Apainaia Mai ki Mua te Au Mea Anga Ouia!

KUA tuatua te Ariki ko Solomona e: “Kare rava e mea ou i raro ake i te rā nei.” (Koheleta 1:9) E tika te reira no te tu tikai o teianei ao ta tatou e noo nei, inara akapeea te vananga maata o ta Iehova anga anga i te pae vaerua? I roto i te reira vananga, koia tei maata rava atu ia Solomona, e tikai, koia te tangata maata rava atu tei ora ana, kua riro mai ei mea anga ouia ma te puapinga. Akapeea teia te tupu anga?

I te mataiti 29 o to tatou Tuatau Noa Nei, kua oronga te tangata tiama, ko Iesu ra, iaia uaorai kia papetitoia e Ioane i roto i te Kauvai Ioridana. “E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera aia i te Vaerua o te Atua i te eke anga mai mei te kukupa, e te to anga mai ki rungao iaia: E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.” (Mataio 3:16, 17) No reira, ko te tangata ra ko Iesu Karaiti te mea mua o tetai anga anga ou, tei akatainuia no te rave i to te Atua anoano. I muri akera, no te tumu ra o tona mate anga akaatinga, kua riro mai a Iesu ei Rotopu no tetai koreromotu ou i rotopu i te Atua e tetai pupu tangata ikiia. Takitai ia ratou kua riro mai ei “mea anga ouia ra” tei anauia na te vaerua o te Atua ki tetai manakonakoanga i te rangi, ma te manakonakoanga o te tutaraanga ma Iesu i roto i tona Patireia i te rangi.​—2 Korinetia 5:17, NW; 1 Timoteo 2:5, 6; Ebera 9:15.

I te au anere mataiti i aereia mai, kua akaputuia mai teia aronga akatainuia, te au Kerititiano tei anauia ma te vaerua kia taokotai ma Karaiti ra ei putuputuanga Kerititiano mou, koia oki ei anga anga ou. E akakoro anga ta te Atua i kapiki ei aia i te reira mei teianei ao, mei ta te apotetoro ko Paulo e akakite ra: “E uki ikiia ra kotou, e kau taunga ariki, e iti-tangata tapu, e aronga okoia; kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra.” (1 Petero 2:9) Mei ia Iesu Karaiti, koia ta te Atua anga anga ou i te akamata anga, e apainga puapinga ta teia anga anga ou no te tutu aere i te tuatua meitaki. (Luka 4:18, 19) I tona au mema takitai ra, e 144,000 te numero tikai, “kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:24; Apokalupo 14:1, 3) Te umuumu ra teia e kia tatanu ratou i “te ua o te vaerua,” tei akatutuia ia Galatia 5:22, 23 (NW), e te akono tamou i to ratou taoonga tuati.​—1 Korinetia 4:2; 9:16.

Akapeea ra teia anga anga ou i teia au tuatau nei? I te mataiti 1914, mei ta te papaanga Puka Tapu e akaari maira, kua akatupuia te au tuatua a Apokalupo 11:15: “Ko te au basileia o teianei ao, kua riro ïa ei au basileia no to tatou Atu [Iehova] e no tana Mesia; e e vai rai te au iaia e tuatau e tuatau ua atu.” Te angaanga mua ta Karaiti ra i rave ei Ariki tei akataoonga ouia koia ko te titiri anga ia Satani e tana au angera temoni mei te rangi ki raro ki te pini anga o te enua nei. Kua apai mai teia i te ‘mate no te enua,’ na roto i te tamaki mua o teianei ao e tana au taitaia anga tei akatupu.​—Apokalupo 12:9, 12, 17.

Kua riro katoa teia ei akakite anga ki te toenga o te aronga o te anga anga ou i te enua nei e kia piri atu ratou ki roto i te akatupuanga i ta Iesu totou: “E tutu aereia te evangelia o te basileia [tei akatumuia] nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” Eaa te reira “openga”? Kua akamarama a Iesu e: “E mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu. Naringa oki kare taua au rā i tapotoia, kare rava tetai tangata e ora; no te aronga i ikiia ra, e riro ïa au rā i te tapotoia.”​—Mataio 24:3-14, 21, 22.

Kua akakeu to Iehova vaerua i taua aronga akatainuia ra o tana anga anga ou kia maroiroi i roto i te oroanga tutu aere maata rava atu tei raveia i te enua nei. Mei te manga tauatini ua i te 1919, kua tupu mai te numero o teia aronga tutu Patireia maroiroi ki etai 50,000 i rotopu i te au mataiti o te 1930. Mei tei totouia, “kua tae ra to ratou reo ki te pa enua katoa, e ta ratou tuatua ki te kotinga o teianei ao.”​—Roma 10:18.

Ko te aronga toenga o te anga anga ou anake ua ainei te aronga tei akaputuia kia ora? Kare, no te mea kua akakite te totou e ka mou te au angera a te Atua i te au matangi ki muri o te mate maata e tae ua atu ki te taime e akaoti ei te akaputuanga kare anake ua o teia au Iseraela vaerua tei tapekaia i te rangi mari katoa ra o te etai pae atu, “e aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki.” Eaa to ratou tere? Ka aere ua mai ratou “mei roto i te mate maata,” ma te kore e takinoia no te rekareka i te oraanga mutu kore i roto i tetai enua parataito!​—Apokalupo 7:1-4, 9, 14.

Ma te mataora, ko teia aronga maata tei akaputuia mai mei etai 229 au enua, kua tupu mai te reira ki te tere atu i te 4,500,000 Au Kite maroiroi. E manganui atu te aere maira, mei tei akakiteia i te numero akaputuanga o te 11,431,171 i te Akamaara Anga o te matenga o Iesu i roto ia Aperira 17 i te mataiti i topa akenei. I teia au mirioni katoatoa nei, e 8,683 anake ua tei akatutu ra e ko te aronga toenga o te anga anga ou i te enua nei, tei kai i te au oroa Akamaara Anga. Kare rava e rauka i taua aronga i roto i teia pupu meangiti, ko ratou anake ua, i te akatupu i te angaanga tutu aere maata o teia tuatau. Ko te mirioni ua atu tei akatupu ra i te aronga maata te angaanga ra i teianei ma ratou ra ma te pakuivi ki te pakuivi i te rave anga i te angaanga kia oti. (Zephania 3:9) Pera katoa, te rave nei te au mema o te aronga maata tei tereni meitakiia i te ravenga akatere e tetai atu au angaanga apainga i te pae i te Pupu Akaaere tei akatainuia o Iseraela vaerua, mei te Netini Iseraela kore ra tei angaanga ra ma te au taunga te maani akaou anga i te au patu o Ierusalema.​—Nehemia 3:22-26.

Te Anga Anga o te “Rangi Ou e te Enua Ou”

Eaa te rekareka te ka aru mai i teia akaputuanga i roto! Koia oki mei ta Iehova i karanga e: “I na oki, te anga nei au i te rangi ou e te enua ou: kare oki tei muatangana ra e maaraia, kare e akamanako akaouia atu. E rekareka ra kotou, e e rere ua i te rekareka e tuatau ua atu, i taku e anga nei: i na oki, te anga nei au ia Ierusalema ei akapaapaa anga, e tona ra iti-tangata ei rekareka anga. E rekareka maata oki au ia Ierusalema, e e pingapingareka au i toku ra iti-tangata: kare oki e kitea akaouia i roto iaia, te reo aue, e te reo evakaku.” (Isaia 65:17-19) I te openga ei akatupu i te au rangi ou ra o ta Iehova anga anga ko Iesu Karaiti ia e te au mema akatuia mai o te 144,000 o te anga anga ou tei okoia mai mei rotopu i te au tangata ra e 19 au anere mataiti i topa akenei. E kaka rava roa atu te reira i tetai ua atu kavamani enua tei tutara ra i roto tikai ia Ierusalema, pera katoa i to Solomona tuatau. Te kapiti maira te reira ia Ierusalema Ou, e oire i te rangi ra, tei akatutuia i roto i tona manea ma te kaka i roto ia Apokalupo pene 21.

Ko Ierusalema Ou e vaine akaipoipo vaerua ia na Karaiti, koia oki ko tana au pipi akatainuia e 144,000, tei taokotai atura ki ta ratou Tane Akaipoipo i te rangi i muri ake i to ratou matenga e te tuakaouanga vaerua. Te akatutuia ratou i roto ia Apokalupo 21:1-4 “te eke anga mai mei ko mai i te Atua i runga i te rangi,” koia oki, te taangaanga angaia e ia i te akatereanga i te au akameitakianga ki te au tangata i te enua nei. Na teia tu te akatupuia ra te totou: “I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”

Mei teaa atura to tatou akameitaki no ta te Atua anga anga i te reira au rangi ou! Kare mei te au tutara anga taui ua, ma te pikikaa tei takinoia i te au tangata nei no tetai tuatau roa, ka vai tamou teia akanoo anga kavamani a te Atua. Te rekareka ra te anga anga ou e ta ratou uanga vaerua, koia te aronga maata, i ta te Atua taputou anga maata: “Mei te rangi ou nei oki, e te enua ou, taku e anga, e vai ua mai ki mua iaku nei, te tuatua mairā Iehova, ka pera rai to kotou uanga, e to kotou ingoa, i te vai ua anga.”​—Isaia 66:22.

Kua akamataia “te enua ou” ma teia uanga aronga akatainuia o te anga anga ou. E totaiete tangata ou te reira ma te mataku i te Atua i te enua nei. I te makitakita, te kino, te ta ua, te pikikaa, e te akaturi i roto i te totaiete tangata i teia tuatau te akaari maira ia i te anoano no tetai taui anga katoa ei totaiete ou i te enua nei, te angaanga anga i raro ake i te akatere anga ngateitei o te au rangi ou ra. Ko te reira ta Iehova au akakoroanga. Mei tana i anga i te au rangi ou ra, te anga katoa ra aia i te enua ou na te akaputuputuanga mai i te aronga maata ei roto ra no tetai totaiete ao ou ma te au. Ko teia totaiete anake ua te ka akaoraia mai “mei roto i te mate maata.”​—Apokalupo 7:14.

Eaa ta tatou ka tapapa atu i muri ake i te mate maata? Te tuatuaanga no runga i tana au apotetoro, ko te aronga tikai tei akatupu ra i te au rangi ou te ka akatere i te enua ou, kua taputou a Iesu e: “Koia mou taku e karanga atu kia kotou nei, Kia tae i te anga akaou anga ra, kia noo te Tamaiti a te tangata ki runga i tona terono kakā, e noo katoa kotou, ko tei aru mai iaku, ki runga i te terono raungauru e rua ara, i te akava anga i te au kopu o Iseraela raungauru e rua ara.” (Mataio 19:28) Ka piri katoatoa te 144,000 o teia Ierusalema Ou ma Iesu ki roto i te akavaanga i te tangata nei. E oti ka komono i reira te aroa i te tu noinoi e te makitakita ei tumu no te patu i te totaiete tangata. Ka takoreia te au manamanata o te au kopu, te kara, e te pa enua. Ka akaoki akaou mai te tuakaou anga tere ki mua i te aronga akaperepereia ra. Ka riro akaou mai te au tangata akarongo e pirioni ua atu ei okotai kopu tangata maata e te taokotaiia, tei akateiteiia ki te oraanga mutu kore ki runga i teia enua tei tauiia ei parataito.

E maata rava atu teia i tetai Utopia me kore tetai Tangari-ra (Shangri-la). Ka riro te reira ei anga anga tamou—‘te rangi ou e te enua ou tana i tuatua maira te tatari nei ra tatou i, i te vai tika anga o te tuatua-tika ra’! (2 Petero 3:13) Te papu ra, e e manakonakoanga umere rava teia, e taputou mekameka ra nana tei karanga ra e, “I na, te akariro nei au i te au mea ravarai ei mea ou,” e tei tuatua ra i te akakite anga akauru ma te akarongo e: “E tuatua-mou oki teianei au tuatua e te pikikaa kore.”​—Apokalupo 21:5.