Au Atinga Akapaapaa Tei Akamareka ia Iehova

“Kia tuku atu kotou i to kotou au kopapa ei atinga ora, e te tapu, e tau oki i te Atua.”​—ROMA 12:1.

1. Eaa ta te Pipiria tuatua no te pirianga puapinga o te au atinga i raro ake i te Ture a Mose ra?

“E TEIANEI, e ata anake te ture no te au mea memeitaki a muri atu, kare ra i taua au mea mou ra, i kore ei i meitaki rava te aronga i aere atu i te reira, i taua au atinga i apaiia i te au mataiti katoa kare i tivata ra.” (Ebera 10:1) I reira, i roto i tetai akakite anga taka meitaki, kua akapapu maira te apotetoro ko Paulo e ko te au atinga katoatoa tei orongaia ra i raro ake i te Ture a Mose kare no tetai puapinga tamouia no te ora o te tangata nei.​—Kolosa 2:​16, 17.

2. Eaa ra i kore ei e puapinga kore kia tauta kia kite i te akakiteanga rikiriki i roto i te Pipiria no te au orongaanga e te au atinga o te Ture ra?

² Kua riro ainei te aiteanga o teianei akakite anga i te Penetatuku ra no te au orongaanga e te au atinga e kare e puapinga ki te au Kerititiano i teia tuatau nei? Ko te tika, no te tuatau e manga tere atu i tetai mataiti, kua tatau te aronga tei o atu ki roto i te Apii Orometua Teokaratiki i roto i te au putuputuanga o te Au Kite o Iehova i te ao katoa nei i nga puka mua e rima o te Pipiria. Kua tauta pakari tetai papaki kia tatau e kia kite oki i te au aiteanga rikiriki katoa ra. Kua kaimoumou ainei ta ratou tauta anga katoatoa ra? E tika tikai e kare tera i te tika, no te mea “te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” (Roma 15:4) Ko te uianga, i reira, eaa te “kite” e te “pumaana” ta tatou ka rauka mei taua kopapa akakiteanga i te Ture ra no runga i te au orongaanga e te au atinga oki?

No to Tatou Kite e te Pumaana Oki

3. Eaa te umuumu tumu anga tei ia tatou nei?

³ Noatu ra e kare e umuumuia kia oronga i te au atinga tikai i te tu akatakaia ra e te Ture, te vaira te umuumu anga maata no tatou mei ta te au atinga rai i rave no to Iseraela ra i tetai tuanga, koia oki, kia akakoreia ta tatou au ara e kia rekareka i ta te Atua ra akaperepere. I te mea kare tatou e oronga akaou i te au atinga tikai ra, akapeea e raukai ia tatou taua au puapinga ra? I muri ake i te touanga mai i te au kotinga no te au atinga manu ra, kua akakite maira Paulo: “No reira te Mesia i na ko ei, iaia i aere mai ki te ao nei, ‘Kare koe i inangaro i te tarangaara e te atinga ra, e kopapa ra taau ïa i akono noku: Te atinga karakaratio, e te tarangaara ra, kare akenei koe i mareka i te reira.’ ‘Kua karanga atura au i reira, I na, e taku Atua, te aere nei au e akatika i toou anoano, (kua tataia te tuatua noku ra i roto i te pokaikai tuatua ra).’”​—Ebera 10:​5-7.

4. Akapeea ta Paulo akapiri anga ia Salamo 40:​6-8 kia Iesu Karaiti ra?

⁴ I te taikuanga mai ia Salamo 40:​6-8, kua tou maira Paulo e kare a Iesu i aere mai e akatinamou i te “atinga e te orongaanga,” te “atinga karakaratio e te tarangaara,” pouroa te reira i te taenga mai ki te tuatau tataanga a Paulo ra kua kore ke ana e akamareka i te Atua ra. Mari ra, kua aere maira Iesu ma tetai kopapa teateamamaoia na tona Metua i te rangi ra, tetai tei aite atura i te au tu ravarai ki ta te Atua i teateamamao ra i Tana anga mai anga ia Adamu ra. (Genese 2;7; Luka 1:35; 1 Korinetia 15:​22, 45) Ei Tamaiti apa kore a te Atua ra, ko Iesu te tuanga no te “uanga” o te vaine ra, tei totouia mai ia Genese 3;15. Ka rave aia i te au takainga kia ‘akaparuparu i te mimiti o Satani’ noatu rai e kua ‘akaparuparuia te pooave,’ o Iesu uaorai. Na roto i teia tu, kua riro na Iesu e oronga te ravenga na Iehova no te ora o te tangata nei, ko ta te au tangata akarongo i tapapa mai mei te tuatau mai ia Abela ra.

5, 6. Eaa te tu akavaitata meitaki ki te Atua te vai maira ki te au Kerititiano?

⁵ I te tuatuaanga no teianei tuanga takake ta Iesu i rave, kua tuatua a Paulo: “Kua akariro oki aia i tei kore i kite i te ara ra, ei tarangaara na tatou: kia akariroia tatou ei aronga tuatua-tika i te Atua iaia ra.” (2 Korinetia 5:21) Te tuatua ‘kua akariroia ei ara’ ka rauka katoa kia uriia “ei tarangaara.” Te tuatua ra te apotetoro ko Ioane: “Koia oki te tarangaara i ta tatou nei ara; kare oki i ta tatou anake ra, i ta to te ao katoa nei ra.” (1 Ioane 2:2) No reira, i te mea e ravenga poto ua ta to Iseraela no te akavaitata atu ki te Atua na ta ratou au atinga, e tumu anga meitaki roa atu ta te au Kerititiano no te aereanga mai ki te Atua ra​—koia te atinga o Iesu Karaiti. (Ioane 14:6; 1 Petero 3:18) Me ka akono tatou i te akarongo i te atinga oko tei orongaia maira e te Atua e ka akarongo atu ei Iaia, ka rauka katoa ia tatou te akakoreanga i ta tatou au ara e ka rekareka oki i te akaperepere e te akameitakianga a te Atua ra. (Ioane 3:​17, 18) Kare ainei tera i tetai tumu no te pumaana? Inara, akapeea, ka raukai ia tatou te akakite e e akarongo to tatou i te atinga oko ra?

⁶ I muri ake i te akatakaanga e e tumu anga meitaki atu ta te au Kerititiano no te akavaitata atu ki te Atua ra, kua akapapaia mai e te apotetoro ko Paulo, mei ta tatou e tatau ia Ebera 10:​22-25, e toru nga ravenga e raukai ia tatou te akakite i to tatou akarongo e te arikianga no ta te Atua ra orongaanga aroa. Noatu rai e kua takiia atu ta Paulo akamaroiroi anga ki te aronga tei ia ratou “te tomo anga mataku kore ki roto i te ngai tapu”​—koia te au Kerititiano akatainuia ra ma tetai kapikianga ki te rangi ra​—e mea tika ka tau te au tangata katoatoa kia manako atu ki ta Paulo au tuatua akauruia ra me te anoano ra ratou kia puapingaia mei ta Iesu atinga tarangaara ra.​—Ebera 10:19.

E Oronga i te Au Atinga Ma e te Viivii Kore

7. (a) Akapeea ta Ebera 10:22 akaata anga i tei raveia i tetai atinga ra? (e) Eaa tei raveia ei akapapu e te arikiia ra tetai atinga e Iehova?

⁷ Te mea mua, te raurau ra Paulo i te au Kerititiano: “E akavaitata tatou ma te ngakau pikikaa kore, ma te akarongo mou tikai, ma te akava-ngakau i pîpî-ia, kia kore te manako kino, e ma te kopapa oreiia i te vai mā.” (Ebera 10:22) Ko te reo tuatuaia i konei te akaata tika maira i tei raveia i roto i tetai atinga akatutuia i raro i te Ture ra. E mea tau teia no te mea no tetai atinga kia arikiia ka tau ia kia orongaia ma te akakeu anga tika e ei apinga ma e te viivii kore. Te manu atinga no roto mai i te au puakatoro me kare i te anana ra, koia oki te au animara ma ra, e te ‘tau ra,’ kare e iro. Me no te au manu maira te atinga, ka riro ia no te au rupe me kare au kukupa ou ra. Me ka akonoia taua au turanga ra, “ka marekaia mai tana, ei tapokiangaara nana.” (Levitiku 1:​2-4, 10, 14; 22:​19-25) Ko te atinga varaoa kare e akaopue, e akatutu oki ia no te tu viivii, kare katoa oki e meri, penei te aiteanga e vai no te ua rakau, te riro ra kia akakava. Me orongaia te au atinga​—manu me kare varaoa​—ki runga i te atarau, ka kapitiia atu te manga miti, ei akameitaki.​—Levitiku 2:​11-13.

8. (a) Eaa tei umuumuia i te tangata te oronga atinga ra? (e) Akapeea ka papu ei ia tatou e te arikiia ra e Iehova ta tatou akamorianga?

⁸ Ka peea oki te tangata rave i te orongaanga ra? Kua akakite te Ture e ko tetai ua atu e aere mai ki mua ia Iehova ka tau kia ma aia e kia viivii kore oki. Ko tetai tei riro ra kia viivii no tetai ua atu tumu ka na mua i te orongaanga tarangaara me kare tutakiangaara kia akaora i tana atinga karakaratio me kare atinga au Kiaia. (Levitiku 5:​1-6, 15, 17) No reira, te ariki ra ainei tatou, i te puapinga maata no te tamou marieanga i tetai turanga ma ki mua ia Iehova? Me te anoano ra tatou kia arikiia mai ta tatou akamori anga e te Atua, ka tika tatou kia viviki i te akatikatikaanga i tetai ua atu au tarevake i te au ture a te Atua ra. Ka tau tatou kia viviki i te kimi anga tatou uaorai i te au tauturu orongaia mai e te Atua​—“te aronga pakari o te ekalesia ra” e te “tarangaara i ta tatou nei ara,” koia oki a Iesu Karaiti.​—Iakobo 5:14; 1 Ioane 2:​1, 2.

9. Eaa te tuke anga maata i rotopu i te au atinga orongaia kia Iehova e tei orongaia ra ki te au atua pikikaa?

⁹ Te akaketaketa anga ki runga i te mataraanga mei te tu viivii no etai ua atu tu ko te tika ia, o te tuke anga maata i rotopu i te au atinga orongaia kia Iehova e tei orongaia ki te au atua pikikaa na te au tangata i te au pa enua takapini ia Iseraela ra. I te tuatuaanga no teianei tuanga taka meitaki no te au atinga i te Ture a Mose ra, kua akakite tetai angaanga kimikimi anga: “Penei ka kite tatou e kare e pirianga ma te tauraatua me kare e totouanga maata; akonoanga pekapeka, akakinoanga i tetai ngai ona uaorai, me kare rave anga akaturi tapu, te ainga e te peu akonoanga no te anauanga tamariki kua ture takiriia; kare e au atinga tangata; kare oki e au atinga no tei mate ra.” Pouroa teianei te kika atura i te manako ki te tika okotai ra: E tapu a Iehova, e kare aia e akatika me kare e mareka oki i te ara me kare te tu viivii o tetai ua atu apinga ra. (Habakuka 1:13) Te akamori anga e te au atinga tei orongaia kiaia ka tika kia ma e auraka e viivii​—te pae kopapa, te akono oki, e te pae vaerua.​—Levitiku 19:2; 1 Petero 1:​14-16.

10. Kia tau ki te akamaroiroi anga a Paulo tei tataia ia Roma 12: 1, 2, ra, eaa te akaraanga matatio tau ia tatou uaorai?

¹⁰ No teianei tu, ka tau tatou kia akara matatio ia tatou uaorai i te au tuanga ravarai o te oraanga kia papu e ta tatou tavini anga ia Iehova te ariki maira aia. Kare tatou e tau kia manako e me te rave ra tatou i tetai tuanga i te au uipaanga Kerititiano e i te angaanga orometua oki, kare e manamanata eaa ta te totou ka rave i to tatou uaorai oraanga. Kare oki tatou e tau kia manako ngakau e na te rave anga angaanga Kerititiano i tetai tu ka akatika ua ia tatou i te umuumu anga kia rave i ta te Atua au ture i etai atu au ngai o to tatou oraanga. (Roma 2:​21, 22) Kare e tau kia manakonako atu tatou i ta te Atua akameitakianga e te akaperepereanga me ka tuku tatou i tetai apinga ma kore me kare viivii i ona nga mata kia taviivii mai i to tatou manakoanga me kare au angaanga. E tamou i te manako o te au tuatua a Paulo: “E aku au taeake, te ako atu nei au ia kotou o te aroa o te Atua, kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou. E eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.”​—Roma 12:​1, 2.

E Oronga i te Au Atinga Akapaapaa ma te Ngakau Katoa

11. Eaa te kapitiia ra ki te tuatua i ‘ta tatou tuatua’ tei taikuia ra ia Ebera 10:23?

¹¹ I te tataanga ki to Epera, kua akamaara katoa mai a Paulo i tetai tu puapinga maata no te akamori mou: “Kia piri tikai to tatou mou ranga i ta tatou tuatua ma te ngaueue kore; e tuatua-mou oki tana ta tei tuatua maira.” (Ebera 10:23) Ta tatou “tuatua” tei taikuia maira tona aite anga tikai e “aaki anga,” e kua tuatua katoa oki a Paulo no “te atinga ra, i te akameitaki.” (Ebera 13:15) Te akamaara maira teianei ia tatou no te tu atinga ta te au tangata mei ia Abela, ia Noa, e Aberahama ra i oronga.

12, 13. Eaa ta tetai tangata Iseraela i akatika i tana oronga anga i tetai atinga karakaratio, e aa ta tatou ka rauka kia rave ei akaata mai i taua tu vaerua rai?

¹² Me oronga tetai ngati Iseraela i te atinga karakaratio, ka raveia te reira kia ‘marekaia tana ki mua i te aroaro o Iehova.’ (Levitiku 1:3) Na taua atinga ra, kua rave ua aia i tetai aaki anga, me kare akakite anga, i ta Iehova ra au akameitakianga maata e te takinga meitaki aroa ki tona au tangata. Kia maara oki e ko tetai tuanga taka meitaki no te atinga karakaratio ra e kua akapou takiriia taua atinga ra ki runga i te atarau​—ei akatutu anga tau no te akamori anga katoa e te akatapu anga oki. Aiteite katoa oki, ka akakite tatou i to tatou akarongo i te atinga oko e ta tatou akameitakianga no taua apinga orongaia maira me ka oronga puareinga tatou ma te ngakau katoa “koia oki ta te vaa nei, i te akapaatu anga,” ia Iehova ra.

¹³ Noatu rai e kare te au Kerititiano e oronga te au atinga​—au manu tikai me kare au apinga tanutanuia​—tei ia ratou ra te apainga kia akakite i te tuatua meitaki o te Patireia e kia akariro au tangata ei pipi na Iesu Karaiti ra. (Mataio 24:14; 28:​19, 20) Te akono ra ainei koe i te au tuatau kia rave i te akakiteanga i te ngai tangata i te tuatua meitaki o te Patireia o te Atua kia kite ei te au tangata e manganui atu i te au apinga memeitaki ta te Atua i akaputu na te au tangata akarongo ra? Te akapou puareinga ra ainei koe i toou tuatau e te maroiroi i te apiianga i te aronga inangaro e te tauturuanga oki ia ratou kia riro ei au pipi na Iesu Karaiti? Na ta tatou raveanga totomapu i te angaanga orometua, mei te akakakara no tetai atinga karakaratio ra, e akamarekaanga meitaki ia i te Atua ra.​—1 Korinetia 15:58.

E Rekareka i te Pirianga Oa ma te Atua e te Au Tangata

14. Akapeea ta Paulo au tuatua ia Ebera 10:​24, 25 i aiteite ei ki te manako no te atinga au ra?

¹⁴ Ei taopenga, te akamaara maira Paulo i to tatou pirianga ma te au oa Kerititiano ia tatou e akamori ra i te Atua. “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:​24, 25) Te au tuatua “ka akamaroiroi atu ei kia maata te aroa, e i te angaanga memeitaki ra,” “to tatou akaputuputu anga,” e “ka akamaroiroi ra” te akamaara katoa maira ia tatou i ta te atinga au i Iseraela ra i rave no te au tangata o te Atua ra.

15. Eaa te tu aiteite ta tatou e kite nei i rotopu i te atinga au e te au uipaanga Kerititiano ra?

¹⁵ I etai taime te uriia ra te tuatua “communion offerings” ei “atinga au.” Te tuatua Epera no te “au” i konei tei roto i te tu maata, penei te akataka maira e ko te rave anga i taua au atinga ra ka akatupu i te au ma te Atua e te au oki ma te au oa akamori ra. No runga i te atinga au, kua akakite tetai tangata apiiia: “Ko tetai tuatau pirianga oa mataora tikai teia, ma te Atua Koreromotu ra, i Tona ekeanga mai ki raro kia riro ei Manuiri na to Iseraela i te kaikaianga atinga ra, noatu rai Koia tei Akamanuiri ra ia ratou i te au tuatau ravarai.” Te akamaara maira teianei ia tatou i ta Iesu ra taputou: “I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.” (Mataio 18:20) I te au tuatau ravarai e putuputu ei tatou i tetai uipaanga Kerititiano, ka puapingaia tatou i te taokotai akamatutuanga, te apiianga akamaroiroianga, e mei te manakoanga e te vaira te Atu ko Iesu Karaiti ma tatou katoa oki. Na te reira e akariro i tetai uipaanga Kerititiano ei atianga rekareka tikai e te akamaroiroianga akarongo katoa oki.

16. Ma te atinga au i roto i te manako ra, eaa te akariro ra i te au uipaanga Kerititiano ei mea rekareka anga?

¹⁶ I te atinga au, te tongaua katoa​—takapini i te ngakau ra, te tongaua katoa no runga i te ate, e te kaokao oki pera katoa to te iku o te mamoe ra​—kua orongaia kia Iehova na te tutungi anga ki runga i te atarau ra. (Levitiku 3:​3-16) Kua manakoia te tongaua ei tuanga puapinga e te meitaki oki o te animara. Te oronga anga i te reira ki runga i te atarau kua akatutu mai i te orongaanga i tei meitaki roa kia Iehova ra. Ko tei akariro ra kia rekareka roa te au uipaanga Kerititiano kare e kua rauka anake ia tatou te apiianga mari ra kua oronga katoaia te akapaapaa kia Iehova. Ko teianei te rave nei tatou na te kapiti anga​—ma to tatou tu akaaka mari ra kia meitaki te tauta anga​—i te imene anga mei te ngakau mai, te akarongoanga matakite, e te pauanga oki me ka rauka. “Alelu Ia.” ta te tata taramo i tuatua. “E imene i te imene ou ia Iehova; e akapaapaa iaia i te uipa anga o te aronga tapu ra.”​—Salamo 149:1.

E Maata te Akameitakianga te Tatari ra ia Tatou mei ia Iehova Ra

17, 18. (a) Eaa te atinga meitaki ta Solomona i akono i te akatapu anga o te iero i Ierusalema ra? (e) Eaa te au akameitakianga no te au tangata ra tei tupu mai i taua oroa ra i te akatapu angaia te iero?

¹⁷ I te akatapu anga o te iero i Ierusalema ra, i te itu o te marama o te mataiti 1026 M.T.N., kua oronga te Ariki ko Solomona i “te atinga ki mua i te aroaro o Iehova,” no “te au atinga karakaratio, e te atinga kai, e te tongaua no te atinga au ra.” Kapiti atu ki tei orongaia i te atinga kai ra, e 22,000 puakatoro e 120,000 mamoe tei oronga atingaia i taua atianga ra.​—1 Ariki 8:​62-65.

¹⁸ Ka rauka ainei ia koe kia tamanako i te moni i pou e te maata oki o te angaanga tei raveia i taua oroa maata ra? Inara, i te akara anga e maata roa atu te au akameitakianga tei rauka i to Iseraela ra i to te moni akapouia. I te openga o taua au oroa ra, “kua tuku ua atura [Solomona] i te tangata: kua akameitaki maira ratou i te ariki, e aere atura ki to ratou au puakapa, ma te pereperekavana e te rekareka o te ngakau, i te au meitaki katoa ta Iehova i rave i tona tavini ia Davida, e ia Iseraela i tona au tangata.” (1 Ariki 8:66) E tika rava, mei ta Solomona i tuatua ra, “na Iehova te meitaki i apingaʼi te apinga, kare oki e kapiti katoaia mai te kino i te reira.”​—Maseli 10:22.

19. Eaa te ka rauka ia tatou kia rave kia raukai te au akameitakianga meitaki mei ia Iehova ra i teianei e e tuatau ua atu?

¹⁹ Te noo nei tatou i te tuatau e kua monoia ‘te ata anake no te au mea memeitaki ra’ ma ‘taua au mea mou ra.’ (Ebera 10:1) Ko Iesu Karaiti, i roto i te tuanga no te Taunga Maata tikai ra, kua tomo ke atu ki te rangi tikai e kua oronga atura i te puapinga o tona uaorai toto ei tapokiangaara no te katoatoa tei akono ra i te akarongo i tona atinga. (Ebera 9:​10, 11, 24-26) Na te tumu anga o taua atinga maata ra e na te orongaanga ma te ngakau katoa ki te Atua i ta tatou au atinga akapaapaa te ma ra e te viivii kore, ka rauka katoa ia tatou te aere atu ki mua “ma te pereperekavana e te rekareka o te ngakau,” ma te akaraanga ki mua ki te akameitakianga maata mei ko mai ia Iehova ra.​—Malaki 3:10.

Akapeea Koe me Pau?

• Eaa te apiianga e te pumaana anga te ka rauka ia tatou mei te akakiteanga mai i te Ture ra no te au atinga e te au orongaanga ra?

• Eaa te umuumuanga mua no tetai atinga ra kia arikiiai, e eaa te aiteanga o te reira no tatou nei?

• Eaa ta tatou ka rauka kia oronga te aiteite atura ki tetai atinga karakaratio oronga uaia ra?

• Na teea au tu e raukai te au uipaanga Kerititiano kia akaaiteia atu ki tetai atinga au ra?

[Tutu i te kapi 18]

Kua orongaia mai a Iehova i to Iesu ra atinga oko ei ora no te au tangata ra

[Tutu i te kapi 20]

No ta tatou tavini anga kia arikiia mai e Iehova, ka tika tatou kia viivii kore mei tetai ua atu tu

[Tutu i te kapi 21]

Ka akatika tatou i te ngai tangata katoa i to Iehova ra tu meitaki ia tatou e rave ra i te angaanga orometua