Te Akakeu ra te Akarongo ia Tatou Kia Rave Angaanga!

“Te kite ra oki koe e na te akarongo i akatupu i ta [Aberahama] angaanga, e no te angaanga i tika ravaʼi te akarongo.”​—IAKOBO 2:22.

1, 2. Eaa ta tatou te ka rave me e akarongo to tatou?

E MANGANUI te tuatua ra e e akarongo to ratou i te Atua. Inara, ko te akarongo manako uaia ra e ora kore ia mei te kopapa mate ra. “Koia katoa te akarongo, kare e angaanga, e mea mate ïa,” ta te pipi ko Iakobo i tata. Kua tuatua katoa aia e na te akarongo o Aberahama mataku i te Atua ra “i akatupu i tana angaanga.” (Iakobo 2:17, 22) Eaa te puapinga maata o taua au tuatua ra no tatou?

² Me e akarongo mou to tatou, kare tatou e irinaki ua i ta tatou i akarongo atu i te au uipaanga Kerititiano ra. Ka oronga ra tatou i te akapapu anga i te akarongo no te mea e Au Kite rave angaanga tatou no Iehova. Ae, ka akakeu te akarongo ia tatou kia akono i te Tuatua a te Atua i te ora anga e ka akakeu ia tatou kia rave angaanga.

Kare te Akara i te Tu e Tau ma te Akarongo

3, 4. Akapeea te tupu anga tau no te akarongo i te tu o ta tatou akono ia etai ke ra?

³ Me e akarongo tikai to tatou i te Atua e ia Karaiti oki, kare tatou e akaari i te akara i te tu. (Iakobo 2:1-4) Ko tetai papaki ta Iakobo i tata atura kare i akakite i te kore e akara i te tu tei umuumuia ra no te au Kerititiano mou ra. (Roma 2:11) E no reira, kua tuatua a Iakobo e: “Auraka kotou e mou i te tuatua a to tatou Atu ra a Iesu Mesia, i te Atu o te kakā ra, ma te akono i te tu o te tangata.” Me ka aere mai tetai tangata akarongo kore apinganui ma te tapeka auro i te rima, ma te kakau manea ki te uipaanga e kia tomo katoa mai tetai tangata akarongo kore “apinga kore oki ma te kakau kino ra,” ka tau kia aravei meitakiia raua toko rua ra, inara kua akaariia te manako anga maata ki tei apinganui ra. Kua orongaia e noo anga no ratou “ki te ngai meitaki,” inara ko te au tangata akarongo kore kare ra ana apinga kua karangaia atu e tu atu ratou me kare kia noo ki runga i te taua i te pae o nga vaevae o tetai ra.

⁴ Kua oronga a Iehova i te atinga oko o Iesu Karaiti no te aronga apinganui e te apinga kore aiteite ua. (2 Korinetia 5:14) Ina me ka akono anake tatou i te aronga apinganui ra, i reira, kua tapae ke tatou i te akarongo ia Karaiti, tei ‘riro ra aia ei apinga kore, kia maata to tatou apinga i taua apinga kore nona ra.’ (2 Korinetia 8:9) Auraka tatou e akava i te au tangata na roto i taua tu ra​—ma te manako tarevake i te akangateitei anga tangata. Kare te Atu e akara i te tu, inara me ka akaariia e tatou i te akara anga i te tu, “ei eumiumi manako kino ra” to tatou. (Iobu 34:19) Ma te anoano kia akamareka i te Atua ra, e mea tika kare tatou e tuku ua ki te timataanga kia akaari i te akara i te tu me kare ‘kia akarekareka atu i te au tangata no to tatou uaorai puapinga.’​—Iuda 4, 16.

5. Koai ma ta te Atua ra i iki “ei aronga apinga maata i te akarongo,” e eaa ta te aronga apinga maata i te pae kopapa e rave putuputu ra?

⁵ Kua akataka maira Iakobo i tei apinga maata tikai e kua raurau kia akaari i te aroa ki te katoatoa ma te kore e akara i te tu. (Iakobo 2:5-9) ‘Kua iki te Atua i te aronga apinga kore ei aronga apinga maata i te akarongo ra, e ei aronga tuanga i te basileia.’ Kua tika ra teia no te mea e putuputu te aronga apinga kore i te tere atu te akarongo vave i te tuatua meitaki ra. (1 Korinetia 1:26-29) Ei tetai pupu, ko te aronga apinganui i te pae kopapa te takinga kino ra ia etai ke no te au kaiou, te tutaki, e te au ravenga a te ture ra. Te tuatua akakino ra ratou ia Karaiti e te takinga kino ra ia tatou no to tatou apai i tona ingoa. Inara kia manako maata tatou kia akarongo i “te ture ariki,” te umuumu ra i te aroa i te tangata tupu​—kia arite te aroa i te aronga apinga maata e te aronga apinga kore oki. (Levitiku 19:18; Mataio 22:37-40) I te mea te umuumu maira te Atua i teia, no reira ko te akaarianga i te akara i te tu o te tangata te ‘rave ra i te ara.’

‘E Vi ra te Akaapa i te Aroa’

6. Akapeea tatou ka riro ei ei aronga aati ture me ka kore tatou e akono aroa ua ia etai ke ra?

⁶ Me ka aroa kore ua tatou i te akara anga i te tu o tetai ra, e aronga aati ture tatou. (Iakobo 2:10-13) Na te rave anga i tetai takainga pikikaa i teianei tu, ka riro tatou ei aronga aati i te au ture katoatoa a te Atua ra. To Iseraela kare ra i rave akaturi mari ra kua keia kua riro ei aronga aati i te Ture a Mose ra. Ei au Kerititiano, te akavaia ra tatou i “te ture rangatira ra”​—to Iseraela vaerua i te koreromotu ou, ma tana ture i roto i to ratou ngakau ra.​—Ieremia 31:31-33.

7. Eaa ra te aronga te rave ua ra i te akara i te tu ka kore ei e tau kia tapapa atu i te aroa no ko mai i te Atua ra?

⁷ Me te manako ra tatou e akarongo to tatou mari ra te rave ua ra i te akaarianga i te akara i te tu o tetai, tei roto tatou i tetai tu kino. Te aronga te aroa kore ra e te tangi kore oki ka akavaia ratou ma te kore e aroaia. (Mataio 7:1, 2) Kua tuatua a Iakobo: “E vi ra te akaapa i te aroa.” Me ka ariki tatou i te arataki anga a te vaerua tapu o Iehova na te akaarianga i te aroa i ta tatou au ravenga katoatoa, kare rava tatou e akaapaia me ka akavaia tatou. Kareka ra ka kite tatou i te aroa ua e ka autu ki rungao i te tuatua tau ketaketa me kare te akava anga tau kore ra.

Akatupu te Akarongo i te Au Angaanga Memeitaki

8. Eaa te turanga o tetai tangata te karanga ra e akarongo tona mari ra te ngere ra i te au angaanga?

⁸ I te pae atu i te akariroanga ia tatou kia aroa e kia ngakau tangi oki, ka akatupu katoa te akarongo i etai atu au angaanga memeitaki ra. (Iakobo 2:14-26) Inara, ko te akarongo manako uaia ra te ngere ra i te au angaanga kare ia e akaora ia tatou. E tika, kare e rauka ia tatou te tutaki no tetai turanga tuatua tika ma te Atua ra na te au angaanga o te Ture ra. (Roma 4:2-5) Te tuatua ra a Iakobo no te au angaanga tei akakeuia, kare na tetai ture tataia, mari ra na te akarongo e te aroa oki. Me te akakeuia ra tatou e taua au tu ra, kare tatou e tuatua ua i te au inangaro takinga meitaki no tetai oa akamori ra. Ka oronga ra tatou i te au apinga tauturu ki tetai tungane me kare tuaine te ngere ra i te kakau me kare te mate pongi ra. Kua ui a Iakobo: ‘Me ka karanga atu koe ki tetai taeake te ngere ra: Kia ora na i te aerenga, kia maanaana oki [koe], e kia merengo; kare ra i oronga atu i te mea e meitaki ei eaa ua ïa puapinga?’ Kare rava ia. (Iobu 31:16-22) E ora kore taua tu “akarongo” ra!

9. Eaa te akaari maira e e akarongo to tatou nei?

⁹ Penei te taokotai atura tatou ma te au tangata o te Atua i tetai ngai, inara na te au angaanga anake ma te ngakau katoa e raukaʼi kia turu i ta tatou manako e e akarongo to tatou. Te meitaki ra me kua kopae ke tatou i te apiianga Toru Tai e kua irinaki e okotai ua Atua mou ra. Inara, ko te irinaki ua kare ia i te akarongo. “Kua akarongo katoa oki ra te au demoni,” e kua “rurutakina” ratou i te mataku no te mea te tapapa maira te akapouanga ia ratou. Me e akarongo tikaʼi to tatou, ka akakeu te reira ia tatou kia rave i te au angaanga mei te tutuanga i te tuatua meitaki e te oronga anga kai e te kakau no te au oa akarongo te ngere ra. Kua ui a Iakobo: “Kia kite maira koe, e tera ra tangata manako kore [kare ra i ki i te kite tika i te Atua] e, ko te akarongo kare e angaanga ra, e akarongo mate ïa?” Ae, te umuumuia ra te angaanga no te akarongo.

10. Eaa ra a Aberahama i karangaiaʼi “ei metua no te peritome kore ravarai i akarongo ra?”

¹⁰ Na te akarongo o Aberahama pateriareka tau i te Atua ra i akakeu iaia kia rave angaanga. “Ei metua no te peritome kore ravarai i akarongo ra,” i “akatikaia mai [aia] i te angaanga, ka apai ei aia i tana tamaiti ra ia Isaaka ki runga i te atarau ra.” (Roma 4:11, 12; Genese 22:1-14) Ka peea naringa i ngere a Aberahama i te akarongo e ka akatuakaou mai te Atua ia Isaaka e ka akatupu i Tana taputou no tetai uanga na roto mai iaia ra? Ei reira kare rava a Aberahama e tauta kia oronga i tana tamaiti. (Ebera 11:19) No te au angaanga akarongo o Aberahama ra “i tika ravaʼi te akarongo,” me kare i akaope takiriiaʼi. No reira kua, “tika tikai atura taua tuatua i tataia [ia Genese 15:6] ra, ko tei na ko ra e: ‘Kua akarongo a Aberahama i te Atua, e i akonoia atura ïa ei tuatua-tika nana.’” Na te au angaanga a Aberahama i te tautaanga kia oronga ia Isaaka i akapapu i ta te Atua ra akakiteanga i mua akera e e tuatua tika a Aberahama. Na te au angaanga akarongo ra, tana akaari anga i tona inangaro no te Atua ra e riro akera kia tapaia “E oa no te Atua.”

11. Eaa ta tatou akapapu anga no te akarongo i te tu o Rahaba ra?

¹¹ Kua akapapuia mai e Aberahama e “i akatikaia te tangata i te angaanga, kare i te akarongo anake ua.” Ko te tika katoa ia no Rahaba, koia tetai vaine akaturi i Ieriko ra. Kua “akatikaia [aia] i te angaanga, ka āriki ei aia i nga tutaka [Iseraela] ra, e tuku atura oki na tetai mataara ke” na reira ta raua aere ke anga i to raua au enemi o Kanaana ra. I mua ake i tona araveianga i nga tutaka Iseraela ra, kua kite aia ko Iehova te Atua mou ra, e na tana au tuatua i muri akera e te akaruke anga i te akaturi anga i oronga i te akapapu anga i tona akarongo ra. (Iosua 2:9-11; Ebera 11:31) I muri ake i teianei rua o te akatauanga i te akarongo akaariia mai na te au angaanga, kua na ko maira Iakobo: “Mei te kopapa oki kia kore te vaerua, e mea mate ïa, koia katoa te akarongo kare e angaanga ra, e mea mate katoa ïa.” Me mate anake tetai tangata, kare rava e mana taangaanga, me kore e “vaerua,” i roto iaia, e kare ana apinga ka rave. Mei te reira katoa oki te akarongo manako uaia e ora kore ia e puapinga kore mei tetai kopapa mate rai. Me e akarongo tikai to tatou, ka akakeu te reira ia tatou kia rave i te angaanga tau i te Atua ra.

E Akatere i to Arero Na!

12. Eaa te tau ra kia raveia e te aronga pakari i te putuputuanga ra?

¹² Ka rauka katoa oki i te tuatuaanga e te apiianga i te oronga akapapu anga akarongo, inara te umuumuia ra tetai tapupu anga. (Iakobo 3:1-4) Ei au puapii i roto i te putuputuanga, e apainga teiaa ta te aronga pakari e te akono anga maata oki ki te Atua. E no reira, ka tau ratou kia akara matatio taakaaka i to ratou akakeu anga e te au turanga. I te pae atu i te kite e te tu karape, ka tika kia inangaro oonu teia au tangata no te Atua ra e no te au oa akarongo ra. (Roma 12:3, 16; 1 Korinetia 13:3, 4) Ka tika katoa oki te aronga pakari kia akatumu i ta ratou ako anga ki runga i te au Tuatua Tapu ra. Me ka tarevake tetai o te aronga pakari i tona apiianga e ka riro mai teia ei akatupu i te au manamanata no etai ke ra, ka akava kinoia aia e te Atua ra na roto ia Karaiti. No reira ka tau te aronga pakari kia taakaaka e kia apii oki, ma te akonoanga tiratiratu i te Tuatua a te Atua ra.

13. Eaa ra tatou ka apaʼi i te tuatua ra?

¹³ Noatu ra ko te au puapii meitaki​—ko te tika, pouroa tatou—​“te apa anake nei tatou i te au mea katoa e manganui” no te mea no te apa ua. Ko te apaanga i te tuatua tetai ia o te au tarevake maata te tupu putuputu e te akakino anga oki. Kua na ko maira Iakobo: “E kia kore tetai tangata e apa i te tuatua ra, e tangata meitaki rava aia, e tika iaia kia tapeka i te kopapa katoa ra.” Kare mei ia Iesu Karaiti ra, kare e rauka ia tatou i te akatere meitaki i to tatou arero ra. Naringa i rauka ia tatou, ka rauka katoa ia tatou te akatere i etai atu au mero o to tatou kopapa nei. I te mea, na te tavaa anga e akariro i te oroenua kia aere na te ngai ta tatou e tioi atu, e na tetai oe meangiti poepoe, noatu ko tetai pai maata ra te puia ua ra e te matangi viviki ka rauka kia tioi aereia i te au ngai ta te akatere e anoano ra.

14. Akapeea ta Iakobo akaketaketa anga i te umuumu anga no te tauta anga kia akatere i te arero ra?

¹⁴ Ka tika tatou ravarai kia akatika papu e te umuumuia ra te tauta anga tikai kia akatere oki i te arero ra. (Iakobo 3:5-12) Me akariteia atu ki tetai oroenua, e meangiti ua te tavaa ra; pera katoa oki tetai oe me akaariteia atu ki tetai pai ra. E kia akaariteia atu ki te kopapa tangata, e meangiti ua te arero nei “e akatietie maata ra tana.” I te mea te akataka maira te au Tuatua Tapu e te akamareka kore ra te akatietie i te Atua, e kimi tatou i tana tauturu kia kore tatou e rave i te reira. (Salamo 12:3, 4; 1 Korinetia 4:7) Kia tapupu katoa oki tatou i to tatou arero me akaririia mai, e na te maaraanga e e meangiti ua te ai e ka ei tetai vao rakau. Mei ta Iakobo i akakite maira “e ai katoa te arero nei” ma te mana kia akatupu i te kino maata ra. (Maseli 18:21) No teaa ra, ko tetai arero tau kore “e putunga no te au kino ravarai nei”! Pouroa te au ravenga kikino o teianei ao tau kore i te Atua ra te taokotaiia ra ma te arero akatere koreia. Na te reira te akatupuanga i te au mea kikino mei te tuatua akakino ra e te apiianga pikikaa. (Levitiku 19:16; 2 Petero 2:1) Eaa toou manako? Kare aina e tau to tatou akarongo kia akakeu ia tatou kia rave pakari i te akatereanga i to tatou arero?

15. Eaa te tu kino penei ka akatupuia na te arero tavaa koreia?

¹⁵ Ko te arero kare ra i tavaaia ‘ka akaviivii takiri ia tatou nei.’ Ei akataunga, me ka mou tatou e te pikikaa putuputu ra, penei ka matauia tatou ei au tangata pikikaa. Inara, akapeea, te arero tau kore ra ‘i te tutungi i te au mea katoatoa’? Na te akariroanga i te oraanga kia arite atu ki tetai porotaka anga kino. Penei ka pekapeka tetai putuputuanga katoa na tetai arero akatere koreia ra. Te taiku ra Iakobo i “te po,” koia te O o Hinoma ra. Tei taangaangaia i mua ana no te atinga tamariki, e kua riro mai te reira ei akaputu anga teita no Ierusalema kia tutungiia. (Ieremia 7:31) No reira ko Keena e akatutu anga no te akapouanga. I tetai tu, te akataka maira Keena i tona mana akapou ki to te arero tau kore ra. Me ka kore tatou e tavaa i to tatou arero, penei ka riro tatou uaorai kia pakapaka i te mura o te ai ta tatou i akamata ra. (Mataio 5:22) Penei ka akaateaia tatou i te putuputuanga no te akakinoanga i tetai ke ra.​—1 Korinetia 5:11-13.

16. I te manako anga no te tu kino te ka rauka kia akatupuia na te arero tau kore ra, eaa ta tatou ka tau kia rave?

¹⁶ Penei mei taau i kite i te tatauanga i te Tuatua a te Atua ra, kua akaue a Iehova kia mana te tangata ki rungao i te au manu katoa i angaia ra. (Genese 1:28) E kua akararataia te au tu mea ora katoatoa ra. Ei akatauanga, kua tereniia te au falcon kua taangaangaia ei arumaki. Te ‘au ovi’ ta Iakobo i taiku ra penei te kapiti ra i te au ovi tei akatereia e te aronga akararata ovi ra. (Salamo 58:4, 5) Te rauka katoa ra i te tangata te akatere i te au toora, inara ei au tangata ki ua ra i te ara kare e rauka takiri ia tatou kia akatere i te arero ra. Tera ra, ka tau tatou kia kopae ke i te tuatua anga, akakino, kokoi, me kare akaapa anga. Ka rauka kia riro tetai arero tuatua tau kore ra ei apinga akakino tei ki ra i te poitini kavangia. (Roma 3:13) E mea mii ra, kua akaariu ke te au arero o te aronga apii pikikaa ra i etai o te au Kerititiano ra kia akaruke i te Atua ra. E no reira auraka tatou e tuku ia tatou uaorai kia akavareia e te au tuatua anga poitini apoteiti ra me e tuatua e me e tata anga.​—1 Timoteo 1:18-20; 2 Petero 2:1-3.

17, 18. Eaa te tu tau kore te touia maira ia Iakobo 3:9-12, e eaa ta tatou ka tau kia rave no runga i teia tu?

¹⁷ Na te akarongo i te Atua e te anoano kia akamareka iaia ka rauka kia paruru ia tatou i te apoteiti e ka rauka kia paruru ia tatou i te taangaanga tau kore i te arero ra. I te tou anga ki te rave anga tau kore o tetai papaki, kua tuatua a Iakobo e ‘ma te arero te akameitaki nei tatou i to tatou Metua, ia Iehova, e te akakino nei tatou i te tangata tei to te Atua tu.’ (Genese 1:26) Ko Iehova to tatou Metua no te mea koia uaorai oki “tei oronga mai i te ora, e te aʼo, e te au mea katoa, ki te au mea ravarai.” (Angaanga 17:24, 25) Koia katoa oki te Metua o te au Kerititiano akatainuia i tetai tu vaerua ra. Pouroa tatou i “tei to te Atua ra tu” te manako e te tu akono tau, kapiti katoa te aroa, te tuatua tau, e te pakari te akataka ke ra ia tatou i te manu. E, no reira, akapeea te rave anga tau na tatou me e akarongo to tatou ia Iehova ra?

¹⁸ Me ka akakino tatou i te au tangata, ka riro te aite anga e mei te mea rai e te pati ra tatou kia, me kore te kapiki ra i te kino kia topa mai ki runga ia ratou. I te mea kare tatou i te au peroveta akauruia kia mana i te tu-Atua kia kapiki i te kino ki runga i tetai tangata, ka kiteia taua tuatua ra ei makitakita anga te ka akariro i ta tatou akameitaki anga i te Atua ra ei mea puapinga kore. Kare i te mea tika no te “akameitaki e te akakino” kia puroro mai no roto i taua vaa okotai ra. (Luka 6:27, 28; Roma 12:14, 17-21; Iuda 9) Mei teaa ra te ki i te ara o te reira kia imene akapaapaa i te Atua ra i te au uipaanga e kia tuatua akakino i te oa akarongo i muri akera! Kare e rauka te vai mangaro e te vai taitai kia pupu mai mei te vaarua okotai ra. Mei “te suke kia akaua mai i te olive? e te vine oki kia akaua mai i te suke?” e kore katoa e rauka i te vai taitai kia pupu mai i te vai mangaro. Te tarevake ra tetai apinga i te pae vaerua me ka rave tatou, tei tau ra kia tuatua i te meitaki, ka tuatua uaʼi i te au tuatua tamamae. Me kua topa tatou ki roto i taua ravenga ra, e pure tatou no ta Iehova tauturu kia akamutu te tuatuaanga na roto i taua tu ra.​—Salamo 39:1.

E Rave ma te Pakari no Runga Maira

19. Me te aratakiia ra tatou i te pakari no te rangi mai, penei eaa ta tatou te ka akatupu kia etai ke ra?

¹⁹ Te umuumu katoa ra tatou i te pakari kia tuatua e kia rave i te au mea tau ki te aronga e akarongo to ratou ra. (Iakobo 3:13-18 akaaite ia NW) Me e mataku tapu to tatou i te Atua, te oronga ra aia i te pakari no te rangi mai kia tatou, e te tu karape kia taangaanga tika i te kite. (Maseli 9:10; Ebera 5:14) Te apii maira tana Tuatua e akapeea tatou i te akakite anga i “te maru e te pakari tikai.” E no te mea e maru tatou, ka akatupu tatou i te au i te putuputuanga. (1 Korinetia 8:1, 2) Ko tetai ua atu te akatietie ra e e puapii meitaki aia no te aronga akarongo ra te ‘pikikaa ra i te tuatua-mou Kerititiano,’ te akaapa ra i to ratou tuatua akateitei ia ratou uaorai. (Galatia 5:26) To ratou “pakari” no “teianei ao ia”​—te tau ra no te au tangata ara tei takake ra i te Atua. Mei te “manu rai,” e tupu anga no te manako kopapa ra. Te tau ra e “no te au demoni,” no te mea e akaparau to te au vaerua kikino ra! (1 Timoteo 3:6) No reira e rave tatou ma te pakari e te akaaka kia kore tatou e rave i tetai apinga te ka akatupu i tetai reva e tupu ei te ‘au apinga viivii’ mei te akakino ra e te akara oki i te tu o tetai kia ruperupe.

20. Akapeea koe me akataka i te pakari no te rangi maira?

²⁰ “Te pakari no runga maira, e mea iro koreia ïa,” te akariro ra ia tatou kia ma te tu akono e te pae vaerua oki. (2 Korinetia 7:11) E tu “au” to te reira, tei akakeu ra ia tatou kia aruaru i te au. (Ebera 12:14) Ka akariro te pakari no runga maira ia tatou kia “maru,” kare e ketaketa e te ngata oki no te akono atu. (Philipi 4:5) Ko te pakari no runga maira, “te akarongo ngoie” ra, te akatupu ra i te akarongo i te apiianga tu-Atua e te taokotai anga ma te akaaerenga a Iehova. (Roma 6:17) Te akariro katoa ra te pakari no runga maira ia tatou kia aroa ua, e kia inangaro oki. (Iuda 22, 23) No te ki i te “au ua meitaki,” ka akatupu i te manako no etai ke ra e te au angaanga te rotai ra ma te tu meitaki, te tuatua tika, e te tuatua mou oki. (Ephesia 5:9) E ei aronga akatupu i te au, ka rekareka tatou i “te au ua no te tuatua-tika” te tupu ruperupe ra i raro ake i te au turanga ponuiaau.

21. Kia tau ki ta Iakobo 2:1​–​3:18 ra, eaa te au angaanga te ka tau to tatou akarongo i te Atua ra kia akakeu ia tatou?

²¹ Te taka meitaki ra, i reira, e te akakeu ra te akarongo ia tatou kia rave angaanga. Te akariro ra ia tatou kia kore e akara i te tu, kia aroa ua, e kia rave i te au angaanga memeitaki. Te tauturu ra te akarongo ia tatou kia akatere i te arero e kia rave i te pakari no te rangi maira. Inara kare ko te reira te katoaanga te ka rauka ia tatou te apii mai mei teia reta. E tere atu ta Iakobo akoanga te ka tauturu ia tatou kia akono ia tatou uaorai i te tu tau no te aronga e akarongo to ratou ia Iehova.

Akapeea Koe me Pau?

◻ Eaa te tarevake no te akaarianga i te akaperepere no te tu akaraia ra?

◻ Eaa te pirianga o te akarongo e te au angaanga ra?

◻ Eaa ra i puapinga maataʼi kia akatere i te arero?

◻ Eaa te tu o te pakari no te rangi maira?