Te Maara Ainei ia Koe?

Kua rekareka ainei koe i te tatauanga i te au itiu i ou ake nei o Te Punanga Tiaki? Me koia ia, ka reka i reira koe i te maara i te ka aru mai:

◻ Eaa te aiteanga o te tuatua Ereni pa·rou·siʼa tei taangaangaia ia Mataio 24:3, 27, 37, 39?

Te tuatua ra te Vine’s Expository Dictionary of New Testament Words e: “PAROUSIA . . . te akataka ra i te taenga mai e te vai anga ma etai ra.” No reira, kare i te atianga ua o te taenga atu, mari ra ko te vai anga ki reira mei te taenga atu i muri iora oki.​—8/15, kapi 11.

◻ Akapeea ‘taua au rā i te tapoto angaia’ e raukaʼi te “tangata” i te akaoraia i te anere mataiti mua, e akapeea te reira me tupu na roto i tetai tu maata roa? (Mataio 24:22)

I te 66 T.N., kua tapoto poitirere ua te nuku o Roma i ta ratou koropini anga ia Ierusalema, te akaora anga i te “tangata” Kerititiano. Ma te aiteite ra, te tapapa atu nei tatou e na tetai tu ka tapotoia te akapou anga ia Babulonia Maata. E no reira ka akaoraia te au Kerititiano akatainuia e to ratou au oa mei te akapou anga.​—8/15, kapi 18-20.

◻ Eaa to tatou tu me akamata tetai tangata i te piri ki roto i te kai anga i te au oroa Akamaara Anga me kore ka akamutu i te rave i te reira?

Kare e anoanoia no tetai ua atu au Kerititiano kia manata. Kua karanga a Iesu e: “Ko au te tiaki mamoe meitaki ra: kua kite au i taku uaorai.” Ma te aiteite te akapapu anga, kua kite a Iehova i te aronga tana i iki ei au tamariki vaerua. (Ioane 10:14; Roma 8:16, 17)​—8/15, kapi 31.

◻ Eaa te akakoro anga maata o te Ture a Mose?

Te tumu maata, kua apii te reira i to Iseraela ra e ka anoanoia te Mesia no ratou, nana e oko mai ia ratou mei to ratou tu ki i te ara. (Galatia 3:24) Kua apii katoa te Ture i te mataku tu Atua e te akarongo oki, e kua tauturu te reira i to Iseraela kia takake mai i te au ravenga viivii a to te pa enua takapini ra. (Levitiku 18:24, 25)​—9/1, kapi 9.

◻ Eaa te akakoro anga o te koreromotu ou? (Ieremia 31:31-34)

Koia oki kia akatupu mai i tetai iti tangata ui ariki e te kau taunga ei akameitaki i te au tangata ravarai. (Exodo 19:6; 1 Petero 2:9; Apokalupo 5:10)​—9/1, kapi 14, 15.

◻ Eaa ra tatou ka taangaanga ei i te ravenga karape o te tataraaraanga?

Ka riro tetai tataraara anga ei tauturu kia akameangiti mai i te mamae tei akatupuia e te tu ara, e ka rauka i te reira i te rapakau i te au pirianga veravera. I te au tataraara anga tataki tai ta tatou ka rave e apiianga ia no te tu akaaka e ka tereni ia tatou kia kite maata atu i te au manako ngakau o tetai atu.​—9/15, kapi 24.

◻ Kua tika ainei te tuatua enua o te tiruvi i te ao o to Noa tuatau ra?

Ae. Ka kiteaia takapini i te au enua katoatoa te au papaanga taito te akakite ra i tetai vaipuke i te ao, mei Marike ki Autireria. Te riro ra te totoa anga o teia tua ei turu i te tika e kua tupu ana tetai tiruvi i te ao katoa, mei tei akakiteia i roto i te Pipiria. (Genese 7:11-20)​—9/15, kapi 25.

◻ Eaa te o maira i roto i te akono aroa? (Roma 12:13)

Kua uriia te tuatua akono aroa mei te tuatua Ereni i nga tuatua aka e rua ra te aiteanga “aroa” e te “tangata ke.” No reira, ko te aite anga tumu anga o te akono aroa e “akono aroa i te tangata ke ra.” Inara te maata atura te o maira i te aroa akatumuia i runga i te kaveinga, ka raveia no tetai tu apainga. Kua akatumuia te reira i runga i te aroa tikai, te inangaro, e te oaoa anga.​—10/1, kapi 9.

◻ Eaa ta Paulo i maro no runga i te akaipoipo e te takaua i tana reta mua ki to Korinetia, pene 7?

Te tika ra te akaipoipo e, i raro ake i etai turanga, e mea tau no tetai papaki. Inara e mea tika te puapinga o te noo takaua no te tane e te vaine Kerititiano tei anoano kia tavini ia Iehova ma te iroirongata meangiti.​—10/15, kapi 13.

◻ Akapeea tetai tangata pakari te rave anga tau i te “takinga-meitaki i tona uaorai”? (1 Timoteo 5:8)

Ka tau tetai tangata pakari kia “takinga-meitaki i tona uaorai”​—tana vaine e pera katoa tana tamariki—​te pae kopapa, te pae vaerua, e te manako ngakau.​—10/15, kapi 22.

◻ Akapeea a Iehova i te oronga maianga i te pumaana ki tona au tavini?

Te angaanga ra te vaerua tapu o te Atua ei “akapumaana.” (Ioane 14:16) Ko tetai atu mataara oronga mai te Atua i te pumaana na roto i te Pipiria. (Roma 15:4) Te kite ra te Atua i to tatou umuumu tataki tai e ka rauka i te taangaanga ia tatou kia akapumaana i tetai e tetai, tei rauka ia Paulo te pumaana na roto i ta Tito ripoti no runga i to Korinetia. (2 Korinetia 7:11-13)​—11/1, kapi 10, 12.

◻ Eaa te akatakaia maira i ta Paulo akatutu anga ia Iehova ei “te Metua . . . te tumu o te aroa [“maru,” NW],” tei kiteaia 2 Korinetia 1:3?

No roto mai te nomena Ereni tei uriia ‘tumu o te aroa maru’ i tetai tuatua tei taikuia ra ei akakite i te mii i te mamaeanga o tetai ke ra. No reira kua akataka maira Paulo i to te Atua au manako ngakau maru no tetai ua atu i Tona au tavini tiratiratu tei mamae ra no te mate.​—11/1, kapi 13.

◻ Eaa tei akatupuia e te akakore anga kai a te au Iseraela i te Ra Tapokiangaara? (Levitiku 16:29-31; 23:27)

Kua akakeu te akono anga i te akakore anga kai i te tangata o Iseraela kia kite maata atu i to ratou tu ara e te anoano no te tataraara anga. Na roto i te reira kua akaari ratou te tu maromaroa no ta ratou au ara e te tataraara anga ki mua i te Atua.​—11/15, kapi 5.

◻ Eaa te akatakaia maira i te ako anga ki te aronga mapu: “E tenana e akamanako i Tei anga ia koe”? (Koheleta 12:1)

Te tuatua ra tetai tangata kite e ko te tuatua Epera tei uriia ra e “akamanako” e putuputu te akakite anga i “te inangaro o te manako e te angaanga tei kapitiia maira ei maara anga.” No reira i te akarongo anga i te akaue anga ko te aite anga e tere atu i te manako anga ia Iehova. Te kapiti ra i te rave angaanga, te rave anga i te ka akamareka iaia.​—12/1, kapi 16.