Te Au Metua, Eaa ta to Kotou Akaraanga e Apii Maira?
“Ei aru kotou i te Atua, mei te tamariki akaperepere ra; Ei aerenga aroa to kotou.”—EPHESIA 5:1, 2.
1. Eaa te tu te au arataki anga ta Iehova i oronga no te tokorua tangata mua ra?
KO IEHOVA Tei Akamata maira i te akanoonoo anga ngutuare tangata. Te kaiou ra te au ngutuare tangata ravarai i to ratou vai maianga kiaia no te mea nana i akanoo mai i te ngutuare tangata mua ra e nana i oronga atu i te mana kia anau tamariki mai ki nga tokorua tangata mua ra. (Ephesia 3:14, 15) Nana i oronga atu kia Adamu raua ko Eva i te au apiianga tumu no ta raua au apainga e pera katoa kua tuku atu kia rava te tuatau no raua kia taangaanga i to raua kite i te raveanga i te reira. (Genese 1:28-30; 2:6, 15-22) I muri ake i te ara anga a Adamu raua ko Eva, kua riro te au turanga apainga a te au ngutuare tangata ra kia tere atu te rave anga ngata. Inara, kua oronga aroa atura Iehova i te au arataki anga te ka tauturu i tona au tavini kia akono atu i taua au turanga ra.
2. (a) Na teea tu ta Iehova ra akaketaketa anga i te akoanga tataia ra ma te apiianga tuatuaia ra? (e) Eaa te uianga ka tau te au metua kia ui ia ratou uaorai?
2 Ei to tatou Puapii Mekameka, e maata atu ta Iehova i rave i te tataanga arataki anga anake i ta tatou ka tau kia rave e ta tatou oki ka tau kia kopae ke. I te au tuatau taito ra kua kapiti mai aia i te au apii anga tataia ra ma te apiianga vaa na te kau taunga e te au peroveta e na roto i te au upoko ngutuare oki. Koai tana e taangaanga ra kia oronga i taua apiianga vaa ra i to tatou tuatau nei? Ko te aronga pakari Kerititiano e te au metua oki. Me ko koe tetai e metua, te rave ra ainei koe i taau tuanga kia apii i toou ngutuare tangata i to Iehova ra au aerenga?—Maseli 6:20-23.
3. Eaa ta te au upoko ngutuare ka kite mei ia Iehova no te apiianga meitaki ra?
3 Akapeea te oronga anga tau i taua apiianga ra i roto i te ngutuare tangata? Na Iehova i akanoo mai i te akaraanga. Te akakite taka meitaki maira aia i te mea meitaki e te mea kino, e te akakite taokioki akaou ua ra aia i etai apinga. (Exodo 20:4, 5; Deuteronomi 4:23, 24; 5:8, 9; 6:14, 15; Iosua 24:19, 20) Te ui maira aia i te au uianga akakeuanga manako. (Iobu 38:4, 8, 31) Na te au akatutu anga e te au akatauanga oraanga tikai, te akakeu maira aia i to tatou au manako ngakau e te akapapa maira i to tatou au ngakau. (Genese 15:5; Daniela 3:1-29) Te au metua, ia kotou e apii ra i ta kotou tamariki, te tauta ra ainei kotou kia aru i taua akaraanga ra?
4. Eaa ta tatou i kite mei ia Iehova maira no te orongaanga i te akoanga, e eaa ra i puapinga maatai te akoanga?
4 Te ngaueue kore ra a Iehova no te mea tika, inara te kite ra aia i te au tupu anga no te tu apa ua ra. No reira i mua ake i tana akautunga anga, ka apii mai aia e ka oronga mai i te au akamatakiteanga e te au akamaaraaraanga ki te au tangata apa ua ra. (Genese 19:15, 16; Ieremia 7:23-26) Me ako mai aia, ka rave aia i te reira kia tau tikai, kare kia maata rava. (Salamo 103:10, 11; Isaia 28:26-29) Me ko te reira te tu o ta tatou akono i ta tatou tamariki, te akakite maira ia e te kite ra tatou ia Iehova, e ka ngoie katoa oki ia no ratou kia kite iaia.—Ieremia 22:16; 1 Ioane 4:8.
5. Eaa ta te au metua ka kite mei ia Iehova no te akarongoanga?
5 E mea umere ra, te akarongo maira Iehova ei Metua aroa i te rangi. Kare aia e oronga ua mai i te au ikuiku anga. Te akamaroiroi maira aia ia tatou kia riringi atu i to tatou au ngakau kiaia. (Salamo 62:8) E mei te au manako ta tatou e akakite atura kare i te tika tikai, kare aia e mangungu mai i tetai akaapa anga i te rangi maira. Ka apii akakoromaki mai aia ia tatou. Mei teaa ra te tau, i reira, te akoanga a te apotetoro ko Paulo: “Ei aru kotou i te Atua, mei te tamariki akaperepere ra”! (Ephesia 4:31–5:1) Mei teaa ra tetai akatauanga meitaki ta Iehova i akanoo mai no te au metua ia ratou e kimi ra kia apii atu i ta ratou tamariki! Ko tetai akatauanga ia te itae ra ki to tatou ngakau e ka akariro ia tatou kia inangaro i te aaere i tona tu oraanga.
Te Mana Orongaia Mai na te Akaraanga
6. Akapeea te tu manako e te akaraanga a te au metua i te akakeu anga ki ta ratou tamariki ra?
6 Kapiti atu ki te apiianga tuatuaia mai, e mana maata to te akatauanga ki runga i te aronga ou. Me ka mareka te au metua e me ka kore, ka aru ra ta ratou tamariki ia ratou. Penei ka akamareka i te au metua—i etai taime penei ka akapoitirere ia ratou—me akarongo ratou i ta ratou tamariki i te tuatua anga i te au apinga ta ratou uaorai i tuatua ana. Me ka akaata mai te tu akono e te tu manako o te au metua i te ariki anga oonu no te au tumu vaerua, ka akono teia i tetai mana papu ki runga i te tamariki ra.—Maseli 20:7.
7. Eaa te tu akaraanga ta Iepheta i akanoo ei metua no tana tamaine ra, e eaa te tupu anga?
7 Te akatutu meitakiia maira te tupu anga no te akaraanga tau a te metua i te Pipiria ra. Ko Iepheta, tei taangaangaia ra e Iehova kia taki atu i to Iseraela kia autu ki rungao i te tamariki a Amona ra, koia tetai e metua katoa. Ko te tataanga no tana pauanga ki te ariki o Amona ra te akakite ra e kua tatau putuputu a Iepheta i te tuatua enua no ta Iehova au akonoanga ma to Iseraela. Kua taiku ngoie ua aia i taua tuatua enua ra, e kua akaari aia i te akarongo maroiroi ia Iehova. Kare e ekoko anga, na tana akatauanga i tauturu i tana tamaine kia akatupu i te akarongo e te vaerua tuku atinga tana i akakite ra i te raveanga i tetai oraanga tavini anga roa ei vaine kare i akaipoipoia tei akamori tamou ra ia Iehova.—Akava 11:14-27, 34-40; akaaite ia Iosua 1:8.
8. (a) Eaa te tu manako meitaki ta te nga metua o Samuela ra i akakite? (e) Akapeea ta te reira akapuapinga anga ia Samuela ra?
8 Ko Samuela tetai akatauanga meitaki ei tamaiti e e tiratiratu ki te Atua ei peroveta i tona oraanga katoa oki. Ka anoano ainei koe i taau tamariki kia riro mei iaia rai? E akara matatio i te akatauanga tei akanooia e to Samuela nga metua ra, ko Elikana raua ko Hana. Noatu rai e kare te turanga i to raua ngutuare i meitaki roa, kua aere putuputu raua ki Silo no te akamori anga, ki te ngai i reira ra te tapenakara tapu. (1 Samuela 1:3-8, 21) E tamanako i te oonu te manako ngakau o ta Hana pure anga. (1 Samuela 1:9-13) E akara oki i akapeea to raua manako ngakau no te puapinga maata o te akatupuanga i tetai ua atu taputou tei papauia ra ki te Atua. (1 Samuela 1:22-28) Kare e ekoko anga e kua tauturu ta raua akatauanga meitaki ra ia Samuela kia akatupu i te au tu tei akariro iaia kia aruaru i tetai aerenga tika—noatu e ko te au tangata takapini iaia tei manakoia ra e e tavini no Iehova kua akaari i te tu akangateitei kore no to te Atua ra au aerenga. I muri akera, kua akataoongaia e Iehova a Samuela ma te apainga ei peroveta Nana.—1 Samuela 2:11, 12; 3:1-21.
9. (a) Eaa te au akakeu anga i te kainga ra tei akatupu i te meitaki kia Timoteo? (e) Eaa te tu tangata tei riro maira Timoteo?
9 Ka inangaro ainei koe i taau tamaiti kia riro mei ia Timoteo rai, ko tei riro ra ei oa no te apotetoro ko Paulo iaia e tangata ou ra? Kare te metua o Timoteo i tetai tangata akarongo, mari ra ko tona metua vaine e tona tupuna vaine kua akanoo mai i tetai akatauanga meitaki no te arikianga i te au apinga vaerua. Kare e ekoko anga e na teianei i akanoo i tetai tango meitaki no to Timoteo oraanga ei Kerititiano. Kua akakiteia mai kia tatou e ko tona metua vaine ko Eunike, e tona tupuna vaine ko Loi e “akarongo pikikaa kore” to raua. To raua oraanga ei Kerititiano kare i te angaanga kanga ua; kua akono tikai raua kia rotai ma ta raua i irinaki ra, e kua apii atu raua ia Timoteo ou ra kia rave akapera katoa. Kua akapapu a Timoteo e ka rauka kia irinakiia aia e e manako tikai tona no te meitaki o etai ke ra.—2 Timoteo 1:5; Philipi 2:20-22.
10. (a) Eaa te au akatauanga i vao ake i te kainga ra penei ka tamanata i te tupu anga o ta tatou tamariki? (e) Eaa ta tatou ka tau kia rave me ka kitea mai teianei au akakeu anga i roto i te tuatua me kare te tu manako o ta tatou tamariki?
10 Ko te au akatauanga te akatupu maira i te tu ki ta tatou tamariki kare i roto anake i te ngutuare ra. Te vai ra te au tamariki i te apii ta ratou e aere ra, te au puapii na ratou ra te angaanga kia potera mai i te au manako ou ra, te aronga tangata tei manako ngakau ketaketa ra e ka tau te katoatoa ravarai kia aru i te au peu oonu a te au kopu tangata ra, te aronga toa i te tarekareka te akapaapaa ateaia ra, te aronga mana taoonga tei akakitekite maataia maira to ratou tu akono i te nuti. E au mirioni ua atu oki te tamariki kua akaaroia atu ki te ta ua o te tamaki anga. Ka tau ainei e kia poitirere tatou me ka akaariia mai teianei au tu i roto i te tuatua me kare te tu manako o ta tatou au tamariki? Akapeea to tatou manako me ka rave pera ratou? Ka rauka ainei i tetai akaapa anga kokoi me kare tetai akoanga ketaketa kia akakore atu i taua manamanata ra? Kare e kia rave ua i tetai ravenga viviki ki ta tatou tamariki, kare ainei e meitaki atu kia ui kia tatou uaorai, ‘Te vaira ainei tetai apinga i ta Iehova ra tu akonoanga ia tatou penei ka tauturu i te akakiteanga e akapeea te akono i teianei turanga?’—Akaaite ia Roma 2:4.
11. Me rave te au metua i te au tarevake, penei eaa te akatupu anga a teianei i te tu manako o ta ratou tamariki ra?
11 Inara, kare te au metua apa ua nei e akono i te au turanga na roto i te tu meitaki. Ka rave ra ratou i te au tarevake. Me kite ra te tamariki i te reira tu, ka riro ainei te reira kia akakore i te akangateitei i to ratou nga metua? Penei ake, me ka tauta te au metua kia akakore ua atu i to ratou uaorai au tarevake na te akakite ketaketa anga i to ratou mana. Inara penei ka tu ke roa te tupu anga me ka taakaaka te au metua e ka akatika uai e kua tarevake ratou. I teia tu, ka rauka ia ratou te akanoo i tetai akatauanga puapinga maata no ta ratou tamariki, tei anoanoia ra kia apii kia rave i taua tu rai.—Iakobo 4:6.
Eaa ta Tatou Akaraanga ka Rauka kia Apii
12, 13. (a) Eaa ta te au tamariki ka tau kia apii no te aroa, e akapeea te apii anga meitaki maata i teia? (e) Eaa ra i puapinga maatai e kia apii te tamariki i te aroa?
12 E manganui te au apiianga puapinga maata te ka rauka kia apii meitakiia me ka kapitiia atu te tuatua apiianga ma tetai akatauanga meitaki. E akamanako i etai tokoiti ua.
13 Akakiteanga aroa noinoi kore: Tetai o te au apiianga puapinga maata rava atu kia akamaroiroiia na te akatauanga ko te aiteanga ia no te aroa. “Te anoano nei tatou [i te Atua], no te mea koia tei anoano mai ia tatou nei.” (1 Ioane 4:19) Koia te Tumu e te akatauanga teitei rava no te aroa. Ko teianei aroa kaveingaia, a·gaʹpe, kua taikuia i te Pipiria e tere atu i te 100 taime. Ko tetai tu ia te akataka ra i te au Kerititiano mou. (Ioane 13:35) Taua aroa nei kia akaariia ki te Atua e kia Iesu Karaiti e na te au tangata katoa oki kia etai atura—noatu rai ki te au tangata penei kare tatou e manako ngakau mareka atu ana. (Mataio 5:44, 45; 1 Ioane 5:3) Kua tika teianei aroa kia vai ki roto i to tatou au ngakau e kia kitea oki i to tatou oraanga i mua ake ka raukai ia tatou kia apii meitaki atu i te reira ki ta tatou tamariki. E maata atu te tuatua a te angaanga i ta te au tuatua. I roto i te ngutuare tangata, ka tau kia kite te tamariki e kia tupuia oki e te aroa e te au tu piri atu, mei te inangaro rai. Me ka kore teianei au apinga, ka riro te tupu anga o tetai tamaiti ra kia meangiti ua i te pae kopapa, te manako, e te manako ngakau. Ka tau katoa te tamariki kia kite akapeea te aroa e te inangaro i te akakite tikaia ki te au taeake Kerititiano i vao ake i te ngutuare tangata ra.—Roma 12:10; 1 Petero 3:8.
14. (a) Akapeea e raukai kia apii i te tamariki kia rave i te angaanga te ka akamerengo mai? (e) Akapeea e raukai i te rave i teianei i te turanga o toou ngutuare tangata?
14 Apiianga akapeea kia angaanga: Ko te angaanga tetai tuanga mua ia o te oraanga. Kia raukai tetai manako ngakau tau nona uaorai, ka umuumuia tetai tangata kia apii e i te rave angaanga meitaki. (Koheleta 2:24; 2 Tesalonia 3:10) Me ka orongaia ki tetai tamaiti te au angaanga e meangiti ua ra te apiianga iaia i te rave e i muri iora ka ririia aia no te kore i rave meitaki ia ratou, kare e manakoia e ka apii aia akapeea te rave angaanga meitaki. Inara me ka apiiia te tamariki na te rave angaanga i te pae i to ratou nga metua e ka orongaia atu te akapaapaa tau, e mea tika ka kite ratou i te rave angaanga te ka apai mai i te merengo anga. Me ka kapitiia ta te au metua akatauanga ma te akatakaanga tau, penei ka kite te tamariki kare e akapera anake te rave angaanga mari katoa ra ka akapeea te akakore anga au manamanata, akapeea te rave tamou marie anga i tetai angaanga tae roa kia oti, e akapeea te manakoanga e te tukuanga tika. Na teianei akanooanga ka rauka kia tauturu ia ratou kia ariki e te rave angaanga katoa ra Iehova, e e angaanga meitaki tana, e te aru ra a Iesu i tona Metua. (Genese 1:31; Maseli 8:27-31; Ioane 5:17) Me te rave ra tetai ngutuare tangata i te angaanga i te pama me kare te rave ra i tetai pitiniti, penei ka angaanga kapiti tetai papaki o te au mema ngutuare tangata ra. Me kare penei ka rauka i te metua vaine te apii i tana tamaiti me kare tamaine i te tunu kai e te tama anga oki i muri ake i te kaikaianga. Ko tetai metua tane te rave angaanga ra i tetai ngai ke atu i te kainga ka rauka kia parani kia rave i etai angaanga i te kainga ma tana tamariki katoa. Mei teaa ra te puapinga me ka tamanako nga metua e kare kia oti vave anake te au angaanga mari ra kia akapapa i te au tamariki no te oraanga!
15. Na roto i teea au tu ka raukai te au apiianga i te akarongo kia apiiia? E akatutu mai.
15 Tamou marieanga i te akarongo i te aro atuanga i te tu taitaia: Ko te akarongo katoa oki tetai tuanga puapinga maata o to tatou au oraanga. Me uriuri manakoia te akarongo i roto i tetai apiianga a te ngutuare tangata, penei ka kite te tamariki i te akataka anga i te reira. Penei ka riro katoa ratou kia matakite i te akapapu anga me ka akamata i te tupu ki roto i to ratou ngakau. Inara me kite ratou i to ratou nga metua i te akaarianga i te akarongo ngaueue kore i te aro atuanga i te au timataanga ketaketa, penei ka vai te tupu anga no te tuatau o te oraanga. Ko tetai vaine apiipii i te Pipiria i Panama kua tamatakuia e tana tane ma te akaatea angaia mei to ratou are me kare aia e akamutu i te tavinianga ia Iehova. Inara, koia ma tana tamariki rikiriki e a, kua aaere putuputu e 16 kiro mita e mei reira atu no etai 30 kiro mita kia tae atu ki te Are Uipaanga Patireia vaitata maira. Kua akamaroiroiia na taua akatauanga ra, kua takave mai etai 20 au mema o tona ra ngutuare tangata i taua aerenga ra no te tuatua mou.
Akanooanga i Tetai Akaraanga i te Tatauanga Pipiria i te Au Ra Takitai
16. Eaa ra i akamaroiroiiai te tatauanga Pipiria i te au ra takitai na te ngutuare tangata?
16 Ko tetai o te au peu puapinga maata rava te ka rauka i tetai ngutuare tangata kia akanoo—ko tetai peu ia te ka akapuapinga meitaki i te au metua e ka riro ei akatauanga no te tamariki kia aru—ko te tatau putuputu anga i te Pipiria ra. Me ka rauka, e rave i te tatauanga Pipiria i te au ra ravarai. Kare e ko te maata o te tatau anga te mea puapinga maata. E tere roa atu te puapinga te putuputu e te tu oki o te rave anga i te reira. No te tamariki, penei ka rauka kia monoia te tatauanga Pipiria na te akarongorongo anga i te au tepe My Book of Bible Stories me ka rauka mai i toou reo. Na te tatauanga mei te Tuatua a te Atua i te au ra ravarai ka tauturu ia tatou kia tamou marie i to te Atua ra au manako ki mua ia tatou. E me ka raveia taua tatauanga Pipiria ra kare na te takitai ua mari ra na te ngutuare tangata katoa, ka rauka i teianei kia tauturu i te ngutuare katoa kia aaere na roto i to Iehova ra au aerenga. Na teianei ravenga tei akamaroiroiia maira i te au Uruoaanga “Ta te Atua Tu Oraanga” i mua ua ake nei i roto i te nuku Au Pamiri—Akariro te Tatauanga i te Pipiria i te Au Ra ko Toou Tu Oraanga!—Salamo 1:1-3.
17. Akapeea te tatauanga Pipiria a te ngutuare tangata e te akamou ngakau anga i te au taviri tuatua tapu i te tauturu anga kia akono i te akoanga ia Ephesia 6:4 ra?
17 Ko te tatauanga Pipiria ei tetai ngutuare tangata te rotai ra ki ta te apotetoro ko Paulo i tata i tana reta akauruia ra ki te au Kerititiano i Ephesia, koia oki: “Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.” (Ephesia 6:4) Eaa te aite anga o te reira? Te aite anga o “te ako a te Atu ra” ko te “tukuanga i te manako ki roto”; no reira te raurauia ra te au metua Kerititiano kia tuku i te manako o te Atua ko Iehova ra ki roto i ta ratou tamariki—ei tauturu i te au tamariki kia kite i to te Atua ra au manako. Na te akamaroiroianga i te au tamariki kia mou ngakau i te au taviri tuatua tapu ka tauturu kia rauka teia. Ko te akakoro anga kia riro na to Iehova ra au manako e arataki i te manakoanga o te tamariki kia tupu ua atu to ratou inangaro e te tu akono kia akaata i te au turanga tau i te Atua ra me te vaira te au tamariki ma te au metua e me kare. Ko te Pipiria ra te tango no taua manakoanga ra.—Deuteronomi 6:6, 7.
18. I te tatauanga i te Pipiria, penei eaa te anoanoia ra kia (a) kite meitaki ei i te reira? (e) puapinga mei te akoanga i roto i te reira? (ng) manako i ta te reira e akakite maira no ta Iehova akakoro anga? (i) puapinga mei ta te reira i tuatua no te au tu manako e te au angaanga a te au tangata ra?
18 Inara, me e akatupu anga ta te Pipiria ki runga i to tatou au oraanga, ka tau tatou kia kite e eaa ta te reira tuatua. No te aronga e manganui, penei ka umuumuia e teianei te tatauanga i etai tuanga kia tere atu i te okotai taime. E raukai te mana ki katoa o etai au akakiteanga, penei ka tau tatou kia akara i te au tuatua i roto i tetai tikitinari me kare i roto i te Insight on the Scriptures. Me e akoanga tetai i roto i te tuatua tapu me kare me e akauenga, e akanoo i te tuatau kia tuatua no te au turanga i to tatou tuatau te tano ra ki te reira. Ei reira penei ka ui koe e, ‘Akapeea tatou ka puapingaiai i te raveanga i teianei ako anga?’ (Isaia 48:17, 18) Me te akakite maira te tuatua tapu no tetai tuanga o ta Iehova ra akakoro anga, e ui, ‘Eaa te akatupu anga na teianei ki to tatou oraanga?’ Penei te tatau ra koe i tetai tataanga te akakite maira i te tu manako e te au ravenga a te au tangata ra. Eaa te au taomianga o te oraanga te tupu ra kia ratou? Akapeea ta ratou ra akono anga i te reira? Akapeea tatou ka puapingaiai i ta ratou akatauanga? E akataka tikai i tetai tuatau kia uriuri manako e eaa te aite anga o te tataanga ra i roto i to tatou au oraanga i teianei tuatau.—Roma 15:4; 1 Korinetia 10:11.
19. Na te riroanga ei aronga aru i te Atua ra, eaa ta tatou ka oronga no ta tatou tamariki?
19 Mei teaa ra tetai rave anga meitaki kia raukai i te tauru anga i to te Atua ra au manako ki runga i to tatou au manako e te au ngakau oki! Na te reira ka tauturu tikaia tatou kia riro kia ‘aru i te Atua, mei te tamariki akaperepere ra.’ (Ephesia 5:1) E ka oronga tatou i tetai akatauanga te ka tau tikai i te aruia e ta tatou au tamariki ra.
Maara Ainei ia Koe?
◻ Akapeea te au metua e puapingaiai mei ta Iehova akatauanga?
◻ Eaa ra i tikai te apiianga tuatua atu ki te tamariki kia kapitiia ma te akatauanga meitaki na te au metua?
◻ Eaa etai apiianga tei meitaki atura kia apiiia e te akatauanga a te au metua?
◻ Akapeea tatou ka puapinga ki katoai mei te tatauanga Pipiria a te ngutuare tangata ra?
[Au Tutu i te kapi 10]
E manganui te rekareka nei i te tatauanga Pipiria ei ngutuare tangata i te au ra takitai