E Aere Mei Tei Apiiia e te Atua
“Ka aere tatou ki runga i te maunga o Iehova, . . . e nana e apii mai ia tatou i tona au aerenga; e ka aere tatou na tona ra au arataa.”—MIKA 4:2.
1. I tau ki ta Mika, eaa ta te Atua ka rave no tona iti tangata i te au ra openga ra?
KUA akakite te peroveta a te Atua ko Mika e i “te au rā openga ra,” to tatou tuatau nei, e manganui te au tangata te ka kimi maroiroi i te Atua, no te akamori iaia. Ka akamaroiroi teia i tetai e tetai, te na ko anga e: “Ka aere tatou ki runga i te maunga o Iehova, . . . e nana e apii mai ia tatou i tona au aerenga; e ka aere tatou na tona ra au arataa.”—Mika 4:1, 2.
2, 3. Akapeea ta Paulo tamanako anga no runga i te au tangata noinoi moni i te akatupu angaia i teia tuatau?
2 Na ta tatou apiianga ia 2 Timoteo 3:1-5 (NW), e tauturu ia tatou kia kite i te au tupu anga o te apii angaia e te Atua i “te au ra openga ra.” I te atikara i mua ake, kua akamata tatou na te kiteanga i te au puapinga te ka tupu ki te aronga tei akamanako tikai ra i te akamatakiteanga a Paulo kia kore e riro ei “aronga inangaro ia ratou uaorai.” Kua tuatua rai a Paulo e ka riro katoa te au tangata i to tatou tuatau nei “ei noinoi i te moni.”
3 Kare tetai e anoano i tetai pepa koreti i roto i te tuatua enua o teia tuatau e kite ei e mei teaa atura taua au tuatua i te tano anga ki to tatou au tuatau. Kare ainei koe i rongo ana i te aronga oronga moni e te au arataki pitiniti kare e merengo ana i ta ratou mirioni ua atu i rauka mai i te mataiti okotai? Te inangaro maata ua atura teia aronga noinoi moni, noatu e ka na roto i te ravenga tureia ra. Te tano katoa ra ta Paulo au tuatua ki te manganui i teia tuatau, koi apinganui kore ei, e morimori katoa, kare rava e merengo ana. Penei kua kite koe i te manganui mei teia i toou ngai.
4-6. Akapeea te Puka Tapu i te tauturu anga i te au Kerititiano kia kopae i te riroanga mai ei aronga noinoi i te moni?
4 Ko ta Paulo i taiku ra e tu kopae koreia ainei te reira o te tu tangata? Kare i tau ki Tei Tata ra i te Puka Tapu, tei akanoo ra i teia tuatua mou i roa ake nei: “Ko te anoano maata oki i te moni te tumu o te au kino katoa nei; kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.” Ka akara ana, kare te Atua i karanga e, ‘Ko te moni te tumu o te au kino katoa nei.’ Kua karanga ra aia e “ko te anoano maata oki i te moni.”—1 Timoteo 6:10.
5 Ma te tau ra, te akatika ra te manako o ta Paulo au tuatua e e apinganui etai au Kerititiano memeitaki i te anere mataiti mua i roto i te akatereanga o te au mea ra, noatu e kua iri mai te tu apinganui ki runga ia ratou e me kua angaanga no te reira. (1 Timoteo 6:17) E tau kia kitea, i reira, e noatu eaa to tatou turanga i te pae o te moni, te akamatakite maira te Puka Tapu ia tatou no te tumatetenga o te riroanga mai ei tangata noinoi i te moni. Te oronga maira ainei te Puka Tapu i etai apii anga maata atu no runga i te kopaeanga i teia tu kino maata e te matauia? E tikai, mei to roto rai i ta Iesu Tuatua i te Maunga. Kua rongoia te reira tu pakari i teianei ao. Ei akaraanga, ka akara ana, i ta Iesu i tuatua ia Mataio 6:26-33.
6 Mei tei papaia ia Luka 12:15-21, kua tuatua a Iesu no runga i tetai tangata apinganui tei tamou ra i te tauta i te akaputu maata atu i te apinga inara kua mate viviki ua atura. Eaa to Iesu manako? Kua karanga aia: “E matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” I te pae i te orongaanga i teia ako anga, te akaapa ra te Puka Tapu i te tu kope e te tuatua tikai ra i te puapinga o te angaanga akono tikai. (1 Tesalonia 4:11, 12) Penei ka patoi etai pae e kare teia au apiianga e tano ana no to tatou au tuatau nei—inara te tano ra ia, e te angaanga ra ratou.
Apiiia e Kua Puapingaia
7. Eaa ta tatou tumu no te irinaki anga e ka rauka ia tatou ma te autu ra i te taangaanga i te ako anga Puka Tapu no runga i te apinganui?
7 I te au enua e manganui, ka kite koe i te au akaraanga tika tikai o te au tane e te au vaine mei te au turanga tangata e te puapinga katoatoa tei taangaanga ra i te au kaveinga tu-Atua no runga i te moni. Kua puapingaia ratou uaorai pera katoa to ratou au pamiri, mei ta te aronga o vao e kite maira. Ei akaraanga, i roto i te puka Religious Movements in Contemporary America, na te papuritia o te Apii Teitei Princeton, e anthropologist tei tata e: “I roto i te au puka [Kite] e i roto i te au tuatua putuputuanga te akamaaraia ra ratou e kare ratou e irinaki ana ki runga i te au motoka ou, te au kakau oko maata, me kore te noo anga maata ra ei tu oraanga no ratou. I taua taime rai te anoanoia ra te Kite kia angaanga tika tikai i te ra no tona pu [e te anoanoia ra] kia akono tikai . . . Na teia au tu e akariro i tetai tangata ma te kore te au tu karape ei tangata angaanga puapinga meitaki, e kua neke atu etai Au Kite i Philadelphia Apatokerau [U.T.M.] ki runga i te au taoonga tei anoanoia te apainga maata no te angaanga.” Te taka ua ra, ko te au tangata tei ariki ra i te apii anga mei te Atua na roto i tana Tuatua kua akamatakiteia ana no runga i te au tu tei riro ra ei mea ngata i te akono atu i te au turanga o teianei. Te akapapu maira ta ratou i kite e te arataki ra te apii anga Puka Tapu ki tetai oraanga mataora atu.
8. Eaa ra te “manako iaia uaorai,” te “akateitei,” e te “tapepe pikikaa” e raukaʼi kia akapiriia, e eaa te aiteanga o teia au tuatua e toru?
8 Ka rauka ia tatou i te akapiri i nga mea e toru te ka aru mai ta Paulo i papa ra. I te au ra openga, ka riro te au tangata “ei manako iaia uaorai, ei akateitei, ei tapepe pikikaa.” Kare teia au tu e toru e aiteite ana, inara te piri katoatoa ra ki te tu parau. Te mea mua “ei manako iaia uaorai.” Te karanga ra tetai tikitinari e ko teia tuatua Ereni tumu i konei, tona aiteanga: “‘Ko tetai tei akamaata atura iaia uaorai i tei tika tikai ra,’ me kore ‘tei taputou kia maata atu i te ka rauka iaia i te rave.’” Ka marama ua koe e no teaa ra etai au Puka Tapu i taangaanga ei i te tuatua “nengonengo.” E oti te aru maira te “akateitei,” me kore te “manako teiteianga” tikai. Te mea openga, “ei tapepe pikikaa.” Penei ka manako etai pae i te tapepe pikikaa ei aronga tei tuatua ngateitei kore ra i te Atua, inara te kapiti maira teia tuatua tikai i te tuatua tamamae, akakino, me kore akapuapinga kore i te au tangata ra. No reira te tuatua ra a Paulo no te tapepe pikikaa ki rungao i te Atua e te tangata.
9. Ei tuke anga i te au tu kikino e autu ra, eaa te au tu ta te Puka Tapu e akamaroiroi ra i te au tangata kia akatupu?
9 Eaa toou manako me takapiniia koe e te au tangata tei aite ra ki ta Paulo akatutu anga, noatu e e au oa angaanga, e au oa apii, me kore e kopu tangata ratou? Ka akariro ainei te reira i toou oraanga kia ngoie mai? Me te riro ra ainei taua au tangata ei akangata i toou oraanga, te akariro anga i te reira kia ngata atu ia koe i te akono i to tatou au tuatau nei? Te riro ra, ta te Atua Tuatua, ei apii ia tatou kia kopae i teia au tu, te orongaanga mai i te apii anga mei tei kitea ia 1 Korinetia 4:7; Kolosa 3:12, 13; e Ephesia 4:29.
10. Eaa te akakite maira e te puapingaia ra to Iehova iti tangata mei te arikianga i te apii anga Puka Tapu?
10 Noatu e e tiama kore te au Kerititiano, na ta ratou taangaanga anga i teia apii anga memeitaki e tauturu maata ia ratou i roto i teia au tuatau kikino. Kua karanga te tianara Itaria La Civiltà Cattolica e ko tetai tumu e tupu ua atura te Au Kite o Iehova “koia oki te oronga ra te akaaerenga i tetai akataka anga ketaketa e te titika ki tona au mema.” Inara, na te “akataka anga ketaketa,” te tuatua ra ainei te tangata tata e “ei manako iaia uaorai, ei akateitei, ei tapepe pikikaa”? Kare roa, te akakite ra te makatini Ietuiti e “te oronga ra te akaaerenga i tetai akataka anga ketaketa e te titika ki tona au mema, e e ngai te reira e arikiia mai ei ratou ma te maana e te manako anga akataeake e te taokotai.” Kare ainei i te tika e ko te au mea tei apiiia ki te Au Kite te tauturu ra te reira ia ratou?
Puapinga te Au Mema Pamiri Mei te Apii Anga
11, 12. Akapeea a Paulo i te akakite tikai anga e mei teaa te tu o te turanga o te au pamiri e manganui?
11 Penei ka akapupu tatou i te au mea e a te ka aru mai, koia oki tei piri atu ki te reira. Kua akakite a Paulo e i te tuatau o te au ra openga, e manganui te ka “akarongo kore ki te au metua, ei akameitaki kore, ei tiratiratu kore, kare e aroa natura.” Kua kite koe e e rua o teia au tu kino—te akameitaki kore e te tiratiratu kore—te takapini ra te reira ia tatou. Noatu rai, te kite ngoie ua ra tatou e no teaa ra a Paulo i akanoo ei ia raua i rotopu i te “akarongo kore ki te au metua” e te “kare e aroa natura.” Te kapitiia ra teia au mea e a.
12 Vaitata rai ka akatika tetai ua atu tangata tei akara ma te kite ra, te mapu me kore te ruaine, e te tupu maata ra te tu akarongo kore ki te au metua, e te tupu ua atura te reira ma te kino. E manganui te au metua te kopekope ra e te akara anga e akameitaki kore te au mapu i te au mea ravarai tei raveia no ratou. E manganui te au mapu te patoi ra e kare to ratou au metua e tiratiratu tikai ana kia ratou (me kore ki te pamiri ua nei) inara te o pakari atura ki roto i ta ratou au angaanga, te au navenave anga, me kore ia ratou uaorai. I te mea e ka tauta i te akamanako e koai tei apa, e akara i te au tupu anga. Te tu takake i rotopu i te aronga mamaata e te au mapu te arataki atura i te au mapu ou kia akatupu i ta ratou uaorai turanga no te tu akono, me kore te tu akono tau kore. Eaa te ka tupu mai? E tupu anga maata o te au mapu ou tei nui, te au titiri anga pepe, e te au maki piri ainga ra. I te maata anga o te taime, no te ngere o te tu inangaro natura i te kainga ka arataki atu ia ki te ta ua. Penei kua kite koe i tetai au akaraanga i toou ngai, ei akapapu anga e te ngaro atura te inangaro natura.
13, 14. (a) I roto i te tu kino pakari o te au pamiri e manganui, eaa ra tatou ka akarongo ei i te Puka Tapu? (e) Eaa te tu ako anga pakari ta te Atua e oronga maira no te oraanga pamiri?
13 Penei na teia e akamarama e eaa ra te maata ua atu o te au tangata e patoi ra i te aronga tei riro ana ei tuanga no to ratou pamiri maata, o taua katiri ra, te kopu, me kore pupu. Ka akamanako ana, ra, e kare matou e tuatua nei i teia au mea no te akakite atu i te au mea papu kore o te oraanga i teia tuatau. To matou nga manako puapinga e rua koia oki: Ka tauturu ainei te au apiianga Puka Tapu ia tatou kia kopae i te mamae mei te au apa ta Paulo i papa ra, e ka puapinga ainei tatou mei te taangaanga anga i te au apiianga Puka Tapu i to tatou oraanga? Ka riro rai te au pau anga e ae, mei tei kitea i te au manako e a ta Paulo i papa ra.
14 Te tau tikai ra tetai akakite anga noa nei: Kare e apiianga tei meitaki atu i ta te Puka Tapu i te akatupuanga i te oraanga pamiri tei akamaana ra i te ngakau e tei autu meitaki. Te akaariia ra te reira e tetai akaraanga ua nei o tana ako anga te ka tauturu i te au mema o te pamiri kare anake no te kopae i te au ereere mari ra no te autu atu. Te akatutu meitaki ra a Kolosa 3:18-21 i te reira, inara te vaira tetai atu au akakite anga tuatua manea e te tau tei tano no te au tane, te au vaine, e te tamariki. Te angaanga ra teia apii anga i to tatou tuatau nei. E tika, noatu i roto i te au pamiri o te au Kerititiano mou, te vaira te au tu ngata e te au akaaoanga. Inara, te akapapu maira te au tupu anga katoa e te oronga maira te Puka Tapu i te apiianga tauturu tikai no te au pamiri.
15, 16. Eaa te turanga ta tetai vaine kimikimi ra i kite i te kimikimianga i te Au Kite o Iehova i Tamapia?
15 No tetai mataiti e te apa, kua apii tetai vaine kimikimi mei te Apii Teitei o Lethbridge, Kanata, i te oraanga tangata i Tamapia. Kua taopenga aia e: “E autu maata atu te Au Kite o Iehova i te au mema o tetai atu au pupu akonoanga i te tamouanga i te au taokotai anga akaipoipo ngaueue kore. . . . Te komono ra to ratou autu anga i tetai pirianga akamakoia tetai e tetai i rotopu i te tane e te vaine, koia oki, i ta ratou au rave anga kite ouia, ma te mataku kore, e te taokotai, i ta ratou akono anga i tetai e tetai tei raro ake ratou i te apainga a tetai arataki ou, ko te Atua. . . . Te apiiia ra te tane Kite o Iehova kia pakari i te raveanga i te apainga no te akonoanga i tana vaine e te tamariki. . . . Te akamaroiroiia ra te tane e te vaine ei au tangata tu tika tataki tai . . . Na teia taumaro anga autu ra no te tu tika e akatinamou i te akaipoipo anga.”
16 Kua akatumuia te kimikimi anga ki runga i te au kite anga tika tikai e manganui. Ei akaraanga, kua karanga teia vaine kimikimi no runga i tei tuke ra mei tei matauia, “te kitea maata uaia atura te au tane Kite o Iehova i te tauturuanga i ta ratou au vaine i roto i te au aua kai, kare anake i roto i te tuatau teateamamao anga, mari katoa ra i te tanuanga e te koanga.” No reira te kitea tikaiia ra e e maata te au kite anga i te au enua katoa te akari maira e te akakeu ra te apii anga Puka Tapu i te au oraanga tangata.
17, 18. Eaa te au tupu anga poitirere tei kitea mai i roto i tetai kimikimi anga no runga i te utuutu anga akonoanga e te ainga i mua ake i te akaipoipo anga?
17 Kua taiku atu te atikara i mua ake i te au kiteanga i roto i te Journal for the Scientific Study of Religion. I te 1991 tei roto i reira tetai atikara te ingoa “Utuutu Anga Akonoanga e te Ainga i Mua Ake i te Akaipoipo Anga: Tei Kitea i Tetai Akaraanga Pa Enua o te Au Mapu Mamaata.” Penei kua kite koe e te tupu maata ra te ainga i mua ake i te akaipoipo anga. I te mataiti ou ua ra e manganui te tuku ua atura ki te inangaro ainga, e e manganui te au mapu ou e maata ua atu to ratou au patana no te piri anga ainga. Ka rauka ainei i te au apiianga Puka Tapu i te taui i teia tu tei matauia?
18 Kua tapapa atura e toru au poropeta piri tei apii i te maro anga i te kite ‘e ko te au tamariki e te au mapu mamaata tei utuutuia mai i roto i te akono anga Kerititiano tei matauia e kare ratou e rave i te ainga i mua ake i te akaipoipo anga.’ Inara eaa ta te au tika i akari mai? I te katoa anga, i rotopu i te 70 patene e te 82 patene tei rave ana i te ainga i mua ake i te akaipoipo anga. No etai pae “ko tetai utuutu anga apiianga tau [ka akameangiti mai] i te tupu anga o te ainga i mua ake i te akaipoipo anga, inara kare i pera ana no te ‘ainga i mua ake i te akaipoipo anga no te au mapu ou.’” Kua akakite te aronga kimikimi no runga i etai au mapu mei te au pamiri akara anga tu akonoanga ra tei “akari ra i tetai tu rave anga maata atu o te ainga i mua ake i te akaipoipo anga me akaaiteia ki te au Porotetani Tumu ra.”—Na matou te au tuatua arara.
19, 20. Akapeea ta te Atua apii anga i te tauturu anga e te paruru anga i te au mapu e manganui i rotopu i te Au Kite o Iehova?
19 Kua kite mai te au poropeta i te mea ke i rotopu i te au mapu a te Au Kite o Iehova, tei rotopu ra i “te pupu tei tuke maata ra mei tetai pae.” No teaa ra? “Te tu pakari o te akono mou anga e te kapiti anga tangata tei akatupuia e te au kite anga, te au tapapa anga, e te o anga ki roto i te reira . . . penei ka akatupu noa ua i te au turanga teitei o te aru anga i te au kaveinga o te akarongo.” Kua tuatua rai ratou e: “Te tapapaia ra te Au Kite kia akatupu i te au apainga mitinari ei au tamariki e te au mapu mamaata.”
20 No reira kua puapinga meitaki te apii anga Puka Tapu no te Au Kite o Iehova na te tauturuanga ia ratou kia kopae i te tu tau kore. Mei tera te tu e paruru anga te reira mei te au maki piri ainga, kare oki e rapakau no etai pae e e kino pakari tetai pae. Tera te aiteanga kare e taomi anga no te titiri pepe, ta te Puka Tapu e apii maira e te aite ra ki te tamate anga i te oraanga. Ka tupu katoa atu ki roto i te au mapu mamaata te ka rauka i te tomo atu ki roto i te akaipoipo anga ma te au akava ngakau ma. Tera te aiteanga e au akaipoipo anga tei patuia ki runga i tetai tango tamou tikai. Na te au apiianga mei teia e tauturu ia tatou kia autu atu, kia meitaki atu te oraanga kopapa, e kia mataora atu.
Apii Anga Papu
21. Eaa te au mea ta Paulo i akakite tikai no to tatou tuatau nei?
21 I teianei ka oki ana ki muri kia 2 Timoteo 3:3, 4 (NW), e e akara eaa atu ta Paulo i tuatua te ka akariro i to tatou au tuatau kia ngata no te akono atu no te manganui—kare ra no te katoa anga: “Kare [te au tangata] i va no tetai ua atu koreromotu anga, ei akakino, ma te kore e akatere-uaorai, ei roto riri, ma te kore e aroa no te tu meitaki, ei pikikaa ra, ei manako pakari, ei kiia i te tu parau, [e] ei aronga inangaro i te au mea e navenave ra kare ei aronga inangaro i te Atua.” Mei teaa atura te tika! Noatu rai, ka riro te apii anga mei te Puka Tapu ei paruru ia tatou e ei akapapa ia tatou kia autu atu, kia manuia.
22, 23. Kua taopenga a Paulo i tana papaanga ma teea raurau anga papu, e eaa tona aiteanga?
22 Kua taopenga te apotetoro ko Paulo i tana papaanga ma tetai raurau anga. Kua taui aia i te apinga openga ei akauenga Atua te ka akapuapinga maata katoa ia tatou. Kua taiku a Paulo i te aronga “e tutu akono i te Atua ra inara kua pikikaa ia i tona ririnui; e mei teia aronga nei e uri ke.” Kia akamaara e ko te au mapu i roto i etai au akonoanga e teitei atu to ratou numero i te no te ainga i mua ake i te akaipoipo anga. Noatu oki, e te averiti ua ra te turanga o te tu akono tau kore o te aronga aere pure, kare ainei te reira i te akapapu anga e e ririnui kore ta ratou tu akamori anga? Pera katoa, te taui ra ainei te au apiianga akonoanga e akapeea te au tangata i te angaanga anga i roto i te pitiniti, e akapeea ratou i te akono anga atu ma te au tangata i raro ake ia ratou, me kore ra akapeea ratou i te akono anga atu i te kopu tangata?
23 Te akari ra ta Paulo au tuatua e e tau tatou kia taangaanga i ta tatou e apii ra mei te Tuatua na te Atua, te raukaanga tetai tu akamori tei akari ra i te ririnui tikai o te akonoanga Kerititiano. No runga i te aronga e ririnui kore ta ratou tu akamori, te akakite maira a Paulo kia tatou e: “Mei teia aronga nei e uri ke.” E akaue anga taka ua tera, te ka apai mai i te au puapinga papu no tatou.
24. Akapeea te raurau anga ia Apokalupo pene 18 i te aiteite anga ki ta Paulo ako anga?
24 Na teea tu? Te akatutu maira te puka openga o te Puka Tapu i tetai vaine akatutu ua, e vaine akaturi, tei kapikiia ko Babulonia Maata. Te akari maira te tika e te akatutu ra a Babulonia Maata i te patireia o te ao katoa o te akonoanga pikikaa, ta te Atua ko Iehova i akara matatio ra e i patoi atu. Inara, kare tatou e tau kia kapitiia atu. Te raurau ra a Apokalupo 18:4 ia tatou e: “Ka aere ke mai ana kotou ki vao, e aku au tangata, kia kore kotou e riro ei rave katoa i tana ra au ara, kia kore kotou e mate katoa i tona ra au mate.” Kare ainei e ko te reira rai ta Paulo tuatua i akakite, “e mei teia aronga nei e uri ke”? Na ta tatou aruanga ra ko tetai atu tu teia e puapingaiaʼi tatou mei te apii anga a te Atua.
25, 26. Eaa te tuatau ki mua te vaira no te aronga tei ariki ra i teianei e tei taangaanga ra i te apii anga mei ko mai i te Atua ko Iehova?
25 Kare e roa ka akao titika mai te Atua iaia ki roto i te au angaanga a te tangata nei. Ka takore aia i te akonoanga pikikaa katoatoa e te toenga o te akatereanga kino o teianei. Ka riro te reira ei tumu no te rekarekaanga, mei ta Apokalupo 19:1, 2 e akakite maira. I te enua nei ko te aronga tei ariki ra e tei aru i te apii anga a te Atua te ka akatikaia kia tamou ua atu i te akono i tana au apiianga me topa atu te au manamanata o teia au tuatau kikino ra.—Apokalupo 21:3, 4.
26 Ka riro te nooanga i roto i te reira Parataito enua tei akaokiia mai ei rekareka anga tikai tei maata atu i ta tatou i manako. Te taputou maira te Atua e ka rauka ia tatou, e ka rauka ia tatou i te irinaki papu tikai iaia. No reira te oronga maira aia i te tumu maata no te ariki e te aru i tana apiianga tauturu. Aea? Ka aru ana tatou i tana au apii anga i teianei i to tatou au tuatau kikino nei e e aere ua atu ki roto i te Parataito tana i taputou mai.—Mika 4:3, 4.
Au Manako no te Akamanako
◻ Akapeea to Iehova iti tangata i te puapinga angaia mei tana ako anga no runga i te apinganui?
◻ Kua akakite tikai tetai makatini Ietuiti i teea au tupu anga meitaki te tupu ra ki te au tavini o te Atua na roto i te taangaanga anga i tana Tuatua?
◻ Te akakite maira tetai kimikimi anga i Tamapia i teea au puapinga tei tupu ra ki te au pamiri tei taangaanga ra i te apii anga tu-Atua?
◻ Eaa te paruru anga ta te apii anga tu-Atua e oronga maira no te au mapu?
[Pia i te kapi 15]
E TUPUANGA KINO TIKAI!
“Te aro atura te au mapu ou i te kino o te AIDS no te mea te reka ra ratou i te tamatamata i te ainga e te au apinga akakona, te noo anga i te oraanga akanavenave ra no teia taime, e no te mea te manako ra e e mate kore ratou e te patoi ra i te mana akaaere,” i karangaʼi tetai ripoti tei orongaia ki tetai uipaanga no runga i te AIDS e te au mapu ou.—New York Daily News, Tapati, Mati 7, 1993.
“Te mama maira te au mapu tamaine ou rave ainga ra ei ‘arataki anga mua’ te ka aru mai o te maki AIDS, kua kiteaia e tetai apiianga kimikimiia na te Pa Enua Taokotaiia i Europa, Aperika e Asia Tonga Itinga.”—The New York Times, Varaire, Tiurai 30, 1993.
[Au Tutu i te kapi 16, 17]
Te riro ra te apii anga Puka Tapu ei puapinga ki te Au Kite o Iehova i roto i te putuputuanga e i te kainga