Akaputuputu Mai te Au Karere o te Au Tu Atua

“KUA akamaroiroiia matou e te au uruoaanga tapere ravarai ta matou i tae,” i na tetai tangata pakari Kerititiano ei no Unaite Teite mai. “Inara, i teia mataiti kare te reira e rauka i te akamaramaia. Kua akaruke atu matou i te au ra ma te manako e me ka maata atu ta tera mai ra i ta matou i tamanako ra, e kare matou i poitirere ana!”

Me aere koe ki tetai o te au Uruoaanga Tapere “Au Karere o te Au Tu Atua” kare e ekoko anga ka akatika koe ki ta teia tereketi oraora. Kua akatumuia te uruoaanga o te au ra ki runga i tetai tumu tuke o te tuku anga kia aere ua atu te Au Kite o Iehova ei au karere no te Atua. Ka uriuri ana tatou i te porokarama e toru ra.

“Te Manea . . . o Tei Tutu Aere i te Au Ra”

Ko te upoko tuatua teia o te ra mua o te uruoaanga. Kua akatumuia ki runga ia Isaia 52:7. I teia au tuatau ngata, e manganui te tavini ra ia Iehova i raro ake i te au turanga akaaoanga. Te tuatua “Akarongoanga Mei te Aronga Akakitekite Maroiroi i te Au” kua kapiti mai te au uiui anga ma etai o teia aronga akarongo. Te akarongoanga i ta ratou au tuatua uaorai e mea akamaroiroi tikai, e no reira kua akapapuia te aronga uruoaanga e ka akamaroiroi a Iehova ia ratou katoa, pera katoa te oronga anga mai i te “mana maata meitaki” no te tauturu ia ratou kia tamou marie.​—2 Korinetia 4:7.

Kare ta Iehova au umuumu anga i te mea teiaa. (1 Ioane 5:3) Kua akataka meitakiia teia i roto i te tuatua openga o te porokarama popongi, te taopenga anga ki te tuku anga ou o tetai poroutia e 32 kapi te ingoa Eaa ta te Atua e Umuumu Maira ia Tatou? Kare e ekoko anga ka riro teia puka tauturu apii ou tei akatutuia ma te manea ei tauturu i te manganui atu kia apii no runga i te au akakoro anga o te Atua. Te au tuatua no te taangaanga anga i teia puka ou ka kitea i roto i te atikara apii openga i roto i teia makatini i te kapi 16 e te 17.

Te tuatua “Tamou Marieanga i Roto i te Angaanga Meitaki” kua tuatua tikai e te kite meitaki ra a Iehova i to tatou au timata anga. Te aite anga o te tamou marie koia kia aruaru tatou e auraka e tuku ua i te au. Kua oronga mai a Iehova kia tatou tana Tuatua, tona vaerua, e tana akaaerenga kia tauturu ia tatou. Ka anoanoia te tu tamou marie kia tutu aere, inara ka riro te tutu aere ei tauturu ia tatou kia tamou marie, no te mea ka akono te reira i to tatou akarongo kia vai oraora ua. No te vaitata nei ki te ope akaoti anga, auraka tatou e tuku i to tatou au manamanata kia tamauu i to tatou tu maroiroi, no te mea ko te aronga anake tei tamou marie ki te openga te ka ora.​—Mataio 24:13.

Te tuatua puapinga maata, “Ta Tatou Tuanga ei Au Karere o te Au Tu Atua,” kua akakite mai te reira i te tuku angaia te au tuikaa ngati Iuda mei Babulonia e te akaou anga o te akamori anga ma i Ierusalema i te 537 M.T.N. Teia tupu anga, i akamarama ei te vaa tuatua, e akara ua anga ki mua o ta te Atua Patireia ka akatupu maata kare e roa i te ao katoa. (Salamo 72:7; Isaia 9:6) Ta tatou tuku anga angaanga i teianei koia ko te tutu aere i te tuatua meitaki no runga i teia Patireia e te noo kia rotai atu ki te reira tuatua. Ka tau te aroa no te Atua e te tangata tupu kia akakeu ia tatou kia rave ua atu i teia angaanga ma te kore e tuku i te au.​—Angaanga 5:42.

Tetai mea manea i te porokarama o te Varaire koia te tuatua kapipiti “Kia Matakite i te Au Ereere Uunaia o te Tamataora Anga.” Te akatangi anga imene o teia tuatau, te au teata, te au vitio, te au akaariari anga tivi, te au kanga vitio, te au puka, te au makatini, e te au komiki i te maata anga o te taime te akaata maira i te manako temoni. No reira, ka anoanoia tatou kia “rikarika i te kino” e te “kapiti atu ki te meitaki.” (Roma 12:9) Ae, kia manako tatou i te tamataora anga kino ei mea viivii e e akaatea mai mei te reira, koi akamanako ei tatou i te au mea viivii kore, meitaki, e te paapaaia. (Philipi 4:8) Te au puka e te au apinga kimikimi tei orongaia mai e ta Iehova akaaerenga ka akakeukeu i to tatou au manako ma te au manako akamaroiroi e ka tereni ia tatou kia akataka ke i te mea tika mei te mea tarevake. (Ebera 5:14) Ka tau tatou kia kapiti atu ki teia au apinga mei ta tatou ka rave ra i roto i tetai poti i roto i tetai moana ngarungaru.

E oti kua aru mai te tuatua “E Patoi i te Tiaporo​—Auraka e Akatika Ua i te Akarere Anga.” I mua ua ake ka tomo ei ratou ki roto i te Enua Taputouia, e tauatini ua atu au Iseraela tei puereereia ki roto i te tu akono tau kore. Kare a Phinehaza i akatika ua ana i te tu akarere no te akamori anga mou. Kua rave atu aia i te ta i te aronga rave tarevake, e kua riro tona tu akono anake ei akamareka ia Iehova. (Numero 25:1-13) To Satani akakoro anga ko te akatupu ia tatou tataki tai kia kore e tomo ki roto i te ao ou a te Atua. Mei ia Phinehaza ra, e patoi tatou i ta te Tiaporo au tauta anga no te akaviivii ia tatou. Noatu e me kua akaipoipo me kore e takaua, kia ‘rere ke tatou i te akaturi.’​—1 Korinetia 6:18.

Ko te “Akono Tiratiratuanga i te Tu Tika o te Tuatua na te Atua” te tuatua openga no te ra mua o te uruoaanga. E manganui te aronga uri reo e taui ana me kore e kiriti ana i tetai au ngai o te au Tuatua Tapu ki vao. Ei akaraanga, ei akameitaki i te aronga turu maata i te au tika anga o te vaine, kua tuatua te aronga uri o The New Testament and Psalms: An Inclusive Version no runga i te Atua, kare ei Metua, mari ra ei Metua-Metua Vaine e no Iesu ei “Te Tangata” kare e ko te “Tamaiti a te tangata.” Ei akatuke anga, te aru meitaki ra te New World Translation i te aerenga tuatua mou e kua riro ei akapapu i to tatou manakoanga no runga i tetai au mea Tuatua Tapu. Ei akaraanga, kua karanga te vaa tuatua e: “No te au tuatua tika i roto i te New World Translation i orongaia mai ei te tango no ta tatou akapapa akaou anga i te au putuputuanga na te akataoongaanga i te au pupu aronga pakari, kia aru meitaki i te tu tei akanooia i te putuputuanga Kerititiano o te anere mataiti mua.” Te akaari ra tatou i to tatou tu tiratiratu ki te Tuatua na te Atua na te tatauanga i te reira i te au ra e te taangaangaanga i tana ako anga. Kua karanga katoa te vaa tuatua: “Te akaari ra tatou e e aronga paruru tiratiratu tatou i te Tuatua na te Atua na te tutu aere maroiroi anga i te reira ki tetai atu e na te taangaanga meitaki anga i te reira ia tatou e apii ra i tetai atu, te koreanga e tauta kia akatano i te reira ki to tatou au manako na te takaurianga me kore te akaetaanga i ta te reira e karanga ra.”

‘Te Au o te Atua, Tei Maata Ua Atu i te Kite Tangata’

Na teia upoko tuatua, tei akatumuia ki runga ia Philipi 4:7, i akanoo i te tangi anga no te ra rua o te uruoaanga. Te maata anga o te tuatua akakite tei orongaia no runga ia i te manako tau o ta tetai angaanga orometua, ngutuare tangata, akatapu anga, e tetai atu au mea o te oraanga o te au ra.

I muri ake i tetai uriurianga o te irava tuatua no te ra, kua orongaia tetai tuatua kapiti te ingoa “Au Karere e Apai Maira i te Tuatua Meitaki o te Au.” Ta tatou tuatua e mea au ia, e ka tau te reira kia orongaia na roto i tetai tu au tikai. (Ephesia 6:15) To tatou akakoro anga kia re mai i te au ngakau kare te au taumaro anga. Te terenianga e te au puka ta tatou ka rauka mei ta Iehova akaaerenga ka tauturu ia tatou kia rave tikai i te reira. Auraka tatou e tuku i te tu tuke me kore tangi kore kia akamaroiroi kore ia tatou. Mari ra, kia rave ua atu tatou i te “akamaroiroi,” te raukaanga tetai rave anga angaanga meitaki o te apii uaorai, te tae anga ki te uipaanga, e te piri anga ki roto i te angaanga tutu aere. (2 Timoteo 2:15) Auraka e akangaropoinaia te rave anga i te meitaki ki tetai atu, te aronga tikai tei piri maira kia tatou i roto i te akarongo. (Galatia 6:10) E tikai, na te akamaroiroianga i tei rauka ia tatou kare tona aite anga e ko te angaanga takiri ia tatou uaorai kia roiroi. Ko tei rauka i tetai i te rave kia tau ki tona uaorai tu e te au turanga te ariki ra Iehova i te reira.

Te oronga ra te iti tangata o te Atua i to ratou taime, ririnui, e te au apinga no te akamaata i te au angaanga Patireia. Te tuatua “Orongaanga Rekareka i Roto i ta Iehova Akaaerenga” kua akakite mai e i te aronga tu mamoe e ariu maata maira ki te tuatua Patireia, te vaira te anoano no te apinga maata atu, te au ngai uipaanga, e te au are manga. Na ta tatou au moni tauturu e raukaʼi i te akaaerenga i te oronga i tei anoanoia no te akatupu i te angaanga tutu aere i te ao katoa. Ka riro katoa te oronga ua anga ei akangateitei ia Iehova e ka apai mai i te rekareka ki tei oronga ra. No reira, ei au Kerititiano, auraka tatou e akangaropoina i teia tuanga puapinga o ta tatou akamori anga.​—2 Korinetia 8:1-7.

Te topirianga i te tuanga popongi ko te tuatua papetito anga​—e rave anga meitaki ua rai i te au akaputuputuanga mamaata a te Au Kite o Iehova. Mei teaa atura i te rekareka i te kite i te aronga papetito ouia e aru ra i te au takainga vaevae o Iesu na te akatikaanga kia papetitoia ki te vai! (Mataio 3:13-17) Pouroa te aronga tei rave i teia takainga kua apiiia i te tumu o te pakari maata rava atu​—koia te Pipiria. Pera katoa, kua kiteaia e ratou te akakoroanga tikai i te oraanga, e te akameitakiia ra ratou ma te au no ko mai i te kiteanga e te rave ra ratou i te mea tika.​—Koheleta 12:13.

Kua orongaia te ako anga tano tikai i roto i te tuatua “E Tuku i te Kite Ngakau kia Paruru ia Koe.” E mea puapinga maata te kite ngakau no runga i te au raverave anga pitiniti. Auraka tatou e rave i te angaanga pitiniti uaorai i roto i te Are Uipaanga Patireia, e kare katoa tatou e taangaanga i to tatou au taeake Kerititiano ei puapinga anga moni na tatou. (Akaaite ia Ioane 2:15, 16.) Ka anoano katoaia te kite ngakau me tukuia te moni ki roto i tetai pitiniti me kore me oriia me kore ra me orongaia. “No te autu kore anga o te au angaanga pitiniti i rotopu i te au Kerititiano i arataki atu ei ki te ati ngakau pera katoa te kino anga i te pae vaerua i tetai pae tei viviki ua i te rave i te au ravenga kimi moni tarotokakaia,” i akakite ei te vaa tuatua. Noatu e kare i te mea tarevake no te au Kerititiano kia rave i te pitiniti ma tetai atu, e mea pakari kia matakite tikai. E me raveia tetai koreromotu anga pitiniti i rotopu i nga pupu e rua, kia tata uaia te au tuatua ki runga i te pepa.

Kua uriuriia ta te Atua turanga no te tane e te vaine i roto i te tuatua “Tane e te Vaine i Tona Anga Anga ia Raua.” Kua takinoia te nga tuanga a nga tangata i te au tuatua enua i aereia mai. “E manganui te akaaiteite tarevake ra i te tu tane ki te taomi anga kikino, te maro, me kore te akaparau anga tu tane,” i na te vaa tuatua ei. “I tetai au peu i kiteaia kare e kite putuputuia ana, e e mea akamaia, no tetai tangata kia aue i te ngai tangata me kore i tona uaorai ngai muna. Inara, ia Ioane 11:35 te akakite ra e iaia i roto i te urupu tangata i vao ake i te ana tanumanga o Lazaro, kua ‘aue iorā Iesu.’” Akapeea te au vaine? I te maata anga o te taime te akaaiteiteia ra te tu vaine ki te tu manea i te pae kopapa. Inara kua ui te vaa tuatua e: “Me e manea tetai vaine inara kua ngere i te tu manako tau e e tauetono, e akatangata, me kore e akaparau, e manea tikai ainei aia i roto i te tika anga tikai o te tuatua, e e tu vaine tikai?” (Akaaite ia Maseli 11:22; 31:26.) I ta raua tuatua, tu akono, e te akamaneaanga, ka tauta te tane e te vaine Kerititiano i te aru i te au turanga Pipiria. I na te vaa tuatua ei: “Te tane tei akaari ra i te ua o te vaerua e ngoie ua i te akangateiteiia, e te vaine tei rave i te reira e ngoie ua i te inangaroia.”​—Galatia 5:22, 23.

E oti kua aru mai te tuatua kapipiti “Te Manako Maira te Atua o te Au ia Koe.” E manganui te au Kerititiano e au apiapi anga pae moni to ratou. Noatu ra, te taputou maira Iehova: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebera 13:5) Noatu te au tu ngata i te pae o te puapinga, kua akaari etai pae i te tu papu ki roto i teia taputou na te tomoanga ki roto i te angaanga painia tauturu me kore te painia tamou. Tetai atu kare i rauka ra i te painia i teianei te tuku ra i te au inangaro Patireia na mua na te opuanga i te au tuatau ravarai no te tutu aere. (Mataio 6:33) Ka tau te au tauta anga pouroa mei teia kia akameitakiia! Kua oronga mai ta Iehova akaaerenga i te au puka e manganui no te tauturu ia tatou i ta tatou angaanga orometua e te tauturu ia tatou kia autu atu i to tatou au manamanata. Me ariki tatou i te au apinga vaerua a Iehova, ka akameitaki aia ia tatou ma te au i teia au tuatau kino i te pae o te puapinga.​—Salamo 29:11.

I te openga o te tuatua openga no te reira ra, “E Aruaru i te Au Tu Atua i Roto i te Oraanga Ngutuare Tangata,” kua rekareka te aronga uruoaanga i te rauka anga te puka ou, The Secret of Family Happiness. “E apii aruaru i teia puka kia koe uaorai e ei au pupu ngutuare tangata,” i raurau ei te vaa tuatua. “E tauta akatenga i te taangaanga i tana ako anga tei akatumuia ki runga i te Pipiria, e ka papu ia koe e ka akamaataia te au e te mataora i toou ngutuare tangata.”

‘Te Matakite i te Taokotaianga i te Ruru o te Au’

Tei akatumuia ki runga ia Ephesia 4:3, e upoko tuatua tau teia no te ra openga o te uruoaanga. Te Au Kite o Iehova, tei aratakiia mai mei te au pa enua o teianei ao, kua apiiia e te Atua. No reira, te inangaro ra ratou i te au. Te aru ra ratou i te akaraanga o Iesu e te tauta ra “ma te matakite tikai oki kia vai rai te taokotaianga a te Vaerua ra i te ruru o te au.”

Te au tei totoa na roto i te akaaerenga a te Atua kua akakiteia i roto i te tuatua kapipiti “Akatakaanga i te Au Karere Tau Tikai.” Kua vai te au peroveta pikikaa i Iseraela taito. Inara, ta te Atua au karere mou​—te au peroveta mei ia Isaia, Ezekiela, e Ieremia—​kua akakite tika tikai ratou i te topa anga o Ierusalema, te tuatau tuikaa anga, e te akarangatira anga i te openga o te iti tangata o te Atua. Te tupu ra tetai turanga aiteite mei te reira i teia tuatau. E maata te au karere pikikaa i roto i te au ngai poritiki e te akonoanga pikikaa. Inara, kua akatu mai a Iehova i tona Au Kite no te akakitekite i tana akakoroanga no runga i teia akatereanga o te au mea. I te 1919 tikai, kua taangaangaia to Iehova au tavini kia akakitekite i te tuatua a te Atua. Mei teaa atura to ratou tuke mei te au karere pikikaa o Kerititome! Kia aruaru tatou i te rave i ta tatou tuanga i teia angaanga e tae ua atu ki te taime e karanga mai ei a Iehova e kua oti te reira i te raveia.

Kua akakite maata mai te tuatua “Akarongo e e Aru i te Tuatua na te Atua” e ko te Tuatua Tapu te tumu maata rava atu o te arataki anga, te akapumaana, e te manakonakoanga. (Isaia 30:20, 21; Roma 15:4) E tu akatikatika ua to teianei ao i teia tuatau. Tei maata rava atu i teianei, ka anoanoia tatou kia akarongo ki te ako anga te aere maira mei ta te Atua Tuatua e te akaaerenga. Kua kite a Iehova i to tatou au ngai paruparu, e i roto i tana Tuatua kua akairo meitaki aia i te kaveinga te ka akapuapinga ia tatou. Te kiteanga e te turu maira a Iehova ia tatou te oronga maira ia i te akapapu anga kia neke ki mua ma tetai ua atu mea tana ka pati mai ia tatou.

Na teia i akanoo i te manako anga no te nuku ma te rakei katoatoa tei aru mai. Te ingoa “Eaa ka Akangateitei ei i te Au Akanoo Anga Teokaratiki?” Te taangaanga anga i te papaanga Pipiria o Gideona ei tango, kua akakite pakari teia oronga anga i tetai apiianga ririnui​—kia aru tatou i te au ikuiku anga a te Atua e auraka e tupau i to tatou uaorai manakoanga me kore ra e tauta i te aere ke i te ako anga teokaratiki.

Te tuatua ki te katoatoa no runga i te tumu manako “I Na e Au Tikai!​—Noea Mai Tona Tumu?” Te au ta te Atua e taputou maira e maata roa atu ia i te ka rauka i teianei ao te akamanako. “Te aite anga o te au tikai e au i te au ra roaʼi,” i na te vaa tuatua ei. “Te aite anga o ta te Atua au e ao ma te kore e maki, e mamae, e mii, e te mate.” Te akakite maira te Pipiria kia tatou e na Iehova e ‘akakore i te tamaki e tae rava akenei ki te openga enua.’ (Salamo 46:9) Akapeea aia i te rave anga i teia? Na te akaateaanga i tei akatupu ra i te tamaki, ko te Tiaporo ko Satani. (Apokalupo 20:1-3) Ka akatuera teia i te mataara no te aronga maru kia ‘noo i te enua, e ka rekareka ratou i te maata o te au ra.’​—Salamo 37:11.

I muri ake i tetai uriuri anga poto o te atikara apii Punanga Tiaki no te epetoma, kua orongaia te tuatua openga no te uruoaanga. Te ingoa “Nekeanga ki Mua ei Au Karere o te Au Tu Atua,” kua akakite pakari teia tuatua akakeuanga e e mea umere e te rapurapuia ta tatou angaanga tutu aere. Kare teia i te tuatau no te akaangaroi, te kaimoumou taime, me kore te uri ki muri ki te au manako tarevake. Kua akapapaia tatou i te au mea tei anoanoia e tatou​—te Tuatua na te Atua, tona vaerua tapu, e te au apinga e manganui te aere maira mei tana akaaerenga teokaratiki aroa. Ei au tavini no Iehova, kia neke ua rai tatou ki mua ei au karere o te au tu Atua!

[Pia/Au Tutu i te kapi 9]

E Apinga Aroa na te Au Ngutuare Tangata

Kua rekareka te aronga tei tae ki te ra rua o te Uruoaanga Tapere “Au Karere o te Au Tu Atua” te rauka anga mai te puka ou The Secret of Family Happiness. Tei roto i teia puka te au akakite anga Tuatua Tapu te ka akapuapinga i te au ngutuare tangata katoatoa tei inangaro i te Atua.

Kua tuatua tetai tangata pakari no Connecticut, U.T.M., e: “Ia Tiunu 15, kua rauka ia matou ta tatou puka Family Happiness. Ia Tiunu 16, kua apa au i te tatauanga i te reira. Te tae anga ki te 17, kua rave matou i ta matou apii ngutuare mua i roto i te reira, e kua akamaroiroi tikaiia matou! I taua ra rai, kua oti iaku te tatau i te puka. Kare e ekoko anga ka riro teia puka memeitaki ei mea akaperepereia ki te katoatoa tei rauka ra ia ratou uaorai te reira. Te papaanga tika o te puka e te akakite anga tau no teia tuatau te oronga maata maira i te akapapu anga e te oronga maira ‘te tavini akono meitaki e te pakari i te kai i te ora mou’ e te kite meitaki tikai ra i to tatou au anoano i teia au tuatau ngata.”​—Mataio 24:45-47.

[Tutu i te kapi 7]

Ka inangaro te aronga ou e te ruaine i te kite eaa ta te Atua e umuumu maira