Te Riro ra Ainei te Vaerua o Teianei Ao ei Poitini ia Koe?

IA Tepetema 12, 1990, kua tupu tetai aruru anga maata ki roto i tetai ngai tamaanga auri i Kazakstan. Kua tukuia mai tetai apinga reitiatini kino ki roto i te reva, kua akakoko i te ora anga o te aronga e 120,000 te noo ra ki reira, e manganui to ratou ra tei aere atu ki runga i te au arataa ma te akaapa anga no taua poitini kino ra.

Inara i te akakitea anga kia tere atu te marama anga, kua kitea e ratou e no te noo ana ratou ki roto i tetai reva poitini no etai raungauru mataiti. I te au mataiti i topa, e 100,000 tane poitini reitiatini tei tiriia atu ki roto i tetai ngai atea ua, kare ra i paruruia. Noatu rai e te vaira taua tu kino ra ki runga i te tapa o to ratou ngutupa, kare e tangata i manako maata atu i te reira. No teaa ra i kore ei?

I te au ra ravarai, i te ngai tarekareka anga, kua akakitea e te aronga opita tetai tare anga reitiatini ra, tei akakite maira i te manako e kare e kino i reira. E tika te au numero tataia ra, inara kua akakite anake i te reitiatini gamma ra. E aiteite katoa oki te akakino anga a te reitiatini alpha, tei kore ra i vaitoia. E manganui te au metua vaine tei akamata ra te kite e eaa ta ratou tamariki i makiiaʼi.

I te tuatuaanga i te pae vaerua, ka rauka katoa oki kia poitiniia tatou i te taero anga akara koreia ra. E mei te aronga tangata tei rokoia ra e te tu kino i Kazakstan, te matakite kore ra te maata anga o te au tangata i teianei akakokoanga akakino i te oraanga. Te akataka maira te Pipiria i teia tumu akataero anga ko “te vaerua o teianei ao,” te akatereia maira e Satani te Tiaporo uaorai. (1 Korinetia 2:12, NW) Te taangaanga akakino maira Tei patoi i te Atua ra i teianei vaerua​—me kare te tu manako​—o teianei ao kia akakore i to tatou tu akono akamori i te Atua ra.

Akapeea te vaerua o teianei ao i te akangere anga i to tatou maroiroi i te pae vaerua? Na te akakeuanga i te anoano tika kore o te mata nei e na te raveanga i to tatou uaorai tu noinoi. (Ephesia 2:1-3; 1 Ioane 2:16) Ei akatauanga, ka akamanako ana tatou e toru au ngai ke ke te ka rauka i te manakoanga no teianei ao te poitini marie i to tatou tu i te pae vaerua.

Kimianga i te Patireia na Mua

Kua raurau a Iesu i te au Kerititiano kia ‘na mua i te kimi i te basileia e te tuatua-tika o te Atua.’ (Mataio 6:33) Ka rauka ra i te vaerua o teianei ao, i tetai pae, kia taki atu ia tatou kia oronga i te manako anga maata tau kore ki to tatou uaorai au manako e te pumaana anga oki. Te vaira te tu kino mua, kare i te akarukeanga takiri i te au manako i te pae vaerua, mari ra i te tukuanga ia ratou ki te tuanga rua. Ka rauka ua kia manako kore tatou i te tu kino​—mei te au tangata i Kazakstan rai​—no tetai tu tinamou pikikaa ra. To tatou au mataiti maata i te tavinianga tiratiratu e to tatou arikianga no to tatou au tungane e te au tuaine i te pae vaerua ka rauka kia akavare ia tatou kia manako e kare rava tatou e akaruke i te aerenga no te tuatua mou ra. Penei, e manganui to te putuputuanga i Ephesia ra tei manako ra taua aerenga ra.

Vaitata ki te mataiti 96 T.N., kua oronga atura Iesu i te ako anga te aru mai nei: “Te vai nei ra taku akaapa anga ia koe, i te mea kua vaoo koe i to inangaro mua ra.” (Apokalupo 2:4) Kua akakoromaki taua au Kerititiano roa ra te tavinianga i te au tu ngata e manganui. (Apokalupo 2:2, 3) Kua apiiia ratou e te aronga pakari tiratiratu ra, kapiti katoa te apotetoro ko Paulo. (Angaanga 20:17-21, 27) Inara, i te topa anga te au mataiti, kua meangiti ua to ratou inangaro no Iehova, e kua ngere i to ratou maroiroi i te pae vaerua.​—Apokalupo 2:5.

Penei, kua akakinoia tetai papaki o to Ephesia ra na te ravenga okooko e te apinganui oki i te oire ra. E mea mii kia tuatuaia, e kua apai ke ia atu e te ravenga kia apinganui a te taiate o teianei tuatau tetai papaki o te au Kerititiano ra ma ia katoa ra. Ko tetai tautaanga pakari kia rauka te tu ora anga pumaana ka riro kia akatapae ke ia tatou mei te au akakoro anga i te pae vaerua ra.​—Akaaite ia Mataio 6:24.

I te akamatakite anga i teianei tu kino, kua tuatua a Iesu: “Ko te mata to te kopapa nei mārama: te meitaki ra to mata, kua mārama ïa to kopapa katoa: Kia kino ra toou mata [“kia vareae,” NW tataanga i raro ake], ka poiri ïa to kopapa katoa.” (Mataio 6:22, 23) Ko te mata “meitaki” ko tetai mata ia te akara ra i te tu vaerua, ko te mata tei tamouia ra ki runga i te Patireia o te Atua ra. I tetai pae, ko tetai mata “kino” me kare e “vareae” te poto ua ra te kite anga, ka rauka i te akara anake ua i te au anoano kopapa no teianei tuatau poto ua. Ko te au akakoro anga i te pae vaerua e te au tutaki no te tuatau ki mua te vai maira kia mamao atu tona akara anga.

Kua tuatua maira Iesu i te irava i mua akera: “Te ngai oki i vaioiaʼi to kotou na apinga, ka riro katoa i reira to kotou ngakau.” (Mataio 6:21) Akapeea tatou ka kite ei me tei runga to tatou ngakau i te au apinga vaerua me kare i te au apinga kopapa? Penei ko te arataki anga meitaki tei ta tatou au tuatua anga, i te mea “no te ki oki o te ngakau i tuatuaʼi te vaa.” (Luka 6:45) Me ka kite tatou ia tatou uaorai i te tuatua anga putuputu no te au apinga kopapa me kare te au ravenga o teianei ao, te akakite maira e te tataka ke ra to tatou ngakau e kare to tatou akara anga i te pae vaerua i te meitaki.

A Carmen, ko tetai tuaine Paniora, kia kukumi aia i teianei manamanata.a “Kua akatupuia ake au i roto i te tuatua mou,” ta Carmen i akataka mai, “inara e 18 oku mataiti kua akamata au i taku uaorai pitiniti apii tamariki rikiriki. E toru mataiti i muri akera e a aku aronga angaanga, kua tupu ruperupe taua pitiniti ra, e e maata taku moni i rauka mai. Inara, penei ko te tumu i maataʼi toku merengo anga, no te tika e naku uaorai i akatere taku moni, e kua ‘puapingaia’ au. Ei tuatua tiratiratu, i roto toku ngakau i taku pitiniti​—ko te reira toku inangaro maata rava.

“Kua manako au e ka tau ua au ei tetai Kite noatu te akatapuia ra te maata anga o toku taime ki te au manako pitiniti. I tetai pae, e manako ngakau tamou toku e ka rauka iaku i te rave kia maata atu te tavini anga ia Iehova ra. Ko tei akariro iaku i te openga kia tuku i te au apinga no te Patireia ei mea mua, ko te akatauanga ia a toku nga oa e rua e painia ra. Tetai o raua ra, ko Juliana, i roto aia i toku putuputuanga. Kare aia i tauta kia opara iaku kia riro ei painia, mari ra na tana au tuatua e te rekareka tana i rauka mai no tana angaanga orometua ra i tauturu iaku kia akamanako akaou i toku uaorai puapinga i te pae vaerua.

“I tetai tuatau i muri akera, i toku orote anga i te Unaite Teite, kua noo kapiti maua ko Gloria, koia tetai tuaine e painia. Kare i roa ana tona riro anga ei vaine takaua, e te akono ra aia i tana tamaine e rima mataiti e tona metua vaine tei maki kaneta ra. Inara te painia ra aia. Kua tukiia toku ngakau e tana akatauanga e tona ariki anga ngakau oki no te angaanga orometua ra. No nga ra poto e a toku noo anga ki tona kainga kua akariro iaku kia manako pakari kia oronga kia Iehova i te meitaki roa te ka rauka iaku. Te mea mua kua riro au ei painia tamou, e i etai mataiti tokoiti i muri akera, kua patiia maua ko taku tane kia tavini ki Betela. Kua karanga au ki taku pitiniti e noo akera te aere nei au​—e arairai anga ki toku tereanga ki mua i te pae vaerua​—e i teianei te manako nei au e kua puapingaia toku oraanga i nga mata o Iehova ra, ko te reira oki te tumu tau tikai.”​—Luka 14:33.

Na te apiianga “kia timata . . . i te au mea e maata ua atu te meitaki,” mei ta Carmen i rave ra, ka tauturu ia tatou kia rave i te ikianga tau no runga i ta tatou angaanga, te kite apiianga, te are, e te tu oraanga oki. (Philipi 1:10) Inara te akapapu katoa ra ainei tatou i te au mea e maata ua atu te meitaki no te pae ki te tamataora anga? Ko teianei katoa tetai ngai te mana maata maira te vaerua o teianei ao.

Tamou i te Tuatau Akaangaroi ki Tona Ngai Tau

Te akavare kikite ra te vaerua o teianei ao i te inangaro natura o te au tangata no te noonoo anga e te akaangaroi anga oki. I te mea ko te maata anga o te au tangata kare o ratou manakonako tikai no te tuatau ki mua, e mea matauia e ka tau ratou kia kimi kia akaki i teianei tuatau ra te tamataora anga e te akaangaroi anga oki. (Akaaite ia Isaia 22:13; 1 Korinetia 15:32.) Te kite ra ainei tatou ia tatou uaorai i te akatakaanga kia maata e kia maata atu te tuatau puapinga ki te akaangaroi oki? Ka rauka kia riro te reira ei akairo e te akapapaia ra to tatou manako e te tu manakoanga o teianei ao.

Te akamatakite maira te Pipiria: “Ko tei aruaru i te mea navenave [“tamataora,” Lamsa] ra, ka riro ei tangata apinga kore.” (Maseli 21:17) Kare i te tarevake kia rave tamataora anga, inara ko te inangaroanga i te reira, me kare te akatakaanga ei mea puapinga maata ia, ka taki atu ki te apinga kore i te pae vaerua. Ka akariro i to tatou kaki i te au apinga vaerua kia meangiti ua, e ka riro oki kia meangiti ua te tuatau no te tutuanga i te tuatua meitaki.

No teia tumu, te ako maira te Tuatua a te Atua ia tatou “kia kiritiia te manako no te angaanga, kia akono meitaki ia tatou ma te apa kore.” (1 Petero 1:13, The New English Bible) Te umuumuia ra te akono meitaki kia kotingaia to tatou tuatau no te akaangaroi kia riro ei mea tau ia. Te aite anga e kia kiritiia no te angaanga koia oki kia papa no te angaanga i te pae vaerua, me no te apii, te au uipaanga, me kare te angaanga tutu aere.

Akapeea te akaangaroi anga umuumuia ra? Ka tau ainei tatou kia manako akaapa ua me ka akataka i tetai tuatau kia akaangaroi? Kare rava ia. E mea anoanoia te akaangaroi anga, e maata oki i teianei ao manamanata nei. Inara ei au Kerititiano akatapuia kare tatou e tau kia tuku ua i to tatou au oraanga kia akapiniia e te akaangaroi anga oki. Me maata roa te akaangaroi anga e te tamataora oki. Me maata roa te akaangaroi ka akavare ia tatou kia rave meangiti mai e kia meangiti atu oki te angaanga tau ra. Ka rauka i te reira i te akameangiti mai i to tatou tu rapurapu, e penei oki ka akamaroiroi mai ia tatou uaorai kia rave ua ma te tuauau. Akapeea, i reira, e raukaʼi ia tatou te manako anga tau i te akaangaroi anga?

Te akamaroiroi maira te Pipiria kia akaangaroi meangiti ua kare ra kia maata roa te angaanga​—me kare ra e umuumuia ana taua angaanga noa ua ra. (Koheleta 4:6) Noatu ra e ka tauturu te akaangaroi i to tatou au kopapa kia maroiroi mai, ko te tumu ra no te maroiroi i te pae vaerua ko te mana rave angaanga ia o te Atua ra. (Isaia 40:29-31) Ka rauka mai ia tatou teia vaerua tapu i te raveanga i ta tatou au angaanga Kerititiano. Ka angai te apii anga takitai i to tatou au ngakau e ka akakeu i te au inangaro tika. Ka akono te aereanga ki te au uipaanga i te ariki anga no Tei Anga mai ia tatou. Ka akatupu te rave kapitianga i te angaanga orometua Kerititiano i te au manako ngakau no etai ke ra. (1 Korinetia 9:22, 23) Mei ta Paulo i akataka tika maira, “mate ua rai oki te tangata i vao nei, te akaouia nei te tangata i roto, i tera rā i tera rā.”​—2 Korinetia 4:16.

Ko Ileana, e metua vaine no nga tamariki e ono e vaine oki na tetai tane akarongo kore, te taki ra aia i tetai oraanga maata te angaanga. E apainga tana i tona uaorai ngutuare tangata e etai atu kopu tangata katoa oki, tera te aite anga i te akaraanga e te rapurapu tamou ra aia i te au ngai ravarai. Inara, te akanoo katoa ra aia i tetai akaraanga tau i te tutu aereanga e te teateamamao anga no te au uipaanga. Akapeea i raukaʼi iaia i te rave i taua angaanga maata ra?

“E tauturu tikai iaku te au uipaanga e te angaanga tutu aere kia akono i taku au apainga ke ra,” ta Ileana i akataka mai. “Ei akatauanga, i muri ake i te tutu aereanga, e maata taku apinga te ka tamanako iaku e rave ra i taku angaanga ngutuare. E putuputu au i te imene iaku e rave ra i te reira. I tetai pae, me kare au i aere ki tetai uipaanga e me e meangiti ua taku i rave i te tutu aereanga, ka riro mai te au angaanga i toku ra ngutuare e tetai tauta anga pakari tikai.”

Mei teaa ra te tuke anga ki to te puapinga maata te tukuia ra ki te akaangaroi e te tamataora!

Te Akamareka ra te Manea i te Pae Vaerua ia Iehova

Te noo nei tatou i tetai tuatau te maata ua atu nei te manako anga i te akara anga kopapa. E maata te moni akapouia e te au tangata no te au akono anga kia meitaki mai to ratou akara anga e kia akameangiti oki i te au tupu anga karukaru no te ruaine. Te kapiti nei teia i te au akatupu anga rauru e te akatukeanga i te kara, te akaki anga kia maata mai te u, e te vai anga i te pakiri mata. E au mirioni ua atu te aere ra ki te au ngai akatopa mai i te paunu, te au ngai tereni anga, e te au pupu akamaroiroi kopapa, me kare ka oko ratou i te au vitio no te tereni anga e te au puka oki no te kai kia akatopa i te paunu anga. Te inangaro ra to teianei ao kia irinaki tatou e ko te patipoti ki te mataora anga ko to tatou akara anga kopapa ia, e ko to tatou “tutu” te au apinga ravarai.

I te Unaite Teite, kua akakite mai tetai kimikimi anga na te makatini Newsweek e e 90 patene o te au mapu Marike teatea te “mareka kore ra i to ratou au kopapa.” Ka rauka i te kimi anga pakari no tetai tu kopapa meitaki i te akakino i to tatou tu i te pae vaerua. Ko Dora tetai Kite ou no Iehova tei manako akama ra i te akaraanga o tona kopapa no te mea e manga teiaa aia. “Me aere au ki te toa, e mea ngata kia kitea e au te kakau tau kiaku no toku tu maata,” tana i akataka. “I te akara anga ko te au kakau manea kua maaniia no te aronga mapu ikoke ua. E kino rava atu oki, kua tuatua aviri te au tangata no toku maata roa, tei akariri maata iaku, e kino atu oki me no ko mai i toku au tungane e te au tuaine i te pae vaerua ra.

“Ei tetai tupu anga, kua riro kia maata atu toku manako anga i toku tu akaraia mai, no te maata o te reira kua topa mai te au puapinga i te pae vaerua ra ei tuanga rua i toku oraanga. Mei te mea rai e tei runga toku mataora anga i toku taukupu. E manganui te au mataiti kua topa, e i teianei kua pakari mai au ei tetai vaine e ei tetai Kerititiano, kua tuke taku akara anga i te au apinga. Noatu rai e te akono ra au i toku tu kopapa, te kite ra au e ko te manea i te pae vaerua te mea maata roa ia, e na te reira e oronga mai kiaku i te merengo anga maata roa. I toku kite anga i te reira, kua rauka iaku i te tuku i te au manako no te Patireia ki roto i to ratou ngai tika ra.”

Ko Sara tetai vaine tiratiratu i taito ra tei rauka iaia teianei manako anga tau. Noatu rai e te taiku maira te Pipiria i tona manea i te pae kopapa iaia kua tere atura i te 60 mataiti, te akakite maata maira te reira i te manako ki tona au tu meitaki​—koia te tangata ngaro ra ko te ngakau. (Genese 12:11; 1 Petero 3:4-6) Kua akaari mai aia i tetai ngakau maru e te muteki ua, e kua kauraro marie i tana tane. Kare a Sara i manako tau kore ua e eaa te manako anga o etai ke nona ra. Noatu rai e no tetai tu apinganui mai aia, kua noo mareka ua aia i roto i te au puakapa ra no te tere atu i te 60 mataiti. Kua turu maru ua aia e te noinoi kore i tana tane; e vaine akarongo aia. Na te reira i akariro iaia ei tetai vaine manea tikai.​—Maseli 31:30; Ebera 11:11.

Ei au Kerititiano, te manako ra tatou kia akameitaki atu i to tatou tu manea i te pae vaerua, ko tetai manea e, me putuputu te tatanuia, ka tupu e ka vai mairai. (Kolosa 1:9, 10) Ka rauka ia tatou i te akono i to tatou tu akara anga i te pae vaerua na roto i nga tu maata e rua ra.

Ka riro tatou kia manea atu i roto i nga mata o Iehova ia tatou e rave ra i ta tatou angaanga orometua i te akaoraanga au tangata. (Isaia 52:7; 2 Korinetia 3:18–​4:2) Pera katoa oki ia tatou e apii ra kia akakite i te au tu Kerititiano, ka oonu atu to tatou manea. Ka maata atu te au tuatau no te akameitakianga i to tatou tu manea i te pae vaerua: “Ei kapiti anga aroa mou to kotou ia kotou uaorai, i te aroa taeake ra; i te akangateitei anga tetai ki tetai . . . kia maroiroi oki te ngakau, . . . ka akamātau rai i te takinga-meitaki i te tangata ke ra. . . . Kia rekareka kotou i te aronga e rekareka ra, ka aue katoa oki i te aronga e aue ra. . . . Auraka te kino e tutakiia atu ki te kino i te tangata ravarai nei. . . . Kia noo au ua kotou i roto i te tangata katoa nei.” (Roma 12:10-18) Na te tatanuanga i taua au tu manako ra ka akameitaki ia tatou ki te Atua e ki te au taeake tangata katoa oki, e na te reira e akameangiti mai i te akara anga viivii no to tatou au tu ara tei akatuangaia maira.​—Galatia 5:22, 23; 2 Petero 1:5-8.

Ka Rauka ia Tatou i te Kopae atu i te Vaerua o Teianei Ao!

Na roto i te au tu kikite e manganui, ka rauka i te vaerua poitini o teianei ao i te akaparuparu i to tatou tu tiratiratu. Ka rauka i te reira i te akariro ia tatou kia merengo kore i ta tatou apinga e kia apiapi i te tuku anga i to tatou uaorai anoano e te au manako ki mua i to te Atua ra. Me kare penei ka taki atu te reira ia tatou kia manako i to te au tangata ra manako kare i to te Atua, ma te tukuanga i te akaangaroi anga e te tamataora me kare te akara anga i te pae kopapa ei mea puapinga ia.​—Akaaite ia Mataio 16:21-23.

Te akakoro ra a Satani kia akapou i to tatou tu i te pae vaerua, e ko te vaerua o teianei ao tetai o tana au apinga maata ei rave i te reira. Kia maara e ka rauka ua i te Tiaporo i te taui i tana au ravenga mei ta te riona ngunguru ra ki ta tetai ovi kikite ra. (Genese 3:1; 1 Petero 5:8) I etai atianga, ka re teianei ao ki runga i tetai Kerititiano ua te takino anga, inara e putuputu tona poitini marie anga. E maata atu to Paulo manako anga no te tu kino openga nei: “Te mataku nei ra au, ko te akakinoia aea to kotou ngakau kia kore atu te tavaitai ua e tau i te Mesia nei, mei ta te ovi i pikikaa atu ia Eva i tona pakari.”​—2 Korinetia 11:3.

Kia paruru ia tatou mei te pakari o te ovi ra, ka umuumuia tatou kia akataka i te anoano pikikaa tei akamata mai “i teianei ao” e ka kopae ngaueue kore atu i te reira. (1 Ioane 2:16) Auraka tatou kia akavareia i te irinakianga e kare e kino o te tu manakoanga o teianei ao. Kua itae te reva poitiniia o ta Satani ra akatereanga ki te turanga poitirere tikai.​—Ephesia 2:2.

Me oti anake te akataka te manakoanga o teianei ao, ka rauka ia tatou te patoi atu i te reira na te akakianga i to tatou manako e te ngakau oki ma te apiianga ma a Iehova ra. Mei te Ariki ko Davida rai, e tuatua tatou e: “E akakite mai koe kiaku i to au arataa, e Iehova; e apii mai koe iaku i to au aerenga. E arataki koe iaku i te tuatua-mou naau ra, e apii mai oki iaku; ko koe oki te Atua o toku ora.”​—Salamo 25:4, 5.

[Tataanga Rikiriki i Raro]

[Tutu i te kapi 26]

Na te tautaanga i tetai tu oraanga meitaki ka akatapae ke ia tatou mei te au akakoro anga pae vaerua