Auraka e Riro kia Apiapiia

“AURAKA e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.” (Mataio 6:34) E tau tikai te akoanga ta Iesu Karaiti i oronga maira no tatou katoatoa te ora nei i te tu aere viviki o teia tuatau nei e i te taiate pekapeka nei oki.

Inara, ka rauka tikai ainei no tatou kia kore e apiapi i to tatou au manamanata, te au ikianga, te au rave anga, e te au apainga oki? E au mirioni ua atu te au tangata te manako ngakau maromaroa ra, te taitaia ra, e te teiaa ra oki i te apainga. No reira te au ua tamaru e te akameangiti i te manako pekapeka i riro ei pitiniti mirioni tara ua atura.

Ko Teea te Ngai no te Kotinga

Ka tau tatou kia parani e kia teateamamao no ta tatou au apainga, te au angaanga, te au iki anga, e te au manamanata​—me e mea rapurapu e kare ainei. Te akamaroiroi maira te Pipiria ia tatou kia “noo ki raro, ka tatau ei i te apinga ei ou” i mua ake ka akamatai i tetai ua atu raveanga maata. (Luka 14:28-30) Te kapiti ra teia i te paunuanga i te au iki anga, i te akatakaanga i te au tupuanga no te reira, e te akamanakoanga i te tuatau akapouia, te maroiroi e te moni oki.

I te mea ka tau tetai kia akamanako matakite eaa penei te ka rokoia, kare e rauka me kare kia tauta i te tamanako i te au mea ravarai penei ka tupu mai. Ei akatauanga, no te pae i te oraanga meitaki no te pamiri, penei ka akamanako koe e eaa te ka raveia me ka akamata mai tetai ai i to kainga. Penei ka oko koe e ka akanoo oki i etai apinga akamatakite auai e te au apinga tamate ai. Penei ka parani koe e ka akamatau i etai au aerenga kia atea atu mei te au tuanga ke ke o te ngutuare ra. Inara aea te parani anga tau e ope ei e te au apiapi tau kore oki e akamatai? Ka akamata mai taua apiapi ra me ka akamata koe i te manamanata no etai au turanga openga kore e manganui ra, ko te maata anga penei e akatupu ua anga na tetai tamanako anga. Penei ka rokoia koe e etai au manako taitaia, i te akairinaki anga e kua ngaropoina ia koe tetai apinga me kore kare i rava taau i rave kia paruru i toou pamiri. Ka rauka i teianei apiapianga naau uaorai i akatupu kia akateiaa i toou manako e ka ngere koe i te moe anga na te reira.

A Mose i Mua i te Aroaro o Pharao

Kua oronga te Atua ko Iehova i tetai angaanga ngata ki tana peroveta kia Mose. Te mea mua, kia mama atu a Mose ki mua i to Iseraela e kia akairinaki atu ia ratou e na Iehova i akataoonga iaia kia arataki ia ratou ki vao i Aiphiti. I muri mai, kia mama atu a Mose ki mua ia Pharao e kia pati iaia kia tuku i to Iseraela kia aere. I te openga ra, kia arataki a Mose i te aronga tini e au mirioni ua atu na roto i te metepara ki roto i tetai enua tei nooia ra e te au tangata riri kino ra. (Exodo 3:1-10) Pouroa teianei ka rauka kia tamanata maata, inara i tuku ainei a Mose i te reira kia riro ei apainga kia akaki i tona manako ma tetai tu apiapi tau kore ua?

I te akara anga, tera etai au tumu tei tamanakoia e Mose. Kua ui aia kia Iehova: “I na, kia tae au ki te tamariki a Iseraela ra, e kia karanga atu au kia ratou e, I tonokia mai au e te Atua o to kotou ai metua kia kotou nei; kia tuatua maira ratou kiaku e, Koai tona ingoa? e akapeea atu au kia ratou?” Kua oronga maira Iehova i te pauanga kiaia. (Exodo 3:13, 14) Kua manako katoa ra Mose e penei eaa te ka tupu me ka kore a Pharao e irinaki iaia. Kua pau akaou maira Iehova ki te peroveta ra. Tetai manamanata openga​—kua akatika a Mose e “kare [aia] i te tangata vaa tukatau.” Akapeea te rapakau anga i teianei? Kua oronga atura Iehova ia Aarona ei vaa tuatua no Mose.​—Exodo 4:1-5, 10-16.

I te papa anga ma te au pauanga ki tana au uianga e te akarongo oki i te Atua, kua rave atura Mose mei ta Iehova i akaue atura iaia. Kare e kia tamamae iaia uaorai ma te au manako tamatakuanga e penei eaa te ka tupu me aro atu aia ia Pharao ra, “kua pera oki a Mose.” (Exodo 7:6) Naringa i tuku aia i te au tu apiapi kia tupu mai kiaia, penei ka akaparuparu mai te reira i tona akarongo e te mataku kore tei umuumuia ra kia rave atu i tana angaanga.

Ko ta Mose tu tau i te raveanga i tana angaanga kua riro ei akatauanga no ta te apotetoro ko Paulo i karanga ra e, e “ngakau akono meitaki.” (2 Timoteo 1:7; Tito 2:2-6) Naringa kare a Mose i akono i te ngakau akono meitaki ra, kua ngoie ua aia i te riroanga kia tapokiia no te maata o tana angaanga e penei ka kore aia e ariki i te reira.

Te Akatere Anga i Toou Au Manako

Eaa taau ka rave me i toou oraanga i te au ra tataki tai ka aro atu koe i te timataanga i toou akarongo me kare ma etai au timataanga ke? Te riro ra ainei koe kia taitaia no te manako ua anga i te au arairai anga e te au akaaoanga te mama maata maira ki mua? Me kare te manako ra koe ia ratou na roto i tetai tu tau? Mei ta tetai papaki i tuatua, ‘Auraka e na runga atu i te ana kia tae roa atura koe ki te reira.’ Penei kare e umuumuia koe kia na runga i taua ana manako uaia ra! No reira eaa ka taitaiai na tetai apinga penei kare e rokoia mai? Te tuatua ra te Pipiria: “E aue oki tei te ngakau o te tangata ra, e piko ïa ki raro.” (Maseli 12:25) E putuputu te tupu anga e ka taroaroa tetai i te rave i tetai iki anga, i te tukuanga apinga ki amuri akera e tae roa kia tureiti.

E maata roa atura te kino to te akakino anga i te pae vaerua ta te apiapi tau kore te ka akatupu mai. Kua akakite maira Iesu Karaiti e ko te ariki anga no “te tuatua o te basileia nei” ka rauka kia pokia atura na te mana “i te anoano maata i to teianei ao.” (Mataio 13:19, 22) Mei te au tataramoa te ka arai ra i te au kia kore e tupu mai kia pakari e kia uua mai oki, mei te reira katoa te apiapi kare ra e rauka kia akonoia ka arai ia tatou kia kore e tere ki mua i te pae vaerua e te uua anga mai i te akapaapaa i te Atua ra. Kua tapu katoa te tu apiapi akapou na tetai uaorai i akatupu kia kore tetai papaki e rave i te akatapuanga ia ratou uaorai ki te Atua ra. Ka manamanata ua ratou e, ‘Ka peea me ka kore au e akono kia tau ki toku akatapu anga?’

Kua tuatua mai te apotetoro kia tatou e i ta tatou tamaki anga pae vaerua, te tauta ra tatou i “te akatuikaa anga atu i te au manako ravarai i te akarongo i te Mesia ra.” (2 Korinetia 10:5) Ka mareka to tatou enemi maata koia Satani te Tiaporo ra kia akatere atu i to tatou au manamanata kia akamaroiroi kore ia tatou e kia akaparuparu ia tatou i te pae kopapa, te manako ngakau, e te pae vaerua oki. E tu kikite tona i te taangaanga i te au tu ekoko anga ei ereere i tei matakite kore ra. No reira rai a Paulo i akamatakite katoai i te au Kerititiano e “auraka e tuku i ta te diabolo ngai kia o mai.” (Ephesia 4:27) E “atua o teianei ao ra,” kua autu a Satani i ‘te akapoiri anga i te ngakau o te aronga akarongo kore ra.’ (2 Korinetia 4:4) Auraka rava tatou e tuku iaia kia akatere i to tatou au manako!

Te Vai Maira te Tauturu

Me te aro atura ki te au manamanata ka rauka i tetai tamaiti te aere atu ki tetai metua aroa e ka rauka mai te arataki anga e te akapumaana oki. Mei te reira katoa, ka rauka ia tatou kia aere atu ki to tatou Metua i te rangi ra, kia Iehova, ma to tatou au manamanata. Ko te tika, te pati maira Iehova ia tatou kia tuku i ta tatou au apainga e te au apiapi oki kiaia. (Salamo 55:22) Mei tetai tamaiti kare ra e taitaia akaou i tona au manamanata i muri ake i te rauka anga iaia te akapapu anga mei tona metua maira, ka tau tatou kare kia tuku anake i ta tatou au apainga ki runga ia Iehova mari katoa ra kia akaruke atu i te reira kiaia.​—Iakobo 1:6.

Akapeea tatou me tuku i to tatou au apiapi kia Iehova? Te pau maira Philipi 4:6, 7 e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” Ae, kia tau ki ta tatou au pure e te au patianga, ka rauka ia Iehova te oronga mai kia tatou i te tu maru ki roto roa te ka paruru i to tatou au manako mei te manamanata anga no te au apiapi tau kore ua ra.​—Ieremia 17:7, 8; Mataio 6:25-34.

Inara, kia rave rotai ma ta tatou au pure, kare tatou e tau kia akataka ke ia tatou uaorai i te pae kopapa me kare te manako ngakau. (Maseli 18:1) Kareka ra, ka meitaki atu tatou kia akamanako i te au kaveinga Pipiria e te au aratakianga te piri atura ki to tatou manamanata, na te reira te kopaeanga i te irinaki anga ki to tatou uaorai kiteanga. (Maseli 3:5, 6) Aiteite katoa te aronga ou e tei ruaine ra ka rauka kia ariu atu ki te Pipiria e te au puka a te Punanga Tiaki no tetai akakite anga apinganui no te tukuanga i te au tika e te akonoanga i te au manamanata. Kapiti katoa oki, i roto i te putuputuanga Kerititiano, te akameitakiia ra tatou ma te aronga pakari e te karape e etai atu au Kerititiano kua pakari tei mareka ua ra kia tuatua mai kia tatou. (Maseli 11:14; 15:22) Te aronga kare ra i piri manako ngakau mai e tei ia ratou ra to te Atua manako ki runga i tetai tumu e putuputu te rauka kia tauturu mai ia tatou kia akara i to tatou au manamanata mei tetai atu manako tuke ra. E noatu e kare ratou e tuku i te ikianga na tatou, ka riro ratou ei tumu maata no te akamaroiroi anga e te turu anga oki.

“E Irinaki i te Atua”

Kare e rauka i tetai te akakore e te rava ra te taitaia i te akonoanga ma to tatou au manamanata tikai i te au ra tataki tai ma te kore e kapiti atu kia ratou na te taitaia anga no te au apinga manako uaia ra. Me te akariro ra te apiapi e penei eaa te ka tupu mai kia tatou kia manako kino e te tau kore, ei reira e ariu tatou kia Iehova na roto i te pure e te patianga. E akara atu ki tana Tuatua e te akaaerenga no te aratakianga, te pakari, e te akono tau. Ka kite tatou e noatu eaa te turanga penei ka tu mai, te vaira te tauturu kia akono atu i te reira.

I te manakoanga teiaa te ngakau e te taitaia, kua imene te tata taramo ra: “Eaa koe i taitaiaʼi, e toku vaerua? eaa koe i ngarepurepu ei i roto iaku nei? e irinaki i te Atua; ka akameitaki rai au iaia, ei ora ïa no toku nei mate, e ei Atua noku.” (Salamo 42:11) E vaio i te reira ei au manako anga na tatou.

Ae, e parani i tei tau kia manakoia atu, e akaruke i tei tau kore ra kia Iehova. “E uri i to kotou tumatetenga katoa ki runga iaia; koia oki te tiaki mai ia kotou.”​—1 Petero 5:7.

[Tutu i te kapi 23]

Te tuku ra ainei koe, mei ia Davida rai, i taau apainga teiaa e te au apiapi ki runga ia Iehova?