Akapeea te Okomaata o te Tuatua Mou kia Koe?
“Ka kite ïa kotou i te tuatua-mou, e na te tuatua-mou kotou e akarangatira.”—IOANE 8:32.
1. Akapeea te tuke anga o ta Pilato taiku anga i te tuatua “tuatua-mou” mei ta Iesu ra taiku anga i te reira?
“EAA te tuatua-mou?” I ta Pilato ui anga i teianei uianga, i te akaraanga ko tona manako te taiku ra i te tuatua mou i roto i te tu matauia. I tetai pae, koi tuatua ua akera Iesu: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37, 38) Kare mei ia Pilato rai, kua taiku a Iesu i te atikara papu e kua tuatua i “te tuatua-mou.” Te taiku ra aia i te tuatua mou tu-Atua.
Te Tu o te Ao no te Tuatua Mou
2. Eaa te tuatua anga a Iesu tei akaari ra i te puapinga o te tuatua mou?
2 Kua tuatua a Paulo: “Kare oki i ope katoatoa te tangata i te akarongo.” (2 Tesalonia 3:2) Ko te reira katoa ka rauka kia tuatuaia no te tuatua mou. Noatu me ka orongaia atu te tika kia kite i te tuatua mou tei akatumuia ra ki runga i te Pipiria, e manganui te au tangata ka kopae akakoro atu i te reira. Inara, mei teaa te okomaata o te reira! Kua tuatua a Iesu: “Ka kite ïa kotou i te tuatua-mou, e na te tuatua-mou kotou e akarangatira.”—Ioane 8:32.
3. Eaa te akamatakiteanga no runga i te au apiianga akavare ra ka tau tatou kia akarongo atu?
3 Kua tuatua te apotetoro ko Paulo e kare te tuatua mou e kitea i roto i te au apiianga a te tangata e ta ratou au ikuiku anga. (Kolosa 2:8) E tika, e akavare taua au apiianga ra. Kua akamatakite a Paulo i te au Kerititiano o Ephesia e me ka tuku ratou i to ratou akarongo ki roto ia ratou ka riro ratou mei te tamariki pae vaerua rai tei “tauriuriia . . . e te matangi ra, i tera tuatua i tera tuatua . . . i te ravenga a te tangata nei, e te pakari i te ravenga tini o te pikikaa ra.” (Ephesia 4:14) I teia tuatau, te “ravenga a te tangata nei” te akatupuia ra e te tauta anga akaariuke a te aronga te patoi ra i te tuatua mou tu-Atua ra. Te akatakaia ra te “tauta anga akaariuke” e The New Encyclopædia Britannica e “te akatereanga i te tauta kia akavare i te au irinaki anga o etai atu tangata, te au tu, me kare te au angaanga.” Te tauriuri kikite ra taua tauta anga akaariuke ra i te tuatua mou ei tarevake e te akariro ra i te au pikikaa ei tuatua mou. Kia kitea te tuatua mou i te aro atuanga i taua au taomianga kino ra, ka tau kia akara matakite tatou i te au Tuatua Tapu.
Te Au Kerititiano e te Ao
4. Te orongaia ra te tuatua mou kiaai ma, e eaa te apainga ta te aronga te rauka ra ia ratou te reira?
4 I te taikuanga ki te aronga tei riro ra ei au pipi nana, kua pure a Iesu Karaiti kia Iehova: “Ka akatapu koe ia ratou i te tuatua-mou naau, ko te tuatua aau na te tuatua-mou.” (Ioane 17:17) Ka akatapuia taua aronga ra, me kare ka akataka keia, no te akakoroanga kia tavini atu ia Iehova e te akakiteanga i tona ingoa e te Patireia. (Mataio 6:9, 10; 24:14) Noatu rai e kare ia no te au tangata ravarai, te vaira te tuatua mou a Iehova ei apinga rangatira ki te katoatoa te kimi ra i te reira, noatu e no teea enua ratou, te kopu, me kare te peu. Kua tuatua te apotetoro ko Petero: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”—Angaanga 10:34, 35.
5. Eaa ra te au Kerititiano i takinga kino putuputuiai?
5 Kua tua aere te au Kerititiano i te tuatua mou o te Pipiria ma etai ke ra inara kare ratou e turouia ana i te au ngai ravarai. Kua akamatakite atura Iesu: “Ei reira e tuku ei ia kotou no te mate, e ka tamate ravaia kotou; e e makitakitaia mai kotou; e te pa enua ravarai i toku nei ingoa.” (Mataio 24:9) I te tuatuaanga no teianei irava, kua tata te tangata orometua Irish ko John R. Cotter i te 1817: “Ta ratou tauta anga [Kerititiano] kia akaou i te au oraanga o te au tangata na ta ratou tutuanga, i teianei no te akariroanga i te au tangata kia akameitaki, ka akariro tikai ia ratou kia makitakita e kia takinga kino i te au pipi no te akakite ateaanga i ta ratou au kino i rave.” Kare taua aronga takinga kino ra e “āriki i te tuatua-mou ma te inangaro, kia ora ratou.” No teia tumu, “No reira oki te Atua e tuku mai ei i te ririnui o te pikikaa ki runga ia ratou, e e akarongo atu rai ratou i taua pikikaa ra: E e ope takiri ratou i te akaapaia, i tei kore i akarongo i te tuatua-mou, i tei navenave i te tuatua-tika kore ra.”—2 Tesalonia 2:10-12.
6. Eaa te au anoano kare te au Kerititiano e tau kia tatanu?
6 Te akamaroiroi maira te apotetoro ko Ioane i te au Kerititiano te noo nei i teianei ao kino: “Auraka e anoano i teianei ao, e te au mea ravarai o teianei ao. . . . Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra no teianei ao anake ïa.” (1 Ioane 2:15, 16) I te tuatuaanga i te “au mea ravarai,” kare a Ioane i akataka ke atu i tetai mea. No teianei tumu auraka tatou e tatanu i tetai anoano no tetai ua atu mea ta teianei ao e oronga maira te ka akaanga ke ia tatou mei te tuatua mou. Na te akarongoanga i ta Ioane akoanga ka akatupu mai i tetai mana ririnui i roto i to tatou au oraanga. Akapeea ra?
7. Akapeea te kite i te tuatua mou i te akakeu anga i te aronga ngakau tika ra?
7 I te tuatau o te mataiti 2001, kua akono te Au Kite o Iehova i te ao katoa nei i te marama taki tai e tere atu i te a e te apa mirioni apii Pipiria i te ngutuare, i te apiianga i te au tangata e te au pupu i te au umuumu anga tu-Atua no te oraanga. Tei tupu mai, e 263,431 aronga tei papetitoia. Kua riro te marama o te tuatua mou ei mea okomaata ki teianei au pipi ou, e kua kopae ke atu ratou i te au taokotai anga kikino e te au tu tau kore, e te au tu akangateitei kore i te Atua te tupu maata nei i teianei ao. Mei te papetito anga mairai, kua rave tamou ratou i te akono i te au turanga tei akanooia maira e Iehova no te au Kerititiano katoatoa. (Ephesia 5:5) E okomaata ainei te tuatua mou kia koe?
Te Manako Maira Iehova ia Tatou
8. Akapeea ta Iehova ra akono i to tatou akatapu anga, e eaa i tau ei kia ‘na mua te kimi i te basileia’?
8 Noatu i to tatou au tu apa ua, te ariki aroa ua maira Iehova i to tatou akatapu anga, mei te mea rai, te itae maira aia ki raro kia akapiri vaitata atu ia tatou kiaia. Nana i reira e apii maira ia tatou kia akateitei i ta tatou au akakoroanga e te au anoano. (Salamo 113:6-8) I taua taime rai, te akatika ra a Iehova ia tatou kia akapiri vaitata atu kiaia, e te taputou maira aia i te utuutu ia tatou me “na mua . . . [tatou] te kimi i te basileia o te Atua, e te tuatua-tika nana ra.” Me rave tatou i teia e ka paruru ia tatou uaorai i te pae vaerua, te taputou maira aia: “E kapiti katoaia mai taua au mea katoa ra ia kotou.”—Mataio 6:33.
9. Koai “te tavini akono meitaki e te pakari,” e i te taangaanga anga i teia “tavini,” akapeea ta Iehova utuutu anga ia tatou?
9 Kua iki a Iesu Karaiti i tana 12 apotetoro e kua akanoo maira i te tango no te putuputuanga o te au Kerititiano akatainuia ra tei tapaia ra ko “te Iseraela o te Atua.” (Galatia 6:16; Apokalupo 21:9, 14) Kua akatakaia te reira i muri akera e ko “te ekalesia o te Atua ora ra, ko te pou e te rangorango o te tuatua-mou ra.” (1 Timoteo 3:15) Kua akataka maira Iesu i te au mema o taua putuputuanga ra e ko “te tavini akono meitaki e te pakari” e ko “te akaaere pikikaa kore e te pakari.” Ko taua tavini tiratiratu ra, ta Iesu i tuatua, ka rave i te apaianga no te orongaanga ki te au Kerititiano i “ta ratou tuanga kai i te ora mou ra.” (Mataio 24:3, 45-47; Luka 12:42) Me kare e kai ka onge tatou e mate atu. Pera katoa, me kore e kai i te pae vaerua, ka paruparu tatou e ka mate i te pae vaerua. No reira, te vai maianga o “te tavini akono meitaki e te pakari” ko tetai atu akapapu anga e te utuutu maira Iehova ia tatou. Kia ariki tamou tatou i te au orongaanga okomaata tei akonoia maira na tatou na roto i taua “tavini.”—Mataio 5:3.
10. Eaa ra i puapingai no tatou kia aere putuputu ki te au uipaanga?
10 Te o maira i roto i te kaikaianga pae vaerua i te apii uaorai. Te o katoa maira te taokotaianga ma etai atu au Kerititiano e te aereanga ki te au uipaanga putuputuanga. Te maara tika ra ainei ia koe e eaa taau i kai ana i te ono marama me kare i te ono epetoma kua topa akenei? Penei kare. Inara, noatu e eaa taau i kai kua oronga mai i te akamatutu anga taau i umuumu kia akamaroiroi ia koe. E penei kua kai koe i te kai aiteite i muri maira. Ko te tika te reira no te kai vaerua te orongaia maira i ta tatou au uipaanga Kerititiano. Penei kare e maara tika ana ia tatou te au mea ravarai ta tatou i akarongo i te au uipaanga ra. E penei e kua orongaia te au tumu aiteite e tere atu i te okotai taime. Inara, e kai vaerua ia, te puapinga ra ei meitaki no tatou. Te oronga tamou maira ta tatou au uipaanga i te akamaroiroianga meitaki, i te tuatau tau ra.
11. Eaa ta tatou au apainga me ka aere atu ki te au uipaanga Kerititiano?
11 Te tuku katoa maira te au uipaanga Kerititiano i tetai apainga ki runga ia tatou. Te akamaroiroiia ra te au Kerititiano kia ‘akono marie rai tetai i tetai,’ ma te akamaroiroi atu i te au mema o te putuputuanga kia “maata te aroa, e i te angaanga memeitaki ra.” Ta tatou teateamamaoanga, te aereanga, e te paupau anga i te au uipaanga Kerititiano katoatoa ka akamaroiroi i to tatou akarongo tataki tai e to etai ke atu. (Ebera 10:23-25) Mei te au tamariki ou rai ka iriiri i te kai, penei te umuumuia ra tetai papaki kia tauru i te akamatutu anga pae vaerua. (Ephesia 4:13) E aroa ia kia oronga i taua akamaroiroi anga ra me te umuumuia ra kia tupu ei taua aronga ra ei au Kerititiano pakari, ta te apotetoro i tata ra: “Te kai pakari ra, na te tangata pakari ïa, na te aronga no te mātau i kite ei to ratou ngakau i te meitaki e te kino.”—Ebera 5:14.
Utuutuanga ia Tatou Uaorai i te Pae Vaerua
12. Tei iaai te apainga openga kia vai tamou ua atu tatou ki roto i te tuatua mou? E akataka mai.
12 To tatou tokorua akaipoipo me kare to tatou au metua ka rauka kia akamaroiroi mai ia tatou i te aerenga no te tuatua mou. Pera katoa, te aronga pakari ka rauka kia tiaki mai ia tatou ei tuanga no te anana i raro ake i ta ratou utuutuanga. (Angaanga 20:28) Inara te vaira te apainga tikai kiea me ka akakoromaki tatou i roto i to tatou aerenga oraanga tei akatumuia ki runga i te tuatua mou ra? Ko te tika, te vaira te apainga ki runga ia tatou tataki tai. E ko te tika te reira i raro ake i te au turanga matauia e te au tuatau ngata. E akamanako ana i te tupuanga te aru mai nei.
13, 14. Mei tei akatutuia maira e tetai tupuanga ki te punua mamoe, akapeea e raukai ia tatou te tauturu i te pae vaerua te umuumuia ra?
13 I Scotland etai au punua mamoe te kaikai ra i tetai ngai matie i te aere ke atu anga tetai o ratou ki te pae o tetai pari e kua topa atu ki tetai ngai i raro ake. Kare ia i kino, mari ra kua mataku e kare i rauka kia kake akaou mai ki runga. No reira kua akamata i te aue maata mai. Kua akarongo atura tona mama, e kua akamata katoa oki aia i te aue tae roa kia aere mai te tiaki e kia apai mai i taua punua mamoe ou ra.
14 E akara i te au tupu anga. Kua kapiki te punua mamoe ra i te tauturu, kua kapiti atu te ua mamoe ra i tona reo ki tana aueanga, e kua oro mai te tiaki mamoe ra i te tauturu kia akaora i te reira. Me ka rauka i tetai manu ou ra e tona tinana mamoe i te kite i te kino e te kapiki viviki anga no te tauturu, kare ainei tatou e tau kia rave akapera me turori tatou i te pae vaerua me kare ka aro atu i tetai au kino manako koreia mei te ao o Satani ra? (Iakobo 5:14, 15; 1 Petero 5:8) Ka tau kia pera tatou, i te mea tikai e te ngere ra tatou i te kite e me no te ou ua ia tatou me kare no to tatou tu ou i roto i te tuatua mou.
Te Aruanga i te Arataki Anga Tu-Atua ka Apai Mai i te Mataora
15. Akapeea te manako ngakau o tetai vaine i tona akamata anga i te taokotai atu ma te putuputuanga Kerititiano ra?
15 E akamanako ana i te puapinga o te kiteanga i te Pipiria e te au o te manako ta te reira ka apai mai ki te aronga tei tavini ra i te Atua o te tuatua mou. Ko tetai vaine e 70 mataiti tei aere ra ki te Church of England i tona oraanga katoa kua akatika ki tetai apii Pipiria nana ma tetai o te Au Kite o Iehova. Kare i roaia kua kite aia e ko te ingoa o te Atua ko Iehova e kua kapiti atu ki te tuatuaanga “Amene” ki te pure anga ngakau tae a te katoatoa tei raveia i te Are Uipaanga Patireia. Ma te manako ngakau maata kua tuatua aia: “E kare kia akatutu i te Atua ra e e mamao ke atu i runga ake ia tatou tangata ua nei, te akara anga nei kua apai mai kotou iaia ki rotopu tikai ia tatou mei tetai oa akaperepere ra. Ko tetai mea ia kare au i kite ana i mua ana.” Penei, kare e ngaropoina i taua vaine inangaro ra i te akatupu anga mua a te tuatua mou ki runga iaia. Kia pera katoa tatou, auraka e akangaropoina e i akapeea te okomaata o te tuatua mou kia tatou i to tatou ariki mua anga i te reira.
16. (a) Penei eaa te ka tupu me ka akariro tatou i te moni ei akakoro anga maata na tatou? (e) Akapeea e kiteai e tatou te mataora mou?
16 E manganui te irinaki ra e me e maata ta ratou moni, ka mataora atu ratou. Inara, me ka akariro tatou i te raukaanga te moni ei akakoroanga maata i to tatou oraanga, penei ka mamae tatou “i te au mamae manako kare i manakoia.” (1 Timoteo 6:10, Phillips) E akamanako ana i te manganui te oko ra i te tiketi roteri, te akapou moni ra i te au casino, me kare te akamanako kite kore ua ra i te stock market, te moemoea ra i te ravenga kia maata te moni. E toko iti ua te kite ra i te moni ta ratou e manakonako ra. E putuputu te taime ko te aronga te kite atura i te reira te kitea ra e kare ta ratou apinganui i apai mai i te mataora. Mari ra, no ko mai te mataora tamou i te raveanga i to Iehova ra anoano, te raveanga angaanga ma te putuputuanga Kerititiano ma te arataki anga a te vaerua tapu o Iehova e te tauturu a tana au angera. (Salamo 1:1-3; 84:4, 5; 89:15) Me rave tatou i teianei, penei ka aere mai te au akameitakianga manako koreia kia tatou. Te okomaata ra ainei te tuatua mou kia koe kia apai mai i taua au akameitakianga ki roto i toou oraanga?
17. To Petero nooanga ma Simona, tetai tangata rapakau kiri ra eaa ta te reira e akakite maira no te tu manako o te apotetoro?
17 E akamanako ana i tei tupu ki te apotetoro ko Petero. I te mataiti 36 T.N., kua rave aia i tetai tutaka anga mitinari ki te ngai Mataataa o Sarona. Kua noo atu aia i Luda, te ngai i rapakau ei aia ia Ainea i te mate akangoru i reira kua aere atura ki Iopa. I reira kua akatuakaou maira ia Doreka. Te akakite maira a Angaanga 9:43 kia tatou: “Noo ua iora aia i Iopa e manganui te rā ki o tetai tangata ko Simona te ingoa, e tangata rapakau kiri.” Te akakite maira teianei taikuanga viviki i to Petero ra tu akono akavaavaa koreia iaia e rave ra i te angaanga orometua ki te au tangata i taua oire ra. Na ea ra? Kua tata a Frederic W. Farrar: “I te are o te tangata rapakau kiri ra kare e tangata aru ketaketa i te Ture Tuatuaia [a Mose] ra e akatikaia kia noo ki reira. Ko te kapiti anga i te au ra tataki tai ma te au kiri e te au kopapa mate o te au manu ke ke ra na teianei angaanga e te au apinga tei umuumuia ra, kua akariro i te reira ei mea viivii e te rikarika oki i te au mata o te aronga tei ketaketa ra te manako anga i te ture.” Noatu rai e me kare te ‘are o Simona i taatai ra’ i te pae i tana ngai rapakau kiri ra, te rave ra a Simona i ‘tetai angaanga tei akara rikarikaia ra e no reira kua akameangiti mai i te tu akangateitei uaorai o te katoatoa tei rave ra i te reira,’ ta Farrar i tuatua.—Angaanga 10:6.
18, 19. (a) Eaa ra a Petero i taitaia ei i te orama tana i kite ra? (e) Eaa te akameitakianga manako koreia i rauka ia Petero?
18 Kua ariki a Petero akavaavaa kore ra i ta Simona akamanuiri anga iaia, e i reira kua rauka ia Petero i te aratakianga tu-Atua manako koreia ra. Kua akara aia i tetai orama tei akaue ra iaia kia kai i te au manu viivii i ta te ture ngati Iuda ra. Kua patoi atura Petero e ‘kare rai aia i kai ana i te kai noa, e te mea viivii.’ Inara e toru taime i tuatuai kiaia: “Ko ta te Atua i tamā ra, auraka koe e tuatua e, e mea noa ïa.” Te matauia ra e, “te eumiumi ua rā Petero ki roto iaia uaorai i te akatau anga i taua mea i kitea e ia ra.”—Angaanga 10:5-17; 11:7-10.
19 Kare a Petero i kite i te ra i muri iora i Kaisarea, e 50 kiro mita te mamao, ko tetai tangata Kenitara ko Korenelio kua akara katoa i tetai orama. Kua akaue atura te angera a Iehova ia Korenelio kia tono atu i tona au tavini kia kimi ia Petero i te are o Simona te tangata rapakau kiri ra. Kua tono atura Korenelio i tona au tavini ki te are o Simona, e kua aru mai a Petero ia ratou ki Kaisarea. I reira kua tutu atura aia kia Korenelio e tona kopu tangata e te au oa oki. Ei tupuanga, kua riro mai ratou ko te aronga Kenitara mua peritome koreia ra kia rauka te vaerua tapu ra ei aronga akatuangaia no te Patireia. Noatu rai e kare taua aronga tangata ra i peritomeia, pouroa te aronga tei akarongo atura i ta Petero tuatua kua papetitoia. Na teia i akatuera i te aerenga no te au tangata o te pa enua, tei manakoia ra e viivii mei te akara anga a te ngati Iuda ra, kia riro ei au mema no te putuputuanga Kerititiano. (Angaanga 10:1-48; 11:18) Mei teaa ra tetai tupuanga takake no Petero—no te mea ko te tuatua mou e okomaata kiaia e kua taki atu iaia kia akarongo i te aratakianga mei ia Iehova ra e kua rave ma te akarongo anga!
20. Eaa te tauturu anga tu-Atua te orongaia maira kia tatou me tuku tatou i te tuatua mou te mea mua i roto i to tatou au oraanga?
20 Kua akamaroiroi atura Paulo: “Kia akatika ra tatou i te tuatua–mou ma te aroa, kia tupu te tau iaia, i te upoko, i te Mesia, i te au mea katoa nei.” (Ephesia 4:15) Ae, na te tuatua mou e apai mai kia tatou i te mataora aite koreia i teianei me ka tuku tatou i te reira ki roto i te ngai mua i to tatou oraanga e kia tuku ia Iehova na tona vaerua tapu e arataki i to tatou au tapuae. Pera katoa e tamou ki roto i te manako i te turuanga a te au angera tapu i roto i ta tatou angaanga evangeria. (Apokalupo 14:6, 7; 22:6) Mei teaa ra te akangateitei anga ia tatou e kia rauka taua turuanga ra i te angaanga a Iehova i akaue maira ia tatou kia rave! Na te tamouanga i te tiratiratu ka taki atu ia tatou kia akapaapaa ia Iehova, te Atua no te tuatua mou ra, e mutu kore ua atu. E apinga okomaata atu ainei tetai i te reira?—Ioane 17:3.
Eaa ta Tatou i Kite?
• Eaa ra te aronga e manganui i korei e ariki i te tuatua mou?
• Akapeea te au Kerititiano i te manakoanga tau i te au mea o te ao o Satani ra?
• Eaa to tatou tu manako tau no te au uipaanga, e no teaa ra?
• Eaa ta tatou apainga kia utuutu no tatou uaorai i te pae vaerua ra?
[Mapu/Tutu i te kapi 18]
(No runga i teia, akara i te puka)
TAI MAATA
Kaisarea
NGAI MATAATAA O SARONA
Iopa
Luda
Ierusalema
[Tutu]
Kua aru a Petero i te arataki anga tu-Atua e kua kokoti i te au akameitakianga manako koreia
[Akameitakianga]
Map: Mountain High Maps® Copyright © 1997 Digital Wisdom, Inc.
[Tutu i te kapi 13]
Kua akakitekite a Iesu i te tuatua mou
[Tutu i te kapi 15]
Mei te kai kopapa, te puapinga ra te kai vaerua ei meitaki no tatou