Akatano Meitaki te Moto Anga
1. Akapeea a 1 Korinetia 9:26 te taangaangaia anga ki te angaanga orometua?
1 Kua tata te apotetoro ko Paulo e: “Te oro nei au, kare ra mei te mea kare i kitea; te moto nei au, kare ra mei te mea e, e moto ki te matangi.” (1 Kori. 9:26) Te taiku ra a Paulo ki e tai manako, koia oki kia akamou i te manako i te aruaru i te au akakoroanga pae vaerua. Inara, te taangaanga katoaia ra teia au tuatua ki te angaanga orometua. Ka akatano meitaki tatou i ta tatou ‘moto anga’ me kore tauta anga kia rauka mai te mea meitaki tikai. Akapeea ra?
2. Akapeea tatou me aru ia Paulo e tetai aronga tutu evangeria o te anere mataiti mua i te ikianga e eaa te taime e tutu ei e ka tutu kiea?
2 Aere ki te Ngai Tangata: Kua tutu aere a Paulo e tetai aronga tutu evangeria i te anere mataiti mua ki te ngai ka kiteaia te tangata. (Anga. 5:42; 16:13; 17:17) No reira me maata te tangata i te kainga i te aiai, ko te taime meitaki teia kia aere mei tera are ki tera are. E bus me kore e rerue ainei tetai e oro ana i te popongi e te avatea aiai e aru ana te au tangata i te reira ki te angaanga me kore ki te kainga? Eaa te taime e ki ana te ngai okooko i te tangata? E meitaki atu te akakitekiteanga i te pae mataara i te reira tuatau.
3. Akapeea tatou me akatano meitaki i ta tatou moto anga me angaanga i ta tatou ngai tutuanga?
3 Angaanga Meitaki i te Ngai Tutuanga: Kia matakite e akapeea tatou me akatano meitaki i ta tatou moto anga me angaanga i te ngai tutuanga. Ei akaraanga, eiaa e apai kia maata te pupu i te ngai tutuanga okotai, no te mea e maata te taime e te maroiroi ka pou i te akanoonoo i te pupu. No reira, me angaanga i te ngai tutuanga i vao mai, ka viviki atu i te angaanga i ta tatou ngai tutuanga e ka maata atu te atianga no te tuatua me kare e maata rava te pupu i runga i te ngai tutuanga. Ka rauka ainei ia tatou tetai ngai tutuanga vaitata atu ki to tatou kainga, te ka akaiti mai i te taime no te teretere anga?
4. Eaa te ka tauturu ia tatou kia puapingaia ei ‘au ravakai tangata’?
4 Kua akaaite a Iesu te aronga tutu evangeria ki te “ravakai tangata.” (Mare. 1:17) Te akakoroanga o te tangata ravakai, kare no te tautai ua mari ra no te opu anga i te ika. No reira, e aere ana te aronga tautai ki te ngai e te taime ka rauka mai te ika, e ka tautai ratou ki reira. Ae, ka tauta pakari ratou i ta ratou ka rave. E akaari katoa tatou i taua tu maroiroi ra i roto i ta tatou angaanga orometua.—Ebe. 6:11.