E Akakite Tamou Marie i te Tu Meitaki
“Ko te au ua o te marama ko te au tu meitaki ravarai ia e te tuatua tika e te tuatua mou.”—EPHESIA 5:9, NW.
1. Akapeea te aronga e mirioni ua atu i te akaari anga mai e te akatika ra ratou ia Salamo 31:19 i teianei?
KO TE meitaki maata rava te ka rauka i tetai ua atu tangata kia rave ko te apai mai i te kaka kia Iehova. I teia tuatau, e au mirioni ua atu te rave nei i teia na te akapaapaaanga i te Atua no tona tu meitaki. Ei Au Kite tiratiratu o Iehova, ka akatika tatou ma te ngakau katoa i te tata taramo tei imene ra: “Te maata oki o te au mea memeitaki naau, i tei vaooia e koe no te aronga i mataku ia koe ra!”—Salamo 31:19.
2, 3. Eaa te ka tupu me kare ta tatou angaanga akariroanga i te tangata ei pipi e turuia e te tu akono meitaki?
2 Te akakeu ra te mataku tapu ia Iehova kia akapaapaa tatou iaia no tona tu meitaki. Te akakeu katoa ra oki te reira ia tatou kia ‘akapaapaa ia Iehova, kia akameitaki iaia, e kia akakite i te kakā o tona ariki anga.’ (Salamo 145:10-13) No reira tatou i rave totomapu ei i te tutuanga Patireia e te angaanga akariroanga i te au tangata ei pipi. (Mataio 24:14; 28:19, 20) Inara, ka tika ta tatou angaanga tutu aereanga kia turuia e te tu akono meitaki. No te mea, ka apai mai tatou i te akakino anga ki runga i te ingoa tapu o Iehova.
3 E manganui te au tangata te karanga ra e te akamori ra ratou i te Atua, inara kare to ratou tu akono e tau ana ki te au turanga tei akanooia ra i roto i tana Tuatua akauruia. No tetai papaki kare ra i akono kia tau ki ta ratou i karanga no te raveanga meitaki, kua tata te apotetoro ko Paulo: “Ko koe oki ko tei apii atu i tetai ke ra, kare koe e apii ia koe uaorai? ko koe oki tei ako ua e, auraka e keia, te keia na oki koe? Ko koe oki ko tei karanga e, auraka e akaturi, te akaturi na oki koe? . . . Kua akakinoia oki te ingoa o te Atua ki o te etene ia kotou; mei tei tataia ra.”—Roma 2:21, 22, 24.
4. No to tatou tu akono meitaki eaa oki te akatupu anga?
4 Koi kore ei i apai mai i te akakino anga ki runga i te ingoa o Iehova, te tauta ra tatou kia akakaka i te reira na to tatou tu akono meitaki. E akatupu anga papu to teianei ki te aronga i vao ake i te putuputuanga Kerititiano ra. Ko tetai apinga, ka tauturu mai te reira ia tatou kia akamuteki i te aronga patoi ia tatou. (1 Petero 2:15) E maata atu oki te puapinga, na to tatou tu akono meitaki e akapiri vaitata mai i te au tangata ki te akaaerenga a Iehova, i te akatueraanga i te mataara no ratou kia apai mai i te kaka kiaia e kia raukai ia ratou te oraanga mutu kore.—Angaanga 13:48.
5. Eaa te au uianga ka tau tatou kia akamanako i teianei?
5 I te mea e tu apa ua to tatou, akapeea e raukai ia tatou kia kopae ke i te tu akono te ka akangateitei kore ia Iehova e ka akaturori i te aronga te kimi ra i te tuatua mou? E tika oki, ka akapeea e raukai kia autu tatou i te akakiteanga i te tu meitaki?
E Ua no te Marama
6. Eaa etai o “te angaanga puapinga kore a te poiri,” inara eaa te au ua te tau ra kia kitea i roto i te au Kerititiano?
6 Ei au Kerititiano akatapuia, te rekareka nei tatou i tetai apinga te tauturu nei ia tatou kia kopae ke i “te angaanga puapinga kore a te poiri.” Te kapiti ra teia i te au angaanga akangateitei kore i te Atua mei te pikikaa anga, te keiaanga, te tuatua akaapa, te tuatua tau kore no te ainga, te tu akono akama, te tuatua viivii, e te kona kava. (Ephesia 4:25, 28, 31; 5:3, 4, 11, 12, 18) Koi kore ei e kapiti atu ia tatou uaorai ki taua au angaanga ra, “ka aere ua atu ei tamariki no te marama.” Te tuatua ra te apotetoro ko Paulo e “ko te au ua o te marama ko te au tu meitaki ravarai ia e te tuatua tika e te tuatua mou.” (Ephesia 5:8, 9, NW) No reira na te aaere ua atu anga i roto i te marama e raukai ia tatou kia akakite i te tu meitaki. Inara eaa teianei tu marama?
7. Eaa ta tatou ka tika kia rave i te akakite ua atuanga i te ua no te meitaki?
7 Noatu rai to tatou au tu apa ua, ka rauka ia tatou kia akakite i te tu meitaki me ka aaere tatou i roto i te marama pae vaerua. “E lamepa taau tuatua i toku nei vaevae, e turama no toku nei arataa,” ta te tata taramo i imene. (Salamo 119:105) Me te anoano ra tatou kia akakite ua atu i “te au ua o te marama” na roto i “te au tu meitaki ravarai,” ka tika tatou kia akono tamou marie i te marama pae vaerua te kitea ra i roto i te Tuatua a te Atua, te akara matatioia i roto i te au puka Kerititiano, e tei uriuri putuputuia i roto i ta tatou au uipaanga no te akamori anga. (Luka 12:42; Roma 15:4; Ebera 10:24, 25) Ka tau katoa tatou kia akamanako taka ke i te au akatauanga e te au apiianga a Iesu Karaiti, “te mārama o teianei ao” e “te kakā oki aia o [to Iehova] tapunui.”—Ioane 8:12; Ebera 1:1-3.
E Ua no te Vaerua
8. Eaa e raukai ia tatou te akakite i te tu meitaki?
8 Kare e ekoko anga te tauturu maira te marama pae vaerua ia tatou kia akakite i te tu meitaki. Kapiti katoa oki, te rauka ra ia tatou te akakite i teia tu no te mea te aratakiia nei tatou e te vaerua tapu o te Atua, me kare tona mana rave angaanga. E tuanga te tu meitaki no “te ua o te vaerua ra.” (Galatia 5:22, 23) Me kauraro tatou i te arataki anga a te vaerua tapu o Iehova ra, ka akatupu mai te reira i roto ia tatou i tona ua umere i te tu meitaki.
9. Akapeea e raukai ia tatou te akono kia rotai ma ta Iesu au tuatua i tataia ra ia Luka 11:9-13?
9 Ka tau to tatou inangaro maata kia akamareka ia Iehova na te akakiteanga i te ua o te vaerua koia te tu meitaki kia akakeu ia tatou kia akono rotai ma ta Iesu au tuatua: “E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai te pa ia kotou. Ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topapa ra, e kiritiia mai ïa te pa iaia. Koai ïa metua i o kotou nei, e apai atu i te toka na tana tamaiti, kia pati mai aia i te manga? e kia pati mai i te ika, e apai atu aina i te ovi nana ei ika? E kia pati aia i te ua moa, e apai atu aina i te sekopio? E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te Vaerua Tapu i te aronga e pati atu aia ra.” (Luka 11:9-13) E aru tatou i ta Iesu ra ako anga na te pureanga no te vaerua o Iehova kia raukai ia tatou te akakite tamou marie anga i tona ua tu meitaki.
“Ka Rave i te Tuatua Meitaki”
10. Eaa te au tu no to Iehova ra tu meitaki te taikuia maira ia Exodo 34:6, 7?
10 Ma te marama vaerua mei te Tuatua mai a te Atua ra e ma te tauturu a te vaerua tapu o te Atua, ka “rauka ia tatou i te rave i te tuatua meitaki.” (Roma 13:3) Na te apii putuputu i te Pipiria, ka maata atu to tatou kite e akapeea e raukai ia tatou te aru i to Iehova tu meitaki. I te atikara i mua akenei kua akamanakoia etai au tu o to te Atua ra tu meitaki tei taikuia i te akakite anga kia Mose tei tataia ra ia Exodo 34:6, 7, NW te ngai ta tatou ka tatau: “Ko Iehova, Ko Iehova, e Atua akaaroa e te aroa ua, kare e riri vave e te ki i te aroa takinga meitaki e te tuatua mou, te akonoanga i te aroa takinga meitaki no te au tauatini ua atu, te akakoreanga i te tarevake e te apa e te ara, inara kare rava aia e tuku ua atu kia kore e akautungaia.” Na te akara anga piri vaitata atu ki teia au akakite anga no to Iehova ra tu meitaki ka tauturu ia tatou kia “rave i te tuatua meitaki.”
11. Akapeea te tupu anga tau kia tatou na te kite e e akaaroa e te aroa ua a Iehova?
11 Te akamatakite maira teianei akakite anga tu-Atua ia tatou i te umuumu anga kia aru ia Iehova na te akaaroa e te aroa ua. “E ao to tei akaaroa,” ta Iesu i tuatua, ka “akaaroa katoaia mai ratou.” (Mataio 5:7; Luka 6:36, NW) I te kite anga e e aroa ua a Iehova, ka akakeu katoa ia tatou kia aroa ua e kia akono tau i roto i ta tatou akonoanga ma etai ke ra, kapiti mai i te aronga ta tatou e tutu atura. Te rotai atura teia ma ta Paulo i ako maira: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.”—Kolosa 4:6.
12. (a) I te mea kare te Atua e riri vave, akapeea tatou i te akono anga ia etai ke ra? (e) Eaa ta te aroa takinga meitaki o Iehova e akakeu maira ia tatou kia rave?
12 I te mea ko te Atua kare e riri rave, ka akakeu to tatou inangaro kia “rave i te tuatua meitaki” e kia akakoromaki i te au tarevake rikiriki o te au oa akarongo ra e kia akara atu ki runga i to ratou au tu meitaki. (Mataio 7:5; Iakobo 1:19) Te akakeu ra to Iehova aroa takinga meitaki ia tatou kia akakite i te aroa tiratiratu, noatu ra i raro ake i te au turanga timataanga maata. Ko teia tikai tei inangaro maataia.—Maseli 19:22.
13. Akapeea tatou i te akono anga kia akaata mai e ko Iehova kua “ki i te tuatua mou”?
13 I te mea ko to tatou Metua i te rangi ra ‘tei ki i te tuatua mou,’ ka kimi tatou ‘kia akakite ia tatou uaorai ei au rave angaanga na te Atua i te tuatua mou.’ (2 Korinetia 6:3-7) I roto i nga mea viivii e itu kia Iehova ra ko “te arero pikikaa” e “te kite pikikaa, e tuatua i te tuatua pikikaa ra.” (Maseli 6:16-19) No reira kua akakeu to tatou inangaro kia akamareka i te Atua kia ‘kopae ua atu i te pikikaa, ei tuatua mou ra.’ (Ephesia 4:25) Auraka tatou kia kore e akakite i te tu meitaki i roto i teianei tu puapinga maata.
14. Eaa tatou i tau ei kia akakore ua i te ara?
14 Ka tau katoa ta te Atua akakite anga kia Mose kia akakeu ia tatou kia akakore i te ara, no te mea te papa ra Iehova kia akakore i te ara. (Mataio 6:14, 15) E tika, te apai maira Iehova i te akautunga ki runga i te aronga rave ara ma te kore e tataraara. No reira ka tika tatou kia mou i tana au turanga no te tu meitaki i te tamouanga i te tu ma i te pae vaerua o te putuputuanga.—Levitiku 5:1; 1 Korinetia 5:11, 12; 1 Timoteo 5:22.
“Kia Matakite”
15, 16. Akapeea e raukai i ta Paulo ako anga i tataia ra ia Ephesia 5:15-19 i te tauturu ia tatou kia rave ua atu i te tu meitaki?
15 Kia aruaru i te aerenga o te tu meitaki noatu te au tu kino te koropini nei ia tatou, ka tau tatou kia ki i te vaerua o te Atua e kia matakite i to tatou aerenga. No reira, kua raurau a Paulo i te au Kerititiano i Ephesia: “Kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia. E auraka kotou ei manako kore, kia kite ra kotou i to te Atu ra anoano. E auraka e kona i te wina, e tupu ei te kanga maata; kia ki ra kotou i te Vaerua; Ma te karangaranga oki kotou kotou uaorai i te salamo e te imene e te peʼe a te Vaerua, e imene oki ma te tau o te ngakau i te Atu.” (Ephesia 5:15-19) Ko teia ako anga e tau tikai no tatou i teianei tuatau kino o te openga nei.—2 Timoteo 3:1.
16 Me ka rave ua atu tatou i te tu meitaki, ka tika tatou kia matakite e te aaere ra tatou mei te aronga tei akono ra i te pakari tau i te Atua. (Iakobo 3:17) Kia kopae ke tatou i te au ara kikino e kia akakiia e te vaerua tapu, te akatikaanga ia tatou uaorai kia aratakiia e te reira. (Galatia 5:19-25) Na te akonoanga i te au apiianga pae vaerua tei orongaia maira i te au uipaanga, te au akaputuanga, e te au uruoaanga Kerititiano, ka rauka ia tatou te rave ua atu i tei meitaki ra. Penei ka akamaaraaraia mai tatou e ta Paulo au tuatua ki to Ephesia ra e i te maataanga o ta tatou au uipaanga no te akamori anga, te puapingaia ra tatou mei ta tatou imeneanga no te ngakau mai i te “au imene pae vaerua”—e manganui ma te au tu vaerua, mei te tu meitaki rai.
17. Me no to ratou au turanga i korei ratou e aere putuputu ki te au uipaanga, eaa te ka papu i te au Kerititiano maki kino ra?
17 Ka akapeea to tatou au oa akarongo tei kore ra e rauka kia aere putuputu ki te au uipaanga Kerititiano no te maki kino? Penei te manako ngakau reka kore ra ratou no te kore e rauka ia ratou kia akamori putuputu atu ia Iehova ma te taokotaianga ki to ratou au taeake e te au tuaine i te pae vaerua ra. Inara ka papu ia ratou e te kite ra a Iehova i to ratou au turanga, ka tamou mai ia ratou ki roto i te marama, e ka oronga atu oki i tona vaerua tapu kia ratou, e ka tauturu ia ratou kia rave i tei meitaki ra.—Isaia 57:15.
18. Na teaa e tauturu ia tatou kia aruaru i te aerenga tu meitaki?
18 Te aruaruanga i te aerenga tu meitaki ka umumuia kia paruru tatou i to tatou au pirianga oa e kia ariu ke mai i te aronga “ma te kore e aroa no te tu meitaki.” (2 Timoteo 3:2-5, NW; 1 Korinetia 15:33) Na te akonoanga i taua akoanga ra ka tauturu ia tatou kia kopae ke i te “akariri atu i te Vaerua Tapu o te Atua” na te raveanga kia tuke i te au aratakianga a te reira. (Ephesia 4:30) Pera katoa oki, te tauturuia ra tatou kia rave i te meitaki me ka akatupu tatou i te au pirianga vaitata ma te aronga te akakite maira to ratou oraanga e te inangaro ra ratou i te tu meitaki e te aratakiia ra e te vaerua tapu o Iehova.—Amosa 5:15; Roma 8:14; Galatia 5:18.
Ka Apai Mai te Tu Meitaki i te Au Tupuanga Meitaki
19-21. E akakite mai i te au tupuanga te akaari maira i te tupu anga no te akakiteanga i te tu meitaki.
19 Na te aaereanga i roto i te marama pae vaerua, te kauraroanga i te arataki anga a te vaerua o te Atua, e te matakiteanga i to tatou aere anga ka tauturu ia tatou kia kopae ke i te kino e kia “rave i te meitaki.” I muri akera, ka akatupu mai teia i te au tupuanga meitaki. E akamanako ana i te tupu anga kia Zongezile, ko tetai o te Au Kite o Iehova i Aperika Apatonga. I tona aere atu anga ki te apii i tetai popongi, kua akara aia i tana manga moni meangiti i roto i te pangika. Kua tarevake te akakite anga mai a te pepa no roto i te matini kia tere atu i te R42,000 e ($6,000, U.S.). Kua raurau atu tetai tiaki o te pangika e etai atu oki iaia kia kiriti mai i taua moni ra e ka tuku atu ei ki roto i tetai pangika ke nana uaorai. Ko nga tokorua e Kite anake tei noo atura aia kia raua tei akameitaki atu iaia no te koreanga e kiriti mai i tetai tuanga o taua moni ra.
20 I te ra angaanga i aru mai, kua ripoti atu a Zongezile taua tarevake ra ki te pangika. Kua kitea mai e ko tana numero pangika anga te aiteite ra ki ta tetai tangata pitiniti apinganui tei tuku tarevake ra i tana moni ki roto i te numero ke. I te poitirere anga e kare a Zongezile i akapou i tetai tuanga o teianei moni, kua ui atura taua tangata pitiniti ra kiaia: “Eaa taau akonoanga?” Kua akataka atura Zongezile e koia tetai o te Au Kite o Iehova. Kua akameitaki pumaanaia aia e te aronga opita o te pangika ra, tei tuatua: “Te anoano nei matou e kia tiratiratu te au tangata ravarai mei te Au Kite o Iehova rai.” E tika tikai, te au angaanga tiratiratu e te tu meitaki ka akariro ia etai ke ra kia akakaka ia Iehova.—Ebera 13:18.
21 Kare te au angaanga meitaki e anoanoia kia maata e raukai te tupuanga meitaki. Ei akatutu anga: Tetai Kite ou tei tavini ra ei tutu evangeria i te au tuatau ravarai i tetai o te au motu o Samoa kua aere atu ki te are maki i reira. Te tiaki ra te au tangata kia akaraia e tetai taote, e kua kite atura taua Kite ra i tetai vaine ruaine i te pae mai iaia te maki kino ra. Kua akapapa aia no taua vaine ra kia rave i tona tuanga kia raukai kia viviki atu te atoro anga iaia. I tetai atianga i muri maira, kua aravei atu taua Kite ra i teia vaine ruaine nei i te makete. Kua maara mai taua vaine ra iaia e tana angaanga meitaki i rave i te are maki ra. “I teianei kua kite e e aroa tikai to te Au Kite o Iehova i to ratou tangata tupu,” tana ia i tuatua. Noatu rai e kare aia i akarongo atu i mua ana ki te tuatua no te Patireia, na te tu meitaki tei akaariia e taua Kite ra kiaia i akatupu mai i te meitaki. Kua ariki atu aia i tetai apiianga Pipiria i tona kainga e kua akamata i te raveanga i te kite no te Tuatua a te Atua ra.
22. Eaa tetai tu meitaki roa “kia rave i te tuatua meitaki”?
22 Penei, ka rauka ia koe te akakitekite i te au tupuanga te ka akaari i te puapinga no te akakiteanga i te tu meitaki. Ko tetai tu meitaki tikai kia “rave tuatua meitaki” na te rave putuputu anga i te akakiteanga i te tuatua meitaki o te Patireia o te Atua. (Mataio 24:14) Kia rave tamou ua atu tatou i te raveanga totomapu i teianei angaanga okomaata, ma te kiteanga e ko teia tetai rave anga meitaki, e maata oki ki te aronga te ka ariki mareka mai. E maata rava oki, ko ta tatou angaanga orometua e te tu akono meitaki ka akakaka ia Iehova, te tumu tikai no te tu meitaki.—Mataio 19:16, 17.
E Rave Ua Atu i te “Takinga-Meitaki”
23. Eaa te angaanga orometua Kerititiano i riro ei ei angaanga meitaki?
23 Kare e ekoko anga e angaanga meitaki ta tatou angaanga orometua. Ka akatupu te reira i te ora no tatou e no te aronga te ka akarongo mai i te tuatua Pipiria e i reira ka aere na runga i te mataara te ka taki atu ki te ora mutu kore. (Mataio 7:13, 14; 1 Timoteo 4:16) Me ka aroia mai tatou e te au ikianga, ei reira, te anoano kia rave i te meitaki ka akariro ia tatou kia ui kia tatou uaorai: ‘Ka akapeea te akatupuanga a teianei ikianga ki taku angaanga tutu aereanga i te Patireia? E meitaki tikai ainei te aerenga taku e akamanako nei? Ka tauturu ainei te reira iaku kia tauturu atu ia etai ke ra kia ariki i “te evangelia mutu kore” e kia aere mai ki te pirianga vaitata ma te Atua ko Iehova?’ (Apokalupo 14:6) Ka rauka mai te mataora anga maata mei te ikianga te ka akatika ia tatou kia maata atu te rave anga no te Patireia.—Mataio 6:33; Angaanga 20:35.
24, 25. Eaa etai raveanga kia rave i te meitaki i te putuputuanga, e eaa ta tatou ka papu me ka akakite tamou marie tatou i te tu meitaki?
24 Auraka rava tatou e akamanako meangiti ua i te au tupu anga puapinga no te tu meitaki. Ka rauka ia tatou te akakite anga i teianei tu na te turuanga i te putuputuanga Kerititiano e te raveanga i te ka rauka ia tatou i te akono i te meitaki no te reira. E tika tikai te rave ra tatou i te meitaki me ka aere putuputu e ka kapiti atu ki te au uipaanga Kerititiano ra. To tatou taenga atu ki reira ka akamaroiroi i te au oa akamori, e ta tatou au pauanga papa meitaki ka akamatutuia ratou i te pae vaerua. Ka rave katoa tatou i te meitaki me ka taangaanga tatou i ta tatou au apinga kia akono i te Are Uipaanga Patireia e me ka tauturu tatou i te akono meitaki anga i te reira. (2 Ariki 22:3-7; 2 Korinetia 9:6, 7) E tika oki, “e kia rauka ta tatou ravenga, e takinga-meitaki tatou i te tangata ravarai, kia maata atura ki to te ngutuare o te akarongo ra.”—Galatia 6:10.
25 Kare e rauka ia tatou kia akamanako i te au turanga ravarai te ka anoanoia no te akakite anga i tetai tu meitaki. Ia tatou e aro atura i te au akaaoanga ou, i reira, e kimi tatou i te marama mei te au Tuatua Tapu maira, e pure no te vaerua tapu o Iehova, e rave ei i te meitaki roa ka rauka ia tatou kia rave i tona anoano apa kore e te meitaki. (Roma 2:9, 10; 12:2) Ka rauka ia tatou i te irinaki e ka akameitaki maata mai a Iehova ia tatou ia tatou e akakite tamou marie ra i te tu meitaki.
Akapeea Koe me Pau?
• Akapeea e oti ei ia tatou te meitaki maata roa?
• Eaa te tu meitaki i karangaiai e “ua o te marama”?
• Eaa te tu meitaki i karangaiai e “te ua o te vaerua”?
• Eaa te tupu anga no to tatou tu akono meitaki?
[Tutu i te kapi 17]
Te Tuatua a te Atua e tona vaerua tapu ka tauturu ia tatou kia akakite i te tu meitaki
[Au Tutu i te kapi 18]
Na te akakiteanga i te tu meitaki e apai mai i te tupuanga meitaki