Tavinianga Ei Karere o te Au Tu Atua

“Te manea o te vaevae o te karere ki runga i te maunga . . . o tei tutu aere i te au ra.”​—ISAIA 52:7.

1, 2. (a) Mei tei totouia maira ia Isaia 52:7, eaa te tuatua meitaki te ka akakiteia? (e) Eaa te aite anga o ta Isaia au tuatua totou ki to Iseraela i taito ra?

E TUATUA meitaki tetai kia akakitekiteia! E tuatua ia no te au​—te au tikai. Ko te tuatua ia no te ora tei kapitiia atura ma te Patireia o te Atua ra. Kua tata te peroveta ko Isaia i te reira i te tuatau roa kua topa ra, e kua akaoraia mai tana au tuatua na tatou ia Isaia 52:7, i te ngai ta tatou ka tatau: “Te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai mai i te tuatua meitaki ra, o tei tutu aere i te ora ra; o tei tuatua mai kia Ziona, Tei to Atua ra te au!”

² Kua akauru a Iehova i tana peroveta ia Isaia kia tata i taua tuatua ra ei puapinga no Iseraela i taito ra e ei puapinga oki no tatou i teia tuatau nei. Eaa te aite anga o te reira? I te tuatau i tataʼi a Isaia i taua au tuatua ra, penei kua riro ke atu te patireia apatokerau o Iseraela ki roto i te tu tuikaaanga ki to Asura ra. I muri iora, kua raveia atu te au tangata o te patireia apatonga o Iuda ei tuikaa ki Babulonia. E mamae ngakau e te taitaia taua au ra ra ki te iti tangata no te akarongo kore o te au tangata ra kia Iehova e no reira kare i au ana ma te Atua ra. Mei ta Iehova i akakite atura kia ratou, te akatupu ra to ratou tu rave ara i tetai ke anga i rotopu ia ratou e to ratou Atua. (Isaia 42:24; 59:2-4) Inara, na roto ia Isaia, kua totou a Iehova e kia tae te tuatau ka tuera ua te au pa o Babulonia ra. Ka rauka ua i te au tangata o te Atua ra i te oki atu ki to ratou enua kainga, ei reira e patu akaou ei i te iero o Iehova ra. Ka akaora akaouia a Ziona, e ka rave akaouia te akamori anga i te Atua mou ra ki Ierusalema.​—Isaia 44:28; 52:1, 2.

3. Akapeea te taputou no te akaora anga i to Iseraela ra i riro ei ei totou katoa no te au?

³ Ko teia taputou no te akaora anga e totou katoa oki no te au. Ka riro te akaora akaou anga ki te enua ta Iehova i oronga ra ki to Iseraela ei akapapu anga i to te Atua aroa ua e no to ratou tataraara anga oki. Ka akakite te reira e te au ra ratou ma te Atua katoa ra.​—Isaia 14:1; 48:17, 18.

“Tei To Atua ra te Au!”

4. (a) Na teea tu i tau ei kia tuatuaia i te 537 M.T.N. e kua ‘riro ia Iehova te au’? (e) Akapeea ta Iehova ra akatanotano anga i te au apinga ei puapinga no tona au tangata i te au mataiti i muri iora?

⁴ I ta Iehova rave anga i teianei akaora anga i te 537 M.T.N., kua tau tikai te akakite anga kia raveia ki to Ziona: “Tei to Atua ra te au!” E tika tikai ko Iehova te “Ariki mutu kore.” (Apokalupo 15:3, NW) Inara ko teianei akaora anga i tona au tangata e akakite anga ou ia i tona ngateitei. Na roto i tetai tu taka meitaki, kua akakite mai te reira i te turanga teitei o tona mana ki runga ake i te patireia mana tangata tae roa mai ki te reira tuatau. (Ieremia 51:56, 57) Ei tupu anga no te angaanga a to Iehova ra vaerua, kua puapinga kore ua etai atu au patoi anga i tona au tangata ra. (Esetera 9:24, 25) Kua rave taokioki akaouia ta Iehova ra rave anga na roto i etai au tu tuketuke kia akariro i te au ariki o Madai e Peresia kia taokotai atu i te raveanga i tona uaorai anoano ngateitei. (Zekaria 4:6) Kua tataia te au tupu anga umere i taua au ra ra no tatou ki roto i te au puka Pipiria ia Ezera, ia Nehemia, ia Esetera, ia Hagai, e ia Zekaria. E mei teaa ra te akamaroiroianga i te akarongo kia akamanako akaou atu i te reira au puka!

5. Eaa te au tupu anga puapinga maata tei akakiteia maira ia Isaia 52:13–​53:12?

⁵ Inara, ko tei tupu mai i te 537 M.T.N. e i muri akera e akamataanga ua ia. I muri ua ake i te totou no te akaora anga i te pene 52 ra, kua tata a Isaia i te aereanga mai o te Mesia ra. (Isaia 52:13–​53:12) Na te Mesia, tei akapapuia maira e ko Iesu Karaiti ia, ka oronga mai a Iehova i te tuatua no te akaora anga e te au oki tei maata atu tona puapinga i tei tupu maira i te 537 M.T.N.

Ta Iehova Karere Maata Rava no te Au

6. Koai ta Iehova karere maata rava no te au, e eaa te angaanga tana i akapiri atu kiaia uaorai?

⁶ Ko Iesu Karaiti ta Iehova karere maata rava no te au. Koia te Tuatua a te Atua, ta Iehova uaorai Vaa Tuatua tikai. (Ioane 1:14) Kia tau ma teianei, i tetai tuatau i muri ake i tona papetito angaia i te Kauvai i Ioridana ra, kua tu mai a Iesu i roto i te Tunako i Nazareta ra e kua tatau maata maira i tana angaanga mei roto mai ia Isaia pene 61. Kua akataka meitaki mai taua angaanga ra e kua tonokia mai aia kia tutu aere i “te matara anga,” e te “ora anga,” pera katoa oki te tuatau kia kitea mai te ariki anga ma Iehova ra. Inara, e maata atu ta Iesu i rave ana i te tuatua anake ua i te tuatua no te au ra. Kua tono katoa mai te Atua iaia kia oronga mai i te tumu anga no te au tinamou ra.​—Luka 4:16-21, NW.

7. Eaa te ka tupu mei te au ma te Atua ra te ka rauka mai na roto ia Iesu Karaiti?

⁷ I te tuatau i anau mai ei a Iesu, kua mama atu te au angera ki te au tiaki mamoe i te pae mai i Betelehema, ma te akapaapaaanga i te Atua e te na ko anga: “Kia akakakāia te Atua i runga i te rangi teitei, e ei au to to teianei ao, e kia kite aroaia mai te tangata nei.” (Luka 2:8, 13, 14) Ae, ka tupu te au no te aronga ta te Atua ka akaari atu i te aroa no to ratou akono i te akarongo i te mea orongaia mai e ia ra na roto i tana Tamaiti. Eaa te aite anga o te reira? Ko te aite anga e noatu rai e i anauia mai te au tangata i roto i te ara, ka rauka ia ratou tetai turanga ma ma te Atua ra, koia oki tetai pirianga marekaia ma ia katoa ra. (Roma 5:1) Ka rekareka ratou i te maru no roto roa, koia oki te au, te ka kore e rauka mai i tetai ua atu mataara ke. I ta te Atua ra tuatau i akatakaia, ka rauka mai tetai matara anga mei te au tupu anga no te ara katoatoa tei akatuangaia maira mei ia Adamu, kapiti katoa oki te maki e te mate. Kare te au tangata e matapo me kare e taringa turiia me kare e pirikokiia. Te au tu paruparu tamanata e te au tu manako apikepike tei akaatingakau ra ka takore takiriia atu ia. Ka rauka kia rekareka i te oraanga apa kore ua e tuatau ua atu.​—Isaia 33:24; Mataio 9:35; Ioane 3:16.

8. Te orongaia ra te au tu Atua kiaai ma?

⁸ Te orongaia nei te au tu Atua kiaai ma? Te orongaia nei te reira ki te aronga katoatoa te ka akono i te akarongo ia Iesu Karaiti ra. Kua tata te apotetoro ko Paulo e ‘e mea meitaki oki i te Atua e, ei roto ia Karaiti te ki o te au mea katoa nei e vai atu ei; na roto i te toto akamaringiia o Iesu i runga i te rakau tamamae anga.’ Kua kapiti katoa atu te apotetoro ra e ko teia akaongi anga ka kapiti katoa i “to te rangi”​—koia oki, te aronga e tuanga ma Karaiti i te rangi ra. Ka kapiti katoa mai “to te enua nei oki”​—koia oki, te aronga te ka akaperepereia ma te tika kia ora e tuatau ua atu ki runga i te enua nei me tae ia ki te turanga ki katoa o te Parataito. (Kolosa 1:19, 20) No to ratou akapapaanga ia ratou uaorai no te puapinga o to Iesu ra atinga e no to ratou akarongo ki te Atua mei te ngakau maira, pouroa ratou ka rauka kia rekareka i te oa anga ma te Atua ra.​—Akaaite ia Iakobo 2:22, 23.

9. (a) Eaa etai atu au pirianga te mana ra te au ma te Atua? (e) Ma te manako anga kia tupu te au mutu kore ki te au ngai ravarai, eaa te mana ta Iehova i oronga ki tana Tamaiti?

⁹ Mei teaa ra te puapinga maata taua au ma te Atua ra! Me kare te au ma te Atua katoa ra, kare e rauka tetai au tinamou me kare tau tikai i tetai ua atu pirianga ke ra. Ko te au ma Iehova ra ko te pange ia no te au mou ki runga i te enua nei. (Isaia 57:19-21) E tau tikai i reira, ko Iesu Karaiti te Ariki no te Au. (Isaia 9:6) Kua oronga katoa a Iehova i te mana tutaraanga ki aia na roto mai iaia e raukaʼi i te au tangata nei te akaongi anga ki te Atua ra. (Daniela 7:13, 14) E no runga i te au tupu anga o to Iesu ra tutara anga ei ariki ki rungao i te au tangata nei, kua taputou maira Iehova: “Kare e mutu te tupu anga o tona ra basileia, e tona au.”​—Isaia 9:6; Salamo 72:7.

10. Akapeea ta Iesu akanoo anga i tetai akatauanga i te tutu aereanga i ta te Atua ra tuatua no te au?

¹⁰ Te umuumuia ra e te au tangata ravarai ta te Atua ra tuatua no te au. Kua akanoo maira a Iesu i tetai akaraanga maroiroi i te tutuanga i te reira. Kua rave aia i te reira i te ngai o te iero i Ierusalema ra, i te pae maunga ra, i te arataa, ki tetai vaine Samaria i tetai rua vai ra, e i te au kainga o te au tangata ra. I tetai ua atu ngai e au tangata etai i reira, kua kimi a Iesu i te au tuatau kia tutu no te au e te Patireia oki o te Atua ra.​—Mataio 4:18, 19; 5:1, 2; 9:9; 26:55; Mareko 6:34; Luka 19:1-10; Ioane 4:5-26.

Akamatauia kia Aaere i to Karaiti Au Tapuae

11. Eaa te angaanga ta Iesu ra i apii atu i tana au pipi?

¹¹ Kua apiiia e Iesu tana au pipi kia tutu aere i ta te Atua ra tuatua no te au. Mei ia Iesu i riro ra ei “te kite mou e te tuatua-mou” no Iehova ra, kua kite ratou e e apainga katoa ta ratou kia akakitekite aere. (Apokalupo 3:14; Isaia 43:10-12) Kua akara atu ratou kia Karaiti ei Arataki no ratou ra.

12. Akapeea ta Paulo akakite anga i te puapinga maata o te angaanga tutu aere?

¹² Kua akamanako ana te apotetoro ko Paulo ki runga i te puapinga maata o te angaanga tutu aereanga, i te na ko anga: “Te tuatua maira oki te tuatua i tataia ra e, ‘Ko tei akarongo iaia ra, kare anake ïa e akama.’” Koia oki kare e taitaia tetai tei akono ra i te akarongo ia Iesu Karaiti koia to Iehova Rima Rave no te ora. E kare te tu o tetai ua atu tangata ke ra e riro ei tumu akakore iaia, no te mea kua tuatua katoa a Paulo: “Kare rava oki e tu ke te ngati Iuda e te Eleni; e takinga-meitaki maata oki to te Atu o te au mea katoatoa nei, i te tangata ravarai e kapiki atu kiaia ra. Ko te kapiki oki i te ingoa o [“Iehova,” NW] ra, e ora ïa.” (Roma 10:11-13) Inara akapeea te au tangata e kite ei i taua tika anga ra?

13. Eaa tei umuumuia kia akarongo ei te au tangata i te tuatua meitaki ra, e i akapeea ta te au Kerititiano ra rave anga i taua umuumu anga ra?

¹³ Kua akono a Paulo i taua umuumu anga ra na te uianga i te au ui anga te tau ra te au tavini takitai o Iehova ra kia tamanako. Kua ui te apotetoro ra e: “Eaa ua ra te tangata e tikaʼi kia kapiki atu kiaia i tei kore i akarongoia e ratou ra? e eaa oki ratou e tikaʼi kia akarongo iaia i tei kore i kitea e ratou ra? e eaa oki ratou e kite ei i te akakite kore? Eaa oki ratou e tikaʼi kia akakite kia kore ratou e ungaia?” (Roma 10:14, 15) Te oronga ra te tataanga no te akonoanga Kerititiano mua ra i tetai akakite anga meitaki e ko te au tangata e te au vaine, te aronga ou e te ruaine, kua akarongo i te akatauanga tei akanooia ra e Karaiti e tana au apotetoro ra. Kua riro ratou ei aronga maroiroi i te akakitekite i te tuatua meitaki ra. I te aru anga ia Iesu, kua tutu atu ratou ki te au tangata i te au ngai ta ratou i aravei atura ia ratou. Ma te anoano oki kia kore tetai e kopae keia, kua rave ratou i ta ratou angaanga orometua i te ngai tangata e mei tera are ki tera are.​—Angaanga 17:17; 20:20.

14. Akapeea te akapapu anga e tika e ko “te vaevae” o te aronga tutu aere i te tuatua meitaki ra e “manea”?

¹⁴ Inara, kare te katoatoa i ariki takinga meitaki atu i te au Kerititiano tutu aere ra. Inara, kua tika ta Paulo i taiku maira mei ia Isaia 52:7. I muri ake i te uianga, ‘Eaa oki ratou e tikaʼi kia akakite kia kore ratou e ungaia?’ kua tuatua katoa aia: “Koia oki tei tataia ra e, ‘Ko te manea o te vaevae o te aronga i apai mai i te tuatua reka o te au, ko te apai mai i te evangelia o te meitaki ra e!’” Ko te maata anga o tatou kare e manako ana i to tatou vaevae e e meitaki, me kare e manea. E no reira, eaa te aite anga o teia? Ko nga vaevae te apai aere ra i te tangata i tona aere anga kia tutu atu kia etai ke ra. Ko aua nga vaevae ra te komono tika ra i taua tangata ra. E ka papu ia tatou e ki te aronga e manganui tei akarongo ra i te tuatua meitaki no ko mai i te au apotetoro ra e etai atu aronga ke o te au pipi a Iesu Karaiti i te anere mataiti mua ra, kua riro tikai teia au Kerititiano mua ra ei tetai akara anga manea. (Angaanga 16:13-15) E maata oki i te reira, e aronga oko maata katoa oki ratou ki mua i te aroaro o te Atua ra.

15, 16. (a) I akapeea ta te au Kerititiano mua ra akakite anga e e karere tikai ratou no te au? (e) Eaa te ka tauturu ia tatou kia rave i ta tatou angaanga orometua na te mataara tei raveia ra e te au Kerititiano o te anere mataiti mua ra?

¹⁵ E tuatua no te au ta te au pipi a Iesu ra, e kua rave ratou i te reira na roto i te tu ponuiaau. Kua oronga atura a Iesu i teianei ikuiku anga: “E te are ta kotou e tomo ra, e akamata na i te karanga atu, Ei au to teianei ngutuare. E tei reira te tamaiti no te au, e vai rai ta kotou au ra i rungao iaia: kare ra, ka oki akaou mai ïa ki rungao ia kotou.” (Luka 10:5, 6) Sha·lohmʹ, me kare “e au,” ko tetai tuatua ngati Iuda aravei anga matauia ia. Inara, e maata atu i teia tei kapitiia maira i roto i ta Iesu au ikuiku anga. Ei au ‘karere na te Mesia,’ kua raurau tana au pipi akatainuia ra i te au tangata: “E akaongi kotou i te Atua.” (2 Korinetia 5:20) Kia rotai ma ta Iesu ra au apiianga, kua tuatua ratou i te Patireia o te Atua ki te au tangata ra e eaa ta te reira ka rave no ratou tataki tai. Kua rauka te akameitakianga i te aronga tei akarongo atura; e ko te aronga tei kopae ke ra i te tuatua kua ngere ratou.

¹⁶ Te rave nei te Au Kite o Iehova i ta ratou angaanga orometua na roto i taua tu rai i teia tuatau. Kare te tuatua meitaki ta ratou e rave atu ki te au tangata na ratou uaorai; na Tei unga atura ia ratou. Ta ratou angaanga e tua aere i te reira. Me ariki mai te au tangata i te reira, te tuku ra ratou ia ratou uaorai kia papa no te au akameitakianga meitaki roa. Me ka kopae ke ratou i te reira, te kopae ke ra ratou i te au ma te Atua ko Iehova e tana Tamaiti oki, koia a Iesu Karaiti.​—Luka 10:16.

Ponuiaau i Roto i Tetai Ao Oripu Ua

17. Noatu rai me ka aravei atu i te aronga aviri maira, akapeea ta tatou akono tau ia tatou uaorai, e no teaa ra?

¹⁷ Noatu rai eaa te tu akono o te au tangata ra, e mea puapinga maata no te au tavini o Iehova kia tamou ki roto i to ratou manako e e au karere ratou no te au tu Atua ra. Penei ka taumaro veravera mai te au tangata o teianei ao e ka akakite i to ratou riri na te tuatua anga kokoi me kare na te kapiki avirianga i te aronga tei akariri atura ia ratou. Penei kua rave tetai papaki o tatou i te reira i te tuatau kua topa ra. Inara, me kua kakau tatou i te akatangata ou e kua kore i te tuanga no te ao i teianei, kare tatou e aru i ta ratou au ravenga. (Ephesia 4:23, 24, 31; Iakobo 1:19, 20) Noatu ra eaa te rave anga a etai ke ra, ka akono tatou i te ako anga: “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.”​—Roma 12:18.

18. Eaa te tu akono tau no tatou me e tu riri kia tatou to tetai tangata akava ra, e no teaa ra?

¹⁸ Penei i etai taime no ta tatou angaanga orometua ka apaiia tatou ki mua i te aronga akava. I te akakiteanga i to ratou mana, penei ‘ka pati mai ratou kia tatou’ i tetai akataka anga e eaa tatou ka rave ei i etai au apinga me kare eaa tatou ka kore ei e rave i etai angaanga ke ra. Penei ka anoano ratou kia kite eaa tatou i tutu aere ei i te tuatua ta tatou e rave nei​—ko tei akakite atea ra i te akonoanga pikikaa e tei akakite maira i te openga o te akatere anga o te au mea nei. No to tatou akangateitei i te akatauanga tei akanooia maira e Karaiti ka akakeu ia tatou kia akaari i te tu maru e te akangateitei anga oonu. (1 Petero 2:23; 3:15) E putuputu, taua aronga akava ra te riro ki raro ake i te taomi anga mei ko mai i te au orometua ra me kare mei to ratou uaorai aronga mana taoonga ra. Penei na tetai pauanga maru e tauturu ia ratou kia ariki e kare ta tatou angaanga i tetai akakoko anga kia ratou me kare ki te tu au o te au tangata katoa ra. Na taua tu pauanga ra e akatupu i tetai vaerua ngateitei, taokotai anga, e te au oki ki roto i te aronga tei ariki ra i te reira.​—Tito 3:1, 2.

19. Eaa te au angaanga kare rava te Au Kite o Iehova e o atu ki roto?

¹⁹ Te matauia ra te Au Kite o Iehova i te ao katoa nei ei au tangata kare ra e o atu ki te akatupu anga pekapeka o teianei ao. Kare ratou e o atu ki roto i te au maro anga o teianei ao no te iti tangata, te akonoanga, me kare au poritiki. (Ioane 17:14) No te mea te arataki ra te Tuatua a te Atua ia tatou kia “kauraro marie te tangata katoatoa i te aronga mana taoonga ra,” kare ua tatou e manako kia rave i te au angaanga patoi i te aronga mana kia patoi i te au tukuanga tika a te kavamani ra. (Roma 13:1) Kare te Au Kite o Iehova e piri atu ki tetai ua atu ravenga tei akakoroia ei takore atu i tetai kavamani ra. No te au turanga tei akanooia e Iehova ra no tona au tavini Kerititiano, kare roa ratou e akamanako i te akamaringi toto me kare te ta ua no tetai ua atu tu ra! Kare te au Kerititiano mou e tuatua anake ua i te tu au; te akono ra ratou kia rotai ma ta ratou e tutu aere ra.

20. No te au, eaa te akakite anga ta Babulonia Maata i akakite maira?

²⁰ Ei tuke anga ma te au Kerititiano mou ra, ko te aronga o te au akaaerenga akonoanga o Kerititome kare rava ratou i akapapu ana e e karere ratou no te au. Te au akonoanga o Babulonia Maata​—te au akonoanga o Kerititome e te au akonoanga kare i te Kerititiano e aiteite katoa—​kua akatika ua, kua turu, e kua arataki oki i te au tamaki o te pa enua katoa. Kua akatupu katoa ratou i te takinga kinoanga e pera katoa te ta ua i te au tavini tiratiratu o Iehova ra. No runga ia Babulonia Maata kua akakite maira a Apokalupo 18:24: “E tei roto iaia te toto o te au peroveta, e to te aronga tapu i te kitea anga ia, e to te aronga katoatoa i taia i teianei ao.”

21. Eaa te tu akono a te aronga ngakau tiratiratu e manganui me kite ratou i te tuke o te tu akono o te au tangata o Iehova e ta te aronga te rave ra i te akonoanga pikikaa?

²¹ Kare mei te au akonoanga o Kerititome e te toenga atu o to Babulonia Maata ra, e mana taokotaianga tamou, to te akonoanga mou. Kua tuatua a Iesu Karaiti ki tana au pipi mou ra: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) E aroa te reira tei runga roa atu i te au kotinga o te au pa enua, te au pupu tangata, te au akaaerenga kia puapinga, e te au kotinga kopu te akatataka ke ra i te au tangata i teianei. I to ratou kite anga i teia, e au mirioni ua atu te au tangata i te ao katoa nei te tuatua ra ki te au tavini akatainuia o Iehova e: “Ka aere katoa tatou: kite akenei oki matou e tei ia kotou te Atua.”​—Zekaria 8:23.

22. Eaa to tatou manako no te angaanga tutu aere te vai maira kia raveia?

²² Ei au tangata no Iehova, te rekareka maata ra tatou i tei oti akenei i te raveia, inara kare te angaanga i oti takiri ake. I muri mai i te ruruanga i te ua e te tatanuanga i tana kainga, kare tetai tangata tanutanu e akamutu ua. Ka angaanga ua atu aia, e maata oki me tae ki te take o te tuatau mou ra. Te umuumuia ra te rave tamou anga, e te tauta anga pakari i te tuatau o te mou ra. I teianei tikai te maata nei te mou o te aronga akamori i te Atua mou ra e tere atu i to mua ana. E tuatau teia no te rekarekaanga. (Isaia 9:3) E tika, te rokoia nei tatou e te patoi anga e te au tu manako koreia mai. Ei aronga tataki tai, penei te tauta ra tatou i te akono i tetai maki kino, te au turanga ngata i te ngutuare tangata, me kare te ngere i te pae o te moni. Inara na te aroa ia Iehova e akamaroiroi ia tatou kia akakoromaki. Ko te tuatua na te Atua i oronga mai kia tatou ko tetai apinga ia te umuumuia ra kia akarongo te au tangata. E tuatua te reira no te au. E tika, ko te tuatua ia ta Iesu uaorai i tutu aere ra​—koia te tuatua meitaki o te Patireia o te Atua ra.

Eaa Taau Pauanga?

◻ Eaa te tupu anga o Isaia 52:7 ki rungao ia Iseraela i taito ra?

◻ Akapeea ta Iesu akapapu anga e koia te karere maata rava no te au?

◻ Akapeea ta te apotetoro ko Paulo akapiri anga ia Isaia 52:7 ma te angaanga te raveia nei e te au Kerititiano?

◻ Eaa te o atura ki te raveanga ei au karere no te au i to tatou tuatau nei?

[Au Tutu i te kapi 13]

Mei ia Iesu rai, e au karere te Au Kite o Iehova no te au tu Atua ra

[Au Tutu i te kapi 15]

Ka vai ponuiaau ra te Au Kite o Iehova noatu eaa te tu akono mai a te au tangata ki te tuatua no te Patireia ra