“Te Tuatua Nei Te Vaerua Ma Te Vaine Akaipoipo Ou Ra, E Aere Mai”
“Te tuatua nei te Vaerua ma te vaine akaipoipo ou ra, E aere mai. . . . E ko tei kaki ra, ka aere mai. E tei anoano ua ra, ka rave ua mai aia i te vai ora.”—APO. 22:17.
1, 2. Ko teea ngai te tuku ra tatou i te au mea o te Patireia i roto i to tatou oraanga, e no teaa ra?
I TEEA ngai e tuku ra tatou i te au mea o te Patireia i roto i to tatou oraanga? Kua raurau a Iesu i tana au pipi kia ‘kimi ua rai i te patireia na mua,’ na te akapapu anga kia ratou e me rave ratou i te reira, ka oronga mai te Atua i ta ratou e anoano ra. (Mata. 6:25-33) Kua akaaite aia i te Patireia o te Atua ki tetai poe meitaki maata roa, e te kitea mai anga te reira kua oko tetai tangata “i te au apinga katoa nana ra, oko atura i taua poe ra.” (Mata. 13:45, 46) Kare ainei e ka tuku tatou i te angaanga tutuanga o te Patireia e te akariro anga i te tangata ei pipi ko te mea puapinga maata rava atu?
2 Mei ta tatou rai i kite mai i roto i nga atikara i mua akenei, me tuatua tatou ma te mataku kore e te taangaanga karape anga i te Tuatua a te Atua i roto i te angaanga orometua, te akaari ra tatou e te aratakiia nei tatou e te vaerua o te Atua. Te riro katoa ra taua vaerua ra ei tuanga puapinga maata te piri putuputu anga tatou ki roto i te angaanga tutuanga i te Patireia. Ka akara ana tatou e ka akapeea.
Tetai Patianga!
3. Ko teea tu vai ta te au tangata ravarai i patiia kia “aere mai”?
3 Kua orongaia mai tetai patianga ki te au tangata na roto i te vaerua tapu. (E tatau ia Apokalupo 22:17.) Ko te patianga koia oki, kia “aere mai” e kia akamerengo i to tetai kaki vai ki tetai vai tuke akerai. Kare te reira ko te vai ta tatou e matau ra e rua tuanga hydrogen e tai tuanga ko te reva meitaki. I te mea e e puapinga maata te vai tika tikai no te akono anga i te oraanga i runga nei i te enua, tuke rai ra ta Iesu vai e manako ra te tuatua anga aia ki te vaine Samaria i ko i te rua vai: “Kareka te ka inu i te vai e orongaia atu e au nei, kare rava atura aia e kaki akaou; ka riro ra taua vai e orongaia atu e au nana ra, ei vai pupui ua i roto iaia, e tika i te pupui anga, e tae ua atu ki te ora mutu kore ra.” (Ioa. 4:14) Te vai meitaki rava atu ta te au tangata e patiia maira kia inu te oronga maira i te ora mutu kore.
4. I akapeea ra te anoano no te vai ora i tupu ei, e eaa te akatutuia maira e taua vai ra?
4 Kua tupu mai te anoano no taua vai ora ra te piri anga te tangata mua, ko Adamu ki tana vaine, ko Eva, to raua akarongo kore anga ki tei anga tikai mai ia raua—te Atua ko Iehova. (Gene. 2:16, 17; 3:1-6) Kua tuaruia te nga tokorua mua mei to raua aua kainga, ko “te akatika aea [a Adamu] i tona rima, e rave katoa i te kai i runga i te rakau o te ora ra, kia ora aia e tuatau ua atu.” (Gene. 3:22) Ei tupuna no te tangata, kua apai mai iora a Adamu i te mate ki runga i te au tangata ravarai. (Roma 5:12) Te akatutu maira te vai ora i ta te Atua akanoonooanga pouroa no te akaora anga mai i te au tangata akarongo mei te ara e te mate, e te oronga anga kia ratou te ora apa kore i roto i te Parataito i runga i te enua nei. Kua rauka mai teia au akanoonooanga na roto i te atinga oko o Iesu Karaiti.—Mata. 20:28; Ioa. 3:16; 1 Ioa. 4:9, 10.
5. No ko mai iaai te patianga kia aere mai e ‘ka rave i te vai ora’ ra? E akamarama mai.
5 Naai i akamata i te patianga kia aere mai e kia ‘rave ua mai i te vai ora ra’? Me rauka pouroa mai tikai te au akanoonooanga katoatoa no te ora ki te au tangata na roto ia Iesu i te tuatau o ta Karaiti Tutaraanga Tauatini Mataiti, kua akatutuia mai te reira ei “vai ora, e vai taʼe oki, mei te io te areare.” Ka kitea uaia taua vai ra e ‘tae ra no roto mai i te terono o te Atua e to te Punua-mamoe ra.’ (Apo. 22:1) No reira, ko Iehova te Oronga Ora, te Tumu o te vai te oronga maira i te ora. (Sala. 36:9) Koia Tei oronga mai i taua vai ra na roto i “te Punua-mamoe,” ko Iesu Karaiti. (Ioa. 1:29) Ko teia vai akatutuia mai ko te ravenga ia e akakore ei a Iehova i te au kino ravarai tei tukunaia mai ki runga i te tangata no to Adamu akarongo kore. Ae, ko Tei Akamata mai i te patianga kia “aere mai” ko te Atua ko Iehova.
6. I naea te “vai ora” i akamata ai i te tae?
6 Noatu e ka tae meitaki ua mai te “vai ora” i te tuatau o te Tutaraanga Tauatini Mataiti o Karaiti, kua akamata mai te reira i te tae i “te rā o te Atu,” te tuatau i akaterenoia ai “te Punua-mamoe” i runga i te rangi i te mataiti 1914. (Apo. 1:10) No reira, kua rauka mai tetai au tauturuanga o te oraanga muri ake i te reira. Te o maira te Tuatua a te Atua, te Pipiria, no te mea te tuatuaia ra tana karere e ei “vai.” (Ephe. 5:26) Te akatueraia nei te patianga ki te katoatoa e kia ‘rave mai i te vai ora,’ na te akarongo anga e te ariu anga ki te tuatua meitaki o te Patireia. Inara koai ma tikai te rave ra i te patianga i te ra o te Atu?
Tuatua ra “te Vaine Akaipoipo Ou” e “E Aere Mai”
7. Koai ma te aronga mua i roto i “te rā o te Atu” te oronga maira i te patianga e e “aere mai,” e kiaai ma?
7 Te au mema o te pupu vaine akaipoipo ou—te au Kerititiano akatainuia e te vaerua—ko ratou te aronga mua te oronga maira i te patianga kia “aere mai.” Kiaai ma? Kare te vaine akaipoipo ou e tuatua ra kiaia uaorai e, “E aere mai.” Te tou ra tana au tuatua ki te aronga te manakonako ra i te ora mutu kore i runga nei i te enua i muri ake i “te tamaki i taua rā maata o te Atua mana katoatoa ra.”—E tatau ia Apokalupo 16:14, 16.
8. Eaa te akaari maira e kua oronga te au Kerititiano akatainuia i te patianga a Iehova mei te mataiti 1918 mai?
8 Mei te mataiti 1918 mai te oronga anga mai te au pipi akatainuia o Karaiti i te patianga. I taua mataiti ra, kua oronga mai te tumu manako o te akoanga e “Mirioni ua Atu te Ora nei Kare Rava e Mate” i te manakonakoanga e ka rauka i te manganui te ora mutu kore i runga nei i te enua parataito i muri ake i te tamaki o Aramakito. Kua akamaroiroi te akoanga tei orongaia i ko i te uruoaanga a te Aronga Apiipii Pipiria i Cedar Point, i Ohio, U.S.A., i te mataiti 1922 i te aronga e akarongo maira kia ‘akakite i te Ariki e tona patireia.’ Kua tauturu teia akoanga i te toenga o te pupu vaine akaipoipo ou kia itae atu te tangata e manganui ma te patianga. I te mataiti 1929, te vai ra i roto i te itiu o The Watchtower o Mati 15, tetai atikara ko te tumu manako “E Patianga Aroa,” ma te tumu tuatua o Apokalupo 22:17. I roto i tetai tuanga, kua akakite mai te atikara e: “Kua piri atu te toenga o te pupu akono meitaki ki [Tei Teitei Rava] i roto i te patianga aroa i te tuatua anga e, ‘E aere mai.’ Kia akakitekite aereia teia karere ki te aronga te inangaro ra i te tuatua tika e te tuatua mou. Kia raveia te reira i teianei.” E tae ua mai ki teia ra, te oronga nei rai te pupu o te vaine akaipoipo ou i teia patianga.
“Ko Tei Akarongo ra, ka Tuatua Katoa Aia e, E Aere Mai”
9, 10. Akapeea ra te aronga te akarongo maira ki te patianga i te patiia anga kia tuatua e, “E aere mai”?
9 Akapeea ra te aronga te akarongo maira ki te patianga e kia “aere mai”? Te patiia ra ratou kia tuatua e, “E aere mai.” Ei akaraanga, i roto i te itiu o The Watchtower o Aukute 1, 1932, te akakite maira i roto i te kapi 232 e: “E akamaroiroi atu tei akatainuia ra i te aronga katoatoa te ka rave i te akakite anga i te tuatua meitaki o te patireia. Kare ratou e anoanoia ei aronga akatainuia na te Atu e tau ei kia akakitekite aere i te karere a te Atu. E pumaana tikai ki te au kite o Iehova i teianei kia kite e te akatikaia ra ratou kia apai i te vai ora ki tetai pupu tangata te ka aere atu na roto ia Aramakito e kia orongaia atu kia ratou te ora mutu kore i runga nei i te enua.”
10 Te tou anga i te apainga a te aronga te akarongo maira kia tuatua e, “E aere mai,” kua akakite mai The Watchtower o Aukute 15, 1934, kapi 249, e: “Ka tika i te aronga o te pupu Ionadaba ra kia aere kapiti atu ma te aronga o te pupu e akatutuia maira e Iehu, koia oki, te aronga tei akatainuia, e kia akakite i te karere o te patireia, noatu e kare ratou i te au kite akatainuia no Iehova.” I te mataiti 1935, kua akataka meitakiia mai te “aronga maata rava” tei taikuia mai i roto ia Apokalupo 7:9-17. Kua akatupu maata atu te reira i te angaanga na te oronga anga i te patianga a te Atua. Mei taua taime mai, maata atu te numero o te aronga maata rava o te aronga akamori mou—tei runga atu i te itu mirioni i teianei—tei ariu mai ki taua patianga ra. I muri ake i te akarongo meitaki anga ki te karere, kua akatapu ratou ia ratou uaorai ki te Atua, na te papetitoanga ki roto i te vai, e kua piri maroiroi atu ki te pupu o te vaine akaipoipo ou i te patianga i tetai ke kia ‘aere mai, ka rave ua mai i te vai ora.’
Tuatua “te Vaerua” e, “E Aere Mai”
11. I te anere mataiti mua T.N., akapeea te vaerua tapu i te o mai anga ki roto i te angaanga tutuanga?
11 I te tutuanga i roto i te tunako i Nazareta, kua eeu a Iesu i te pokaikai a te peroveta ko Isaia e kua tatau: ‘Tei rungao iaku te vaerua o [“Iehova,” NW], koia i akatainu mai iaku ei tutu aere i te evangelia i te tangata rikiriki; kua tono mai iaku e akanā i te aronga ngakau aue, ei tutu aere i te ora no te aronga tuikaa, kia akara akaou te matapo, e e tuku oki i te aronga i tapekaia ra, Ei tutu aere i te mataiti inangaro [“a Iehova,” NW].’ E oti kua taangaanga a Iesu i teia au tuatua kiaia uaorai, na te tuatua anga e: “Teianei tuatua i tataia nei, ta kotou i akarongo nei, kua tupu ïa i teianei rā.” (Luka 4:17-21) I mua ake ka aere atu ei aia ki te rangi, kua akakite a Iesu ki tana au pipi e: ‘Ka rauka ra to kotou mana i te vaerua tapu, kia aere mai aia i rungao ia kotou; e ei kite oki kotou noku, e tae ua atu ki te openga o te enua ra.’ (Anga. 1:8) I te anere mataiti mua, e tuanga maata ta te vaerua tapu i rave i roto i te angaanga tutuanga.
12. Akapeea te vaerua o te Atua te o mai anga i to tatou tuatau nei i te oronga anga i te patianga?
12 Akapeea te vaerua tapu o te Atua te o mai anga i te oronga anga i te patianga ki te au tangata i to tatou tuatau? Ko Iehova te Tumu o te vaerua tapu. E taangaanga ana aia i tona vaerua ei akamaora i te ngakau e te manako o te pupu o te vaine akaipoipo ou kia marama ratou i tana Tuatua, te Pipiria. Te akakeu nei te vaerua ia ratou kia oronga i te patianga e te akamarama i te au Tuatua Tapu mou ki te aronga e manakonako anga to ratou no te ora mutu kore i roto i te Parataito i te enua nei. Akapeea i reira te aronga tei ariki mai i te patianga, e kua riro mai ei au pipi na Iesu Karaiti, e kua oronga atu i te patianga ki tetai ke? Te o katoa maira te vaerua i roto i to ratou oraanga. Na te papetitoanga ‘i te ingoa o te vaerua tapu,’ te taokotai ra e te irinaki ra ratou ki runga i te vaerua i te tauturu ia ratou. (Mata. 28:19) E akamanako katoa ana i te karere ta te aronga akatainuia e te aronga maata rava e tutu aere ra. No roto mai te reira i te Pipiria—e puka tei tataia i raro ake i te akakeu anga tikai a te vaerua o te Atua. No reira, kua orongaia mai te patianga na roto i te vaerua tapu. Na taua vaerua ra e arataki nei ia tatou. Akapeea taua vaerua ra i te akakeu maataanga ia tatou kia o atu ki roto i te angaanga patianga?
‘Te Tuatua nei Ratou, E Aere Mai’
13. Eaa te akatakaia maira e te manako e “te tuatua nei te vaerua e te vaine akaipoipo ou ra, E aere mai”?
13 ‘E te tuatua nei te vaerua ma te vaine akaipoipo ou ra, E aere mai.’ Te akakite maira teia i te oronga putuputu anga i te patianga a te Atua. Akapeea te aronga e akarongo maira e e ariki maira i te patianga ra? Te tuatua katoa ra ratou e, “E aere mai.” Kua karanga katoaia te aronga maata rava o te aronga akamori mou e te ‘akamori ra ratou i te po e te ao i roto i te nao o Iehova.’ (Apo. 7:9, 15) I roto i teea tu e ‘akamori ra ratou i te po e te ao’? (E tatau ia Luka 2:36, 37; Angaanga 20:31; 2 Tesalonia 3:8.) Te akaari maira nga akaraanga o te vaine peroveta ruaine ko Ana raua ko te apotetoro ko Paulo e ko te ‘akamori anga i te po e te ao’ te akakite maira i te tauta maroiroi anga ma te tamou marie i roto i te angaanga orometua.
14, 15. Akapeea a Daniela i te akaari anga mai i te puapinga no te akamori putuputu anga?
14 Kua akaari katoa mai te peroveta ko Daniela i te puapinga no te akamori putuputu anga. (E tatau ia Daniela 6:4-10, 16.) Kare aia i taui ana i tana ravenga matauia i te pae vaerua—tana peu no te pure anga ki te Atua e “tutoru tuturi anga i te rā okotai, . . . mei tana oki i rave i muatangana ra”—e okotai ua marama, noatu e ka tiria aia ki roto i te vaarua o te riona. Te akataka meitaki maira i tana i rave ki te aronga e akara maira e e puapinga atu te akamori putuputu anga ia Iehova i tetai ua atu apinga!—Mata. 5:16.
15 I muri ake te noo anga a Daniela e tai po i roto i te vaarua o te riona, kua aere mai te ariki e kua kapiki maata atu e: “E Daniela, e te tavini o te Atua ora ra, kua tika ainei i toou Atua, taau i akamori tamou ana, i te akaora ia koe i te au liona?” Kua pau viviki atu a Daniela e: “E te ariki e, kia ora koe e tuatau ua atu. Kua tono mai taku Atua i tana angela, e kua topiri i te vaa o te au liona, e kare ua ratou i rave kino mai iaku: no te mea te kitea ra te ara kore i roto iaku nei ki mua i tona aroaro; e ki mua katoa ia koe, e te ariki, kare oki au i rave ana i te kino.” Kua akameitaki a Iehova ia Daniela no te akamori “tamou.”—Dani. 6:19-22.
16. Eaa te au uianga no runga i te akaraanga o Daniela te ka akakeu ia tatou kia ui e me te piri ra tatou ki roto i te angaanga orometua?
16 Kua inangaro puareinga ua a Daniela i te mate i to te akaruke anga i tana peu pae vaerua. Akapeea ra tatou? Eaa ra te au akaatinga anga ta tatou e rave nei me kore te inangaro puareinga ra i te rave kia rauka i te akakite aere i te tuatua meitaki o te Patireia o te Atua ma te tamou marie? Ae, kare tatou e tuku ua i tetai marama kia topa kare i tuatua ana ki tetai ke no runga ia Iehova! Me ka rauka te reira, kare ainei e ka tauta tatou kia piri atu ki roto i te angaanga orometua i te au epetoma ravarai? Noatu e kua kotingaia tatou no te makimaki e ka rauka i te akakitekite ua e 15 miniti i roto i te marama, e ripoti tatou i teia angaanga. No teaa ra? No te mea, te inangaro nei tatou i te tuatua ma te vaerua e te vaine akaipoipo ou, “E aere mai.” Ae, ka inangaro tatou i te rave i te ka rauka ia tatou kia vai ua rai ei au papuritia tamou no te Patireia.
17. Eaa te au atianga e oronga ua ana tatou i ta Iehova patianga?
17 E kimi tatou i te ravenga i te oronga i ta Iehova patianga i te au atianga ravarai, kare i te taime ua i akanoo tatou no te angaanga orometua i te ngai tangata. E tikaanga ngateitei i te pati i te aronga e kaki vai ra kia ‘aere mai e rave i te vai ora’ i tetai atu au tuatau, mei te tuatau okooko anga, teretere anga, orote, angaanga, me kore aere anga ki te apii! Noatu e ka arairai e te au mana akaaere te angaanga tutuanga, ka tutu aere tatou ma te matakite—penei na te atoro anga i te au are e te au ngai tukeke me kore na te akamaata anga i te akakitekite aere anga.
Te Tuatua Nei rai “E Aere Mai”
18, 19. Akapeea koe i te akaari anga e te akaperepere ra koe i te tikaanga ngateitei ei oa rave angaanga na te Atua?
18 Kua tere atu e iva ngauru mataiti i teianei, te tuatua nei te vaerua e te vaine akaipoipo ou ra e, “E aere mai” ki tetai au tangata te kaki ra i te vai ora. Kua akarongo ainei koe i ta ratou patianga mataora? No reira te raurauia atu nei koe kia oronga i te patianga ki tetai ke.
19 Kare tatou i kite e mei teaa te roa me oronga mai a Iehova i tana patianga aroa, inara i to tatou ariu anga ki te reira na te tuatua anga e, “E aere mai” te akariro ra ia tatou ei oa rave angaanga na te Atua. (1 Kori. 3:6, 9) E akameitakianga tikai te reira! Kia akaari ua rai tatou e te akaperepere ra tatou i taua akameitakianga ra e kia ‘oronga ua ki te Atua i te atinga akapaapaa’ na te tutu putuputu aere anga. (Ebe. 13:15, NW) Kapiti atu ki te pupu o te vaine akaipoipo ou, e tuatua ua rai tatou te aronga e manakonakoanga to ratou i te enua nei e, “E aere mai.” E penei e manganui te ‘ka rave mai i te vai ora’!
Eaa Taau i Kite?
• Kua orongaia kiaai ma te patianga kia “aere mai”?
• Eaa i karangaia ai e no ko mai ia Iehova te patianga kia “aere mai”?
• Eaa te tuanga a te vaerua tapu no te oronga anga i te patianga kia “aere mai”?
• Eaa tatou ka tauta ei kia rave tamou i te angaanga orometua?
[Chart/Au Tutu i te kapi 16]
(No te akanooanga tikai o te tataanga, akara i te puka)
Te Tuatua Nei rai, “E Aere Mai”
1914
5,100 papuritia
1918
Manganui ka ora mai i runga i te enua Parataito
1922
“Akakite, akakite, akakite, i te Ariki e tona patireia”
1932
Kare te patianga e “E aere mai,” i oronga uaia ki te aronga akatainuia
1929
Tuatua ra te toenga o te aronga akarongo mou, “E aere mai”
1934
Patiia te pupu Ionadaba kia tutu aere
1935
Akatakaia mai te “aronga maata rava”
2009
E 7,313,173 papuritia