Ka Akaata Ainei Koe i te Kaka o te Atua?

“Ia tatou e akaata ra mei te io rai i te kaka o Iehova.”​—2 KORINETIA 3:18, NW.

1. Eaa ta Mose i kite, e eaa tei tupu i muri ake?

KO TETAI te reira o te au orama vavaria roa atu ta tetai ua atu tangata i kite ana. Koia anake rai, i runga i te ngai teitei o te Maunga i Sinai, kua akatikaia mai ta Mose patianga tuke ake rai. Kua akatikaia aia kia kite i tetai mea kare roa e tangata i kite ana​—te kaka o Iehova. E tika, e kare a Mose i kite tika atu ana ia Iehova. No te mekameka maata i te tu o te Atua kare rava tetai tangata e ora kia akara atu iaia. Inara, kua tuku a Iehova i tona “rima” ki rungao ia Mose ei tapoki paruru me aere vaitata mai Aia na te pae, i te akara anga na te taangaanga anga i tetai angera. I reira kua akatika a Iehova ia Mose kia kite i te marama o teia mamaanga mai o te kaka tu-Atua. Kua tuatua katoa atu a Iehova kia Mose na roto i tetai angera. Te akataka maira te Pipiria i tei tupu i muri ake: “E kia eke mai a Mose ki raro mei runga i te maunga ra ko Sinai . . . te kakā ra tona kiri mata, koia i karangaranga [kia Iehova].”​—Exodo 33:18–​34:7, 29.

2. Eaa ta te apotetoro ko Paulo i tata no runga i te kaka ta te au Kerititiano e akaata ra?

² E akamanako ana ia koe uaorai i runga i taua maunga ra korua ko Mose. Mei teaa ra te rekareka kia kite i te kaka mekameka o te Mana Katoatoa e i te akarongo anga ki tana au tuatua! E akangateiteianga tikai kia eke mai ki raro i te Maunga i Sinai i te pae ia Mose, te rotopu no te Ture koreromotu! Inara, kua kite ainei koe, e na roto i tetai au tu te akaata ra rai te au Kerititiano mou i te kaka o te Atua na roto i tetai au mataara tei maata roa atu i te mataara ta Mose i akaata ai i te reira? Ka kiteaia taua tumu akakeu anga manako ra ki roto i tetai reta ta te apotetoro ko Paulo i tata. Kua tata aia e ko te au Kerititiano akatainuia te “akaata ra mei te io rai i te kaka o Iehova.” (2 Korinetia 3:7, 8, 18, NW) I tetai tu, ko te au Kerititiano e manakonakoanga enua to ratou te akaata katoa ra i te kaka o te Atua.

Akapeea te Au Kerititiano me Akaata i te Kaka o te Atua

3. Akapeea i rauka ai ia tatou te kite ia Iehova na roto i te au mataara kare i rauka ana ia Mose?

³ Akapeea e rauka ai ia tatou i te akaata i te kaka o te Atua? Kare tatou i kite ana me kore i rongo ana ia Iehova na roto i te mataara i pera ai a Mose. Inara, kua rauka ia tatou, te kite ia Iehova na roto i te au mataara kare i rauka ana ia Mose. Kare a Iesu i mama mai ana ei Mesia e tae ua atu vaitata rai e 1,500 mataiti i muri ake i te mate anga o Mose. No reira, kare e tano e kua kite a Mose e akapeea te Ture i te akatupu angaia i roto ia Iesu, ko tei mate ei akaora i te tangata nei mei te apainga kino o te ara e te mate. (Roma 5:20, 21; Galatia 3:19) Pera katoa, e meangiti ua rai ta Mose i rauka kia kite no runga i te tu mekameka o to Iehova akakoroanga, tei piri vaitata atu ki te Patireia Mesia, e te Parataito ta te reira ka apai mai i te enua nei. No reira te kite nei tatou i te kaka o Iehova, kare ki to tatou mata tikai, mari ra ki te mata o te akarongo tei akatumuia ki runga i te au apiianga Pipiria. Pera katoa, kua rongo tatou i to Iehova reo, kare na roto i tetai angera, mari ra na roto i te Pipiria, i te au Evangeria tikai, ko tei akataka taurekareka mai i te au apiianga e te angaanga orometua a Iesu.

4. (a) Akapeea te au Kerititiano akatainuia me akaata i te kaka o te Atua? (e) Na roto i teea au mataara e rauka ai i te aronga e manakonakoanga to ratou i te akaata i te kaka o te Atua?

⁴ Noatu kare te au Kerititiano e akaata maira i te kaka o te Atua na roto i te au verovero e marama maira mei to ratou au mata, e mata katakata ra to ratou ia ratou e akakite ra ki etai ke no runga i to Iehova tu kaka e te au akakoroanga. No runga i to tatou nei tuatau, kua totou te peroveta ko Isaia e ko te iti tangata o te Atua “na ratou e akakite i [to Iehova] kakā ki rotopu i te au etene.” (Isaia 66:19) Pera katoa, i roto ia 2 Korinetia 4:1, 2, ka tatau tatou: “E teianei tei ia matou mai nei teianei taoonga. . . . Kua akaruke ra matou i te au peu munangaro akama ra, e kare oki to matou i te aerenga pakari, kare oki i pikikaa i te rave anga i te tuatua a te Atua, te akameitaki nei ra matou ia matou uaorai i te akava-ngakau o te tangata ravarai, i te akakite anga atu i te tuatua-mou i mua i te aroaro o te Atua.” Te tuatua ra tikai a Paulo no runga i te au Kerititiano akatainuia, ko ratou oki te “au orometua no tetai koremotu ou.” (2 Korinetia 3:6, NW) Inara kua akatupu ta ratou angaanga orometua i tetai akakeuanga ki runga i te manotinianga tei rauka te manakonakoanga no te ora mutu kore i te enua nei. Te o maira ki roto i te angaanga orometua a nga pupu roa ai te akaata anga i te kaka o Iehova kare i roto anake ua i ta ratou e apii ra mari ra i roto katoa i te tu o to ratou oraanga. Na tatou teia apainga e e akameitakianga teia na tatou kia akaata mei te io rai i te kaka o te Atua Teitei Rava!

5. Eaa ta to tatou puapinga pae vaerua e akapapu maira?

⁵ Teia tuatau, te tutu aereia nei te tuatua meitaki kaka o te Patireia o te Atua ki te au pa enua ravarai tei tangataia, mei ta Iesu i totou. (Mataio 24:14, NW) Te au tangata no te pa enua ravarai, te au kopu ravarai, te au iti tangata ravarai, e te au reo katoa kua ariu maruarua mai ki te tuatua meitaki e kua taui i to ratou au oraanga kia rauka i te rave i te anoano o te Atua. (Roma 12:2; Apokalupo 7:9) Mei te au Kerititiano mua rai, kare e rauka ia ratou kia kore e tuatua no runga i te au apinga ta ratou i kite e i akarongo. (Angaanga 4:20) Tere atu i te ono mirioni tangata, maata atu i to tetai ua atu tuatau i roto i te tuatua enua o te tangata, te akaata nei i te kaka o te Atua i teia tuatau. Ko koe ainei tetai i roto ia ratou? Te oronga maira te turanga puapinga pae vaerua o te iti tangata o te Atua i te akapapuanga no ta Iehova akameitakianga e te paruruanga. E maata roa atu te akapapuanga e tei rungao te vaerua o Iehova ia tatou me akamanakoia atu te au mana ririnui e taangaangaia nei i te patoi ia tatou. Ka akara ana tatou i teianei e no teaa ra.

Kare e Rauka i te Akamuteki i te Iti Tangata o te Atua

6. No teaa ka anoanoia ai te akarongo e te mataku kore kia rauka i te turuturu atu ia Iehova?

⁶ Mei te mea e kapikiia mai koe ei kite i roto i te akavaanga i te patoi atu i tetai tangata rave kino viivii. Kua kite koe e e akaerenga ririnui ta tera tangata rave kino e ka taangaanga i te au ravenga ravarai i te arai ia koe mei te akaari pu ua anga iaia. Noou kia tu ei kite i te patoi atu i taua tangata rave kino ra ka anoanoia te tu mataku kore pera katoa te irinakianga papu e ka paruru mai te au mana akaaere ia koe mei iaia. Tei roto katoa tatou i tetai turanga mei te reira. I te akakitekite anga no runga ia Iehova e tona au akakoroanga, ka patoi atu tatou i te Tiaporo ko Satani, i te akaari pu ua anga iaia ei ta tangata e ei pikikaa ko tei arataki ke i to te ao nei. (Ioane 8:44; Apokalupo 12:9, NW) Noou kia turuturu atu ia Iehova e te patoi atu i te Tiaporo ka anoanoia te akarongo e te mataku kore.

7. Mei teea ra te ririnui i ta Satani akakeuanga, e eaa tana e titau ra i te rave?

⁷ E tika, e ko Iehova oki, Tei Teitei. E teitei openga kore atu tona mana i to Satani. Kia papu ia tatou e kare e rauka anake ua ia Iehova mari ra te inangaro katoa ra aia i te paruru ia tatou ia tatou e tavini tiratiratu ra iaia. (2 Paraleipomeno 16:9) Inara, ko Satani te tutara o te au temoni e o teianei ao tei takake mai mei te Atua. (Mataio 12:24, 26; Ioane 14:30, NW) Kua akanooia ki te tuanga o te enua nei e ma te ki i te “riri maata,” te patoi pakari nei a Satani i to Iehova au tavini e te taangaanga nei i te ao i raro i tana akaaereanga kia topiri i te vaa o te aronga katoatoa e tutu aere ra i te tuatua meitaki. (Apokalupo 12:7-9, 12, 17, NW) Akapeea ra aia i te rave anga i teia? Na roto i nga mataara e toru.

8, 9. Akapeea a Satani i te taangaanga anga i te aroa tarevake, e no teaa i tau ei kia matakite meitaki tatou i te iki anga i to tatou au taeake?

⁸ Tetai mataara e titau ana a Satani i te akaariu ke ia tatou koia oki na roto i te au apiapianga o te oraanga. Ko te tangata i teia au tuatau openga e aronga noinoi moni, e aronga akaperepere ia ratou uaorai, e aronga anoano ua i te au mea e navenave ei ra. Kare ratou i te aronga anoano i te Atua. (2 Timoteo 3:1-4) No te varenga ua ki te au mea o te oraanga i te au ra, ko te maataanga i te tangata “kare rava i akarongo” i te tuatua meitaki e apai atu nei tatou kia ratou. Kare ua ratou e inangaro mai ana i te apii i te tuatua mou o te Pipiria. (Mataio 24:37-39, NW) Ka piri mai oki taua tu ra, e ka akavarenga ia tatou ki roto i tetai turanga varevarea moe i te pae vaerua. Me akatika tatou ia tatou uaorai kia akatupu i te inangaro no te au apinga materia e te au mea navenave o te oraanga, ka meangiti ua to tatou inangaro i te Atua.​—Mataio 24:12, NW.

⁹ No teia tumu nei, kia matakite meitaki te au Kerititiano i te iki anga i te aronga ta ratou ka piri atu. “Ko tei kapiti katoa i tona aerenga ki to te aronga pakari ra, ka pakari katoa ïa,” i tata maira te Ariki ko Solomona, “ko tei kapiti ra ki te aronga neneva ra, e mate ïa.” (Maseli 13:20) Kia ‘aaere’ tatou ma te aronga e akaata ra i te kaka o te Atua. E mea mataora tikai kia akapera! Ia tatou e akaputuputu kapiti ra ma to tatou au tungane e te au tuaine pae vaerua i ko i ta tatou au uipaanga e tetai au taime ke atu ka akamaroiroiia tatou e to ratou aroa, to ratou akarongo, to ratou rekareka, e to ratou tu pakari. Ka akaketaketa taua tu taokotaianga meitaki ra i to tatou akakoroanga kia akaperepere i ta tatou angaanga orometua.

10. Na teea au mataara a Satani i te taangaanga anga i te taitotioanga ki runga i te aronga e akaata ra i te kaka o te Atua?

¹⁰ Te rua o te mataara e titau ana a Satani i te tapu i te au Kerititiano katoatoa mei te akaata anga i te kaka o te Atua koia oki na roto i te taitoitoanga. Kare teia ravenga i te mea poitirere. I tona taime e angaanga orometua ra i te enua nei, kua taitoitoia ana a Iesu​—kua kataia, kua aviriia, kua akariroia ei mea kangakanga, kua takinga kinoia, e te tutua katoaia ki te uavare. (Mareko 5:40; Luka 16:14; 18:32) Kua akariro katoaia te au Kerititiano ei au mea avirianga. (Angaanga 2:13; 17:32) Te aro atu nei rai te au tavini o Iehova i taua tu akakino ra. Kia tau ki te apotetoro ko Petero, ko te tikaanga, ka karangaia ratou, e e au “peroveta pikikaa.” “Kia tae ki te au rā openga ra,” i akakite ei a Petero, “e kitea mai ei e aronga taitoito, i te akono anga i ta ratou uaorai anoano, E te tuatua anga mai e, Teiea ua te aerenga mai nona i karangaia ra? te vai ua nei rai oki te au mea katoa nei mei te maani anga mairai o te enua ra.” (2 Petero 3:3, 4) Te taitoitoia nei te iti tangata o te Atua e kare e kite ana i te turanga tika tikai. Te manakoia ra te au turanga akono tau o te Pipiria e kua taito. Ki te manganui, e tuatua neneva ua rai te karere ta tatou e tutu aere nei. (1 Korinetia 1:18, 19) Ei au Kerititiano, penei ka aro atu tatou i te taitoitoanga i te apii, i te ngai angaanga, e i roto tikai i te pamiri i tetai au taime. Kare i akaparuparuia, ka rave ua atu rai tatou i te akaata i te kaka o te Atua na roto i ta tatou tutuanga, i te kite anga mei ia Iesu rai e e tuatua mou te Tuatua a te Atua.​—Ioane 17:17.

11. Akapeea a Satani i te taangaanga anga i te takinga kino i te titau anga kia akamuteki i te au Kerititiano?

¹¹ Te toru o te ravenga ta te Tiaporo e taangaanga ana i te tauta anga kia akamuteki ia tatou koia oki ko te patoianga e te takinga kinoanga. Kua akakite a Iesu ki tana au pipi: “I reira te tangata e tuku ei ia kotou no te mate e ka tamate ia kotou, e riro oki kotou ei makitakita anga na te pa enua ravarai no toku nei ingoa.” (Mataio 24:9, NW) E tikai, e ei Au Kite o Iehova, kua aro atu ana tatou i te au takinga kinoanga pakari i te au tuanga e manganui o te enua nei. Kua kite oki tatou e kua roa akenei to Iehova akakite anga e ka tupu te makitakitaanga, me kore te ke i rotopu i te aronga e tavini ra i te Atua e te aronga e tavini ra i te Tiaporo ia Satani. (Genese 3:15) Kua kite katoa tatou e na te tamou marie anga i te tu tau i raro ake i te timataanga, te akakite papu ra tatou i te tu tika tikai o to Iehova tu ngateitei i te ao katoa e pini ua ake. Ka riro te kite anga i teia i te akaketaketa ia tatou i raro ake i te au turanga kino roa atu. Kare rava e rauka i te takinga kinoanga i te akamuteki takiri ia tatou me tamou marie tikai tatou i te akaata i te kaka o te Atua.

12. No teaa ra tatou ka pereperekavana ai ia tatou e vai akarongo mou ra i te aro atu anga i ta Satani takinga kinoanga?

¹² Te patoi ra ainei koe i te akavareanga a teianei ao e te vai akarongo mou ra noatu te taitoitoanga e te patoianga? I na e tumuanga tau toou kia pereperekavana. Kua akapapu atura a Iesu ki te aronga ka aru iaia e: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.” (Mataio 5:11, 12) Na toou akakoromaki e akapapu mai e tei rungao te vaerua tapu ririnui o Iehova ia koe, i te akamaroiroi ia koe kia akaata i tona kaka.​—2 Korinetia 12:9.

No ko Mai ia Iehova te Akakoromaki

13. Eaa te tumu maata i akakoromaki ei tatou i roto i ta tatou angaanga orometua Kerititiano?

¹³ Tetai tumu maata e akakoromaki nei tatou i roto i te angaanga orometua koia oki no to tatou aroa ia Iehova e te rekareka nei i te akaata i tona kaka. E mea inangaro na te tangata i te aru i te aronga ta ratou e aroa e e akangateitei ra, e kare atu ei mari ra ko te Atua ko Iehova tei puapinga maata atu i te aru. No tona uaorai aroa maata, kua tono mai aia i tana Tamaiti ki te enua nei kia akakite i te tuatua mou e kia akaora i te tangata nei tei akarongo. (Ioane 3:16; 18:37) Mei te Atua oki, te anoano nei tatou e kia rauka i te au tu tangata katoatoa ra te tataraara e te ora; e no reira oki tatou e tutu aere atu ei kia ratou. (2 Petero 3:9) Na teia anoano, ma ta tatou ikianga papu kia aru i te Atua, e akakeu ia tatou kia aruaru atu rai i te akaata anga i tona kaka na roto i ta tatou angaanga orometua.

14. Akapeea a Iehova i te akamaroiroi anga ia tatou kia akakoromaki i roto i ta tatou angaanga orometua?

¹⁴ Inara, i te openga, ko to tatou maroiroi i te akakoromaki i roto i te angaanga orometua Kerititiano no ko mai te reira ia Iehova. Nana e utuutu ana e e akamatutu mai ana ia tatou na roto i tona vaerua, tana akaaerenga, e tana Tuatua, te Pipiria. Na Iehova i “oronga mai i te akakoromaki” ki te aronga tei puareinga ua i te akaata i tona kaka. E pau mai ana aia i ta tatou au pure e te oronga mai i te pakari kia rauka ia tatou i te akono atu i te au timataanga. (Roma 15:5, NW; Iakobo 1:5) Pera katoa, kare a Iehova e tuku ua ia tatou kia rokoia e tetai ua atu timataanga te kare e rauka i te akakoromaki. Me irinaki tatou ia Iehova, ka akatupu aia i te akapuanga kia rauka ua atu rai ia tatou i te akaata i tona kaka.​—1 Korinetia 10:13.

15. Eaa te tauturu maira ia tatou kia akakoromaki?

¹⁵ Te oronga maira te akakoromaki i roto i ta tatou angaanga orometua i te akapapuanga e tei rungao te vaerua o te Atua ia tatou. Kia akatutu atu: Penei kua pati atu tetai tangata ia koe kia tua i tetai tu varaoa mei tera are ki tera are, kare e tiati. Kua akakiteia kia koe kia rave i teia i roto i toou uaorai taime e naau rai e tutaki. Tetai katoa, kare i roa i muri mai kua kite koe e kare e maata ana te tangata e inangaro ra i taau varaoa; e te patoi katoa ra tetai papaki i taau tautaanga kia tua i te reira. I toou manako e ka rave ua atu rai koe i taua angaanga ra i tera marama e tera marama e i tera mataiti e tera mataiti? Kare paa. Inara, penei kua tauta ana koe uaorai i te akakitekite i te tuatua meitaki i toou uaorai taime e naau rai i tutaki no tetai au mataiti, e no te au rau ngauru mataiti katoa. No teaa ra? Kare ainei e no toou aroa ia Iehova e na roto i tona vaerua kua akameitaki mai aia i taau au tautaanga na te tauturu anga ia koe kia akakoromaki? Tika rava!

E Angaanga kia Akamaaraia

16. Te akakoromaki i roto i ta tatou angaanga orometua eaa ra te aiteanga no tatou e no te aronga tei akarongo mai kia tatou?

¹⁶ Ko te angaanga orometua o te koreromotu ou e apinga aroa akaaite koreia. (2 Korinetia 4:7) Akapera rai, te angaanga orometua Kerititiano e raveia nei e te mamoe ke atu takapini i te ao katoa nei mei te poe akaperepereia rai. Ia koe e akakoromaki ua atura i roto i taau angaanga orometua, ka rauka ia koe, mei ta Paulo i tata kia Timoteo, i te “akaora ia koe uaorai e te aronga e akarongo mai ia koe.” (1 Timoteo 4:16, NW) E akamanako ua ana i te aiteanga o te reira. Ko te tuatua meitaki taau e tutu aere ra te oronga ra ki etai ke i te tuatau kia ora e tuatau ua atu. Ka rauka ia koe i te akatupu i tetai tatua ketaketa no te pirianga taeake ki te aronga taau e tauturu ra i te pae vaerua. E akamanako ana mei teaa ra te rekareka kia ora e tuatau ua atu i roto i te Parataito ma te aronga taau i tauturu ana kia kite no runga i te Atua! Papu e kare roa e ngaropoina ia ratou taau au tautaanga i te tauturu ia ratou. E marekaanga maata tikai!

17. No teaa ra to tatou nei tuatau i riro ei ei mea takake rava i roto i te tuatua enua o te tangata nei?

¹⁷ Te noo nei koe i roto i tetai tuatau takake rava i roto i te tuatua enua o te tangata. Kare rava te tuatua meitaki e tutu akaouia i rotopu i tetai ao akatakakeia mei te Atua. Kua noo ana a Noa i roto i taua tu ao ra, e kua kite aia i te ngaro ke anga te reira. Mei teaa ra tona pereperekavana i te kite anga e kua rave aia ma te akarongo mou i to te Atua anoano i te tarai anga i tetai araka, tei arataki atu ki te akaoraanga iaia e tona ngutuare! (Ebera 11:7) Ka rauka katoa ia koe taua rekarekaanga. E akamanako ua ana mei teaa ra toou manako ngakau i roto i te ao ou ia koe e akamanako ra no runga i taau angaanga i teia au ra openga nei, i te kite anga e kua rave koe i tei rauka ia koe i te akatupu anga i te au anoano o te Patireia.

18. Eaa te akapapuanga e te akamaroiroianga ta Iehova e oronga maira no tona au tavini?

¹⁸ No reira, kia tamou marie atu rai tatou, i te akaata anga i te kaka o te Atua. Me akapera tatou ka riro te reira ei mea te ka maara ua rai ia tatou e mutu kore ua atu. Ka maara katoa rai ia Iehova ta tatou au angaanga. Te oronga maira te Pipiria i teia akamaroiroianga: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou. E te inangaro nei matou kia akakite tamou marie rai kotou katoa i taua maroiroi ra, kia rauka te irinaki kite pu tikai e tae ua atu ki te openga: Kia kore e akatau, ei aru ra i te aronga i rauka tei tuatuaia maira i te akarongo e te akakoromaki.”​—Ebera 6:10-12.

Ka Rauka Ainei ia Koe te Akataka?

• Akapeea te au Kerititiano me akaata i te kaka o te Atua?

• Eaa tetai au ravenga ta Satani e taangaanga ana i roto i tana au tautaanga kia akamuteki i te iti tangata o te Atua?

• Eaa te akapapuanga e kitea nei e tei rungao ia tatou te vaerua o te Atua?

[Tutu i te kapi 15]

Akaata mai te mata o Mose i te kaka

[Au Tutu i te kapi 16, 17]

E akaata tatou i te kaka o te Atua i roto i ta tatou angaanga orometua