Ka Rauka ia Koe kia Akakoromaki Tae Roa ki te Openga

“E oro tamou marie ei i teianei oroanga i tukuia mai ki mua ia tatou nei.”​—EBERA 12:1.

1, 2. Eaa te aite anga e kia akakoromaki?

“KO TE akakoromaki ra te tau ia kotou,” ta te apotetoro ko Paulo i tata ki te au Kerititiano Epera i te anere mataiti mua ra. (Ebera 10:36) I te akaketaketaanga i te puapinga maata o teianei tu, kua raurau katoa maira te apotetoro ko Petero i te au Kerititiano: “Kapiti katoa to kotou akarongo . . . ki te akakoromaki.” (2 Petero 1:5, 6) Inara eaa tikai te akakoromaki?

² Te akataka maira tetai tikitinari Ereni e te Papaa i te verepa Ereni no te “akakoromaki” ei “vai tamou anga kare e kia oro ke . . . kia tu atu i tona ngai, kia ngaueue kore.” No runga i te nauna Ereni no te “akakoromaki anga,” te tuatua ra tetai angaanga kimikimi anga: “Ka rauka i te vaerua te akakoromaki i te au apinga, kare ma te tu akamutu ua, mari ra ma te manakonako ketaketa . . . Ko te tu ia te ka akatinamou i tetai tangata ki runga i ona vaevae ma tona mata kia aro atu i te matangi. Ko te tu ia te ka akariro i te timataanga ngata ei mea kaka no te mea i te pae atu i te mamae te kite atura i te akakoro anga.” Na te akakoromaki anga, i reira, e raukai i tetai kia tu ngaueue kore ki mua i te au arairai anga e te au tu ngata oki e kare e ngere i te manakonako anga. Koai tikai te umuumu ra i teianei tu?

3, 4. (a) Koai ma te anoanoia ra kia akakoromaki? (e) Eaa tatou i tikai kia akakoromaki tae roa ki te openga?

³ Te au Kerititiano katoatoa te rave ra i tetai oroanga akatutuia te umuumuia ra te akakoromaki anga. I vaitata i te mataiti 65 T.N., kua tata atu a Paulo ki tona oa rave angaanga e te tutakaanga tiratiratu kia Timoteo i teianei au tuatua akamaroiroi: “I kukumi ana au i te kukumianga meitaki, kua oti toku oro anga, i mou marie na au i te akarongo.” (2 Timoteo 4:7) Ma te tuatua “kua oti toku oro anga,” te akaaite atura Paulo i tona oraanga ei tetai Kerititiano ki tetai oroanga, ma tetai oroanga akanooia e tetai ngai re anga oki. I taua tuatau ra, te vaitata autu atura Paulo ki te openga o tona oroanga, e te akara irinaki atura aia ki te rauka anga te tutaki. “E teianei,” tana i tuatua mai, “te vaioia nei te korona o te tuatua-tika noku, ta te Atu, ta te akava tuatua-tika ra, e oronga mai noku kia tae ki taua rā ra.” (2 Timoteo 4:8) Kua papu ia Paulo e ka rauka iaia taua tutaki ra no te mea kua akakoromaki aia e tae roa ki te openga. Akapeea ra te toenga o tatou nei?

⁴ Ei akamaroiroi i te aronga tei akamata ra i taua oroanga ra, kua tata a Paulo: “E oro tamou marie ei i teianei oroanga i tukuia mai ki mua ia tatou nei.” (Ebera 12:1) Ei au Kerititiano, ka tomo atu tatou ki teianei oroanga akakoromaki anga i to tatou akatapu anga ia tatou uaorai ki te Atua ko Iehova ra na roto ia Iesu Karaiti. Ko tetai akamata anga meitaki i taua oroanga ei pipi e mea puapinga maata ia, inara ko te mea puapinga maata roa ko ta tatou akaoti anga i taua oroanga ra. Kua akakite mai a Iesu: “Kareka te tāpu tikai e tae ua atu ki te openga ra, ka ora ïa.” (Mataio 24:13) Ko te tutaki te tatari maira i te aronga te ka akaoti autu i taua oroanga ra ko te ora mutu kore ia! No reira, i te akamanako anga i tetai akakoro anga, ka tika kia akakoromaki tatou tae roa ki te openga. Eaa te ka tauturu ia tatou kia rauka taua akakoro anga ra?

Akamatutu Anga Tau​—E Mea Tika Ia

5, 6. (a) Kia akakoromaki i te oroanga no te oraanga, eaa ta tatou ka tika kia tamanako atu? (e) Eaa te au apinga tika na tatou kia akapapa na tatou uaorai, e no teaa ra?

⁵ I vaitata i te oire o Korinetia, i Ereni ra, ko te ngai ia o te au tarekareka anga rongonui o te Isthmian i te tuatau taito ra. Kare e ekoko anga e kua matau a Paulo e kua kite a Paulo e kua matau katoa oki te au taeake Korinetia ra i te au tarere anga e etai atu au taemoemo anga tei raveia ki reira. I te taiku anga i to ratou kite anga, kua akamaara atura aia ia ratou no te oroanga no te oraanga ta ratou e rave ra: “Kare ra kotou i kite e ko te aronga e oro i te taemoemo anga ra, e oro katoatoa ïa, okotai ua ra e rave i te korona. E akaarite i to kotou taemoemo anga, kia rauka te korona.” Kua akaketaketa a Paulo i te puapinga maata o te vai tamouanga i te oroanga e te raveanga kia tae ki te openga. Inara eaa te ka tauturu ia ratou kia rave i te reira? “Te tangata ravarai e manono kia riro iaia te re ra, e akono ïa i tei tau i te au mea katoa nei,” tana i kapiti atu. Ae, kua kauraro te aronga taemoemo i te au tarere anga taito ra i te terenianga pakari, kua matakite i ta ratou i kai e i inu oki, e kua akatere i ta ratou angaanga ravarai kia raukai kia re.​—1 Korinetia 9:24, 25.

⁶ Akapeea ra te oroanga ta te au Kerititiano i tomo atura? “Ka tau koe kia matakite i taau kaikaianga i te pae vaerua me kia autu koe i te oroanga no te oraanga,” ta tetai o te aronga pakari i te putuputuanga o te Au Kite o Iehova ra i tuatua. E akamanako ana eaa te kai vaerua ta Iehova, “te Atua nona te akakoromaki tei oronga maira,” no tatou nei. (Roma 15:5) Ta tatou tumu maata no te akamatutu anga i te pae vaerua ko tana Tuatua ia, koia te Pipiria. Kare ainei tatou e tau kia tamou i tetai papaanga tatauanga Pipiria? Na roto mai i te “tavini akono meitaki e te pakari,” kua oronga katoa mai oki a Iehova i te au makatini tau koia Te Punanga Tiaki e te Awake! e etai atu au puka akatumuia i te Pipiria ra. (Mataio 24:45) Na te apiianga maroiroi i te reira ka akamatutu ia tatou i te pae vaerua. Ae, ka tika tatou kia akataka tuatau​—‘no te taporoporo i te tuatau’​—no ta tatou apiianga.​—Ephesia 5:16.

7. (a) Eaa ra tatou i kore ei e tau kia merengoia ma te kite uaanga i te au apiianga tumu no te au Kerititiano? (e) Akapeea tatou me ‘aere atu ki mua ma te pakari mou’?

⁷ Kia vai marie tatou ki runga i te aerenga no te pipi Kerititiano, ka tau tatou kia mamao atu te aere anga i to “te tuatua mua o te Mesia” e “aere atu rai tatou ki mua i te pakari mou.” (Ebera 6:1) No reira ka tika tatou kia akatupu i te manako “i te tipoto, e te tiroa, e te oonu, e te teitei” o te tuatua mou e kia rauka mai te matutu anga no “te kai pakari ra, na te tangata pakari.” (Ephesia 3:18; Ebera 5:12-14) Ei akatauanga e akara i nga tataanga tau kia irinakiia no to Iesu oraanga i te enua nei​—te Evangeria a Mataio, ta Mareko, ta Luka, e ta Ioane. Na roto i te apiianga matakite i teianei au tataanga Evangeria, kare e ka kite anake tatou i te au angaanga ta Iesu i rave e tona tu ei tangata mari ra ka kite katoa tatou i tana akatauanga manakoanga tei akakeu ra i tana au angaanga. Ei reira ka rauka ia tatou “te kite i te manako o te Karaiti ra.”​—1 Korinetia 2:16, NW.

8. Akapeea te au uipaanga Kerititiano i te tauturu anga ia tatou kia akakoromaki i te oroanga no te oraanga?

⁸ Kua akamaroiroi atu a Paulo i tona au oa akarongo ra: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara ra kotou i taua rā ra i te vaitata anga mai.” (Ebera 10:24, 25) Mei teaa ra tetai tumu no te akamaroiroi taua au uipaanga Kerititiano ra! E mei teaa ra te akapumaana anga kia kapiti atu ma te au taeake e te au tuaine te manako maira kia tatou e te anoano ra kia tauturu ia tatou kia akakoromaki tae roa ki te openga! Kare tatou e tau kia akono mama ua i teianei orongaanga aroa mei ko mai ia Iehova ra. Na roto i ta tatou uaorai apiianga maroiroi e te aereanga putuputu ki te uipaanga, “i te kite ra, ei tangata pakari ïa kotou.”​—1 Korinetia 14:20.

Aronga Matakitaki ei Akakeu ia Koe

9, 10. (a) I teea tu te aronga matakitaki e riro ei ei tumu no te akamaroiroianga i tetai oroanga akakoromaki anga? (e) Eaa ‘te tiaorangi maata i kite tei akapini ia tatou’ tei taikuia ra ia Ebera 12:1?

⁹ Inara, noatu peea te meitaki o te teateamamao anga a tetai tangata oro ra, penei ka tupu i te ngai oroanga te au apinga te ka akariro ia koe kia topa. “I oro meitaki ana oki kotou; naai kotou i arai io nei, i kore ei kotou i akono i te tuatua-mou?” ta Paulo i ui atu. (Galatia 5:7) I te akara anga, ko tetai papaki o te au Kerititiano Galatia kua topa ki roto i te pirianga oa kikino e, ei tetai tupu anga, kua akaariu keia i ta ratou oroanga no te oraanga. I tetai tua, na te turuanga e te akamaroiroi anga mei ko mai i etai ke ra ka rauka kia akariro kia ngoie te oroanga no te oraanga. Te aite ra teianei ki te tupu anga ta te aronga matakitaki i tetai taemoemo anga te ka akatupu ki runga i te aronga tarere ra. Ka akarapurapu te au urupu anoano maata ra kia akakeuia te aronga tarere ra mei te akamataanga tae roa ki te openga. Na te au kapiki anga a te aronga matakitaki ra, tei putuputu te kapitiia ma te akatangianga imene maata e te pokarakaraanga ka rauka kia oronga i te akakeuanga ki te aronga taemoemo te umuumuia ra ia ratou e aere maira no te akaoti anga. E tika, ka rauka i te aronga matakitaki tei anoano ra i te oronga tetai mana tau ki runga i te aronga i roto i te oroanga ra.

¹⁰ I te oroanga no te oraanga ta te au Kerititiano i tomo atura, koai ma te aronga matakitaki ra? I muri ake i te taikuanga i te au kite tiratiratu o Iehova i mua ake i te tuatau Kerititiano ra, tei tataia i te pene 11 o Ebera ra, kua tata a Paulo: “E teianei, kua akapiniia tatou i taua [“tiaorangi maata,” NW] i kite nei . . . e oro tamou marie ei i teianei oroanga i tukuia mai ki mua ia tatou nei.” (Ebera 12:1) I te taikuanga i te tuatua akatutu o tetai tiaorangi, kare a Paulo i taangaanga i te tuatua Ereni tei akataka pu maira i tetai tiaorangi taka meitaki te maata e te tu oki. Kareka ra, kua taiku mai aia i tetai tei tau ra ki ta te tangata apii i te au tuatua ko W. E. Vine “te akakite maira i tetai tu tiaorangi, e tu kore maata ua te tapoki ra i te au rangi.” Te taka meitaki ra, e te manako ra Paulo i tetai urupu maata no te au kite​—no te manganui o ratou kua aite ratou mei tetai tiaorangi maata ra.

11, 12. (a) Akapeea te au kite tiratiratu i mua ake i te au Kerititiano ra i te akamaroiroi anga ia tatou, mei te mea ra e, kia oro i te oroanga ma te akakoromaki anga? (e) Penei akapeea tatou e puapinga maata atu ei mei te ‘tiaorangi maata i kite’ ra?

¹¹ Ka rauka ainei kia riro tikai te au kite o mua ake i te au Kerititiano ra ei aronga matakitaki i teianei tuatau nei? Kare e tau. Te moe ra ratou katoatoa i roto i te matenga, te tatari ra i te tuakaouanga. Inara, e aronga oro autu ratou uaorai ia ratou e ora ra, e te ora ra ta ratou au akatauanga i roto i te au kapi o te Pipiria. Ia tatou e apii ana i te au Tuatua Tapu, ka ora mai teianei aronga tiratiratu ki roto i to tatou au manako e ka akamaroiroi ia tatou, mei te mea rai e, kia oro i taua oroanga ra kia tae ki te openga.​—Roma 15:4.a

¹² Ei akatauanga, me ka timataia mai tatou e te au ravenga o teianei ao, kare ainei tetai akamanako anga e i akapeea ta Mose ra kopae keanga i te au kaka o Aiphiti ra e akakeu ia tatou kia vai tamou i te oroanga ra? Me ka akara anga ketaketa roa tetai timataanga te aro maira kia tatou, na te akamaara anga i te timataanga ngata ta Aberahama i aro atu ra i tona pati angaia kia oronga i tana tamaiti ia Isaaka ei atinga ka akamaroiroi tikai te reira ia tatou kia kore e unui ki muri i te taemoemo anga no te akarongo ra. Ko te maata o taua “tiaorangi maata” i kite nei akakeu anga ia tatou i teianei tu tei runga ia i te taka meitaki to tatou kite ia ratou ma to tatou au mata no te kite ra.

13. Na teea tu ta te Au Kite o Iehova i teia tuatau akakeu anga ia tatou i te oroanga no te oraanga?

¹³ Te koropini katoaia nei tatou e te Au Kite e manganui no Iehova i teia tuatau nei. Mei teaa ra te au akatauanga meitaki no te akarongo tei akanooia e te au Kerititiano akatainuia ra pera katoa oki te au tangata e te au vaine o “te aronga maata rava”! (Apokalupo 7:9) Ka rauka ia tatou te tatau i ta ratou au tua i etai tuatau i roto i teianei makatini e etai atu au puka Punanga Tiaki.b Ia tatou e akaata ra i to ratou akarongo, te akamaroiroiia ra tatou kia akakoromaki tae roa ki te openga. E mei teaa ra te meitaki kia turuia mai tatou i te au oa piri vaitata e te au kopu tangata te tavini tiratiratu ra ratou uaorai ia Iehova! Ae, e manganui te aronga ei akakeu mai ia tatou kia rave tamou i te oroanga no te oraanga.

E Akanoo Pakari i Toou Oroanga

14, 15. (a) Eaa ra i puapinga maatai kia akanoo pakari i to tatou oro anga? (e) Eaa ra i tau ei kia tika ta tatou akanoo anga i te au akakoro anga?

¹⁴ Me te oro ra i tetai oroanga mamao, mei te oroanga roa rai, ka tika tetai te oro ra kia akanoo pakari i tona oroanga. “Te akamataanga viviki roa te akanoo ra ia koe no te puapinga koreia,” ta te makatini New York Runner i tuatua. “Penei ko te tupuanga ka riro ei tetai tauta anga roa i etai au maire openga ra me kare e topaanga ki vao.” Te maara ra i tetai tangata oro ki roto i te oroanga roa e: “Kua akataka mai tetai tangata ako mai i tetai apiianga teateamamao anga no te oroanga: ‘Auraka e arumaki atu i te aronga viviki atu te oro anga. E oro i toou uaorai akanooanga. Penei ka roiroi vave koe e ka akamutu ua.’ Na te akarongoanga i teianei akoanga i tauturu iaku kia oro tae roa ki te openga ra.”

¹⁵ I te oroanga no te oraanga, ka tika te au tavini o te Atua kia uapou ua atu ratou uaorai. (Luka 13:24) Inara, kua tata te pipi ko Iakobo: “Te pakari no runga maira, e . . . e te maru.” (Iakobo 3:17) Penei ka akamaroiroi mai te akatauanga meitaki a etai ke ra ia tatou kia rave maata atu, ka tauturu maira te tu tau ia tatou kia akanoo i te au akakoro anga tika kia rotai ma to tatou au kite e te au turanga oki. Te akamaara maira te au Tuatua Tapu kia tatou: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke. Ei runga iaia uaorai ta te tangata ravarai apainga.”​—Galatia 6:4, 5.

16. Akapeea te akamako anga i te tauturuanga ia tatou i te akanooanga i ta tatou oro anga?

¹⁶ Ia Mika 6:8, te uiia maira kia tatou teianei uianga akakeu i to tatou manakoanga: “Eaa ta Iehova inangaro ia koe ra, mari ra ko . . . te aerenga akamako tikai i to Atua ra?” Te kapiti ra te akamako tikai i tetai tu matakite i to tatou au kotinga. Kua tuku ainei te apikepikeanga te ora anga me kare te ruaine anga i etai kotinga ki runga i ta tatou ka rauka kia rave i te tavini anga i te Atua ra? Auraka tatou e riro kia maroiroi kore. Te ariki maira Iehova i ta tatou au tauta anga e te au atinga “ta te tangata i rauka ra, kare i tei kore i rauka iaia ra.”​—2 Korinetia 8:12; akaaite ia Luka 21:1-4.

Tamou Marie i Toou Nga Mata ki te Tutaki

17, 18. Na te tamou marieanga i teaa ki roto i tona ra manako i tauturu ia Iesu kia akakoromaki i te tatauro tamamaeanga ra?

¹⁷ I te touanga atu ki te au Kerititiano o Korinetia i te umuumuanga kia akakoromaki i te oroanga no te oraanga, kua taiku atura Paulo i tetai atu tu o te au tarekareka Isthmian tei tau ra no to ratou manakoanga. No runga i te aronga taemoemo i taua au tarekareka anga ra, kua tata a Paulo: “Kia rauka te korona pe ua i peraʼi [i oro ei] ratou; kareka tatou kia rauka ia te korona pe kore. E teianei te oro nei au, kare ra mei te mea kare i kitea; te moto nei au, kare ra mei te mea e, e moto ki te matangi.” (1 Korinetia 9:25, 26) Ko te tutaki no tei autu i taua au tarere taito ra ko tetai korona, me kare ei katu, tei maaniia i te raurau paina me kare etai atu ngangaere me kare e celery mae tupu ua mai​—e “korona pe ua” tikai. Inara, eaa te tatari maira i te au Kerititiano akakoromaki tae roa ki te openga?

¹⁸ I te taikuanga i ta tatou Akaraanga, ia Iesu Karaiti, kua tata te apotetoro ko Paulo: “Ko tei akakoromaki i te tatauro, kare i akono i te akama, i te meitaki i tukuia mai ki mua i tona aroaro, e te noo ra i teianei i te pae katau i te terono o te Atua ra.” (Ebera 12:2) Kua akakoromaki a Iesu tae roa ki te openga o tona oraanga tangata na te akaraanga kia mamao atu i te tatauro tamamaeanga ra ki tona tutaki, tei kapiti ra i te rekareka i rauka iaia i te tauturuanga i te akatapuanga i te ingoa o Iehova, i te oko mai anga i te pamiri tangata mei te mate mai, e te tutaraanga ei Ariki e ei Taunga Maata iaia ka akaora mai i te au tangata akarongo ki te oraanga mutu kore i tetai enua parataito ra.​—Mataio 6:9, 10; 20:28; Ebera 7:23-26.

19. Eaa ta tatou ka tau kia tamou marie ki roto i to tatou manako ia tatou e aruaru ra i te rave anga angaanga ei pipi Kerititiano?

¹⁹ E akamanako i te rekareka tei akanooia mai ki mua ia tatou ia tatou e aruaru ra i te angaanga ei au pipi Kerititiano. Kua orongaia mai e Iehova kia tatou te angaanga akamerengoanga oonu no te tutuanga i te tuatua meitaki o te Patireia o te Atua e te tuaanga i te kite akaora anga no te Pipiria kia etai ke ra. (Mataio 28:19, 20) Mei teaa ra te marekaanga kia kitea tetai tei inangaro ra i te Atua mou e kia tauturu atu iaia kia tomo atu i te oroanga no te oraanga! E noatu ra eaa te manako o te au tangata ta tatou e tutu atura, e angaanga meitaki ia kia o atu ki te angaanga tei piri atura ma te akatapuanga i te ingoa o Iehova. Me ka akakoromaki tatou i te angaanga orometua noatu te tu manako koreia mai me kare te patoianga mai i te tuanga a te aronga i roto i to tatou ngai akakitekiteanga, tei ia tatou te rekareka no te akarekarekaanga i te ngakau o Iehova. (Maseli 27:11) E ko te tutaki mekameka tana i taputou mai kia tatou ko te oraanga mutu kore ia. Mei teaa ra te rekareka anga te reira! Ka tau tatou kia tamou marie i teianei au akameitakianga ki roto i to tatou manako e kia rave tamou marie oki i te oroanga.

I te Vaitata Anga Mai te Openga

20. Penei akapeea te riro anga kia ngata atu te oroanga no te oraanga i te vaitata maianga te openga ra?

²⁰ I te oroanga no te oraanga, ka tau tatou kia patoi atu i to tatou enemi maata, koia Satani te Tiaporo ra. Ia tatou e akavaitata atu nei i te openga, te tauta maroiroi ra aia kia akaturori ia tatou me kare kia akavareia. (Apokalupo 12:12, 17) E kare oki i te mea ngoie ua kia rave ua atu ei aronga tiratiratu, tei akatapuia ei akakitekite i te Patireia noatu rai te au tamaki, te au onge, te au maki mate, e etai au tu ngata katoatoa tei akairo maira i “te tuatau openga.” (Daniela 12:4; Mataio 24:3-14; Luka 21:11; 2 Timoteo 3:1-5) Pera katoa oki, penei ka akaraanga mamao atu te openga i ta tatou i manako ana, e maata oki me kua tomo tatou ki te oroanga no etai au raungauru mataiti kua topa. Inara, te akapapu maira te Tuatua a te Atua kia tatou e ka tae mai te openga. Te tuatua maira Iehova, e kare e tavarevare. Te akaraia atura te openga.​—Habakuka 2:3; 2 Petero 3:9, 10.

21. (a) Na teaa e akamatutu ia tatou ia tatou e rave ua atura i te oroanga no te oraanga? (e) Eaa te tamanako anga tau no tatou i te vaitata maianga te openga ra?

²¹ Kia autu i te oroanga no te oraanga, i reira, ka tika tatou kia apai mai i te maroiroi mei ko mai i ta Iehova i oronga aroa maira no te akamatutu anga ia tatou i te pae vaerua. Ka anoano katoa oki tatou i te akamaroiroi anga katoa te ka rauka ia tatou mei ko mai i te taokotai anga putuputu ma to tatou au oa akarongo ra, te oro katoa ra i taua oroanga ra. Noatu me te vaira te au takinga kino maata e te au apinga kare i manakoia atu i te ngai oroanga tei akariro kia ngata roa ta tatou oroanga, ka rauka ia tatou kia akakoromaki tae roa ki te openga no te mea te oronga maira Iehova i “te mana maata meitaki.” (2 Korinetia 4:7) Mei teaa ra te akapapuanga kia kite e te anoano maira Iehova kia akaoti autu tatou i taua oroanga ra! Ma te tamanakoanga ngaueue kore, “e oro tamou marie ei i teianei oroanga i tukuia mai ki mua ia tatou nei,” ma te irinaki anga ki katoa e “ei te tuatau tikai oki tatou e kokoti ei, kia kore tatou e akaparuparu.”​—Ebera 12:1; Galatia 6:9.

[Au Tataanga Rikiriki i Raro]

Maara Ainei ia Koe?

◻ Eaa i tikai kia akakoromaki tatou tae roa ki te openga?

◻ Eaa te au apinga orongaia mai e Iehova kare tatou e tau kia manako kore ua?

◻ Eaa ra i puapinga maatai kia pakari te akanoo anga i to tatou oro anga?

◻ Eaa te rekareka anga tei akanooia maira ki mua ia tatou ia tatou e rave ua atura i te oroanga?

[Tutu i te kapi 18]

E rave mai i te akamaroiroi anga mei ko mai i te au uipaanga Kerititiano ra