Ka Rauka Ia Koe i te Na Roto Atu i Teia Au Arairai Anga!

PENEI ka tari tetai pairere maatamaata i te au anere ua atu patete e te au tane kako. Akapeea e raukaʼi i taua pairere teiaa i te akaruke i te enua? Na roto ua i te lift.

Me oro viviki te pairere na runga i te ngai akato anga, ka oro viviki te reva na runga e ka na raro i te au peau amingi. E na teia e akatupu i tetai opara anga ki runga tei kapikiia e ko te lift. Me rava te lift i te akatupuia, ka rauka te pairere i te akaruke i te ngai akato anga e ka rere atu. Ae, kare e rauka i tetai pairere ki roa i te akatupu kia rava te lift e raukaʼi i te rere.

Ka ki katoa rai tatou. I te anere mataiti i topa, kua tuatua te Ariki ko Davida e ko tana ‘au ara e mei te apainga kare e maranga iaia.’ (Salamo 38:4) Pera katoa, kua akamatakite mai a Iesu Karaiti no te riroanga mai kia akateiaa roaia e te au pekapeka o te oraanga. (Luka 21:34) Ka rauka i te au manako e te au manako ngakau papu kore i te akateiaa roa ia tatou e penei i te akara anga e mea ngata e raukaʼi i te “rere.” Te akateiaaia ra ainei koe na te reira mataara? Me kore kua kite ainei koe i etai arairai anga ki toou tupu maata anga atu i te pae vaerua? Me koia ia, eaa te ka riro ei tauturu?

Te Maromaroa ra Koe?

Te maromaroa​—e kopekope anga matauia i teia tuatau—​ka riro ia ei arairai anga i te pae o te manako, e pera katoa no etai o te au tangata o Iehova. Ko te au mapu ou tikai e viviki ua ratou i te karanga i etai au angaanga e e maromaroa. Te manako pera ra ainei koe i etai taime no runga i te au uipaanga Kerititiano? Me koia ia, eaa taau ka rave kia akariro i taau aereanga ki te uipaanga ei mea rekaia?

Na te akao anga atu ki roto ko te taviri ia. Kua tata a Paulo ki te mapu tane ou ko Timoteo: “E akamātau ua ra koe i te akono i te Atua. Ko te akamātau i te kopapa nei, e puapinga mea ngiti ua to reira: kareka te akono i te Atua ra, e puapinga to te reira i te au mea katoa nei, e meitaki tei akakiteia mai to te reira i teianei ao, e te ao a muri atu.” (1 Timoteo 4:7, 8) Ka reka koreia tetai puka akamatutu anga kopapa e e meangiti ua tona puapinga me kare tatou e aru i te au akatikatika anga kopapa tei orongaia mai. Kua akatakaia te au uipaanga Kerititiano kia taangaanga i to tatou au manako e ka pera rai me akapapa tatou e te piri atu ki roto. Ka riro teia akao anga ki roto i te au uipaanga ei mea tutaki maata e te reka.

No teia tu, kua tuatua tetai vaine Kerititiano ou ko Mara tona ingoa e: “Me kare au e akapapa no te au uipaanga, kare au e reka ia ratou. Inara, me kua akapapa au i mua ake ana, ka ariu maata atu toku manako e te ngakau. Ka riro te au uipaanga ei mea puapinga tikai, e e tapapa ua ana au no te paupau.”

Na te apiianga i te akarongo ka riro katoa ia ei tauturu. E mea ngoie ua e te marekaia te akarongo anga ki tetai akatangi anga imene reka. Inara kare te katoa anga o te tu merengo i te mea tupu viviki ua. Ka rauka ua ia tatou te tu merengo mei te porokarama uipaanga me akarongo meitaki tatou i tei tuatuaia. Kua akakite tetai Kerititiano ko Rachel tona ingoa e: “Me kare te vaa tuatua e oraora ana, ka anoanoia au kia akarongo pakari. Te ture noku uaorai, ‘Me e reka kore te ako, ko te maata atu o taku akarongo pakari anga.’ . . . E akarongo meitaki ana au i te au irava, te tautaanga kia maata taku ka rauka mei ia ratou.” Ka tau tatou e kia ako ia tatou uaorai, mei ia Rachel rai, e raukaʼi i te akarongo. Te tuatua ra te puka a Maseli e: “E taku tamaiti, e akono mai i toku nei pakari, e ariu mai i to taringa ki toku nei kite.”​—Maseli 5:1.

Penei te ripiti uaia ra etai akakite anga te orongaia ra i te au uipaanga. Te anoanoia ra teia! Te anoanoia ra te au akamaaraara anga pouroa no te au tavini o te Atua. Te anoanoia ra e te kopapa tiama kore, ma tona inangaro akarongo kore e te manako tarevake, i te tauturu katoatoa te ka rauka. ‘Kare ua [te apotetoro ko Petero] e vata i te akakite i te taeake akarongo i etai au tuatua, kite ua rai ratou, e tinamou ua rai i taua tuatua-mou.’ (2 Petero 1:12) Kua akamarama katoa a Iesu i “te au tata tuatua katoa . . . e arite ïa ki te tangata kainga, tei apai mai i te apinga ou e te apinga taito, no roto i tana putunga.” (Mataio 13:52) No reira, koi apai maira ta tatou au uipaanga i te au manako Tuatua Tapu matauia, me kore te ‘au putunga taito,’ te vai ua ra etai ‘au putunga ou’ ei tarekareka ia tatou.

Na te aruaru anga i te akarongo maata tikai i te au uipaanga ka riro ia ei akamaroiroianga tikai i te pae vaerua. “E mataora to te aronga tei manako i to ratou anoano i te pae vaerua, [te aronga te pati ra i te vaerua],” i tuatuaʼi a Iesu. (Mataio 5:3, NW tataanga i raro ake) Ka riro taua tu no te kai meitaki tikai i te pae vaerua te orongaia ra i ko i te au uipaanga ei akakore atu i te maromaroa.​—Mataio 24:45-47.

Akamaroiroi Koreia Ainei e Tetai Akaraanga Kino?

I riri ana koe no runga i te tu o tetai ke i roto i taau putuputuanga? Penei kua umere ana koe, ‘Akapeea tetai taeake te noo ua anga mei tera te tu e te vai nei rai i roto i tetai turanga meitaki?’ Ka riro taua au manako ei arairai anga i te pae o te manako, te akamatapo anga ia tatou mei te puapinga o te pirianga taeake mareka te ka rauka ia tatou ma te au tangata o te Atua.​—Salamo 133:1.

Penei kua tupu tetai manamanata aiteite mei teia ki etai au mema o te putuputuanga i Kolosa. Kua akamaroiroi a Paulo ia ratou: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra.” (Kolosa 3:13) Kua kite a Paulo e penei te noo mako kore ra etai au Kerititiano i Kolosa e penei kua oronga ki tetai atu i te tumu no te kopekope anga. No reira auraka tatou e poitirere maata ua me te ngere ra tetai o to tatou au taeake tungane me kore tuaine i etai tu Kerititiano. Kua oronga a Iesu i te ako anga tau no runga i te akatikatika anga i te au manamanata pakari tikai. (Mataio 5:23, 24; 18:15-17) Inara i te maata anga o te taime, ka rauka ua ia tatou i te akangaropoina atu i te au tarevake o to tatou au taeake akarongo e te akakore ua ia ratou. (1 Petero 4:8) E tika, ka riro te reira rave anga ei mea meitaki no tatou uaorai e no tetai atu. Eaa te tumu?

“Na te akono o te tangata i kore ei i riri vave; ko tona ïa kakā koia i akakore i te ara,” i tuatuaʼi a Maseli 19:11. Mei teaa ra te meitaki i reira i te akakore ua e i te akatika anga i te riri e te akamoupuku kia tupu ua atu! Kua tuatua a Salvador, e tangata pakari tei kiteaia no tona tu aroa e: “Me akono kino mai tetai taeake iaku me kore ka tuatua i tetai apinga takinga kino, ka ui au kiaku uaorai: ‘Akapeea au te tauturu anga i toku taeake? Akapeea e raukaʼi iaku i te kopae kia kore e ngaro toku pirianga akaperepere ma ia ra?’ E manako ua ana au e mei teaa te ngoie ua i te tuatua i te apinga tarevake. Me tuatua manako kore ua etai, te pauanga tau nona ra kia akaoki i tana i tuatua e kia akamata akaou. Inara kare te reira e rauka, no reira ka rave au i te takainga meitaki atu ka aru mai e ka akangaropoina atu i te tuatua. Ka manako ua au i te reira e e riri ua o te kopapa tiama kore, kare i te akaata anga o te tu tikai o toku taeake.”

Penei ka manako koe e e ngoie ua i te tuatua i teia i te rave atu. Inara ko te maata anga te vaira ki runga i te mataara ta tatou e arataki ra i to tatou manako. “Te au mea rekarekaia ra, . . . e akamaara i taua au mea ra,” i ako ei a Paulo. (Philipi 4:8) “Rekarekaia” te aite anga tikai ko te “akakeuanga i te inangaro.” Te inangaro ra a Iehova ia tatou kia akara i te mea meitaki i roto i te au tangata, kia akara tika atu ki runga i tei akakeu i te inangaro e kare i te akamoupuku. Te oronga maira aia uaorai kia tatou i te akaraanga teitei i teia tu. Kua akamaara mai te tata taramo ia tatou no teia, i te tuatua anga e: “Naringa koe, e Iehova, e akairo ana i te au ara nei e te Atu, koai te ka mou?”​—Salamo 103:12; 130:3.

Tika rai, penei i tetai atianga kare te tu o tetai taeake e tau ana, inara ko te maata anga o to tatou au taeake akamori e au akaraanga meitaki i te nooanga ei Kerititiano. Me akamaara tatou i teia, mei ia Davida rai ka mataora tatou i te ‘akameitaki maata roa ia Iehova e akapaapaa iaia i rotopu i te tangata tini ra.’​—Salamo 109:30.

E Mea Ngata Ainei te Riro Mai ei Kite?

Ma te mii tikai, no te arairai anga i te pae o te manako, kare etai i akamata ake i te akapaapaa ia Iehova. E manganui te au tangata kare i te Au Kite o Iehova te oronga tau ua ra no to ratou au pamiri e pera katoa te turu ra i ta ratou au vaine i roto i te angaanga orometua Kerititiano. E aronga oaoa ratou e penei ka reka atu i te putuputuanga, inara te tapupu ra ratou no te riro anga mai ei au tavini akatapuia no te Atua. Eaa te tapupu ra ia ratou?

Penei ko tetai manamanata te kite ra teia au tane i te angaanga teokaratiki rave ua a ta ratou au vaine e kua manako e e maro anga maata roa te riro mai ei Kite. Me kore ra penei te mataku ra ratou e kare rava e rauka ia ratou i te piri atu ki roto i te angaanga tutu aereanga mei tera are ki tera are. Mei ta ratou akara anga, te riro ra te au apainga ei tapoki i te au akameitakianga. Eaa ra i tupu ei te arairai anga i te pae o te manako? Ka apii e ka taangaanga ua te maata anga o te aronga apiipii Puka Tapu i te tuatua mou. Inara te kite ra te au tane irinaki kore i te maata anga o te taime te au apainga pouroa a te Kerititiano i mua ake ka akakeuiaʼi ratou no te ariki ia ratou.

Kua akamarama a Manuel, tei roto i teia turanga e: “No etai tai ngauru mataiti, e aru ana au i taku vaine ki te au akaputuputuanga e ki te au uipaanga. Ko te tika, e reka atu au i te piri ki te Au Kite e ki tera o te au tangata o teianei ao, e e mataora ana au i te tauturu ia ratou me rauka iaku. Kua umere au i te aroa tei kiteaia i rotopu ia ratou. Inara ko te manako o te aereanga mei tera are ki tera are e arairai anga maata tikai noku, kua mataku au ka tatiaeae toku au oa angaanga iaku.

“Kua akakoromaki maata taku vaine iaku e kare rava i tauta te maro mai iaku kia apii i te Puka Tapu. E ‘tutu aere’ ana aia e te tamariki katoa na roto i to ratou akaraanga meitaki. Kua inangaro takake a José, e tangata pakari i roto i te putuputuanga iaku. I toku manako na tana akamaroiroi anga i akakeu iaku i te openga ra kia akamata i te apii tikai. I muri ake i te papetitoangaia, kua kite mai au e tei roto ua te au arairai anga i toku manako. Te ikianga au i te tavini ia Iehova, kua kite au i tana tauturu te autuanga i toku au tu mataku.”

Akapeea e raukaʼi i te au vaine e te aronga pakari Kerititiano i te tauturu i te au tane mei ia Manuel rai kia autu i to ratou arairai anga i te pae o te manako? Penei na tetai apiianga i te Puka Tapu e akatupu i te ariki anga e te inangaro i te rave i te anoano o te Atua. Ae tikai, ko te kite meitaki tikai i te tuatua tapu te tumu no te taangaangaanga i te akarongo e te papu anga i roto i te manakonakoanga te vaira ki mua.​—Roma 15:13.

Eaa te ka akamaroiroi i taua au tane kia ariki i tetai apii Puka Tapu? Te maata anga o te taime, ka riro tetai pirianga ma tetai taeake marama ua i roto i te putuputuanga ei iki anga meitaki. Penei ka rauka i tetai tangata pakari me kore i tetai taeake i te akamatau atu iaia ki te tane. Me oti tetai pirianga meitaki i te akatumuia, penei ko tana ka inangaro kia apii tetai tangata kiaia. (1 Korinetia 9:19-23) I teianei, ka rauka i te vaine Kerititiano akono i te oronga i te au kai pae vaerua ki tana tane irinaki kore, te kiteanga e kare aia e ariu mai ki te taomi anga.​—Maseli 19:14.

Mei ta Manuel i apii na roto i te kite anga, me rauka i tetai tangata te tu maroiroi i te pae vaerua, ka riro mai te au arairai anga mamaata ei mea rikiriki ua. Ka akamatutu a Iehova i te aronga te inangaro ra i te tavini iaia. (Isaia 40:29-31) Na roto i to te Atua tu maroiroi ma te tauturu o tetai Au Kite pakari, ka rauka te au arairai anga i te akaateaia. Ka meangiti mai te tu reka kore o te angaanga tutu aere mei tera are ki tera are e ka meangiti mai te akakeukeu anga a te au oa angaanga, koi riro ei te tavini anga ma te meta katoa ei mea reka.​—Isaia 51:12; Roma 10:10.

E Tamou Atu i te Akakeu Anga

Ka rauka i te na roto atu i teia au arairai anga e toru ta tatou i uriuri ana. Me rere tetai pairere, ka inangaroia te ririnui maata o te matini e pera katoa kia taokotai mai te aronga angaanga i runga i te pairere. I te tuatau ka rere, ko teia te taime e maata atu ta te matini penitini ka apuku i tetai ua atu taime rere anga. Ma te aiteite, e raukaʼi i te akaruke i te au manako e te au manako ngakau papu kore ka anoanoia te tauta anga maata e te akarongo anga pakari. Penei i te akamata anga e ngata roa, inara ka ngoie mai te tere anga ki mua me rauka te akakeu anga.​—Akaaite ia 2 Petero 1:10.

Ka tamouia te tere anga ki mua na te aru viviki anga i te au akamaroiroi Tuatua Tapu. (Salamo 119:60) Ka papu ia tatou e ka inangaro te putuputuanga i te tauturu mai. (Galatia 6:2) Inara, ko te mea puapinga maata, koia oki te tauturu o te Atua ko Iehova. Mei ta Davida i tuatua, “kia akameitakiia te Atu i tera rā i tera rā, ko tei akateiaa ia matou i te meitaki.” (Salamo 68:19) Me akateiaa kore tatou ia tatou uaorai na roto i te pure, ka mamangika ta tatou apainga.

I etai taime, ka akaruke mai te pairere i tetai ngai reureu e te uaua ki muri, te tomo atu anga na roto i tetai tumurangi, e ka rere ki roto i tetai tiao ma te iti anga manea tikai o te ra. Ka rauka katoa ia tatou i te akaruke i te au manako papu kore ki muri. Ma te tauturu tu-Atua, ka rauka ia tatou i te na roto atu i te tiao, e ka takotokoto ki roto i te mareva manea, mataora o to Iehova pamiri akamori takapini i teianei ao.

[Au Tutu i te kapi 23]

Ma to Iehova tauturu, ka rauka ia tatou i te na roto atu i te au arairai anga i te pae o te manako