E Tatau i te Tuatua a te Atua e Tavini Iaia ma te Tuatua Mou
“E apii mai koe, e Iehova, i toou ra arataa, kia aere au i taau ra tuatua-mou.”—SALAMO 86:11.
1. I te akatumuanga, eaa ta te itiu mua o teianei makatini i tuatua mai no runga i te tuatua mou?
TE AKAKITE maira Iehova i tona marama e te tuatua mou. (Salamo 43:3) Te oronga katoa maira aia i te kite kia tatau i tana Tuatua, koia te Pipiria, e kia apii i te tuatua mou. Kua tuatuaia i te itiu mua o teianei tianara—Tiurai 1879—e: “Te tuatua mou, mei tetai tiare meangiti ua i roto i te metepara o te oraanga, tei koropiniia ra e kua vaitata i te pokia e te tupu anga ruperupe o te au teita o te pikikaa ra. Me ka kitea e koe te reira e mea tika te akara matakite ra koe. Me kite anake koe i tona manea ka tika koe kia kopae ke atu i te au teita o te pikikaa e te au tataramoa no te marokiakia e nona te akonoanga tika. Me ka anoano koe kia rauka ia koe te reira ka tika koe kia piko atu kia rauka mai ei. Auraka ra e mareka ua i te tiare okotai no te tuatua mou. Naringa i rava ua te okotai ra kare e angaia mai etai atu. E akaputu ua atu, e kimi kia maata atu.” Na te tatauanga e te apiianga i te Tuatua a te Atua ka rauka ia tatou kia akaputu i te kite tika e kia aere i te tuatua mou nana ra.—Salamo 86:11.
2. Eaa tei tupu i ta Ezera ratou ko etai atura tatau anga i te Ture a te Atua ki te au ngati Iuda i Ierusalema i taito ra?
2 I muri ake i te patu akaou anga te au paruru o Ierusalema i te 455 M.T.N., kua tatau atu te taunga ko Ezera ratou ko etai atu i te Ture a te Atua ra ki te au ngati Iuda. Kua aruia mai teia na tetai Oroa Patia Anga Puakapa rekareka, te aaki anga i te au ara, e kua akaotiia “tetai koreromotu maroiroi.” (Nehemia 8:1–9:38) Ka tatau tatou e: “Tatau taka meitaki iora ratou i taua buka ra i te ture a te Atua, e kua akakite i te ariteanga, e kite akera ratou i tei tatauia ra.” (Nehemia 8:8) Kua manako tetai papaki e kare te au ngati Iuda i kite meitaki i te reo Epera e kua raveia te akatakaanga i te reo Arama. Inara kare te irava ra i akakite mai i te akataka anga ua i te reo tuatua anga. Kua akamarama mai a Ezera ratou ko etai atura i te Ture kia rauka i te au tangata kia mou i tona au kaveinga e te taangaanga ia ratou. Te rave katoa nei te au puka Kerititiano e te au uipaanga i te ‘akakiteanga i te ariteanga ki roto’ i te Tuatua a te Atua ra. Te rave katoa nei te aronga pakari akataoongaia ra i te reira, ko tei “tau oki kia apii” mai.—1 Timoteo 3:1, 2; 2 Timoteo 2:24.
Au Puapinga Mutu Kore
3. Eaa etai puapinga no te tatauanga i te Pipiria ra?
3 Me tatau kapiti te au ngutuare tangata Kerititiano i te Pipiria, e mea tau ka kite ratou i te au puapinga mutu kore. Ka riro kia kite ratou i te au ture a te Atua e ka kite i te tuatua mou no te au apiianga, te au tumu totou, e etai atu au tumu oki. I muri ake i te tatau anga i tetai tuanga o te Pipiria, penei ka ui te upoko o te ngutuare: Akapeea te tupu anga tau no teia kia tatou? Na roto i teea tu te pirianga o teia ki etai atu apiianga Pipiria ra? Akapeea tatou me taangaanga i teianei au tumu i te tutuanga i te tuatua meitaki? Ka rauka i te ngutuare tangata kia oonu atu te kite i te tatauanga i te Pipiria me ka rave ratou i te kimikimi anga i te Watchtower Publications Index me kare i etai atu au puka. Ka puapinga katoa oki nga voriumu e rua o te Insight on the Scriptures kia akaraia ma te au puapinga.
4. Akapeea a Iosua i te akonoanga i te apiianga tei tataia ia Iosua 1:8?
4 Ka rauka i te au kaveinga no roto mai i te au Tuatua Tapu kia arataki ia tatou i te oraanga. Pera katoa oki, na te tatauanga e te apiianga ‘i te tuatua tapu i tataia ra, ko te tuatua ïa e pakari ei tatou e tae ua atu ki te ora.’ (2 Timoteo 3:15) Me tuku tatou na te Tuatua a te Atua e arataki ia tatou, ka aere ua atu tatou i tana tuatua mou e ka tupu to tatou anoano tuatua tika. (Salamo 26:3; 119:130) Inara, ka anoanoia tatou kia kimi i te kite marama, mei ia Iosua, te komono ia Mose ra. Auraka te “buka ture” ra kia taka ke atu i roto i tona vaa, e kia tatau aia i te reira i te ao e te po. (Iosua 1:8) Auraka e taka ke te “buka ture” i tona vaa tera te aite anga e auraka a Iosua e akamutu i te tuatuaanga kia etai atura i te au apinga akamarama ta te reira i tuatua. Te aite anga o te tatauanga i te Ture i te ao e te po kia tamanako oonu a Iosua i te reira, kia apii i te reira. Kua raurau katoa te apotetoro ko Paulo ia Timoteo “ka akamanako tikai”—kia tamanako oonu—i tona tu akono, tana angaanga orometua, e te apiianga. Ei tetai Kerititiano pakari, kua umuumuia a Timoteo kia matakite tikai e e meitaki tona oraanga e te apii ra aia i te tuatua mou no te Tuatua Tapu.—1 Timoteo 4:15.
5. Eaa te anoanoia ra me kia kiteia e tatou te tuatua mou a te Atua ra?
5 E apinga oko maata te tuatua mou a te Atua ra. Te umuumuia ra te koanga i te kimi anga i te reira, te kimi tamou marieanga i te au Tuatua Tapu. Ei te tu tamariki apiiia anake na te Puapii Mekameka ra e rauka ia tatou te pakari e kia kite meitaki i te mataku tapu ia Iehova ra. (Maseli 1:7; Isaia 30:20, 21) Inara, ka tau tatou kia akapapu i te au apinga ma te Tuatua Tapu ra. (1 Petero 2:1, 2) Ko te au ngati Iuda i Berea “e maata rava to ratou meitaki i to Tesalonia, kua āriki ua oki ratou i te tuatua ma te ngakau maora, e te kimi anga i te tuatua i tataia ra, i te tau anga oki i taua tuatua ra [tei tuatuaia e Paulo], kare e rā i tukua.” Kua akameitakiia atura to Berea kare ra i akoia atu ia ratou no te raveanga i teia.—Angaanga 17:10, 11.
6. Eaa ra a Iesu i akakite ei e kare tetai papaki o te au ngati Iuda ra i puapingaia i te kimi anga i te au Tuatua Tapu ra?
6 Kua tuatua atura Iesu ki tetai papaki ngati Iuda ra: “Ka kimi marie i te au tuatua i tataia ra; no te mea, te manako ra kotou ka rauka te ora mutu kore i reira: na ratou ra oki e akakite ïa iaku ra. Kare ra kotou e aere mai kiaku nei i te ora no kotou.” (Ioane 5:39, 40) Kua kimi ratou i te au Tuatua Tapu ma te manako tika—e kia arataki ia ratou ki te ora. E tika, tei roto i te au Tuatua Tapu te au totou no te Mesia tei tou atura kia Iesu ei te tumu anga no te ora. Inara kua kopae ke te au ngati Iuda iaia. Kare ratou, i reira, i meitaki i ta ratou kimianga i te au Tuatua Tapu ra.
7. Eaa te umuumuia ra kia tupu ei i te kiteanga i te Pipiria ra, e no teaa ra?
7 E tupu ei to tatou kiteanga i te Pipiria, ka anoano tatou i te arataki anga a te vaerua o te Atua, me kare tona mana rave angaanga. “E kimi oki te Vaerua i te au mea katoa nei, e te au mea oonu rai o te Atua ra” kia apai mai i to ratou aiteanga. (1 Korinetia 2:10) Kua anoanoia te au Kerititiano i Tesalonia kia “akara matariki marie i te au mea katoa ra” i roto i tetai ua atu totou ta ratou i akarongo atura. (1 Tesalonia 5:20, 21) Ia Paulo i tataʼi ki to Tesalonia (vaitata i te 50 T.N.), ko te tuanga anake o te au Tuatua Tapu Ereni tei oti i te tataia ko te evangeria a Mataio. No reira ka rauka i to Tesalonia e to Berea i te akara matariki marie i te au mea katoa ra penei na te akaraanga i te urianga Septuagint i te reo Ereni no te au Tuatua Tapu Epera ra. Kua tau ratou kia tatau e kia apii oki i te au Tuatua Tapu, e te pera katoa nei oki tatou.
E Puapinga Maata no te Katoatoa
8. Eaa ra i tau ei kia meitaki roa te kite o te aronga pakari akataoongaia ra i te Pipiria?
8 E mea tau kia kite meitaki i te Pipiria te aronga pakari akataoongaia ra. Ka tika ratou kia “tau kia apii” e ‘kia tāpu piri tikai i te tuatua mou.’ Kua anoano katoaia te akaaere ko Timoteo ‘kia tika i te tua anga i te tuatua mou ra.’ (1 Timoteo 3:2; Tito 1:9; 2 Timoteo 2:15) Kua apii tona metua vaine ko Eunike e tona tupuna vaine ko Loi iaia i te au tataanga tapu mei tona tamaiti anga mairai, kua akatamou i te ‘akarongo pikikaa kore’ ki roto iaia, noatu rai e akarongo kore tona metua tane ra. (2 Timoteo 1:5; 3:15) E akono te au metua akarongo i ta ratou anaunga “e apii ra ia ratou kia pakari ma te ako a te Atua ra,” e kia maata atu oki te aronga pakari e au metua tane ra no “te tamariki akarongo, kare i tapepeia i te kaimoumou, e te akongata.” (Ephesia 6:4; Tito 1:6) Noatu rai eaa to tatou turanga, i reira, ka tau tatou kia manako marie i tei umuumuia kia tatau, kia apii, e kia akono i te Tuatua a te Atua.
9. Eaa ka meitaki ei kia apii kapiti i te Pipiria ma te au taeake Kerititiano ra?
9 Ka tau katoa oki tatou kia apii kapiti i te Pipiria ma te au taeake akarongo ra. Kua anoano a Paulo kia uriuri manako te au Kerititiano o Tesalonia i tana apii anga tetai ma tetai. (1 Tesalonia 4:18) Ei akakokoi i to tatou kite i te tuatua mou, kare e apinga meitaki atu i te kapitianga ma etai atu aronga apiiia ra i te akara matatioanga i te au Tuatua Tapu ra. E tika ra te materi ra e: “Na te auri i akakina i te auri; e na te tangata e akakino i te mata o tona taunga.” (Maseli 27:17) Ka tutae auriia tetai apinga auri me ka kore e taangaangaia e kia akakinaia. Mei te reira katoa, ka anoanoia tatou kia uipa putuputu e kia akakina tetai i tetai na te tuaanga i te kite ta tatou i rauka i te tatauanga, te apiianga, e te manako oonuanga ki runga i te Tuatua a te Atua no te tuatua mou. (Ebera 10:24, 25) Pera katoa, ko teia tetai mataara no te akapapu anga e ka puapingaia tatou mei te au kaka anga o te marama vaerua ra.—Salamo 97:11; Maseli 4:18.
10. Eaa te aite anga e kia aere na te tuatua mou ra?
10 I ta tatou apii anga i te au Tuatua Tapu, ka tau tatou kia pure ki te Atua mei ta te tata taramo ra: “E akakite ua mai i to mārama e te tuatua-mou; e na te reira e arataki iaku nei.” (Salamo 43:3) Me te anoano ra tatou i to te Atua mareka anga, ka tika tatou kia aaere i tana tuatua mou ra. (3 Ioane 3, 4) Te kapiti ra teia i te akonoanga i tana au umuumu anga e te tavinianga iaia ma te tiratiratu e te ngakau tae. (Salamo 25:4, 5; Ioane 4:23, 24) Ka tika tatou kia tavini ia Iehova ma te tuatua mou, tei akakiteia mai ra i roto i tana Tuatua e te akatakaia maira i roto i te au puka a “te tavini akono meitaki e te pakari.” (Mataio 24:45-47) Te umuumu ra teia i te kite tika i te au Tuatua Tapu. Akapeea, i reira, ta tatou tatau anga e te apii anga tau i te Tuatua a te Atua? Ka tau ainei kia akamata atu tatou i te tatauanga mei ia Genese pene 1, irava 1, e aere ua atu i te au 66 puka katoa? Ae, te au Kerititiano ravarai tei ia ratou ra te Pipiria katoa i to ratou reo ka tau kia tatau i te reira mei ia Genese mai kia Apokalupo. Ko ta tatou akakoro anga i te tatauanga i te Pipiria e te au puka Kerititiano ka tau e kia akatupu i to tatou kite marama i te akaputu anga maata o te tuatua mou no te Tuatua Tapu ta te Atua e oronga maira na roto i te ‘tavini akono meitaki.’
E Tatau Reo Maata i te Tuatua a te Atua
11, 12. Eaa ra i puapingaiaʼi kia tatau i te Pipiria i te au uipaanga ma te reo maata?
11 Penei ka tatau muteki ua tatou me ko tatou anake ua. Inara, i te tuatau i taito ra, kua raveia te tatauanga ko koe anake ua ma te reo maata. Mei te eunuka Etiopia iaia e aere ra i rungao i tana kariota, e akarongo atura a Philipa te tangata tutu evangeria ra iaia i te tatau anga i ta te peroveta ko Isaia ra totou. (Angaanga 8:27-30) Ko te aite anga o te tuatua Epera tei uriia ra e “tatau” koia oki kia “kapiki.” No reira ko te aronga kare e kite i te aite anga o te tatauanga muteki ua kare e tau kia manonoia kia kore e tatau i te tuatua tataki tai ma te reo maata ra. Ko te apinga maata kia kite i te tuatua mou na te tatauanga i te Tuatua tataia a te Atua ra.
12 E mea puapinga kia tatauia te Pipiria ma te reo maata i te au uipaanga Kerititiano ra. Kua raurau atu ra te apotetoro ko Paulo i tona oa rave angaanga ia Timoteo: “E akamaroiroi rai i te tatau i te tuatua, e te ako, e te apii.” (1 Timoteo 4:13) Kua tuatua atu a Paulo ki to Kolosa: “E kia oti teianei leta i te tatauia i rotopu ia kotou na, e akaue atu oki kotou kia tatau katoaia i te ekalesia i Laodikea ra, e kia tatau katoa kotou i to Laodikea maira.” (Kolosa 4:16) E ia Apokalupo 1:3 te karanga ra: “E ao tona to tei tatau, e to te aronga e akarongo i teianei tuatua totou, e tei akono i tei tataia ki roto ra: kua vaitata oki te tuatau.” No reira, ka tau tei tuatua ra i te ngai tangata kia tatau i te au irava no te Pipiria maira ei turu i tana tuatua ki tetai putuputuanga ra.
Apii Anga ma te Ravenga Tumu Akapapaia
13. Eaa te ravenga meitaki maata no te apiianga i te au tuatua mou Pipiria ra, e eaa te ka tauturu ia tatou i te kimi anga i te au Tuatua Tapu ra?
13 Te apii anga ma te tumu akapapaia ko te ravenga meitaki maata ia no te apiianga i te au tuatua mou no te Tuatua Tapu ra. Te au akapapaanga, tei papa ra i te au tuatua Pipiria kia tau ki te akapapaanga piapa i to ratou ngai kia tau ki te puka, te pene, e te irava, te akariro ra kia ngoie ua te kimi anga au irava te piri atura ki tetai tumu tuatua. E ka rauka taua au tuatua tapu ra kia akarotaiia ma etai atu no te mea kare te Pu o te Pipiria e patoi iaia uaorai. Na te vaerua tapu, kua akauru aia i etai 40 tangata kia tata i te Pipiria i roto i te tuatau e 16 anere mataiti, e na te apiianga i te reira ma te tumu akapapaia ko tetai mataara timataia ia no te apiianga i te tuatua mou ra.
14. Eaa ka meitaki ei kia apii kapiti i te au Tuatua Tapu Epera e e to te Ereni Kerititiano katoa ra?
14 Ka tau to tatou ariki anga i te tuatua mou o te Pipiria kia akakeu ia tatou kia tatau e kia apii i te au Tuatua Tapu Ereni Kerititiano ma te au Tuatua Tapu Epera oki. Na teia e akaari e akapeea te au Tuatua Tapu Ereni i te kapiti anga ma te akakoro anga a te Atua ra e ka akakaka atu i te marama ki runga i te au totou Tuatua Tapu Epera ra. (Roma 16:25-27; Ephesia 3:4-6; Kolosa 1:26) Tetai tauturu tikai i teia tu ko te New World Translation of the Holy Scriptures. Kua teateamamaoia te reira e te au tavini akatapuia o te Atua ra tei akono ra i te kite tupu maata te rauka maira no runga i te au irava Pipiria akamata anga pera katoa oki tona akapapaanga e te au taiku anga i te reo ra. E mea puapinga, katoa, te au tauturu apii Pipiria ta Iehova i oronga maira na roto i “te tavini akono meitaki e te pakari.”
15. Akapeea koe i te akapapu anga e e mea tau kia taiku i konei e i ko ra i roto i te Pipiria?
15 Penei ka tuatua tetai papaki, ‘e au tauatini ua atu taiku anga i te Pipiria i roto i ta kotou au puka, inara eaa kotou i rave mai ei i te reira mei konei e mei ko maira?’ Na te taikuanga mei konei e mei ko maira i roto i te 66 au puka o te Pipiria ra, te rave maira te au puka e manganui te au kite akauruia kia akapapu i te tuatua mou o tetai apiianga. Kua taangaanga a Iesu uaorai i teia ravenga no te apii anga. I tana oronga anga i tana Tuatua i te Maunga ra, e 21 ana taiku anga mei te au Tuatua Tapu Epera maira. E toru taiku anga i taua tuatua ra no Exodo mai, e rua no Levitiku, e okotai no Numero, e ono no Deuteronomi mai, e okotai no te Buka Rua a te Au Ariki mai, e a no te Taramo, e toru no Isaia, e okotai no Ieremia mai. Na te raveanga i teia, te ‘tamata ra ainei a Iesu i te akapapu i tetai ua atu apinga’? Kare, no te mea ‘i apii aia mei tetai tangata ma te mana, e kare mei ta te tata tuatua ra.’ Kua pera aia no te mea kua turu a Iesu i tana apiianga ma te mana o te Tuatua tataia a te Atua ra. (Mataio 7:29) Kua rave pera katoa oki te apotetoro ko Paulo.
16. Eaa te au taiku anga Tuatua Tapu ta Paulo i rave ia Roma 15:7-13?
16 I roto i te tuatua tapu tataia ia Roma 15:7-13, kua taiku maira Paulo no nga tuanga Tuatua Tapu Epera e toru—te Ture, te au Peroveta, e te au Taramo. Kua akakite mai aia e ka akakaka te au ngati Iuda e te au Kenitara i te Atua, e no reira ka tau te au Kerititiano kia turou atu i te au tangata no te pa enua ravarai. Kua na ko maira Paulo: “E teianei ka āriki kotou ia kotou uaorai, mei te Mesia i āriki mai ia tatou nei, kia kakā te Atua. Teia taku tuatua e rave angaanga a Iesu Mesia no te peritome kia kitea te tuatua-mou a te Atua, kia tupu te tuatua i tuatuaia mai i te aronga tupuna ra; E kia akameitaki te etene i te Atua i tona aroa; koia oki tei tataia ra [ia Salamo 18:49]: ‘E teianei e akameitaki au ia koe i rotopu i te au etene ra, e imene akapaapaa rai au i toou ingoa.’ Te na ko ra oki [ia Deuteronomi 32:43]: ‘Ka rekareka, e te au etene, e tona katoa au tangata.’ E te na ko akaou ra oki [ia Salamo 117:1]: ‘E akameitaki ia Iehova, e te au etene katoa e, e akapaapaa iaia, e te au tangata katoa na.’ Te na ko maira oki a Isaia [11:1, 10]: ‘E kitea mai tetai aka o Iese, ko te ka tupu ei ariki no te etene, ei iaia e irinaki ei te etene.’ Kia akakiia mai kotou i te rekareka ravarai e te au i te akarongo anga, e te Atua e raukaʼi te irinakianga; kia maata to kotou irinaki i te mana o te Vaerua Tapu ra.” Na teianei ravenga akapapa anga tumu, kua akakite maira Paulo e akapeea te taiku anga i te au tuatua tapu ei akanoo anga i te au tuatua mou o te Pipiria ra.
17. Kia rotai ma teea ravenga i taiku ei te au Kerititiano i konei e i ko ra i roto i te Pipiria katoa?
17 E 34 au taiku anga a te reta mua a te apotetoro ko Petero tei akauruia ra mei roto mai i nga puka tai ngauru o te Ture ra, te au Peroveta, e te au Taramo oki. I te rua o tana reta, kua taiku maira Petero e ono taime no roto mai i nga puka e toru. I te Evangeria a Mataio e 122 au taiku anga no roto mai ia Genese kia Malaki. I roto i te 27 au puka o te au Tuatua Tapu Ereni, e 320 au taiku anga tika tika maira no roto mai ia Genese kia Malaki e etai au anere atu akakite anga i te au Tuatua Tapu Epera. Kia rotai atu ma te ravenga mua tei akanooia e Iesu e tei aruia e tana au apotetoro, me ka rave te au Kerititiano i tetai apii anga i akapapaia no tetai tumu Tuatua Tapu, ka taiku mai ratou mei konei e mei ko mai i roto i te Pipiria katoa ra. E mea tau tikai teia i te “tuatau openga” nei, i te akatupu angaia te maata anga o te au Tuatua Tapu Epera e te Ereni katoa oki. (2 Timoteo 3:1) Te taangaanga ra te ‘tavini akono meitaki’ i taua ravenga ra i roto i tana au puka, inara kare roa ia e topiri mai i tetai tuatua ki te Tuatua a te Atua ra e kare katoa oki e kiriti ke atu i tetai tuatua mei reira.—Maseli 30:5, 6; Apokalupo 22:18, 19.
E Aaere Tamou Marie i te Tuatua Mou
18. Eaa i tau ei ‘kia aere tatou na te tuatua mou’?
18 Auraka rava tatou e kiriti ke atu i tetai apinga ki vao i te Pipiria, no te mea ko te katoa anga o te au apiianga Kerititiano i roto i te Tuatua a te Atua ra ko “te tuatua-mou” me kare “te tuatua-mou o te evangelia.” Ko te aru anga i teia tuatua mou—te “akono anga” i roto i reira—e mea puapinga ia no te ora. (Galatia 2:5; 2 Ioane 4; 1 Timoteo 2:3, 4) I te mea ko te akonoanga Kerititiano “te arataa tuatua-mou ra,” na te tauturuanga ia etai ke ra ka akatere atu tatou i tona meitaki, ka riro tatou “ei aronga rave angaanga katoa i te tuatua-mou.”—2 Petero 2:2; 3 Ioane 8.
19. Akapeea e raukaʼi ia tatou kia tamou marie i ‘te aere na te tuatua-mou’?
19 Me ‘te aere ra tatou na te tuatua-mou,’ ka tika tatou kia tatau i te Pipiria e ka tuku ei ia tatou uaorai ki roto i te tauturu i te pae vaerua ta te Atua e oronga maira na roto i te ‘tavini akono meitaki.’ (3 Ioane 4) E rave tatou i teia ei meitaki no tatou uaorai e kia tau ei kia apii atu ia etai ke ra no runga i te Atua ra ko Iehova, e Iesu Karaiti, e te akakoro anga tu-Atua ra. E kia akameitaki tatou e te tauturu maira te vaerua o Iehova kia kite tatou i tana Tuatua e kia autu i te tavinianga iaia i te tuatua mou ra.
Eaa Taau Au Pauanga?
◻ Eaa etai puapinga mutu kore no te tatauanga Pipiria?
◻ Eaa ka apii kapiti ei i te Pipiria ma te au taeake akarongo ra?
◻ Eaa ra i tikai kia taiku i te au irava no roto mai i etai au ngai ke ke o roto katoa i te Pipiria ra?
◻ Eaa te aite anga e ‘kia aere na te tuatua-mou ra,’ e akapeea e raukaʼi ia tatou kia rave i te reira?
[Tutu i te kapi 17]
Te au metua, e apii i ta kotou tamariki i te au Tuatua Tapu
[Tutu i te kapi 18]
I tana Tuatua i runga i te Maunga ra, kua taiku maira Iesu i etai au tuanga no te au Tuatua Tapu Epera ra