Tavinianga Tiratiratu ma ta Iehova Akaaerenga

“Ma tetai tei tiratiratu ra, ka rave koe ma te tiratiratu.”​—2 SAMUELA 22:26, NW.

1, 2. Eaa etai akatauanga no te tiratiratu te ka kitea e tatou ravarai i roto i te putuputuanga?

KUA roa i tetai aiai i teateamamao ei tetai tangata pakari i tetai tuatua no te uipaanga Kerititiano. Kua inangaro aia kia tapu e kia akaangaroi ua; kareka ra, kua angaanga ua atu aia, i te kimianga i te au akaraanga Tuatua Tapu e te au akatutu anga te ka itae i te au ngakau e kia akamaroiroi atu i te anana ra. I te po o taua uipaanga ra, kua roiroi etai nga tokorua metua o taua putuputuanga rai penei ka rekareka ua i tetai aiai ki te kainga; kareka ra, kua akapapa marie raua i ta raua nga tamariki e kua aere atu ki te uipaanga. I muri ake i te uipaanga, kua uriuri manako tetai pupu Kerititiano i te tuanga tuatua a taua tangata pakari ra. Kua timataia tetai tuaine kia taiku aia i te mamae anga tona manako ngakau i taua taeake rai i tetai tuatau; kareka ra, kua tuatua oraora ua aia no tetai o te au tumu tana i tuatua maira. Te kite ra ainei koe i te tumu manako matauia i roto i teianei au tuatua anga?

² Ko taua tumu manako ra ko te tiratiratu ia. Kua rave tiratiratu te tangata pakari ra kia tavini atu i te anana a te Atua ra; kua aere tiratiratu nga metua ra ki te au uipaanga putuputuanga; kua turu tiratiratu te tuaine ra i te aronga pakari. (Ebera 10:24, 25; 13:17; 1 Petero 5:2) Ae, i te au tuanga ravarai o te oraanga, ka kite tatou i te au tangata o te Atua e aruaru ra kia tavini tiratiratu ma te akaaerenga a Iehova ra.

3. Eaa ra i puapinga maata roaʼi kia vai tiratiratu tatou ki ta Iehova ra akaaerenga i te enua nei?

³ Me akara mai a Iehova ki raro i teianei ao viivii, e mea ngiti ua te tu tiratiratu tana ka kite. (Mika 7:2) Mei teaa ra te akakeu anga tona ngakau ma te rekareka i tona kite anga i te tiratiratu o tona au tangata! Ae, te mareka maira aia i toou uaorai tu tiratiratu. Inara, ka akariri te reira ia Satani, te meameaau mua ra, e ka akapapu iaia ei pikikaa. (Maseli 27:11; Ioane 8:44) E akamanako e ka tauta a Satani kia akakino i toou tu tiratiratu kia Iehova e ki Tana akaaerenga i te enua nei. E akamanako tatou i etai au mataara ta Satani ka rave i teia. E na reira ka kite meitaki atu ei tatou e akapeea ka raukaʼi ia tatou kia vai tiratiratu tae roa ki te openga ra.​—2 Korinetia 2:11.

Na te Akaraanga i te Au Tu Apa Ua ka Akakino ia i te Tu Tiratiratu

4. (a) Eaa ra i ngoie uaʼi kia akono i tetai manako akaapa ua i te aronga e mana to ratou? (e) I akapeea a Kora i rave tiratiratu kore ei ki te akaaerenga a Iehova ra?

⁴ Me tei roto tetai taeake i tetai turanga e apainga tana, penei ka kitea uaia tona au tarevake. Mei teaa ra te ngoie ua te akara atu i ‘tetai tanga iti i roto i te mata o to tatou taeake ra, e ka manako kore uaʼi i te rakau maata i roto i to tatou uaorai’! (Mataio 7:1-5) Inara, na te manako tamouanga i te au tarevake ka akatupu ia i te tiratiratu kore. Ei akatutu anga, e akamanako ana i te tuke i rotopu ia Kora e Davida. E maata ta Kora ra apainga, e penei kua tiratiratu aia no te au mataiti e manganui, inara kua riro aia kia inangaro kia maata tona mana. Kua manako ariki kore aia i te mana o Mose raua ko Aarona, tona nga katini mua ra. Noatu rai e ko Mose e tu maru maata tona i to te tangata ravarai, penei kua akamata a Kora i te akara atu iaia ra ma nga mata akaapa. Penei kua kite aia i etai au tarevake o Mose. Inara, kare taua au tarevake ra i akatika i to Kora tiratiratu kore ki te akaaerenga a Iehova. Kua akapouia aia mei roto atu i te putuputuanga ra.​—Numero 12:3; 16:11, 31-33.

5. Penei no teaa i manako timataiaʼi a Davida kia akameameaau atu ia Saula ra?

⁵ I tetai tua, kua tavini a Davida i raro ake i te Ariki ko Saula. E ariki meitaki i mua ana, kua riro ra a Saula kia kino. Kua umuumu a Davida i te akarongo, te akakoromaki, e pera katoa te tu karape kia oraʼi i te au rave anga kikino a Saula vareae ra. Inara, i te va mai anga tetai tuatau no Davida kia ta atu iaia, kua tuatua aia e ‘e mea tau kore kia manakoia, mei ta Iehova ra turanga,’ kia rave aia i tetai angaanga tiratiratu kore ki tetai ta Iehova i akatainu ra.​—1 Samuela 26:11.

6. Noatu rai me ka kite tatou i te au tu paruparu e te au tarevake i te aronga pakari ra, eaa ta tatou kare rava e tau kia rave?

⁶ Me ko etai e arataki ra i roto ia tatou ka akara anga tarevake i te tuku anga tika, ka tuatua ma te au tuatua riri, me kare ka akaari i te akaperepere i tetai papaki, ka akaapa ainei tatou ia ratou, penei te akamaataanga atu i tetai vaerua akaapa ua i roto i te putuputuanga? Ka akataka ke atu ainei tatou mei te au uipaanga Kerititiano ra ei tetai tu patoi anga? Kare rava! Mei ia Davida rai, kare rava tatou e akatika i te au tarevake o tetai kia akakeu ia tatou kia tiratiratu kore kia Iehova e tana akaaerenga oki!​—Salamo 119:165.

7. Eaa etai au ravenga viivii tei akatupuia ki te iero i Ierusalema ra, e eaa to Iesu manako ra no te reira?

⁷ Ko Iesu Karaiti te akaraanga maata rava no te tiratiratu tangata nei, tei totou akatakaia maira ei “tei tiratiratu” no Iehova. (Salamo 16:10, NW) Te taangaanga viivii i te iero i Ierusalema ra kua akariro ia i te tu tiratiratu ei akaaoanga. Kua kite oki a Iesu e ko te angaanga a te taunga maata e te au atinga kua akatutu mai i tana uaorai angaanga orometua e tona matenga ei atinga, kua kite aia i te puapinga maata no te au tangata kia apii mai mei te reira. No reira kua ki aia i te rikarika tuatua tika i tona akara anga e kua riro te iero ra ei “ana no te aronga keia.” Ma te mana orongaia mai e te Atua ra, e rua taime i rave ei aia i te tama anga i te reira.a​—Mataio 21:12, 13; Ioane 2:15-17.

8. (a) I akapeea ta Iesu ra akaari anga i te tiratiratu ki te akanoonoo anga i te iero ra? (e) Akapeea e raukaʼi ia tatou te akaari e te ariki ra tatou i te akamorianga ia Iehova ma tana akaaerenga ma katoa ra?

⁸ Inara, kua turu tiratiratu a Iesu i te akanoonoo anga no te iero. Mei tona tamaiti rikiriki anga mai, kua aere aia ki te au oroa i te iero ra e kua putuputu aia i te ako atu i reira. Kua tutaki katoa aia i te tero iero​—noatu rai e kare aia i akaueia kia rave i te reira. (Mataio 17:24-27) Kua akapaapaa a Iesu i te vaine takaua putaua ra no te tuku anga kia “ope roa tona apinga rikiriki rava kore” ki roto i te pia apinga i te iero ra. E roa poto i muri akera, kua kopae takiri atura Iehova i taua iero ra. Inara tae roa mai ki reira, kua tiratiratu a Iesu ki te reira. (Mareko 12:41-44; Mataio 23:38) Ko ta te Atua ra akaaerenga i te enua nei i teia tuatau e mamao roa atu te meitaki ki to te akatereanga ngati Iuda ma tona iero ra. E tika, kare te reira i apa kore ua; ko te tumu te reira i raveiaʼi te au akatikatika anga i etai taime. Inara kare katoa ia i ki ma te tu viivii, kare katoa oki te Atua ko Iehova e taui vave i te reira. Kare tatou e tau kia tuku i tetai ua atu au tu apa ua ta tatou ka kite i roto i reira kia akariri ia tatou me kare kia akakeu ia tatou kia akono i tetai tu akaapa e te tau kore. Mari ra, kia aru tatou i te tu tiratiratu o Iesu Karaiti.​—1 Petero 2:21.

To Tatou Uaorai Au Tu Apa Ua

9, 10. (a) Akapeea ta Satani akatereanga o te au mea i te akariro anga i to tatou au tu apa ua kia akavare ia tatou ki roto i te tu akono tiratiratu kore? (e) Eaa ta tetai te ka tau kia rave no tei rave aia i tetai ara kino ra?

⁹ Te tauta katoa ra a Satani i te akamaata i te tu tiratiratu kore na te taangaanga anga i to tatou au tu apa ua ra. Te kanga maira tana akatereanga o te au mea nei i to tatou au tu paruparu, ma te timataanga ia tatou kia rave i tei tarevake ra i nga mata o Iehova. E mea mii ra, i te au mataiti ravarai e au tauatini ua atu te topa ra ki te rave anga tau kore. Kua rave tetai papaki i teianei tu tiratiratu kore na te akonoanga i tetai oraanga e rua, na te rave ua atuanga i te tarevake e te akameameaanga e te vaira ei au Kerititiano tiratiratu. Ei pauanga ki te au atikara no teia tumu tuatua i roto i te “Young People Ask . . . ” te au tataanga i roto i te makatini Awake!, kua tata tetai vaine ou: “Te akataka maira te au atikara ra i te tua no toku ora anga.” Na roto i te tu muna, kua tatanu aia i te pirianga oa ma te au mapu kare ra e aroa no Iehova. Ko tei tupu? Kua tata aia: “Kua topa toku ora anga ki raro roa, e kua o atu au ki roto i te ainga tau kore e kua akoia mai au. Kua akakinoia toku pirianga ma Iehova, e kua ngaro ke atu te irinaki anga mei toku nga metua e te aronga pakari katoa oki.”b

¹⁰ Kua tauturuia mai teianei vaine ou e te aronga pakari ra e kua oki akaou aia ki te tavini tiratiratu ia Iehova. Inara, e mea mii, e manganui kua mamae i te au tu kino roa atu, e kare tetai papaki e oki akaou mai ki te koro. Mei teaa ra te meitaki atu kia tiratiratu e kia patoi atu i te timataanga i roto i teianei ao kino nei! E akarongo i te au akamatakite anga mei te au makatini Punanga Tiaki e te Awake! mai no te au tumu mei te pirianga ki teianei ao e te tamataora anga akaviivii ra. Kia kore koe i tetai ua atu taime e topa ki roto i te tu akono tiratiratu kore. Inara me ka topa koe, auraka e akameamea ua i tetai tu kare ra koe i pera ana. (Salamo 26:4) Mari ra, e kimi tauturu. Ko ta te au metua Kerititiano te reira e te aronga pakari oki ka rave.​—Iakobo 5:14.

11. Eaa ra i tarevake ei kia manako ia tatou uaorai ei kino kare e manakonako anga, e eaa te manako no te Pipiria te ka tauturu ia tatou kia akatikatika i to tatou manako?

¹¹ Penei ka akakino to tatou au tu apa ua ia tatou na roto i tetai atu tu. Ko tetai papaki tei rave ra i tetai angaanga tiratiratu kore ka akamutu ua i te tautaanga kia akamareka ia Iehova. E manako ana, kua rave a Davida i te au ara kikino roa. Inara, i muri roa mai i to Davida matenga, kua maaraara a Iehova iaia ei tetai tavini tiratiratu. (Ebera 11:32; 12:1) No teaa ra? No te mea kare aia i akamutu i te tautaanga kia akamareka ia Iehova. Te tuatua ra a Maseli 24:16: “Kia taki itu ua atu te inga anga o te tangata tuatua-tika, e tu akaou mai aia.” E mea tika ra, me ka topa tatou ki roto i etai ara rikiriki​—ae me ka taokioki akaou​—no etai au tu paruparu ta tatou e maro atura, penei te vaira to tatou tu tuatua tika i nga mata o Iehova ra me ka rave ua atu tatou i te “tu akaou mai”​—koia oki, kia tataraara ma te ngakau tae e ka rave akaou ei i tetai aerenga no te tavini anga tiratiratu ra.​—Akaaite ia 2 Korinetia 2:7.

Kia Matakite i te Au Tu Kikite no te Tiratiratu Kore!

12. I to te au Pharisea ra turanga, i akapeea tetai manako anga ketaketa i te pae o te ture i taki atu ei ki te tiratiratu kore?

¹² Te aere katoa maira te tiratiratu kore na roto i te au tu kikite. Penei ka akameamea ua te reira ei tiratiratu! Ei akatauanga, penei kua manako te au Pharisea o to Iesu tuatau ra ia ratou uaorai ei aronga kitea puia e tiratiratu.c Inara kare ratou i kite i te tuke anga i rotopu i tei tiratiratu ra e tetai tei aru ketaketa ra i te au ture tangata, no te mea e ketaketa ratou e te marokiakia no te akavaanga. (Akaaite ia Koheleta 7:16.) I teia tu e tiratiratu kore tikai ratou​—ki te au tangata ta ratou i tau ra kia tavini atu, ki te vaerua o te Ture ta ratou i karanga e te apii ra ratou, e kia Iehova uaorai oki. Ei tuke anga, ko Iesu kua tiratiratu ki te vaerua o te Ture, tei akatumuia ra ki runga i te aroa. E no reira kua akamatutu aia e kua akamaroiroi i te au tangata, kia tau tikai ki ta te au totou no te Mesia i akakite maira.​—Isaia 42:3; 50:4; 61:1, 2.

13. (a) Penei akapeea te au metua Kerititiano e tiratiratu kore ei? (e) Eaa ra ka tau ei te au metua kia kopae ke i te riri kino, te akaapa ua, me kare te manako papu kore i te ako anga i ta ratou tamariki?

¹³ Te puapingaia ra te au Kerititiano e tuanga mana to ratou mei ta Iesu ra akaraanga i roto i teianei tu. Ei akatauanga, te kite ra te au metua tiratiratu e ka tika ratou kia ako i ta ratou tamariki. (Maseli 13:24) Inara ka akapapu ratou e kare ratou e akariri i ta ratou tamariki ma te papa anga kino ma te riri me kare ma te akaapa anga putuputuia. Te au tamariki tei manako ra e kare e rauka ia ratou i te akamareka i to ratou nga metua me kare te manako ra e te akariro ra te akamori anga a to ratou nga metua ia ratou kia akara anake i te apa penei ka riro kia ngakau taitaia e, ei tupu anga, kua akatakakeia mei te akarongo mou ra.​—Kolosa 3:21.

14. Akapeea ta te au tiaki Kerititiano ra akapapu anga i te tiratiratu ki te anana ta ratou e tavini ra?

¹⁴ Mei te reira katoa, te aronga pakari Kerititiano e te au akaaere tutaka ka tamanako atu i te au manamanata e te au tu kino ta te anana e aro atura. Ei au tiaki tiratiratu, ka oronga ratou i te ako anga me te anoanoia ra, ma te akapapuanga e kua rauka ia ratou te au tika katoa na mua e kia akatumu matakite i ta ratou ka tuatua ki runga i te Pipiria e ki runga oki i te au puka a te Taiate. (Salamo 119:105; Maseli 18:13) Te kite katoa ra ratou, e te irinaki mai ra te au mamoe kia ratou no te akamatutu anga e te angaianga i te pae vaerua. No reira ka kimi ratou kia aru ia Iesu Karaiti, koia te Tiaki Meitaki ra. Te akono tiratiratu ra ratou i te au mamoe i te au epetoma tataki tai katoa i te au uipaanga Kerititiano​—kare e turaki ia ratou ki raro mari ra, ka akamatutu atu ia ratou e ka akamaroiroi atu i to ratou akarongo.​—Mataio 20:28; Ephesia 4:11, 12; Ebera 13:20, 21.

15. I akapeea tetai papaki i te anere mataiti mua ra akaari anga e au tiratiratu tarevake to ratou ra?

¹⁵ Ko tetai atu tu kikite no te tiratiratu kore ko te tiratiratu tei tuku tarevakeia. Ko te tiratiratu mou i te tu tau i te Pipiria ra kare e akatika kia tuku tatou i tetai ua atu kauraro anga ki mua ake i to tatou tiratiratu ki te Atua ko Iehova ra. E manganui te au ngati Iuda i te anere mataiti mua ra tei mou piri tikai ki te Ture a Mose e ki te akatereanga ngati Iuda no te au mea ra. Inara kua tae mai te tuatau kia nekeia tana akameitakianga mei tona iti tangata meameaau ra ki te iti tangata Iseraela vaerua ra. E toko iti ua tei tiratiratu kia Iehova e tei akono i teianei tauianga viviki ua. Noatu rai i roto i te au Kerititiano mou ra, kua maro tetai papaki o te aronga ngati Iuda ra kia oki akaou ki taua au “apiianga mua rikiriki tika kore” ra no te Ture a Mose, tei akaotiia ra i roto ia Karaiti.​—Galatia 4:9; 5:6-12; Philipi 3:2, 3.

16. Akapeea te au tavini tiratiratu o Iehova ra i te akarongo anga ki te au akatikatika anga ra?

¹⁶ Ei tuke anga, kua akapapu te au tangata o Iehova i teia tuatau nei ia ratou uaorai kia tiratiratu i te au tuatau no te taui anga. I te tupu anga te marama o te tuatua mou akakiteia maira kia kaka, kua raveia te au akatikatika anga. (Maseli 4:18) I mua ua akenei, kua tauturu mai “te tavini akono meitaki e te pakari” ia tatou kia akameitaki i to tatou kiteanga i te tuatua “uki” tei taikuia ra ia Mataio 24:34 e te tuatau no te akataka anga i “te mamoe” e “te puaka-nio” tei taikuia ra ia Mataio 25:31-46, pera katoa oki to tatou manako anga no etai tu no te angaanga tauturu i te tangata. (Mataio 24:45) Kare e ekoko anga ka mareka etai o te aronga apoteiti me ka mou ketaketa te Au Kite o Iehova e manganui ki to ratou kiteanga mua i taua au tumu ra e kia kore e akatika kia tere ki mua. Kare ra te reira tu i tupu ana. Eaa te tumu? No te tiratiratu oki te au tangata o Iehova ra.

17. Penei ka akapeea ta tatou au akaperepere i te tuku anga i to tatou tiratiratu kia timataia i etai taime?

¹⁷ Inara, penei ko te tumu no te tiratiratu tei tuku tarevakeia ka tuki piri vaitata atu ki te kainga. Me ka iki tetai oa akaperepereia me kare penei tetai mema o te pamiri i tetai aerenga te aati ra i te au kaveinga Pipiria, penei ka manako tatou e kua vee to tatou tu tiratiratu. E mea matauia, e ka manako tiratiratu tatou ki te au mema pamiri. Inara auraka tatou e tuku i to tatou kauraro anga kia ratou ki mua ake i to tatou tu tiratiratu kia Iehova ra! (Akaaite ia 1 Samuela 23:16-18.) Kare katoa tatou e tauturu i te aronga rave tarevake kia uuna i tetai ara kino kare katoa e turu ia ratou kia patoi atu i te aronga pakari tei tauta ra kia ‘akaora ia ratou ma te ngakau maru ra.’ (Galatia 6:1) Ko te rave i te reira ka riro ei tiratiratu kore kia Iehova, ki tana akaaerenga, e tetai tei akaperepereia ra. Teia oki te tu, ko te tuanga i rotopu i tetai tei rave ara ra e te ako anga te umuumuia ra nona, te riro ra, kia arai i tetai akakite anga i to Iehova aroa kia kore e itae atu kiaia. (Ebera 12:5-7) Kia maara, katoa oki, e “e mea meitaki te putaputa no te taunga.” (Maseli 27:6) Te ako anga aroa tika tikai, tei akatumuia ra ki runga i te Tuatua a te Atua penei ka akaputa i te ngakau parau o tetai akaperepere tei apa ra, inara penei ka riro ei akaora anga i te tuatau roa ki mua!

Ka Tu Ua te Tiratiratu Noatu te Takinokino Anga

18, 19. (a) Eaa ta Ahaba i anoano mai ia Nabota ra, e eaa ra a Nabota i kore ei e akatika? (e) I tau ainei to Nabota tiratiratu no tana tutaki anga? E akataka mai.

¹⁸ I etai taime e tika tika mai ta Satani au takinokino anga i to tatou tu tiratiratu. E akamanako i te tu oa Nabota ra. I ta te Ariki ko Ahaba ra taomianga iaia kia oko i tona kainga vine, kua pau atura aia: “Kia tāpu mai a Iehova iaku, auraka au e oronga atu i te kainga ipukarea o toku ai metua noou.” (1 Ariki 21:3) Kare a Nabota i te marokiakia; kua tiratiratu ra aia. Kua ikuiku te Ture a Mose e auraka tetai ngati Iseraela e oko i te ipukarea enua ei oko akariro roaia. (Levitiku 25:23-28) Kua kite pu tikai a Nabota e ka ta teianei ariki kino iaia, no te mea kua tuku ke ana a Ahaba i tana vaine, ia Iezebela, kia ta i te au peroveta a Iehova e manganui ra! Inara kua tu ngaueue kore a Nabota.​—1 Ariki 18:4.

¹⁹ I etai taime te papa maira tetai tutaki anga no te tiratiratu. Ma te tauturu anga a te “toko rua puke tangata kanga,” kua pikikaaia a Nabota e Iezebela no tetai kino kare ra aia i rave. Ei tetai tupu anga, kua tamateia aia ma tana nga tamaroa katoa. (1 Ariki 21:7-16; 2 Ariki 9:26) Te riro ra ainei te aiteanga e kua tarevake to Nabota ra tu tiratiratu? Kare! Ko Nabota tei roto i te au tangata e te au vaine tiratiratu e manganui ‘te ora ra’ i roto i to Iehova manako i teianei tikai, te moe meitaki ra i roto i te tanumanga kia tae roa ki te tuatau no te tuakaouanga.​—Luka 20:38; Angaanga 24:15.

20. Akapeea te manakonako anga i te tauturu anga ia tatou kia tamou marie i to tatou tiratiratu?

²⁰ Ko taua au taputou ra te oronga maira i te akapapu ki to Iehova ra aronga tiratiratu i teia tuatau nei. Te kite ra tatou e penei ka maata te tutaki no to tatou tiratiratu i roto i teianei ao. Kua tutaki a Iesu Karaiti no tona tu tiratiratu ma tona oraanga, e kua akakite aia ki tana au pipi e kare e meitaki mai te akono anga no ratou. (Ioane 15:20) I te mea na tona manakonako anga no te tuatau ki mua i akamaroiroi iaia, ka pera katoa to tatou i te akamaroiroi ia tatou. (Ebera 12:2) E no reira ka rauka ia tatou kia vai tiratiratu i te aro atuanga i te au tu takinokino anga ravarai.

21. Eaa te au akapapu anga ta Iehova i oronga ki tona aronga tiratiratu ra?

²¹ E tika, e toko iti ua o tatou i teia tuatau te tamamaeia ra na taua au takinokino anga no to tatou tiratiratu. Inara penei ka aro atu te au tangata o te Atua kia tere atu te takinokino anga i mua ake i te taenga mai te openga ra. Akapeea e papu ei ia tatou i te tamou marie i to tatou tiratiratu? Na te vai tamou anga i to tatou tiratiratu i teianei. Kua oronga mai a Iehova kia tatou i tetai angaanga meitaki​—te tutuanga e te apiianga no runga i tona Patireia. Kia vai tiratiratu marie tatou i te rave anga i teianei angaanga puapinga maata. (1 Korinetia 15:58) Me ka kore tatou e akatika kia tuku i te au tu apa o te tangata nei kia akakino i to tatou tiratiratu ki ta Iehova ra akaaerenga e me ka paruru atu tatou i te au tu kikite no te tiratiratu kore mei te tuku anga tarevake i te au tu tiratiratu ra, ei reira ka papa meitaki atu tatou me ka timata maataia mai to tatou tiratiratu. I roto i tetai ua atu tu, ka papu ia tatou i te au tuatau ravarai e kare e puapinga kore to Iehova ra tiratiratu ki tona au tavini tiratiratu ra. (2 Samuela 22:26) Ae, ka paruru aia i tona aronga tiratiratu!​—Salamo 97:10.

[Au Tataanga Rikiriki i Raro]

Akapeea Koe me Pau?

◻ Akapeea e raukaʼi ia tatou te kopae i te tuku anga i te au tu apa ua o etai ke kia taki atu ia tatou kia tiratiratu kore?

◻ Na teea au mataara to tatou uaorai tu apa ua e taki atu ei ia tatou ki te tu akono tiratiratu kore?

◻ Akapeea e raukaʼi ia tatou te arai atu i te manako kia tuku tarevake i to tatou au tu tiratiratu?

◻ Eaa te ka tauturu ia tatou kia tamou marie i to tatou tiratiratu noatu i roto i te au tuatau takinokino anga?

[Pia i te kapi 9]

Tavinianga Tiratiratu i Betela

“E rave ra te au mea ravarai ma te tika e te [“akanoonoo anga,” NW].” Ta te apotetoro ko Paulo i tata. (1 Korinetia 14:40) Kua kite a Paulo e no tetai putuputuanga kia angaanga meitaki, ka umuumuia te “akanoonoo anga,” no te akaaerenga. Mei te reira katoa i teia tuatau, ka anoanoia te aronga pakari kia tuku i te au tika no te au akapapa anga, mei te akatakaanga i te au mema o te putuputuanga ki te au ngai apii anga puka ke ke, te akapapaanga i te au uipaanga no te angaanga tutu aere, e te akaraanga i te ngai kua oti. Penei i etai taime ka akatupu taua akanoonoo anga ra i etai au timataanga no te tiratiratu. Kare te reira i te au akauenga akauruia i te tu-Atua, e kare ratou e tau ki te akamareka anga no te aronga takitai ravarai.

Te kite ra ainei koe i te reira ei akaaoanga, i etai taime, kia tiratiratu ki etai o te au akanoonoo anga tau tei raveia i roto i te putuputuanga Kerititiano ra? Me koia ia, penei ka kitea e koe te akaraanga a to Betela ei mea tauturu. Ko te ingoa Betela, e tuatua Epera tona aiteanga “Are o te Atua,” te orongaia ra ki te 104 au manga o te Taiate Punanga Tiaki, kapiti katoa te opati maata o te U.T. ra.* Te aronga rave angaanga ua tei noo e tei angaanga i te au ngai i Betela ra ka anoanoia i teianei au ngai kia akaata mai i te tu tapu e te mataku no Iehova. Te umuumu ra teia i te tu tiratiratu mei te aronga takitai ra.

E putuputu te aronga aere ki Betela i te tuatua no te papa meitaki e te tu ma ta ratou i kite i reira. Kua papa meitaki te aronga angaanga e te mataora ra; ta ratou tuatua anga e te tu akono e pera katoa to ratou akara anga te akaata maira i te pakari, e te au akava ngakau Kerititiano tereniia i te Pipiria. Te au mema katoatoa o te pamiri Betela te akono tiratiratu ra kia tau ki te au turanga o te Tuatua a te Atua ra.

Kapiti katoa oki, te orongaia ra e te Pupu Akaaere kia ratou tetai puka ko te ingoa Dwelling Together in Unity, tei akanoo takinga meitaki maira i etai akanoonoo anga tau tei anoanoia ra no taua pamiri maata ra kia meitaki te angaanga kapiti anga. (Salamo 133:1) Ei akatauanga, te akara ra i te au pia moe anga, te kaikai anga, te tu ma, te kakau e te akamaneaanga, e etai atu tu mei te reira. Te turu tiratiratu ra te au mema pamiri Betela e te aru ra i taua au akanoonoo anga, noatu e penei ka taki atu to ratou uaorai au inangaro ia ratou ki tetai aratakianga ke. Te manako ra ratou i teia puka akapapaanga, kare ei tetai akaputu anga au ture e te au ikuiku anga anu, mari ra ei tetai akanooanga arataki anga akapapaia kia akatupu i te taokotai anga e te tu rotai oki. E tiratiratu te au akaaere i te mouanga i teianei au ravenga akatumuia i te Pipiria, e te taangaanga ra ia ratou i roto i te tu tau kia akamatutu e kia akamaroiroi i te pamiri Betela kia aruaru i ta ratou angaanga tapu i Betela ra.

* Kare teia au vakatori, opati, e te au ngai noo anga i akatutu mai i te iero vaerua maata o te Atua ra, me kare i tona are. Ko te iero vaerua o te Atua ra tana akanoonoo anga ia no te akamori anga ma. (Mika 4:1) Ei te reira, kare ia i kotingaia ki tetai ua atu are maaniia ki runga i te enua nei.

[Pia i te kapi 10]

Te Tangata Tiratiratu e te Tangata Akono Ture

I te 1916 kua akakite mai te Encyclopædia of Religion and Ethics e “ko teia takake anga i rotopu i te tangata tiratiratu e te tangata akono i te ture penei ka kitea i te au taime ravarai e i te au ngai ravarai.” Kua akataka mai te reira: “Te vai ra te tangata akono i te ture tei rave ra i tei akaueia kiaia, kare e aati ture; te akarongo ra aia i te tuatua tei tataia ra e ka rauka kia tatauia. Te vai ra te tangata tiratiratu te rave ra i teia inara ka rauka . . . kia irinakiia no te maata atu, tei tuku ra i tona manako katoa ki roto i tana angaanga, tei akapapa ra i tona vaerua kia tau ma te vaerua o te akakoro anga kia raveia.” I muri iora, kua kite teianei angaanga tikai: “Ko te tiratiratu e maata roa atu ia i te akonoanga ture. . . . Te akatakaia ra te tangata tiratiratu mei te tangata akono ture ra ei tetai tei tavini ra ma te ngakau katoa e te manako oki . . . Kare e rave ua i te au ara no te angaanga, te rave kore, me kare te tu kite kore kare ra aia e akatika iaia uaorai kia o atu.”