No Iehova Mai te Ora
“Ko to matou nei Atua, ko te Atua ïa e oraʼi.”—SALAMO 68:20.
1, 2. (a) Eaa ka raukai ia tatou kia tuatua e ko Iehova te Tumu no te ora? (e) Akapeea koe me akataka ia Maseli 21:31?
KO IEHOVA te Akaora o te au tangata te inangaro ra iaia. (Isaia 43:11) Kua kite te ariki rongonui o Iseraela ko Davida i teia mei te au mea i tupu ra kiaia uaorai, e kua imene aia ma te ngakau katoa: “No ko mai te ora ia Iehova ra.” (Salamo 3:8) Kua taiku ra te peroveta ko Iona i taua au tuatua rai i te pure akatenga anga iaia i roto i te kopu o te ika maata ra.—Iona 2:9.
2 Kua kite katoa oki a Solomona tamaiti a Davida ra e ko Iehova te Tumu o te ora, no te mea kua tuatua aia: “Kua akonoia te oroenua no te rā tamaki: ko te re ra, no ko ïa ia Iehova ra.” (Maseli 21:31) I te Itinga Rotopu taito ra, na nga puakatoro e kika i te arote, na te au atini e apai i te au apainga, kua akaoro te au tangata i te au mure, e kua taangaangaia te au oroenua i te tamakianga. Inara i mua ake i te tomo anga to Iseraela ki te Enua Taputouia ra, kua akaue atu te Atua i to ratou ariki no te tuatau ki mua ra e “auraka ra aia e akamaata i te oroenua nana.” (Deuteronomi 17:16) Kare e anoanoia te au oroenua tamaki ra no te mea ka riro na Iehova e akaora i tona au tangata.
3. Eaa te au uianga te tau ra tatou kia akamanako?
3 Ko te Atu Ngateitei ko Iehova ra “te Atua ïa e oraʼi.” (Salamo 68:20) Mei teaa ra tetai manako akamaroiroianga! Inara eaa te angaanga e ‘oraʼi’ ta Iehova i rave? E koai ma tana i akaora?
Te Akaora ra Iehova i te Aronga Tuatua Tika
4. Akapeea tatou e kite ei e ka akaora a Iehova i te au tangata tau i te Atua ra?
4 Pouroa te aronga te aruaru ra i tetai aerenga tuatua tika ei au tavini akatapuia no te Atua ka rauka ia ratou te akapumaana mei ko mai i te au tuatua a te apotetoro ko Petero ra: “Kua kite mari te Atu i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate.” I te akapapuanga i teia tumu, kua tuatua a Petero e “kare [te Atua] i akaperepere i to te ao taito ra, akaora iora ra ia Noa i te tangata i ako i te tuatua-tika ra, ma etai e tokoitu ra, ka apai mai ei aia i te nina-anga ki teianei ao akono kore i te Atua ra.”—2 Petero 2:5, 9.
5. I raro ake i teea au turanga i rave ei a Noa ei “te tangata i ako i te tuatua-tika” ra?
5 E tamanako ana me ko koe uaorai tetai i roto i te au turanga i te tuatau ia Noa ra. Te vaira te au temoni akakopapaia i runga i te enua. Te akono takino ra te au anaunga o teia au angera akarongo kore i te au tangata, e “kua ki te enua i te takino-anga.” (Genese 6:1-12) Inara, kare e rauka kia oparaia a Noa kia akaruke i te angaanga a Iehova. Kareka ra, e “tangata i ako i te tuatua-tika.” Kua patu aia e tona ngutuare tangata i tetai araka, e kare oki i ekoko e ka takoreia atu te rave kino i to ratou tuatau ora anga ra. Kua akaapa to Noa akarongo i taua ao ra. (Ebera 11:7) Te aite atu nei teianei au turanga ki taua tuatau ia Noa ra, te akairo maira i teia tuatau openga nei ei tuatau openga no teianei akatereanga o te au mea nei. (Mataio 24:37-39; 2 Timoteo 3:1-5) Mei ia Noa rai, i reira, ka akapapu ainei koe ia koe ei tetai tangata ako tiratiratu i te tuatua tika i te tavinianga ma te au tangata o te Atua ra ia koe e tatari atura i te ora na Iehova?
6. Akapeea ta 2 Petero 2:7, 8 akapapu anga e ka akaora a Iehova i te aronga tuatua tika?
6 Kua oronga katoa mai a Petero i tetai atu akapapu anga e te akaora ra a Iehova i tei tuatua tika. Te tuatua ra te apotetoro e: “Akaora atura [te Atua] ia Lota tuatua-tika ra, ko tei mamae i te tuatua viivii a te aronga kino ra—Mamae atura oki te ngakau o taua tangata tuatua-tika ra, i te noo anga i roto ia ratou, i te akara anga, e te akarongo anga atu, i tera rā, e tera rā, i ta ratou tuatua-tika kore.” (2 Petero 2:7, 8; Genese 19:1-29) Kua riro te ainga tau kore ei ravenga na te aronga e au mirioni ua atu i teianei tuatau openga nei. Mei ia Lota rai, ‘te mamae ra ainei koe i te tuatua viivii a te aronga kino ra’ i te tuanga a te aronga e manganui i teia tuatau nei? Me te pera ra koe, e me te rave ra koe i te tuatua tika, penei ko koe tetai te ka akaoraia e Iehova me akaopeia teianei akatereanga kino nei.
Te Akaora ra a Iehova i Tona Au Tangata i te Aronga Takinga Kino
7. Akapeea ta Iehova ra akonoanga ma to Iseraela i Aiphiti i te akapapu anga e ka akaora aia i tona au tangata i te takinga kinoanga?
7 I te tuatau katoa e vai mai ei teianei akatereanga taito, ka tupu ra te takinga kinoanga e te taomianga enemi ki te au tavini o Iehova. Inara ka rauka kia irinaki ratou e ka akaora a Iehova ia ratou, no te mea kua akaora aia i tona au tangata takinga kinoia ra i te tuatau kua topa. E tamanako ana me ko koe tetai e ngati Iseraela tei mamae ra i te takinga kinoanga a te au rima o to Aiphiti i te tuatau ia Mose ra. (Exodo 1:1-14; 6:8) Kua ta atura te Atua ia Aiphiti ma tetai mate i muri ake i tetai. (Exodo 8:5–10:29) I te rokoia anga te tai ngauru o te mate tei akataka ke atura i te au oraanga o te au tama mua o to Aiphiti ra, kua akatika a Pharao kia akaatea atu to Iseraela ra mari ra i muri akera kua akapapa i tona au nuku vaeau e kua arumaki atu ia ratou. Inara, kare i roaia, kua akapouia aia e tona au tangata katoa i te Tai Muramura ra. (Exodo 14:23-28) Ka kapiti atu koe kia Mose e to Iseraela katoatoa ra i teia imene anga: “E toā Iehova i te tamaki: ko Iehova tona ingoa. Te au kariota o Pharao e tona ra nuku, kua uriia e ia ki raro i te tai: e te au rangatira ikiia nona ra, kua maremoia i te Tai Muramura. Kua tapokiia ratou e te moana; e topa iora ratou ki raro roa i te takere mei te toka ra.” (Exodo 15:3-5) Te tatari maira tetai tumatetenga aiteite i te aronga takinga kino katoatoa i te au tangata o te Atua i teianei tuatau openga nei.
8, 9. Mei te puka mai o te Au Akava, e oronga mai i tetai akatauanga te akapapu ra e te akaora ra a Iehova i tona au tangata i te aronga takinga kino ra.
8 No etai mataiti e manganui i muri ake i te tomo anga to Iseraela ki te Enua Taputouia, kua akono te au akava i te tuatua tau i roto ia ratou. I etai tuatau kua mamae te au tangata i raro ake i te takinga kino anga a te tangata ke ra, inara kua taangaanga te Atua i te au akava tiratiratu ra kia akaora ia ratou. Noatu ra penei kua aiteite to tatou ‘aue no te aronga tinai-mate e te aronga opara aere ia tatou nei,’ ka akaora katoa mai a Iehova ia tatou ei tona au tavini tiratiratu ra. (Akava 2:16-18; 3:9, 15) Te tika, te oronga maira te puka Pipiria o te Au Akava kia tatou i te akapapu anga no teia e no te ora maata atu ta te Atua ka oronga mai na tana Akava akataoongaia, koia Iesu Karaiti.
9 E oki akaou tatou ki te tuatau o te Akava ko Baraka. No te akamori pikikaa e te mareka kore tu-Atua, kua tupu ki to Iseraela e 20 mataiti no te tutara anga kino na te ariki o Kanaana ko Iabina. Ko Sisera te rangatira o te nuku vaeau maata o Kanaana ra. Inara, ‘kare i kitea tetai korare e te paruru okotai ua i roto ia Iseraela e a katoa ngauru anga o te tausani i reira,’ noatu rai e vaitata i te a mirioni taua iti tangata ra. (Akava 5:6-8) Kua kapiki tataraara ua to Iseraela kia Iehova ra. Mei tei aratakiia ra e te Atua na roto i te peroveta vaine ko Debora, kua uipa atura a Baraka e 10,000 au tangata ki runga i te Maunga ko Tabora, e kua akavaitata maira Iehova i te enemi i te o i raro ake ia Tabora teitei ra. Aruru maira na runga i te enua paraaraa e te kauvai maro o Kisona te oro maira te aronga tini o Sisera e te 900 au kariota tamaki. Inara kua topa maata maira te ua e kua puke maata te vai ki Kisona. I te aere atuanga a Baraka e tona au tangata i raro ake i te tapoki ki raro i te Maunga i Tabora i taua uriia ra, kua kite ratou i te tu kino tei akatupuia ra i te tukuanga mai to Iehova riri. Kua tamateia e te au tangata o Baraka ra te au Kanaana mataku, te oro ke ra, e kare tetai o ratou i ora. Mei teaa ra tetai akamatakiteanga no to tatou aronga takinga kino mai tei manako ra kia tamaki mai i te Atua!—Akava 4:3-16; 5:19-22.
10. Eaa tatou ka papu ei e ka akaora te Atua i tona au tavini i teia tuatau nei i to ratou aronga takinga kino katoatoa ra?
10 Ka akaora a Iehova i tona au tavini i teia tuatau mei to ratou au enemi takinga kino katoa ra, mei tana akaora anga i to Iseraela mataku i te Atua ra i te au tuatau takinoia. (Isaia 43:3; Ieremia 14:8) Kua akaora atura te Atua ia Davida “i te rima o tona katoa ra au enemi.” (2 Samuela 22:1-3) No reira noatu me te taomiia ra tatou me kare te takinga kinoia ra ei au tangata no Iehova, kia mataku kore tatou, no te mea ka akamataraia mai tatou e tana Ariki Mesia ra mei roto i te takinga kinoanga. Ae, “e akaora oki aia i te au vaerua o te aronga ao ra. Ka akaora aia i to ratou vaerua i te takinga-kino e te rotoriri ra.” (Salamo 72:13, 14) Kua vaitata roa mai taua akaora anga ra.
Ka Akaora te Atua i te Aronga Irinaki Iaia
11. Eaa te akatauanga no te irinaki anga ia Iehova to Davida tangata ou ra i oronga mai?
11 E kite ei i te ora na Iehova, ka tika tatou kia irinaki iaia ma te mataku kore. Kua akakite a Davida i te irinaki anga mataku kore ki runga i te Atua ra i tona aere atu anga kia aravei i te tuputupua ko Golia ra. E tamanako ana i taua Philiseti teitei ra i te tuanga ki mua ia Davida ou ra, tei karanga atura: “Te aere maira koe kiaku nei ma te koke, e te korare, e te paruru: te aere atu nei ra au kia koe ma te ingoa o Iehova Sabaota ra, te Atua no te au nuku o Iseraela ra, tei akavaavaaia e koe na. Na Iehova koe e tuku mai ki toku rima akonei; e naku koe e ta, e ka tipu keia e au to mimiti na; e tuku oki au i te kopapa o te nuku Philiseti na te au manu o te reva, e na te au puaka taae o te enua nei, i teianei rā; kia kite te ao katoa nei e, e Atua to Iseraela. E ka kite teianei aronga maata katoa ra e, e tika ia Iehova kia akaora, auraka ua atu ei koke, auraka ei korare: na Iehova oki te tamaki.” Kare i roaia kua mate ua a Golia, e kua arumaki keia atu te au Philiseti ra. Te taka meitaki ra, kua akaora a Iehova i tona au tangata.—1 Samuela 17:45-54.
12. Eaa ra e penei ka riro ei tauturu kia maara i to Davida tangata maata ko Eleazara?
12 Me te aro atura i te aronga takinga kino mai, penei ka tau tatou kia “akatangata oki” e kia irinaki ki katoa i te Atua ra. (Isaia 46:8-13; Maseli 3:5, 6) E manako ana i teianei tupu anga i tetai ngai tei tapaia ra ko Pasa-damima. Kua unui to Iseraela i mua i te nuku Philiseti ra. Inara kare te mataku i akaparuparu ia Eleazara, koia tetai o nga tangata toa mana o Davida ra. Kua mou aia i tona tuanga ki roto i tetai kainga kerite e kua ta aia i te au Philiseti ma te koke nana anake ua. Na reira ‘kua ora rava atura a Iseraela ia Iehova ma tetai ora maata.’ (1 Paraleipomeno 11:12-14; 2 Samuela 23:9, 10) Kare e tangata te ka manako mai ia tatou kia tamaki atu i tetai nuku vaeau okotai ua aia ra. Inara, penei ko etai tuatau okotai ua o tatou tei taomiia mai e te au enemi ra. Ka pure ua ainei tatou ia Iehova ma te irinaki anga iaia, i te Atua rave akaora anga ra? Ka kimi ainei tatou i tana tauturu kia kopae ke ei i te tukuanga i to tatou au oa akarongo ra ki te aronga takinga kino?
Te Akaora ra Iehova i te Aronga Tiratiratu
13. Eaa ra i rave anga ngatai kia tamou marie i te tiratiratu ki te Atua ra i roto i te patireia tai ngauru kopu o Iseraela ra?
13 E kite ei i te ora a Iehova, ka tika tatou kia tamou i te tiratiratu kiaia noatu eaa te tupu anga ra. Kua kite te au tangata o te Atua i te au tuatau taito ra i te au timataanga tuke tuke. E tamanako ana e penei eaa taau ka aro atu me ko koe tetai tei noo ra ki roto i nga kopu tai ngauru o te patireia o Iseraela. Kua akakeu to Rehoboama tu riri kia akakore atu nga kopu tai ngauru ra i te turu anga mei ko mai iaia ra e kua akapapa i te patireia apatokerau no Iseraela ra. (2 Paraleipomeno 10:16, 17; 11:13, 14) O tona au ariki e manganui ra, ko Iehu te mea meitaki roa, inara noatu ko ia ‘kare i aaere i te ture a Iehova ra ma tona ngakau katoa.’ (2 Ariki 10:30, 31) Inara, i taua patireia tai ngauru ra kopu e aronga tiratiratu etai. (1 Ariki 19:18) Kua akono ratou i te akarongo i te Atua, e kua akapapu aia e ia ratou ra aia. Noatu ra te au timataanga i toou akarongo, te tamou marie ra ainei koe i toou tiratiratu ia Iehova?
14. Eaa te ora ta Iehova i rave i te tuatau o te Ariki ko Hezekia, e na teaa i taki atu ki te re anga o Babulonia ia Iuda ra?
14 Na te manako kore atea no te Ture a te Atua ra i taki atu ki te tumatetenga no te patireia o Iseraela ra. I te re anga te ngati Asura ki rungao i te reira i te 740 M.T.N., kua oro ke atu etai mei taua tai ngauru kopu ra ki te Patireia o Iuda e rua ra kopu, ki te ngai te ka rauka ia ratou kia akamori ia Iehova i tona iero. E a o to Iuda 19 au ariki no te kopu o Davida ra ko—Asa, Iehosaphata, Hezekia, e Iosia—e meitaki i to ratou akamorianga i te Atua ra. I te tuatau o Hezekia akono tiratiratu ra, kua aere atu te au ngati Asura kua tamaki ia Iuda ma tetai nuku vaeau maata. Ei pauanga ki ta Hezekia ra au patianga, kua taangaanga te Atua ra e okotai ua angera kia tamate e 185,000 to Asura ra i te po okotai, na te reira te orongaanga i te ora ki Tona aronga akamori! (Isaia 37:36-38) I muri iora, no te kore o te au tangata e akono i te Ture e kia akarongo oki i te au akamatakiteanga a te au peroveta a te Atua ra kua taki atu ki te autu anga to Babulonia i to Iuda ra e te akapou anga i tona oire maata, i Ierusalema ra, e te iero katoa i te 607 M.T.N.
15. Eaa ra i umuumuiai te akakoromaki anga e te aronga tuikaa ngati Iuda i Babulonia ra, e i akapeea ta Iehova ra raveanga i te akaora anga i te openga?
15 Kua umuumuia te akakoromaki anga e te aronga ngati Iuda tuikaa ra kia raukai te tamou marie i te tiratiratu ki te Atua ia ratou i roto i te tuikaa anga ki Babulonia no etai 70 mataiti i te turanga mii ra. (Salamo 137:1-6) Ko tetai tei vai tamou ra te tiratiratu tau ko te peroveta ko Daniela ia. (Daniela 1:1-7; 9:1-3) E akamanako ana i tona rekareka i te mana anga te akauenga a te ariki o Peresia ko Kuro i te 537 M.T.N., i te akatikaanga kia oki akaou te au ngati Iuda ki Iuda e patu akaou i te iero ra. (Ezera 1:1-4) Kua akakoromaki a Daniela ratou ko etai katoa ra no te au mataiti e manganui, inara kua kite ratou i te openga ra i te inga anga a Babulonia e te akaora anga o te au tangata o Iehova. Ka tau teianei kia tauturu ia tatou kia akakite i te akakoromaki anga ia tatou e tatari nei i te akapou anga o “Babulonia Maata,” koia te patireia akonoanga pikikaa o teianei ao.—Apokalupo 18:1-5.
Te Akaora ua ra Iehova i Tona Au Tangata
16. Eaa te ora ta te Atua ra i akatupu i te tuatau o te Ariki Vaine ko Esetera ra?
16 Te akaora ra Iehova i tona iti tangata me te tiratiratu ra ratou ki tona ingoa. (1 Samuela 12:22; Isaia 43:10-12) E tamanako ki muri ki te tuatau o te Ariki vaine ko Esetera—i te rima anere mataiti M.T.N. kua akataoonga te Ariki ko Ahasueru (Xerxes I) ia Hamana ei paraimi minita. I te riri no te kore a Moredekai e ngati Iuda ra e tupou atu kiaia, kua akakoro a Hamana kia akapou atu iaia e te au ngati Iuda katoa oki i te Patireia o Peresia ra. Te peni ra aia ia ratou ei aronga aati ture, e kua kapiti mai i tetai ravenga e puapingaiai tana, e kua akatikaia aia kia taangaanga i te momono rima o te ariki ra kia akairo i te pepa tataia ra ei akatikaanga i to ratou akapouanga. Kua akakite mataku kore atura Esetera i tona akapapa anga ngati Iuda ki te ariki ra e kua akakite atea atura i te akakoro anga taanga a Hamana. Kare i roaia te tautau maira Hamana i runga tikai i te rakau tana i teateamamao ra ei tamate anga ia Moredekai ra. Kua akariroia ko Moredekai ei paraimi minita, ma te akamana anga kia akatikaia te au ngati Iuda ra kia paruru ia ratou uaorai. Kua peke ia ratou te autu anga maata i to ratou au enemi. (Esetera 3:1–9:19) Ka tau teia tupu anga kia akamaroiroi i to tatou akarongo e ka rave a Iehova i te au angaanga akaora i tona au tavini akarongo ra i teianei tuatau.
17. Eaa ta te akarongo tuanga i rave i te akaora anga i te au Kerititiano ngati Iuda tei noo ra ki Iudea i te anere mataiti mua ra?
17 Tetai atu tumu i akaorai te Atua ra i tona au tangata no to ratou akarongo kiaia e tana Tamaiti. E tuku ia koe uaorai ki te ngai o ta Iesu au pipi ngati Iuda i te anere mataiti mua ra. Kua tuatua aia kia ratou ra: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou. Te aronga e noo i Iudea ra, ka oro ratou ki te maunga i reira.” (Luka 21:20-22) E au mataiti ua atu i topa, e kua tamanako koe aea ra e tupu ei teianei au tuatua. I reira kua rokoia mai tetai orureau anga ngati Iuda i te 66 T.N. Kua koropiniia a Ierusalema e te au nuku Roma i raro ake ia Cestius Gallus e kua aere atu ki te au patu o te iero ra. Poitirere ua, kua unui to Roma ra ki muri ma te tumu kore ua ra. Eaa ta te au Kerititiano ngati Iuda ra ka rave? I roto i tana puka Ecclesiastical History (Puka III, pene V, 3), kua tuatua a Eusebius e kua oro ratou mei Ierusalema e Iudea. Kua akaoraia ratou no te mea kua akarongo ratou i te totou akamatakiteanga. Ko koe ainei tetai te viviki ra i te rave kia tau ma te arataki anga Tuatua Tapu te orongaia maira na roto i te “akaaere pikikaa kore” ta te pu i tuku i rungao i ta Iesu “apinga tini ravarai”?—Luka 12:42-44.
Ora ki te Oraanga Mutu Kore
18, 19. (a) Eaa te ora tei rauka mai no te matenga o Iesu ra, e noai ma oki? (e) Eaa ta te apotetoro ko Paulo i manako papu kia raveia?
18 Na te akarongoanga i ta Iesu akamatakiteanga i akaorai i te au oraanga o te au Kerititiano ngati Iuda i Iudea ra. Inara na to Iesu ra matenga i akariro kia rauka te ora ki te oraanga mutu kore no “te tangata katoa nei.” (1 Timoteo 4:10) Kua tu mai te umuumu anga no tetai oko no te au tangata katoa i ta Adamu ra ara anga, e kua ngere aia i te ora nona uaorai e kua oko ke atu i te tangata katoatoa ki roto i te tuikaa anga ki te ara e te mate oki. (Roma 5:12-19) Te au manu tei tuku atingaia i raro ake i te Ture a Mose ra e akatutu ua anga no te tapokianga ara. (Ebera 10:1-4) I te mea kare o Iesu metua tangata nei e i te akara anga kua ‘tamaru’ mai te vaerua tapu i rungao ia Maria mei tona tuatau i to ei tae roa mai ki te anau anga a Iesu, kua anau tu rangatira ua aia i tetai ua atu tuanga no te ara me kare te tu apa ua. (Luka 1:35; Ioane 1:29; 1 Petero 1:18, 19) I to Iesu ra mate anga e ko tetai tei vai tiratiratu apa kore ua ra, kua oronga aia i tona uaorai oraanga apa kore ua ei oko akaou mai e kia akataka ke oki i te au tangata nei. (Ebera 2:14, 15) E no reira a Karaiti i ‘orongaʼi iaia uaorai ei oko i te tangata katoa.’ (1 Timoteo 2:5, 6) Kare te katoatoa e oronga ia ratou uaorai no teianei orongaanga no te ora, inara te mareka ra te Atua kia akono i te au puapinga o te reira ki te aronga tei ariki i te reira ma te akarongo.
19 Na te orongaanga i te puapinga o tona atinga oko ki te Atua i te rangi, kua oko akaou maira Karaiti i te anaunga a Adamu. (Ebera 9:24) No reira kua rauka mai ia Iesu tetai Vaine Akaipoipo Ou, tei akapapaia mai no tana au pipi akatainuia e 144,000 tei akatuia ra ki te oraanga i te rangi. (Ephesia 5:25-27; Apokalupo 14:3, 4; 21:9) Ka riro katoa oki aia ei “Metua no te Tuatau Mutu Kore” ki te aronga te ariki ra i tona atinga e ka rauka ia ratou te ora mutu kore i te enua nei. (Isaia 9:5, 6; 1 Ioane 2:1, 2) Mei teaa ra tetai akanoonoo anga aroa! Te kitea ra to Paulo ariki anga no te reira i roto i te rua o tana reta akauruia ki te au Kerititiano i Korinetia ra, mei ta te atikara te ka aru mai e akakite. Ko te tika, kua manako papu a Paulo kia kore e tuku i tetai apinga kia arai iaia i te tauturuanga te au tangata kia tuku ia ratou uaorai ki roto i te au apinga oronga meitakiia mai e Iehova no te ora ki te oraanga mutu kore.
Akapeea Koe me Pau?
◻ Eaa te akapapu anga Tuatua Tapu te vaira e ka akaora te Atua i tona au tangata tuatua tika?
◻ Akapeea tatou i kite ei e ka akaora a Iehova i te aronga tei irinaki ra kiaia e ka tamou marie oki i to ratou tiratiratu?
◻ Eaa te apinga ta te Atua ra i rave no te ora ki te oraanga mutu kore?
[Tutu i te kapi 12]
Kua irinaki a Davida ia Iehova, koia “te Atua e oraʼi.” Te pera ra ainei koe?
[Tutu i te kapi 15]
Te akaora ra Iehova i tona iti tangata, mei tana i rave i te tuatau o te Ariki Vaine ko Esetera