Te Oronga nei a Iehova i te Maroiroi no Tei Paruparu
“Ko te aronga ra e tapapa ia Iehova, e rauka ïa te maroiroi ou; e rere ratou ki runga i te peau mei to te au aeto ra.”—ISAIA 40:31.
1, 2. Eaa ta Iehova e oronga ra ki te aronga irinaki iaia, e eaa ta tatou te ka akamanako i teianei?
KO TE au aeto to roto i te au manu maroiroi rava i te reva ra. Ka rauka ia ratou i te rere kia mamao ma te kore ua e tairiirianga i to ratou peau. Ma nga peau e tere atu i te rua mita te atea, ko “te Ariki o te au Manu Rere,” ko te aeto auro ra, koia “tetai o te au aeto maata te umereia; te rereanga ki runga ake i te au maunga e te au enua paraaraa, te rere aere ra ia ki runga ake i etai tuaivi maunga ra no etai ora, e ka kake ki runga atura na te takauri aereanga tae roa kia riro ei topata kerekere i [te] reva ra.”—The Audubon Society Encyclopedia of North American Birds.
2 Ma te maroiroi o te aeto i te rere anga i roto i tona manako, kua tata a Isaia: “Te oronga nei [a Iehova] i te maroiroi no tei paruparu; e te akamaata nei aia i te maroiroi no tei apikepike. E potopoto te aʼo o te aronga mapu, e mate oki i te roiroi, e te au tangata ou, e inga takiri roa ïa ki raro: Ko te aronga ra e tapapa ia Iehova, e rauka ïa te maroiroi ou; e rere ratou ki runga i te peau mei to te au aeto ra; e oro ratou e kare e roiroi; e aere atu rai oki ratou, e kare ïa e potopoto te aʼo.” (Isaia 40:29-31) Mei teaa ra te akapumaanaanga kia kite e te oronga ra a Iehova ki tei irinaki iaia i te maroiroi kia aere ua atu, mei te mea rai te oronga ra kia ratou i te au peau roiroi kore te tu mei to te aeto rere ra ki runga! E akamanako, i teianei, i etai o te au apinga tana i akapapa kia oronga ki tei paruparu ra i te maroiroi.
Te Maroiroi no te Pure
3, 4. (a) Eaa ta Iesu i raurau i tana au pipi kia rave? (e) Eaa ta tatou ka tapapa atu ia Iehova kia rave ei pauanga i ta tatou au pure?
3 Kua raurau a Iesu i tana au pipi “kia tamou marie ratou i te pure, auraka e maromaroa.” (Luka 18:1) Ka rauka ainei i te riringianga i to tatou ngakau kia Iehova i te tauturu tikai ia tatou kia maroiroi akaou e kia kore e maromaroa me ka akara anga maata roa te au taomianga o te oraanga? Ae, inara te vaira etai apinga ka tau tatou kia tamou ki roto i te manako.
4 Ka tau tatou kia manakonako tikai i ta Iehova ka rave i te pauanga i ta tatou au pure. Kua kite tetai Kerititiano i muri ake i tona pateka anga ki roto i tetai tu maromaroa oonu ra e: “Mei etai atu maki ra, kare a Iehova e rave i te au temeio i teia tuatau nei. Inara ka tauturu aia ia tatou kia akakoromaki e kia rapakau i te tuanga te ka rauka ia tatou i roto i teia akatereanga nei.” I te akatakaanga e eaa tana au pure i akatupu ei i tetai tuke anga, kua tuatua maira aia: “E 24 ora i te ra toku itae anga ki te vaerua tapu o Iehova ra.” No reira, kare a Iehova e paruru ia tatou i te au taomianga o te oraanga te ka akateiaa ia tatou, inara ka “oronga [aia] i te Vaerua Tapu i te aronga e pati atu iaia ra.” (Luka 11:13; Salamo 88:1-3) Ka rauka i te vaerua te akariro ia tatou kia tau atu ki tetai ua atu timataanga me kare taomianga te ka aro atu tatou. (1 Korinetia 10:13) Me ka umuumuia, ka rauka i te reira i te akauru ia tatou ma te “mana maata meitaki” kia akakoromaki e tae roa kia takoreia atu e te Patireia o te Atua te au manamanata kino katoa i roto i te ao ou te vaitata maira.—2 Korinetia 4:7.
5. (a) E puapingaʼi ta tatou au pure, eaa nga apinga puapinga maata e rua ra? (e) Penei akapeea tatou me pure me te maro ra tatou i tetai tu paruparu i te kopapa nei? (ng) Eaa ta tatou au pure putuputu e te taka meitaki ka akakite kia Iehova?
5 Inara, e puapingaʼi ta tatou au pure, ka tau tatou kia tamou marie i te pure, e kia taka meitaki oki. (Roma 12:12) Ei akatauanga, me te maromaroa ra koe i etai tuatau no te mea te maro ra koe i tetai tu paruparu i te pae kopapa, i te akamataanga o te au ra tataki tai, e pati ia Iehova kia tauturu ia koe kia kore e riro ua i taua tu paruparu rai i te reira ra. E pure aiteite oki i taua ra katoa ra e i mua ake ka oki ei ki te moe i te au po tataki tai. Me ka topa akaou koe, e pati akatenga ia Iehova no tana akakore anga ara, inara e tuatua katoa kiaia no tei tupu i taki atu ei ki te topa akaou anga e penei eaa taau ka rave ei kopae ke atu i taua au turanga ra a te tuatau ki mua. Na te reira au pure tamou marie e te taka meitaki ka akakite ki “tei akarongo i te pure ra” i te ngakau tae o toou anoano kia re koe i taua maro anga ra.—Salamo 65:2; Luka 11:5-13.
6. Eaa tatou ka tau ei kia tapapa atu ia Iehova kia akarongo mai i ta tatou au pure noatu rai me te manako ra tatou e e tau kore tatou kia pure?
6 Inara, i etai tuatau, tei riro ra kia maromaroa penei ka manako ngakau e e tau kore kia pure. Kua akakite tetai vaine Kerititiano tei manako ngakau ra mei te reira te tu i muri akera: “E manakoanga kino rava te reira no te mea kua riro te aite anga e kua rave tatou i te akava anga ia tatou uaorai, inara kare te reira angaanga na tatou.” Ko te tika, “ko te Atua uaorai oki te akava.” (Salamo 50:6) Te akapapu maira te Puka Tapu kia tatou e me “kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei.” (1 Ioane 3:20) Mei teaa ra te akapumaana anga kia kite e me ka akava tatou ia tatou uaorai ei tau kore kia pure, penei kare a Iehova e manako na te reira tu ia tatou! “Kua kite oki aia i to tatou tu,” kapiti katoa te au turanga i to tatou oraanga penei tei akariro ia tatou kia manako ngakau e tau kore ua tatou. (Salamo 103:10-14) No tona aroa ua e te oonu o te kite kua akakeu iaia kia akarongo i te au pure mei ko mai i “te ngakau paruparu, e te aue ra.” (Salamo 51:17) Akapeea aia ka kore ei e akarongo mai i ta tatou aue no te tauturu me te akaapa ra aia uaorai i “tei popani i tona taringa i te aue o te ao ra”?—Maseli 21:13.
Te Pumaana o te Taeake Anga
7. (a) Eaa tetai atu apinga ta Iehova i oronga mai ei tauturu ia tatou kia maroiroi akaou? (e) Te kiteanga i teaa no to tatou taeake anga te ka tau ei akaririnui ia tatou?
7 Ko tetai atu apinga ta Iehova i oronga mai ei tauturu ia tatou kia maroiroi akaou ko to tatou taeake anga Kerititiano ia. Mei teaa ra tetai turanga oko maata kia riro tatou ei tuanga no tetai ngutuare tangata au taeake e te au tuaine i te ao katoa nei! (1 Petero 2:17) Me ka akateiaaia tatou e te au taomianga o te oraanga, ka rauka i te pumaana o to tatou taeake anga i te tauturu ia tatou kia maroiroi akaou. Akapeea ra? Na te kiteanga e kare ko tatou anake ua te aro atura i te au akaaoanga manamanata ka riro ei akamaroiroianga te reira uaorai. I roto i to tatou au taeake e te au tuaine, kare e ekoko anga e kua aro atu tetai papaki i te au taomianga me kare au timataanga aiteite ra e kua kite ratou i te au manako ngakau mei to tatou uaorai te tu. (1 Petero 5:9) E mea akapapu akaouanga kia kite e te tupu nei kia tatou kare ia i te mea matau koreia e ko to tatou au tu manako ngakau kare i te mea kite koreia.
8. (a) Eaa te au akatauanga te akaari ra e akapeea e kiteaʼi e tatou te tauturu maata e te akapumaana i roto i to tatou taeake anga ra? (e) Na roto i teea tu a koe uaorai i tauturuiaʼi me kare akapumaanaiaʼi e “tetai oa mou ra”?
8 I roto i te tu pumaana o te taeake anga ka kiteia e tatou te ‘au oa mou’ te ka oronga mai i te tauturu maata tei umuumuia ra e te akapumaana anga. (Maseli 17:17, NW) E putuputu ra, e ko tei anoanoia ko etai tuatua takinga meitaki me kare au angaanga manako meitakiia ra. Ko tetai Kerititiano tei maro ra i te au manako ngakau e e tau kore ua aia te maara ra e: “E au oa etai tei angai maira iaku ma etai au apinga papu noku uaorai ei tauturu iaku kia takore atu i oku au manako tau kore ra.” (Maseli 15:23) I muri ake i te matenga tana tamaine ou, kua kite tetai tuaine i te tu ngata i te akamata anga kia imene i te au imene Patireia i te au uipaanga putuputuanga ra, e maata oki i te au imene te taiku ra i te tuakaouanga. “I tetai tuatau,” te maara ra iaia e, “ko tetai tuaine tei noo ra i te pae mai iaia i te ngai aere anga ra kua kite mai iaku e aue ana. Kua aere mai aia kiaku, e kua takave tona rima, e kua imene mai maua i te toenga atu o taua imene ra. Kua tupu kiaku te ki i te aroa no te au taeake e te au tuaine e kua mataora i aere ana matou ki te au uipaanga, i te kiteanga e ko te ngai te reira no to tatou tauturu, i reira i te Are Uipaanga Patireia ra.”
9, 10. (a) Akapeea tatou i te tauturu anga i te pumaana o to tatou taeake anga? (e) Koai te maata ra te umuumuia te taokotai anga meitaki? (ng) Eaa ta tatou ka rave ei tauturu i te aronga te umuumuia ra te akamaroiroi anga?
9 Inara, e apainga ta tatou tataki tai kia oronga ki te pumaana o te taeake anga Kerititiano ra. No reira, ka tau to tatou ngakau “kia maora” atu kia kapiti i te katoatoa o te au taeake e te au tuaine. (2 Korinetia 6:13) Mei teaa ra te tu mii no te aronga tei maromaroa ra kia manako ngakau e kua anu mai te aroa o te taeake anga kia ratou! Inara, te ripoti ra etai Kerititiano e te manako maromaroa ra ratou e te kore e manakoia atu. Kua pati tetai tuaine e patoi ra tana tane i te tuatua mou e: “Koai kare e anoano e e umuumu i te au oa ei akamatutu, ei akamaroiroi, e te taokotai anga aroa? E akamaaraara atu i to tatou au taeake e te au tuaine e te anoanoia ra ratou e tatou!” Ae, e maata oki i te aronga te akateiaaia ra ratou e te au turanga o te oraanga—te aronga e au tokorua akarongo kore to ratou, te au metua takaua ra, te aronga ma te oraanga kino te manamanata, te aronga ruaine, e etai atu—te umuumuia ra te taokotai anga meitaki. Te umuumuia ra ainei tetai papaki i o tatou kia akamaaraaraia i te reira tu?
10 Eaa ta tatou ka rave ei tauturu? Kia maora atu tatou i te akakiteanga i to tatou aroa. I te orongaanga i te tu maoraora, auraka e ngaropoina ia tatou te aronga te umuumuia ra te akamaroiroi anga. (Luka 14:12-14; Ebera 13:2) Eiaa e manako ua e kare to ratou au turanga e akatika ia ratou kia ariki mai, eaa ka kore ei e pati ua atu ia ratou ra? Ei reira ka tuku atu ei na ratou e iki. Noatu me kare e rauka ia ratou i te ariki, kare e ekoko anga e ka manako ngakau akamaroiroiia ratou i te kite anga e te manakoia maira ratou e etai ke ra. Penei ko te reira tikai ta ratou e umuumu ra kia maroiroi akaou ei.
11. Te aronga te teiaaia ra penei te umuumu ra i te tauturu anga na roto i teea au mataara?
11 Penei te umuumuia ra te tauturu na etai atu mataara no te aronga te teiaaia ra. Ei akatauanga, penei ka anoano tetai metua vaine takaua, i tetai tungane pakari mai kia akaari i te manako anga i tana tamaiti matiroeroe ra. (Iakobo 1:27) Tetai taeake me kare tetai tuaine e maki manamanata kino tona penei ka anoano i te tauturu i te tiki apinga i te toa me kare i te akono i te ngutuare. Penei ko tetai kua ruaine maira ka anoano i tetai oa me kare ka anoano i tetai tauturu kia aere ki vao ki te angaanga orometua. Me te vaira tetai umuumuanga no te reira tu tauturu, te akatu maira i ‘tetai timata anga i te pikikaa kore o to tatou inangaro.’ (2 Korinetia 8:8) Eiaa e akamamao ke atu mei te aronga te anoano tauturu ra no te tuatau e te tauta anga te piri atura, kia re tatou i te timata anga no te aroa Kerititiano na te manako tau anga e te rave anga i te au mea anoanoia ra no etai ke.
Te Maroiroi no te Tuatua a te Atua
12. Akapeea te tauturu anga te Tuatua a te Atua ia tatou kia maroiroi akaou?
12 Te tangata e akamutu i te kaikaianga kare e roa ka kore tona ririnui, me kare maroiroi. No reira, ko tetai atu mataara oronga mai a Iehova i te maroiroi no tatou kia akono tamou ua atu na te akapapuanga e ka kaikai meitaki tatou i te pae vaerua. (Isaia 65:13, 14) Eaa te kaikai vaerua tana e oronga mai ana? I runga ravao, ko tana Tuatua, koia te Puka Tapu. (Mataio 4:4; akaaite ia Ebera 4:12.) Akapeea te reira i te tauturu anga ia tatou kia maroiroi akaou? Me akamata te au taomianga e te au manamanata ta tatou e aro atura i te akaparuparu i to tatou ririnui, ka rauka mai ia tatou te ririnui na te tatauanga i te au manako ngakau te au tauta anga pakari tikai a te au tane e te au vaine tiratiratu i te au tuatau Puka Tapu ra. Noatu rai e e au akatauanga meitaki no te tiratiratu, e au tangata ua ratou “mei ia tatou katoa te tu.” (Iakobo 5:17; Angaanga 14:15) Kua aro atu ratou i te au timataanga e te au taomianga mei to tatou uaorai te tu. E akamanako ana i etai akatauanga.
13. Eaa te au akatauanga Tuatua Tapu te akaari maira e e au manako ngakau e te au tupuanga aiteite ki to tatou uaorai to te au tane e te au vaine i te au tuatau Puka Tapu ra?
13 Kua mamae ngakau oonu te pateriareka ko Aberahama i te matenga o tana vaine noatu rai e akarongo tona i te tuakaouanga. (Genese 23:2; akaaite ia Ebera 11:8-10, 17-19.) Kua manako a Davida tei tataraara ra e no tana ara kua riro aia kia tau kore no te tavini ia Iehova. (Salamo 51:11) I manako a Mose e tau kore aia. (Exodo 4:10) Kua maromaroa a Epaperodito i te kite anga e no tona maki kino kua kotingaia tana “angaanga a te Mesia nei.” (Philipi 2:25-30) Kua maro a Paulo i tona kopapa apa ua ra. (Roma 7:21-25) I te akara anga e tu ngata to Euodia raua ko Sunetuke, no te angaanga kapiti, e rua raua ko nga tuaine akatainuia i te putuputuanga i Philipi ra. (Philipi 1:1; 4:2, 3) Mei teaa ra te akamaroiroianga kia kite e e manako ngakau e te au tupuanga mei to tatou uaorai to teia aronga tiratiratu nei, inara kare ratou i akaroiroi! Kare katoa oki a Iehova i roiroi ia ratou.
14. (a) Eaa te apinga ta Iehova i taangaanga ana kia tauturu ia tatou kia ririnui mai i tana Tuatua ra? (e) Eaa ra nga tianara te Punanga Tiaki e te Awake! i apai mai ei i nga atikara no te akaputu anga tangata, te ngutuare tangata, e te au akaaoanga manako ngakau ra?
14 Ei tauturu ia tatou kia rauka te ririnui mei tana Tuatua maira, te taangaanga ra a Iehova i te pupu tavini akono meitaki e te pakari kia tua tamou marie mai kia tatou “i te kai na tatou i te ora mou ra.” (Mataio 24:45) Kua roa te tavini akono meitaki i te taangaanga anga i nga tianara te Punanga Tiaki e te Awake! ei paruru i te tuatua mou o te Puka Tapu e ei akakite i te Patireia o te Atua ei te manakonako anga anake ia no te tangata. E maata oki i nga rau ngauru mataiti kua topa akenei, kua apai mai eia nga tianara i te au atikara tau i te Tuatua Tapu no te akaputu anga tangata, te ngutuare tangata, e te au akaaoanga manako ngakau te tupu katoa ra ki etai o te au tangata o te Atua. Eaa te akakoro anga i neneiiaʼi te reira akakiteanga? E mea papu ei tauturu i te aronga te tupu ra kia ratou teia au akaaoanga kia raukaʼi te ririnui e te akamaroiroi anga mei ko mai i te Tuatua a te Atua ra. Inara te tauturu katoa ra taua au atikara ra ia tatou katoatoa kia marama meitaki i te au mea penei te tupu ra ki tetai papaki o to tatou au tungane e te au tuaine. No reira ka meitaki atu to tatou papaanga kia akarongo i ta Paulo au tuatua: “E akapumaana atu i te ngakau taitaia, e tauturu atu i tei apikepike, kia roa te akakoromaki anga i te tangata ravarai.”—1 Tesalonia 5:14.
Te Aronga Pakari Tei Riro “Mei te Punanga i te Uriia Ra”
15. Eaa ta Isaia i totou no te aronga tavini ei aronga pakari, e eaa te apainga ta teia e tuku nei ki rungao ia ratou ra?
15 Kua oronga mai a Iehova i tetai atu apinga ei tauturu ia tatou me te paruparu ra tatou—koia te aronga pakari o te putuputuanga. Kua tata te peroveta ko Isaia no teia aronga: “E riro oki tetai tangata mei te punanga i te uriia ra, mei te pipinianga i te matangi maata ra; mei te vai taʼe i te ngai keremarō ra, mei te marumaru o tetai mato maata i te enua papamarō ra.” (Isaia 32:1, 2) E apainga i reira, ta te aronga pakari kia aite atu ki ta Iehova i totou maira no ratou. Ka tau ratou kia “riro oki . . . mei te” au tumu no te akapumaana e te akaangaroi anga kia etai ke ra e kia puareinga roa i te “rave atu tetai i ta tetai apainga” [me kare, “au apinga taitaia”; tona aiteanga tikai, “au apinga teiaa”]. (Galatia 6:2, NW, tataanga i raro ake) Akapeea ratou i te raveanga i teia?
16. Eaa ta te aronga pakari ka tau kia rave ei tauturu i tetai te manako ra e e tau kore aia kia pure?
16 Mei tei taikuia i mua akenei, i etai tuatau penei te akaparuparu ra tetai tangata e kua manako e tau kore aia i te pure. Eaa ta te aronga pakari ka tau kia rave? Ka tau ratou kia pure ma taua tangata ra e nona oki. (Iakobo 5:14) Ko te patianga ua ia Iehova, e te akarongo maira tei paruparu ra, ei tauturu iaia kia kite i te maata o tona aroaia mai e Iehova e e etai ke katoa oki ka riro tikai ia ei akapumaanaanga. Na te akarongoanga i te pure akatenga no te ngakau mai o tetai o te aronga pakari ra penei ka tauturu i te akaririnui i te irinaki anga o tetai tangata te taitaia ra. Penei ka tauturuia aia kia akamanako e me te irinaki ra te aronga pakari e ka pau mai a Iehova i te au pure nona ra, ei reira aia e piri atu ei ki taua irinaki anga ra.
17. Eaa ra i tau ei te aronga pakari kia riro ei aronga akarongorongo meitaki?
17 “Kia rapurapu ua te tangata ravarai i te akarongo, kia tavarevare i te tuatua,” ta Iakobo 1:19 i tuatua. Kia tauturu i te aronga paruparu ra kia maroiroi akaou, ka tau katoa te aronga pakari ei aronga akarongorongo meitaki. I etai au turanga penei te au mema o te putuputuanga te tauta pakari ra i etai manamanata me kare au taomianga kare ra e rauka kia akakoreia i roto i teia akatereanga o te au mea nei. Penei ko ta ratou ka anoano, i reira, kare i tetai apinga ei “akatikatika” i to ratou manamanata mari ua ra no te tuatua ki tetai tangata akarongorongo meitaki ua—ko tetai tangata kare e akakite atu kia ratou e eaa ta ratou ka tau kia manako mari ra ei tei akarongo atu kare ra ei rave akava anga.—Luka 6:37; Roma 14:13.
18, 19. (a) Akapeea te tu viviki o tetai o te aronga pakari ra i te akarongo i te tauturu anga kia kore e akariro kia teiaa atu te apainga a tei paruparu ra? (e) Eaa te ka tupu me akaari te aronga pakari i te “aroa taeake” ra?
18 Te aronga pakari, me rapurapu ua i te akarongo ka rauka i te tauturu ia koe kia kopae ke i te akateiaa atu i te apainga a tei paruparu ra. Ei akatauanga, me e tungane tetai me kare e tuaine tei kore ra i tae ki etai uipaanga me kare kua topa mai tona aere i te angaanga tutu aere, te tau tika ra ainei kia akoia aia kia maata atu te rave i te angaanga orometua me kare kia putuputu atu te aere ki te au uipaanga? Penei ake paa. Inara tei ia koe ainei te tutu katoa? E au manamanata no te oraanga kopapa ainei etai te tupu ra kia maata? Kua taui ainei te au apainga a te ngutuare tangata i teia tuatau nei? E au turanga ke atu ainei etai me kare e au taomianga te akateiaa ra iaia? Kia maara e, penei kua manako akaapa ke ana taua tangata ra no te kore e rauka iaia i te rave kia maata atu.
19 Akapeea, i reira, e raukaʼi ia koe i te tauturu i taua tungane ra me kare tuaine? I mua ake ka akanoo ei koe i etai manako e ka oronga ako atu ei, e akarongo! (Maseli 18:13) Ma te au uianga a te tangata kite e ‘rauka mai ei’ te au manako no te ngakau o te tangata ra. (Maseli 20:5) Auraka e akakore ua atu i teia au manako ngakau—e akamanako atu ia ratou. Ka tau ra tei paruparu ra kia akapapu akaouia e te manako maira a Iehova ia tatou te kite ra e i etai tuatau te akakotinga ra to tatou au turanga ia tatou. (1 Petero 5:7) Me akaari te aronga pakari i te “aroa taeake,” ka kitea e te aronga roiroi ‘te akaangaroianga no to ratou meta.’ (1 Petero 3:8; Mataio 11:28-30) Me ka kitea e ratou te reira akaangaroianga, kare e anoanoia te tuatua atu kia ratou e kia maata atu te angaanga; ka akakeu to ratou ngakau kia rave ratou i te ka rauka ia ratou i te tavinianga ia Iehova.—Akaaite ia 2 Korinetia 8:12; 9:7.
20. I te mea te vaitata roa nei te openga o teianei uki kino nei, eaa ta tatou ka tau kia rave papu ua atu?
20 E tika tikai te noo nei tatou i te tuatau maata te rapurapu i te tuatua enua katoa o te tangata nei. Te tupu ra kia maata te au taomianga no te oraanga i te ao o Satani ia tatou e tomo oonu atu nei ki roto i te tuatau o te openga. Kia maara, mei te riona kimi kai ra nana, te tapapa maira te Tiaporo ia tatou kia paruparu e kia roiroi kia raukaʼi iaia i te rave ngoie ua ia tatou ei kai. Mei teaa ra to tatou akameitaki anga e te oronga maira a Iehova i te maroiroi ki tei roiroi ra! Kia rave meitaki tatou i te au apinga orongaia mai e ia ei akamaroiroi ia tatou kia rave tamou ua atu, mei te mea rai e te oronga maira aia kia tatou i nga peau mana maata o tetai aeto te rere ra ki runga. I te vaitata rava mai anga te openga o teianei uki rave kino nei, kare teianei i te tuatau no te akamutu i te oroanga i ta tatou oro no te tutaki ra—koia te ora mutu kore.—Ebera 12:1.
Eaa Taau Pauanga?
◻ Eaa ta tatou ka tapapa atu ia Iehova kia rave i te pauanga i ta tatou pure?
◻ Na roto i teea au mataara e raukaʼi ia tatou te ririnui mei ko mai i to tatou taeake anga Kerititiano ra?
◻ Akapeea te tauturu anga a te Tuatua a te Atua ia tatou kia maroiroi akaou?
◻ Eaa ta te aronga pakari ka tau kia rave ei tauturu i te aronga paruparu kia maroiroi akaou?
[Tutu i te kapi 17]
Me te oronga ra i te tu maoraora, eiaa tatou e akangaropoinaʼi i te aronga te anoano ra i te akamaroiroi anga
[Tutu i te kapi 18]
Ka rauka i te aronga pakari i te pati ia Iehova kia tauturu i te aronga paruparu kia kite te maata ra to ratou inangaroia