Au Uianga a te Aronga Tatau

Eaa te mamao ka patoi ei tetai vaine Kerititiano tiratiratu i te akatakake anga tei akatupuia e tona tokorua?

I te akamata angaia te akaipoipo anga no te tangata, kua akakite te Atua e kia “piri” kapipiti te tane e te vaine. (Genese 2:​18-24) Kua apa ua te au tangata, ma te au manamanata tei tupu mai i roto i te au akaipoipo anga e manganui, inara ko to te Atua anoano koia oki kia piri kapipiti ua atu nga tokorua. Kua tata te apotetoro ko Paulo: “E i te aronga i akaipoipoia ra, teia taku tuatua, kare ra taku, na te Atu ra, Eiaa te vaine e akataka ke i tana tane. (Kia akataka ke ra aia, e noo ua aia auraka e akaipoipo, e kia akaongiia aia e tana tane:) e eiaa te tane e tuku ke atu i tana vaine.”​—1 Korinetia 7:​10, 11.

Te akakite maira te reira au tuatua e i roto i te au tangata apa kore te vaira tetai tokorua te ka iki a tetai taime no te akaruke. Ei akaraanga, kua tuatua a Paulo me takake tetai tokorua, kia ‘noo ua auraka e akaipoipo’ nga tokorua. No teaa ra? Kua takake te tokorua, i roto ra i nga mata o te Atua te vai kapipiti ra rai raua. Kua rauka ia Paulo i te tuatua i teia no te mea kua akanoo a Iesu i te turanga no te akaipoipo anga Kerititiano: “Tei kopae i tana vaine, auraka ra no te akaturi, ka akaipoipo ei i tetai, kua akaturi [te reo Ereni, e por·neiʹa] ïa: e ko tei akaipoipo i taua vaine i kopaeia ra, kua akaturi ïa.” (Mataio 19:9) Ae, te tumu anga anake no te takake anga te akaope ra i tetai akaipoipo anga i te pae Tuatua Tapu koia oki ko te “fornication” te ainga tau kore. I te akaraanga, i roto i ta Paulo e taiku ra, kare nga tokorua i rave ake i te tu akono tau kore, no reira me takake te tane me kare te vaine, kare te akaipoipo anga i ope i roto i nga mata o te Atua.

I reira, kua tuatua a Paulo no runga i tetai turanga i roto i te reira e tokorua kare i roto i te irinaki anga to tetai Kerititiano mou. Ka akamanako i ta Paulo arataki anga: “Kia aere ke ra tei kore i akarongo ra, aere ua atu ïa: kare te taeake e te tuaine e ii i te reira. Kua akonoia ra tatou e te Atua, ei au ta tatou.” (1 Korinetia 7:​12-16) Eaa ta tetai vaine tiratiratu ka rave me akaruke tana tane irinaki kore iaia, te kimianga i te pae ture no te akatakake anga iaia?

Penei ka inangaro aia iaia kia noo kiaia. Penei te inangaro ra aia iaia, te kite anga i to raua au anoano i te pae ngakau e te ainga, e te kite ra e te anoano ra aia e te tamariki meangiti i te tauturu anga i te pae apinga. Penei ka manakonako katoa aia, kare e roaia ka riro mai tana tane ei tangata irinaki e orai. Inara, me ka rave aia i te au takainga no te akaope i te akaipoipo anga (ma te tumu kare i roto i te Tuatua Tapu), ka rauka i te vaine i te “aere ua atu,” mei ta Paulo i tata ra. Ka aiteite katoa te reira ki tetai tane akarongo me ka manako kore i to te Atua manako i te akaipoipo anga e ka maro ua atu e kia takake ra.

Inara, i roto i taua turanga, penei ka kite aia i te anoano anga no te paruru iaia uaorai e te tamariki. Akapeea ra? Ka inangaro aia e kia rauka iaia te tika anga ki tana tamariki akaperepere e raukai iaia i te akaari kia ratou i te inangaro metua vaine, kia oronga kia ratou i te terenianga i te pae o te akono, e kia apii kia ratou i te akarongo akanooia ki runga i te au apiianga meitaki a te Pipiria. (2 Timoteo 3:15) Penei ka akakino te takake anga i tona au tika anga. No reira, penei ka rave aia i te au takainga kia komono meitakiia ki mua i te au mana akaaere e raukai i te paruru i tona tika anga kia akono i tana tamariki e kia papu e ka anoanoia tana tane kia turu i te pamiri tana i akaruke ra. I tetai au ngai, ko tetai vaine te maro ra e kia takake ka rauka i te taina i te au pepa pae ture te akanoo ra i te au ravenga e raukai te tika anga o te tamaiti te turuanga i te pae moni, ma te kore i akatika anga ki te akatakake tei anoano ra tana tane. I tetai ngai ra, te akakite maira te au tuatua o te pepa e te akatika ra aia ki te akatakake anga; no reira, me apa tana tane i te akaturi, te taina anga te vaine i teia te aite anga e kua kopae aia iaia.

Kare te maata anga i roto i te ngai tangata e i roto i te putuputuanga i kite tikai i te au tuatua, me kua akanooia te akatakake anga ki runga i te tika anga a te Tuatua Tapu. Inara i mua ake ka tere atu ei te au mea ki reira, ka meitaki no te vaine kia akakite ki te akaaere akono e tetai tangata pakari i roto i te putuputuanga (na te tataanga) i te au tumu tikai. Na te reira mataara ka rauka ua te reira au tumu tikai e ua ake me ka tupu mai tetai ui anga​—i reira me i muri mai.

Ka akara ana tatou i ta Iesu tuatua: “Tei kopae i tana vaine, auraka ra no te akaturi, ka akaipoipo ei i tetai, kua akaturi [te reo Ereni, por·neiʹa] ïa: e ko tei akaipoipo i taua vaine i kopaeia ra, kua akaturi ïa.” Me kua apa tikai tetai tane i te ainga tau kore inara kua inangaro i te vai akaipoipo ki tana vaine, kia iki aia (tei kino kore i ta Iesu akaraanga) me ka akakore i tana ara e ka akono ua atu i te roi akaipoipo me kore ka kopae iaia. Me ka puareinga aia i te akakore i te ara e ka akono ua atu i tana tane i te pae ture, kare aia i kino tikai no te rave i te reira.​—Hosea 1:​1-3; 3:​1-3.

I roto i tetai turanga me ka kimi te tane rave ainga tau kore i te akatakake anga, penei ka puareinga ua te vaine i te akakore iaia, te manakonakoanga e kia oki mai aia. Tei runga iaia kia tauta, te akanoo angaia ki runga i tona akava ngakau e te turanga, me ka maro no te akatakake iaia. I etai au ngai ko tetai vaine e maro ra kia takake penei ka rauka i te taina i tetai pepa te akamana ra i te au tika anga no te tamariki e kia turuia i te pae moni ma te kore te akakite anga e kua akatika aia i te takake anga; tona taina anga i te au pepa kare te reira e te akakite ra e te kopae ra aia iaia. Inara, i tetai atu ngai ko tetai vaine te karanga ra e te maro ra aia e kia akatakake penei ka patiia kia taina i te au pepa te akakite ra e kua akatika aia e kia akatakake; te taina anga i te reira te akaari ra e te kopae ra aia i tana tane rave ara.

Kia kopae i te marama kore anga, ka meitaki i reira i roto i teia turanga e no te vaine katoa kia oronga ki te aronga komono o te putuputuanga i tetai reta te akataka anga i te au takainga te ka akonoia e te au tu puapinga no te reira. Ka rauka iaia i te tuatua e kua akakite aia ki tana tane e te puareinga ra aia kia akakore i tana ara e kia riro ei vaine nana. Tera te aite anga e kua rauka ua te akatakake anga kare i tona anoano; koi kore ei e kopae i tana tane, te papa ra aia no te akakore i tana ara. I muri ake i te akataka meitaki anga i te reira e te puareinga ra aia i te akakore i te ara e kia vai akaipoipo ra, tona taina anga i te au pepa te akakite ua ra e akapeea me akatikatikaia te au manako i te pae moni e/me kare te tika anga ki te tamariki kare te reira e te akakite ra e te kopae ra aia i tana tane.a

I te akanoo anga i tona tu puareinga i te akakore i te ara noatu i muri ake i te akatakake anga, kare aia e tana tane i akarangatira akaouia kia akaipoipo i tetai e tetai. Me koia, te tokorua kino kore tei patoiia tona tu akakore i te ara, i muri mai kua iki i te patoi iaia no tana ainga tau kore, ka rangatira raua roai. Kua akaari mai a Iesu e e tika anga to te tokorua kino kore kia tuku i taua iki anga.​—Mataio 5:32; 19:9; Luka 16:18.

[Tataanga Rikiriki i Raro]