“E te Tika oki i te Tua i te Tuatua-Mou Ra”

TE TUATUA a te Atua e are vairanga ia no te au kaveinga te anoanoia ra no tetai oraanga puapinga. Ka rauka i te reira i te tauturu i tetai orometua kia apii, kia akakite ua i te apa, e kia akatikatika. (2 Timoteo 3:16, 17) Inara, e puapinga meitaki ei mei teia arataki anga tu-Atua, ka tau tatou kia aru i te ako anga a Paulo kia Timoteo: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra.”​—2 Timoteo 2:15.

Te akaaiteia ra te Tuatua a te Atua, i rotopu i etai au apinga ke atu, mei te u meitaki ra, te kai pakari ra, te vai akaoraora e no te oreianga, mei tetai io ra, e mei tetai koke kokoi ra. Te maramaanga e eaa ta teia au tuatua e akakite ra ka tauturu i tetai orometua kia taangaanga i te Puka Tapu ma te karape.

Orongaanga i te U o te Tuatua a te Atua

Ko te u te kai e anoanoia ra e te au pepe anau ou. I te pepe e tupu maira, ka angai marieia te kai pakari kiaia, inara i te akamata anga, ka rauka i te reira i te taviri anake i te u. I te au tu e manganui, te aronga e meangiti ua to ratou kite i te Tuatua a te Atua te aite ra i te au pepe. Me e tangata ou ua i te inangaro i te Tuatua a te Atua me kore ra kua matau i te reira no tetai taime ua, me e marama papu kore ua tona no runga i ta te Puka Tapu e tuatua ra, e pepe aia i te pae vaerua e ka anoano i te kai meitaki tei ngoie ua i te taviri​—te “u” vaerua. Kare ake rai i rauka iaia te taviri i te “kai pakari,” te au apinga oonu o te Tuatua a te Atua.​—Ebera 5:12.

Ko te turanga teia i roto i te putuputuanga ou tei akamataia i Korinetia i te tata anga a Paulo kia ratou: “Kua angai oki au ia kotou i te u, kare i te kai pakari; kare oki i tika ia kotou i reira.” (1 Korinetia 3:2) Te mea mua kua anoanoia to Korinetia kia apii i te ‘apiianga o te tuatua a te Atua e tikaʼi.’ (Ebera 5:12) I te turanga o to ratou tupuanga ra, penei kare ratou i taviri ake i “te au mea oonu rai o te Atua ra.”​—1 Korinetia 2:10.

Mei ia Paulo ra, te akaari ra te au orometua Kerititiano i teia tuatau i to ratou manako no te au pepe vaerua na te orongaanga i te “u” kia ratou, koia oki, na te tauturuanga ia ratou kia tamou ketaketaia ki runga i te apii anga Kerititiano. Te akamaroiroi ra ratou i te reira aronga ou me kore ra aronga kite kore “kia kaki tikai i te u iro koreia ra, i te tuatua.” (1 Petero 2:2) Kua akaari te apotetoro ko Paulo e kua kite aia i te akono anga takake e anoanoia ra e te aronga ou i tana tata anga e: “Ko tei kai katoa oki i te u anake ra, kare ïa i pakari i te tuatua-tika ra: e kaiu rai aia.” (Ebera 5:13) Te akakoromaki, te akamanako anga, te maramaanga, e te tu maru te anoanoia ra no te au orometua o te Atua ia ratou e tua aere ra i te u ma o te Tuatua ma te aronga ou e te kamakura na roto i te au apii anga Puka Tapu i te kainga e i roto i te putuputuanga.

Tuaanga i te Kai Pakari o te Tuatua a te Atua

E raukaʼi te tupu kia rauka te ora, ka anoano tetai Kerititiano kia maata atu i te “u.” Me rauka ana te marama taka meitaki no te au tuatua mou puapinga o te Puka Tapu e kua arikiia, kua papa aia i te neke atu ki te “kai pakari ra, na te tangata pakari.” (Ebera 5:14) Akapeea aia i te rave anga i teia? Na roto ua rai i te akanoo anga i tetai apii anga putuputu nana uaorai e te taokotai anga atu i te au uipaanga Kerititiano. Te reira au tu meitaki ka riro ei tauturu i tetai Kerititiano kia maroiroi, kia pakari, e kia puapinga i roto i te angaanga orometua. (2 Petero 1:8) Auraka tatou e akangaropoina e kapiti mai i te kite, ko te raveanga i to Iehova anoano te akatupu katoa ra i te kai vaerua.​—Ioane 4:34.

I teia tuatau nei, kua akataoongaia tetai “tavini akono meitaki e te pakari” ei oronga ki te au tavini o te Atua i te kai i te tuatau tau ei tauturu ia ratou kia marama i “te pakari tumatatini o te Atua.” Na roto i tona vaerua, te akaari maira a Iehova i te au Tuatua Tapu oonu na roto i teia tavini tiratiratu, tei nenei tiratiratu ua i te ‘kai [vaerua] i te ora mou ra.’ (Mataio 24:45-47; Ephesia 3:10, 11; akaaite ia Apokalupo 1:1, 2.) E apainga na te au Kerititiano tataki tai i te taangaanga meitaki i te reira au apinga aroa tei neneiia.​—Apokalupo 1:3.

E tikai, ko etai au apinga i roto i te Puka Tapu e au mea “kimingata,” i te au Kerititiano pakari katoa. (2 Petero 3:16) Te vaira te au tuatua, te au totou, e te au akatutu anga marama koreia tei umuumu i te apii anga e te tamanako anga pakari. No reira, ta tetai uaorai apii anga te kapitiia maira te koanga ki roto i te Tuatua a te Atua. (Maseli 1:5, 6; 2:1-5) E apainga tikai ta te aronga pakari no runga i teia me apii ratou i te putuputuanga. Me te rave ra i te Apii Puka a te Putuputuanga me kore ra te Apii Punanga Tiaki, te orongaanga i te au tuatua papuriki, me kore ra te tavini ra i tetai ua atu turanga o te apiianga, ka tau te aronga pakari kia matau tikai i ta ratou apiianga e kia papa ua i te akamanako atu i ta ratou “apii marie anga atu” ia ratou e oronga ra i te kai vaerua pakari ki te putuputuanga.​—2 Timoteo 4:2.

Te Vai Akaoraora e no te Oreianga

Kua akakite a Iesu i te vaine Samaria i te punavai ra e ka oronga atu aia i tetai vai nana kia inu te ka riro “ei vai pupui ua i roto iaia, e tika i te pupui anga, e tae ua atu ki te ora mutu kore ra.” (Ioane 4:13, 14; 17:3) Teia vai te ka oronga mai i te ora te kapitiia maira te au apinga aroa ravarai a te Atua e raukaʼi te ora na roto i te Mamoe a te Atua, e te akamaramaia maira teia au apinga aroa ki roto i te Puka Tapu. Ei au tangata tataki tai tei kaki i te reira “vai,” te ariki ra tatou i te pati anga tei orongaia mai e te vaerua e te vaine akaipoipo a Karaiti kia ‘rave ua mai i te vai ora.’ (Apokalupo 22:17) Ka riro te inuanga i teia vai ei ora mutu kore.

Pera katoa, te akanoo ra te Puka Tapu i te au turanga vaerua e te tu akono no te au Kerititiano mou. Ia tatou e taangaanga ra i teia au turanga tu-Atua tei akanooia, te oreiia ra tatou e te Tuatua a Iehova, te “oreiia” ra i te au angaanga ravarai ta te Atua ko Iehova e rikarika ra. (1 Korinetia 6:9-11) No teia tumu, kua karangaia te tuatua mou i roto i te Tuatua akauruia e ko te “orei anga vai.” (Ephesia 5:26) Me kare tatou e akatika i te tuatua mou a te Atua kia orei ia tatou na teia mataara, kare ta tatou akamori anga e arikiia mai e ia.

Ma te tau tikai, ko te aronga pakari tei ‘tika ra i te tua i te tuatua-mou ra’ kua akaaite katoaia ki te vai. Te karanga ra a Isaia e te aite ra ratou “mei te marumaru o tetai mato maata i te enua papamarō ra.” (Isaia 32:1, 2) Te akatupu ra te aronga pakari aroa i teia akataka anga ia ratou e atoro ra i to ratou au taeake ei au tiaki vaerua, te taangaangaanga i te Tuatua akaoraora a te Atua ei oronga atu i te au tuatua akaketaketa e te akapumaana i te pae vaerua te ka akamatutu e ka paruru.​—Akaaite ia Mataio 11:28, 29.a

Te akara atura te au mema o te putuputuanga ki mua i te au atoro anga a te aronga pakari. “Kua kite au e mei teaa te tu maru o te aronga pakari, e te mataora nei au i te mea e kua oronga mai a Iehova i teia apinga aroa,” i karanga ei a Bonnie. Kua tata tetai metua vaine takaua, ko Lynda e: “Ma te au akamaroiroianga Tuatua Tapu, kua tauturu te aronga pakari iaku kia autu. Kua akarongo ratou e kua akaari mai i te tu tangi.” Kua karanga a Michael e: “Kua akariro ratou iaku ei tuanga no tetai akaaerenga tei akono mai.” “Kua riro te au atoro anga a te aronga pakari i te tauturu iaku kia autu atu i te au tuatau taitaia anga pakari,” i karanga ei tetai. Ko tetai atoro anga a tetai tangata pakari tei taaki i te pae vaerua te aite ra ki te vai inu anuanu e te akaoraora. Te akapumaanaia ra te aronga tu mamoe i te aronga pakari e tauturu ra ia ratou kia kite e akapeea te au kaveinga Tuatua Tapu i te piri anga atu ki to ratou turanga.​—Roma 1:11, 12; Iakobo 5:14.

Taangaanga i te Tuatua a te Atua ei Io

Me apai tetai tangata i te kai pakari ki roto, kare te akakoroanga e kia reka ua i te tongi anga. Mari ra, ka akara atu aia kia rauka mai te meitaki te ka tauturu iaia kia angaanga. Me e tamaiti aia, ka akara atu aia e ka tauturu te kai iaia kia tupu mai ei tangata pakari. Mei te reira katoa te kai vaerua. Ka riro ta tetai uaorai apii anga Puka Tapu ei mea rekaia, inara kare ko te reira ua te tumu no te reira. Te tano anga tikai ka taui te kai vaerua ia tatou. Te tauturu ra te reira ia tatou kia akataka e kia akatupu i te ua o te vaerua e te tauturu ra ia tatou kia “akatangata ou, ko tei akaouia i te kite mei te tu katoa o Tei anga iaia ra.” (Kolosa 3:10; Galatia 5:22-24) Te tauturu katoa ra te kai vaerua ia tatou kia tupu ki te pakari anga, te tauturu anga ia tatou kia rauka meitaki te taangaanga i te au kaveinga Tuatua Tapu i te akonoanga atu i to tatou au manamanata e i te tauturuanga atu ia etai ke kia akono atu i to ratou.

Akapeea tatou e kite ei e te akakeu ra te Puka Tapu ia tatou? Ka taangaanga tatou i te Puka Tapu mei te io ra. Te karanga ra Iakobo e: “Ei aronga rave oki kotou i te tuatua nei, auraka ei aronga akarongo ua . . . Ko te tangata oki e akarongo ua i te tuatua, e kare aia i rave, e tau aia i te tangata e akara ua i tona uaorai mata ki roto i te io ra: Te akara ra aia iaia uaorai, e aere atura, ngaropoina ua iora tona tu iaia uaorai i reira ra. Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.”​—Iakobo 1:22-25.

Te ‘akara’ ra tatou i te Tuatua a te Atua ia tatou e makitoro vaitata atura i te reira e te akaaite anga atu ia tatou kia tau i ta te Atua au turanga. Na te rave anga i teia, ka riro tatou ei ‘aronga rave i te tuatua nei, auraka ei aronga akarongo ua.’ Ka riro te Puka Tapu ei akakeu anga meitaki ki runga ia tatou.

Te Tuatua a te Atua ei Koke

I te openga iora, te tauturu ra te apotetoro ko Paulo ia tatou kia kite e akapeea tatou i te taangaangaanga i te Tuatua a te Atua ei koke. I te akamatakite anga ia tatou no runga i “te au ariki katoa ra, e te aronga mana, e te au tutara o teianei ao poiri, e te au vaerua kikino i te reva nei,” kua raurau aia ia tatou kia “rave . . . te koke a te Vaerua ra, koia te tuatua a te Atua.” (Ephesia 6:12, 17) Te Tuatua a te Atua e apinga ia kare e akakoreia, ta tatou ia ka taangaanga ei akaatea atu i tetai ua atu au manako te ka “akateitei kia kore e rauka te kite i te Atua.”​—2 Korinetia 10:3-5.

Kare e ekoko anga, “e mea ora oki te tuatua a te Atua, e te ririnui.” (Ebera 4:12) Te tuatua ra a Iehova ki te au tangata na roto i te au kapi o tana Tuatua akauruia. E taangaanga meitaki i te reira i te apiianga ia etai ke e te akamaeuanga i te au apiianga pikikaa. E taangaanga koe i te reira ei akamaroiroi, ei akaketaketa, ei akaoraora, ei akapumaana, ei akakeu, e ei akamatutu ia etai ke i te pae vaerua. E kia riro na Iehova e “akameitaki rava mai ia kotou i te au angaanga memeitaki katoa ra, kia rave kotou i tona anoano,” kia rave ua rai kotou i te mea “tau i mua i tona aroaro.”​—Ebera 13:21.

[Tataanga Rikiriki i Raro]

[Tutu i te kapi 31]

Te akamaroiroi ra te aronga pakari ia etai ke, “e te tika oki i te tua i te tuatua-mou ra”