Tika Meitaki ei Aronga Apii i te Tuatua a te Atua
“No ko maira i te Atua . . . Ko tei akatau katoa ia matou ei [“au orometua,” NW].”—2 KORINETIA 3:5, 6.
1, 2. Eaa te au tauta anga i te tutu aereanga te raveia ra i tetai taime, inara eaa ratou i puapinga korei?
AKAPEEA koe me ka orongaia atu tetai angaanga naau kare ra koe i tau kia rave? E akamanako: I te au mea tei umuumuia ra kua akapapaia mai ki mua ia koe, e te au apinga ei rave i tei reira kua papa katoa oki. Inara kare koe i kite e ka akapeea i te rave anga i taua angaanga ra. E kino rava atu oki, ko teianei angaanga tikai e mea rapurapuia. Te manako maira te au tangata naau e rave. Mei teaa ra te tu pekapeka o te reira!
2 Kare te reira tu i te mea manako ua. E akamanako ana i tetai akatauanga. I etai tuatau, kua tauta tetai o te au akonoanga o Kerititome i te akapapa e kia rave i te angaanga orometua mei tera are ki tera are. Kua puapinga kore te reira au tauta anga ra, e kua kore i roto i etai au epetoma me kare i etai marama ua. No teaa ra? No te mea kare a Kerititome i tauturu i tona au tangata kia tau no taua angaanga ra. Noatu rai ko te aronga apii kare i tau no taua angaanga tutu aereanga ra, e putuputu noatu ra te au mataiti apiianga i te au ngai apii ra. Eaa ra ka raukai ia tatou kia tuatua i te reira?
3. Ia 2 Korinetia 3:5, 6, eaa te tuatua tei taikuia ra e toru taime, e eaa tona aiteanga?
3 Te akataka maira te Tuatua a te Atua eaa te tau ra i tei tutu tikai i te tuatua meitaki Kerititiano ra. Kua akauruia te apotetoro ko Paulo kia tata: “Kare ra mei te mea e, e tau ia matou uaorai kia manako e, e tika tetai mea ngiti ia matou anake uaorai; no ko maira i te Atua ra to matou tika; Ko tei akatau katoa ia matou ei [“au orometua,” NW].” (2 Korinetia 3:5, 6) E akamanako ana i nga tuatua tei taikuia e toru taime i konei—e “tau” tikai. Eaa te aiteanga? Te tuatua ra te Vine’s Expository Dictionary of Biblical Words: “Me tuatuaia no te au mea [te tuatua Ereni mua] te akakite ra e ‘kua rava’ . . . ; me tuatuaia no te au tangata, te aiteanga kua ‘mako tikai,’ kua ‘tau.’” No reira, ko tei “tau” tikai kua mako tikai e kua tau i te rave i tetai angaanga orongaia mai. Ae, te au orometua tikai i te tuatua meitaki kua tau i te rave i teianei angaanga. Kua mako tikai ratou, kua tano, kua tau i te tutu aere.
4. (a) Akapeea ta Paulo ra akatauanga i te akaari anga e ko te tauanga no te angaanga orometua Kerititiano kare i kotingaia ki tetai aronga karape tokoiti ua? (e) Eaa nga apinga e toru ta Iehova e akatau maira ia tatou ei au orometua?
4 Noea maira, taua tu tau ra? No te au kite tangata mai ainei? No te kite teitei mai ainei? No te apiianga ainei i te au apii ma tetai tu taka ke? I te akara anga tei te apotetoro ko Paulo taua au apinga katoa ra. (Angaanga 22:3; Philipi 3:4, 5) Inara, kua akatika taakaaka aia e ko tona au tu tau ei orometua kua rauka mai, kare no te au apiianga teitei mari ra no ko mai i te Atua ko Iehova ra. No te aronga karape tokoiti ua ainei taua au tu tau ra? Kua tata atura Paulo ki te putuputuanga i Korinetia ra “kia tau tikai matou.” Te akakite tika maira te reira e te akapapu ra a Iehova e ko te katoatoa o tona au tavini e tau anake, ka rauka kia rave i te angaanga tana i akaue ra ia ratou kia rave. Akapeea ta Iehova ra akatau anga i te au Kerititiano mou i teia tuatau? E uriuri tatou i nga tumu e toru tana e taangaanga ra; (1) tana Tuatua, (2) tona vaerua tapu, e (3) tana akaaerenga i te enua nei.
Na te Tuatua a Iehova i Akatau ia Tatou
5, 6. Eaa te akatupu anga a te au Tuatua Tapu ki runga i te au Kerititiano mou ra?
5 Te mea mua, akapeea te Tuatua a te Atua i te tauturu anga kia tau tatou ei au orometua? Kua tata a Paulo: “Te au Tuatua Tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.” (2 Timoteo 3:16, 17) No reira na te au Tuatua Tapu e tauturu mai ia tatou “kia apa kore . . . ma te tau tikai” kia rave i te “angaanga memeitaki” no te apiianga i te au tangata i te Tuatua a te Atua. Inara, akapeea, te aronga katoatoa o te au akonoanga o Kerititome ra? Tei ia ratou te Pipiria. Akapeea e raukai i te puka okotai i te tauturu i etai au tangata kia tau ei au orometua e kare e tauturu ia etai ke ra? Te vaira te pauanga i to tatou tu manako ki te Pipiria ra.
6 E mea mii ra, e manganui te aere ra ki te akonoanga kare e ariki ana i te tuatua a te Pipiria, “ei tuatua ra na te Atua, e koia tika rai oki.” (1 Tesalonia 2:13) Kua patu a Kerititome i tetai akaraanga akama i roto i teianei tu. I muri ake i te akapouanga e au mataiti ua atu i te apiianga i roto i te au ngai apii, kua tau ainei te au orometua ei aronga apii i te Tuatua a te Atua ra? Kare rava ia. No teaa ra, ko tetai papaki o te aronga apiipiiia kua akamata i te au apii anga terenianga orometua ei aronga irinaki i te Pipiria mari ra kua karatuati mai ei aronga ekoko! I muri akera, kare i rave i te tutu aereanga i te Tuatua a te Atua ra—ta te aronga e manganui o ratou kare ra e irinaki akaou ana—kua akaariu ke ratou i ta ratou angaanga orometua na etai au ngai ke, te raveanga i te au patoianga poritiki, na te akamaataanga i tetai evangeria, me kore na te akateitei anga i te au apiianga a te tangata i roto i ta ratou au akoanga. (2 Timoteo 4:3) Ei tukeanga, kua aru te au Kerititiano mou i te au akatauanga a Iesu Karaiti ra.
7, 8. Akapeea to Iesu ra tu manako ki te Tuatua a te Atua ra i tuke ei mei to te au arataki akonoanga o tona tuatau ra?
7 Kare a Iesu i akatika i te aronga arataki akonoanga o tona tuatau kia mana i rungao i tona manakoanga. Me te apii ra i tetai pupu meangiti, mei tana au apotetoro ra, me kare i te aronga maata, kua akono a Iesu i te taangaanga meitaki i te au tata anga tapu ra. (Mataio 13:10-17; 15:1-11) Na teianei ravenga i akataka ke iaia mei te au arataki akonoanga o tona tuatau ra. Kua akamaroiroi kore ratou i te au tangata noa nei kia kore e akara ki roto i te au mea oonu a te Atua. Ko te tika, e mea matauia no tei apii i taua tuatau ra kia mou i etai tuanga o te Pipiria e e ketaketa roa kia uriuri manakoia ma tetai ua atu mari ra ki tana i akaperepere anake kia apii—e noatu rai i reira, na roto i tetai reo akaaka e ma te tapoki anga i te upoko. Ko taua aronga arataki akonoanga ra kua maata to ratou manako purepure i te uriurianga i etai tuanga o te Pipiria ra i ta ratou e rave ra i te taikuanga i te ingoa o te Atua ra!
8 Kare te reira i to Karaiti tu. Kua irinaki aia e kare e tokoiti ua mari ra ko te au tangata katoatoa te umuumuia ra kia akamanako “i te au mea katoa ra no roto mai i te vaa o te Atua ra.” Kare a Iesu i inangaro i te oronga i tetai ua atu taviri no te kite ki tetai pupu ikiia o te aronga apiiia. Kua tuatua aia ki tana au pipi: “Taku i karanga atu kia kotou i te poiri nei, ta kotou ïa e tuatua i te mārama: e tei koumuumuia i roto i to kotou taringa, ta kotou ïa e kapiki ua atu ki rungao i te are.” (Mataio 4:4; 10:27) Kua anoano maata a Iesu kia tua i te kite i te Atua ma te au tangata e manganui te ka rauka.
9. Eaa ta te au Kerititiano mou e taangaanga ra no te Pipiria?
9 Ko te Tuatua a te Atua ka tau kia riro ei tumu maata no ta tatou apiianga. Me oronga tatou i tetai tuatua i te Are Uipaanga Patireia o te Au Kite o Iehova, ei akatauanga, e mea matauia kare e rava ua kia tatau i etai irava ikiia mei te Pipiria maira. Penei ka anoanoia tatou kia akataka, kia akatutu, e kia taangaanga i tetai irava tau ki te aerenga manako. Ko to tatou akakoro anga kia taaki mai i te tuatua Pipiria ra mei te kapi tataia ra e ka tauru ei ki runga i te au ngakau o te aronga e akarongo maira kia tatou. (Nehemia 8:8, 12) Ka tau katoa kia taangaangaia te Pipiria me te tau ra kia ako atu me kare kia rave i te apii akatikatika anga. Noatu rai e te tuatua ra te au tangata o Iehova i te au reo ke ke e kua aere mai mei te au ngai tukeke, pouroa ratou te akangateitei ra i te Puka o te au puka ra—koia te Pipiria.
10. Eaa te akatupu anga a te tuatua akauruia o te Pipiria ki runga ia tatou?
10 Me taangaangaia ma taua tu ngateitei ra, e mana to te tuatua Pipiria ra. (Ebera 4:12) Ka akakeuia te au tangata kia akatupu i te au tauianga i roto i to ratou oraanga, mei te ariu ke anga mai mei te au ravenga tau kore i te tuatua tapu no te kanga, te akaturi, te akamori itoro, te kona kava e te keikeia. Kua tauturu te reira i te aronga e manganui kia akakore i te tangata taito ra e kia kakau i te mea ou ra. (Ephesia 4:20-24) Ae, me ka akangateitei tatou i te reira ki runga ake i tetai ua atu manako anga tangata ra me kare ikuiku anga e ka taangaanga tiratiratu ei i te reira, ka rauka i te Pipiria i te tauturu ia tatou kia mako tikai ei aronga apii i te Tuatua a te Atua.
Te Akatau ra te Vaerua o Iehova ia Tatou
11. Eaa ra te vaerua tapu o Iehova ra i tau ei kia taikuia e ko “te akapumaana”?
11 Te rua, e uriuri manako tatou i te tuanga a te vaerua tapu o Iehova, me kore mana angaanga, i te akariroanga ia tatou kia tau tikai. Auraka e ngaropoina ia tatou e ko te vaerua o Iehova te mana ririnui katoa te vai nei. Kua akamana a Iehova i tana Tamaiti akaperepere kia taangaanga i taua mana ririnui ra no te au Kerititiano mou. E kua taiku a Iesu i te vaerua tapu ra e ko “te Akapumaana.” (Ioane 16:7) Kua raurau aia i tana au pipi kia pati ia Iehova no taua vaerua ra, ma te akapapuanga kia ratou e ka oronga maoraora mai a Iehova i te reira.—Luka 11:10-13; Iakobo 1:17.
12, 13. (a) Eaa ra i puapinga maatai e kia pure tatou no te vaerua tapu kia tauturu mai ia tatou i ta tatou angaanga orometua? (e) Akapeea ta te au Pharisea ra akaari anga e kare te vaerua tapu i angaanga kia ratou ra?
12 Ka anoanoia tatou kia pure no te vaerua tapu i te au ra tataki tai, e maata oki kia tauturu ia tatou i ta tatou angaanga orometua. Eaa te akatupuanga a taua mana rave angaanga ra ki runga ia tatou? Ka rauka i te reira i te angaanga ki runga to tatou manako e te ngakau, i te tauturuanga ia tatou kia taui, kia tupu, e kia taui i te tu tangata taito ma te mea ou. (Kolosa 3:9, 10) Ka tauturu te reira ia tatou kia patu i te au tu akaperepereia te aite ra ki to Karaiti. E manganui o tatou ka rauka kia tuatua ua mai ia Galatia 5:22, 23 mei te ngakau. Te papa maira taua au irava ra i te au ua o te vaerua o te Atua. Te mea mua ko te aroa. Te meitaki ra taua tu ra no ta tatou angaanga orometua. No teaa ra?
13 Ko te aroa te akakeu anga maata. Te aroa no Iehova e no te tangata te akakeu ra i te au Kerititiano mou kia tua i te tuatua meitaki. (Mareko 12:28-31) Me kare taua aroa ra, kare tatou e tau tikai ei aronga apii i te Tuatua a te Atua. E akara i te tuke anga i rotopu ia Iesu e te au Pharisea ra. A Mataio 9:36 te tuatua ra no Iesu: “E kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” Akapeea te manako ngakau o te au Pharisea no te au tangata noa ra? Kua tuatua ratou: “Kareka teianei au tangata tei kore i kite i te ture nei, kua taumaaia ïa.” (Ioane 7:49) Taua au Pharisea ra kare e aroa no te au tangata ra mari ra e maata te akaapa anga. Te taka meitaki ra, kare to Iehova ra vaerua i angaanga i roto ia ratou ra.
14. Akapeea te akatauanga o Iesu ra i te akaarianga i te aroa i tana angaanga orometua i te akakeu anga ia tatou?
14 Kua manako ngakau a Iesu no te au tangata ra. Kua kite aia i to ratou mamae anga. Kua kite aia e kua akakinoia ratou, kua mate i te roiroi, e kua akapueurikiriki keia mei te mamoe tiaki kore ra. Te tuatua maira a Ioane 2:25 kia tatou e “kua kite oki aia i to roto i te tangata.” I te mea koia te Pu Rave Angaanga a Iehova i te tuatau anga mai anga ra, tei ia Iesu tetai kite maata no te tu tangata. (Maseli 8:30, 31) Na taua kite anga ra i akaoonu i tona aroa. Kia riro taua tu aroa ra ei mana akakeuanga i ta tatou angaanga tutuanga! Me ka manako tatou e ka rauka kia meitaki mai tatou i teianei tu, e pure tatou no te vaerua tapu o Iehova e ka akono rotai ei ma ta tatou au pure. Ka pau mai a Iehova ia tatou. Ka tono mai aia i teianei mana meitaki kia tauturu ia tatou kia maata atu te aite kia Karaiti, tei tau meitaki tikai kia tutu aere i te tuatua meitaki.
15. Akapeea te au tuatua ia Isaia 61:1-3 te tau ra kia Iesu e i taua taime rai te akaari atea ra i te au tata tuatua e te au Pharisea ra?
15 Noea mai to Iesu ra tu tau? “Tei rungao iaku te Vaerua o te Atu,” tana i tuatua. (Luka 4:17-21) Ae, na Iehova uaorai i akamana ia Iesu na roto i te vaerua tapu. Kare i umuumuia e Iesu etai atu apinga. Na te vaerua tapu ainei i akamana i te au arataki akonoanga i tona tuatau. Kare. Kare katoa oki ratou i tau kia akatupu ia Isaia 61:1-3, ta Iesu i tatau maata ra e i akono atu kiaia uaorai. E tatau i taua au irava ra ine, e ka akara ei koe uaorai e ko taua aronga tata tuatua ra e te au Pharisea kare i tau. Kare a ratou tuatua meitaki kia akakite ki te aronga putaua ra. E akapeea e raukai ia ratou kia tuatua i te matara anga ki te aronga tuikaa ra e te kite anga nga mata o te aronga matapo ra? I roto i tetai tu pae vaerua, e matapo ratou uaorai e kua tuikaa ki te au ikuikuanga a te au tangata! Kare mei taua au tangata ra, te tau ra ainei tatou kia apii atu i te au tangata nei?
16. Eaa te irinaki anga papu no te au tangata o Iehova kia manako ngakau i teia tuatau no to ratou tu tau ei au orometua?
16 E tika, kare tatou i apiiia i te au ngai apii teitei a Kerititome. Kare a tatou papa anga ei aronga apii mei roto mai i tetai pupu apiipii anga akonoanga. Te ngere ra ainei tatou, i reira, i te au akatau anga? Kare rava ia! To tatou papa anga ei Au Kite no ko mai ia Iehova ra. (Isaia 43:10-12) Me pure tatou no tona vaerua e ka rave angaanga rotai ma ta tatou pure anga, tei ia tatou te au akatau anga teitei rava. E tika, e apa ua tatou e te ngere ra i te akatauanga tei akanooia e te Puapii Maata ra, ko Iesu. Tera ra, kare ainei tatou e akameitaki ana e te taangaanga ra a Iehova i tona vaerua kia akatau e te akapapa ia tatou ei aronga apii i tana Tuatua?
Na ta Iehova Akaaerenga i Akatau ia Tatou
17-19. Akapeea nga uipaanga epetoma e rima tei orongaia maira e te akaaerenga a Iehova i te tauturu anga ia tatou kia tau ei au orometua?
17 I teianei e uriuri manako tatou i te toru o te tumuanga ta Iehova i akapapa ei ia tatou ei aronga apii i tana Tuatua—tana akaaerenga i te enua nei, me kare akaaerenga, te tereni ra ia tatou ei au orometua. Akapeea ra? E akamanako ana i te porokaramu apiianga ta tatou e rekareka nei! I te epetoma, ka aere tatou ki nga uipaanga Kerititiano e rima. (Ebera 10:24, 25) Ka akaputu tatou ki roto i te au pupu rikiriki i te Apii Puka a te Putuputuanga kia rekareka i tetai apiianga oonu i te Pipiria na te apiianga i tetai puka oronga uaia mai no roto i te akaaerenga a Iehova. Na te akarongoanga e te pauanga, ka kite tatou e ka akamaroiroiia tetai e tetai. Ka rauka katoa ia tatou tataki tai te apiianga e te manakoanga mei ko mai i te akaaere apii puka. I te Uipaanga Papuriki e te Apii Punanga Tiaki, ka rauka ia tatou etai atu kai vaerua puapinga.
18 Ta tatou Apii Orometua Teokaratiki kua akapapaia kia oronga mai i te apiianga e akapeea kia apii. Na te teateamamaoanga i te au tuatua a te aronga apii, ka kite tatou e akapeea me taangaanga i te Tuatua a te Atua i te apii anga no runga i tetai atu au tumu tuatua ra. (1 Petero 3:15) Kua orongaia ainei kia koe tetai tuatua no runga i tetai tumu tuatua tei akaraanga matauia ra e koe, e te kite anga koe uaorai e te apii ra koe i tetai tumu ou no te reira? Ko tetai tupuanga matauia te reira. Kare e apinga e akakokoi mai i to tatou kite no tetai tumu tuatua kia maata atu i te apiianga i te reira ki etai ke ra. Noatu rai me kare i orongaia mai na tatou uaorai e rave te tuatua anga, ka rauka ra kia meitaki atu to tatou kite ei aronga apii. I roto i te aronga apii tataki tai, ka kite tatou i te au tu meitaki, e ka rauka ia tatou kia tamanako e akapeea kia aru i taua au tu tau ra.
19 Ko te Uipaanga Tavini Anga katoa oki kua akanoonooia kia akapapa ia tatou ei aronga apii i te Tuatua a te Atua. I te au epetoma ravarai, te rekareka nei tatou i te au tuatua oraora, te au uriurianga manako, e te au akakitekite anga tei akanoonooia no ta tatou angaanga orometua. Eaa te tu orongaanga ta tatou ka taangaanga? Akapeea e raukai ia tatou kia akono i te au akaaoanga taka ke i ta tatou angaanga orometua i te ngai tangata? Eaa te au tu tutu aereanga te tuera maira kia tatou te ka tau tatou kia akara mamao atu? Eaa te ka tauturu ia tatou kia meitaki atu ei aronga apii me rave tatou i te oki akaou anga e te au apiianga Pipiria? (1 Korinetia 9:19-22) Ko taua au uianga ra te akonoia ra e te uriuriia ra i te Uipaanga Tavini Anga. E manganui te au tuanga uipaanga te akatumuia ra ki runga i te au atikara i roto i te Our Kingdom Ministry, ko tetai atu apinga ia tei orongaia maira kia akapapa ia tatou no ta tatou angaanga puapinga maata.
20. Akapeea tatou e puapinga ki katoai mei te au uipaanga e te au akaputuputu anga oki?
20 Na te teateamamaoanga e te aereanga ki ta tatou au uipaanga e te akonoanga i ta tatou i kite ki ta tatou angaanga ei aronga apii, ka rauka ia tatou te terenianga maata atu. Inara e maata atu te tereni anga. E au uipaanga maata atu ta tatou—te au akaputuputu anga e te au uruoaanga—tei akanoonooia ra kia akapapa ia tatou ei aronga apii i te Tuatua a te Atua. E mei teaa ra to tatou akara atuanga kia akarongorongo marie e kia rave i taua akoanga ra!—Luka 8:18.
21. Eaa te akakite anga te akaari ra e te meitaki ra to tatou terenianga, e ka aere te akameitaki anga kiaai?
21 E meitaki ainei te tupuanga o te terenianga ta Iehova ra i oronga mai? E tuku na te au tika e tuatua no ratou uaorai. I te au mataiti tataki tai, e au anere ua atu i te tauatini au tangata te tauturuia ra kia apii i te au apiianga no te Pipiria e kia noo rotai ma ta te Atua e umuumu ra ia ratou. Te tere ra to tatou numero ki mua, inara kare e rauka i tetai o tatou uaorai kia akameitakiia no te reira. Ka tika tatou kia manako tikai i te au tumu, mei ta Iesu i rave ra. Kua tuatua aia: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” Mei te au apotetoro i taito ra, ko te maataanga o tatou e au tangata apii koreia e te kite kore oki. (Ioane 6:44; Angaanga 4:13) To tatou autu anga tei runga ia Iehova, tei akatae maira i te aronga ngakau tiratiratu ki te tuatua mou. Kua akataka meitaki maira Paulo: “Naku oki i tanu, na Apolo i tamauu ki te vai; na te Atua ra i akatupu.”—1 Korinetia 3:6.
22. Eaa tatou ka tau ei kia kore e mareka kore roa i te rave anga ki katoa i te angaanga orometua Kerititiano ra?
22 Ae, te o katoa maira Iehova ki roto i ta tatou angaanga ei aronga apii i tana Tuatua. Penei kare tatou e manako ngakau tamou ana e te tau ra tatou ei aronga apii. Inara kia maara, na Iehova i akatae ra i te au tangata kiaia uaorai e ki tana Tamaiti oki. Na Iehova i akatau ia tatou ei aronga apii ki te aronga ou na roto i tana Tuatua, tona vaerua tapu, e tana akaaerenga i te enua nei. E akarongo tatou ki ta Iehova ra terenianga na te akonoanga i te au mea memeitaki tana e oronga mai nei i teianei kia akariro ia tatou kia tau meitaki ei aronga apii i te Tuatua a te Atua ra!
Akapeea Koe me Pau?
• Akapeea ta te Pipiria akatau anga ia tatou no te angaanga tutu aereanga?
• Eaa te tuanga a te vaerua tapu i rave i te akatauanga ia tatou ei au orometua?
• Na roto i teea au tu ta te akaaerenga a Iehova i te enua nei tauturu anga ia koe kia tau ei tutu aere i te tuatua meitaki ra?
• Eaa ra tatou i tau ei kia papu i te rave anga i te angaanga orometua?
[Tutu i te kapi 25]
Ei tangata apii i te Tuatua a te Atua, kua akaari a Iesu i te aroa no te au tangata ra