Te Akarongo Tu Atua i Roto i Tetai Ngutuare Tangata tei Akatakakeia e te Akonoanga

“E MAATA atu te mamae i tetai moto anga i te pae kopapa. . . . I toku manako te mamae nei au i te ngai ravarai, e inara kare tetai e kite mai ana.” “I tetai taime e inangaro ana au i te akaruke i te oraanga . . . me kare i te akaruke e kare rava e oki akaou mai.” “E ngata tikai i te manako tika i tetai au taime.”

Te akaari maira taua au tuatua ra i te au manako no te anoano taitaia e te maromaroa. No ko mai ratou i te aronga tei tuatua akakinoia ra​—tei akaapaia, tei takinoia, tei kapiki ingoa viiviiia, te ravenga muna—​e pera katoa te akakino anga i te pae kopapa mei te au tokorua e te au mema o te ngutuare tangata. Eaa ra i takinga kinoiaʼi teia au tangata nei? No te au irinaki anga tuke ua nei o te akonoanga. I raro ake i teia au turanga, te nooanga i roto i tetai ngutuare tangata tei akatakakeia e te akonoanga te maani ra i te akamori anga ia Iehova ra ei akaaoanga tikai. Inara, te akaari autu meitaki ra te manganui o taua au Kerititiano akakinoia ra i te akarongo tu Atua.

Ma te meitaki, kare taua tu apiapi e te taitaia ra e kiteaia ana i roto i te au kainga ravarai tei akatakakeia e te akonoanga. Noatu rai, te vaira te reira. Te tano ra ainei toou kainga ki teia akataka anga? No reira, penei te kite ra koe e te ngata ra ia koe i te tamou i te tu kauraro ki toou tokorua me kare ki toou nga metua. Me e vaine koe i roto i taua turanga ra me kare e tamariki i roto i taua ngai ra, akapeea e raukaʼi ia koe te akaari autu meitaki atu i te akarongo tu Atua i roto i te kainga tei akatakakeia e te akonoanga? Eaa te turu anga te ka rauka i tetai atu i te oronga mai? E akapeea ra te manako o te Atua no te reira tumu manako?

Eaa ra i Ngata ei te Akarongo?

Te maani ra te inangaro ia koe uaorai o te ao nei e te angaanga ariki koreia e toou uaorai au inangaro tu ara ra ei putoto anga maata te akarongo tu Atua ra. Kua kite a Satani i teia, e te tauta nei aia i te aati i toou vaerua. Te taangaanga putuputu ra aia i te au mema o te ngutuare tangata tei kore ra e ariki ana e e kauraro ana i te au turanga tu Atua. E maata tikai te tuke o toou tu vaerua teitei e te au tu tika o toou ngutuare tangata akarongo kore ra. Ko te aite anga o teia e au manako tukeke no runga i te tu akono e te angaanga. (1 Petero 4:4) Penei e e ririnui te taomi anga kia taruri ke koe mei te turanga Kerititiano, i te mea e kua akarongo koe i te akauenga ra: “E auraka e kapiti ki te angaanga puapinga kore a te poiri.” (Ephesia 5:11) I to ratou nga mata kare koe e rave akaou ana i te au mea tika. No taau akonoanga katoa te tumu. Ko tetai metua vaine, te akateiaa angaia e te tamariki maki ra, kua pati atu ki tana tane i te tauturu e kua orongaia mai te pau anga, “E taime toou no taau akonoanga; kare koe e inangaro i tetai tauturu.” Te kapiti ra taua au tuatua ra i te akaaoanga o te tu akarongo.

Penei e te vaira tetai taime kare koe e akatika i te au tumu manako kare e arataki tika atu i te aati anga i te au Tuatua Tapu. Inara, kua kite koe e e tuanga koe no tetai ngutuare tangata e ki te maata anga ra e au apainga tetai. “E maromaroa ana au me akamanako e te akapeea nei toku metua tane i te akono anga ia matou no te mea kua kite au e te manako ra aia e koia anake ua,” i karangaʼi a Connie. “E akamaara putuputu ua ana au kiaku uaorai e auraka e riri i te patoi anga a toku metua tane. E mea anoano noku i te akakite kiaku uaorai e e tumu pakari tetai i manako akaperaʼi aia me kare i patoi mai ei i to matou turanga. Ko Satani te tutara o teia akatereanga o te au mea nei.” Kua akakite mai a Susan, tei akaipoipo ki tetai tangata akarongo kore ra e: “I te akamataanga e manako inangaro tikai toku i te akaruke​—inara kare akaou. Kua kite au e te taangaanga ra a Satani iaia i te timata iaku.”

Penei e te maani ra te au tauta anga a Satani ia koe kia manako puapinga kore e kare rava e akaotianga. Penei e ka pati te au ra kare e komunikeiti anga ma toou tokorua. Ka riro mai te oraanga ei mea maromaroa tikai. Te akakore ra teia i te irinaki anga e te akangateitei uaorai e te timata ra i toou akarongo tu Atua. Ka tu katoa te tamariki i teia tu manako ngakau e te akaparuparu anga i te pae kopapa. I tetai akaraanga, noatu e kua patoi to ratou nga metua, kua tae tiratiratu atu tetai au tavini mapu e toru ra o te Atua ki te au uipaanga Kerititiano. Ko tetai ia ratou ra, e orometua tamou i teianei, kua akakite mai: “Kua kite matou i te tu ngenge e te roiroi; kare i rauka ia matou te moe; kua aati te reira i to matou au ngakau.”

Eaa ra ta te Atua e Tapapa Maira Noou?

Te akarongo i te Atua te mea mua ia, e ko te akarongo tei tuangaia ki te tane e ko te upoko e mea tau e mei ta Iehova e akatika ra. (Angaanga 5:29) Penei e ka ngata te reira, inara ka rauka ia. E akara ua atu ki te Atua no te tauturu. Te inangaro ra aia ia koe kia “akamori ma te vaerua e te tuatua-mou” e kia akarongo atu e kia kauraro atu ki tana arataki anga. (Ioane 4:24) Te akakeu ra te kite mei ko mai i te Tuatua a te Atua, i te akarongo puareinga, tei akaki ra i te tu ngakau tika. Noatu e ka taui toou uaorai au turanga, kare rava a Iehova e tana Tuatua e taui. (Malaki 3:6; Iakobo 1:17) Kua oronga a Iehova i te taoonga upoko ki te tane. Te vai tika ua ra teia noatu e kua ariki aia i te taoonga upoko o Karaiti e me kare. (1 Korinetia 11:3) Noatu e penei ka ngata teia i te ariki atu me te aro putuputu ra koe i te akakino anga e te ta akaaka anga, te karanga ra te pipi a Iakobo e: “Kareka te pakari no runga maira . . . te akarongo ngoie.” (Iakobo 3:17) Kia kite i teia taoonga upoko kare i tamanakoia e kia ariki i te reira te umuumuia ra te vaerua o te Atua, tana ua o te aroa.​—Galatia 5:22, 23.

Me aroa koe i tetai ra, e ngoie ua i te akaari i te akarongo tu Atua ki te mana ikiia e te tu-Atua ra. Te ako maira a Ephesia 5:33 e: “E aroa ra te tangata katoa i tana uaorai vaine mei te aroa iaia uaorai; e te vaine oki e kauraro aia i tana tane.”

E tamanako ia Iesu. Kua tuatua akakino ia aia e te akakino angaia i te pae kopapa, inara kare rava aia i akakino i tetai ke. Kua tamou marie aia i te papa anga apa kore. (1 Petero 2:22, 23) E mamae ei a Iesu i taua au akakino anga maata ra, te anoano ia ra e ia te ngakau manava nui e te aroa rauka kore ra o tona Metua, ia Iehova ra. Inara, te “akakoromaki [ra te aroa] i te au mea katoa.”​—1 Korinetia 13:4-8.

Te akamaara ra a Paulo i tona taeake angaanga ra ia Timoteo, e te akamaara ra aia ia tatou i teia tuatau: “Kare oki i te ngakau kopē ta te Atua i oronga mai no tatou; te ngakau maroiroi ra, e te aroa, e te ngakau akono meitaki.” (2 Timoteo 1:7) Ka rauka te aroa oonu no Iehova e no Iesu Karaiti i te akakeu ia koe i roto i te akarongo tu Atua me te ngata ra te turanga i te tamou marie. Na te manako tau e tauturu ia koe kia tamou i tetai akara anga tau e te akara tamou anga ki runga i toou pirianga kia Iehova e ia Iesu Karaiti.​—Akaaite ia Philipi 3:8-11.

Te Au Tokorua Tei Autu te Akaarianga i te Akarongo Tu Atua

I tetai taime e mea tau kia tiaki koe i te tuatau roa kia akara e akapeea a Iehova i te akono anga i toou au manamanata. Inara, kare rava tona rima e poto ana. “E rave ua i te au mea ta Iehova ka oronga atu kia koe te tika anga e kia rave i te meitaki​—kia akamori iaia i te au uipaanga e te au akaputuputu anga, kia apii, kia aere ki te angaanga tavini anga, e kia pure,” ta tetai ia i akakite tei autu ra i te akaarianga i te akarongo tu Atua. Ko taau tauta anga ta Iehova ka akameitaki, kare ua e ko taau au akatupu anga. I roto ia 2 Korinetia 4:17, te karanga ra te apotetoro ko Paulo e ko te ‘mate e mea ngiti poto, te akatupu nei ïa i te kakā maata rava teimaa mutu kore no tatou.’ E akamanako no runga i teia. E tumu anga ngaueue kore noou. Te akaata maira tetai vaine: “Kare toku oraanga ngutuare tangata e meitaki mai ana, e i tetai taime e manako ana au e me te mareka maira a Iehova iaku. Inara ko tetai mea taku e akono ana ei akameitaki anga nana ko te tika anga e kua aere meitaki mai au mei roto i teia au turanga ngata mei taku tane ra. I te kiteanga e te akamareka ra ta tatou au angaanga ia Iehova te maani ra te reira i te putoto anga ravarai ei mea puapinga tikai.”

Kua taputou mai a Iehova e kare aia e akaruke ia koe i roto i te au turanga mamao taau kare e rauka i te tamou marie. E irinaki iaia. Kua kite meitaki aia i taau i kite, e kua kite meitaki aia ia koe i taau i kite noou uaorai. (Roma 8:35-39; 11:33; 1 Korinetia 10:13) Te pureanga kia Iehova te tauturu ra i te au turanga ngata. E pure no tona vaerua kia arataki ia koe, me kare tikai koe e kite e te aere ra koe kiea me kore akapeea te rave tamou anga i tetai turanga. (Maseli 3:5; 1 Petero 3:12) E pati putuputu kiaia no te akakoromaki, te akatere-uaorai, e te akarongo akaaka i te mana taoonga i roto i toou oraanga. Te karanga ra te tata taramo: “Ko Iehova taku mato, e taku punanga, e toku nei ora.” (Salamo 18:2) E akamaara e e tauturu akamaroiroianga teia no ratou i roto i te ngutuare tei akatakakeia e te akonoanga.

Tei runga rava atu, e tauta pakari i te maani i toou akaipoipo e ko tetai mea mataora ia. Ae, kua kite ana a Iesu i mua atu e ka akatupu te tuatua meitaki i te au akapae anga. Noatu ra, e pure kia kore toou tu me kare te tu akono e akatupu i tetai akapae anga. (Mataio 10:35, 36) Ki teia manako nei, te akameangiti ra te taokotai anga i te au manamanata o te akaipoipo. Noatu e ko koe anake te akaari ra i teia tu tau ra, ka rauka i te arai maata atu i te au manamanata kia kore e taeria ki te tumu o te maniania maata e te taumaro anga. E puapinga maata tikai te akakoromaki e te aroa. “Kia maru” e te “akakoromaki marie.”​—2 Timoteo 2:24.

Kua riro mai te apotetoro ko Paulo ra ei “au mea katoa i te tangata ravarai nei.” (1 Korinetia 9:22) Ma te aiteite rai, kare ra e akaruke i te au angaanga Kerititiano, penei i tetai taime ka inangaro koe i te akatano i toou taime kia maata te tuatau ma toou tokorua e te ngutuare tangata. E oronga maata atu i te tuatau kiaia ra ko taau ia i iki i te tua atu i toou oraanga. E akaari i te manako Kerititiano. E akakite anga teia i te akorongo tu Atua.

Te vaine mataku i te Atua e te kauraro e tei maru ra e te manako akaaroa ra e mea ngoie ua i te akaari i te akarongo tu Atua. (Ephesia 5:22, 23) Te au tuatua aroa ra, “kia rapakauia i te tai,” te tauturu ra kia akameangiti mai i tetai au maniania anga putuputu.​—Kolosa 4:6; Maseli 15:1.

Te ako maira te pakari tu Atua ia koe kia akono viviki i te au tuke anga e kia akaoki i te au ma te au tuatua akamaroiroi meitaki ra, kare e aere atu ki te moe na roto i te “riri.” (Ephesia 4:26, 29, 31) E tu akaaka tikai teia. E irinaki maata atu ki runga ia Iehova no te maroiroi. Kua akatika akaaka mai tetai vaine Kerititiano e: “I muri ake i te pure akatenga, kua kite au i te vaerua o Iehova i te taakianga i toku rima i te takave i toku tokorua.” Te ako maira te Tuatua a te Atua e: “Auraka te kino e tutakiia atu ki te kino i te tangata ravarai nei. . . . Kia mate ra te kino ia koe i te meitaki.” (Roma 12:17-21) E ako anga pakari teia e ko te mataara no te akarongo tu Atua ia.

Te Au Tamariki te Akaari ra i te Akarongo Tu Atua

Te ako anga a Iehova kia koe e te au tamariki i roto i te ngutuare tangata tei akatakakeia e te akonoanga e: “E te au tamariki e, e akarongo i to kotou au metua i te au mea katoa nei, e mea mareka te reira na te Atu.” (Kolosa 3:20) E akara ana kua taikuia mai te Atu ra a Iesu Karaiti i roto i teia tumu manako. No reira, kare e arairai anga i te akarongo ki nga metua ra. I tetai manako te ako anga a Angaanga 5:29, kia ‘akarongo i te Atua ra e tikaʼi auraka te tangata,’ te tano katoa ra ki te au mapu Kerititiano. Ka tupu mai tetai au atianga me iki koe eaa te ka raveia no runga i te tumu manako taau e kite ra e me te tau ra ki te au Tuatua Tapu. Penei e ka tupu mai tetai au tu akautunga anga no te patoianga kia kore e o atu ki roto i tetai akamori anga angaanga pikikaa. I te mea e e manakonako anga reka kore teia, ka rauka ia koe te pumaana e pera katoa te rekareka i te kite anga e te mamae ra koe no te raveanga i te mea tika i roto i nga mata o te Atua ra.​—1 Petero 2:19, 20.

I te mea e na te au kaveinga Puka Tapu e arataki i toou au manako, penei e ka tuke koe ma toou nga metua i runga i tetai au maro anga. Kare teia e maani ra ia raua ei enemi noou. Noatu e kare raua i nga tavini akatapuia no Iehova ra, e mea tau te akangateitei ia raua. (Ephesia 6:2) Te karanga ra a Solomona e: “E akarongo mai i to metua tane i anau ei koe ra, e auraka e akavaavaa i to metua vaine me ruaine aia ra.” (Maseli 23:22) E tauta kia marama i te mamae ta raua e manako ra no runga i taau aruaruanga i te akarongo tei tuke ra ia raua. E komunikeiti kia raua, e “kia kitea meitakiia oki to kotou maru.” (Philipi 4:5) E oronga i toou au manako e te akono anga. Kia ketaketa no te au kaveinga tu Atua, inara, “kia noo au ua kotou i roto i te tangata katoa nei.” (Roma 12:18) Te tika anga oki e kua akarongo koe ki te ture a to nga metua ra i teia taime nei na te akaari anga kia Iehova e te anoano ra koe i te rave ua atu i te akarongo ei tangata no te Patireia.

Eaa ta Etai ka Rauka i te Rave

Ko te au Kerititiano te noo ra i roto i te ngutuare tangata tei akatakakeia e te akonoanga te anoano ra i te turu anga e te akamaramaanga mei ko mai i te au taeake akamori ra. E au tuatua akapapu anga teia mei ko mai i tetai te karanga ra e: “E manako puapinga kore e te tauturu kore tikai toku, i te mea e kare e rauka i tetai i te rave, e kare e rauka iaku i te taui i te reira. Te irinaki nei au ia Iehova kia rave i tona anoano i roto i toku ngutuare tangata, te ka rauka ua.”

E puanga te au tungane e te au tuaine pae vaerua te kapiti atura ki te au uipaanga Kerititiano. Kua akataka katoa mai rai teia vaine nei i tona oraanga “mei tetai nga ao tuke e rua ra. Ko tetai tei roto au e ko tetai e reka ana mei tei roto au.” Na te aroa o te taokotai anga taeake i raukaʼi i teia aronga taitaia i te tamou marie e te tavini i te au turanga ravarai. E kapiti atu ia ratou ki roto i taau au pure. (Ephesia 1:16) I te au atianga ravarai, e i te au taime, e tuatua akamaroiroi atu, akapapu atu, e te tuatua pumaana atu anga kia ratou. (1 Tesalonia 5:14) Me ka tika e me ka tau, e kapiti atu ia ratou ki roto i taau au angaanga teokaratiki e te au angaanga tamataora ra.

Te Au Akameitakianga e te Au Puapinga no te Akarongo Tu Atua

E manakonako i te au ra katoa no runga i te au akameitakianga e te au puapinga te akaarianga i te akarongo tu Atua i roto i tetai kainga tei akatakakeia e te akonoanga. E angaanga pakari no te akarongo. ‘Auraka e akaroi.’ (Galatia 6:9) Te tamou marie anga i te au turanga mareka koreia e te au tika kore “no te akava-ngakau i te Atua . . . e mea meitaki ïa” i te Atua. (1 Petero 2:19, 20) E akarongo atu ki te maata anga i te au kaveinga tika e kia kore e akaruke i te au ture a Iehova. Te akaari ra teia i te tiratiratu ki ta Iehova akapapa anga. Penei e ka akaora toou tu akono tu Atua ra i te oraanga o toou tokorua, te tamariki, me kare te nga metua ra.​—1 Korinetia 7:16; 1 Petero 3:1.

Ia koe e autu meitaki ra i te au maro anga e te au tapapa anga o tetai ngutuare tangata tei akatakakeia e te akonoanga, e akamaara i te puapinga no te tamou i te tiratiratu ki te Atua ra ia Iehova e ia Iesu Karaiti. Penei e ka rauka ia koe te au tumu e manganui, inara te rauka anga te tiratiratu ka rauka ia te au mea katoatoa, kapiti atu te oraanga uaorai. Te karanga ra te apotetoro ko Paulo e: “Ko te Atua . . . Ko tei tuatua mai ïa kia tatou i teianei tuatau openga i tana Tamaiti, ko tei akariroia e ia ei Atu no te au mea ravarai, e kua anga oki i nga ao katoa nei iaia.” Te kiteanga i teia “ora maata mei teianei” e akamaroiroi angaia ia koe kia akarongo.​—Ebera 1:1, 2; 2:3.

Na toou akarongo kare e akarukeia e te ketaketa i te au tu tika e te au apinga tika ra e paruru meitaki ia koe e toou tokorua akarongo kore ra. Na te tu akarongo e akatu i te au pirianga ketaketa o te ngutuare tangata. Te karanga a Maseli 31:11 no tetai vaine akono meitaki e te tiratiratu: “Te irinaki ra te ngakau o tana tane ra iaia.” Penei e na toou tu akono meitaki e te akangateitei oonu e akapuera i nga mata o taau tane akarongo kore ra. Penei e ka arataki atu ia iaia kia ariki i te tuatua mou a te Atua.

E puapinga tikai te akarongo tu Atua e te akaoraanga. E pure no te reira i roto i te oraanga o toou ngutuare. Ka tupu mai ia ei tu au no te manako e te apai maira ia i te akapaapaa anga kia Iehova.