Aere ki mua i te Pakari mou—“Kua Vaitata te rā Maata o Iehova”
“E aere rai tatou ki mua i te pakari mou ra.”—EBE. 6:1.
1, 2. Eaa te atianga tei orongaia ki te au Kerititiano o te anere mataiti mua i roto ia Ierusalema e Iudea kia ‘oro ki te maunga’?
IA IESU i runga nei i te enua, kua aravei atu tana au pipi iaia e kua ui atu e: “Eaa te akairo o toou ra parutia e te akaopengaanga o te akatereanga o te au mea nei?” (Mata. 24:1-3, NW) Te akatupuanga mua o te totou ta Iesu i oronga kia ratou i te pauanga i ta ratou uianga, kua tupu te reira i te anere mataiti mua. Kua tuatua a Iesu i tetai tupuanga tuke ua ake rai te akairo maira e te vaitata tikai maira te openga. I te kite atu anga i taua tupuanga ra, ko “te aronga e noo i Iudea ra, ka oro ratou ki te maunga.” (Mata. 24:15-22)) Ka kite ainei te au pipi a Iesu i te akairo e ka aru i tana au ikuikuanga?
2 Vaitata atu ki te toru ngauru mataiti i muri mai, i te mataiti 61 T.N., kua tata te apoteotoro ko Paulo i tetai karere pakari e te tau ki te au Kerititiano Epera e noo ra i Ierusalema, e i te au ngai takapini ra ia reira. Kare a Paulo e tona au taeake irinaki i kite e ko te akairo no te akamata anga i te “mate maata” e rima ua mataiti i mua atu. (Mata. 24:21) I te mataiti 66 T.N., kua arataki a Cestius Gallus i te pupu vaeau Roma ki tetai tamakianga vaitata rai e ka autuia a Ierusalema. Inara kua akaruke poitirere ua aia e tona pupu vaeau, i te oronga anga i te atianga ki te au Kerititiano kia oro ratou e kia ora atu.
3. Eaa te akoanga ta Paulo i oronga ki te au Kerititiano Epera, e no teaa ra?
3 Ka anoano taua au Kerititiano ra i te kite karape e te marama i te pae vaerua kia kite ratou i te au tupuanga e tupu ra e kia oro. Inara, kua riro mai tetai pae ei “kamakura.” Mei te au pepe pae vaerua rai ratou te anoano ra i te “u.” (E tatau ia Ebera 5:11-13.) Pera katoa tetai pae tei aaere ana i te arataa o te tuatua mou no te au mataiti e manganui te akaari maira i te au akairo no “te akaruke anga i te Atua ora.” (Ebe. 3:12) E peu matauia na tetai aronga i te akaruke i te au uipaanga Kerititiano i te taime tikai e tupu ra teia au kino ‘te vaitata anga mai taua rā ra.’ (Ebe. 10:24, 25) Kua oronga a Paulo i te akoanga tau kia ratou, na te tuatua anga e: “E teianei e vaio atu ana i te tuatua mua o te Mesia; e aere rai tatou ki mua i te pakari mou ra.”—Ebe. 6:1.
4. Eaa ra i puapinga ai kia vai matakite ua tatou i te pae vaerua, e eaa te ka tauturu ia tatou kia rave i te reira?
4 Te noo nei tatou i te tuatau o te akatupuanga openga o ta Iesu totou. “Kua vaitata te rā maata o Iehova”—te ra te ka takore i te akatereanga katoa o Satani. (Zepha. 1:14) No reira, kia vai matakite ua rai tatou i te pae vaerua. (1 Pete. 5:8) Te rave tikai ra ainei tatou i te reira? Ka tauturu mai te tu pakari mou Kerititiano ia tatou kia akara mou e teiea tatou i roto i teia tuatau.
Te Tu Pakari Mou ei Kerititiano
5, 6. (a) Eaa te o maira ki te pakari mou i te pae vaerua? (e) No te aere anga ki mua ma te pakari mou te umumuuia ra te tauta anga i roto i teea ngai e rua?
5 Kare a Paulo i akamaroiroi ua i te au Kerititiano Epera o te anere mataiti mua kia aere ki mua ma te pakari mou, kua akakite katoa ra aia kia ratou e eaa te o maira ki te tu pakari mou i te pae vaerua. (E tatau ia Ebera 5:14.) Kare te “tangata pakari ” e mareka ua i te kai i te “u.” E kai ana ratou i te “kai pakari.” No reira, kua kite ratou “i te apiianga mua” e “te au mea oonu” o te tuatua mou. (1 Kori. 2:10) Tei maata atu, kua tereniia to ratou kite ngakau—na te taangaanga anga i ta ratou i kite—na te tauturu anga ia ratou kia kite i te meitaki e te kino. Me aro atu ratou i tetai ikianga, ka rauka teia tereni anga ia ratou kia kite e eaa te o maira i roto i te au kaveinga Tuatua Tapu e akapeea me taangaanga i te reira.
6 “E tau ia tatou kia akamaata tikai i te akono i te au tuatua ta tatou i akarongo akenei,” i tata mai ei a Paulo, “ko te topa ua aea ia tatou a muri ake.” (Ebe. 2:1) Ka tupu taua topa anga ra mei te akarongo, i mua ake ka kite ei tatou. Ka rauka ia tatou i te kopae i teia tupuanga na te akarongo anga i te ‘akamaata tikai anga i te akono i te au tuatua’ i te tuatau e akamanako ra tatou i te au tuatua mou pae vaerua. No reira, ka anoanoia tatou tataki tai kia ui e: ‘Te akamanako ra ainei au i te au apiianga mua? Te rave ua ra ainei au i teia au mea, e kare toku ngakau e piri tikai ana ki te tuatua mou? Akapeea au e tere meitaki ei i roto i te tuatua mou?’ Te aere anga ki mua ma te pakari mou e rua ngai te umuumuia maira ta tatou tauta anga. Kia kite meitaki tatou i te Tuatua a te Atua. E ka anoanoia tatou kia kite mai i te akarongo.
Kia Kite Meitaki i te Tuatua
7. Akapeea tatou e puapingaia ai i te kite meitaki anga i te Tuatua a te Atua?
7 “Ko tei kai katoa oki i te u anake ra, kare ïa i pakari i te tuatua-tika ra: e kaiu rai aia,” i tata mai ei a Paulo. (Ebe. 5:13) Kia rauka te tu pakari mou, kia kite meitaki tatou i te Tuatua a te Atua, ko tana karere tei orongaia mai kia tatou. No te mea e tei roto teia karere i tana Tuatua te Pipiria, te anoanoia ra tatou kia riro ei aronga apii meitaki i te au Tuatua Tapu e te au puka a “te tavini akono meitaki e te pakari.” (Mata. 24:45-47) I te apiianga na roto i teia mataara te akatika ra ia tatou kia kite i to te Atua manako, ka rauka i te tauturu ia tatou kia tereni i to tatou kite ngakau. E akamanako ana i te akaraanga o tetai Keritititano ko Orchid tona ingoa.a Kua karanga aia e: “Ko te akamaara anga tei akakeu maata tikai i toku oraanga, koia oki ko te tatau putuputu anga i te Pipiria. Kua pou rai iaku e rua mataiti i te tatau i te katoaanga o te Pipiria, inara i te akaraanga ko te taime mua teia i kite ei au i Tei Anga mai iaku. Kua kite mai au i tona tu, tana e reka ana e tana e reka kore ra, te ririnui o tona mana, e te oonu o tona pakari. Te tatau anga i te Pipiria i te au ra ravarai kua tauturu te reira iaku i roto i te au turanga ngata tikai o toku oraanga.”
8. Eaa te mana ririnui te ka rauka i te Tuatua a te Atua i te akakeu ia tatou?
8 Te tatau putuputu anga i tetai tuanga o te Tuatua a te Atua, te akatika ra i te reira karere kia akakeu i “te ririnui” i rungao ia tatou. (E tatau ia Ebera 4:12.) Ka rauka te reira tatau anga i te akatikatika ia tatou uaorai e kia mareka mai a Iehova ia tatou. Te anoano uaorai ra ainei koe i te akapapa meitaki kia maata atu te tuatau i te tatau i te Pipiria e te akamanako oonu anga i ta te reira e akakite maira?
9, 10. Eaa te o maira i te kite meitaki anga i te Tuatua a te Atua? Akatutu mai.
9 E kite meitaki ei i te Pipiria e maata te o maira i te kite ua i ta te reira e tuatua ra. Ko te au Kerititiano kare e pakari roa ana e manga kite ua to ratou no runga i ta te Tuatua a te Atua e tuatua ra. Inara, kare ratou e taangaanga ana i te reira e te akara anga i te puapinga tikai o te reira. Kare ratou i akamatau ia ratou uaorai ki te karere, na te akatika anga i te reira kia arataki ia ratou i te rave anga i tetai au ikianga pakari i roto i to ratou oraanga.
10 E kite meitaki ei i te Tuatua a te Atua, ko te aiteanga kia kite e eaa ta te reira e tuatua ra e kia taangaanga i te reira kite. Te akaari maira te tupuanga o tetai tuaine Kerititiano ko Kyle tona ingoa e akapeea aia i te rave anga i teia. Kua pekapeka a Kyle raua ko tetai oa angaanga. Eaa tana i rave i te akatikatikaanga i te manamanata? Kua akamarama mai aia e: “Ko te irava taku i manako viviki mai koia oki ko Roma 12:18, te karanga ra e: ‘Kia noo au ua kotou i roto i te tangata katoa nei.’ No reira kua rave au i tetai akanoonooanga i te aravei atu i teia oa angaanga i muri ake i te angaanga.” Puapinga tikai ta raua pukapuka anga, e kua rekareka te oa angaanga e kua rave a Kyle i teia takainga. “Kua kite mai au e kare rava tatou e tarevake me taangaanga tatou i te au kaveinga Pipiria,” i karanga ai a Kyle.
Kite Mai Anga i te Akarongo
11. Eaa te akaari maira e ka riro te akarongo i raro ake i te au turanga ngata tikai ei akaaoanga?
11 I te taangaanga anga i ta tatou i kite mai mei te au Tuatua Tapu ka riro ei akaoaanga, me ngata tikai te au turanga. Ei akaraanga, i muri poto ua ake i te akaora anga a Iehova i te au tamariki o Iseraela mei te tuikaanga i Aiphiti, “kua kauvae maira te tangata ia Mose” e kua ‘akakōkō ua mai rai ia Iehova.’ No teaa ra? No te mea kare e rava ana te vai no te inu. (Exo. 17:1-4) I raro ua ake i te rua marama i muri ake i te o atu anga ki roto i tetai koreromotu ma te Atua e te ariki anga kia rave i “te au tuatua katoa ta Iehova i tuatua maira,” kua aati ratou i tana ture na te akamorianga i te itoro. (Exo. 24:3, 12-18; 32:1, 2, 7-9) Kua tupu ainei teia no te mea kua roa a Mose i te aere anga, iaia e apiiia ra i runga i te Maunga Horeba, i mataku ei ratou? Kua manako ainei ratou e ka tamaki akaou mai te ngati Amaleka kia ratou e ka puapinga kore ua te ngati Iseraela me kare a Mose i reira, nana oki i arataki mai ia ratou kia autu i mua atu ana? (Exo. 17:8-16) Tano rai paa te reira, inara noatu e eaa te turanga, ‘kare rai te ngati Iseraela i akarongo ana.’ (Anga. 7:39-41) Kua raurau atu a Paulo i te au Kerititiano kia ‘akamaroiroi ratou’ kia kore e “topa atu aea tetai, mei ia ratou i topa i te akarongo kore” mei te ngati Iseraela rai i te akaari anga i to ratou mataku i te tomo atu anga ki roto i te Enua Taputou.—Ebe. 4:3, 11.
12. Akapeea a Iesu i te kite mai anga i te akarongo, e eaa te puapinga?
12 Te aere anga ki mua ma te pakari mou te umumuuia ra e kia akarongo maroiroi ua atu rai tatou kia Iehova. Mei tei akaariia mai e Iesu Karaiti, e kite putuputuia ana te akarongo na roto i te au mamae. (E tatau ia Ebera 5:8, 9.) I mua ake ka aere mai ei ki te enua nei, kua akarongo a Iesu ki tona Metua. Inara, na te rave anga i te anoano o tona Metua i runga nei i te enua, te o maira te mamae kopapa e te manako taitaia. Na roto i te akarongo i raro ake i te au turanga kino pakari, kua “akatapu ravaia” a Iesu ki tetai taoonga ou ta te Atua e manako ra nona, koia oki kia riro mai ei Ariki e ei Taunga Maata.
13. Eaa te akaari maira e me te akarongo nei tatou?
13 Akapeea ra tatou? Ka tauta ainei tatou i te akarongo kia Iehova me te aro katoa atura tatou i te au manamanata kino pakari? (E tatau ia 1 Petero 1:6, 7.) Ko te akoanga a te Atua no runga i te tu akono tau, te tu tika, te taangaanga meitaki i te arero, taau uaorai tatau anga e te apiianga i te au Tuatua Tapu, te aere anga ki te au uipaanga Kerititiano, e te piri atu anga ki roto i te angaanga tutuanga, te taka meitaki ua ra te reira. (Iosu. 1:8; Mata. 28:19, 20; Ephe. 4:25, 28, 29; 5:3-5; Ebe. 10:24, 25) Te akarongo ra ainei tatou kia Iehova i roto i teia tumu manako i raro ake i te au turanga kino? Te akaari maira to tatou akarongo e te tere meitaki ra tatou ki mua ma te pakari mou.
Te Pakari Mou Kerititiano —Eaa i Puapinga Ai?
14. Akatutu mai e akapeea te aere anga ki mua ma te pakari mou i riro ei ei paruruanga.
14 E paruru anga meitaki tikai no tetai Kerititiano kia rauka te kite ngakau tei tereni meitakiia kia kite i te mea tika e te tarevake i roto i teia ao “kite kore i te akama.” (Ephe. 4:19) Ei akaraanga, ko tetai taeake ko James tona ingoa, tei tatau putuputu e tei akaperepere maata i te au puka Tuatua Tapu, kua ariki aia i tetai angaanga e au vaine ua tona au oa angaanga. “E manganui ia ratou kare e akono ana i te tu tau,” i karanga ai a James, “e tai vaine ra akaraanga e e tu meitaki tona e kua akaari mai i te inangaro i roto i te tuatua mou o te Pipiria. Te riro anga e ko maua anake ua i roto i tetai pia angaanga, kua akamata aia i te akameamea mai iaku. Manako nei au e te kanga ua mai nei aia, inara kua kite mai au e e ngata tikai i te tapu iaia. I reira rai, kua maara mai iaku tetai tupuanga aiteite ua i roto Te Punanga Tiaki no runga i tetai taeake tei aro atu i taua timataanga aiteite ua i ko i tana angaanga. Kua taangaanga te atikara i te akaaraanga o Iosepha e te vaine a Potiphara.b Kua opara ke atu au i tera tamaine, e kua oro atu aia ki vao.” (Gene. 39:7-12) Kua rekareka a James e kare e apinga ke atu i tupu ana e kua vai rai tona akava ngakau meitaki.—1 Timo. 1:5.
15. Akapeea te aere anga ki mua ma te pakari mou i te akaketaketa anga i to tatou ngakau akatutu?
15 E puapinga katoa te pakari mou no te mea ka akaketaketa te reira i to tatou ngakau akatutu e kia kore tatou “e turori ua atu i te tuatua rikiriki ke ke tau kore ra.” (E tatau ia Ebera 13:9.) Me tauta tatou i te tere ki mua i te pae vaerua, ka akamou tatou i to tatou manako ki runga i “te au mea e maata ua atu te meitaki.” (Phili. 1:9, 10) Ka maata atu to tatou ariki rekareka anga i te Atua e i te au mea ravarai tana i oronga mai ei puapinga anga no tatou. (Roma 3:24) Ko tetai Kerititiano e “kite ra, ei tangata pakari” te akatupu ra aia i te tu akameitakianga e te pirianga vaitata kia Iehova.—1 Kori. 14:20.
16. Eaa tei tauturu i tetai tuaine kia ‘akatinamou tikai i tona ngakau’?
16 Kua akakite mai tetai tuaine ko Louise tona ingoa e, i tetai taime i muri ake i te papetitoia anga, ko te tumu maata i rave ua ai aia i te angaanga tutuanga koia oki kia akamareka ua i te au tangata. “Kare au e rave ana i tetai mea tarevake,” i tuatua ai aia, “inara kare au e inangaro roa ana i te tavini ia Iehova. Kua kite mai au e te anoanoia ra au kia rave i tetai au tauianga me te manako ra au e te oronga nei au i te au mea ravarai kia Iehova te ka rauka iaku. Te taui anga maata rava atu koia oki kia oronga ngakau tae tikai iaku ki tana akamorianga.” Na te tauta pakari anga, ‘kua akatinamou tikai a Louise i tona ngakau,’ e kua riro mai te reira ei mea puapinga i te aro atu anga aia i te au manamanata i te pae kopapa. (Iako. 5:8) Kua tuatua a Louise e, “E maata tikai taku au putoto anga, inara kua akavaitata tikai atu au kia Iehova.”
“Akarongo ma te Ngakau Katoa”
17. Eaa ra te akarongo i puapinga tikai ei i te anere mataiti mua?
17 Kua riro te akoanga a Paulo e kia ‘aere ki mua ma te pakari mou’ ei akaoraanga ki te au Kerititiano o te anere mataiti mua e noo ra i Ierusalema e i Iudea. Ko te aronga tei akarongo ki te reira te anoanoia ra te kite karape i te pae vaerua kia kite ratou i te akairo ta Iesu i oronga kia ratou kia “oro ratou ki te maunga.” To ratou kite atu anga “i te mea rikirika e taneaʼi ra, . . . te tu anga i te ngai-tapu ra,” koia oki, ko te pupu vaeau o Roma te koropini ra e te tomo maira ki roto ia Ierusalema, kua kite ratou e kua tae te taime i te oro. (Mata. 24:15, 16) I te akarongo anga ki te akamatakiteanga totou a Iesu, kua oro te au Kerititiano ki vao ake i te oire o Ierusalema i mua ake ka takoreia ai te reira, e kia tau ki ta te tangata tuatua enua o te ekaretia ko Eusebius, kua noo ratou ki roto i te oire o Pella i te au ngai maunga o Gileada. I rauka ai ia ratou i te kopae i te kino maata rava atu i roto i tetai rekoti tuatua enua no Ierusalema.
18, 19. (a) Eaa ra i puapinga ai te akarongo i to tatou tuatau? (e) Eaa te ka uriuri manakoia i roto i te atikara e aru maira?
18 Ko te akarongo tei rauka mai no te aere anga ki mua ma te pakari mou, ka riro katoa ei akaoraanga me aro atu tatou i te akatupuanga maata o ta Iesu totou no runga i taua “mate maata” aite koreia. (Mata. 24:21) Ka akarongo ainei tatou ki tetai ua atu aratakianga rapurapu no te tuatau ki mua te ka rauka mai ia tatou no ko mai i “te akaaere pikikaa kore”? (Luka 12:42) E puapinga maata tikai kia kite tatou i te “akarongo ma te ngakau katoa”!—Roma 6:17.
19 Te rauka anga ia tatou te pakari mou te umuumuia ra e kia tereni tatou i to tatou kite ngakau. Ka rave tatou i teia na te tauta pakari anga kia kite meitaki i te Tuatua a te Atua e na te kite mai anga i te akarongo. I te tupuanga ei Kerititiano pakari mou te oronga maira i te au akaaoanga takake ki te au mapu. Ka uriuri manako te atikara e aru mai nei e akapeea i te autu meitaki anga i taua au akaoaanga ra.
[Au Tataanga Rikiriki i Raro]
a Kua tauiia tetai au ingoa.
b Akara i te atikara tei tapaia e “Akaketaketaia kia Tuatua e Kare ki te Raveanga Tarevake,” i roto i te itiu o Te Punanga Tiaki o Okotopa 1, 1999.
Eaa Taau i Kite?
• Eaa te tu pakari mou i te pae vaerua, e akapeea e rauka ai ia tatou te reira?
• Eaa te tuanga ta te kite meitaki anga i te Tuatua a te Atua e akatupu ra i to tatou aere anga ki mua ma te pakari mou?
• Akapeea tatou e kite mai ei i te akarongo?
• Na roto i teea au mataara e puapinga ai tatou i te tu pakari mou?
[Tutu i te kapi 10]
Te taangaanga anga i te akoanga Pipiria ka tauturu mai ia tatou kia akono i te au manamanata na roto i tetai mataara pakari
[Tutu i te kapi 12, 13]
Aru anga i ta Iesu akoanga kua riro ei ora no te au Kerititiano mua