Eaa ra te Atua Kare e Akarongo ki te au Pure Katoatoa?

E mareka ana to tatou Metua i te rangi, ko Iehova, i te akarongo ki ta tatou au pure ngakau tae. Inara e au apinga tetai te ka tāpu iaia kia pau mai i ta tatou au pure. Eaa teia au apinga, e eaa ta tatou ka akamaara me pure tatou? Teia tetai au kaveinga Pipiria.

E au tangata i roto i te are pure, e tatau ra i te pure mei roto i tetai puka pure.

“Kia pure kotou, auraka e maata te tuatua rikiriki puapinga kore.”—Mataio 6:7.

Kare te Atua e inangaro ia tatou kia taokioki i te au pure tamou ngakau me kore kia tatau mei roto i tetai puka pure. Mari ra, te inangaro ra aia kia tuatua tatou mei roto i to tatou ngakau. Akamanako ana mei teaa toou tu me tuatua taokioki toou oa i tana tuatua kia koe i te au rā ravarai. Ko te au oa meitaki, ka akakite aia i te au mea katoatoa i roto i tona ngakau. Me akakite koe i toou uaorai manako na roto i taau pure, te akariro ra koe i to tatou Metua i te rangi ei oa noou.

E tangata e akara ra ki runga iaia e raku ra i tana tiketi pere moni.

“Te pati ra oki kotou, e kare a kotou i rauka, no te mea te apa na ta kotou pati anga.”—Iakobo 4:3.

Kare tatou e tapapa i te Atua kia pau mai i ta tatou au pure, me ka pati tatou i te au apinga kua kite tatou e kare aia e inangaro ia tatou kia rave. Ei akaraanga, ka pau mai ainei a Iehova i te patianga a tetai tangata pere moni kia manuia aia, me kua ako mai te Atua eiaa tatou e noinoi apinga e kia irinaki i te au ravenga purepure kia rauka te manuia? (Isaia 65:11; Luka 12:15) Kare tatou e tapapa ia Iehova kia pau mai i tera tu pure! Kia pau mai te Atua i ta tatou pure, ka akapapu tatou e kua rotai ta tatou patianga ki tana i akakite i roto i te Pipiria.

E orometua te pure ra no tetai au vaeau.

“Ko tei ariu ke, i tona taringa kia kore e kite i te ture, e riro tana pure ei mea viivii.”—Maseli 28:9.

I te tuatau Pipiria, kare te Atua i pau i te pure a te aronga kare i akarongo ki tana au ture. (Isaia 1:15, 16) Kare rai tona manako i taui. (Malaki 3:6) Me inangaro tatou i te Atua kia pau mai i ta tatou au pure, ka tauta tatou i te akarongo ki tana au ture. Akapeea i reira me kua rave tatou i te au mea tarevake i mua ana? Ko te aiteanga ainei e kare rava a Iehova e akarongo mai kia tatou? Kare! Ka akakore te Atua i ta tatou au ara me tauiia to tatou oraanga e kia rave i te au mea te ka akamareka iaia.—Angaanga 3:19.