Akapeea Toou Oraanga e Puapinga Maata Atu Ei

TE NA ko ra tetai materi taito: “Auraka e akaope i te ririnui ki te apinga kia maata; auraka e irinaki ki toou uaorai pakari. Ka anaana rai koe i o mata ki runga i te mea e kare nei ïa? te rave nei oki te reira i te peau; te rere ke nei mei te aeto ki runga i te rangi ra.” (Maseli 23:​4, 5) Tera te aiteanga, kare i te mea pakari kia akaparuparu ia tatou uaorai i te tautaanga kia apinganui, no te mea ka rere ke te apinganui mei runga i nga peau o te aeto ra.

Mei ta te Pipiria e akaari ra, ka ngaro viviki te apinganui materia. Penei ka ngaro te reira i te po no te tumatetenga natura, te topa anga i te pae apinga, me kare tetai atu au tupu anga kitea koreia. I te pae mai, e putuputu te taime kua oripu ua te aronga te rauka ra te manuia anga i te pae materia. Ka akamanako ana ia John, te o maira ki roto i tana angaanga te tarekareka anga i te aronga poritiki, te au tangata akamatutu, e te au ui ariki.

Te akakite ra a John: “Kua oronga au i tei rauka iaku ki taku angaanga. Kua puapinga au i te pae moni, kua noo ki roto i te au otera taurekareka, e tetai au taime kua aere au ki te angaanga na runga i tetai pairere meangiti. I te akamata anga kua rekareka au i te reira, inara ma te marie kua maromaroa au. Ko te au tangata taku i tauta i te akamareka atu kua akara anga puapinga koreia ra. Kare e mea puapinga i roto i toku oraanga.”

Mei ta John i kite, e merengo kore tetai oraanga kare te au puapinga i te pae vaerua i roto ra. I roto i tana Tuatua rongonui i te Maunga, kua akaari mai a Iesu e akapeea e kiteai te mataora mutu kore. Kua tuatua aia: “E ao to tei akaaka te ngakau: no ratou te basileia o te ao.” (Mataio 5:3) Te taka meitaki ra, i reira, e pakari atu i te tuku i te au mea pae vaerua i te ngai mua o te oraanga. Inara, ka rauka katoa i tetai atu au tumu i te tauturu mai e puapinga maata atu ei te oraanga.

Te Manako Maataia ra Toou Pamiri e te Au Oa

Ka rekareka ainei koe i te oraanga me kare koe e aravei ana i toou pamiri e kare e au oa piri vaitata? Kare. Kua maani Tei Anga ia tatou ma te anoano i te inangaro e kia inangaroia mai. No reira oki a Iesu i tuatua maata ei kia ‘aroa atu i to tatou tangata tupu mei te aroa ia tatou uaorai.’ (Mataio 22:39) E apinga aroa tu-Atua te pamiri te oronga maira i tetai akanooanga tau no te akaarianga i te aroa noinoi kore.​—Ephesia 3:​14, 15.

Akapeea e raukai i to tatou pamiri i te akariro kia puapinga maata atu to tatou oraanga? Ka rauka tetai pamiri taokotaiia kia akaaiteia ki tetai aua kainga manea te oronga ra i tetai punanga akaoraoraanga mei te oraanga taitaia i te au ra. Ma te aiteite, i roto rai i te pamiri, ka kiteaia e tatou te akaoaoaanga oraora e te pumaana te akakore ra i te au manako maromaroa. E tika, kare tetai pamiri e oronga otomatiki ua mai i taua turanga. Inara, ia tatou e akaketaketa ra i te au tapeka anga pamiri, ka piri vaitata tatou tetai ki tetai, e ka puapinga maata atu te oraanga. Ei akatauanga, te tuatau e te manako anga ta tatou i oronga no te akaarianga i te aroa e te tu ngateitei no to tatou tokorua akaipoipo e au puapinga ia i te ra te ka oronga mai i te openga ra i te au tupu anga meitaki.​—Ephesia 5:33.

Me e tamariki ta tatou, kia tauta tatou i te akanoo i tetai reva tau no te akatupu mai ia ratou. Te akapouanga i te taime kia ratou, te eeu tamou anga i te au mataara no te komunikeitianga kia ratou, e te orongaanga kia ratou i te ako anga i te pae vaerua penei te umuumu maataia ra. Inara ka apai mai taua taime e te tauta anga i te akamerengo anga maata kia tatou. Te manako ra te au metua manuia i te tamariki ei akameitakianga, e e tuanga ia no ko mai i te Atua tei tau kia akono meitakiia.​—Salamo 127:3.

Te tauturu katoa ra te au oa meitaki i tetai oraanga puapinga e te merengo anga. (Maseli 27:9) Ka rauka ia tatou te au oa e manganui na te akaarianga i te manako taeake. (1 Petero 3:8) Ka tauturu te au oa mou i te akamaroiroi ia tatou me inga tatou. (Koheleta 4:​9, 10) E ko “te taunga i te au tuatau katoa ra, i anau maira te taeake no te tuatau e tumatetengaʼi ra.”​—Maseli 17:17.

Mei teaa atura te merengoanga i te pirianga oa mou! E manea atu tetai opunga ra, e reka atu tetai kai, e reka atu te akatangi imene me kapitiia atu ki tetai taeake. Ae, ko te pamiri vaitata e te au oa irinaki ua tetai atu nga tumu e puapinga maata ei tetai oraanga. Eaa atu tetai au apinga ta te Atua i maani te ka oronga mai i te puapinga maata atu ki to tatou au oraanga?

Akamerengoanga i to Tatou Au Anoano Pae Vaerua

Mei tei kiteia i mua ana, kua kapiti a Iesu Karaiti i te mataora ki te kiteanga i to tatou anoano pae vaerua. Kua angaia tatou ma te tu akono e te pae vaerua. No reira, te taiku ra te Pipiria ki “tei akono i ta te Vaerua” e te “tangata ngaro ra ko te ngakau.”​—1 Korinetia 2:15; 1 Petero 3:​3, 4.

Kia tau ki te An Expository Dictionary of New Testament Words, na W. E. Vine, te aite anga o te ngakau akatutu koia oki “ko te katoa anga i te pae manako e te angaanga akono o tetai tangata, te au mea manako ngakau e te akamarama anga.” I te akatakaanga, kua tuatua a Vine e: “Tera te aite anga, te taangaanga akatutuia ra te ngakau no te au mea uuna oonuia o tetai oraanga.” Te akakite katoa ra taua tataanga e ko “te ngakau, te vai oonu ra i roto roa, te ki ra ‘i te tangata muna,’ . . . te tangata tikai.”

Akapeea tatou me akamerengo i te au anoano o “tei akono i ta te vaerua,” me kare “te tangata muna,” koia oki te “tangata ngaro ra ko te ngakau”? Ka akono tatou i tetai takainga puapinga no te raveanga i teia e te akamerengoanga i to tatou anoano pae vaerua me akakite tatou i te manako tei imeneia e te tata taramo akauruia: “Kia kite kotou ko Iehova anake ra te Atua: nana tatou i anga, e nona oki tatou: e aronga tangata nona, e te mamoe no tana ra koro.” (Salamo 100:3) Te kiteanga i teia akamarama anga tau te taki ra ia tatou kia taopenga e e apainga ta tatou ki te Atua. Me ka inangaro tatou e kia kapitiia atu ei “aronga tangata nona, e te mamoe no tana ra koro,” kia rave rotai tatou ki tana Tuatua, te Pipiria.

E apinga kino ainei te reira? Kare, te kite anga e te manako maira te Atua i to tatou tu te akapuapinga ra i to tatou au oraanga. Te akamaroiroi maira te reira ia tatou kia meitaki atu ei tangata tataki tai​—papu tikai e akakoroanga puapinga. “E ao to te tangata i mataku ia Iehova, tei rekareka maata i tana ra au akauenga,” i na Salamo 112:1 ei. Te mataku tapu i te Atua e te akarongo ngakau tae ki tana au akauenga te oronga maira i te puapinga maata atu ki to tatou au oraanga.

Eaa ra te akarongo ki te Atua i akamerengo ei ia tatou? No te mea e akava ngakau to tatou, e apinga aroa ta te Atua i oronga mai ki te tangata ravarai. E akara matatio i te pae akono te akava ngakau te retita ra i te ariki anga me kare te ariki anga kore i ta tatou i rave me kare i manako no te raveanga. Kua kite ana tatou i te tu manamanata o tetai akava ngakau taitaia. (Roma 2:15) Inara ka rauka i to tatou akava ngakau i te tutaki ia tatou. Me angaanga noinoi kore tatou ki te Atua e te au taeake tangata, ka kite tatou i te merengo anga e te tau. Ka kite tatou e “e mea meitaki i te oronga atu i te rave mai.” (Angaanga 20:35) Te vaira tetai tumu puapinga no teia.

Kua maani Tei Anga ia tatou na roto i tetai tu e te akakeu ra te au anoano e te au inangaro i te taeake tangata ia tatou. Te tauturuanga i tetai atu te akatupu ra i te mareka anga i roto i to tatou ngakau. Pera katoa, te akapapu maira te Pipiria kia tatou me oronga tatou ki tetai tei anoano ra, te manako ra te Atua i teia e ko tetai apinga meitaki tei raveia kiaia.​—Maseli 19:17.

Takake mai i te orongaanga i te merengo anga i roto roa, ka rauka ainei i te manako anga i te au anoano i te pae vaerua i te tauturu ia tatou na roto i tetai tu tau ua? Te irinaki ra tetai tangata pitiniti i Itinga Rotopu ko Raymond tona ingoa e ka pera rai te reira. “Ko toku akakoroanga, e ma e te ngoie ua, koia oki kia maani moni,” i nana ei. “Inara mei te taime mai i ariki ei au i roto i toku ngakau e te vaira tetai Atua e te akakite maira te Pipiria i tona au anoano, e tangata tuke au. Te maani anga i tetai oraanga te akono ra i te ngai rua i toku oraanga. Na te tautaanga i te akamareka i te Atua, kare oku au manako akakino e te riri. Noatu rai kua mate toku papa i tetai tuatau maro anga, kare oku anoano no te tutaki i te kino ki te aronga tei apa.”

Mei ta Raymond i kite, te akono meitaki anga i te au anoano o “tei akono i ta te Vaerua” ka rapakau i te au puta oonu o te ngakau. Inara, kia rauka roa ia tatou te autu i te au manamanata te apai maira te au ra tataki tai, kare te katoa anga o te oraanga e merengo meitakiia.

Ka Rauka ia Tatou “te Au o te Atua”

I roto i teia ao taitaia, e iti ua te ra te ngaro meitaki ra. Te tupu ra te au tumatetenga, te tarevake ra te au parani, e te akamaromaroa ra te tangata ia tatou. Penei ka keia teia au tu ngata mei ia tatou i te mataora. Inara, ki te aronga te tavini ra i te Atua ko Iehova, te taputou maira te Pipiria i te merengo anga i roto roa​—“te au o te Atua.” Akapeea e raukai ia tatou teia au?

Kua tata te apotetoro ko Paulo: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:​6, 7) Koi kore ei e tauta i te apai ua i to tatou au manamanata, ka anoanoia tatou kia pure ma te ngakau tae, te titirianga i to tatou au taitaia i te au ra ki runga i te Atua. (Salamo 55:22) Te akarongo e ka ariu mai aia ki taua pure na roto i tana Tamaiti, ko Iesu Karaiti, ka maata atu ia ia tatou e tupu ra i te pae vaerua e te kite karape ra e akapeea te Atua i te tauturu anga ia tatou.​—Ioane 14:​6, 14; 2 Tesalonia 1:3.

I muri mai i te patu anga i to tatou irinaki ki roto i te Atua ko Iehova, “tei akarongo i te pure,” te meitaki ra tatou i te autu i te au timata anga, mei te maki roa, te ruaine anga, me kare te mii anga i tei mate ra. (Salamo 65:2) Inara, no tetai oraanga puapinga tikai, kia manako katoa tatou i te tuatau ki mua.

E Rekareka i te Manakonakoanga te Vaira ki Mua

Te taputou maira te Pipiria “i te rangi ou e te enua ou,” tetai kavamani tuatua tika i te rangi ra te ka tutara ki rungao i te pamiri tangata akarongo. (2 Petero 3:13) I roto i taua ao ou tei taputouia e te Atua, ka monoia te tamaki e te tika tau kore e te au e te tika tau. Kare teia i tetai umuumu anga rere ke ua, inara e irinaki anga te reira te ka tupu pakari i te au ra. E nuti meitaki tikai e e tumu no te rekareka anga.​—Roma 12:12; Tito 1:2.

Ko John, tei taikuia i te akamata anga, te manako nei i teianei e e puapinga maata atu tona oraanga. “Noatu e kare au i te tangata manako akonoanga, e irinaki ua ana au i te Atua,” i tuatuai aia. “Inara kare au i rave ana i tetai apinga no runga i teia irinaki anga e tae ua atu i te aravei mai anga e rua Au Kite o Iehova iaku. Kua akapuke au ia raua ma te au ui anga, mei te, ‘Eaa ta tatou angaanga i konei? Te aere nei tatou kiea?’ Kua oronga mai ta raua au pau anga Tuatua Tapu kiaku i te akakoroanga no te taime mua i toku oraanga. Ko te akamata anga ua te reira. Kua tatanu au i te kaki anga no te tuatua mou tei taki atu iaku kia taui i te katoa anga o taku au kaveinga. Noatu e kare au i puapinga i te pae materia, te manako nei au mei tetai tangata ona mirioni pae vaerua.”

Mei ia John rai, penei kua tuku koe i toou tu kite i te pae vaerua kia paruparu no tetai au mataiti e manganui. Inara, na te tatanuanga i te “ngakau ki te pakari” ka rauka ia koe te akaora akaou i te reira. (Salamo 90:12) Ma te aruaru anga e te tauta anga, ka rauka ia koe te rekareka tikai, te au, e te manakonakoanga. (Roma 15:13) Ae, ka puapinga maata atu toou oraanga.

[Tutu i te kapi 6]

Ka rauka i te pure i te apai mai kia tatou i “te au o te Atua”

[Au Tutu i te kapi 7]

Kua kite ainei koe e na teaa e akariro i tetai oraanga pamiri kia merengo maata tikai?