Te Kite ra Ainei Koe te Anoano Kia Tere ki Mua i te Pae Vaerua?
“E akamaroiroi rai i te tatau i te tuatua, e te ako, e te apii.”—1 TIMOTEO 4:13.
1, 2. (a) Akapeea a Isaia 60:22 te tupuanga i teia tuatau openga nei? (e) Eaa te anoanoia ra i roto i ta Iehova akaaerenga i te enua nei?
“E RIRO te mea ngiti okotai ei tausani; e ko tei mea ngiti poepoe ra, e riro ïa ei enua maroiroi.” (Isaia 60:22) Te tupu nei teia au tuatua i teia tuatau openga nei. Te tika, i te mataiti 2015, e 8,220,105 tavini o Iehova tei tutu aere i te nuti meitaki o te Patireia takapini i teianei ao! Kua tuatua te Atua no runga i te akamaataanga i tona iti tangata: “Naku, na Iehova, e akarapurapu i te reira i tona tuatau.” No reira i te tuatau ka aereia ka maata atu ta tatou angaanga. Te rave ra ainei tatou i ta tatou ka rauka kia tutu aere e kia apii i te nuti meitaki? Te tavini nei te maataanga o te au taeake e te au tuaine ei painia tamou me kore ei painia tauturu. Kua neke tetai pae ki te au ngai ke ei tauturu i te angaanga tutu aere, e tetai pae te angaanga pakari nei i te akatu i te au Are Uipaanga Patireia.
2 I te au mataiti tataki tai, mei te 2,000 putuputuanga ou tei akanooia. Ka anoanoia te aronga pakari e te au tavini tauturu no teia au putuputuanga. I te au mataiti tataki tai, ka anoanoia te tauatini ua atu au tavini tauturu kia riro mai ei aronga pakari e te tauatini ua atu au taeake kia riro mai ei au tavini tauturu. Te taka ua ra, te “maata nei te rave anga i te angaanga a te Atu,” na te au taeake e te au tuaine.—1 Korinetia 15:58.
EAA TE KA ANOANOIA KIA TERE KI MUA I TE PAE VAERUA?
3, 4. Eaa te aiteanga kia tere ki mua i te pae vaerua?
3 E tatau ia 1 Timoteo 3:1. Kua akameitaki te apotetoro ko Paulo i te au taeake tei “inangaro” i te riro mai ei au akaaere. Me itae tetai tangata i tetai apinga mamao, ka anoanoia aia kia tauta i te itae tikai kia rauka te reira. E akamanako ana i tetai taeake tei inangaro kia riro mai ei tavini tauturu. Kua kite aia e ka anoanoia kia tauta i te akameitaki atu i tona au tu Kerititiano. I reira, me riro mai aia ei tavini tauturu, ka angaanga pakari roa atu aia kia riro mai ei akaaere.
4 Te rave nei tetai au taeake e te au tuaine i te au taui anga i roto i to ratou oraanga no te mea ka inangaro ratou i te tavini maata atu ia Iehova. Ei akaraanga, penei ka inangaro ratou i te painia, te angaanga i roto i te Betela, e te tauturu i te akatu i te au Are Uipaanga Patireia. Ka akara ana tatou akapeea te Pipiria te tauturu anga ia tatou kia tere ua rai ki mua.
KIA TERE UA RAI KI MUA I TE PAE VAERUA
5. Akapeea te au mapu me taangaanga i to ratou maroiroi i roto i te angaanga Patireia?
5 E maata te angaanga ta te au mapu ka rauka i te rave ei tavini ia Iehova no te mea e maroiroi ratou e te matutu. (E tatau ia Maseli 20:29.) Te tauturu nei tetai au taeake mapu i roto i te Betela i te nenei e te vaî i te au puka Pipiria. E manganui te au taeake e te au tuaine mapu tei tauturu i te akatu i te au Are Uipaanga Patireia me kore te akaou i te reira. Kua tauturu tetai pae me tupu tetai tumatetenga natura. E maata te au painia mapu tei apii i te reo ke e tei neke ki te ngai ke kia tutu aere i te nuti meitaki.
6-8. (a) Akapeea tetai mapu tane te taui anga i tona manako no runga i te tavini anga i te Atua, e eaa tei tupu? (e) Akapeea tatou me “tongi ana kia kite i te meitaki o Iehova”?
6 E inangaro ana tatou ia Iehova e ka angaanga pakari nana. Noatu ra, penei ka manako tatou mei tetai taeake rai ko Aaron tona ingoa. Kua inangaro aia i te tavini i te Atua ma te rekareka, inara kare aia e mataora ana. Noatu kua aere a Aaron ki te au uipaanga e te angaanga tutu aere mei tona tamariki anga mai, karanga aia: “E maromaroa tikai te uipaanga e te angaanga tutu aere.” No reira eaa tana i rave?
7 Kua tauta a Aaron i te tatau putuputu i te Pipiria, te akapapa no te au uipaanga, e te paupau. Kua akamata katoa aia i te pure putuputu. Kua tauturu teia au mea iaia kia tere ki mua i te pae vaerua. Kua akamata aia i te kite maata e te inangaro maata ia Iehova. Tei tupu, kua mataora atu a Aaron. Kua painia aia, kua tauturu i te aronga tei rokoia e te au tumatetenga natura, e kua neke ki tetai enua ke no te tutu aere. I teianei koia tetai o te aronga pakari e tavini ra i ko i te Betela. Eaa tona manako i tona oraanga? Karanga a Aaron: “Kua ‘tongi ana au e kua kite i te meitaki o Iehova!’ No tana akameitakianga, mei te mea rai e kaiou taku kiaia e kua akakeuia au kia tavini maata atu iaia, e kua tupu te au akameitakianga.”
8 Karanga te tata salamo: “Ka tongi ana kia kite i te meitaki o Iehova!” Karanga katoa aia: “Kareka tei kimi ia Iehova ra, kare rava e ngere i te meitaki.” (E tatau ia Salamo 34:8-10.) Ae, me oronga tatou i tei rauka ia tatou kia Iehova, ka mataora tikai tatou no te mea kua kite tatou te akamareka ra tatou iaia. E ka akatupu aia i tana i taputou kia akono ia tatou.
AURAKA E TUKU I TE AU
9, 10 Eaa i puapinga ai kia ‘tapapa koe i te Atua’?
9 Penei ka inangaro tatou i te tavini maata ia Iehova. Inara akapeea me kua roa ta tatou tiaki anga i tetai tuanga angaanga i roto i te putuputuanga me kore te tiaki kia taui to tatou turanga? Penei ka anoanoia tatou kia akakoromaki. (Mika 7:7) Noatu e ka akatika a Iehova i teia kia tupu ua atu, ka papu ia tatou e ka turuturu ua rai aia ia tatou. Ka apii tatou mei te akaraanga o Aberahama. Kua taputou a Iehova e ka tu aia i te tamaroa, inara kua anoanoia aia kia tiaki no tetai tuatau roa e tae ua atu ki te taime i anauia ai a Isaaka. I te reira tuatau, kua akakoromaki a Aberahama e kare rava tona akarongo ki roto ia Iehova i kore ana.—Genese 15:3, 4; 21:5; Ebera 6:12-15.
10 E tikai, kare i te mea māmā ua i te tiaki marie. (Maseli 13:12) Inara me akamanako ua tatou i to tatou turanga, ka taitaia tatou. No reira kia taangaanga tatou i te tuatau no te akamako i te au tu tei anoanoia no te akono i te au apainga i roto i te putuputuanga.
Na te manakonakoanga i ta tatou e tatau ra i roto i te Pipiria, ka rauka te kite pakari, e ka rave i te au ikianga meitaki
11. Eaa te au tu pae vaerua ta tatou ka akatupu, e no teaa ra i puapinga ai te reira?
11 E akatupu i te au tu e te au karape tei anoanoia. Na te tatauanga i te Pipiria e te manakonakoanga i taau e tatau ra, ka rauka te kite pakari, te manako tau, e kia rave i te au ikianga meitaki. Te tika, ka anoano te au taeake i te au tu e te karape mei teia rai kia akono i te putuputuanga. (Maseli 1:1-4; Tito 1:7-9) Me apii tatou i te Pipiria ka kite tatou i to Iehova manako no runga i te au mea e manganui. E i te au rā katoa ka taangaanga tatou i ta tatou i apii mai kia rave i te au ikianga tei akamareka ia Iehova. Ei akaraanga, ka apii tatou akapeea me akono i tetai ke, me taangaanga i te moni, e te iki i te tu tamataora e te kakau.
12. Akapeea te au mema o te putuputuanga te akapapuanga e ka irinakiia ratou?
12 E angaanga pakari i te rave i tetai ua atu tuanga angaanga tei orongaia kia koe. I te akatuanga te iti tangata o te Atua i te iero, kua inangaro a Nehemia i te au tane kia akono i te au apainga ke ke. Kua iki aia i te aronga e turanga meitaki to ratou. Kua kite aia e e inangaro to teia au tane i te Atua e ka angaanga pakari i te rave i te angaanga tei orongaia kia ratou. (Nehemia 7:2; 13:12, 13) Mei te reira katoa i teia tuatau, ko te aronga tei tiratiratu e te angaanga pakari, ka rauka te turanga meitaki e penei ka orongaia te au apainga maata kia ratou. (1 Korinetia 4:2) No reira me e taeake me kore e tuaine tatou, kia angaanga pakari tatou i te rave i tetai ua atu angaanga tei orongaia mai.—E tatau ia 1 Timoteo 5:25.
13. Akapeea koe me aru i te akaraanga o Iosepha me akono tau kore tetai pae ia koe?
13 E irinaki ki runga ia Iehova. Eaa taau ka rave me akono tau kore tetai pae ia koe? Penei ka akamārama koe i toou manako kia ratou. Inara me paruru ua rai koe ia koe uaorai e kia mārō i taau tika anga, penei ka kino atu te manamanata. E maata ta tatou ka apii mai mei te akaraanga o Iosepha. Kua takinokino tona ai taeake iaia. Kua pikikaa tetai pae iaia, e kua tiria ki roto i te are auri no tetai mea kare aia i rave ana. Inara kua irinaki a Iosepha ki runga ia Iehova. Kua akamanako aia i ta Iehova au taputou e kua vai tiratiratu. (Salamo 105:19) I taua tuatau ngata, kua akatupu aia i te au tu meitaki tei tauturu iaia kia rave i tetai angaanga puapinga i muri mai. (Genese 41:37-44; 45:4-8) Me kua akono tau kore tetai pae ia koe, e pure kia Iehova no te pakari. Ka tauturu aia ia koe kia noo maru e kia takinga meitaki ia ratou me tuatua koe kia ratou.—E tatau ia 1 Petero 5:10.
KIA TERE KI MUA I ROTO I TE ANGAANGA TUTU AERE
14, 15 (a) No teaa ra tatou “kia matakite” i ta tatou tutu aere anga? (e) Akapeea koe me akatano ki te au turanga tauiui ua? (Akara i te tutu mua e te pia “Inangaro Ainei Koe i te Tamata i Tetai Ravenga Ke?”)
14 Kua akakite a Paulo kia Timoteo kia akameitaki i te tu e akamārama ra aia i te au Tuatua Tapu. Karanga a Paulo: “Kia matakite ia koe, e taau e apii ra.” (1 Timoteo 4:13, 16) Kua roa te tuatau to Timoteo tutu aere anga. No reira eaa aia i anoanoia ai kia mako atu? Kua kite a Timoteo e taui ana te tu e te turanga o te tangata. Kua inangaro aia i te tangata kia akarongo ua atu kiaia, no reira kua anoanoia aia kia akameitaki atu e kia taui i tana apiianga ia ratou. Ia tatou e tutu aere ra i teia tuatau, ka anoanoia tatou kia akapera.
15 I tetai au ngai, me tutu aere tatou mei tera are ki tera are, kare te maataanga o te tangata i te kainga. I tetai au ngai ke, tei te kainga te tangata, inara kare e taea te ngutupa, no te mea kare tatou e tae ki roto. Me e tika teia i toou ngai, ka rauka ainei ia koe kia tamata i tetai ravenga ke kia aravei i te tangata?
16. Akapeea te tutu anga i te ngai tangata e puapinga ai?
16 E manganui te au taeake e te au tuaine te rekareka ra i te tutu anga i te ngai tangata. Ei akaraanga, ka aere ratou ki te ngai tiaki rerue, te ngai tiaki bus, te makete, e te au paka kia aravei i te tangata. Penei ka akamata tetai Kite i te pukapuka no runga i tetai nuti. Me kore ka akameitaki te Kite i te tamariki a tetai me kore ka ui i te uianga no tana ngai angaanga. Me reka te tangata i ta raua pukapukaanga, penei ka taiku te papuritia i tetai manako i roto i te Pipiria e ka ui i tona manako. Maataanga i te taime, ka inangaro te tangata kia kite maata atu i te Pipiria.
17, 18 (a) Akapeea koe e manako papu ei i te tutu anga i te ngai tangata? (e) No teaa ra to Davida akapaapaaanga ia Iehova i riro ei ei mea puapinga kia koe me rave koe i te angaanga tutu aere?
17 Penei e ngata ia koe i te pukapuka atu ki te tangata kare koe i kite i runga i te mataara. Ko teia te manako o Eddie, e painia i New York City. Inara kua kite mai aia i tetai ravenga kia manako papu. Karanga aia: “I ta maua akamorianga ngutuare, e kimikimi ana maua ko taku vaine i te pauanga ki te au patoianga e te au manako o te tangata. Kua ui katoa maua i te au manako o te Au Kite.” I teianei te reka ra a Eddie i te tutu anga i te ngai tangata.
18 Me rekareka maata atu tatou i te angaanga tutu aere e te mako i te akakite i te nuti meitaki ki te tangata, ka kite mai te tangata i to tatou turanga pae vaerua. (E tatau ia 1 Timoteo 4:15.) E penei ka tauturu tatou i tetai kia riro mai ei tavini no Iehova. Karanga a Davida: “Ka akameitaki rai au ia Iehova, kare e tivata; kia vai tamou rai te akameitaki iaia i roto i toku nei vaa. E akapaapaa toku vaerua ia Iehova; ka kite te aronga akaaka i te reira, e ka rekareka.”—Salamo 34:1, 2.
AKAPAAPAA UA RAI IA IEHOVA KIA TERE KI MUA I TE PAE VAERUA
19. No teaa ra tetai tavini tiratiratu o Iehova ka mataora ai, noatu e tei roto aia i te au turanga arairaiia?
19 Karanga katoa a Davida: “Ka akapaapaa taau katoa ra au angaanga ia koe, e Iehova, e na toou aronga tapu e akameitaki ia koe. E tuatua ratou i te kakā o toou ra basileia, e karangaranga ua oki i toou ra ririnui, I te akakite anga ki te tamariki a te tangata nei i tona ra mana, e te mana kakā o tona ra basileia.” (Salamo 145:10-12) Pouroa te aronga tei inangaro e tei tiratiratu kia Iehova e inangaro maata to ratou i te akakite ki tetai ke no runga iaia. Akapeea ra me kua rokoia koe e te maki e te ruaine, e kare e rauka i te akapou maata i te taime i te tutu aere mei tera are ki tera are? E akamaara e te akapaapaa nei koe ia Iehova me tuatua koe ki te au tangata ravarai, mei te au neti e te au taote. Me tei roto koe i te are auri no toou akarongo, ka rauka rai ia koe i te tuatua ki tetai ke no runga ia Iehova, e te rekareka ra aia i teia. (Maseli 27:11) Te rekareka katoa nei aia me tavini koe iaia noatu e kare toou ngutuare tangata e tavini ra iaia. (1 Petero 3:1-4) Noatu te au turanga ngata tikai, ka rauka ia koe i te akapaapaa ia Iehova, te akavaitata atu kiaia, e kia tere ki mua i te pae vaerua.
20, 21 Me orongaia te au angaanga maata kia koe i roto i ta Iehova akaaerenga, akapeea koe te riro anga ei akameitakianga ki tetai ke?
20 Ka akameitaki tikai a Iehova ia koe me akavaitata ua atu koe kiaia e te angaanga pakari i te tavini iaia. Penei na te rave anga i te tauianga ki taau akapapaanga e toou oraanga, ka maata atu te tuatau no te tauturu i te tangata kia apii i te au taputou manea a te Atua. Penei ka tauturu katoa koe i toou au taeake. E akamanako ana i te inangaro maata o te au taeake e te au tuaine me kite ratou ia koe e angaanga pakari ra i roto i te putuputuanga!
21 Noatu eaa te roa ta tatou tavini anga ia Iehova, kia akavaitata ua atu tatou kiaia e kia tere ki mua i te pae vaerua. I te apii ka aru mai, ka uriuri tatou akapeea me tauturu i tetai ke kia tere ki mua.