Kimi Anga i te Au Apinga Puapinga Maata ‘Tei Vaooia i Roto Iaia’
“Tei vaoo katoatoaia te apinga ra o te pakari e te kite i roto iaia ra.”—KOLO. 2:3.
1, 2. (a) Eaa tei kiteaia mai i te mataiti 1922, e teiea taua au apinga ra i teianei? (e) Eaa te patianga ki te katoatoa ta te Tuatua a te Atua e oronga maira?
E RIRO putuputu ana te kitea anga o te au apinga puapinga maata tei unaia ei nuti maata. Ei akaraanga, i te mataiti 1922, i muri ake i te au rau ngauru mataiti i te angaanga pakari anga i raro ake i te au turanga ngata, e mea umere tikai tei kiteaia mai e Howard Carter, e tangata keri apinga taito, no Peritane. Kua kitea mai iaia te ngai tanumanga ariki o Pharao Tutankhamen, te vai meitaki ua ra, vaitata rai e 5,000 apinga i roto.
2 Noatu e e mea umere tikai tei kiteaia mai e Carter, te maata anga o te au apinga tana i kite mai, tei roto i te au runanga apinga taito me kore tei roto i te apinga akaputu a tetai au tangata. Penei e puapinga maata to te reira au apinga i te pae tuatua enua me kore i te pae ati, kareka ra kare o te reira puapinga no to tatou oraanga i te au ra ravarai. Inara, te pati maira te Tuatua a te Atua kia tatou kia kimi i te au apinga puapinga maata tikai te ka riro ei meitaki no tatou. Te patiia atu nei te katoatoa, e ko te tutaki e puapinga roa atu te reira i tetai ua atu apinga puapinga maata i te pae materia.—E tatau ia Maseli 2:1-6.
3. I roto i teea au mataara i puapinga ai te au apinga puapinga maata ta Iehova e raurau ra i tana aronga akamori kia kimi?
3 E akamanako ana i te puapinga o te au apinga puapinga maata ta Iehova e raurau ra ki tana aronga akamori kia kimi. I roto i taua au apinga puapinga maata ra koia oki ko “te mataku ia Iehova,” te ka riro ei paruru e ei tiaki ia tatou i teia au tuatau kino. (Sala. 19:9) Ka riro te kitea anga “te kite i te Atua” ei arataki ki te tikaanga ngateitei rava atu te ka rauka i tetai ua atu tangata—koia oki, tetai pirianga vaitata uaorai ki Tei Teitei Rava. E ma te au apinga puapinga maata no ko mai i te Atua, te pakari, te kite, e te karape, ka rauka ia tatou i te akono meitaki i te au manamanata e te au taitaia i roto i to tatou oraanga i te au ra ravarai. (Mase. 9:10, 11) Akapeea e kitea ai e tatou taua au apinga puapinga maata akaperepereia ra?
Kimi Anga i te Au Apinga Pae Vaerua
4. Eaa ra te au kaveinga ki te au apinga puapinga maata i te pae vaerua tei rauka ia tatou?
4 Kare i aite ki te aronga keri apinga taito e te aronga kimi ngai ou, e kimi ra i te au ngai katoatoa no ta ratou au apinga puapinga maata, kua kite tikai ra tatou e, teiea te ngai ka kiteaia te au apinga puapinga maata i te pae vaerua. Mei te mapu kimi apinga puapinga maata rai, te akakite maira te Tuatua a te Atua kia tatou, i te ngai tikai ka kitea e tatou te apinga puapinga maata ta te Atua i taputou mai. I te tuatua anga no runga ia Karaiti, kua tata te apotetoro ko Paulo e: “Tei vaoo katoatoaia te apinga ra o te pakari e te kite i roto iaia ra.” (Kolo. 2:3) Ia tatou e tatau ra i taua au tuatua ra, penei ka ui tatou e: ‘Eaa ra tatou ka kimi ei i taua au apinga puapinga maata ra? Akapeea ra te reira i ‘te vaooia anga i roto ia’ Karaiti? E ka akapeea ra e kitea ai ia tatou te reira?’ E rauka mai ei te au pauanga, ka akara meitaki ana tatou i te au tuatua a te apotetoro.
5. Eaa ra a Paulo i tata ei no runga i te au apinga puapinga maata i te pae vaerua?
5 Kua tata a Paulo i taua au tuatua ki tona au oa Kerititiano i Kolosa. Kua akakite aia kia ratou e e taitaia maata tona no ratou “kia pumaana to ratou ngakau, i te tau okotai anga i te aroa.” (E tatau ia Kolosa 2:1, 2.) Eaa ra aia i taitaia ei? E tika, kua kite a Paulo e penei te akakeuia ra te au taeake i reira e tetai aronga i rotopu ia ratou e turu ra i tetai au apiianga Ereni me kore, e akamaroiroi ra kia akono akaou i te Ture a Mose. Kua akamatakite pakari atu aia i te au taeake e: “E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.”—Kolo. 2:8.
6. Eaa ra tatou ka akamanako atu ei i te akoanga a Paulo?
6 I teia tuatau, te aro atura tatou i te au akakeuanga mei te reira rai mei ko mai ia Satani e tona akatereanga kino. Te apiianga o teianei ao, kapiti mai i te irinaki i roto i te tangata e te apiianga o te mea tupu ua mai, te akakeu ra i te aerenga manako o te tangata, te au tu akono tau, te au akakoroanga, e te turanga o te oraanga. E tuanga maata ta te akonoanga pikikaa i roto i te akamaaraanga o te au orote rekaia e manganui. E reka ana te au pitiniti tamataora i te akamaroiroi i te au anoano tau kore o te kopapa, e te maata anga o te au porokaramu i runga i te Internet te akatupu ra i te kino ki te au mapu e te aronga pakari katoa. Ka riro te akara putuputu ua rai i teia e tetai atu au tu o teianei ao ei takino ngoie ua i to tatou manako e to tatou tu ki te aratakianga ta Iehova e oronga maira, kia kore tatou e mou piri i te ora mutu kore. (E tatau ia 1 Timoteo 6:17-19.) Te taka ua ra e, ka anoanoia tatou kia marama i ta Paulo akoanga ki to Kolosa e kia akamanako meitaki i te reira kia kore tatou e inga atu ki roto i te au ereere a Satani.
7. Eaa nga mea e rua ta Paulo i akakite e ka tauturu i to Kolosa?
7 I te akamanako akaou anga i te au tuatua a Paulo ki to Kolosa, te kite ra tatou e i muri ake i te taiku anga i tona taitaia, kia tau ki The New World Translation, kua akakite aia e rua nga mea te ka akapumaana ia ratou e te ka akarotai kapiti ia ratou i roto i te aroa. Te mea mua, kua taiku aia i “te akapapuanga mou tikai i to ratou marama.” Ka anoanoia ratou kia irinaki pu tikai e kua tika ta ratou marama anga i te au Tuatua Tapu, e kia rauka ia ratou te akatumu i to ratou akarongo ki runga i tetai tango ngaueue kore. (Ebe. 11:1) E oti, kua taiku atu aia “i te kite tika tikai i te tuatua muna tapu a te Atua.” E maata atu i te kite tumu o te tuatua mou ta ratou ka anoano, e kia rauka te marama taka meitaki i te au apiianga oonu a te Atua. (Ebe. 5:13, 14) E akoanga meitaki tikai no to Kolosa e no tatou i teia tuatau! Ka akapeea ra e rauka ai ia tatou taua akapapuanga e taua kite tika tikai ra? Kua oronga mai a Paulo i te taviri i roto i tana tuatua pakari no runga ia Iesu Karaiti e: “Tei vaoo katoatoaia te apinga ra o te pakari e te kite i roto iaia ra.”
Te Au Apinga Puapinga Maata ‘Tei Vaooia i Roto ia’ Karaiti
8. E akamarama mai i te aiteanga o te tuatua ‘tei vaooia i roto ia’ Karaiti.
8 Kia karanga e kua ‘vaooia i roto ia’ Karaiti te au apinga puapinga maata o te pakari e te kite, kare tona aiteanga e kua unaia te reira, kia kore e rauka i tetai ua atu tangata. Mari ra, ko te aiteanga koia oki, e kiteaia ai te au apinga puapinga maata, ka anoanoia tatou kia tauta pakari tikai, e kia akatinamou i to tatou manako ki runga ia Iesu Karaiti. Te rotai ra teia ki ta Iesu i tuatua no runga iaia uaorai e: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.” (Ioa. 14:6) Ae, e kitea ai te kite no runga i te Atua, ka anoanoia te tauturu e te aratakianga ta Iesu e oronga maira.
9. Eaa te au tuanga angaanga tei tukuia kia Iesu?
9 Kapiti atu ki te riro anga e ko “te mataara,” kua akakite a Iesu e koia “te tuatua-mou e te ora.” Te akaari maira teia e e maata roa atu te o maira ki tana tuanga angaanga, i to te riro ua anga ei ravenga no te akavaitata atu ki te Metua. E au tuanga angaanga katoa ta Iesu tei puapinga ki te marama anga i te tuatua mou o te Pipiria e te rauka anga te oraanga mutu kore. Te tika ua ra, e te vaooia ra i roto ia Iesu te au apinga puapinga maata aite koreia i te pae vaerua, e vai ua ra kia rauka i te aronga apiipii meitaki i te Pipiria kia kite. Ka makitoro marie ana tatou i etai o teia au apinga puapinga maata e piri tika atura ki to tatou manakonakoanga no te tuatau ki mua e to tatou pirianga ki te Atua.
10. Eaa ta tatou ka kite no runga ia Iesu mei ia Kolosa 1:19 e te 2:9?
10 “Tei roto iaia oki te ki katoa o te Atua i te noo marie anga.” (Kolo. 1:19; 2:9) No te mea kua noo ana aia ki tona Metua i te rangi no tetai tuatau roa, ko Iesu tei kite meitaki atu i tetai ua atu tangata, i te anoano o tona Metua e tona tu ei Atua. I te tuatau o tana angaanga orometua i te enua nei, kua apii atu a Iesu i etai ke i ta tona Metua i apii kiaia, e kua akaata i roto i tana au angaanga te au tu ta tona Metua i apii kia rauka iaia. Ko te tumu te reira i rauka ai ia Iesu kia karanga e “Ko te akara mai iaku nei, kua akara ïa i te Metua.” (Ioa. 14:9) Pouroa te pakari e te kite i te Atua kua unaia, me kore te vai ra, i roto ia Karaiti, e kare atu e mataara meitaki atu no tatou kia kite no runga ia Iehova mari ra, na te apii meitaki anga i te au mea pouroa te ka rauka ia tatou no runga ia Iesu.
11. Eaa te pirianga i rotopu ia Iesu e te au totou Pipiria?
11 “Ko te akakite oki ia Iesu ra, ko te vaerua ïa o te totou.” (Apo. 19:10) Te akakite ra taua au tuatua ra e ko Iesu te tangata maata i roto i te akatupu anga i te au totou e manganui i roto i te Pipiria. Mei ta Iehova totouanga mua i akakite, tei rekotiia i roto ia Genese 3:15, e tae ua atu ki te au orama kaka i roto i te puka o Apokalupo, ka rauka kia marama meitakiia te au totou Pipiria, mei te mea ua ra e, me akamanakoia e te piri atura te tuanga angaanga a Iesu ki te Patireia o te Mesia. Te akataka maira te reira i te tumu i kore ei te au totou i roto i te au Tuatua Tapu Epera e maramaia e te aronga tei kore e ariki ana e ko Iesu te Mesia taputouia. Te akataka katoa maira te reira i te tumu i manako ei te aronga kare e akaperepere ana i te au Tuatua Tapu Epera, e kare a Iesu i te tangata maata. Ina e, tei roto i reira te au totou e manganui no runga i te Mesia. Ko te kite no runga ia Iesu, ko te reira te tauturu ra i te au tangata o te Atua kia marama i te aiteanga o te au totou Pipiria kare i akatupuia ake.—2 Kori. 1:20.
12, 13. (a) Akapeea ra a Iesu i riro ei e ko “te mārama o teianei ao”? (e) I te mea e kua matara mai mei te poiri pae vaerua, eaa te umuumuia maira mei te au pipi a Karaiti?
12 “Ko au te mārama o teianei ao.” (E tatau ia Ioane 8:12; 9:5.) I mua rava atu i te anau anga o Iesu i te enua nei, kua totou te peroveta ko Isaia e: “Te aronga i aere ua na te poiri ra, kua akara ïa i te mārama maata: te aronga i noo ki te ngai maru-mate, kua itiia ratou e te mārama.” (Isa. 9:1) Kua akamarama mai te apotetoro ko Mataio e kua akatupu a Iesu i taua totou ra i Tona akamata anga i te tutu aere e kua akakite e: “Ka tataraara: te vaitata mai nei oki te basileia o te ao.” (Mata. 4:16, 17) Kua riro ta Iesu angaanga orometua ei apai mai i te marama pae vaerua ki te tangata, e kia matara mai ratou mei roto i te tuikaaanga a te au apiianga akonoanga pikikaa. “I aere mai ei au i te ao nei ei mārama,” i tuatua ai a Iesu, “kia kore tei akarongo mai iaku ra kia noo ua i te poiri.”—Ioa. 1:3-5; 12:46.
13 I te au mataiti e manganui i muri mai, kua akakite te apotetoro ko Paulo ki tona au oa Kerititiano e: “I poiri ana oki kotou i muatangana ra, i teianei ra, kua mārama kotou i te Atu: kia tau oki to kotou aerenga i te tamariki o te mārama.” (Ephe. 5:8) I te mea, kua matara mai ratou mei te tuikaa ki te tu poiri i te pae vaerua, te umuumuia ra te au Kerititiano kia aaere mei te tamariki o te marama. Te rotai ra teia ki ta Iesu i akakite ki tana au pipi i roto i te Tuatua i runga i te Maunga e: “Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.” (Mata. 5:16) E maata tikai ainei toou rekareka i te au apinga puapinga maata i te pae vaerua taau i kite mai i roto ia Iesu, e ka inangaro koe i te akakite atu ki etai ke na roto i te tuatua anga no runga i te reira, e na roto i toou tu meitaki ei Kerititiano?
14, 15. (a) Akapeea te mamoe e te au manu i riro ei ei tuanga no te akamorianga mou i te tuatau o te Pipiria? (e) Eaa ra a Iesu i riro ei ei apinga puapinga maata aite koreia i roto i tana tuanga angaanga ei ‘Punua-mamoe na te Atua’?
14 Ko Iesu “te Punua-mamoe a te Atua.” (Ioa. 1:29, 36) I roto i te katoaanga o te Pipiria, e tuanga puapinga ta te mamoe i roto i te akakore anga ara e te akavaitata anga atu ki te Atua. Ei akatauanga, i muri ake i to Aberahama akaari anga i tona inangaro puareinga ua i te oronga i tana tamaiti ko Isaaka, kua akakiteia kiaia e auraka e arapaki atu ia Isaaka, e kua orongaia mai tetai toa mamoe, ei atinga. (Gene. 22:12, 13) I te akaoraia mai anga te ngati Iseraela mei Aiphiti, e tuanga puapinga akaou ta te mamoe, i teia taime ei tuanga no te ‘pasa a Iehova.’ (Exo. 12:1-13) Pera katoa, i raro ake i te Ture a Mose kua akanooia e kia orongaia te au manu tukeke ei atinga, kapiti mai te au mamoe e te au puakanio.—Exo. 29:38-42; Levi. 5:6, 7.
15 Kare tetai ua atu o taua au atinga ra—koia oki, kare te au atinga tei orongaia e te tangata—e riro ei apai mai i te rangatiraanga tinamou mei te ara e te mate. (Ebe. 10:1-4) I tetai tua ra, ko Iesu “te Punua-mamoe a te Atua, ko tei apai ke atu i te ara a to te ao.” Na teia tikaanga anake ua i akariro ia Iesu ei apinga puapinga maata atu i tetai apinga puapinga maata i te pae materia tei kiteaia ana. No reira, e mea meitaki no tatou kia akapou i te taime kia apii meitaki no runga i te ravenga oko, e kia taangaanga i te akarongo i roto i taua ravenga umeremere ra. Me rave tatou i teia, ka rauka ia tatou tetai manakonakoanga e te akameitakianga manea rava—te kaka e te akangateiteianga ma Karaiti i runga i te rangi no te “anana iti,” e te oraanga mutu kore i runga i te enua Parataito no te “mamoe ke atu.”—Luka 12:32; Ioa. 6:40, 47; 10:16.
16, 17. Eaa i puapinga ai kia marama tatou i ta Iesu tuanga angaanga ei “tumu e te akaoti i to tatou akarongo”?
16 Ko Iesu “te tumu e te akaoti i to tatou akarongo.” (E tatau ia Ebera 12:1, 2.) I roto ia Ebera pene 11, ka kite tatou i ta Paulo uriurianga ririnui no runga i te akarongo, tei kapiti mai i tetai akatakaanga tika ua, e tetai papaanga no runga i te au akaraanga meitaki o te au tane e te au vaine tei akono i to ratou akarongo mei ia Noa, Aberahama, Sara, e Rahaba. Ma te akamanakoanga i teia au mea pouroa, kua raurau atu a Paulo i tona au oa Kerititiano kia “akara tamou kia Iesu i te tumu e te akaoti i to tatou akarongo.” Eaa te tumu?
17 Ko taua au tane e taua au vaine akarongo mou ra tei papaia i roto ia Ebera pene 11, noatu e e akarongo ketaketa to ratou i roto i te taputou a te Atua, kare ra ratou i kite i te au mea katoatoa, e ka akapeea te Atua i te akatupu anga i tana taputou na roto i te Mesia e te Patireia. I roto i taua tu ra, kare to ratou akarongo i ope takiri. E tika katoa e, kare te aronga tei taangaangaia e Iehova kia tata i te au totou e manganui no runga i te Mesia, i marama tikai no runga i te puapinga o ta ratou i tata. (1 Pete. 1:10-12) Na roto anake ua rai ia Iesu e akaope takiriia ai te akarongo. E mea puapinga tikai kia marama e kia kite meitaki tatou i ta Iesu tuanga angaanga ei “tumu e te akaoti i to tatou akarongo”!
E Kimi ua Atu Rai
18, 19. (a) E akakite mai i tetai atu au apinga puapinga maata i te pae vaerua tei vaooia i roto ia Karaiti. (e) Eaa ra tatou ka akara tamou ua atu ei kia Iesu no te au apinga puapinga maata i te pae vaerua?
18 Ko etai ua o ta Iesu au tuanga angaanga akaperepere i roto i to te Atua akakoroanga no te akaora anga i te tangata ravarai, ta tatou i akara mai ana. Te vai ra rai tetai atu au apinga puapinga maata i te pae vaerua, tei vaooia i roto ia Karaiti. Me kiteaia, ka apai mai te reira i te rekareka maata e te au puapinga. Ei akaraanga, kua kapiki te apotetoro ko Petero ia Iesu e ko “te Tumu o te ora” e te “etu popongi” e kake maira. (Anga. 3:15; 5:31; 2 Pete. 1:19) E te taangaanga ra te Pipiria i te tuatua “Amene” kia Iesu. (Apo. 3:14) Kua kite ainei koe i te aiteanga e te puapinga o teia au tuanga angaanga? Mei ta Iesu i tuatua e, “e kimi, e kitea ïa ia kotou.”—Mata. 7:7.
19 Kare ua e tangata i roto i te katoaanga o te tuatua enua, i puapinga maata tikai tona oraanga e tei piri vaitata atu ki to tatou turanga meitaki no te tuatau mutu kore mei to Iesu rai. Tei roto iaia te au apinga puapinga maata i te pae vaerua te ka rauka ngoie ua i tetai ua atu tangata e kimi ra i te reira ma te ngakau katoa. Ka rauka ia koe te rekareka e te akameitakianga, i te kimi anga i te au apinga puapinga maata ‘tei vaooia i roto iaia.’
Maara Ainei ia Koe?
• Eaa te au apinga puapinga maata e raurauia ra te au Kerititiano kia kimi?
• Eaa ra te akoanga a Paulo ki to Kolosa i tau ei no tatou i teia tuatau?
• Akakite mai, e e akataka mai i etai o te au apinga puapinga maata i te pae vaerua ‘tei vaooia i roto ia’ Karaiti.
[Au Tutu i te kapi 5]
Aite rai te Pipiria ki te mapu kimi apinga puapinga maata e arataki ra ia tatou ki te au apinganui ‘tei vaooia i roto’ ia Karaiti