“Kia Akaruke Katoa Tatou i te au Teiaa Ravarai”

“E maromaroa tikai au e te akamaroiroi koreia,” i aue ei a Mary. Te tuatuaanga no te apainga o te au angaanga Kerititiano, kua tuatua ua atu teia vaine Kerititiano: “E kite ana au i te au taeake te roiroi anga. E roiroi ana rai au e te taitaia. E tauturu mai ana iaku kia marama e no teaa ra.”

TE MANAKO taitaia katoa ainei koe, e roiroi rava i te akono atu i te au apainga teokaratiki ma te tau? E akaraanga ainei i etai taime e e apainga teiaa te angaanga orometua Kerititiano, e apainga kare e rauka i te akakoromakiia? E manganui te au Kerititiano akono meitaki te na roto ra i te akamaroiroi kore anga, no te mea e takapiniia ra tatou e te au ririnui papu kore e ka rauka i te akameangiti mai i to tatou mataora. Ei Kerititiano ngakau tae i teia tuatau e akaaoanga tikai teia. No reira, i tetai au taime e manako ana etai pae i te angaanga orometua Kerititiano ei apainga teiaa.

Kimianga i te Tumu

Te akapapu maira te au Tuatua Tapu e kare a Iehova i tuku i te au maro anga tau kore ki runga ia tatou. Kua tuatua te apotetoro a Ioane e “kare oki tana au akauenga i te mea teiaa.” (1 Ioane 5:3) Kua tuatua rai a Iesu mei teia ki tana au pipi: “E apai i taku amo ki runga ia kotou e apii mai mei iaku nei, no te mea e maru toku tu e te ngakau akaaka, e ka kite kotou i te akaoraora anga i to kotou au meta. E takinga meitaki taku amo e te mamangika taku apainga.” (Mataio 11:29, 30, NW) Te papu ra kare i te anoano no Iehova e kia manako akateiaa maataia tatou me kare taomiia e te au apainga i ta tatou tavini anga iaia.

Akapeea i reira, tetai Kerititiano akono meitaki te manako anga i tana au apainga Kerititiano ei apainga teiaa? Te akara anga e e manganui te au rave anga te piri atura. Ka akara ana i teia au tuatua a te apotetoro ko Paulo: “Kia akaruke katoa tatou i te au teiaa ravarai . . . , e oro tatou ma te akakoromaki i te oroanga tei tukuia maira ki mua ia tatou nei.” (Ebera 12:1, NW) Te akakite maira ta Paulo au tuatua e penei te tuku ra tetai Kerititiano i tetai au taime i te au apainga anoano koreia ki runga iaia uaorai. Kare oki te au ara pakari e o atu ki roto i teia. Inara penei ka rave tetai Kerititiano i te au tarevake te akava anga te ka takino i tona oraanga, te maanianga kia ngata iaia i te oro i te taemoemo anga tei tukuia ki mua ia tatou.

Tetai Manako Tau i te Au Mea Apinganui

Ka akara ana i te akara anga o te ngai angaanga. I te au enua e manganui, no te au turanga i te pae o te moni kare atu e ravenga mari ra kia angaanga tetai Kerititiano kia roa atu te ora. Te maata anga o te taime, e rave ana te au tangata i te angaanga no te mea ua nei kia tere ratou ki mua me kare kia akaputu te au apinga manea. Na te akara akaou anga i to ratou au anoano tikai, kua kite mai etai au Kerititiano i te mea pakari kia rave i te au akatikatika anga i to ratou turanga i te ngai angaanga. Ko teia oki tei tupu kia Debbie e tana tane, e Au Kite no Iehova. Kua tuatua aia: “Kua taui to maua turanga i te pae o te moni, e kare tikai e anoano akaou noku kia rave ua atu i te angaanga tamou. Inara e aka angaanga iaku i te akamutu i te reira.” Kare i roa ana kua akamata aia i te kite i te taomi anga no te maata rava te au mea no te rave. Kua akamarama aia: “E Maanakai ua rai toku ra va no te rave i te angaanga o te ngutuare. Te maata anga o te taime kare au e inangaro i te aere i te tutu aere. Kua manako kino tikai au no teia, e kua tamanata toku akava ngakau iaku, inara kua reka au i taku angaanga! I te openga, kua aro au i te tika anga tikai. E tai rai pau anga. E akamutu au i te angaanga.” Ma te tau, penei kare teia akatikatika anga maata e rauka no etai pae. Inara, penei na tetai makitoro metiaki anga i taau akapapa anga angaanga e akakite mai i te anoano no tetai au taui anga.

Penei te vaira tetai atu au mataara no te akakoreanga ia tatou uaorai i te au apainga anoano koreia. Akapeea te tameangitianga mai i te aerenga o ta tatou teretere anga rekaia, te au angaanga kanga kanga aere, me kare tetai atu au tamataora anga​—kapiti katoa te ora te pou ra no te akarakara tivi? Pera katoa i muri ake i te raukaanga tetai turanga tau tei anoanoia i teia au ngai, penei ka anoanoia tetai au akatikatika anga putuputu no te rave tamou i teia turanga tau.

E Puapinga Ra te Tu Tau

Te tu tau i teia au mea ka tauturu te reira ia tatou kia akatano atu ki te au turanga ou i te reira e tupu maira. No reira, ka rauka ia tatou i te rave tamou i tetai manako papu i ta tatou angaanga orometua.​—Ephesia 5:15-17; Philipi 4:5.

E kite ana ainei koe ia koe uaorai i raro ake i te taomi anga o te aruaru anga i te rave i ta tetai pae e rave ra i roto i te tavini anga i te Atua? Ka rauka katoa i teia te kapiti atu i te taitaia e te apiapi ki toou oraanga. Koi riro ei te akaraanga meitaki o tetai pae ei akamaroiroi ia koe no te rave kia maata atu, na te tu tau e tauturu ia koe i te tuku i te au akakoro anga tau tei rotai ki toou uaorai au turanga e te kite. Te akakite maira te au Tuatua Tapu kia tatou: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke. Ei runga iaia uaorai ta te tangata ravarai apainga.”​—Galatia 6:4, 5.

Penei ka akamaata katoa te au akono anga e te au peu ki to tatou au taomi anga. I to Iesu tuatau kua roiroi te au tangata mei te tautaanga i te aru i te au ture akonoanga e manganui e te au peu tei tukuia e te tangata. I teia tuatau, kua akarangatiraia to Iehova iti tangata mei te au peu akonoanga pikikaa. (Akaaiteia atu kia Ioane 8:32.) Noatu rai, ka o puapinga kore ua atu tetai Kerititiano ki roto i te au akono anga o te reira ngai. Ei akaraanga, i tetai au taime e riro ana te au rave anga mei te akaipoipoanga ei akono anga akamanea aere. Penei e kare teia au akono anga e tarevake ana, e penei e akara anga tuke ratou e te reka tikai. Inara, penei e kare o te au Kerititiano taime me kare moni no te akono i te reira au mea ravarai, e te tautaanga i te rave i te reira te ka akamaata atu i te au taomi anga anoano koreia.

E tamanako ana i tei tupu te atoro anga a Iesu i tetai vaine ko Mareta tona ingoa. I te mea e kia puapinga aia mei tona pakari no te atua mai, “ko Mareta ra, kua varenga iora aia i te akono anga i te peu o te manuiri.” Kua teiaaia aia e te au apiapi anga e manganui. (Luka 10:40) Inara kua tuatua mai a Iesu ma te takinga meitaki e kia tameangiti mai aia i tana au akanoo anga no te manga e raukaʼi iaia kia puapinga mei tana apiianga. (Luka 10:41, 42) Te akatutu meitaki maira teia i te akava anga meitaki e te tu tau te ka tauturu ia koe kia rauka tetai tu tau i taau angaanga orometua Kerititiano.​—Iakobo 3:17.

Ka anoano katoaia te akava anga meitaki te ikianga i toou au taeake. Te akamatakite maira a Maseli 27:3: “Teimaa to te toka, teimaa katoa to te one; teimaa maata ra to te riri o te neneva i aua nga mea katoa e rua ra.” Ma te tukeke, e mana pakari to toou au taeake piri vaitata ki runga i taau akaaerenga manako. Te akataeakeanga ki te aronga te viviki ra i te kimi apa e te aviri i tetai pae i roto i te putuputuanga penei ka ruru te reira i te au ua o te akamaroiroi kore e te manako papu kore i roto ia koe. (1 Korinetia 15:33) Me kite koe e e manamanata tetai, penei e na etai au taui anga pakari i toou au taeake e akono ra e tameangiti mai i taau apainga.

Kia Mako i te Aaereanga ma te Atua

Ia Mika 6:8, ka kite tatou i teia uianga no te ariuriu manako: “Eaa ta Iehova inangaro ia koe ra, mari ra ko te . . . aerenga akamako tikai i to Atua ra?” Te aiteanga o te tu mako ko te kite anga i to tetai au kotinga. Te aronga kare e kite ana i to ratou au kotinga ka kite ia ratou uaorai i te manamanata ki roto i te au rave anga angaanga e manganui. Kua tupu teia ki te au Kerititiano pakari, pera katoa te au akaaere, te tupuanga ki te akamaroiroi kore anga, te riri, e te ngere o te mataora. Kua akatika a Kenneth, ko tetai Kerititiano o te aronga pakari: “Kua kite au iaku i te maromaroa anga, e kua tuatua au, ‘kare rava au e tuku akaou i teia kia tupu kiaku.’ No reira kua tipu au i etai o taku au rave anga angaanga e kua rave anake ua i te ka rauka iaku i te rave.”

Pera katoa te peroveta akaaka ra ko Mose kua ngata iaia i te kite i tona uaorai au kotinga. No reira kua tauturu a Ietero, tona papa ongai ia Mose kia manako meitaki no runga i te maata roa o tana angaanga te tauta ra aia i te rave koia anake ua. Kua ui a Ietero, “eaa teia taau e rave i te aronga tangata nei?” “Kare e meitaki taau e rave na. Ka mate ua koe . . . e mea teiaa maata roa taua mea nei ia koe; kare e tika ia koe anake ra kia rave. . . . E kimi io na oki koe i te au tangata maroiroi i roto i te tangata katoa nei, . . . ko te tuatua maata katoa ra, e apai mai ratou i te reira kia koe na, te au tuatua rikiriki katoa ra, na ratou ïa e akava i te reira: māmā iora koe i reira, kia raverave katoa ratou e koe katoa ra.” Kua akamata viviki a Mose i te oronga i etai o tana angaanga ki tetai pae, mei reira te kiteanga i te maru mei tei kiteaia e e apainga kare e rauka i te apai.​—Exodo 18:13-26.

I tetai atianga kua tuatua a Mose kia Iehova: “Kare e maranga iaku i teia katoa nei au tangata ko au anake ra, e maata ua atu ïa i te teiaa.” I konei ko te pau anga kia oronga atu i te angaanga. Penei e ko teia katoa te pau anga ki toou manamanata me i te mea e te teiaaia ra koe ma te au rave anga angaanga.​—Numero 11:14-17.

Tauturu a Iehova ia Tatou no te Apai i te Apainga

Kua tuatua a Iesu e e takinga meitaki tana amo e e mamangika tana apainga kare e teiaa ana. Te amo ta Iesu e pati maira ia tatou kia apai ki runga ia tatou uaorai kare te reira amo i te mea rave kore ua. E amo teia o te akatapu ki katoa anga ki te Atua ei pipi na Iesu Karaiti. No reira, ka tupu maira rai tetai teiaa anga me kare taomi anga ki roto i te riro anga mai ei Kerititiano tika tikai. (Mataio 16:24-26; 19:16-29; Luka 13:24) I te au turanga o teianei ao e kino maira, ka tupu maata te au taomi anga. Tera ra, e tumu ta tatou kia vai papu i ta tatou akara anga no te mea te akakite maira ta Iesu pati anga e ka rauka i tetai pae i te aere ki raro ake i tana amo ma ia katoa e ka tauturu aia ia ratou.a No reira, koi aru ei tatou i te akatere anga a Karaiti, ka vai ua rai ta tatou apainga kia rauka ia tatou i te rave no te mea ka tauturu mai aia ia tatou.

Te manako maira te Atua i te aronga te inangaro ra iaia, e te paruru ra aia i te au ngakau e te au manako ririnui o te aronga ravarai te pei ra i to ratou au teiaa anga ravarai kiaia na roto i te pure. (Salamo 55:22; Philipi 4:6, 7; 1 Petero 5:6, 7) “Kia akameitakiia te Atu i tera rā i tera rā, ko tei akateiaa ia matou i te meitaki, ko te Atua ï to matou nei ora.” (Salamo 68:19) Ae, kia akapapuia e ka apai katoa te Atua i te au apainga na kotou me akaruke kotou i te au teiaa ravarai e oro ma te akakoromaki i te taemoemo anga tei tukuia maira ki mua ia koe.

[Au Tataanga Rikiriki i Raro]

[Tutu i te kapi 24]

Te anoano ra te aronga pakari ma te kite i te oronga i etai au angaanga e te tua i te au apainga