Akataka Keia ei Aronga Akapaapaa Rekareka i te Ao Katoa
“Alelu Ia. Akapaapaa, e te au tavini o Iehova, e akapaapaa i te ingoa o Iehova.”—SALAMO 113:1.
1, 2. (a) Kia rotai ma te Salamo 113:1-3, koai te tau ra no ta tatou akapaapaa anga oraora? (e) Eaa te uianga te tau ra kia uiia?
KO TE Atua ko Iehova Tei Anga Mekameka mai i te rangi e te enua, to tatou Ngateitei i te Ao Katoa e Pini Ua Ake no te mutu kore ua atu. Kua tau tikai aia no ta tatou akapaapaa oraora. Ko te tumu teia i akaue ei a Salamo 113:1-3 ia tatou: “Alelu Ia. Akapaapaa, e te au tavini o Iehova, e akapaapaa i te ingoa o Iehova. Kia akapaapaaia te ingoa o Iehova, i teianei, e e tuatatau ua atu. Mei te itinga mai o te rā e tae ua atu ki tona opunga, kia akapaapaaia te ingoa o Iehova.”
2 Ei Au Kite no te Atua, ka rekareka tatou kia rave i teia. Mei teaa ra te mataora e kare e roaia ka akatupu te Atua ko Iehova i teianei imene rekareka akapaapaa anga ta tatou e imene nei i teia tuatau kia akaki i te enua katoa nei! (Salamo 22:27) Te akarongoia ra ainei toou reo i roto i teianei pupu imene maata i te ao katoa nei? Me koia ia, mei teaa ra te akariro anga a te reira kia mataora koe i te akataka ke mai anga i teianei ao tataka ke e te rekareka kore!
3. (a) Eaa te akariro ra kia taka meitaki te au tangata o Iehova ra, kia tuke? (e) Na teea au tu te akataka ke anga ia tatou?
3 Na to tatou akapaapaaanga ia Iehova te akariro tika ra ia tatou kia taka meitaki, kia tuke. Te tuatua ra tatou e te apii oki ma te tu aiteite e te taangaanga ra i te au ravenga aiteite i te akakite anga i ‘to Iehova ra meitaki maata.’ (Salamo 145:7) Ae, ei au tangata akatapuia no Iehova, kua akataka keia tatou no te angaanga a te Atua ra ko Iehova. Kua tuatua atu te Atua ki tona au tangata akatapuia i taito ra, koia to Iseraela, kia akataka ke mai i to te pa enua koropini ia ratou ra e auraka kia viivii i te au ravenga a taua au pa enua ra. (Exodo 34:12-16) Kua oronga aia ki tona au tangata i te au ture ei tauturu ia ratou kia rave i te reira. Pera katoa oki i teia tuatau nei, kua oronga mai a Iehova kia tatou i tana Tuatua Tapu, koia te Pipiria. Te akakite maira tana apiianga ia tatou e akapeea e raukaʼi kia akataka ke mai i teianei ao. (2 Korinetia 6:17; 2 Timoteo 3:16, 17) Kare ra tatou i akatakaia na te akaatea angaia ki roto i etai ngai mongoka e te au ngai paretenia, o Babulonia Maata ra. I te aruanga i ta Iesu Karaiti akatauanga, e aronga akapaapaa tatou ia Iehova i te ngai tangata ra.
E Aru i Tei Akapaapaa Maata ia Iehova
4. Akapeea ta Iesu akanoo anga i te akatauanga i te akapaapaa anga ia Iehova?
4 Kare rava a Iesu i tapae ke mai i tana akakoroanga kia akapaapaa ia Iehova. E na teia i akataka ke iaia i teianei ao. I te au tunako e i te iero i Ierusalema, kua akapaapaa aia i te ingoa tapu o te Atua. Me i runga i te maunga me kare i te taatai, i te ngai ua e akaputu mai ei te au urupu, kua tutu a Iesu i te au tuatua mou a Iehova ki te au tangata. Kua tuatua aia: “E akameitaki au ia koe, e taku Metua, e te Atu no te rangi e te enua.” (Mataio 11:25) Noatu rai i te timata angaia ki mua ia Ponotio Pilato, kua akakite a Iesu e: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37) Kua ariki a Iesu i te puapinga maata o tana angaanga. I tana ua atu ngai i aere ei, kua akakitekite a Iesu ia Iehova e kua akapaapaa iaia i te ngai tangata ra.
5. Te tuatua ra a Salamo 22:22 noai, e eaa te tu manako tau no tatou?
5 Ia Salamo 22:22, ka kitea e tatou teianei tata anga totou no Tei Akapaapaa Maata ia Iehova: “E akakite au i to ingoa i toku ra au taeake: e akapaapaa au ia koe i roto i te uipa anga ra.” E ia Ebera 2:11, 12, kua tuatua te apotetoro ko Paulo i teia nga irava kua akapiriia atu ki te Atu ko Iesu, e ki te aronga oki ta Iehova i akatapu ra no te kaka i te rangi. Mei iaia katoa ra, kare ratou i akama i te akapaapaa i to Iehova ra ingoa i roto i te putuputuanga ra. To tatou tu manako ainei teia i te au uipaanga a to tatou putuputuanga? Na to tatou rave anga oraora i te au uipaanga, i te manako anga te tuatua e te imene oki, ka akapaapaa ia Iehova. Inara ka akaoti ainei ta tatou akapaapaa anga rekareka ki reira?
6. Eaa te akauenga ta Iesu i oronga ki tana au pipi, e akapeea te aronga inangaro i te marama i te akakaka anga i te Atua?
6 Kia tau ki ta Mataio 5:14-16, kua akaue katoa te Atu ko Iesu i tana au pipi kia akakaka i to ratou marama kia akapaapaa katoaʼi etai atura ia Iehova. Kua tuatua aia: “Ko kotou te mārama o te ao nei. . . . Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.” Ko te aronga inangaro i te marama ka apai mai i te kaka ki te Atua. Te rave ra ainei ratou i teia na te tuatua ua e te rave anga i te au mea meitaki, no te pae kopapa? Kare, mari ra te rave ra ratou i te reira na te akakakaanga taokotai anga ia Iehova ra. Ae, ko te aronga inangaro i te marama ka akatapu ia ratou uaorai ki te Atua e ka riro ei aronga akapaapaa rekareka iaia. Kua rave ainei koe i teianei takainga mataora?
Rekareka no te Akapaapaaanga ia Iehova
7. Eaa ra i rekareka roaʼi te aronga akapaapaa ia Iehova, e eaa ta ratou i rekareka i te ra Penetekote 33 T.N.?
7 Eaa ra te aronga akapaapaa ia Iehova i rekareka maataʼi? No te mea ko te rekareka e ua ia no te vaerua tapu o te Atua. Ia Galatia 5:22, kua tataia te reira ki muri ua ake i te inangaro. Kua akaari mai te au pipi a Iesu i te anere mataiti mua ra i teianei ua no te vaerua o Iehova ra. I te ra o Penetekote 33 T.N., i ta te Atua ra riringi anga mai i tona vaerua ki rungao i te 120 au pipi a Iesu, kua akamata ratou katoatoa i te akapaapaa ia Iehova na roto i te au reo ke ke. ‘Kua va ua iora e kua poitirere rava atura’ te au ngati Iuda akono meitaki tei aere maira ki Ierusalema mei te au enua e manganui. Kua karanga ratou e: “I te akarongo anga atu tatou ia ratou i te tuatua anga mai i te peu taka ke a te Atua i to tatou uaorai nei au reo tikai”! (Angaanga 2:1-11) Eaa te tupu anga no teia tuatua anga umere i te au reo ke ke i te akapaapaaanga ia Iehova? Vaitata e 3,000 ngati Iuda e te au poroteraita ngati Iuda tei ariki i te tuatua meitaki o te Patireia no te Mesia. Kua papetitoia ratou, e kua rauka ia ratou te vaerua tapu, e kua kapiti rekareka atu i to ratou reo ei aronga akapaapaa rekareka no Iehova. (Angaanga 2:37-42) Mei teaa ra te akameitaki anga a te reira!
8. I muri ake ia Penetekote, eaa ta te au Kerititiano i rave ei akatere atu i to ratou rekareka?
8 Kua akakite katoa taua ripoti ra: “E noo tamou iora ratou ra ki roto i te iero ra, i te au rā katoa, ma te inangaro okotai, e te vavaʼi anga i te manga, i tera are, i tera are, kai iora oki ratou i te kai ma te rekareka, e ma te tavaitai ua te ngakau; I te akameitaki anga i te Atua, e ma te kiteia mai e te tangata ravarai. E te aronga i akaoraia ra, kua kapitiia ïa e te Atu i te ekalesia ra, kare e rā i tukua.” (Angaanga 2:46, 47) Na to ratou taokotaianga kapiti ua ainei e te kaikaianga manga i apai mai i te rekareka maata kia ratou? Kare, kua rauka mai to ratou rekareka maata no te akapaapaaanga i te Atua ko Iehova ra i te au ra katoa. E kua tere atu to ratou rekareka i to ratou kite anga i nga tauatini o te aronga tei akarongo ra i ta ratou tuatua no te ora. Mei te reira katoa oki te tu ma tatou i teia tuatau.
Te Aronga Akapaapaa Rekareka i te Pa Enua Katoa
9. (a) I naea e akapeea ta te Atua ra akamata anga kia oronga atu i te tuatau ki to te pa enua katoa kia akarongo i tana tuatua meitaki? (e) Eaa ra i riringiiaʼi te vaerua tapu ki runga ia Korenelio e tona au oa i mua ake i to ratou papetito angaia?
9 Kare a Iehova i anoano i te angaanga akamarama anga a tona au tavini kia kotingaia ki te enua okotai. No reira, akamata mai i te 36 T.N., kua oronga aia i te tuatau ki te tangata no to te pa enua ravarai kia akarongo i tana tuatua meitaki. I ta te Atua arataki anga, kua aere atu a Petero ki te kainga o tetai rangatira vaeau e Kenitara i Kaisarea. I reira kua kitea e ia a Korenelio te akaputu ra ma tona au oa piri vaitata e tona ngutuare tangata katoa oki. I to ratou akarongo marie anga ki ta Petero au tuatua, kua akono ratou i te akarongo ia Iesu ra i roto i to ratou ngakau. Akapeea tatou i kite ei? No te mea kua to mai te vaerua tapu o te Atua ki rungao i taua aronga Kenitara kua irinaki ra. Te mea matauia, ka oronga anakeia te vaerua o te Atua i muri ake i te papetito angaia, inara i taua atianga ra kua akakite mai a Iehova i tona mareka anga i te reira aronga kare ra i te ngati Iuda i mua ake i to ratou taruku angaia. Naringa kare a Iehova i rave i te reira, kare e papu ia Petero e me kua ariki te Atua i te au Kenitara ei au tavini Nona e kua tau oki ratou kia papetitoia i te vai.—Angaanga 10:34, 35, 47, 48.
10. Akapeea te totou anga mei ito mairai e ka akapaapaa ia Iehova te au tangata o te pa enua ravarai?
10 Mei ito mairai, kua totou mai a Iehova e ka akapaapaa te au tangata no te pa enua ravarai iaia. Ka riro mai e aronga akapaapaa rekareka iaia no te pa enua ravarai. Ei akapapu i teia, kua taiku mai a Paulo i te au totou no roto mai i te au Tuatua Tapu Epera ra. Kua tuatua aia ki te putuputuanga Kerititiano no to te pa enua i Roma ra: “Ka āriki kotou ia kotou uaorai, mei te Mesia i āriki mai ia tatou nei, kia kakā te Atua. Teia taku tuatua e rave angaanga a Iesu Mesia no te peritome kia kitea te tuatua-mou a te Atua, kia tupu te tuatua i tuatuaia mai i te aronga tupuna ra; E kia akameitaki te etene i te Atua i tona aroa; koia oki tei tataia ra [ia Salamo 18:49]: ‘E teianei e akameitaki au ia koe i rotopu i te au etene ra, e imene akapaapaa rai au i toou ingoa.’ Te na ko ra oki, [ia Deuteronomi 32:43]: ‘Ka rekareka, e te au etene, e tona katoa au tangata.’ E te na ko akaou ra oki, [ia Salamo 117:1]: ‘E akameitaki ia Iehova, e te au etene katoa e, e akapaapaa iaia, e te au tangata katoa na.’”—Roma 15:7-11.
11. Akapeea ta te Atua ra tauturu anga i te au tangata no te pa enua ravarai kia kite i tana au tuatua mou, e eaa te tupu anga?
11 Kare e rauka i te au tangata te akapaapaa taokotai anga ia Iehova mari ra kia tuku anake i to ratou manakonako anga ki rungao ia Iesu Karaiti, ta te Atua i akamana ra kia tutara ki rungao i to te pa enua ravarai. Ei tauturu ia ratou kia ariki i Tana au tuatua mou te ka taki atu ki te ora mutu kore, kua akanoo te Atua ra i tetai porokarama apiianga i to te pa enua katoa. Te oronga ra aia i te arataki anga na roto i tana pupu tavini akono meitaki. (Mataio 24:45-47) Te tupu anga? E tere atu i te rima mirioni reo rekareka te imene ra i te akapaapaa anga ia Iehova i te au enua e tere atu i te 230. E e au mirioni ua atu oki te akaari mai ra i te inangaro kia rave katoa i te reira. E akara eia tei aere atu ki te Akamaara Anga i te 1996: e 12,921,933. E mea umere tikai!
E Aronga Maata no te Akapaapaa Rekareka Tei Totouia Mai
12. Eaa te orama akarekareka anga ta te apotetoro ko Ioane ra i kite, e eaa tikai te aiteanga o te reira katoa ra?
12 I roto i te orama, kua akara te apotetoro ko Ioane i tetai “aronga maata rava” no te pa enua ravarai. (Apokalupo 7:9) Eaa te tumu tuatua no te au akapaapaa anga ta teianei aronga maata rava e imene kapiti nei ma te toenga o tei akatainuia a te Atua ra? Te akakitekite maira Ioane kia tatou: “No to tatou Atua te ora, tei noo ki rungao i te terono, e no te Punua-mamoe.” (Apokalupo 7:10) Te akakite mataku koreia nei teia ki te au tuanga ravarai o teianei ao. Ko te manako, no te tairiirianga i te kikau nu tamara, koia oki ka akateitei tatou i te Atua ei te Ngateitei i te Ao Katoa e Pini Ua Ake e ka aaki rekareka ki mua i te rangi e te enua e nona “to tatou” ora no tana Tamaiti oki, te Punua mamoe, koia Iesu Karaiti. Mei teaa ra, te mareka anga te apotetoro ko Ioane i te kite anga i teianei orama akarekareka no te aronga maata rava! E mei teaa ra te mareka anga no tatou i teia tuatau nei i te kiteanga, e te riroanga oki ei tuanga no, te ora anga tikai i ta Ioane i akara ra!
13. Eaa te akataka ke ra i to Iehova au tangata mei teianei ao mai?
13 Ei au tavini no Iehova, te mou akaparau ra tatou i tona ingoa. (Isaia 43:10, 12) No te mea e Au Kite no Iehova tatou ka akariro ia tatou kia tuke i to teianei ao. Mei teaa ra te rekareka kia mou i to te Atua ra ingoa taka meitaki e kia rave i tana angaanga tu-Atua ei akakoroanga na tatou i te oraanga! Na te akakoroanga mekameka a Iehova kia akatapu i tona ingoa tapu e kia akatika i tona ngateitei i te ao katoa e pini ua ake na roto i te Patireia kua oronga mai i te puapinga ki to tatou ora anga. E kua tauturu aia ia tatou kia rauka tetai ngai ki roto i tana akakoroanga tu-Atua no runga i tona ingoa e te Patireia. Kua rave aia i teia na roto i nga mataara e toru.
Akatuangaia ma te Tuatua Mou
14, 15. (a) Eaa tetai mataara ta te Atua i tauturu ia tatou kia rauka tetai ngai i roto i tana akakoroanga tu-Atua no runga i tona ingoa e te Patireia ra? (e) Eaa te tuke anga o te Patireia tei akanooia ra i te 1914 T.N. mei to tei takoreia atura i te 607 M.T.N. ra?
14 Te mea mua, kua akatuangaia e Iehova tona au tangata ma te tuatua mou. Te akakiteanga mareka rava atu koia oki kua akamata tona Patireia i te tutaraanga i te 1914. (Apokalupo 12:10) E tuke teia kavamani no te rangi mei te patireia akatutuia i Ierusalema ra, te ngai i akateronoiaʼi te au ariki no te kopu o Davida ra. Kua takoreia taua Patireia ra, e akamata mai i te 607 M.T.N., kua akakauraro takiriia a Ierusalema ki te tutara anga mana Kenitara o teianei ao. Te Patireia ou ta Iehova i akanoo ra i te 1914 e mana no te rangi ia kare rava e riro kia kauraro ki tetai ua atu mari ra kia Iehova, kare katoa oki te reira e akakoreia. (Daniela 2:44) Pera katoa oki, e tuke tana tutara anga. Naea ra? Te pau maira Apokalupo 11:15: “E au reo mamaata atura tei runga i te rangi, i te na ko anga e, ko te au basileia o teianei ao, kua riro ia ei au basileia no to tatou Atu e no tana Mesia; e e vai rai te au iaia e tuatau e tuatau ua atu.”
15 Te “basileia no to tatou Atu e no tana Mesia” te akono ra i te mana ki rungao i te ao katoa o te tangata nei. Ko teianei taiku anga ou i to Iehova ra tu ngateitei, tei kapiti ra i tana Tamaiti Mesia e to Iesu au taeake e 144,000, ko te maata anga o ratou ra kua akatuakaouia ki te kaka i te rangi i teianei, kare ia i te manako apiianga teitei ua—e apinga manako uaia ta te aronga apiipiiia ka inangaro kia uriuri manakoia. Kare, ko teianei Patireia no te rangi e kavamani tikai ia. E ko to tatou manakonako anga mataora no te ora anga e tuatau ua atu i roto i te tu apa kore ua ei tupu anga no tana tutara ka oronga mai kia tatou kia rava te tumu kia rekareka ua atu. No te akatuangaia ma taua au tuatua mou ra no te Tuatua a Iehova ka akakeu ia tatou kia tuatua tamou meitaki i te reira. (Salamo 56:10) Te rave putuputu ra ainei koe i teia na te tuatuaanga ki te tangata ravarai e te tutara ra te Patireia Mesia o te Atua i teianei i te au rangi ra?
Tauturuia e te Vaerua Tapu e Tetai Taeake Anga i te Ao Katoa Nei
16, 17. Eaa te rua e te toru o nga mataara ta te Atua i tauturu maira ia tatou kia rauka tetai ngai ki roto i tana akakoroanga tu-Atua ra?
16 Te rua o te mataara ta te Atua i tauturu mai ia tatou kia rauka tetai ngai i tana akakoroanga tu-Atua na te orongaanga kia tatou i tona vaerua tapu, tei akariro ra kia uua mai tatou i tona au ua manea i to tatou oraanga kia rauka tona mareka anga. (Galatia 5:22, 23) Pera katoa, kua tata a Paulo ki te au Kerititiano akatainuia: “I rauka ia tatou nei . . . te Vaerua ra no ko mai i te Atua ra: kia kite tatou i te au mea i oronga uaia mai e te Atua no tatou nei.” (1 Korinetia 2:12) Na te akarongoanga ki te vaerua o Iehova, ka rauka kia kite tatou i teianei e kia marama oki i te au apinga meitaki tana i oronga mai kia tatou—tana au taputou, te au ture, te au kaveinga, e te vai atura.—Akaaite ia Mataio 13:11.
17 E no te toru o te mataara ta te Atua e tauturu ra ia tatou, ko to tatou taeake anga i te ao katoa nei e ta Iehova ra akanoonoo anga meitaki i te akaaerenga no te akamori anga. Kua tuatua te apotetoro ko Petero no te reira i tana akamaroiroi anga ia tatou kia “aroa atu i te au taeake.” (1 Petero 2:17) Te tauturu ra ia tatou to tatou pamiri aroa no te au taeake e te au tuaine kia tavini ia Iehova ma te ngakau rekareka maata, mei ta Salamo 100:2 e akaue maira: “E akamori ia Iehova ma te pereperekavana; e aere mai ki mua i tona aroaro ma te imene.” Te tuatua katoa ra te irava 4: “E tomo ki tona au ngutupa ma te akameitaki; tona ra au paepae ma te imene akameitaki: e akapaapaa kotou iaia, e akameitaki i tona ingoa.” No reira me te tutu aere ra tatou i te ngai tangata me kare te akaputu ra i ta tatou au uipaanga, ka rauka kia kite tatou i te rekareka. Mei teaa ra te au e te tinamou ta tatou i kite i roto i te au paepae manea o to Iehova ra iero vaerua!
E Akapaapaa Rekareka ia Iehova!
18. Eaa ra tatou ka rekarekaʼi i te akapaapaaanga ia Iehova noatu rai te takinga kinoanga me kare etai atu manamanata te tupu ra kia tatou?
18 Noatu rai eaa te au turanga ngata, takinga kinoanga, me kare etai atu au manamanata te ka tupu kia tatou, kia rekareka tatou e tei roto tatou i te are akamori o Iehova ra. (Isaia 2:2, 3) Kia maara e ko te rekareka e tu ia no te ngakau. To tatou au taeake e te au tuaine mua ra e aronga akapaapaa rekareka ia Iehova noatu rai e manganui te au tu ngata e te au ngere anga tei tupu kia ratou. (Ebera 10:34) Aiteite to tatou au taeake irinaki i teia tuatau nei kia ratou ra.—Mataio 5:10-12.
19. (a) Eaa te au ikuiku anga putuputu te akakeu ra ia tatou kia akapaapaa ia Iehova? (e) Tei runga i teaa to tatou ora anga mutu kore, e eaa to tatou manako papu?
19 Pouroa tatou te aronga tavini ia Iehova te mareka ra kia akarongo i te ikuiku anga a te Pipiria kia akapaapaa iaia. E putuputu te puka o Apokalupo i te akaoti i te au akapaapaa anga i te Atua ra ma te tuatua “Alelu Ia!” (Apokalupo 19:1-6) I roto i nga irava e ono o Salamo 150, te akaueia maira tatou e 13 taime kia akapaapaa ia Iehova. E patianga teia ki te au mea katoa i angaia ra i te ao katoa e pini ua ake kia kapiti mai i te imeneanga rekareka i te akapaapaa ia Iehova. Tei runga to tatou ora anga mutu kore i to tatou kapitianga i teianei imene maata Alelu Ia! Ae, te aronga anake te ka ora e tuatau ua atu ko te aronga te ka akapaapaa mutu kore ia Iehova ra. No reira, te manako papu nei tatou kia piri vaitata atu ki tana putuputuanga tiratiratu i te ao katoa nei i te akavaitata anga mai te openga. Ei reira, ka rauka ia tatou te manakonako atu kia kite i te tupu anga takiri te au tuatua taopenga o Salamo 150 ra e: “Ko tei uti i te aʼo ra, kia akapaapaa anake ïa ia Iehova. Alelu Ia.”
Akapeea Koe me Pau?
◻ Eaa te akariro ra kia taka meitaki te au tangata o Iehova, e kia tuke oki?
◻ Eaa ra te au tavini o Iehova ra i rekareka roaʼi?
◻ Eaa te akataka ke ra ia tatou mei teianei ao?
◻ Eaa nga mataara e toru ta te Atua ra i tauturu mai ia tatou kia raukaʼi tetai ngai i roto i tana akakoroanga tu-Atua ra?
[Tutu i te kapi 17]
I te au ngai ravarai, kua akakitekite a Iesu ia Iehova e kua akapaapaa iaia i te ngai tangata