Eaa te au Ravenga e Aroa Maira Iehova ia Tatou?

1. Eaa ta te apotetoro ko Ioane i akamaroiroi ia tatou kia manako, e no teaa ra?

KUA akamaroiroi te apotetoro ko Ioane ia tatou kia manako oonu i to Iehova aroa maata no tatou. Karanga a 1 Ioane 3:1 e: “Ka akara na i te tu o to te Metua aroa ia tatou nei.” Me manakonako tatou i te maata i to Iehova aroa e akapeea aia te akaari mai anga i tona aroa, ka piri vaitata tatou kiaia e ka maata atu to tatou inangaro iaia.

2. Eaa ra i ngata ai no tetai pae kia mārama e te inangaro maira te Atua ia ratou?

² Te mea maromaroa ra, kare tetai pae e mārama ana akapeea te Atua i te aroa mai anga ia ratou. Te manako ra ratou e kare te Atua e manako mai ana i te tangata. Penei te irinaki ra ratou e e rave ua ana te Atua i te au arairaianga e ka akautunga aia i te aronga tei akarongo kore iaia. No te au apiianga pikikaa, te manako ra tetai pae e e Atua kino aia e e ngata rava i te inangaro iaia. Te manako ra tetai pae e te inangaro ra te Atua i te au tangata ravarai noatu ta ratou e rave ra. Inara kua riro taau apii i te Pipiria ei tauturu ia koe kia kite i te tuatua mou no runga ia Iehova. Kua kite koe e ko te aroa tona tu maata rava atu, e kua oronga mai aia i tana Tamaiti ei atinga oko noou. (Ioane 3:16; 1 Ioane 4:8) Inara, no toou au kite anga i te oraanga, penei e mea ngata ia koe kia mārama mei teaa te maata i to Iehova inangaro ia koe.

3. Eaa te ka tauturu ia tatou kia mārama i to Iehova aroa no tatou?

³ Ei tauturu ia tatou kia mārama i to Iehova aroa no tatou, ka anoanoia na mua kia mārama e na Iehova tatou i anga. Nana i oronga mai i te ora no tatou. (E tatau ia Salamo 100:3-5.) Te tumu te reira i akataka ai te Pipiria i te tangata mua ei ‘tamaiti na te Atua.’ (Luka 3:38) E kua apii mai a Iesu ia tatou kia kapiki ia Iehova “e to matou Metua i te ao ra.” (Mataio 6:9) No reira ko Iehova to tatou Metua, e te inangaro maira aia ia tatou mei tetai metua meitaki e inangaro ra i tana tamariki.

4. (a) Mei teaa te tu o Iehova ei Metua? (e) Eaa ta tatou ka uriuri i roto i teia atikara e te mea ka aru mai?

⁴ E mea ngata no tetai pae kia manako i tetai metua ei tangata aroa. Penei e au maaraara anga mamae to ratou i to ratou tamariki anga no te mea kua takinokino to ratou papa ia ratou. Kare rava a Iehova e pera ana i tana tamariki. Koia te Metua meitaki rava atu no tatou. (Salamo 27:10) E inangaro maata tona ia tatou e e manganui te au tu me akono aia ia tatou. Ko te maata atu i to tatou manako e te inangaroia ra tatou e Iehova, ko te maata atu to tatou inangaro iaia. (Iakobo 4:8) I roto i teia atikara, ka uriuri tatou e ā au ravenga ta Iehova akaari mai anga i tona aroa no tatou. E i roto i te atikara ka aru mai, ka kite tatou e ā au ravenga ka rauka i te akaari i to tatou aroa nona.

E TU AROA TO IEHOVA E TE ORONGA UA

5. Eaa ta te Atua i oronga ki te au tangata ravarai?

⁵ I to te apotetoro ko Paulo tuatau i Atene i Ereni, e manganui tana au itoro i kite, e kua irinaki te tangata e na te au atua i oronga mai i te ora kia ratou. No reira kua akakite aia kia ratou no runga i “te Atua i anga i teianei ao, e te apinga tini ravarai i roto.” Kua karanga aia no te Atua e “koia uaorai oki tei oronga mai i te ora, e te aʼo, e te au mea katoa, ki te au mea ravarai” e “nona oki to tatou ora, e i aaere ei, e i noo ei oki.” (Angaanga 17:24, 25, 28) Te oronga maira Iehova i te au mea ravarai ta tatou e anoano ra kia ora e kia rekareka i te oraanga. Ka akamanako ana i tetai atu au mea tana i oronga mai no tona aroa no tatou.

6. Eaa te tu kainga ta Iehova i oronga mai no tatou? (Akara i te tutu mua o teia atikara.)

⁶ Ei akaraanga, kua akateateamamao a Iehova i tetai kainga ruperupe no tatou. (Salamo 115:15, 16) I te au paraneta katoatoa tana i anga mai, ko te enua te mea umere tikai. Kua akarakara ana te au taineti ki te au rangi e e manganui te au paraneta tei kitea mai, inara kare rai e kiteaia e ratou tetai akaou paraneta tei reira te au mea ravarai tei anoanoia e oraʼi te tangata. Kare a Iehova i oronga anake ua mai i te au mea ravarai tei anoanoia e oraʼi tatou, mari ra kua anga katoa aia i te enua ei ngai ruperupe, tau ua, e te tinamou kia rekareka tatou i te oraanga. (Isaia 45:18) Me akamanako tatou i te kainga ta to tatou Metua ko Iehova i oronga mai, ka kite tikai tatou mei teaa atura tona aroa maata ia tatou.​—E tatau ia Iobu 38:4, 7; Salamo 8:3-5.

7. Akapeea ta Iehova anga mai anga ia tatou te akaari mai anga e te inangaro tikai ra aia ia tatou?

⁷ Tetai akaou mai mataara ta Iehova akaari mai anga i tona aroa no tatou, koia oki na te anga mai anga ia tatou kia rauka i te aru iaia. (Genese 1:27) Teia te aiteanga, ka kite tatou i tona aroa no tatou, i reira ka akaari atu i to tatou aroa nona. Kua kite aia e ko teia tikai te mea e rekareka ai tatou. Mei tera te tu, e rekareka maata tikai to te tamariki me kite ratou e te inangaro maira to ratou au metua ia ratou. E akamaara katoa, kua apii mai a Iesu e ka rekareka tatou me piri vaitata tatou ki to tatou Metua ko Iehova. (Mataio 5:3) Kua oronga mai aia “i te au mea katoa nei ei rave anga na tatou,” me kore ei rekareka anga no tatou. Te taka meitaki ua ra, e tu oronga ua tona e te inangaro maata ia tatou.​—1 Timoteo 6:17; Salamo 145:16.

TE APII MAIRA IEHOVA I TE TUATUA MOU KIA TATOU

8. No teaa ra tatou ka inangaro ei ia Iehova kia apii mai ia tatou?

⁸ E āka inangaro to te au metua tane i ta ratou tamariki e kare e inangaro i te arataki ke me kore i te akavare ia ratou. Inara i teia tuatau, e manganui te au metua kare e āriki ana i te au turanga Pipiria no runga i te mea tika e te mea tarevake. No reira kare e rauka ana ia ratou i te arataki meitaki i ta ratou tamariki, e i te maataanga o te taime ka tupu mai te maromaroa e te manako oripu ua. (Maseli 14:12) Inara te oronga maira Iehova i te aratakianga meitaki rava atu ki tana tamariki no te mea e “Atua tuatua-mou” aia. (Salamo 31:5) Te mareka ra aia i te apii atu i te tika no runga iaia. Te apii katoa ra aia ia tatou e akapeea me akamori iaia e te akaari maira i te oraanga meitaki rava atu no tatou. (E tatau ia Salamo 43:3.) No reira, eaa ta Iehova i apii mai kia tatou tei akaari mei teaa te maata i tona inangaro ia tatou?

9, 10 (a) Eaa ra a Iehova i akakite mai ei iaia uaorai kia tatou? (e) Eaa tana e apii maira no runga i tona akakoroanga no tatou?

⁹ Te mea mua, te akakite maira a Iehova iaia uaorai kia tatou. Te inangaro nei aia ia tatou kia kite iaia. (Iakobo 4:8) No reira te akakite maira aia i tona ingoa kia tatou. Te tika, e maata atu ta te Pipiria taiku anga i tona ingoa i to tetai ua atu ingoa. Te akakite katoa maira a Iehova i tona tu ei Peretana. Me akara tatou i te au mea tana i anga, ka kite tatou e e ririnui maata tona e te kite pakari. (Roma 1:20) Me tatau tatou i te Pipiria, ka kite tatou i tona tu tau e tona inangaro maata ia tatou. Ia tatou e kite maira i te au tu manea o Iehova, ka piri vaitata atu tatou kiaia.

¹⁰ Te apii katoa maira a Iehova i tona akakoroanga kia tatou. Te akakite maira aia e e tuanga tatou no tona pamiri. Te akamārama katoa maira aia i tana i tapapa mei ia tatou e raukaʼi ia tatou i te angaanga taokotai ma te au ki te katoatoa i roto i tona pamiri. Te akataka meitaki maira te Pipiria e kare te Atua i anga mai ia tatou ma te tikaanga kia iki i te mea meitaki e te mea kino no tatou uaorai. (Ieremia 10:23) Kua kite a Iehova i te mea meitaki rava atu no tatou. E na te āriki anga i tona mana akatere e te akarongo anga kiaia e raukaʼi te oraanga au e te merengo no tatou. Kua apii mai a Iehova i teia tuatua mou puapinga no te mea e āka inangaro tona ia tatou?

11. Eaa ta to tatou Metua aroa i akakite mai kia tatou no te tuatau ki mua?

¹¹ E manako pakari ana tetai metua aroa i te tuatau ki mua o tana tamariki. Te inangaro ra aia ia ratou kia rauka tetai oraanga merengo. Te mea maromaroa ra, i teia tuatau te manamanata ra te maataanga o te tangata i te tuatau ki mua, e e manganui te kaimoumou ra i to ratou oraanga i te angaanga no te au mea kare e tinamou ana. (Salamo 90:10) Mei teaa atura to tatou rekareka i to tatou Metua ko Iehova, kare aia i apii ua mai akapeea me noo i tetai oraanga merengo i teianei mari ra, kua taputou katoa mai aia i tetai tuatau umere ki mua!

TE ARATAKI RA E TE AKO RA IEHOVA I TANA TAMARIKI

12. Akapeea a Iehova i te tauta anga i te tauturu ia Kaina raua ko Baruka?

¹² I te kite anga a Iehova e kua vaitata a Kaina i te rave i tetai mea kino tikai, kua tauta aia i te tauturu ia Kaina na te ui anga e: “Eaa koe i riri ei? e eaa oki i akatumatumaʼi toou mata na? Kia rave koe i te meitaki ra, kare ainei koe e kiteia mai?” (Genese 4:6, 7) Kua patoi a Kaina i te āriki i te tauturu a Iehova e kua tupu te mamae kiaia. (Genese 4:11-13) I tetai atu taime, kua kite a Iehova e te riro ra to Baruka tu tarevake ei akaroiroi iaia ma te taitaia. No reira kua akakite a Iehova kia Baruka e e tarevake tona manako e kua anoanoia aia kia taui i te reira. Kua akarongo a Baruka i te akoanga a Iehova, e kua riro te reira ei akaora iaia.​—Ieremia 45:2-5.

13. Eaa ta te au tavini tiratiratu o Iehova i apii mai mei te au timataanga?

¹³ Te arataki ra e te ako ra Iehova ia tatou no tona inangaro ia tatou. Kare aia e akatikatika anake ua ia tatou mari ra, ka tereni katoa aia ia tatou. (Ebera 12:6) I roto i te Pipiria, ka tatau tatou no runga i te au tavini tiratiratu tei tereniia e Iehova kia riro mai ei au tangata meitaki atu. Ei akaraanga, kua na roto a Iosepha, a Mose, e Davida i te au tuatau ngata tikai. I te tuatau i to ratou timataanga, kua vai ua a Iehova i rotopu ia ratou. Te au mea ta ratou i apii mai i taua au timataanga ra, kua riro ei tauturu ia ratou i te oronga anga a Iehova i te au apainga maata kia ratou. Ia tatou e tatau ra i te Pipiria no ta Iehova turuturu anga e te tereni anga i tona iti tangata, ka kite tatou e te inangaro tikai ra a Iehova ia tatou.​—E tatau ia Maseli 3:11, 12

14. Me rave tatou i te tarevake, akapeea a Iehova i te akaari mai anga i tona aroa no tatou?

¹⁴ Noatu me rave tatou i tetai mea tarevake, ka akaari ua rai a Iehova i tona aroa no tatou. Me ariu tatou ki tana akoanga e kia tataraara, “te maata ra oki” iaia te akakore i ta tatou ara. (Isaia 55:7) Eaa te aiteanga o te reira? Te riro ra te au tuatua a Davida no runga i to Iehova akakoreanga ara ei akaari i te tu akaaroa o to tatou Metua: “Koia tei akakore i taau katoa ra au apa; ko tei akaora i toou katoa ra au maki; ko tei akaora ia koe i te mate; ko tei akakorona ia koe i te takinga-meitaki e te aroa; mei te itinga o te rā e taka ke i te opunga o te rā ra, ko tana ïa akataka ke anga i ta tatou au ara ia tatou nei.” (Salamo 103:3, 4, 12) Te ako ra e te arataki ra a Iehova ia tatou na te au ara ke ke. Te viviki ra ainei koe i te rave i te au taui anga? E akamaara ua rai e ko ta Iehova e ako ra ko tana ïa e inangaro ra.​—Salamo 30:5.

PARURU A IEHOVA IA TATOU

15. Eaa tetai atu mataara ka akaari mai a Iehova i tona aroa no tatou?

¹⁵ Ka paruru tetai metua aroa i tona ngutuare tangata mei te kino. Ka pera katoa to tatou Metua ko Iehova kia tatou. Te karanga ra te tata salamo no Iehova e: ‘Te tiaki ra aia i tona aronga tapu ra; te akaora ra aia ia ratou i te rima o te aronga kino ra.’ (Salamo 97:10) Ka akamanako ana i teia: Mei ia koe e viviki ra i te paruru i to nga mata no te mea e mea akaperepereia kia koe, koia katoa to Iehova viviki i te paruru i tona iti tangata no te mea te akaperepere ra aia ia ratou.​—E tatau ia Zekaria 2:8.

16, 17 Akapeea ta Iehova paruru anga i tona iti tangata i mua ana e i teia tuatau?

¹⁶ Tetai mataara ta Iehova paruru anga i tona iti tangata i mua ana e i teia tuatau, koia oki na roto i tana au angera. (Salamo 91:11) Kua tamate tetai angera e 185,000 vaeau Asura i te po okotai e kua akaora i te iti tangata o te Atua. (2 Ariki 19:35) I te anere mataiti mua, kua akaora te au angera ia Petero, Paulo, e tetai ke mei roto i te are tapekaanga. (Angaanga 5:18-20; 12:6-11) Koi tupu ua akenei tetai tamaki kino i tetai enua i Aperika. Kua tupu te tu oripu ua no te tamaki, te keikeia, te tauati, e te tā tangata. Noatu e kare tetai o to tatou au taeake i mate, e manganui tei ngere i to ratou au apinga ravarai. Inara kua kite pouroa ratou i te aroa o Iehova e kua kite e te akono maira aia ia ratou. Noatu te au mamae tei tupu kia ratou, te mataora ra rai ratou. I te atoro anga tetai mata o te opati maata ia ratou e kua ui i te au taeake e te au tuaine e te peea ra ratou, kua pau atu ratou e, “Te meitaki ua nei matou, e akameitaki tikai ia Iehova!”

¹⁷ E tika, tetai au tavini o Iehova mei te pipi ko Setephano e tetai atu mei iaia rai, kua mate ratou no to ratou tu tiratiratu. Kare a Iehova i arai ua rai i teia kia kore e tupu. Inara ka paruru aia i tona iti tangata ei pupu na te akamatakite anga ia ratou i te au mataara ke ke ta Satani ka titau i te akavare ia ratou. (Ephesia 6:10-12) Ka kitea teia au akamatakiteanga i roto i te Pipiria e i roto i te au puka a te akaaerenga a Iehova. Ei akaraanga, ka kite tatou i te au kino no te Initaneti, te anoano i te moni, e te au teata, au puka e te au apinga kangakanga tau kore e te tā ua. Te taka meitaki ua ra to Iehova aroa ia tatou e tona inangaro i te paruru ia tatou.

E NGATEITEI MAATA

18. Eaa toou manako i to Iehova aroa noou?

¹⁸ I to Mose manako anga i tona au mataiti i te tavini anga ia Iehova, kua papu iaia i to Iehova aroa nona. Karanga a Mose e: “E akamataora vave mai koe ia matou i toou ra aroa, kia mareka matou, e kia pereperekavana, i to matou katoa nei au rā toe.” (Salamo 90:14) Te akameitakiia nei tatou kia mārama e kia kite i to Iehova aroa no tatou. Mei teaa atura te ngateitei maata kia inangaroia tatou e Iehova! Ka aite to tatou manako ki to te apotetoro ko Ioane tei karanga e: “Ka akara na i te tu o to te Metua aroa ia tatou nei.”​—1 Ioane 3:1