Kamupeini Puapinga i te Akakitekite i te Akamaaraanga!

1. Eaa ta te au papuritia o te Patireia ka rave i roto i teia ao katoa, akamata ia Mati ra 21, 2009, e no teaa ra?

¹ A te Paraparau, ra 9 o Aperira, 2009, ka akaputuputu te aronga akamori o te Atua ko Iehova i te ao katoa nei i te akamaara i tana angaanga aroa maata rava atu no te tangata. (Roma 5:6-8) Te tapapa atu nei tatou e mirioni ua atu aronga e inangaro maira i te kapiti mai kia tatou me akamaara tatou i te mate o Iesu. Akamata ia Mati ra 21, ka tuaia tetai patianga puapinga ki te Akamaaraanga takapini i teia ao katoa.

2. Eaa te au tumu ka akamanako koe me oronga i te patianga?

² Au Tumu kia Akamanakoia: E taangaanga pu tikai i te au tutu, te au uianga, e te au irava tei taikuia i roto i te patianga. Ei akaraanga, penei ka tou koe ki te tutu i runga i te kapi mua e ka karanga e: “Te inangaro nei au i te pati atu ia koe kia kapiti mai kia matou no te akamaara anga i te mate o Iesu, te ka raveia a te Paraparau, ra 9 o Aperira, 2009.” E oti e taiku i te tumu manako o te patianga e te au uianga i raro ake. E akapapu meitaki atu e ka akatikaia te tangata ngutuare kia pati atu i tona ngutuare tangata e tetai ua atu tana e inangaro ra i te apai mai.

3. Akapeea koe i te atoro atu anga i te aronga taau i pati vave atu i roto i te kamupeini?

³ Me e aka ngai tutuanga to taau putuputuanga, penei ka akakite atu te aronga pakari kia koe kia akaruke i te au patianga ki te au ngutuare kare e tangata i te kainga. I te au openga epetoma, e oronga kapiti i te makatini e te patianga. E akariro ei akakoroanga naau i te pati atu i te aronga e atoro ana koe, te aronga apii Pipiria, te kopu tangata, te au oa apii, te au oa angaanga, te au tangata tupu, e te aronga e piri atura koe. I te mataiti i topa akenei, kua pati atu tetai tuaine e 30 mema o tona kopu tangata, e oti kua akamaara putuputu atu aia kia ratou i te puapinga o teia atianga. Kua rekareka tikai aia e e 25 tei tae mai, e e 4 ia ratou kua ariki i tetai apii Pipiria i muri mai!

4. Eaa te au akapapa anga ka rave vave tatou, e no teaa ra?

⁴ Akapapa Vave: E manganui te au papuritia, penei ka rauka i te akamaata mai i ta ratou angaanga i roto ia Mati e Aperira. Me e tamariki taau me kore e aronga apii Pipiria te tere meitaki ra ki mua, penei ko teia te taime meitaki rava atu kia akariro ia ratou ei au papuritia kare i papetitoia. Ko teia te taime no te akamata i te akapapa kia piri pu tikai ki roto i teia kamupeini, te akakitekite ra i te akamaara anga i nga akakiteanga maata rava atu o te aroa.​—Ioa. 3:16; 15:13.