Teia Taua Ra e Orai!

“I na, teia taua tuatau tau ra, teia taua rā e oraʼi ra.”​—2 KORINETIA 6:2.

1. Eaa te umuumuia ra no tetai turanga marekaia ma te Atua raua ko Karaiti?

KUA akanooia e Iehova tetai ra no te akavaanga i te au tangata nei. (Angaanga 17:31) Me kia riro te reira ei tetai ra ei ora no tatou, ka umuumuia tetai turanga marekaia no tatou ma ia katoa ra e tana Akava i akataoongaia, koia Iesu Karaiti. (Ioane 5:22) Te umuumuia ra te tu akono rotai ma te Tuatua a te Atua e taua turanga ra e te akarongo oki te ka akakeu ia tatou kia tauturu ia etai ke ra kia riro ei au pipi mou na Iesu.

2. Eaa ra te ao o te tangata nei i taka ke ei mei te Atua ra?

² No te akatuangaia i te ara, kua riro te au tangata o te ao nei kia akataka keia mai i te Atua ra. (Roma 5:12; Ephesia 4:17, 18) No reira, ka rauka anake i te aronga ta tatou i ako atura, te ora me ka riro ratou kia akaongiia kiaia ra. Kua akataka meitaki maira te apotetoro ko Paulo i teia i tana tataanga ki te au Kerititiano i Korinetia ra. E akara matatio tatou ia 2 Korinetia 5:10–​6:10 kia kite eaa ta Paulo i tuatua no te akavaanga, te akaongi anga ma te Atua ra, e te ora oki.

“I Ako Atu ei Matou nei i te Tangata”

3. Akapeea ta Paulo ‘ako anga i te au tangata,’ e eaa tatou i tau ei kia rave i teia i teianei tuatau?

³ Kua kapiti atura Paulo i te akavaanga ma te akoanga i tana tata anga: “E mama katoatoa atu oki tatou ki mua i te akavaanga a te Mesia e tikaʼi; kia rave te tangata ravarai i tei tau i te au mea i raveia e ia i roto i te kopapa nei, te meitaki e te kino. E no te mea kua kite matou i te mea mataku ra i te Atu, i ako atu ei matou nei i te tangata.” (2 Korinetia 5:10, 11) ‘Kua ako atura te apotetoro i te tangata’ na te tutuanga i te tuatua meitaki. Ka peea oki tatou? I te mea te aro atu nei tatou i te openga o teianei akatereanga kino o te au mea nei, ka tau tatou kia rave pakari i te ako anga ia etai ke ra kia rave i te au takainga te umuumuia ra kia rauka ta Iesu akavaanga akaperepere e te mareka anga oki a te Tumu o te ora, koia te Atua ko Iehova.

4, 5. (a) Eaa tatou i kore ei e tau kia akaparau i ta tatou au angaanga i rave i te tavinianga i Iehova ra? (e) I akapeea i riro ei e kua akatietie a Paulo “no te Atua”?

⁴ Inara, me kua akameitakiia e te Atua ra ta tatou angaanga orometua, kare tatou e tau kia akaparau. I Korinetia ra kua akaparau tetai papaki ia ratou uaorai me kare i etai tangata ke ra, e kua akatupu i te tataka keanga i roto i te putuputuanga. (1 Korinetia 1:10-13; 3:3, 4) I te akakiteanga i teia turanga, kua tata a Paulo: “Kare ra matou e akameitaki akaou ia matou uaorai ia kotou na, kia rauka ra to kotou rekareka anga ia matou nei, ei tuatua anga atu na kotou i te aronga akaparau i te tu i vao ake kare i te ngakau ra. Te tu ke nei matou, no te Atua ïa; e te akono mei matou, no kotou ïa.” (2 Korinetia 5:12, 13) Kare o te aronga akatietie manako anga i te taokotai anga e te meitaki pae vaerua o te putuputuanga. Te anoano ra ratou kia akaparau i te mama anga o vao ua kare i te tauturuanga i to ratou au oa akarongo ra kia akatupu ngakau meitaki ki mua i te Atua ra. No reira, kua akaapa atura Paulo i te putuputuanga e tuatua atu ra i muri ake: “Ko tei akatietie ra, kia akatietie aia i te Atu.”​—2 Korinetia 10:17.

⁵ Kare ainei a Paulo uaorai i akaparau? Penei kua manako tetai papaki e i pera aia no tana i tuatua ra e koia tetai e apotetoro. Inara kua akaparau aia “no te Atua.” Kua akaparau aia no te au apinga tei tataia nona ei tetai apotetoro, kia kore ei to Korinetia e akaruke ia Iehova ra. Kua rave Paulo i teia ei akaoki mai ia ratou ki te Atua no te mea te akaariuke ra ia ratou ki te aerenga tarevake. (2 Korinetia 11:16-21; 12:11, 12, 19-21; 13:10) Inara, kare a Paulo i tauta tamou marie kia akamanako atu te au tangata ravarai i tana au angaanga i rave ra kia oti.​—Maseli 21:4.

Te Akakeu ra Ainei to Karaiti Aroa ia Koe?

6. Eaa te tupuanga tau no to Karaiti aroa ia tatou?

⁶ Ei tetai apotetoro mou, kua apii atu a Paulo ia etai ke ra no runga i to Iesu atinga oko. Kua akakeu te reira i to Paulo oraanga, no te mea kua tata aia: “Te riro nei oki matou i te aroa o te Mesia ra, no te mea te karanga nei matou e, i mate te tangata okotai no te tangata ravarai, e mate to te tangata katoa nei i reira; E i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.” (2 Korinetia 5:14, 15) Mei teaa ra te aroa ta Iesu i akaari mai i te orongaanga i tona oraanga no tatou! E tika tikai ka tau te reira kia riro ei mana akakeu anga i to tatou au oraanga. Te akameitaki anga kia Iesu no te orongaanga i tona oraanga no tatou ka tau ia kia akakeu ia tatou kia rave maroiroi i te akakitekite anga i te tuatua meitaki no te ora ta Iehova ra i oronga mai na roto i tana Tamaiti akaperepere. (Ioane 3:16; akaaite ia Salamo 96:2.) Te riro nei ainei “te aroa o te Mesia ra” kia akakeu ia koe kia rave maroiroi i te tutuanga Patireia e te angaanga akariro anga tangata ei pipi?​—Mataio 28:19, 20.

7. Eaa te aite anga e kare “e akono ua atu i te tangata i te akonoanga o te kopapa nei”?

⁷ Na te taangaanga i to ratou oraanga na roto i tetai tu te akaari ra i te akameitaki anga no ta Karaiti i rave ra no ratou, te akono ra te aronga akatainuia i ‘te ora anga kare no ratou uaorai, mari ra nona.’ “E teianei,” ta Paulo i tuatua, “kare atura matou e akono ua atu i te tangata i te akonoanga o te kopapa nei: e kua akono matou i te Mesia i te akonoanga o te kopapa ra, teianei ra kare matou e akono akaou iaia i reira.” (2 Korinetia 5:16) Kare te au Kerititiano e tika kia manako atu i te au tangata na roto i te tu kopapa, penei na te akaperepereanga te au ngati Iuda ki runga ake i te au Kenitara me kare te apinganui ki runga ake i te putaua. Kare te aronga akatainuia “e akono ua atu i te tangata i te akonoanga o te kopapa nei,” no te mea ko to ratou pirianga i te pae vaerua ma te aronga akarongo ra te mea puapinga maata. Te aronga tei ‘akono ra ia Karaiti i te akonoanga o te kopapa’ kare i te au tangata ua tei akara ra ia Iesu iaia i te enua nei. Noatu rai mei tetai papaki tei manakonako ra i te Mesia i akara ia Karaiti i te tumu anga o tona kopapa, kare ratou e tau kia pera akaou. Kua oronga aia i tona kopapa ei tetai oko e kua akatuakaouia ei tetai vaerua oronga oraanga. Ko etai atu tei akatuia mai ki te oraanga i te rangi ra kua oronga ua i to au kopapa ma te kore ua i akara mata ia Iesu Karaiti i te tu kopapa.​—1 Korinetia 15:45, 50; 2 Korinetia 5:1-5.

8. Akapeea te aronga tataki tai i riro ei ‘tei roto i te Mesia ra’?

⁸ I te tuatua ua anga i te aronga akatainuia ra, kua tuatua katoa a Paulo: “Tei roto anake te tangata i te Mesia ra, kua riro ïa ei tangata ou: kua kore te au mea taito ra; i na, kua riro te au mea ravarai ei mea ou.” (2 Korinetia 5:17) Kia riro e “tei roto anake te tangata i te Mesia ra” te aite anga kia rekareka i tetai taokotai anga ma ia katoa ra. (Ioane 17:21) Kua tupu mai teianei pirianga no taua tangata ra i ta Iehova akatae mai anga iaia ki tana Tamaiti e kua akaanauia mai taua tangata ra ma te vaerua tapu. Ei tamaiti na te Atua tei anauia mai i te vaerua tapu, kua riro aia “ei mea ou” ma te manakonako anga no te kapitianga ma Karaiti i te Patireia o te rangi ra. (Ioane 3:3-8; 6:44; Galatia 4:6, 7) Kua orongaia ki taua au Kerititiano akatainuia ra tetai angaanga meitaki roa.

“E Akaongi Kotou i te Atua”

9. Eaa ta te Atua ra i rave kia raukai te akaongi anga kiaia?

⁹ Mei teaa ra ta Iehova akaperepere anga i te “mea ou” ra! Te tuatua ra Paulo: “Na te Atua ra taua au mea katoa, ra, ko tei akaongi ia tatou iaia uaorai ia Iesu Mesia nei, e kua tuku mai oki ia matou i te taoonga akaongi nei. Teia oki taua tuatua nei, ei roto te Atua i te Mesia i te akaongi anga i to teianei ao iaia uaorai, i te uri kore anga atu i to ratou ara ia ratou; e kua tuku mai oki te tuatua akaongi ra ia matou nei.” (2 Korinetia 5:18, 19) Kua akataka keia te au tangata mei te Atua ra i to Adamu ara anga mairai. Inara kua rave aroa ua a Iehova i te tamata anga i te akatueraanga i te mataara no te akaongi anga na roto i te atinga o Iesu ra.​—Roma 5:6-12.

10. Kua oronga a Iehova i te angaanga akaongi anga kiaai ma, e eaa ta ratou i rave ei akatupu anga i te reira?

¹⁰ Kua oronga a Iehova i te angaanga ­orometua no te akaongi anga ki te aronga akatainuia ra, kua rauka ia Paulo kia tuatua: “E teianei e karere matou na te Mesia, mei te mea e te ako nei te Atua i te tangata ia matou nei; ei tuā matou no te Mesia, i te ako anga atu i te tangata e, e akaongi kotou i te Atua.” (2 Korinetia 5:20) I te au tuatau taito ra, kua tono atu i te au karere te maata anga i te tuatau kia akara me ka rauka te akakore i te tamaki anga. (Luka 14:31, 32) I te mea ko teianei ao tangata nei kua akataka keia mai i te Atua ra, kua tomo atu aia i tana au karere akatainuia kia akakite ki te au tangata i tana au akapapa anga no te akaongi anga. Ei aronga tua no Karaiti, te pati ra te aronga akatainuia e: “E akaongi kotou i te Atua.” Ko teianei patianga e raurauanga aroa ia kia kimi i te au ma te Atua ra e kia ariki oki i te ora tana e oronga maira na roto ia Karaiti.

11. Na roto i te oko, koai ma i te openga ra te ka rauka ia ratou tetai turanga tuatua tika ki mua i te Atua?

¹¹ Te au tangata katoa te akono ra i te akarongo i te oko ka rauka kia akaongiia ki te Atua. (Ioane 3:36) Te tuatua ra Paulo: “Kua akariro oki aia [a Iehova] i tei kore i kite i te ara ra [ia Iesu], ei tarangaara na tatou: kia akariroia tatou ei aronga tuatua-tika i te Atua iaia ra.” (2 Korinetia 5:21) Ko te tangata apa kore ua ko Iesu tei orongaia no te ara a te au anaunga katoatoa a Adamu tei akaoraia maira i te ara akatuangaia ra. Ka riro ratou ei “aronga tuatua-tika i te Atua,” ia Iesu ra. Ko teianei tu tuatua tika, me kare turanga tuatua tika ki mua i te Atua ra, ka riro mai i te 144,000 aronga akatuangaia o Karaiti na mua. I te tuatau o to Karaiti Tutara Anga Tauatini Mataiti ra, ka riro mai tetai turanga tuatua tika ei au tangata apa kore ua i te au tamariki a te Metua no te tuatau mutu kore ra, koia Iesu Karaiti. Nana e taaki ake ia ratou ki tetai turanga tuatua tika i roto i te tu apa kore ua kia raukai ia ratou te tiratiratu ki te Atua e kia rauka oki te apinga orongaia mai no te ora mutu kore ra.​—Isaia 9:5; Apokalupo 14:1; 20:4-6, 11-15.

“Taua Tuatau Tau Ra”

12. Eaa te angaanga puapinga maata te raveia ra e te au karere a Iehova e te au karere katoa oki?

¹² No te ora, ka tika tatou kia rave kia rotai ma te au tuatua a Paulo ra: “E teianei, te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra: Te karanga ra oki aia e, ‘Kua akarongo au ia koe i te tuatau tau ra, e kua tauturu atu au ia koe i te rā e oraʼi ra:’ i na, teia taua tuatau tau ra, teia taua rā e oraʼi ra.” (2 Korinetia 6:1, 2) Kare ta Iehova au komono akatainuia e tona au karere o te “au mamoe ke atu” ra, e ariki puapinga kore ua i te aroa ua o to ratou Metua i te rangi ra. (Ioane 10:16) Na ta ratou tu akono tika e te angaanga orometua maroiroi i teianei “tuatau tau” nei, te kimi ra ratou i te akaperepere tu-Atua e te akakitekite ra i te au tangata o te enua nei e ko teia “taua rā e oraʼi ra.”

13. Eaa te aiteanga o ta Isaia 49:8 ra, e akapeea te akatupu anga mua i te reira ra?

¹³ Kua akakite mai a Paulo ia Isaia 49:8, te tatau ra: “Te na ko mairā Iehova, Kua akarongo au ia koe i te tuatau tau ra; kua tauturu au ia koe i te rā e oraʼi ra: e naku e akaora ia koe, e oronga au ia koe ei koreromotu na te au tangata nei; ei akāū aere i te enua, kia akanooia te au kainga i akaruke uaia ra.” Kua akatupu muaia teia totou i te matara anga mai te au tangata o Iseraela ra mei te tuikaaanga i Babulonia e kua oki atura i muri iora ki to ratou enua kainga tei akataneaia ra.​—Isaia 49:3, 9.

14. Akapeea te akatupu anga ia Isaia 49:8 i ta Iesu i rave ra?

¹⁴ I te akatere atu anga i te tupu anga te totou a Isaia ra, kua oronga mai a Iehova i tona “tavini” ia Iesu “ei turama no te etene, ei ora naku e tae ua atu ki te openga mai o te enua nei.” (Isaia 49:6, 8; akaaite ia Isaia 42:1-4, 6, 7; Mataio 12:18-21.) Te “tuatau tau ra” i te akara anga te taiku ra i to Iesu tuatau iaia i te enua nei. Kua pure aia, e kua “akarongo” te Atua iaia. Kua riro te reira ei ‘tetai rā e oraʼi’ a Iesu no te mea kua tamou marie aia i te tiratiratu apa kore e no reira kua “riro atura ïa ei tumu no te ora mutu kore no te aronga katoa e akarongo iaia ra.”​—Ebera 5:7, 9; Ioane 12:27, 28.

15. Mei naea mai ta te au Iseraela vaerua ra akapapu anga i to ratou tau no te aroa ua o te Atua, e eaa te akakoro anga?

¹⁵ Kua akapiri atura Paulo ia Isaia 49:8 ki te au Kerititiano akatainuia ra, ma te raurauanga ia ratou e ‘auraka e aere ke i te akakoro anga o to te Atua ra aroa ua’ na te kore e kimi i tona mareka anga i “te tuatau tau” e te “rā e oraʼi ra” tana e oronga maira. Kua tuatua katoa a Paulo: “i na, teia taua tuatau tau ra, teia taua rā e oraʼi ra.” (2 Korinetia 6:2) Mei te Penetekote 33 T.N. mairai, kua umuumuia te au Iseraela vaerua ra kia akapapu i to ratou tu tau no te aroa ua o te Atua ra kia riro ei “te tuatau tau” ei tetai “rā e oraʼi ra” no ratou.

‘Akatikaanga ia Tatou Uaorai ei Rave Angaanga na te Atua’

16. I raro ake i teea au turanga timataanga ta Paulo akatika anga iaia uaorai ei rave angaanga na te Atua?

¹⁶ Ko tetai papaki o te aronga tei kapitiia atura ma te putuputuanga Korinetia kare i te mea tau no te aroa ua o te Atua ra. Kua tuatua akakino ratou ia Paulo i te tauta anga kia akakore i tona mana apotetoro, noatu rai i kopae ke aia i te “tuku i te turorianga.” Kua akakite ua ra aia iaia uaorai e e rave angaanga na te Atua “i te akakoromaki maata, i te mate, i te apiapi, i te tumatetenga. I te pāpā, i te tapeka, i te aue, i te angaanga, i te tapapa, i te akakoreanga kai.” (2 Korinetia 6:3-5) I muri iora, kua akamanako atura Paulo e me e aronga rave angaanga tona au enemi ra “e maata atu au” no te maata atu tona mamaeanga i te tapekaanga, te papaanga, te au tu kino, e te au taka keanga ra.​—2 Korinetia 11:23-27.

17. (a) Na te akakite anga i teea au tu e raukai ia tatou kia akatika ia tatou uaorai ei rave angaanga na te Atua? (e) Eaa “te taoonga, ko te tuatua-tika” ra?

¹⁷ Mei ia Paulo ratou ko tona au oa ra, ka rauka ia tatou te akatika ia tatou uaorai ei aronga rave angaanga i te Atua ra. Naea? “I te viivii kore,” me kare na te tu ma, e na te raveanga kia rotai ma te kite tika i te Pipiria ra. Ka rauka ia tatou kia akatika ia tatou uaorai na “te akakoromakianga roa,” te akakoromaki anga marie i te au tarevake me kare te au akakino anga, e na te “takinga meitaki” oki ia tatou e rave ra i te tauturu anga ia etai ke ra. Pera katoa oki, ka rauka ia tatou kia akatika ia tatou uaorai ei rave angaanga i te Atua na te arikianga i te arataki anga a tona vaerua, i te akakiteanga i te “aroa pikikaa kore,” na te tuatuaanga te tuatua mou, e te irinakianga kiaia no te mana kia rave i te angaanga ra. E meitaki katoa oki kia manakoia e, kua akakite katoa a Paulo i tona turanga tika no te angaanga “i te taoonga ra, ko te tuatua-tika, i te rima katau e te rima kaui.” I te au tamaki anga taito ra, te mea matauia na te rima katau e rave i te koke e na te kaui i mou i te paruru ra. I te raveanga tamaki i te pae vaerua i te au orometua pikikaa ra, kare a Paulo i rave i te au apinga tamaki a te kopapa ara nei​—te maro, te kikite e te akavare oki. (2 Korinetia 6:6, 7; 11:12-14; Maseli 3:32) Kua taangaanga aia i te au “taoonga” tuatua tika ra, me kare au apinga, no te akatereanga i te akamori mou ra. Ka tau katoa oki tatou kia pera.

18. Me ko tatou te aronga rave angaanga na te Atua ra, akapeea to tatou akono ia tatou uaorai?

¹⁸ Me e aronga angaanga tatou na te Atua, ka akono tatou ia tatou uaorai mei ta Paulo ratou ko tona au oa i rave ra. Ka akono tatou mei te au Kerititiano rai noatu me ka akangateiteiia e me ka kore e akangateiteiia. Kare te au ripoti kikino no tatou e tapu i ta tatou angaanga tutu aere, e kare katoa oki tatou e riro kia akatietie me ka ripoti akaperepereia. Ka tuatua ra tatou i te tuatua mou e penei ka kiteia mai no te au angaanga tau i te Atua ra. Me i roto i te tu kino roa i raro ake i te takino anga enemi, ka irinaki ra tatou ia Iehova. E ka ariki ra tatou i te ako anga ma te akameitaki.​—2 Korinetia 6:8, 9.

19. Akapeea e raukai kia ‘akariro i te aronga e manganui kia apingaia’ i te pae vaerua?

¹⁹ I te akaotianga i tana uriurianga manako no te angaanga akaongi anga, kua tuatua a Paulo nona uaorai e no tona au oa angaanga e “mei te mea te aue nei, kare ra i tivata i te rekareka; mei te mea e putaua, te akariro nei ra te tangata e manganui ei tangata apinga; mei te mea kare rava e puapinga, tei ia matou ra te au mea katoa nei.” (2 Korinetia 6:10) Noatu ra e, e au tumu to taua aronga angaanga ra kia aue no to ratou au mate, ia ratou ra te rekareka o roto roa. E putaua ratou i te pae kopapa, mari ra ‘e manganui ta ratou i akariro kia apingaia’ i te pae vaerua. Ko te tika, ‘ia ratou te au mea katoa nei’ no te mea kua apai mai to ratou akarongo i te apinga vaerua na ratou​—tae roa ki te manakonako anga kia riro ei au tamariki na te Atua ki te rangi. E ia ratou tetai oraanga apinga e te mataora ei au orometua Kerititiano. (Angaanga 20:35) Mei ia ratou ra, ka rauka ia tatou ‘te akariro i te aronga e manganui kia apingaia’ na te raveanga i te angaanga akaongi anga i teianei tikai​—i teianei ra e orai.

E Irinaki i te Ora na Iehova

20. (a) Eaa to Paulo anoano maata ra, e eaa i kore ei e taime no te kaimoumouia? (e) Eaa te akairo ra i te ra e orai i te reira te noo nei tatou?

²⁰ I ta Paulo tata anga i te rua o tana reta ki to Korinetia ra i vaitata i te 55 T.N., ko etai 15 mataiti ua te toe ra no te akatere anga ngati Iuda no te au mea ra. Kua anoano tikai te apotetoro ra i te au ngati Iuda e te au Kenitara kia riro kia akaongiia ki te Atua ra na roto ia Karaiti. Ko te reira tetai ra no te ora, e kare i te tuatau no te kaimoumou taime. E tika, tei roto tatou i tetai tuatau aiteite no tetai openga no te akatere anga o te au mea nei mei te 1914 mairai. Te angaanga i te ao katoa nei i te tutuanga i te Patireia te raveia nei i teianei te akairo maira i teia ei te ra e orai ra.

21. (a) Eaa te irava mataiti kua ikiia no te 1999? (e) Eaa ta tatou ka tau kia rave i teia ra e orai ra?

²¹ Te umuumuia ra te au tangata o te pa enua ravarai kia rongo i ta te Atua e oronga maira no te ora na roto ia Iesu Karaiti. Kare e taime no te taroaroa. Kua tata a Paulo: ‘I na, teia taua rā e oraʼi ra.’ Ka riro taua au tuatua ia 2 Korinetia 6:2 ra ei te irava mataiti no te 1999 o te Au Kite o Iehova ra. Mei teaa ra te tau, no te mea te aro atu nei tatou i tetai apinga kino rava atu i to te akapouanga o Ierusalema e tona iero oki! Tei mua vaitata akenei te openga o teianei akatereanga katoa o te au mea nei, kapiti katoa te au tangata ravarai i te enua nei. I teianei​—kare apopo​—te tuatau ia kia rave angaanga. Me te irinaki nei tatou e na Iehova te oroa, me te inangaro nei tatou iaia, e me te manako maata nei tatou i te ora anga mutu kore, kare tatou e manako kore i te akakoro anga o to te Atua ra aroa ua. Ma tetai anoano no te ngakau mai kia akangateitei ia Iehova, ka akapapu tatou na te tuatua e te angaanga oki e te manako tika ra tatou i te reira ia tatou ka tuatuai: ‘I na, teia taua rā e oraʼi ra.’

Akapeea Koe me Pau?

◻ Eaa ra te akaongi anga ma te Atua i puapinga maatai?

◻ Koai ma te au komono e te au karere te rave ra i te angaanga no te akaongi anga?

◻ Akapeea e raukai ia tatou te akatika ia tatou uaorai ei rave angaanga na te Atua?

◻ Eaa te aite anga o te irava mataiti 1999 a te Au Kite o Iehova ra kia koe?

[Au Tutu i te kapi 17]

Mei ia Paulo rai, te rave maroiroi ra ainei koe i te tutuanga e te tauturuanga ia etai ke ra kia riro kia akaongiia ki te Atua?

United States

France

Cote d’Ivoire

[Tutu i te kapi 18]

I teia ra e orai ra, tei roto ainei koe i te aronga tini te riro ra kia akaongiia ki te Atua ko Iehova?