Tuaanga i te Pumaana ta Iehova e Oronga Maira

“Te tinamou nei to matou manako ia kotou, kua kite matou e rave katoa kotou i te pumaana, ko kotou i rave katoa i te mate nei.”​—2 KORINETIA 1:7.

1, 2. Eaa te tupu anga ki te aronga e manganui tei riro mai ei au Kerititiano i teia tuatau nei?

E MANGANUI te aronga tatau i Te Punanga Tiaki i teianei tei tupu ake ma te kite kore i te tuatua mou a te Atua. Penei ko te tika te reira no toou turanga. Me koia ia, ka akamaara ana i akapeea toou manako anga i te akamata anga toou nga mata marama i te pueraanga. Ei akatauanga, i toou kite anga mua e kare tei mate ra e mamae ana mari ra te vai kite kore ua ra i te mamae, kare ainei koe i pumaana mai? Ei toou kite anga i te manakonako anga no tei mate ra, e ka akatuakaouia mai te aronga e au pirioni ua atu ki te oraanga i te ao ou a te Atua ra, kare ainei koe i akapumaanaia?​—Koheleta 9:5, 10; Ioane 5:28, 29.

² Akapeea oki ta te Atua ra taputou kia akaope i te rave kino e kia akatuke i te enua nei kia riro ei parataito? I toou kite anga i teia, kare ainei te reira i akapumaana ia koe e i akaki ia koe ma te manakonako anga marekaia? Akapeea toou manako ngakau i toou kiteanga mua e ka rauka kia kore e mate mari ra kia ora atu ki roto i taua enua Parataito te aere maira? Kare e ekoko anga e kua mareka maataia koe. Ae, kua riro koe ei tetai tei rauka ra te tuatua akapumaanaanga i teianei tei tutu aereia ra e te Au Kite o Iehova i te ao katoa nei.​—Salamo 37:9-11, 29; Ioane 11:26; Apokalupo 21:3-5.

3. Eaa ra te aronga te tua ra i te tuatua akapumaana ma etai ke katoa ra i mamae ei i te mate?

³ Inara, i toou tauta anga kia tua atu i te tuatua Pipiria ki etai ke ra, kua kite katoa koe i reira e “kare oki i ope katoatoa te tangata i te akarongo.” (2 Tesalonia 3:2) Penei kua aviri tetai papaki o toou au oa i mua ana ia koe no te akarongoanga i te au taputou o te Pipiria ra. Penei katoa oki kua mamae koe i te takinga kinoia no te tamouanga i te apii i te Pipiria ma te kapiti anga i te Au Kite o Iehova ra. Penei kua pakari atu te patoi anga i toou akamata anga i te au tauianga i toou oraanga kia rotai ma te au kaveinga Pipiria ra. Kua akamata koe i te kite i te mate ta Satani e tona ao i apai mai ki rungao i te katoatoa o tei ariki i ta te Atua akapumaana.

4. Na roto i teea au tu tuke tuke te akono anga a te aronga inangaro ou ra i te mate?

⁴ E mea mii ra, mei ta Iesu i totou maira, ka akariro te mate i tetai papaki kia turori e kia akamutu te pirianga ma te putuputuanga Kerititiano ra. (Mataio 13:5, 6, 20, 21) Ko etai ka akakoromaki i te mate na te tamou marieanga i to ratou manako ki runga i te au taputou pumaana ta ratou e apii ra. I te openga ka akatapu ratou i to ratou oraanga kia Iehova e ka papetitoia ei au pipi na tana Tamaiti, na Iesu Karaiti. (Mataio 28:19, 20; Mareko 8:34) Inara, kare te mate e akamutu me ka papetitoia tetai Kerititiano. Ei akatauanga, ka riro te tamou marieanga i te tu viivii kore ei rave anga ngata no tetai tangata no roto maira aia i te ravenga tau kore. Ko etai atu ka akakoromaki i te patoi anga tamou mei ko mai i te au mema ngutuare tangata akarongo kore ra. Noatu rai eaa te mate, pouroa te aronga aruaru tiratiratu i tetai oraanga akatapuia ki te Atua ka rauka kia papu i tetai apinga okotai ra. Na roto i tetai tu tikai, ka kite ratou i te pumaana e te tauturu a te Atua ra.

“Te Atua Nona Anake te Pumaana”

5. Kapiti katoa ma te au timataanga e manganui ta Paulo i mamae ra, eaa katoa oki tana i kite?

⁵ Ko tetai tei ariki oonu ra i te pumaana ta te Atua i oronga mai ko te apotetoro ko Paulo ia. I muri ake i tetai tuatau timataanga taka ke i Asia e i Makedonia, kua kite aia i te pumaana maata i te akarongoanga e kua aru tikai te putuputuanga o Korinetia i tana reta i ako atura. Na teia i akakeu iaia kia tata atu kia ratou i te rua o tana reta, i roto i reira te aru maira te tuatua akapaapaa: “Kia akameitakiia te Atua, te Metua o to tatou Atu ra o Iesu Mesia, te tumu o te aroa [“maru,” NW], e ko te Atua nona anake te pumaana; ko tei akapumaana mai ia matou i to matou au mate katoa nei.”​—2 Korinetia 1:3, 4.

6. Eaa ta tatou i kite mei ta Paulo au tuatua ia 2 Korinetia 1:3, 4 te kiteia ra?

⁶ E maata te akakiteia maira e teianei au tuatua akauruia. E akara akataka tatou ia ratou. Ia Paulo e tuatua akapaapaa ra me kare akameitaki i te Atua me kare te rave ra i tetai pati anga kiaia i roto i tana nga reta, te mea matauia ka kitea e tatou e ka kapiti katoa aia i te ariki anga oonu no Iesu, koia te Upoko o te putuputuanga Kerititiano ra. (Roma 1:8; 7:25; Ephesia 1:3; Ebera 13:20, 21) No reira, kua tuatua atura Paulo i teia akakite anga akapaapaa ki “te Atua, te Metua o to tatou Atu ra o Iesu Mesia.” I reira, no te taime mua i roto i tana au tataanga, kua taiku aia i te nauna Ereni tei uriia ra ko ‘te aroa maru.’ No roto mai teia nauna i tetai tuatua tei taikuia ra ei akakite i te mii i te mamaeanga o tetai ke ra. E no reira kua akataka maira Paulo i to te Atua au manako ngakau maru no tetai ua atu o Tona au tavini tiratiratu te mamae ra no te mate​—au manako ngakau maru te akakeu ra i te Atua kia rave aroa ua no ratou ra. Oti akera, kua akara atu ra Paulo kia Iehova ei te tumu no teia tu anoanoia na te tapaanga iaia ko ‘te tumu o te aroa maru.’

7. Eaa i raukaʼi kia tuatuaia e ko Iehova “te Atua nona anake te pumaana”?

⁷ Te tupu anga o to te Atua ra ‘aroa maru’ e pumaana ia ki tei mamae ra i te mate. No reira, kua rave ua atu a Paulo i te akataka anga ia Iehova ei “te Atua nona anake te pumaana.” E no reira, noatu eaa te akapumaana te ka kiteia e tatou no te takinga meitaki o to tatou au taeake akarongo ra, ka rauka ia tatou kia akara atu kia Iehova ei te tumu o te reira. Kare e pumaana tikai, ma te mutu kore kare ra i akamataia mai i te Atua. Pera katoa oki, nana i anga mai i te tangata ra i tona uaorai tu, e no reira i raukaʼi kia riro tatou ei aronga akapumaana. E ko te vaerua tapu o te Atua te akakeu ra i tona au tavini kia akaari i te aroa maru ki te aronga te umuumuia ra te akapumaana.

Tereniia ei Aronga Akapumaana

8. Noatu rai e kare ko te Atua ra te tumu o to tatou au timataanga, eaa te tupu anga puapinga ka rauka mai i to tatou akakoromaki anga i te mate ra?

⁸ Noatu rai e te tuku ra te Atua ko Iehova i te au timataanga tuke tuke kia tupu mai ki tona au tavini tiratiratu, kare ra koia te tumu o taua au timataanga ra. (Iakobo 1:13) Inara, ko te pumaana tana e oronga maira kia tatou e akakoromaki ra i te mate ka rauka kia tereni mai ia tatou kia maata atu te kite i te au umuumu anga no etai ke atura. Ma teea tupu anga? “Kia tika ia matou kia akapumaana i te aronga i rokoia e te mate ra, i te pumaana a te Atua i pumaanaʼi matou uaorai nei.” (2 Korinetia 1:4) E no reira te tereni nei a Iehova ia tatou kia riro ei aronga tua meitaki i tona pumaana ma te au taeake akarongo e ma te aronga ta tatou ka aravei i ta tatou angaanga orometua ia tatou e aru ra ia Karaiti ei “akapumaana i te aronga ravarai i mii ra.”​—Isaia 61:2; Mataio 5:4.

9. (a) Eaa te ka tauturu ia tatou kia akakoromaki i te mamaeanga? (e) Akapeea etai ke ra i te akapumaanaia me ka akakoromaki tiratiratu tatou i te mate?

⁹ Kua akakoromaki a Paulo i te au mamae e manganui te akameitaki ra i te pumaana maata tana i rauka mai i te Atua na roto ia Karaiti. (2 Korinetia 1:5) Ka kite katoa oki tatou i te pumaana maata na te tamanakoanga i te au taputou okomaata, na te pureanga no te turu anga a tona vaerua tapu, e na te kite anga i ta te Atua ra pauanga i ta tatou au pure. Na te reira tatou e akamaroiroi kia rave ua atu i te akamouanga i to Iehova ngateitei e te akataka anga i te Tiaporo ei tetai pikikaa ra. (Iobu 2:4; Maseli 27:11) Me rauka anake ia tatou te akakoromaki tiratiratu i tetai ua atu tu o te mate, ka tau tatou, mei ia Paulo rai, kia tuku i te akapaapaa katoa kia Iehova, na tona pumaana ra i raukaʼi i te au Kerititiano kia vai tiratiratu i raro ake i te timataanga. Ka akatupu te akakoromaki anga o te au Kerititiano tiratiratu ra i te akapumaanaanga ki runga i te au taeake, ma te akariroanga i etai katoa ra kia tamanako ketaketa kia rave i te “akakoromaki marie anga i taua au mate” ra.​—2 Korinetia 1:6.

10, 11. (a) Eaa etai apinga tei akatupu ra i te mamaeanga ki te putuputuanga i Korinetia i taito ra? (e) Akapeea ta Paulo akapumaana i te putuputuanga i Korinetia ra, e eaa te manakonako anga tana i akakite ra?

¹⁰ I tupu ki to Korinetia ta ratou tuanga o te au mamae tei tupu maira ki rungao i te au Kerititiano mou katoa ra. Kapiti katoa oki, kua umuumu ratou i te akoanga kia akaatea ke atu i tetai tei rave i te kanga akaturi ra ma te tataraara kore. (1 Korinetia 5:1, 2, 11, 13) No te kore i rave vave i teia e te akaope i teia pekapeka e te tataka keanga kua apai mai i te tu viivii ki runga i te putuputuanga. Inara i te openga kua akono ratou i ta Paulo ako anga e kua akakite i te tu tataraara tikai. No reira, kua tuatua akameitaki maanaana ua aia kia ratou e kua akakite atu e no to ratou ariki anga meitaki i tana reta kua akapumaanaia mai aia ra. (2 Korinetia 7:8, 10, 11, 13) I te akaraanga, kua tataraara katoa oki tei akaateaia ra ki vao. No reira kua apii atura Paulo ia ratou kia ‘akakore atu ratou i tana ara, e e akapumaana atu iaia, ko te apuku uaia aea taua tangata ra i te aue maata.’​—2 Korinetia 2:7.

¹¹ E mea tika rava kua akapumaanaia te putuputuanga i Korinetia e taua reta tuarua a Paulo ra. E ko teia tetai o tana au akakoro anga. Kua akataka maira aia: “Te tinamou nei to matou manako ia kotou, kua kite matou e rave katoa kotou i te pumaana, ko kotou i rave katoa i te mate nei.” (2 Korinetia 1:7) I te tuanga openga o tana reta, kua raurau a Paulo: “Kia tika rava, kia pumaana rava, . . . e e noo ïa te Atua nona te aroa e te au i rotopu ia kotou.”​—2 Korinetia 13:11.

12. Eaa te umuumu anga no te au Kerititiano ravarai?

¹² Mei teaa ra tetai apiianga puapinga maata te ka rauka ia tatou kia kite mei roto mai i teia! Ka tau te au mema katoatoa o te putuputuanga Kerititiano kia “rave katoa [ratou] i te pumaana” ta te Atua e oronga maira na roto i tana Tuatua, i tona vaerua tapu, e tana akaaerenga i te enua nei. Noatu rai ko te aronga tei ­akaateaia ki vao penei te tau ra kia akapumaanaia me kua tataraara ratou e kua akatikatika i to ratou aerenga tarevake ra. E no reira, kua akapapa mai “te tavini akono meitaki e te pakari” i tetai ravenga aroa ua ei tauturu ia ratou. E okotai taime i te mataiti e rua o te aronga pakari ka aere e aravei atu i etai o te aronga akaateaia ra. Penei kua kore teia aronga e akaari i tetai tu manako meameaau me kare e rave i te ara kino ra e penei ka tau kia tauturuia kia rave i te au takainga umuumuia no te akaoki akaou mai.​—Mataio 24:45; Ezekiela 34:16.

To Paulo Mate i Asia Ra

13, 14. (a) Akapeea ta Paulo akataka anga i tetai tuatau no te mate kino tana i kite i Asia ra? (e) Eaa te tupu anga penei ta Paulo ra i tamanako ana?

¹³ Kare i aite atu te au tu mamaeanga tei tupu ra ki te putuputuanga i Korinetia ra i teianei ma te au mate e manganui ta Paulo i akakoromaki ra. E no reira, kua rauka iaia i te akamaara atu kia ratou: “Kare oki matou i inangaro, e te au taeake, e kia kore kotou e kite i to matou mate ka rokoia mai ei matou i Asia ra, e i romia uaia matou, kare atura e maroiroi, e kare rava matou i manako e e ora: E manako mate to matou i roto ia matou uaorai, kia kore matou e irinaki kia matou uaorai, ki te Atua ra, i tei akatu i tei mate ra: Ko tei akaora ia matou i taua mate maata ra, e te akaora ua nei rai oki; ko ta matou oki e irinaki nei e nana rai e akaora ia matou.”​—2 Korinetia 1:8-10.

¹⁴ Kua irinaki tetai papaki o te aronga apiiia i te Pipiria e te taiku ra Paulo i te pekapeka anga i Ephesia ra, tei rauka ra penei kia mate a Paulo e pera katoa tona nga taeake tutaka aere no Makedonia, ko Gaio e Arisetareko. Ko teia nga Kerititiano e rua kua rave oparaia atu ki roto i tetai teata tei ki ra i tetai pupu tei rave i te “kapiki anga, e rua akera ora, E maata to Diana [te atua vaine] i Ephesia.” I te openga, kua rauka i tetai opita no te oire ra i te akamaru mai i taua urupu ra. Kua riro teia akakoko anga i te ora anga o Gaio raua ko Arisetareko ei tetai taitaia maata kia Paulo. Ko te tika, i anoano aia kia tomo atu ki roto e uriuri manako ma taua pupu akatupu pekapeka ra, inara kua araiia aia kia kore e tuku i tona oraanga ki roto i te tu kino na teia mataara.​—Angaanga 19:26-41.

15. Eaa te turanga mamao ke roa penei ka akatakaia mai ia 1 Korinetia 15:32 ra?

¹⁵ Inara, penei te akataka maira a Paulo i tetai turanga kino roa atu i tei akakite ia maira i mua akenei. I tana reta mua ki to Korinetia ra, kua ui atura Paulo: “I kukumi na au i te au puaka taae i Ephesia ra i te peu a te tangata nei, eaa taku puapinga i rauka?” (1 Korinetia 15:32) Penei kua riro te aite anga o teia e kua akakokoia te oraanga o Paulo kare na te au tangata i te tu puaka taae anake rai mari ra na te au puaka taetaevao tikai i roto i te ngai tarekareka anga i Ephesia ra. Kua akautungaia te aronga rave kino i etai tuatau na te tuku angaia kia tamaki atu i te au puaka taae ra i te tuatau e matakitaki atura te au urupu kaki i te toto ra. Me ko te aite anga o ta Paulo tuatua e i aro atu aia i te au puaka taae tikai, ka tika e i te atianga openga ra kua akaora temeioia mai aia mei tetai matenga kino roa, mei ia Daniela i akaoraia maira mei te vaa o te au riona tikai ra.​—Daniela 6:22.

Au Akatauanga o Teia Tuatau Nei

16. (a) Eaa ra ka raukaʼi i te Au Kite o Iehova e manganui i te akataka i te au mate tei mamaeia ra e Paulo? (e) Eaa ta tatou ka papu no te aronga tei mate no to ratou akarongo ra? (ng) Eaa te tupu anga meitaki no te ora ua mai anga te au Kerititiano mei te mate?

¹⁶ E manganui te au Kerititiano o teia tuatau nei te ka kite i te au tu mate tei mamaeia ra a Paulo. (2 Korinetia 11:23-27) I teia tuatau, katoa oki, kua rokoia te au Kerititiano i “te romia uaia [ratou], kare atura e maroiroi,” e e manganui kua aro atu i te au tuanga ‘kare rava ratou i manako e e ora.’ (2 Korinetia 1:8) Kua mate atu tetai papaki i nga rima o te au pupu ta ua e te aronga takinga kino oki. Ka papu ia tatou e na te mana akapumaana o te Atua i raukaʼi ia ratou kia akakoromaki e kua mate atu ratou ma te au ngakau e te au manako tei akatinamouia ki runga i te akatupu anga i to ratou manakonako anga, me no te rangi me kare no te enua. (1 Korinetia 10:13; Philipi 4:13; Apokalupo 2:10) I etai atu au turanga, kua akatanotanoia e Iehova te au apinga, e kua akaoraia mai to tatou au taeake mei te mate ra. Kare e ekoko anga e ko te aronga tei rokoia e taua tu akaora anga ra kua akatupu i te irinaki anga maata “ki te Atua ra, i tei akatu i tei mate ra.” (2 Korinetia 1:9) I muri akera kua rauka ia ratou te tuatua ma te irinaki anga maata atu ia ratou e tua ra i te tuatua akapumaana a te Atua ma etai ke atura.​—Mataio 24:14.

17-19. Eaa te au tupu anga tei akaari maira e kua o atu to tatou au taeake i Ruanata ra ki te akapumaana anga a te Atua ra?

¹⁷ I mua ua akenei kua na roto mai to tatou au taeake i Ruanata na roto i tetai tupu anga aiteite ki to Paulo ratou ko tona nga oa. E manganui i o ratou ra tei taka ke atura, inara kare i rauka i ta Satani au tauta anga kia akakore i to ratou akarongo. Mari ra, kua kite to tatou au taeake i teia enua i te akapumaana a te Atua ra na roto i te au tu tataki tai e manganui. I te tuatau o te takinokino anga i te au Tutsi e te au Hutu tei noo ra ki Ruanata, e aronga Hutu etai tei tuku ra i to ratou oraanga ki roto i te tu kino kia paruru atu i te aronga Tutsi, e te Tutsi tei paruru atura i te Hutu. Ko etai tei taia ra e te aronga rave kino no te paruruanga i to ratou au taeake akarongo ra. Ei akatauanga, kua tamateia tetai Kite Hutu ko Gahizi i muri ake i tana uunaanga i tetai tuaine Tutsi ko Chantal. Kua uunaia te tane Tutsi a Chantal, koia a Jean, ki roto i tetai atu ngai na tetai tuaine Hutu ko Charlotte te ingoa. No te au 40 ra a Jean raua ko tetai atu taeake Tutsi i noo uunaiaʼi ki roto i tetai pu auai maata, e kua aere ua mai ki vao no te au tuatau poto i te po. I teia tuatau katoa oki, na Charlotte i oronga atu te kai na raua e te paruru katoa, noatu ra i te noo rai te pae o tetai puakapa vaeau Hutu ra. I runga i teianei kapi, te kite nei koe i te tutu o Jean raua ko Chantal i te kapiti akaou anga, te akameitaki nei raua ki to raua nga taeake Hutu akamori no te ‘tukuanga i to ratou nga kaki ki roto i te tu kino’ no raua, mei ta Peresila raua ko Akauila i rave no te apotetoro ko Paulo ra.​—Roma 16:3, 4.

¹⁸ Tetai atu Kite Hutu, ko Rwakabubu, kua akapaapaaia i te nutipepa Intaremara no te paruruanga i te aronga Tutsi e au taeake akarongo ra.a Kua na ko maira: “Te vai katoa ra oki a Rwakabubu, koia tetai o te Au Kite o Iehova, tei rave marie ra i te uuna i te au tangata i konei e i ko ra oki i roto i tona au taeake (ko te reira ta ratou i tapa i to ratou au taeake akarongo ra). Kua akapou aia i te au ra roa katoa i te apaianga manga e te vai inu no ratou noatu rai e aʼo potopoto tona. Inara kua akariro te Atua iaia kia maroiroi tikai.”

¹⁹ E akamanako, katoa oki, i tetai nga tokorua manako inangaro e Hutu raua, ko Nicodeme e Athanasie to raua nga ingoa. I mua ake i te akamata anga te takinokino anga ra, no te apii kapiti teia nga tokorua akaipoipoia i te Pipiria ma tetai Kite Tutsi ko Alphonse te ingoa. Na te tuku anga i to raua nga oraanga ki roto i tetai turanga kino, kua uuna raua ia Alphonse ki roto i to raua are. I muri akera kua kite raua e kare te are i tetai ngai meitaki no te mea ko te aronga Hutu i te pae mai ia raua kua kite i to raua oa Tutsi. No reira, kua uuna a Nicodeme raua ko Athanasie ia Alphonse ki roto i tetai vaarua i te potonga enua o te are ra. Ko tetai rave anga meitaki teia no te mea kua aere putuputu maira to raua aronga Hutu i te pae mai kia kimi aere ia Alphonse vaitata i te au ra ravarai. Iaia e takoto ra i roto i teia vaarua no te 28 ra, kua tamanako oonu a Alphonse i te au tataanga Pipiria mei te tua no Rahaba rai, tei uuna ra i nga tangata Iseraela e rua ki runga i te tapoki o tona are i Ieriko ra. (Iosua 6:17) I teia tuatau nei te rave tamou ra a Alphonse i tana angaanga i Ruanata ei tetai tangata tutu aere i te tuatua meitaki ra, ma te akameitaki anga e i tuku tana nga tangata Hutu apiiia i te Pipiria i to raua oraanga ki te tu kino no raua. E akapeea a Nicodeme raua ko Athanasie? I teianei kua riro raua ei Nga Kite papetitoia no Iehova e te rave ra e tere atu i te 20 au apii Pipiria ma te aronga inangaro i te apii.

20. Na teea mataara ta Iehova ra akapumaana anga i to tatou au taeake i Ruanata ra, inara eaa te umuumuanga tamou marie te anoanoia ra e te aronga e manganui i o ratou ra?

²⁰ I te tuatau i akamataʼi te takinokino anga i Ruanata, e 2,500 te aronga akakitekite aere i te tuatua meitaki i taua enua ra. Noatu rai e e au anere ua atu kua mate me kare kua oro ke atu i taua enua ra, kua kake te numero o te Au Kite kia tere atu i te 3,000 i reira. E akapapu anga te reira e kua akapumaana te Atua i to tatou au taeake. Akapeea ra te au matiroeroe e te au vaine takaua e manganui i roto i te Au Kite o Iehova ra? E mea matauia ra, e te vaira teia aronga i roto i te mamae o te mate e te umuumuia ra te akapumaana tamou marie. (Iakobo 1:27) Ka orei takiriia to ratou au roimata me akamataia mai te tuakaouanga i to te Atua ao ou ra. Inara, e au akameitaki anga ki te au ravenga a to ratou au taeake e no te mea e aronga akamori ratou i “te Atua nona anake te pumaana,” te rauka nei ia ratou te akakoromaki i te oraanga.

21. (a) Eaa atu tetai ngai tei ngere maata ra to tatou au taeake i te akapumaana a te Atua ra, e eaa tetai mataara te ka rauka ia tatou ravarai i te tauturu atu? (Akara i te pia “Akapumaana Anga i te Tuatau o Nga Mataiti Tamaki e A.”) (e) Aea to tatou umuumu anga no te akapumaana e akamerengo takiriiaʼi?

²¹ I etai atu au ngai e manganui, mei ia Eritiria, i Tingapoa ra, e pera katoa te Ukotaravia mua ana ra, kua rave ua atu to tatou au taeake i te tavini tiratiratu ia Iehova noatu rai te mate. E tauturu tatou i taua au taeake ra na te raveanga i te au patianga putuputu e kia rauka ia ratou te akapumaana. (2 Korinetia 1:11) Kia akakoromaki tiratiratu marie tatou kia tae roa ki te tuatau e rave ei te Atua ra na roto ia Iesu Karaiti i te “orei i te roi-mata katoatoa mei to [tatou] au mata” na roto i te tu ki katoa ra. Ei reira tatou e kite ei i te tu pumaana takiri ta Iehova ka oronga mai i roto i tana ao ou no te tuatua tika.​—Apokalupo 7:17; 21:4; 2 Petero 3:13.

[Tataanga Rikiriki i Raro]

Te Kite Ainei Koe?

◻ Eaa a Iehova i tapaiaʼi ko “te Atua nona anake te pumaana”?

◻ Eaa te manako anga tau na tatou i te au mate ra?

◻ Ka rauka ia tatou i te oronga akapumaana kiaai ma?

◻ Akapeea te akamerengo anga takiri i to tatou ra umuumu anga no te akapumaana?

[Tutu i te kapi 17]

Ko Jean raua ko Chantal, noatu e nga Kite Tutsi, kua uunaia ki roto i nga ngai tataka ke e te Au Kite Hutu ra i te tuatau o te takinokino anga i Ruanata ra

[Tutu i te kapi 17]

Te rave tamou marie nei te Au Kite o Iehova i te oronga anga i te tuatua akapumaana ma to ratou au tangata i te pae mai i Ruanata ra