Te Kimi ra Ainei Koe i te Akapuanga i ko ia Iehova?

“E akaorā Iehova i te vaerua o tona ra au tavini: kare oki tetai i irinaki iaia ra e akaapaia.”​—SALAMO 34:22.

AU IMENE: 49, 32

EAA TA TE AU OIRE AKAPUANGA E APII MAIRA IA KOE . . .

akapeea te aronga pakari me tauturu i tetai tei rave i te ara kino?

eaa ta tatou ka anoanoia kia rave kia rauka te aroa ua o te Atua?

akapeea a Iehova te akakore takiri anga i taau ara?

1. No runga i te ara, eaa te manako o te maata anga o te au tavini tiratiratu o te Atua?

“AUE oki au ko te tangata mate maata e!” i tata ei te apotetoro ko Paulo. (Roma 7:24) I teia rā, e maata te au tavini tiratiratu o te Atua e paruparu nei e te taitaia mei ia Paulo rai. Eaa te tumu? No te mea noatu te inangaro ra tatou i te akamareka ia Iehova, kua iri mai te ara e e aronga ara pouroa tatou. No reira ka manako kino tatou me kare e rauka ia tatou te akamareka iaia. Kua manako katoa etai Kerititiano tei rave i te ara kino e kare rava Iehova e akakore ia ratou.

2. (a) Akapeea a Salamo 34:22 te akaari anga e kare te au tavini o te Atua e anoanoia kia taomiia e te manako apa ua? (e) Eaa ta tatou ka apii i teia atikara? (Akara i te pia “Au Apiianga me e au Aiteanga Akatutu?”)

² Te akapapu maira te au Tuatua Tapu e me aere tatou ki te akapuanga o Iehova, kare tatou e anoanoia kia taomiia e te tu apa ua. (E tatau ia Salamo 34:22.) Inara eaa te aiteanga kia aere ki te akapuanga o Iehova? Eaa ta tatou ka rave me ka inangaro tatou ia Iehova kia tangi mai ia tatou e kia akakore ia tatou? Ka kitea e tatou te pauanga ki taua uianga na te apiianga i te au akanoonooanga o te oire akapuanga i Iseraela taito. Kua vai te reira akanoonooanga i raro ake i te koreromotu Ture, tei tupauia ia Penetekote mataiti 33. Inara no ko mai ia Iehova te Ture. No reira, mei te akanoonooanga o te au oire akapuanga, ka apii tatou eaa to Iehova manako i te ara, te aronga ara, e te aronga tei tataraara. Te mea mua, ka akara tatou te tumu e au oire akapuanga to Iseraela e akapeea te reira te angaanga anga.

“KA AKATAKA ANA I TE OIRE AKAPUANGA NO KOTOU”

3. Eaa ta te ngati Iseraela ka rave ki taua tā tangata ra?

³ Me mate tetai tangata e manamanata tikai ana a Iehova. Me tamate tetai o te ngati Iseraela i tetai tangata, na te kopu tangata vaitata roa atu o tei mate ra, tei kapikiia ko “te akamo[u]puku” e tamate i taua tā tangata ra. (Numero 35:19) Na tera tu, ka tutaki taua tā tangata ra ki tona uaorai oraanga no tei tamate aia i tetai tangata kare ona apa. Me kare taua tā tangata ra i tamate vivikiia, ka taeroia te Enua Taputouia, e kare e tu tapu akaou. Akaue a Iehova e: “Auraka kotou e akaviivii i te enua ta kotou e noo ra” na te akataʼeanga i te toto, te tamate anga i tetai.​—Numero 35:33, 34.

4. Eaa tei tupu me tamate anoano kore tetai o te ngati Iseraela i tetai tangata?

⁴ Eaa tei tupu me tamate anoano kore tetai o te ngati Iseraela i tetai tangata? Noatu e e mate anoano kore te reira, kua apa rai aia te tamateanga i tetai tangata kare ona apa. (Genese 9:5) Inara i teia turanga, karanga a Iehova e kia tangi aroaia aia. Ka rauka i taua tā tangata kite kore ra i te oro ke mei te akamoupuku toto ra e ka oro ki tetai o te au oire akapuanga e ono. Me akatikaia aia kia noo ki roto i te reira oire, ka paruruia aia. Inara kia noo tamou aia ki roto i te oire akapuanga e tae ua atu ki te mateanga o te taunga maata.​—Numero 35:15, 28.

5. Eaa ra te akanoonooanga o te au oire akapuanga te tauturu anga ia tatou kia mārama meitaki atu ia Iehova?

⁵ Kare no te tangata teia manako no te akanoonooanga o te au oire akapuanga. No ko mai te reira ia Iehova. Kua akaue aia ia Iosua: “E karanga atu koe ki te tamariki a Iseraela, e na ko atu, Ka akataka ana i te oire akapuanga no kotou.” “Akataka[ia] atura” teia au oire. (Iosua 20:1, 2, 7, 8) Kua manako a Iehova kia akataka keia teia au oire. No reira mei teia au akanoonooanga, ka apii maata atu tatou no runga ia Iehova. Ei akaraanga, ka mārama meitaki atu tatou i to Iehova tu tangi aroa. E te apii maira ia tatou akapeea tatou te oroanga ki te akapuanga o Iehova i teia tuatau.

“KA AKAKITE EI I TANA TUATUA” KI TE ARONGA PAKARI

6, 7. (a) E akataka mai i te tuanga a te aronga pakari te akavaanga i taua tā tangata kite kore ra. (Akara i te tutu mua.) (e) No teaa i pakari ei no tetai tuitarere kia tuatua ki te aronga pakari?

⁶ Me tamate anoano kore tetai o te ngati Iseraela i tetai tangata, ka anoanoia aia kia oro ki te oire akapuanga “ka akakite ei i tana tuatua” ki te aronga pakari i ko i te ngutupa tomo anga o te oire. Ka anoanoia te aronga pakari kia āriki iaia. (Iosua 20:4) No tetai tuatau i muri mai, ka akaoki ratou iaia kia akavaia e te aronga pakari o te oire tei tupu te tā anga ki reira. (E tatau ia Numero 35:24, 25.) Me iki taua aronga pakari e e mate anoano kore te reira, ka akaoki i reira ratou i te tuitarere ki te oire akapuanga.

⁷ Eaa ra te tuitarere i anoanoia ai kia tuatua ki te aronga pakari? Ka akapapu meitaki te aronga pakari kia vai mā ua te putuputuanga o Iseraela e ka tauturu i taua tā tangata kite kore ra kia puapinga mei te tu tangi aroa o Iehova. Tata tetai tangata tata Pipiria e me kare te tuitarere e aere ki te aronga pakari, ka tamateia aia. Karanga katoa aia e no te tuitarere rai te apa me mate aia no te mea kare aia i rave ana i ta te Atua i akaue kiaia. Kua anoanoia taua tā tangata kite kore ra kia pati tauturu e kia āriki i te reira e ora ai. Me kare aia e aere ki tetai o te au oire akapuanga, ka rauka ua i te kopu tangata vaitata o te tangata tana i tā kia tamate iaia.

8, 9. No teaa ra tetai Kerititiano tei rave i te ara kino ka tuatua ai ki te aronga pakari?

⁸ I teia tuatau, me rave tetai Kerititiano i te ara kino ka anoanoia aia kia aere ki te aronga pakari kia tauturu ratou iaia kia rauka tetai pirianga meitaki kia Iehova. Eaa teia i puapinga ai? Te mea mua, na Iehova i akanoo i te aronga pakari kia akava i te au ara kino. (Iakobo 5:14-16) Te rua, te vaira te aronga pakari ei tauturu i te aronga ara tei tataraara kia marekaia e te Atua e kia kore e rave akaou i ta ratou ara. (Galatia 6:1; Ebera 12:11) Te toru, kua akatikaia e kua tereniia te aronga pakari kia akamaroiroi i te aronga ara tei tataraara e kia tauturu i te akamaru i to ratou mamae e te apa. Kapiki a Iehova i teia aronga pakari “mei te pipinianga i te matangi maata ra.” (Isaia 32:1, 2) Ko teia tetai mataara ta te Atua akaari anga kia aroa ua ia tatou.

⁹ E maata te au tavini o te Atua tei kite i te maru na te tuatuaanga ki te aronga pakari e te rauka anga te tauturu. Ei akaraanga, kua rave tetai taeake ko Daniel i te ara kino, inara no tetai tuatau roa kare aia i aere ana ki te aronga pakari. Karanga aia: “No tetai tuatau i topa, manako au kare e rauka akaou i te aronga pakari i te tauturu iaku.” Noatu ra, kua mataku aia te openga e kitea mai tana ara e tetai, e kua manako i te akamata i tana pure tataki tai ma te tataraapa kia Iehova. I te openga, kua pati tauturu aia ki te aronga pakari. Te akamanakoanga, karanga aia: “Ae, kua mataku rai au te aere kia ratou. Inara i muri mai, mei te mea atura kua maranga tetai teiaa maata mei toku nga pakuivi.” Kua rauka akaou ia Daniel i te tuatua va ua kia Iehova. I teianei e akava ngakau mā tona, e koi riro ua akera aia ei tavini tauturu.

“E ORO I TETAI O AUA NGA OIRE RA”

10. Kia akakoreia te apa, eaa ta te tā tangata kite kore ra ka anoanoia kia rave?

¹⁰ Kia akakoreia te apa, e mea rapurapu no taua tā tangata kite kore ra kia oro ki te oire akapuanga vaitata roa atu. (E tatau ia Iosua 20:4.) Tei runga tona oraanga i te taeanga ki te oire e kia noo ki reira e mate ua atu te taunga maata. E akaatinga anga teia ki te tuitarere. Ka anoanoia aia kia akaruke i tana angaanga, tona kainga meitaki, e tana teretere anga.a (Akara i te tataanga rikiriki i raro.) (Numero 35:25) Inara kua tau kia rave aia i te reira. Me akaruke aia i te oire i tetai ua atu taime, te akaari ra te tuitarere e kare ana manako anga e kua tamate aia i tetai tangata, e ka rokoia aia e te tumatetenga.

11. Akapeea tetai Kerititiano tei tataraara te akaari anga e te akameitaki tikai ra aia i te tu tangi aroa o te Atua?

¹¹ Kia rave katoa te tangata ara tei tataraara i tetai au mea kia akakoreia e te Atua. Kia akamutu aia i tana au ara. Kapiti mai te kopaeanga i tetai ua atu mea te ka taki atu ki te au ara kino. Akataka te apotetoro ko Paulo i ta te au Kerititiano i tataraara i Korinetia i rave. Tata aia: “I te mea i tau to kotou aue i te Atua ra ko te akono meitaki oki ta te reira i akatupu i roto ia kotou na, e te akatika ia kotou uaorai, e te kinokino, e te mataku, e te anoano maata tikai, e te maroiroi, e te tutaki!” (2 Korinetia 7:10, 11) No reira me rave tatou i te ka rauka na te akamutu anga i te ara, ka akaari tatou kia Iehova e te manako tikai ra tatou i te turanga e kare e manako ua e te tangi maira aia ia tatou.

12. Eaa ta tetai Kerititiano penei ka anoanoia kia akaruke kia rauka ua atu to Iehova tu tangi?

¹² Eaa ta tetai Kerititiano penei ka anoanoia kia akaruke kia rauka ua atu te aroa ua o te Atua? Kia papa ua aia i te akaruke i te au mea tana i reka ana me ka akatupu te reira iaia kia rave i te ara. (Mataio 18:8, 9) Ei akaraanga, me akakeu toou au oa ia koe kia rave i te au mea te ka akamareka kore ia Iehova, ka akamutu ainei koe i te piri atu kia ratou? Me e ngata ia koe te akatere te maata i taau kava ka inu, ka kopae ainei koe i te au turanga te ka timata ia koe kia inu maata? Me e ngata ia koe te akatere i toou au anoano ainga tau kore, ka kopae ainei koe i te au teata, te au website, me kore angaanga te ka akakeu i toou manako viivii? Akamaara, ka pauna tetai ua atu atinga me akarongo tatou ki te au ture a Iehova. Kare e apinga tei kino roa atu me akarukeia tatou e Iehova. Kare e apinga tei meitaki atu i to Iehova “aroa mutu kore.”​—Isaia 54:7, 8.

“EI AKAPUANGA TEI REIRA NO KOTOU”

13. Akamārama mai, eaa ra tetai tuitarere ka noo meitaki ei, ma te tinamou, e te mataora i roto i te oire akapuanga.

¹³ Me tae te tuitarere ki roto i te oire akapuanga, kua ora aia. Karanga a Iehova no runga i teia au oire: “Ei akapuanga tei reira no kotou.” (Iosua 20:2, 3) Kare a Iehova i umuumu ana kia akava akaouia te tuitarere. Pera katoa, kare te akamoupuku toto e akatikaia kia tomo ki roto i te oire kia tamate iaia. Me tae te tuitarere ki roto i te oire, kua ora aia i raro ake i te paruru anga a Iehova. Kare aia i roto i te areauri. Ka rauka iaia i te angaanga, te tauturu i tetai ke, e te tavini ia Iehova ma te ‘au. Ae, ka rauka iaia tetai oraanga mataora e te merengo ua!

14. Eaa te akapapu anga ki tetai Kerititiano tei tataraara?

¹⁴ Noatu i muri ake i te tataraara anga, ka manako apa ua rai tetai pae o te iti tangata o te Atua tei rave i te au ara kino. Manako etai pae e kare rava a Iehova e akangaropoina i ta ratou i rave. Me te manako akapera ra koe, kia akapapuia e me akakore a Iehova ia koe, ka rave aia ma te ngakau tae. Kare koe e anoanoia kia manako apa akaou. Ko teia tei tupu kia Daniel, tei taikuia i te akamataanga. I muri ake te akatikatika anga te aronga pakari iaia e kua tauturu kia rauka te akava ngakau meitaki akaou, kua kite aia i te akapuanga. Karanga aia: “Kare au i anoanoia kia manako apa akaou. Me ngaro te ara, kua ngaro rai. Mei ta Iehova i karanga, ka apai ke aia i toou taitaia ki te ngai mamao. Kare rava koe e kite akaou i te reira.” E i muri ake me tae te tuitarere ki roto i te oire akapuanga, kare aia e anoanoia kia mataku e ka aere mai te akamoupuku toto i te tamate iaia. Ma te aiteite, i muri ake i to Iehova akakoreanga i ta tatou ara, kare tatou e mataku e ka taiku akaou aia i te reira me kore ka akautunga ia tatou.​—E tatau ia Salamo 103:8-12.

15, 16 Akapeea te reira te akaketaketa anga i toou irinaki ki roto i te tu tangi o te Atua te kite anga e kua tutaki a Iesu i te atinga oko e e Taunga Maata aia no tatou?

¹⁵ Te tika, e tumu maata atu ta tatou i ta te ngati Iseraela kia irinaki i te tu aroa ua o Iehova. I muri ake i to Paulo karanga anga “aue oki au” no te mea kare i rauka iaia te akarongo apa kore kia Iehova, i tuatua ai aia: “E akameitaki au i te Atua i te mea e ora i to tatou Atu ra ia Iesu Mesia.” (Roma 7:25) Eaa te aiteanga i tana tuatua? Noatu e kua tamaki ana a Paulo i te au anoano ara ua e kua ara i te tuatau i topa, kua tataraara rai aia. No reira kua irinaki aia e kua akakore a Iehova iaia tei akatumuia ki runga i te atinga oko o Iesu. No te mea kua tutaki a Iesu i te atinga oko, ka rauka ia tatou te akava ngakau mā e te ‘au. (Ebera 9:13, 14) Ei Taunga Maata no tatou, “e tika meitaki rava atu [ia Iesu] kia akaora i te aronga e na reira atu iaia ra i te aere ki te Atua ra, e tika oki aia i te ora anga e tuatau ua atu ei pati i ta ratou.” (Ebera 7:24, 25) I te tuatau taito, kua tauturu te taunga maata i te ngati Iseraela kia papu e kua akakore a Iehova i ta ratou ara. Ma Iesu ei Taunga Maata no tatou, e tumu anga maata atu to tatou kia papu “e kia rauka te meitaki ei tauturu mai ia tatou i te tuatau e tau ei ra.”​—Ebera 4:15, 16.

¹⁶ No reira, kia rauka te akapuanga i ko ia Iehova, ka anoanoia tatou kia rauka te akarongo ki roto i te atinga o Iesu. Auraka e manako e ka tau ua te atinga oko no te tangata ua nei. E akatupu i te akarongo kia puapinga koe mei te atinga oko. (Galatia 2:20, 21) E akatupu i te akarongo no te atinga oko, ka akakore a Iehova i taau au ara. E akatupu i te akarongo e ka oronga mai te atinga oko i te manakonakoanga kia koe kia ora e tuatau ua atu. E apinga aroa to Iesu atinga oko no ko mai ia Iehova kia koe!

17. Eaa koe ka inangaro ei i te kimi i te akapuanga i ko ia Iehova?

¹⁷ Ka riro te au oire akapuanga ei tauturu ia tatou kia mārama i to Iehova tu tangi. Ka riro teia akanoonooanga no ko mai i te Atua ei apii ia tatou e mea tapu te oraanga. Te akaari katoa maira akapeea te aronga pakari te tauturu anga ia tatou, e te aiteanga tikai kia tataraara, e no teaa tatou ka papu meitaki ei e ka akakore takiri a Iehova ia tatou. Te kimi ra ainei koe i te akapuanga i ko ia Iehova? Kare atu e ngai meitaki mei teia! (Salamo 91:1, 2) I te atikara ka aru mai, ka kite tatou akapeea te au oire akapuanga te tauturu anga ia tatou kia aru ia Iehova, koia te akaraanga maata rava atu no te tu tika e te tangi aroa.

[Tataanga Rikiriki i Raro]

[Pia i te kapi 14]

TETAI AU TUATUA I URIURIIA

Me kua ara kino tatou, ka rauka te akapuanga i ko ia Iehova na te tataraara anga e te kimi tauturu anga na roto i te aronga pakari. Ka irinaki tatou e ka akakore takiri a Iehova ia tatou e te vaira te atinga oko o Iesu no tatou tikai. I reira e rauka ai te akava ngakau mā ma te mataora

Te tā tangata kite kore ra: E tangata tei tamate anoano kore i tetai

[Pia i te kapi 10]

Au Apiianga me e au Aiteanga Akatutu

Akamārama The Watch Tower o Tepetema 1, 1895, e aiteanga akatutu to te au oire akatutuanga. Kua karangaia e te akatutu ra te reira i te “akapuanga te ka kitea e te tangata ara na roto ia Karaiti.” Karanga katoa te reira e ka paruruia tetai tangata me e akarongo tona ki roto ia Iesu. Okotai anere mataiti i muri mai, karanga The Watchtower e te akatutu ra te au oire akapuanga i ta te Atua paruru anga ia tatou mei te mate, no te mea kua aati tatou i tana akauenga no te toto.

Inara kua akamārama Te Punanga Tiaki o Mati 15, 2015, te tumu kare ta tatou au puka e taiku putuputu ana i te au tu e te au akatutu, me kore te au aiteanga akatutu o te au papaanga Pipiria: “Me apii mai te au Tuatua Tapu e te akatutu maira tetai tangata, akakoroanga, me kore apinga i tetai mea te ka tupu a tetai tuatau ki mua, ka āriki ua tatou i taua akamāramaanga. Tera ra, auraka tatou e rave i te akatutuanga no runga i tetai tua Pipiria me kare te reira e akatumuia ki runga i te au Tuatua Tapu.” Kare te au Tuatua Tapu e karanga ra e ka akatutu te au oire akapuanga i tetai mea maata atu a te tuatau ki mua. Te tumu te reira ka akakite atu teia atikara e te ka aru mai i te au apiianga ta te au Kerititiano ka apii no te au oire.

[Tutu i te kapi 13]

E irinaki e ka akakore a Iehova i taau ara (Akara i te parakarapa 14-16)