Au Uianga a te Aronga Tatau

◼ Ka ora ainei te au Kerititiano akatainuia i te “tumatetenga maata” mea noo i te enua nei i roto i te ao ou i mua ake ka apainaia ei ki te rangi?

Te tika tikai, kare te Puka Tapu i tuatua i te reira.

Inangaro ua ana rai te au Kerititiano i te kite i teia au tikaanga ta te Atua penei ka oronga kia ratou. (Angaanga 1:6) Tika rava oki te reira i to tatou tuatau i te mea e kua akanooia te Patireia. (Mataio 24:3, 24, 34) I te mea te aere mai nei te openga o teia akatereanga kino i tona uaorai taime, I tapapa ana te au Kerititiano me ka ora atu rai tetai pae tei akatainuia i te vaerua “i taua rā maata o te Atua mana katoatoa ra” e kia tavini i runga nei i te enua no tetai tuatau i mua ake ka raukai to ratou tutaki i te rangi ra. (Apokalupo 16:14) Kare oki te Puka Tapu i tuatua me ka tupu te reira, inara tetai au akapapaanga e te au totou kua raveia mai ei akaari e penei ka na reira. Auraka oki tatou e tamanako ua, kia akara ra kia kite e ka akapeea te Atua me rave i te reira au mea.

Tetai au tupuanga Tuatua Puka Tapu kua tupu aiteite te reira i muri mai i rotopu i to te Atua iti tangata. Ei akaraanga, kua kite oki tatou e no roto ana a Iona i tetai ika maata no tetai toru ra e e toru po. Ka akara tetai papaki i te reira akaoraanga e na te Atua, inara kua tuatua a Iesu e akaraanga tuatua totou te reira e ka noo aia ki roto i te vaarua no tetai tuatau aiteite i mua ake i tona tuakaouanga ra. (Iona 1:17; Mataio 12:40) Ae, tei tupu kia Iona e akaraanga tupuanga totou te reira. Ei marama anga, kua akara i reira to te Atua iti tangata i te au totou e tetai au akapapaanga takake o te Puka Tapu kia kite me kua akaari mai te reira e ka akapeea a Iehova me rave ake i te reira.

Ei akaraanga i te aru i te totou Puka Tapu, Te Punanga Tiaki Anga (reo Peritane), o Titema 15, 1928, kua tuatua a Mika 5:2-15. Kua akaari mai te Puka ko Mika i to Asura akatanea anga ia Samaria e te oki akaou anga te ngati Iuda mei te tuikaa i roto ia Babulonia. (Mika 1:1, 5-7; 4:10) Kua tou katoa ki tetai au mea i muri mai, mei te anau anga o te Mesia i roto ia Betelehema. (Mika 5:2) Kua totou a Mika e i muri ake i to ratou akaoraangaia mai mei “to Asura,” “te toenga o Iakoba” ka riro “mei te au no ko ia Iehova ra” e “mei te liona ou i rotopu i te au anana mamoe ra.” (Mika 5:6-8) Kua akakite mai Te Punanga Tiaki Anga e: “Penei ka tau teia kia mouia ei akaraanga e ko tetai papaki o te toenga tei runga rai i te enua i muri ake i te tamakianga ia Aramakito e ka riro oki na ratou e rave i etai angaanga i roto i te ingoa o te Atu e ki tona ngateitei e te kaka.” Te vai nei te tu akaaka, te tuatua mako tei raveia mai ei akaari i teia tamanakoanga: “Penei ka tau teia ki mouia ei akaraanga.”

E akaraanga ainei tetai na te Puka Tapu tei aiteite e ka ora atu rai i runga i te enua? Tetai akaraanga tei orongaia koia oki ko Noa e tona ngutuare tangata. Kua riro oki a Noa ei akatutu ia Iesu i roto i teia tuatau o te openga. (Genese 6:8-10; Mataio 24:37) Mei a Noa rai i arataki i tana vaine e nga tamariki tamaroa e toru e ta raua nga tamaine unonga na roto i te openga o te reira akatereanga taito, ka oronga oki te Mesia i tetai aratakianga no te toenga o te pupu o tana vaine akaipoipo e te aronga katoa tei riro mai ei au tamariki a te “Metua Mutu Kore,” ko Iesu. Kua ora atu oki te vaine a Noa i te Tiruvi e kua kapiti atu i te akaouanga i te akamori tika i runga i te enua tamaia. Te akaraanga aiteite koia oki te ora atu anga o te anana iti te pupu o te vaine akaipoipo ki roto i te ao ou.​—Isaia 9:6, 7, NW; 2 Korinetia 11:2; Apokalupo 21:2, 9.a

Tetai au akaraanga Puka Tapu kua riro katoa ei tumu anga i te oronga mai e tetai papaki o tei akatainuia ra penei ka ora atu ki roto i te ao ou. Ei akaraanga, kua ora atu a Ieremia i te akapouanga o Ierusalema; “te tangata” tei aia te ariki inika kua noo atu kia kite i te angaanga takore anga i mua ake ka oki ei aia ka oronga i tana ripoti.​—Ezekiela 9:4, 8, 11.

Te au tuatuaanga no runga i te tumu e penei ka ora atu etai o te aronga akatainuia ki roto i te ao ou kua raveia te reira ma te akakoroanga meitaki e i roto katoa i te marama i te au tupuanga a te Puka Tapu i mua atu tei tau­taia ana kia kite i te au totou me kare au akatutuanga te ka riro ei au mea aiteite no a muri nei. Mei te mea e kare tei akatainuia e noo mai i te enua nei, kare rai oki e tumu kia mareka kore. Kua ariki ke ana tatou e na roto i te au tuatau ka marama tatou i te au ravenga a te Puka Tapu. Ei akaraanga, kua tuatua akaou oki Te Punanga Tiaki Anga (reo Peritane) o Tiurai 15, 1981, ia Mika 5:6-9 e kua akamarama e ko “te toeanga o te Iseraela vaerua kare oki i tiaki e i muri rava ake . . . ia Aramakito e riro ei ei ‘au’ akaoraora ki te iti tangata.” Kua oronga akaou teia uriurianga manako i te tumuanga e penei ka ora atu te toenga i te tamaki maata a te Atua e no tetai tuatau poto “ka riro rai ei ‘au’ akaoraora ki te ‘urupu maata’ o te ‘mamoe ke.’” Te kite nei ra tatou, e te tuatau tei topa e te maata atura te marama i te pae vaerua ka akamaata e ka taui i to tatou maramaanga o te totou me kare te au nuku o te Puka Tapu.​—Maseli 4:18.

Kua kite ra tatou e kua kapiti te Puka Tapu i te ‘aere anga mai o te Tamaiti a te tangata’ ki ‘te akaputuputuanga i tona aronga ikiia ra, no nga matangi e a.’ (Mataio 24:29-31) Pera katoa, i te tuatau o “te mama mai anga o te Atu” i roto i te mana Patireia, te aronga akatainuia tei moe i roto i te mate, ka akatuia kia ora i te rangi ra. (1 Tesalonia 4:15, 16) Ko teia aronga kua topiriia ka riro ratou ei tuanga no te vaine akaipoipo a te Punua Mamoe. Aea te reira e tupu ei?

I roto i te puka Apokalupo, i muri uaorai i to Ioane akakite anga i ta te Atua akautunga anga i te vaine akaturi, ko Babulonia Maata, kua akakite mai aia i “te akaipoipoanga o te Punua mamoe.” Kua akaateaia teia “vaine” viivii, akaturi mei teia ngai, e kite atura tatou i “te vaine akaipoipo, te vaine a te Punua mamoe ra” ‘tei kakau i te kakau meitaki e mea viivii kore, e te teatea tei akaaiteia ki te angaanga tuatua tika a te aronga tapu ra.’ (Apokalupo 18:10; 19:2, 7, 8; 21:9) Te akapouanga o Babulonia Maata ko te tuanga maata te reira o te tumatetenga maata. (Mataio 24:21; Apokalupo 7:14) No reira ka tau kia tamanakoia e ko tetai o te pupu o te vaine akaipoipo ka ora atu mei te tumatetenga maata ei akakite i ta Iehova mareka anga e te paruruanga. (Zephania 2:3; akaaiteia atu kia Mataio 24:22.) Mei te mea e ka paruruia te enua nei, ka vai i reira ratou i konei e tae ua atu ki to Iehova ikianga ia ratou kia aere ki te rangi.

Inara, te akakiteanga i roto i te Apokalupo kare te reira i te tupuanga akaau. Kare oki e mei te mea atura e ko te toeanga o te aronga akatainuia e ka anoanoia ratou kia akamata atu i te ao ou, no te mea kua akamatau takereia mai ana ratou e au mirioni o te au Kerititiano tiratiratu te ka ora ua atu rai ki runga i te enua nei. No reira, ka rauka kia apai atu te Atua i tona aronga akatainuia ki te rangi i muri ua ake i te akapouanga o Babulonia Maata, e akanoo atura i te au mea te ka raveia no “te akaipoipo anga o te Puna Mamoe” kia tupu. Ka rauka i reira i te aronga tapu katoatoa kia kapiti atu ki te Mesia ei ‘tainga anga nana i te pa enua ma te sepeta auri’ i roto i te tuanga openga o te tumatetenga maata. (Apokalupo 2:26, 27; 19:11-21) Mei te mea e ka na reira te Atua me rave i te au angaanga, te katoatoa o te 144,000 tei a Iesu anakeia kia ‘tutara ei au ariki e te Mesia no te katoa anga o te tai tauatini mataiti.’​—Apokalupo 20:4.

E mea meitaki oki no to te Atua iti tangata kia inangaro kia akara atu ki roto e ka akapeea aia me oronga mai i te tutaki ki tona au tavini. (Akaaiteia atu kia 1 Petero 1:12.) Ka akaari mai teia i to ratou irinaki anga ka tupu rai tona anoano. Auraka nei ra tatou e maro no runga i tetai au mea, kia akara atu ra ki mua ki te ka tupu.

[Tataanga Rikiriki i Raro]