Au Uianga a te Aronga Tatau

Ia Ebera 2:14, eaa ra a Satani i kapikiia ai e “nona te mate ra”?

E tapoto ei i te pauanga, te karanga ra a Paulo no Satani, e na roto iaia uaorai me kare na roto i tona au rima rave, ka rauka i te akatupu i te mate o te au tangata ra. E rotai ei ki te reira, kua kapiki a Iesu ia Satani “e ta tangata aia mei ito mairai.”​—Ioane 8:44.

Penei ka mama mai te marama anga tarevake no runga ia Ebera 2:14 no te taiku anga a etai au urianga i te uri anga i te reira, te karanga anga e tei ia Satani te “mana no te mate” me kare te “mana i runga ake i te mate.” (King James Version; Revised Standard; New International Version; Jerusalem Bible) I te akaraanga te karanga ra taua au urianga e tei ia Satani te kite tei kotinga koreia kia ta i tetai ua atu tangata tana i iki ra. Inara, kare ko te reira te tu. Me koia ia, penei ka takore pouroa atu aia i te au tangata akamori o Iehova mei runga i te enua nei i te au mataiti i topa akenei.​—Genese 3:15.

Te taiku ra te tuatua Ereni i te “mana i runga ake i te mate” i roto i etai au urianga e “te ravenga i te akatupu anga i te mate” i roto i te New World Translation koia oki “kraʹtos tou tha·naʹtou.” Te tou tha·naʹtou e tu ia no te tuatua ko te aiteanga e “mate.” Te tumu aiteanga tikai o kraʹtos te “ririnui, maroiroi, mana.” E mea tau ei ki te Theological Dictionary of the New Testament, te akataka ra te reira e “te vai anga e te puapinga o te ririnui me kare te maroiroi kare no te taangaanga anga i te reira.” No reira, i roto ia Ebera 2:14, kare a Paulo e karanga ra e tei a Satani te mana tikaanga tikai i runga ake i te mate. Kareka ra, te tou ra aia ki to Satani tu me kare te raukaanga i te akatupu i te mate.

Akapeea ra a Satani i te taangaanga anga i “te ravenga i te akatupu anga i te mate”? I roto i te puka a Iobu, penei kua tatau ana tatou e tai tupu anga ma te turanga tuke ra. Te karanga ra te papa anga e kua taangaanga a Satani i tetai uriia kia ‘akatupu i te mate’ ki ta Iobu tamariki. Inara, e akara e, ka rave ua a Satani i teia ma te akatikaanga a te Atua, tei orongaia atu no te mea kua iki takereia te maro anga maata. (Iobu 1:12, 18, 19) E tikai, kare i rauka ana ia Satani i te ta ia Iobu uaorai. Kua arai ia taua tikaanga. (Iobu 2:6) Te akaari ra teia e noatu rai, i tetai atianga, kua rauka oki ia Satani i te akatupu i te mate o te au tangata tiratiratu, kare ra tatou e mataku atu e ka rauka iaia i te takore i to tatou au oraanga i tana i anoano ra.

Kua akatupu katoa a Satani i te mate na roto i te au rima rave tangata. No reira, e manganui te au Kerititiano kua tamateia no to ratou akarongo, ko etai kua taia e te au pupu riri me kare kua tamate tau koreia na te akauenga a te au opita kavamani me kare te au akava kino.​—Apokalupo 2:13.

Tei maata atu, i tetai taime kua akatupu a Satani i te mate na te akakokoanga i te au tu paruparu o te tangata. I to Iseraela tuatau ra, kua ako atu te peroveta ko Balaama i te ngati Moabi kia akavare i te ngati Iseraela kia ‘ara ai ia Iehova.’ (Numero 31:16) Kua akatupu te reira i te mate e tere atu i te 23,000 ngati Iseraela. (Numero 25:9; 1 Korinetia 10:8) I teia tuatau, kua topa katoa etai ki roto i ta Satani “ravenga pakari” e kua akavareia atu ki roto i te ainga tau kore me kare i tetai au ravenga akono kore i te Atua. (Ephesia 6:11) E tika tikai, ko taua aronga ra kare e ruti viviki i to ratou au ora. Inara ka ruti ia ratou te oraanga mutu kore, e na taua tu oki i akatupu ei a Satani i to ratou mate.

Noatu e kua kite tatou e ka rauka ia Satani i te akatupu i te kino, kare e anoanoia kia mataku atu tatou iaia. I to Paulo tuatua anga e tei ia Satani te ravenga i te akatupu anga i te mate, kua karanga katoa aia e kua mate a Karaiti kia rauka iaia ra “i te akangere atu [ia Satani]; . . . E kia akaora oki aia i te aronga i tuikaa i te mataku i te mate, e ope ua ake to ratou ora anga nei.” (Ebera 2:14, 15) Ae, kua tutaki a Iesu i te oko e no reira kua akarangatiraia mai te au tangata irinaki ra mei te tuikaa anga i te ara e te mate.​—2 Timoteo 1:10.

Ae, e manako anga tau ia kia akamanako e tei ia Satani te ravenga i te akatupu anga i te mate, inara te papu nei ia tatou e ka rauka ia Iehova i te taui i tetai ua atu kino tei akatupu ia e Satani e tana au rima rave. Te akapapu maira a Iehova kia tatou e na Iesu tei akatuia ra e ‘akakore i te angaanga a te diabolo.’ (1 Ioane 3:8) Na roto i te mana o Iehova, ka akatu mai a Iesu i tei mate ra e i reira ka takore atu ei i te mate. (Ioane 5:28, 29) I te openga ra, ka akatuera pu ua mai a Iesu i te au kotinga o to Satani mana na te tapeka anga iaia. E ka tukunaia atu ei a Satani ki te takore anga mutu kore ra.​—Apokalupo 20:1-10.