To Tatou Turanga Kauraro ki te Aronga Mana Taoonga
“No reira i tikaʼi e kia kauraro kotou.”—ROMA 13:5.
1. Eaa te tupuanga ngata tei rokoia te au Kite o Iehova i te rima o te aronga mana taoonga Nazi, e me no “te rave anga i te kino” ainei?
IA TIANUARE 7, 1940, kua tamateia a Franz Reiter ma etai atu aronga ou e toko rima no Autiria i raro ake i te apinga no te pari katu ei tamateanga. E Bibelforscher ratou, e au Kite o Iehova, e kua mate ratou no tei kore i mou i te au apinga tamaki no te Patireia o Hitler. Ko Reiter tetai o te au tauatini ua atu au Kite tei mate no to ratou akarongo i te tuatau o te tamaki rua o te ao. E manganui tei akakoromaki no te au mataiti roa ki roto i te au puakapa tamamae anga. I mamae ainei teia aronga katoatoa i “te koke” a te aronga mana taoonga a Nazi no te “rave i te kino”? (Roma 13:4) Kare rava ia! Te akaari maira etai atu tuatua a Paulo e kua akarongo teia au Kerititiano i te au akauenga a te Atua ia Roma pene 13 ra, noatu rai e kua tamamaeia ratou e te au rima o te aronga mana ra.
2. Eaa i tikaʼi kia kauraro atu i te aronga mana taoonga ra?
2 Ia Roma 13:5, kua tata te apotetoro ra e: “No reira i tikaʼi e kia kauraro kotou; kare ra oki no te mate anake ra; no te akava-ngakau katoa oki.” I mua akera, kua karanga a Paulo e te mou ra te aronga mana i “te koke” ei tumu meitaki no te mataku atu i te reira. Inara, i teianei, kua oronga mai aia i tetai tumu ketaketa atu: koia te akava ngakau. Te tauta nei tatou i te tavini atu i te Atua “ma te akava-ngakau viivii kore.” (2 Timoteo 1:3) Te akaue maira te Puka Tapu ia tatou kia kauraro i te aronga mana taoonga, e ka akarongo rai tatou no te mea te anoano ra tatou kia rave i te tika ki mua i te mata o te Atua. (Ebera 5:14) Ko te tika, ka akakeu to tatou akava ngakau tei akamatauia e te Puka Tapu kia akarongo i te aronga mana noatu me kare e tangata vaitata mai ei akara ia tatou.—Akaaiteia atu kia Koheleta 10:20.
“No Reira Oki Kotou ka Oronga Atu ei i te Tero Nei”
3, 4. Eaa te tu o te au Kite o Iehova, e eaa ra i tau ei te au Kerititiano kia tutaki i te tero?
3 I Nikeria i etai mataiti i topa akenei, e au maroanga etai no te tutaki anga i te tero. E manganui te oraanga i kore atu, e kua kapikiia te vaeau e te aronga mana ra. Kua tomo atu te vaeau ki roto i te Are Uipaanga Patireia i te ngai te raveia ra te uipaanga e kua pati ratou kia akakiteia atu te akakoroanga o te reira putuputuanga. I te kiteanga e e uipaanga apii Puka Tapu no te au Kite o Iehova, kua karanga atura te rangatira ki te au vaeau kia akaruke mai, i te na ko anga: “Kare te au Kite o Iehova i te aronga tamanata no te pae i te tero.”
4 Kua matauia taua aronga Kite o Nikeria ra no te nooanga tau ki ta Paulo au tuatua ra e: “No reira oki kotou ka oronga atu ei i te tero nei; e tavini oki ratou no te Atua, i te rave tamou marie anga i taua mea nei.” (Roma 13:6, NW) I ta Iesu oronga atu anga i te ture e, ‘E oronga i ta Kaitara kia Kaitara,’ te tuatua ra aia no te tutakianga i te tero. (Mataio 22:21) Na te aronga mana o te enua e oronga mai ana i te au mataara, te paruru anga a te akava, te ngai vairanga au puka, te au akatereanga no te rave patete, te ngai apii, te tuku mere, e te maata atura. Te putuputu ra tatou i te taangaanga i te reira au apinga. E mea tika rai kia tutaki tatou no te reira na ta tatou tero.
“E Tuku atu i te Mea Tau i te Tangata Katoatoa”
5. Eaa te aiteanga o te tuatua e “e tuku atu i te mea tau i te tangata katoatoa ra”?
5 Kua tuatua ua atura a Paulo: “E tuku atu i te mea tau i te tangata katoatoa ra, e taūnga tana ra, ei tautaūnga atu rai; e telo tana ra, ei telo ïa; ko tei matakuia ra, ka mataku atu ïa; ko tei akateiteiia ra, ka akateitei atu ïa.” (Roma 13:7) Ko te tuatua “katoatoa” te kapiti ra i te aronga mana ravarai koia te au tavini o te Atua no te tangata katoa nei. Kare etai i akataka keia. Noatu rai me te noo ra tatou i raro ake i te akatereanga poritiki kare ra tatou uaorai e reka ana, ka tutaki ra tatou i te tero. Me kare te au akonoanga atua e tutaki i te tero i to tatou ngai nooanga, ka tau ua te au putuputuanga kia akapera. E mei etai atu tangata katoa o reira, ka tau te au Kerititiano kia akono i te au mea tau i te ture ei akatopa mai i ta ratou tero no te tutaki. Inara kare e tau te Kerititiano kia akakore i te tutakianga i te tero kare ia i tika i te ture ra.—Akaaiteia atu kia Mataio 5:41; 17:24-27.
6, 7. Eaa ra i tau ei tatou kia tutaki tero noatu me ka akapouia te moni ei tauturu i tetai apinga kare tatou i akatika me kare noatu te takinga kinoia ra tatou e te aronga mana?
6 Akapeea, me e akara anga tika kore tetai tero. Me kare penei e tuanga to te moni tero te ka riro ei tutaki i tetai apinga kare tatou e akatika, mei te titiri pepe rai, te akaputu i te toto, me kare etai porokarama te patoi ra i to tatou au manako no te kore e piri atu? Ka tutaki rai tatou i to tatou au tero ravarai. Na te aronga mana te apainga no te iki e akapeea ratou i te akono anga i te moni tero ra. Kare tatou i akamanaia ei akava no te aronga mana. Ko te Atua te “akava o te enua nei,” e a tona uaorai tuatau, ka rave aia i te tuku anga i te tika ma te au kavamani i ta ratou akono anga i to ratou mana. (Salamo 94:2; Ieremia 25:31) Tae roa i te tupu anga te reira, ka tutaki rai tatou i ta tatou tero.
7 Akapeea me ka takinga kino mai te aronga mana ia tatou? Ka tutaki rai tatou i te tero no te au angaanga te raveia ra i te au ra tatakitai. No te au Kite tamamaeia i te takinga kinoangaia i tetai enua i Aperika, kua karanga te Examiner o San Francisco e: “Ka manako rai tatou ia ratou ei aronga akaraanga tau. Te tutaki papu ra ratou i te tero, te utuutu ra i te maki, e te maro atura i te tu kite kore.” Ae, kua tutaki taua aronga Kite tei takinga kinoia ra, i ta ratou tero.
“Mataku” e te “Akateitei”
8. Eaa te “mataku” ta tatou e akaari ki te aronga mana ra?
8 Ko te “mataku” i roto ia Roma 13:7 kare i te mataku tangata ua nei mari ra, e manako akangateitei i te aronga mana o te enua nei, e mataku e auraka kia aati i tana ture. Ko teia akangateitei te orongaia ra no te turanga tei o maira, kare e no te tangata anake te akaki ra i te reira turanga. I ta te Puka Tapu totou anga no te ariki o Roma ko Tiberio, kua tapaia aia e “ko tei kore e akangateiteiia.” (Daniela 11:21, NW) Inara e ariki aia, e tau oki te Kerititiano kia mataku e kia akangateitei iaia.
9. Eaa etai mataara no tatou e orongaʼi i te akangateitei ki te aronga mana tangata nei?
9 No runga i te akangateitei, ka aru tatou i ta Iesu akauenga kia kore e oronga i te taoonga tei akanooia ki runga i te turanga i te akonoanga atua. (Mataio 23:8-10) Inara no te aronga mana o te enua nei, te mataora ua nei tatou i te tuatua kia ratou ma to ratou taoonga ei akangateiteianga ia ratou. Kua taiku a Paulo i te tuatua “e Fesito teitei” i te tuatuaanga ki te kavana o Roma. (Angaanga 26:25) Kua karanga a Daniela ia Nebukanesa “E taku atu.” (Daniela 4:19) I teia tuatau, te tau ua ra te au Kerititiano kia taiku i te tuatua “E te Atu” me kare “E te Ngateitei.” Ka tika ua ia ratou kia tu me tomo mai te akava ki roto i te pia akavaanga me kare kia tupou akangateitei ki mua i tetai tutara me ko te reira te peu e matauia ana.
Kauraro Anga Tau
10. Akapeea ta Iesu akaari anga e, e au kotinga etai no te aronga mana tangata nei kia akaue mai i tetai Kerititiano?
10 I te mea te kauraro nei te au Kite o Iehova i te aronga mana tangata nei, eaa ra a Franz Reiter e etai atu e manganui i tamamaeiaʼi mei tei tupu kia ratou ra? No te mea ko to tatou kauraro anga e mea tau, e kare te aronga mana e kite ana i te au taime ravarai e e au kotinga tei akanooia i te Puka Tapu i ta ratou ka tau kia akaue mai. Me akaue mai te aronga mana i tetai apinga te akakino ra i te akava ngakau o te Kerititiano, te mamao atura te reira i te kotinga tei akatikaia e te Atua. Kua akakite maira a Iesu i teia i tana tuatua anga: “E apai mari i ta Kaisara kia Kaisara; e ta te Atua ra, e apai ïa ki te Atua.” (Mataio 22:21) Kia pati mai ra a Kaitara i ta te Atua, ka tau tatou kia akakite e no te Atua te tika mua ra.
11. Eaa te kaveinga te ariki ateaia ra, te akakite maira e, e au kotinga etai no ta te aronga mana tangata nei e akaue mai kia raveia?
11 E akakore ainei teia turanga i te mana me kare e pikikaa ia? Kare rava ia. Ko te tika, e akatotoa anga i te kaveinga tei kiteia e te maataanga o te au enua kua marama. I te 15 anere mataiti ra, kua tukuia tetai tangata ko Peter von Hagenbach ki te akavaanga no te tamataanga i te tutara e te tamataku i tetai ngai i Europa koia ra te tangata mana i reira. Ko tana tumu, te aru ua ra aia i te au ikuiku a tona atu, koia te Tutara o Burgundy, kua kopaeia tana. Ko tei manako, e kare e apa o te tangata te rave ra i te kino no te mea te aru ra aia i te ikuiku a tetai tangata mana taoonga, kua raveia te reira e manganui te au taime mei reira mairai—e maata rava atu oki ta te aronga rave kino o te tamaki Nazi ra ki mua i te aroaro o te Aronga Akava no te Ao Katoa i Nuremberg. Te mea matauia e kua kopaeia te reira manako. Kua akakite mai te Aronga Akava no te Ao Katoa i tana akavaanga e: “E apainga ta te aronga tatakitai no te ao katoa tei runga ake i te au apainga kia akarongo i tona ake enua ra, tei tukuia mai e te kavamani tatakitai o te au enua ke ke ra.”
12. Eaa etai akatauanga no te Tuatua Tapu mai e kare te au tavini o te Atua i kauraro i te au akauenga tau kore a te aronga mana ra?
12 Kua kite te au tavini o te Atua e e kotinga to te kauraro anga ta ratou ka tau kia akono ki te aronga mana taoonga ra. I te tuatau i anau ei a Mose i Aiphiti ra, kua akaue a Pharao i nga vaine Epera e rua, kia akono i te anau anga o te pepe ra, kia ta i te au pepe Epera tamaroa tei anau ouia maira. Inara, kua akaora te reira nga vaine akono ra i te au pepe. I tarevake ainei raua no te kore i akarongo ia Pharao? Kare, te aru ra raua i to raua akava ngakau, e kua akameitaki te Atua ia raua no te reira. (Exodo 1:15-20) I to Iseraela tuatau e tuikaa i Babulonia, kua akaue a Nebukanesa i tona aronga taoonga, kapiti katoa nga Epera ko Sadaraka, ko Meseka, e Abedenego, kia tipapa ki mua i te tiki tana i akatu i te ngai tikatika ua i Dura ra. Kare nga Epera e toru i akatika. Kua tarevake ainei ratou? Kare, no te mea kia aru ratou i te akauenga a te ariki ra kua akarongo kore ratou i te ture a te Atua.—Exodo 20:4, 5; Daniela 3:1-18.
“Akarongo i te Atua ei Tutara”
13. Eaa te akatauanga ta te au Kerititiano mua ra i akakite mai no te kauraro tau ki te aronga mana taoonga?
13 Mei te reira katoa, i te akaue anga te aronga mana o te ngati Iuda ia Petero raua ko Ioane e auraka e tutu aere ia Iesu, kua karanga atura raua: “E mea tika i te Atua kia akarongo atu ia kotou auraka te Atua, ka akamaara io ïa kotou.” (Angaanga 4:19; 5:29, NW) Kare i rauka ia ratou kia muteki ua. Te arataki ra te makatini The Christian Century i to tatou manako ki tetai atu turanga ngakau meitaki tei akonoia e te au Kerititiano mua ra, i tana tuatua anga: “Kare te au Kerititiano mua i o atu ki roto i te au nuku vaeau. Kua akakite maira a Roland Bainton e ‘mei te openga mai i te tuatau o te Koreromotu Ou ra ki te tuatau 170-180 T.A. e taingauru mataiti nei kare ua e akakite anga e i o atu te au Kerititiano ki te vaeau’ (Christian Attitudes Toward War and Peace [Abingdon, 1960], nga kapi 67-8). . . . Te karanga ra a Swift e ‘te manako ra a Justin Martyr e e mataara tika ia kare te au Kerititiano e rave i te ta anga.’”
14, 15. Eaa etai kaveinga no te Puka Tapu tei akatano ra i te kauraro tau no te au Kerititiano mua ra ki te aronga mana tangata nei?
14 Eaa ra te au Kerititiano mua ra i kore ei i tavini ei vaeau? Ma te ekoko kore e kua apii marie ratou tatakitai i te Tuatua a te Atua e te au ture e kua tuku i tana uaorai tika no runga i te tumuanga o tona akava ngakau tei akamatauia i te Puka Tapu. E takake ratou, “kare . . . i to teianei ao,” e kua akakore to ratou tu takake i te iki anga i te tuanga no ratou i te au tamakianga o teianei ao. (Ioane 17:16; 18:36) E pera katoa oki, na te Atua ratou. (2 Timoteo 2:19) Ko te tukuanga i to ratou oraanga no te Kavamani enua nei te oronga ra kia Kaitara i ta te Atua. Pera katoa, e tuanga oki ratou no te taeake anga i te ao katoa nei e kua tatuaia i te aroa. (Ioane 13:34, 35; Kolosa 3:14; 1 Petero 4:8; 5:9) Kare e rauka ia ratou te rave i te au apinga tamaki ma te ta anga i te au taeake Kerititiano ma te akava ngakau meitaki.
15 Kapiti katoa ki teia, kare te au Kerititiano e o atu ki te au ra akatakaia e te au akonoanga atua ei akatapu anga, mei te akamori ariki rai. Ko te tupu anga, kua manako ratou ei “aronga tuke e kino, e te tarotokakaia ra e te au tangata katoa.” (Still the Bible Speaks, na W. A. Smart) Noatu rai i tata a Paulo e ka tau te au Kerititiano ‘kia oronga i te mataku ki tei pati mai i te reira mataku, kia mataku atura iaia,’ kare i ngaropoina ia ratou te mataku maata atu, me kare te akangateitei no Iehova ra. (Roma 13:7; Salamo 86:11) Na Iesu uaorai i tuatua: “Auraka e mataku i te aronga e ta mai i te kopapa e kare e mate ia ratou te meta; mari ra kia mataku iaia te ka rauka i te tamate i te meta e te kopapa i Keena.”—Mataio 10:28, NW.
16. (a) I teea au tu e tau ei te au Kerititiano kia paunu matakite i to ratou kauraro ki te aronga mana taoonga? (e) Eaa ta te pia i te kapi 27 e akatutu maira?
16 Ei au Kerititiano, te aro atu nei tatou i te au akaaoanga mei te reira te tu i teia tuatau. Kare tatou e rave i tetai tuanga o te akamori itoro o teia tuatau nei—te taaki anga rima no te akamori itoro e etai katoa akatutuanga me kare i te irinakianga e no tetai tangata mai me kare akaaerenga te ora. (1 Korinetia 10:14; 1 Ioane 5:21) E mei te au Kerititiano mua ra, kare tatou e tuku ua i to tatou turanga kia takake ei Kerititiano.—Akaaiteia atu kia 2 Korinetia 10:4.
“Te Maru e te Kauraro Marie”
17. Eaa te ako ta Petero i oronga ki te aronga tei tamamaeia no runga i to ratou akava ngakau?
17 Kua tata te apotetoro ko Petero no to tatou turanga ma te manako tau e kua na ko ra: “Ko te mea meitaki oki te reira, kia akakoromaki te tangata i te aue no te mate tika kore, no te akava-ngakau i te Atua.” (1 Petero 2:19) Ae, e mea meitaki ia i te Atua kia tu ngaueue kore te Kerititiano noatu te takinga kinoanga, e e puapinga kapitiia mai te akamaroiroi anga i te akameitaki anga i te akarongo Kerititiano. (Iakobo 1:2-4; 1 Petero 1:6, 7; 5:8-10) Kua tata katoa a Petero e: “Me ka tamamaeia kotou no te tuatua tika, ka mataora kotou. Inara eiaa kotou e mataku i ta ratou apinga e akamataku ra, eiaa oki e taitaia. E akatapu ra i te Mesia ei Atu i to kotou ngakau, kia papa no te paruruanga ki mua i te aronga katoa e pati mai i te tumu no toou manakonakoanga, inara ka rave i te reira ma te maru e te kauraro marie anga.” (1 Petero 3:14, 15, NW) E ako anga tauturu tikai te reira.
18, 19. Akapeea e raukai te tauturu i te tu manako no te kauraro marie me ka kotingaia mai to tatou tu rangatira no te akamori e te aronga mana ra?
18 Me tupu te takinga kino no te mea kua marama kore te aronga mana i te turanga o te au Kerititiano me kore no tei tuatua ke ua te au arataki akonoanga i te au Kite o Iehova ki te aronga mana, ka riro te orongaanga i te au tika ki te aronga mana ei akameangiti mai i te au taomi anga. Ma te tu maru e te akangateitei oonu, kare tetai Kerititiano e tau kia oki i te ta i te aronga takinga kino. Inara, ka taangaanga aia i te au tu tau ki te ture te ka rauka no te paruru i tona akarongo. E oti ka akaruke aia i te au mea ki roto i to Iehova rima.—Philipi 1:7; Kolosa 4:5, 6.
19 Ka taki atu te kauraro marie a te Kerititiano kia mamao tona aerenga, ma te kore e akakino i tona akava ngakau, kia akarongo i te aronga mana ra. Ei akatauanga, me ka araiia te au uipaanga putuputuanga, ka kitea e te au Kerititiano tetai atu mataara kare ra e kite puia mai, kia rave ua atu i te kaikai anga i te kaingakai a Iehova ra. Te akakite maira te Mana Teitei Rava te Atua ko Iehova na roto ia Paulo e: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga.” (Ebera 10:24, 25) Inara ka rauka ua te reira akaputuputu anga kia rave pakariia. Noatu me e tokoiti ua te ka akaputu mai, ka papu ia tatou e ka akameitaki te Atua i te reira au akanoonoo anga.—Akaaiteia atu kia Mataio 18:20.
20. Me ka araiia te tutu aere anga i te tuatua meitaki, ka akapeea ta te au Kerititiano akono anga i te reira turanga?
20 Mei te reira katoa, kua arai etai aronga mana i te tutu aere anga i te tuatua meitaki ki te ngai tangata. Te maaraara ra te au Kerititiano te noo ra i raro ake ia ratou e, na roto mai ia Iesu uaorai, ta te Mana Teitei Rava tuatua: “E na mua ra te evangelia nei i te akakiteia atu i to te pa enua ravarai e tikaʼi.” (Mareko 13:10) No reira, ka akarongo ratou i te Mana Teitei Rava noatu eaa ta ratou ka tutaki. I te au ngai i rauka, kua tutu aere te au apotetoro i te ngai tangata e i tera are i tera are, inara te vaira etai atu ravenga e raukai te araveianga i te au tangata, koia oki te tuatua anga ki te tangata noatu iea. (Ioane 4:7-15; Angaanga 5:42; 20:20) E putuputu ra te kore te aronga mana e arai mai i te angaanga tutu aere me ko te Puka Tapu anake te taangaangaia ra—te akakite maata maira te reira ka anoanoia te au Kite ravarai kia akamatau meitaki i te uriuri manakoanga mei te Tuatua Tapu maira. (Akaaiteia atu kia Angaanga 17:2, 17) Na te mataku kore, e te kauraro marie anga, e putuputu te rauka i te au Kerititiano te akarongo ia Iehova ma te kore e akatupu i te riri no ko mai i te aronga mana taoonga ra.—Tito 3:1, 2.
21. Me ka rave ua atu a Kaitara i tana takinga kinoanga, eaa te ravenga ta te au Kerititiano ka iki kia rave?
21 Inara, i etai tuatau, ka tamou ua atu te aronga mana i te takinga kinoanga i te au Kerititiano. Ei reira, na te akava ngakau meitaki, ka rauka anake ia tatou i te akakoromaki i te raveanga i te tika. Kua aravei atu a Franz Reiter ou ra i te iki anga: e tuku ua i tona akarongo me kare e mate atu. I te mea kare i tika iaia kia akamutu i tana akamorianga i te Atua, kua rave maroiroi ua atura aia e mate atu ra. I te po i mua ake i tona matenga, kua tata a Franz ki tona metua vaine: “Apopo i te popongi e tamateiaʼi au nei. Te vai nei toku maroiroi no ko mai i te Atua ra, mei te tu e matauia ana no te au Kerititiano mou i te tuatau mamao kua topa . . . Me ka tu ngaueue kore koe e mate ua atu, ka aravei akaou tatou i te tuakaouanga.”
22. Eaa to tatou manakonakoanga, e eaa ta tatou ka rave i teianei?
22 A tetai tuatau, ka riro te au tangata ravarai ki raro ake e okotai ua ture, koia ta te Atua ko Iehova ture. Kia tae roa ki reira, ka tau tatou kia akono i ta te Atua ra akanoonoo anga ma te akava ngakau meitaki e kia tamou i to tatou kauraro anga tau ki te aronga mana taoonga e i te reira taime rai te akarongoanga i to tatou Atu Ngateitei, ia Iehova, i te au mea ravarai nei.—Philipi 4:5-7.
Te Maaraara Nei Ainei Koe?
◻ Eaa i tikaʼi kia kauraro i te aronga mana taoonga?
◻ Eaa tatou i kore ei e tau kia ekoko i te tutaki anga i te au tero tei patiia mai e Kaitara?
◻ Eaa te tu akangateitei te tika ra no tatou kia oronga atu ki te aronga mana?
◻ Eaa to tatou kauraro anga kia Kaitara i kotingaiaʼi ei te mea tau anake ua?
◻ Me ka takinga kinoia tatou no tei pati mai a Kaitara i ta te Atua nana, eaa ta tatou ka tau kia rave?
[Pia i te kapi 27]
Akangateitei, kare te akamori
I tetai popongi i te tuatau apii, kua kite atu a Terra, e tamaine ou no Kanata e Kite no Iehova, tera te puapii te arataki atura i tetai taeake nona tei apiiia ra, ki vao i te pia apii no tetai tuatau poto ua. I muri poto akera, kua pati maru ua mai taua puapii ra ia Terra kia aru atu iaia ki te opati o te puapii maata.
I to raua tae anga ki reira, kua kite a Terra i te reva no Kanata te tapoki ra i runga i te ngai tataanga o te puapii maata ra. Kua akaue atura te puapii ia Terra kia tutua atu ki runga i taua reva ra! Kua karanga aia i te mea kare a Terra i imene i te imene patireia o te enua ra e kare katoa i taaki te rima ki taua reva ra, kare e tumu nona e kore ei e rave i te reira apinga. Kare a Terra i akatika, e kua akataka atu e noatu kare te au Kite o Iehova e akamori i te reva, te akangateitei ra ratou i te reira.
I te oki atu anga ki te pia apii, kua akakite te puapii ra e koi oti ua akera iaia tetai kimikimi anga. E rua nga tamariki apiiia ra tei raveia atu ki te opati o te puapii maata e tatakitai i te rave anga e kua akaueia kia tutua ki runga i te reva ra. Ko te tamaine mua kua akono i te au peu tei matauia no te enua, inara kua tutua aia ki runga i te reva i te akaue atu anga kia pera. Ei tuke anga, ko Terra kare i imene i te imene patireia e kare katoa i taaki te rima ki te reva ra; inara, kare rava aia i akangateitei kore i te reva na te reira mataara. Kua akataka atura te puapii e ko Terra tei akaari mai i te akangateitei anga tika.—1990 Yearbook of Jehovah’s Witnesses. (Te puka Mataiti 1990 o te au Kite o Iehova.)
[Au Akameitakianga no te Tutu i te kapi 23]
French Embassy Press & Information Division
USSR Mission to the UN