Tu Akono Aroa Kerititiano i Roto i te Ao Tataka Ke
“No reira, tei raro tatou i te apainga kia ariki akono aroa atu i taua aronga ra, kia riro tatou ei au taeake rave angaanga i te tuatua mou.”—3 IOANE 8, NW.
1. Eaa te au apinga anoano maataia ta Tei Anga ra i oronga mai na te tangata nei?
“KARE oki o te tangata nei meitaki i raro ake i te rā nei, mari ra kia kai, e kia inu, ka rekarekaʼi: ko tei vaooia mai ïa nana i taua ra rave anga angaanga, koi vai ake ona puke rā i te ora anga nei, ta te Atua i oronga mai nona i raro ake i te rā nei.” (Koheleta 8:15) Ma taua au tuatua ra te akakite maira te orometua Epera i taito ra kia tatou e kare te Atua ko Iehova ra i anoano anake i te au tangata tana i anga maira kia rekareka e kia mataora oki mari katoa ra kua oronga mai i te au apinga no ratou kia akapera. I roto katoa i te tata tuatua enua o te tangata nei ko tetai anoano matauia i roto i te au tangata i te au ngai ravarai te akara anga kia rekareka ratou uaorai e kia mareka i tetai tuatau meitaki ra.
2. (a) Akapeea ta te au tangata ra akono akakino anga i ta Iehova i akakoro no ratou? (e) Eaa te tupu anga?
2 I teia tuatau te noo nei tatou i roto i tetai taiate rave kia navenave te akapou ra te au tangata i to ratou taime i te aruaru anga kia mareka ratou e kia mataora. Kua riro te au tangata “ei akaperepere ia ratou uaorai, . . . ei anoano i te au mea e navenave ei ra, kare i anoano i te Atua,” mei ta te Pipiria i totou maira. (2 Timoteo 3:1-4) Inara, ko teia e akatuke anga maata i ta te Atua ko Iehova ra i akakoro. Me riro anake te aruaru anga i te tamataora anga ei akakoro anga maata, e me riro te akatietie anga ei te manako maata ia, kare e merengo anga mou i reira, e ‘kua riro ei mea puapinga kore anake, e mei te mea e te kai ra i te matangi.’ (Koheleta 1:14; 2:11) No teia tu kua ki te ao nei i te au tangata maromaroa e te pekapeka, tei taki atura ki te au manamanata e manganui i roto i te taiate. (Maseli 18:1) Kua riro te au tangata kia tarotokaka tetai i tetai e kia tataka ke ei iti tangata, ei pupu eteniki, i te au ravenga, e te pae oki o te puapinga.
3. Akapeea e kiteiaʼi e tatou te rekareka mou e te merengo anga?
3 Mei teaa ra te tuke anga te au apinga me ka aru te au tangata i ta Iehova mataara no te akonoanga ia etai ke ra—te takinga meitaki, te oronga ua, e te akono aroa! Kua akataka meitaki mai aia e ko te taviri ki te tu mataora mou kare na to tatou tautaanga kia akamerengo i to tatou uaorai au anoano. Mari ra, ko teia te taviri: “E mea meitaki i te oronga atu i te rave mai.” (Angaanga 20:35) E kiteiaʼi te rekareka e te merengo anga, ka tika tatou kia akakore atu i te au arai e te au tataka keanga penei ka koropini ia tatou. Ka tika tatou kia itae atu ki te aronga te tavini kapiti ra ma tatou ia Iehova. E mea tau ra kia akarongo tatou i te ako anga: “No reira, tei raro tatou i te apainga kia ariki akono aroa ua i taua aronga ra, kia riro tatou ei au taeake rave angaanga i te tuatua mou.” (3 Ioane 8, NW) Ko te akaarianga akono aroa ki te aronga tau ra, ki te kotinga te ka akatikaia e to tatou au turanga, ka riro ei meitaki i nga tu e rua—ka puapingaia tei oronga atura e pera katoa oki tei rave mai. Koai ma, i reira, to roto i te aronga tau ta tatou ‘kia ariki akono aroa atu’?
“Akono i te Au Matiroeroe e te Au Vaine Takaua”
4. Eaa te taui anga i roto i te pirianga ngutuare tangata te kitea ra noatu rai i roto i tetai papaki o to Iehova ra au tangata?
4 E takitai ua ake te au ngutuare tangata ngaueue kore e te au akaipoipo anga mataora i teia tuatau nei. Te kakeanga te kopae anga kia tini e te tupuanga te numero o te au metua vaine kare i akaipoipoia takapini i teianei ao kua maata te taui anga i te akono anga ngutuare tei matauia. Ei tupu anga, e manganui tei riro mai ei Au Kite o Iehova i teia au mataiti akenei no roto mai i te au ngutuare tangata ngaangaaia. Penei kua kopaeia ratou me kare kua taka ke mei to ratou tokorua akaipoipo, me kare te noo ra ratou ei au ngutuare tangata okotai ua ra metua. Kapiti katoa oki, mei ta Iesu i totou maira, ei tupu anga no te tuatua mou tana i apii mai e manganui te au ngutuare tangata kua tataka ke.—Mataio 10:34-37; Luka 12:51-53.
5. Eaa ta Iesu i tuatua te ka rauka kia riro ei tetai tumu no te akamaroiroi anga i te aronga i roto i te ngutuare tangata tataka ke ra?
5 Te pumaana ra to tatou ngakau kia kite i te aronga ou te mou ra i tetai turanga ngaueue kore no te tuatua mou, e e putuputu tatou i te akapumaana atu ia ratou ma ta Iesu ra taputou akamaroiroianga: “Koia mou taku e karanga atu kia kotou nei, Kare e tangata i akaruke i te are, e te au taeake, e te au tuaine, e te metua tane, e te metua vaine, . . . e te tamariki, e te kainga noku, e no te evangelia nei, e kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.”—Mareko 10:29, 30.
6. Akapeea e raukaʼi kia riro tatou ei ‘au taeake, au tuaine, au metua vaine, e ei au tamariki’ ki “te au matiroeroe e te au vaine takaua” ra i roto ia tatou nei?
6 Inara, koai teia ‘au taeake e te au tuaine, te metua vaine e te tamariki’? Ko te akaraanga anake i te au tangata e manganui i te Are Uipaanga Patireia, e putuputu te tere atu i te tai anere, te karanga ra ia ratou uaorai e au taeake e te au tuaine kare e akariro ua i tetai tangata kia manako e ko teia aronga e au taeake, e te au tuaine, e te metua vaine nona, e te tamariki nana ra. E akamanako i teia tumu: Te akamaara maira te pipi ko Iakobo kia tatou e e arikiiaʼi e Iehova ta tatou akamori anga, ka tika tatou ‘kia takinga meitaki i te matiroeroe e te au vaine takaua i to ratou mate anga e kia tiaki ia tatou uaorai auraka ei viivii i teianei ao.’ (Iakobo 1:27) Te aite anga o te reira e auraka tatou e tuku i te au tu manako o teianei ao i te akaparau no te au apinga e te turanga teitei kia topiri i te ngutupa o te aroa ki taua aronga “matiroeroe e te au vaine takaua.” Mari ra, ka tika tatou kia tamata i te oronga atu ia tatou uaorai e te akono aroa atu kia ratou ra.
7. (a) Eaa te akakoro anga tikai no te akono aroa i te “au matiroeroe e te au vaine takaua”? (e) Koai ma penei ka rauka katoa kia piri atu ki te akaarianga i te akono aroa Kerititiano ra?
7 Kare te akaarianga i te akono aroa ki “te matiroeroe e te au vaine takaua” i te tauturu anga i to ratou ngere anga i te pae o te apinga i te au taime ravarai. Te au ngutuare tangata okotai ua metua me kare te au ngutuare tataka ke i te pae akonoanga kare mei te mea e te rave ngata ra i te pae o te moni. Inara, ko te taokotai anga meitaki, te reva o te ngutuare tangata, te kapiti anga ma te au tangata o te au mataiti ke ke ra, e te raveanga i te au apinga meitaki i te pae vaerua—koia ra te au tu oraanga te riro ra ei apinga maata. No reira, na te manakoanga e, kare ko te maata o te apinga no taua atianga ra, mari ra ko te vaerua o te aroa e te taokotai anga te mea puapinga ia, mei teaa ra te meitaki e, i etai taime, noatu rai ko “te matiroeroe e te au vaine takaua” te rave ra i te akaarianga akono aroa ki te au taeake Kerititiano ra!—Akaaite ia 1 Ariki 17:8-16.
E Au Tangata Ke Ainei to Roto ia Tatou?
8. Eaa te taui anga te kiteia ra i roto i te au putuputuanga e manganui o te Au Kite o Iehova ra?
8 Te noo nei tatou i te tuatau e maata te ori aere anga te au tangata. “E tere atu i te 100 mirioni tangata takapini teianei ao te noo ra i te au enua kare ra i to ratou enua kainga, e e 23 mirioni tei akaateaia atura i to ratou uaorai au enua,” ta te World Press Review i akakite mai. Ko te tupu anga tikai no teia e i te au ngai e manganui, e maata oki i te au oire mamaata ra, ko te au putuputuanga o te au tangata o Iehova i mua ana ko te maata anga no te iti tangata okotai me kare pa enua i teianei e au tangata no te au tuanga ke ke o teianei ao mai. Penei ko te tika teia no toou ngai. Inara, eaa te manako tau no tatou i teia “aronga tuitarere” e “te au tangata ke,” mei ta to teianei ao ka tapa ia ratou ra, e tuke ra ia tatou to ratou reo, te au peu, e to ratou tu oraanga oki?
9. Eaa tetai topa anga vaarua kino te ka rauka kia ereere ia tatou no runga i to tatou manako no te “au tuitarere” e “te au tangata ke” i te aere mai anga ki roto i te putuputuanga Kerititiano?
9 Ei akataka anga mama ua, kare tatou e tika kia tuku i tetai ua atu manako makitakita kia akariro ia tatou kia manako e e tau atu tatou no te kiteanga i te tuatua mou ia etai ke tei aere maira mei tetai enua ke te karangaia ra e enua peikani; kare katoa oki tatou e tau kia manako mei te mea rai e te akaapiapi ua nei teia aronga ou i te Are Uipaanga Patireia me kore i etai atu ngai. Kua akamaara te apotetoro ko Paulo i tetai papaki o te ngati Iuda Kerititiano i te anere mataiti mua ra, tei akamou i taua au manako ra, e kare tikai tetai i tau; na te aroa ua o te Atua i akariro kia tau tetai ua atu tangata kia rauka iaia te ora. (Roma 3:9-12, 23, 24) Ka tau ra tatou kia rekareka e te itae nei to te Atua aroa ua i teianei ki te au tangata e manganui tei akakoreia ra te tuatau no ratou kia akarongo atu i te tuatua meitaki. (1 Timoteo 2:4) Akapeea e raukaʼi ia tatou te akaari e e tika tikai to tatou aroa no ratou?
10. Akapeea e raukaʼi ia tatou te akaari e te akono aroa tikai ra tatou i “te au tangata ke” i roto ia tatou nei?
10 Ka rauka ia tatou te aru i ta Paulo ako anga: “Ka āriki kotou ia kotou uaorai, mei te Mesia i ariki mai ia tatou nei, kia kakā te Atua.” (Roma 15:7) I te arikianga e e putuputu te au tangata no etai atu enua ke me kare no etai atu au tu akono anga te rave ngata ra, ka tau tatou kia akaari i te takinga meitaki kia ratou e te manako anga me ka rauka ia tatou i te rave i te reira. Ka tau tatou kia ariki ia ratou ki roto i o tatou nei, e akono atu ia ratou tataki tai “mei te tangata tupu katoa ia kotou,” nei e “e aroa oki koe iaia mei te aroa ia koe uaorai.” (Levitiku 19:34) Penei kare teia i te mea ngoie ua kia rave, inara ka autu tatou me ka maara tatou i te ako anga: “E eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.”—Roma 12:2.
E Akono Kapiti ma te Aronga Tapu
11, 12. Eaa te akamanako anga taka ke tei orongaia ki etai tavini o Iehova (a) i Iseraela i taito ra (e) i te anere mataiti mua ra?
11 I roto i te aronga tei tau tikai no ta tatou akamanako anga e te akono aroa ko te au Kerititiano pakari te rave maroiroi ra i te angaanga no to tatou meitaki i te pae vaerua. Kua rave au apinga taka ke a Iehova no te kau taunga e te ngati Levi i Iseraela i taito ra. (Numero 18:25-29) I te anere mataiti mua ra, kua raurau katoaia te au Kerititiano kia utuutu i te aronga tei tavini atura ia ratou i te au angaanga taka ke. Te oronga maira te tataanga ia 3 Ioane 5-8 i tetai akara anga i te tatua mou piri tikai o te aroa tei vaira i roto i te au Kerititiano mua ra.
12 Kua manako teitei te apotetoro ko Ioane i te takinga meitaki e te akono aroa ta Gaio i akakite atura ki etai o te au taeake tutaka aere i tonokia atu kia atoro i te putuputuanga ra. Ko teia au taeake—kapiti katoa ia Demeterio, e penei ko te tangata nana i apai atu te epitetore ra—e au tangata ke katoa ratou e kare a Gaio i matau ia ratou i mua ana. Inara kua arikiia mai ratou ma te akono aroaia no te mea “no [to te Atua] ingoa i aere ei ratou ki mua.” Kua akataka maira Ioane i teia: “No reira, tei raro tatou i te apainga kia ariki akono aroa atu i taua aronga ra, kia riro tatou ei au taeake rave angaanga i te tuatua mou.”—3 Ioane 1, 7, 8, NW.
13. Koai ma i roto ia tatou i teia tuatau nei te tau maata ra ‘kia ariki akono aroaia’?
13 I roto i te akaaerenga a Iehova i teia tuatau nei, e manganui te rave maroiroi ra ratou uaorai no te taokotai anga katoa o te au taeake ra. Te kapiti ra teia i te au akaaere tutaka aere, te akapou ra i to ratou taime e te ririnui mei tetai epetoma ki tetai epetoma i te akamatutuanga i te au putuputuanga; te au mitinari, tei akaruke maira i te au ngutuare tangata e te au oa kia tutu aere i te au enua ke ke; te aronga te tavini ra i te au ngutuare Betela me kare au opati manga, tei oronga ua ra i ta ratou au angaanga ei turu i te angaanga tutu aere i te ao katoa nei; e te aronga oki i te angaanga painia, tei akapou ra i te tuanga maata o to ratou taime e te ririnui i te angaanga orometua. Ko te tumu anga, pouroa teia aronga te angaanga maroiroi ra, kare no tetai ua atu kaka no ratou uaorai me kare puapinga, mari ra no te aroa no te taeake anga Kerititiano e no Iehova oki. Kua tau tatou kia aru ia ratou no to ratou akamori anga ma te ngakau katoa e kua tau kia ‘arikiia ma te akono aroa meitaki ra.’
14. (a) Akapeea tatou i riro ei ei au Kerititiano meitaki atu me ka akaari tatou i te akono aroa ki te aronga tiratiratu ra? (e) Eaa ra a Iesu i tuatuaʼi e kua iki a Maria i “taua tuanga meitaki nei”?
14 Me “ariki akono aroa atu [tatou] i taua aronga ra,” te akakite maira te apotetoro ko Ioane e, ka “riro tatou ei au taeake rave angaanga i te tuatua mou.” I tetai tu ka riro tatou ei au Kerititiano meitaki atu te tupu anga. Ko teia no te mea te kapiti ra te au angaanga Kerititiano i te raveanga meitaki ki te au taeake akarongo ra. (Maseli 3:27, 28; 1 Ioane 3:18) Te vai katoa ra te au tutaki na tetai atu mataara ke. Ia Maria raua ko Mareta i ariki ra ia Iesu ki roto i to raua ngutuare, kua anoano a Mareta kia riro aia ei tetai tei akono meitaki i te manuiri na te teateamamaoanga i te “au mea katoa e manganui” na Iesu. Kua akaari atura a Maria i te akono aroa na roto i tetai mataara ke ra. Kua “noo ïa i te pae vaevae o Iesu, i te akarongo anga i tana tuatua,” e kua tuatua akameitaki atura Iesu iaia no te iki anga i “taua tuanga meitaki nei.” (Luka 10:38-42) Ko te tuatua anga e te uriuri anga manako ma te aronga e roa te au mataiti o te kite anga e putuputu te riro ei au apinga maata no tetai aiai tei akapouia ra ma ratou katoa.—Roma 1:11, 12.
I te Au Atianga Taka Ke Ra
15. Eaa te au atianga taka ke penei ka riro ei au taime mataora no te au tangata o Iehova ra?
15 Noatu rai kare te au Kerititiano mou ra e aru ana i te au peu matauia me kare e akono ana i te au orote e te au tuatau tamataora o teianei ao, te vaira te au atianga e akaputu ei ratou kia tarekareka ratou tetai e tetai ra. Ei akatauanga, kua aere atu a Iesu ki tetai umukai akaipoipo anga i Kana e kua tauturu atura i te rekareka anga o taua atianga ra na te raveanga i tana temeio mua i reira ra. (Ioane 2:1-11) Mei te reira katoa i teia tuatau, te akono kapiti ra te au tangata o Iehova i te au tuatau tamataora i te au atianga taka ke aiteite ra, e i te au ravenga tau e te au taokotai anga mataora te oronga maata maira ki taua au atianga ra. Inara, eaa, te tau ra?
16. Eaa ta tatou au kaveinga tei ia tatou nei no te tu akono tika no te au atianga taka ke ra?
16 Mei roto mai i ta tatou apii anga i te Pipiria, kua kite tatou eaa te tu akono tau no te au Kerititiano, e ko teia ta tatou ka aru i te au taime ravarai. (Roma 13:12-14; Galatia 5:19-21; Ephesia 5:3-5) Te au akaputuanga tamataora, me no te au akaipoipo anga me kare no etai atu au tumu, kare e oronga mai ana i te tika kia akaruke ua tatou i te au turanga Kerititiano me kare kia rave i tetai apinga kare ra tatou e rave ua ana; kare katoa oki i te apainga na tatou kia aru i te au peu ravarai o te enua te noo ra tatou i reira. E manganui o taua au apinga ra kua akatumuia ki runga i te au ravenga akonoanga pikikaa me kare au peu purepure, e ko etai atu te kapiti ra i te au tu akono kare takiri ra e tau kia arikiia e te au Kerititiano.—1 Petero 4:3, 4.
17. (a) Eaa te au tumu te akaari maira e kua meitaki te akapapa anga e te tika oki te akaaere anga i te umukai akaipoipo anga i Kana ra? (e) Eaa te akakite maira e kua mareka a Iesu i taua atianga ra?
17 I te tatauanga ia Ioane 2:1-11 (NW), kare i te mea ngata no tatou kia kite e ko taua atianga ra ko tetai rave anga maata ia e e maata te au manuiri i reira. Inara, kua “patiia” a Iesu ratou ko tana au pipi ei au manuiri; kare ratou i tapae ua atu ki reira, noatu rai e ko tetai papaki i o ratou ra e kopu tangata no tei akaipoipoia ra. Ka kite katoa tatou i te aronga “e tavini ra” pera katoa oki e “akatere” tetai, nana ra e oronga i te au arataki anga e eaa te ka orongaia me kare ka raveia. Pouroa teia te akakite maira ko taua ravenga ra kua akapapa meitakiia e kua tika te akaaere anga. Te akaotiia ra taua tataanga na te tuatuaanga e na tana i rave i taua oroa ra kua “akariro [a Iesu] i tona kaka kia kitea.” E iki ainei aia i taua atianga ra kia rave i te reira naringa ko tetai pati turituri e te akatere koreia? Kare e ekoko anga e kare ia.
18. Eaa te manako maata te ka tika kia orongaia i tetai ua atu atianga tamataora?
18 Eaa, i reira, etai ua atu atianga taka ke ta tatou ka akamanuiri i te au tangata? Ka anoanoia tatou kia maara e ko te akakoro anga no te arikianga ia etai ke ra ma te tu akono aroa koia oki “kia riro tatou ei au taeake rave angaanga i te tuatua mou.” E no reira, kare i rava ua kia karangaia tetai atianga ei akaputuanga “Au Kite.” Penei ka tika kia uiia tetai uianga, E tika ainei e akakite anga koai tatou e eaa to tatou irinaki anga? Kare roa tatou e tau kia manako i taua au atianga ra ei au tuatau kia kite akapeea te mamao to tatou aerenga i te taemoemoanga i teianei ao i roto i tana au ravenga, i te rave i “te anoano tika kore o te kopapa nei, e te anoano tika kore o te mata nei, e te akatietie o te ora anga nei.” (1 Ioane 2:15, 16) Kareka ra, ka tau teia au atianga kia akaata tika i to tatou tuanga ei Au Kite o Iehova, e ka tau tatou kia akapapu e ko ta tatou e rave ra ka apai mai i te kaka e te ngateitei kia Iehova.—Mataio 5:16; 1 Korinetia 10:31-33.
‘Kia Akono Aroa ma te Kore e Koumuumuanga’
19. Eaa i tau ei “kia akono aroa [tatou] tetai i tetai ma te kore e koumuumu anga”?
19 I te topa tamou marieanga te au turanga o teianei ao e te riro anga te au tangata kia maata atu te tu tataka ke, ka tau tatou kia rave i te ka rauka katoa ia tatou kia akamaroiroi i te tatua mou piri tikai te vaira i roto i te au Kerititiano mou ra. (Kolosa 3:14) No teia akakoro anga, ka tika tatou kia “aroa maata tetai i tetai,” mei ta Petero i raurau maira ia tatou. I reira, na roto i te au tuatua tau, kua kapiti katoa mai aia: “Kia akono aroa kotou tetai i tetai ma te kore e koumuumuanga.” (1 Petero 4:7-9, NW) Te mareka ra ainei tatou kia rave i te tamata anga kia akono aroa i to tatou au taeake, kia akamaroiroi ia tatou uaorai kia takinga meitaki e kia tauturu atu? E me te koumuumu ra ainei tatou me ka tu mai tetai tuatau mei te reira? Me ka rave pera tatou, ka takore atu tatou i te rekareka anga e rauka ia tatou e pera katoa ka ngere i te tutaki mataora no te raveanga i te meitaki.—Maseli 3:27; Angaanga 20:35.
20. Eaa te au akameitakianga te tapapa maira ia tatou me ka rave tatou i te akono aroa i roto i te ao tataka ke o teia tuatau nei?
20 Na te rave angaanga piri vaitata ma to tatou au taeake Kerititiano, e te takinga meitaki e te akono aroa tetai ki tetai, ka apai mai i te au akameitakianga maata. (Mataio 10:40-42) Ki taua aronga ra kua taputou atu a Iehova e ka “akatotoa aia i tona puakapa ki rungao ia ratou. Kare oki ratou e pongi akaou kare e kaki vai akaou.” Ko tei noo ki roto i to Iehova puakapa ka rekareka i tana paruru anga e tana akono aroa oki. (Apokalupo 7:15, 16, NW; Isaia 25:6) Ae, ei mua poto ua akenei te manakonako anga i te rekarekaanga i ta Iehova akono aroa e tuatau ua atu.—Salamo 27:4; 61:3, 4.
Ka Rauka ia Koe te Akataka?
◻ Eaa ta tatou kare e tau kia manako kore atu me te anoano ra tatou kia kiteia te rekareka mou e te merengo anga oki?
◻ Koai ma te “au matiroeroe e te au vaine takaua,” e akapeea tatou i “te akono tau atu” ia ratou?
◻ Eaa te manako tau no tatou i te “aronga tuitarere” e “te au tangata ke” i roto ia tatou?
◻ Koai ma te tau ra no te akamanako anga taka ke i teia tuatau nei?
◻ Akapeea te akaata anga tau i te au atianga taka ke ra a te vaerua mou no te akono aroa?
[Au Tutu i te kapi 16, 17]
I te au atianga kaikai anga ka rauka ia tatou te akono aroa ki te au tangata ke, te au tamariki matiroeroe, te aronga angaanga orometua tamou e etai atu au manuiri