E Tau te Ngateitei e te Akatapu i te Au Vaine Kerititiano

“E te au tane, e noo ia ratou ra ma te kite, i te akangateitei anga i te vaine, i te āriki paruparu ra.”​—1 PETERO 3:7.

1, 2. (a) Eaa te manako tei akakeuia ra no to Iesu tuatua anga ma te vaine Samaria i te pae ruavai ra, e no teaa ra? (Akara katoa i te tataanga i raro ake.) (e) Na te tutuanga ki te vaine Samaria ra, eaa ta Iesu i akaari mai?

I TE ruavai taito i vaitata i te oire ko Sikara i tetai avatea i te tuatau te aere atura ki te openga o te 30 T.N., kua akakite a Iesu i tona manako ngakau e akapeea te tu akono tau no te au vaine. Kua pou iaia taua popongi ra i te aaereanga na roto i te enua pukupuku o Samaria e kua tae atu ki te ruavai ma te roiroi tikai, te onge, e te kaki vai. Iaia e noo ana i te pae i te ruavai, kua aere maira tetai vaine Samaria e uti i te vai. “Ka o mai ana e inu,” ta Iesu i karanga atura kiaia. Penei kua akara atura taua vaine ra kiaia ma te umere. Kua ui atu: “Eaa ua koe, te ngati Iuda na, i pati mai ei iaku i te vaine Samaria nei i te vai?” I muri iora, i te oki mai anga tana au pipi i te okoanga kai, kua poitirere ratou, ma te manakoanga eaa ra a Iesu “i karangaranga atu ki taua vaine ra.”​—Ioane 4:4-9, 27.

² Na teaa i akakeu i te uianga a teia vaine e te manako anga poitirere o te au pipi ra? E vaine Samaria aia, e kare a te ngati Iuda au ravenga kapiti atu ma te au Samaria ra. (Ioane 8:48) Inara i te akara anga te vai maira tetai atu tumu no te manako anga. I te reira taime, kua rave te ikuiku anga rapi i te arairai i te au tane kia kore e tuatua atu ki te au vaine i te ngai tangata ra.a Inara, kua tutu atea ua a Iesu ki teia vaine ngakau tae nei, i te akakiteanga kiaia e koia te Mesia. (Ioane 4:25, 26) Na te reira ta Iesu akaari anga e kare rava aia e araiia e te au ikuiku anga tau kore i te tuatua tapu, kapiti katoa tei taakaaka ra i te au vaine. (Mareko 7:9-13) Ei tuke anga, na tana i rave e tana i apii ra, kua akakite maira a Iesu e e mea tau kia akonoia te au vaine ma te ngateitei e te akatapu.

Akapeea ta Iesu Akono Anga i te Au Vaine

3, 4. (a) Akapeea ta Iesu akono i te vaine tei akatukia atura ki tona kakau? (e) Akapeea ta Iesu ra akanoo anga i tetai akatauanga meitaki no te au tane Kerititiano ra, koia oki te au akaaere?

³ Kua akaataia mai to Iesu ra akaaroa maru no te au tangata i te mataara o tana akono i te au vaine ra. I tetai atianga e vaine tetai tei makiia i te atekeria no te raungauru ma rua mataiti e kua kimi ia Iesu i roto i te urupu tangata ra. No tona tu maki kua riro aia kia viivii i te ture no reira kare aia i tau kia aere mai ki reira. (Levitiku 15:25-27) Inara no tona tu taitaia kua pipini maira aia na muri ia Iesu. I tona akatuki anga ki to Iesu tapa kakau, kua ora iora aia i reira tikai! Noatu rai e te aere atura aia ki te kainga o Iairo, no te maki o tana tamaine, kua tapu iora Iesu. Kite akera aia e mana tei riro atu no roto iaia, kua ariu akera e akara koai tei akatukia maira ki aia. I te openga iora, kua aere maira taua vaine ra ma te tipapa anga ki mua iaia e te rutetetete anga. Ka akariri atu ainei a Iesu iaia no te aere anga mai ki roto i taua urupu ra me kare no te akatukia anga i tona tapa kakau e kare i akatikaia e ia? E tuke anga rai, kua kite aia i tona tu pumaana e te takinga meitaki. “E taku tamaine,” e nana ei, “kua ora koe i toou akarongo.” Ko teia anake te tuatau i tuatua tika atu ei a Iesu ki tetai vaine e “taku tamaine.” Mei teaa ra te akapumaana anga a taua tuatua ra i tona ngakau!​—Mataio 9:18-22; Mareko 5:21-34.

⁴ Kua akara mamao ke atura a Iesu i to te Ture. Kua kite aia i te vaerua i muri ake i te reira e te anoanoia ra te aroa e te akaaroa. (Akaaite ia Mataio 23:23.) Kua kite a Iesu i te au turanga taitaia o taua vaine maki ra e kua akamanako oki e na te akarongo i akakeu iaia. No reira kua akanoo aia i tetai akaraanga meitaki no te au tangata Kerititiano, e maata oki no te au akaaere. Me te aro atura tetai tuaine Kerititiano i te au manamanata nona uaorai me kore ra tetai turanga ngata me kare timata anga, e mea tau kia tamata te aronga pakari kia tauta i te akara kia mamao ke atu i te au tuatua me kare te au angaanga tei tupu ua akera e e akamanako ana i te au turanga e te au akakeu anga. Penei ka akakite te reira kite oonu e ko te akakoromaki, te marama, e te akaaroa e apinga anoanoia kare ko te ako e te akatikatika anga.​—Maseli 10:19; 16:23; 19:11.

5. (a) Na teea tu te arairai anga i te au vaine a te au ikuiku a te rapi ra? (Akaraia te tataanga i raro ake.) (e) Koai ma te aronga mua tei kite e tei akakite oki no runga ia Iesu i akatuakaouia maira?

⁵ Kua koropiniia e te au ikuiku anga a te rapi ra, kua arairaiia te au vaine te ora ra i te tuatau ia Iesu i runga i te enua nei kia kore e tavini ei au kite no te ture.b E akamanako ana i tei tupu i muri ua ake i to Iesu akatuakaou angaia mei te mate maira i te popongi o Nisana 16, 33 T.N. Koai tei riro ei mea mua kia akara ia Iesu tei akatuakaouia ra e kia akakite atu ki etai atu au pipi ra e kua akatuia mai to ratou Atu? Kua riro ko te au vaine tei noo vaitata ra ki te ngai o te patiti angaia e tae roa ki tona mate anga.​—Mataio 27:55, 56, 61.

6, 7. (a) Eaa ta Iesu i tuatua atu ki te au vaine tei aere maira ki te tanumanga? (e) I akapeea te manako anga mua o te au pipi tane a Iesu ra i te akakite anga a te au vaine ra, e eaa te ka kiteia mei te reira?

⁶ I te akirata i te ra mua o te epetoma ra, kua aere atura a Maria Magadala e etai atu vaine katoa ra ki te tanumanga ma te au vairakau i te akono i te kopapa o Iesu ra. I te kiteanga e kua kore te kopapa i roto i reira, kua oro atura Maria kia akakite atu kia Petero raua ko Ioane. Kua noo mai etai atu o taua aronga vaine ra. Kare i roa ana, kua mama maira tetai angera kia ratou e kua akakite kia ratou e kua akatuia a Iesu ra. Kua akaue atura taua angera ra: “Ka aere viviki ana korua, ka akakite atu ki tana au pipi.” I te aere vivikianga taua nga vaine ra e akakite i taua nuti ra, kua mama maira a Iesu uaorai kia raua. “Ka aere, ka akakite atu ki taku au taeake,” tana i tuatua kia raua. (Mataio 28:1-10; Mareko 16:1, 2; Ioane 20:1, 2) I te kore anga i kite i te aere anga mai te angera ra ma te tu mamae ngakau oki, kua oki akaou atura a Maria Magadala ki te tanumanga kare ra e tangata mate i roto. Kua mama atura a Iesu kiaia i reira, e i tona kite anga koai aia i muri akera, kua tuatua atura aia: “E aere ra koe ki toku au taeake ra, e karanga atu kia ratou e, Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra.”​—Ioane 20:11-18; akaaite ia Mataio 28:9, 10.

⁷ Ka rauka ua ia Iesu i te mama atu kia Petero, kia Ioane, me kare ki tetai atu o te au pipi tane ra na mua. Kareka ra, kua iki aia kia mareka i teia au vaine na te akariroanga ia ratou ei aronga kite mata mua i tona tuakaouanga e na te akaueanga ia ratou kia akakite i te reira ki tana au pipi tane ra. Akapeea te manako anga o te au tane ra i reira? Te akakite ra te tata anga: “Kare ra ratou i akarongo mai, mei te tuatua taeke ua ra te reira tuatua.” (Luka 24:11) Kare ainei e kua kite ratou i te tu ngata kia ariki i taua akakite anga ra no te mea no ko mai i te au vaine ra? Me koia ia, kare i roa i muri mai kua rauka ia ratou te kite anga maata tikai e kua akatuia mai a Iesu mei te mate. (Luka 24:13-46; 1 Korinetia 15:3-8) I teia tuatau, te rave ra te au tane Kerititiano ma te tu pakari ra i te akamanako i te au kite anga a to ratou au tuaine pae vaerua.​—Akaaite ia Genese 21:12.

8. Eaa ta Iesu i akakite, na tana tu akono i te au vaine ra?

⁸ E akapumaana ngakau tikai kia tamanako i te mataara ta Iesu i akono ra ma te au vaine. E tu akaaroa tikai e te tau takiri i te akonoanga i te au vaine, kare rava aia i akateitei me kare i akameangiti ia ratou. (Ioane 2:3-5) Kua kopae ke aia i te au ikuiku a te au rapi ra te takore atura i to ratou tu ngateitei e kua akakore te reira i te mana o te Tuatua a te Atua ra. (Akaaite ia Mataio 15:3-9.) Na te akonoanga i te au vaine ma te akangateitei e te tu akatapu, kua akakite tikai a Iesu i to te Atua ko Iehova ra manako ngakau i tei tau kia akono atu ia ratou ra. (Ioane 5:19) Kua akanoo katoa a Iesu i tetai akaraanga meitaki no te au tane Kerititiano kia aru.​—1 Petero 2:21.

Ta Iesu Au Apiianga no te Au Vaine

9, 10. Akapeea ta Iesu ra akakite anga i te tarevake o te au ikuiku anga a te rapi ra no runga i te au vaine, e eaa tana i tuatua i muri ake i ta te au Pharisea uianga no te kopae ra?

⁹ Kua akaapa atura Iesu i te au ikuiku a te au rapi e kua akangateitei akera i te au vaine kare na te au angaanga anake mari ra na tana au apiianga katoa oki. Ei akatauanga, e akamanako ana i tana i apii no te kopae anga e te akaturi oki.

¹⁰ No runga i tetai kopae anga, kua uiia teia uianga kia Iesu: “E tau aina i te ture kia kopae atu te tane i tana vaine i te au apa katoa nei?” Kia tau ki ta Mareko tata anga, kua tuatua a Iesu: “Ko te kopae atu i tana vaine, [auraka ra no te akaturi] ka akaipoipo ei i tetai, kua akaturi aia iaia. E kia kopae atu te vaine i tana tane, ka akaipoipo ei i tetai, kua akaturi aia.” (Mareko 10:10-12; Mataio 19:3, 9) Kua akatapu taua au tuatua mama ua ra i te tu ngateitei o te au vaine ra. Na ea?

11. Eaa te akakiteia maira no te tapeka akaipoipoanga e ta Iesu au tuatua e “auraka ra no te akaturi”?

¹¹ Te mea mua, na te au tuatua “auraka ra no te akaturi” (tei kitea ra i te tata anga Evangeria a Mataio), kua akakite mai a Iesu e ko te tapekaanga akaipoipoanga kare e tau kia manako mama uaia me kare kia momotu ngoie uaia. Kua akatika ua te apiianga a te au rapi te vaira no te kopae no te au tumu rikiriki ra mei te kinoanga i te vaine tetai mereki kai me kare no te tuatua atu anga ki tetai tangata ke ra. Ae, kua akatika uaia te kopae me ka kitea e tetai tane tetai vaine tei manea atu ki tona nga mata! Te akakite maira tetai tangata apiiia i te Puka Tapu ra: “I ta Iesu tuatua anga mei tana i rave ra . . . te turu ra aia i te au vaine na te kimianga kia akaora i te akaipoipo anga ki tetai turanga tei tau ra no te reira.” E tika oki, e mea tau no te akaipoipoanga kia riro ei taokotai anga tamouia kia raukaʼi te manako ngakau tinamou o te vaine.​—Mareko 10:6-9.

12. Na te au tuatua e “kua akaturi aia iaia,” eaa te manako ta Iesu i akamata maira?

¹² Te rua, na te tuatua “kua akaturi aia iaia,” kua oronga maira Iesu i tetai manako kare ra i akatikaia i te au akavaanga rapi ra​—te manako anga no te akaturi anga tetai tane i tetai atu vaine. Te akataka maira The Expositor’s Bible Commentary: “I te akonoanga rapi ngati Iuda ra ka apa i te akaturi tetai vaine na te kore e tiratiratu ki tana tane i te pae no te ainga; e ko tetai tane, na te pirianga ainga ma te vaine a tetai tane ke ra, ka riro e kia apa aia ki te tane ra i te akaturi anga. Inara kare roa te tane e apa ki tana vaine no te akaturi anga, noatu eaa tana i rave ana. Na ta Iesu tukuanga i te tane ki raro ake i te apainga aiteite ki ta te vaine ra, kua akateitei ake i te turanga e te tu ngateitei o te au vaine ra.”

13. No runga i te kopae, akapeea ta Iesu akaari anga e i raro ake i te akatereanga Kerititiano, ka riro e okotai turanga no te au tane e te au vaine?

¹³ Te toru, na te takiota tuatua e “kia kopae atu te vaine i tana tane,” kua kite a Iesu i te tika kia kopae atu tetai vaine i tana tane tiratiratu kore ra​—e ravenga penei kua kiteaia mari ra kare i matauia i raro ake i te ture ngati Iuda i te reira tuatau.c Kua tuatuaia e “ka rauka kia kopaeia tetai vaine me ka akatika aia me kare noatu kare aia i akatika, mari ra ko te tane na tana akatika anga anake.” Inara, kia tau ki ta Iesu, i raro ake i te akatereanga Kerititiano, aiteite te turanga no te au tane e te au vaine katoa ra.

14. Eaa ta Iesu i akaata maira i tana au apiianga?

¹⁴ Kua akakite marama mai ta Iesu au apiianga i tetai manako anga oonu no te meitaki o te au vaine ra. No reira, kare i te mea ngata kia maramaia eaa tetai papaki o te au vaine i manako aroa atu ei ia Iesu e kua akono atu ratou i tei anoanoia nona ra mei roto atu i ta ratou uaorai au apinga ra. (Luka 8:1-3) “Kare taku uaorai i taku e apii nei,” ta Iesu i karanga atura, “nana ra, na tei tono mai iaku nei.” (Ioane 7:16) Na tana i apii ra, kua akaata atura a Iesu i to Iehova uaorai akamanako anga maru no te au vaine ra.

“Akangateitei Anga i te Vaine”

15. Eaa ta te apotetoro ko Petero i tata no runga i te tu tau no te au tane kia akono i ta ratou au vaine?

¹⁵ I akara tika atu ana te apotetoro ko Petero i te mataara o ta Iesu ra akono anga i te au vaine ra. I etai 30 mataiti i muri iora, kua oronga atura Petero i te ako anga aroa ki te au vaine e kua tata atu i reira: “Koia katoa oki kotou, e te au tane, e noo ia ratou ra ma te kite, i te akangateitei anga i te vaine, i te āriki paruparu ra, e ei atu katoa oki i te aroa ua ra i te ora; kia kore ta kotou pure e topa.” (1 Petero 3:7) Eaa te aite anga o ta Petero au tuatua “akangateitei anga i te vaine”?

16. (a) Eaa te aiteanga o te nauna Ereni tei uriia ra e “ngateitei”? (e) Akapeea ta Iehova ra akangateitei anga ia Iesu i tona akatuke anga ra, e eaa ta tatou i kite mei te reira maira?

¹⁶ Kia tau ki ta tetai tangata tata tikitinari, te nauna Ereni tei uriia ra e “ngateitei” (ti·meʹ) tona aite anga ko te “moni oko, te puapinga, te ngateitei, te tu akatapu.” Etai au tu o teia tuatua Ereni kua uriia e “au apinga aroa” e e “meitaki maata.” (Angaanga 28:10, NW; 1 Petero 2:7) Ka rauka ia tatou te kite oonu i te aiteanga e kia akangateitei i tetai me ka akara matatio tatou i ta Petero taangaanga i tetai tu o taua tuatua rai ia 2 Petero 1:17 ra. I reira kua tuatua aia no te akatuke anga o Iesu ra: “I rauka oki iaia i te Atua Metua ra te akangateitei e te kakā, ka tae mai ei iaia taua reo no roto mai i te kakā maata ra e, ‘Taku tamaiti akaperepere teia, kua mareka rava au iaia.’” I to Iesu akatuke anga ra, kua akangateitei atura Iehova i tana Tamaiti na te tuatuaanga i tona mareka anga ia Iesu ra, e kua rave te Atua i te reira ma te akarongoanga atu o etai ke ra. (Mataio 17:1-5) No reira, ko te tangata tei akangateitei ra i tana vaine, kare e taakaaka atu me kare e taeke atu iaia ra. Mari ra, ka akakite aia na tana au tuatua e na tana au angaanga​—ia raua anake ua me kare i te ngai tangata—​e te manako akateitei ra aia iaia.​—Maseli 31:28-30.

17. (a) Eaa ra te ngateitei i tau ei no te vaine Kerititiano ra? (e) Eaa te tane i kore ei e tau kia manako e maata tona puapinga i roto i nga mata o te Atua i to te vaine ra?

¹⁷ Ko teia akangateitei, ta Petero i tuatua, ka tau kia ‘orongaia’ e te au tane Kerititiano ki ta ratou au vaine. (Akaaite ia NW.) Ka tau kia orongaia, kare ei tetai akaperepere anga, mari ra ei mea tau tika no ta ratou au vaine. Eaa ra i tau ei taua akangateitei ra no te au vaine? No te mea “ei atu katoa oki [ratou] i te aroa ua ra i te ora,” ta Petero i akataka mai. I te anere mataiti mua o te T.N., kua kapiki katoaia te au tane e te au vaine tei rauka ra ia ratou te reta a Petero e e aronga tuanga ma Karaiti katoa. (Roma 8:16, 17; Galatia 3:28) Kare ra i aiteite ta ratou apainga i te putuputuanga, inara i te openga ra ka kapiti katoa ratou i te tutaraanga ma Karaiti katoa ki te rangi. (Apokalupo 20:6) I teia tuatau, katoa oki, e ko te maata anga o te au tangata o te Atua e manakonako anga to ratou no te enua nei, ka riro ia ei tarevake kino roa no tetai ua atu tane ­Kerititiano kia manako e no te mea e au angaanga tana i roto i te putuputuanga, e maata atu tona puapinga i roto i nga mata o te Atua ra i to te au vaine. (Akaaite ia Luka 17:10.) E aiteite te turanga o te au tane e te au vaine i te pae vaerua ki mua i te Atua ra, no te mea kua akatueraia mai e to Iesu matenga ei atinga te tika aiteite ki te au tane e te au vaine​—koia oki te akamatara anga mai mei te akaapa anga i te ara e te mate, ma te ora mutu kore ei manako anga.​—Roma 6:23.

18. Eaa te tumu tau ta Petero i oronga ra no te tane kia akangateitei i tana vaine?

¹⁸ Kua oronga katoa maira a Petero i tetai atu tumu i tau ei te tane kia akangateitei i tana vaine, “kia kore [tana] pure e topa.” Ko te tuatua “e topa” no ko mai i tetai verepa Ereni (en·koʹpto) tona aiteanga tikai “kia tipu atu ki roto.” Kia tau ki ta Vine’s Expository Dic­tion­ary of New Testament Words, “kua taangaangaia te reira ei tavarevare i te au tangata na te akakinoanga i te mataara, me kare na te tukuanga i tetai apinga kokoi ki te arataa.” No reira, ko te tane tei kore e akangateitei i tana vaine ka kite e e arai anga tetai i te mataara i rotopu i tana pure e to Iehova ra akarongoanga. Penei ka manako ngakau te tane e e tau kore ua aia kia aravei i te Atua ra, me kare penei ka kore ua a Iehova e akarongo iaia. Te taka meitaki ra, e e maata to Iehova ra manako anga i te tu o ta te au tane akono i te au vaine.​—Akaaite ia Te Aue o Ieremia 3:44.

19. Akapeea te au tane e te au vaine i te tavini anga kapiti i roto i te putuputuanga ma te tu akatapu okotai anga?

¹⁹ Ko te apainga kia akaari i te akangateitei kare i tukuia ki runga i te au tane anake. Noatu rai e ka tau te tane kia akangateitei i tana vaine na te akonoanga aroa iaia e te tu akangateitei, ka tau katoa te vaine kia akangateitei i tana tane na te kauraro anga e te akaarianga i te tu akatapu anga oonu kiaia. (1 Petero 3:1-6) Pera katoa, kua akamaroiroi maira a Paulo kia ‘akaari akangateitei anga tetai ki tetai.’ (Roma 12:10) E kapiki anga teia i te au tane e te au vaine i te putuputuanga kia tavini kapiti ma te tu akatapu okotai anga. Me ka vai mai te reira vaerua, kare te au vaine Kerititiano e tuatua na roto i te tu te ka akakore i te mana o te aronga te rave ra i te arataki anga. Kareka ra, ka turu ratou i te aronga pakari e ka taokotai atu ma ratou katoa ra. (1 Korinetia 14:34, 35; Ebera 13:17) No ta ratou tuanga, ka akono te au akaaere Kerititiano i “te au vaine pakari ra, mei te metua vaine, e te au vaine ou ra, ei tuaine ïa, ma te akono meitaki.” (1 Timoteo 5:1, 2) Na te tu pakari, ka akamanako takinga meitaki te aronga pakari i te reo o to ratou au tuaine Kerititiano. No reira, me akaari tetai tuaine i tona tu taakaaka no te taoonga upoko teokaratiki e ka ui akatapu ua i tetai uianga me kare ka tou mai i tetai apinga te umuumuia ra te tamanako anga, ka rekareka ua te aronga pakari i te akamanako atu i tana uianga me kore manamanata.

20. Kia tau ki ta te tataanga Tuatua Tapu ra, akapeea te tu akono tau i te au vaine ra?

²⁰ Mei te akamata anga maira o te ara i Edene, kua tukuia te au vaine i te au tu peu e manganui ki roto i tetai turanga akangateitei koreia. Inara kare te reira i te tu akono anga ta Iehova ra i akakoro no ratou kia kite i te akamata anga. Noatu rai eaa te au manako anga peu no te au vaine ka vai mai, ko te tataanga no te au Tuatua Tapu Epera e te Ereni Kerititiano te taka meitaki ra te akaari anga e te tau ra te au vaine tu Atua kia akonoia ma te akangateitei e te tu akatapu. Ko te tika te reira na te Atua i oronga mai no ratou.

[Au Tataanga Rikiriki i Raro]

Eaa Taau Pauanga?

◻ Eaa te au akatauanga te akakite maira e i akono a Iesu i te au vaine ma te akangateitei e te tu akatapuia?

◻ Akapeea ta Iesu ra au apiianga i te akatapu anga i te tu ngateitei o te au vaine?

◻ Eaa i tau ei te tane kia orongaia te ngateitei i tana vaine Kerititiano ra?

◻ Eaa te apainga kia akaari i te akangateitei anga te vaira i te au Kerititiano ravarai?

[Tutu i te kapi 17]

I to ratou rekareka, ko te au vaine tu Atua te aronga mua tei kite ia Iesu tei akatuia maira e te akakite kia ratou kia akakite atu ki tona au taeake