“Te Mana Maata Meitaki Nei”

MEI teaa te maata te mamae ka rauka i tetai Kerititiano i te tamou marie? I teia ra, e manganui te au Kerititiano takapini i teianei ao te aro atura i te putaua, te tamanamanata anga ngutuare tangata, te mamae manako ngakau, te maki, te tamaki, e te takinga kino. E mea tau ainei no te anoano atu ia ratou kia akono i te tiratiratu noatu teia au mea pouroa? Kua karanga te apotetoro a Paulo e koia ia. Kua tata aia: “No te au mea ravarai i raukaʼi iaku te maroiroi na roto iaia tei oronga mai i te ririnui ki aku nei.”​—Philipi 4:13, NW.

Kua akaari mai te tuatua enua e ko te maroiroi no ko mai ia Iehova kua rava te reira no te au mea ravarai. Ei akaraanga, i te tuatau o te akatereanga Nati i Tiamani, kua mamae te Au Kite o Iehova i te takingakino anga kino. I tamou marie ainei ratou? Kua karanga te puka Les Bibelforscher et le nazisme (Te Aronga Apiipii Puka Tapu e te Akatereanga Nati): “Noatu te au papaanga ravarai, te au tamataku anga, e te au arai anga, noatu te au taakama anga i te ngai tangata, te au tapeka anga e te akautunga anga i roto i te au puakapa tamamae anga, kare rava te Aronga Apiipii Puka Tapu [Au Kite o Iehova] i tuku ua ana ia ratou uaorai kia ‘apii akaouia.’”

I roto i te au puakapa tamamae anga, kua akatakaia te Au Kite na roto i te au toroenga vareau i runga i to ratou rima pona e kua akatakaia ma te kino takake. Kua takino ainei teia ia ratou? Kua kite te Taote no te Manako a Bruno Bettelheim e “kare ratou i akaari anake ua i te au tu ngateitei tuke ei au tangata e te tu akono tau, inara te akara anga e kua paruruia ratou mei te kite anga aiteite i roto i te puakapa tei kare i roa ana kua takore i te au peretana tei tamanakoia e kua kapiti meitaki ia au e toku au taeake manako taitaia.”

Ae, kua rauka ia ratou ‘te maroiroi no te au mea ravarai.’ No teaa ra? No te mea kua irinaki ratou ia Iehova. Kua karanga a Paulo e: “Te āriki nei ra matou i taua apinga nei i te āriki karakaraea nei, kia riro te mana maata meitaki nei ki te Atua, auraka ia matou.” (2 Korinetia 4:7) Me ka aravei koe i tetai ua atu turanga timata anga, e akara papu tikai kia Iehova no te tauturu. Ma te akamaroiroiia ki te mana maata meitaki nei tana ka oronga mai, ka rauka ia koe i te tamou marie.​—Luka 11:13.