Apai mai te Au Apinganui o te Oronga Ua i te Rekareka

EI AKAAERE Kerititiano inangaro, te manako meitaki ra te apotetoro ko Paulo i tei inangaroia e tona au taeake irinaki ra. (2 Korinetia 11:28) No reira, i rotopu i te 50 mataiti o te anere mataiti mua o to tatou Tuatau Noa Nei kua akapapa aia e kia koiia tetai moni na te au Kerititiano te anoanoia ra i Iudea, kua taangaanga aia i taua tuatau no te apii i tetai apii anga puapinga no runga i te oronga ua. Kua tuatua maata a Paulo e ko te oronga rekareka ua te akateitei maataia ra e Iehova: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.”​—2 Korinetia 9:7.

Oonu i te Putaua, Inara te Oronga ua Ra

Kare te maata anga o te au Kerititiano i te anere mataiti mua i rongonui. Kua kite atu a Paulo e i roto ia ratou “kare e rai te tangata pakari.” Ko ratou “te mea parukaua o teianei ao,” “te au mea akaaka o te ao nei.” (1 Korinetia 1:​26-28) Ei akaraanga, te au Kerititiano e noo ra i Makedonia tei roto i te “putaua” e “te mate maata.” Noatu rai, kua pati akaaka te aronga irinaki o Makedonia ra i te akameitaki anga no te tauturuanga i te pae moni no “taua apinga ra i te aronga tapu ra”; e ko ta ratou i oronga mai, te akakite maira a Paulo, kua “oronga i tei tika ia ratou ra, e e maata atu rai”!​—2 Korinetia 8:​1-4.

Noatu rai, kare i akavaia taua oronga ua anga ki runga i te maata tei orongaia. Mari ra, ko te akaneke anga, te puareinga anga i te tua aere, e te tu ngakau ko te mea puapinga maata ia. Kua akakite a Paulo ki te au Kerititiano i Korinetia ra e te o maira te manako e te ngakau i roto i te oronga ua. Kua tuatua aia: “Kua kite oki au i te tika o to kotou ngakau, i akapaatu ei au ia kotou i to Makedonia ra, . . . e manganui tei maroiroi katoa i taua maroiroi no kotou na.” Kua ‘akakoro ratou i roto i to ratou ngakau’ kia oronga maoraora ua.​—2 Korinetia 9:​2, 7.

‘I Tika to Ratou Ngakau’

Penei te manako ra te apotetoro ko Paulo i tetai akaraanga oronga maoraora ua i mua ana, tetai tei tupu i roto i te metepara e tere atu i te 15 anere mataiti i mua ake i tona taime. Koi akarangatira uaia maira te 12 kopu o Iseraela mei te tuikaa i Aiphiti ra. Tei raro ratou i te papa o te Maunga Sinai, e kua akaue atura Iehova ia ratou kia patu i tetai tapenakara ei akamori anga e kua akapapa i te reira ma te au apinga akamori anga. Ka pou te au apinga no teia, e kua patiia to te pa enua kia oronga ua.

Akapeea to Iseraela i te ariu atu anga? “Kua aere maira ratou, te tangata katoa i tae tona ngakau, te aronga katoa i tika to ratou ngakau, kua apai maira ratou i te atinga na Iehova, no te angaanga i te Are uipaanga ra.” (Exodo 35:21) Kua oronga ainei te iti tangata i te atinga? Ae tikai! Kua oronga ia tetai ripoti kia Mose: “E apinga maata rava atura ta te au tangata i apai mai nei, no te angaanga ta Iehova i akaue maira e rave, e toe ïa.”​—Exodo 36:5.

Eaa oki te turanga i te pae moni o te au Iseraela i te reira taime? Kare i roa i mua atu, kua riro ratou ei aronga tuikaa taitaia, ‘akateiaaia i te apainga,’ te taki anga ki tetai ‘potopoto rava te aʼo,’ e oraanga “mate.” (Exodo 1:​11, 14; 3:7; 5:​10-18) Kare i tau i reira e kua maata ta ratou apinganui. E tika, kua akaruke to Iseraela i te enua tuikaa ma te au anana e te au manu. (Exodo 12:32) Penei kare i maata te reira, i te mea e kare i roa i muri ake i te akaruke anga ia Aiphiti, kua koumuumu ratou e kare a ratou kiko kare katoa e varaoa e kai.​—Exodo 16:3.

Noea, i reira, te ngai i raukai i to Iseraela te au mea apinganui ta ratou i oronga atura no te patuanga i te tapenakara? Mei to ratou au pu i mua ana, te au Aiphiti. Te na ko ra te Pipiria e: “Kua akono oki te tamariki a Iseraela . . . I pati ana oki ratou i to Aiphiti i te apinga ario, e te apinga auro ra, e te kakau. . . . I oronga mai ei ratou [to Aiphiti ra] i ta ratou i pati ra.” Kua riro teia rave anga oronga ua i te tua o Aiphiti ei akameitakianga no ko mai ia Iehova, kare e no ko mai ia Pharao. Te akakite ra te rekoti tu-Atua e: “E i aroaia mai oki taua au tangata ra e to Aiphiti ia Iehova ra, i oronga mai ei ratou i ta ratou i pati ra.”​—Exodo 12:​35, 36.

Ka akamanako e eaa to te au Iseraela manako. Kua mamae te au uki na roto i te tuikaa kino e te akangere anga. Teianei kua akarangatira ia ratou e kua rauka te au apinganui materia. Eaa to ratou manako no te oronga anga i etai o taua au apinganui i rauka ra? Penei ka manako ratou e kua rauka ia ratou te reira e kua tika i te akono atu i te reira. Inara, i te umuumu angaia e kia oronga ua i te pae moni kia turu i te akamori anga ma, kua pera ratou​—kare i emiemi ana me kore riririri ua! Kare ratou i ngaropoina ana e na Iehova i akariro e kia rauka te au apinga materia ia ratou. No reira, kua oronga ua ratou i ta ratou ario e te auro e te au manu. E au tangata “ngakau oronga” ua to ratou. Kua ‘tae to ratou ngakau.’ Kua “tika to ratou ngakau.” E tikai e ‘apinga ngakau tae i apai mai na Iehova.’​—Exodo 25:​1-9; 35:​4-9, 20-29; 36:​3-7.

Te Papa ua ra no te Oronga Ua

Te maata o te oronga anga kare ia e te mono ra i te tu oronga ua o tei oronga ra. Okotai taime kua kite atu a Iesu i te au tangata e tuku ra i te moni i roto i te au pia moni o te iero. Kua tuku te aronga apinganui e maata te au moni, inara kua akakeuia a Iesu i te kite anga aia i tetai vaine takaua i te tuku anga e rua moni e iti ua te puapinga. Kua tuatua aia: “E maata ta te vaine takaua apinga kore nei i tuku ki roto, i ta ratou ravarai: . . kua ope rava tona apinga rikiriki i te tukuia e ia ki roto.”​—Luka 21:​1-4; Mareko 12:​41-44.

Te rotai ra ta Paulo tuatua ki to Korinetia ma teia manako o Iesu. No runga i te oronga anga ei tauturu i te au taeake irinaki te anoano ra, kua akakite a Paulo: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.” (2 Korinetia 8:12) Ae, kare te oronga anga i te tumu taemoemo anga me kore akaaiteite. Te oronga ra tetai tangata kia tau ki tei rauka iaia, e te mareka ra a Iehova i te tu oronga ua.

Noatu e kare e rauka i tetai i te akaapinganui ia Iehova, tei iaia te au mea, e akameitaki anga te oronga anga te tuku ra i tetai tuatau no te aronga akamori kia akatutu i to ratou inangaro iaia. (1 Paraleipomeno 29:​14-17) Te au tauturu oronga uaia, kare ei akaariari me kore no te au akakoroanga noinoi-uaorai, mari ra ma tetai tu tau e te akamaata atu i te akamori anga mou, te apai maira i te rekareka e ma te reira i ta te Atua akameitaki anga. (Mataio 6:​1-4) Kua tuatua a Iesu: “E mea meitaki i te oronga atu i te rave mai.” (Angaanga 20:35) Ka rauka ia tatou i te rekareka i taua tu mataora na te tukuanga i to tatou maroiroi ki roto i te angaanga a Iehova e na te akapae ke anga mei ta tatou au apinga materia no te turuanga i te akamori anga mou e te tauturu anga i te aronga tei anoano maira.​—1 Korinetia 16:​1, 2.

Papa Tikai no te Oronga ua i Teia Tuatau

I teia tuatau, te rekareka nei te Au Kite o Iehova i te akara atu i te tere anga o te tutuanga i “te evangelia o te basileia nei” i te ao katoa. (Mataio 24:14) I te ngauru mataiti o te 20 anere mataiti i topa, e tere atu i te 3,000,000 tangata tei papetitoia kia akatutu i to ratou akatapu anga ki te Atua ko Iehova, e kua akanooia etai 30,000 putuputuanga ou. Ae, e tai toru o te au putuputuanga o te Au Kite o Iehova te vai nei i teia tuatau kua akanooia i roto ua i te ngauru mataiti i topa! Te maata anga o te akamaata anga e tupu anga ia o te angaanga maroiroi a te au tane e te vaine Kerititiano ngakau tae tei akapou i to ratou taime e te maroiroi e raukai i te atoro i to ratou au tangata tupu e kia akakite kia ratou i to Iehova au akakoroanga. Etai o te akamaata anga koia oki ko te tupu anga o te angaanga a te au mitinari, tei akaruke i to ratou au kainga e kua teretere ki te au enua ke kia tauturu i te angaanga tutuanga i te Patireia. Kua tupu mai te akamaata anga i roto i te akapapaanga i te au kotinga ou, tei umuumu i te akataoonga anga i te au akaaere kotinga ou. Kapiti mai, kua anoanoia e kia maata te Pipiria kia taangaangaia i roto i te angaanga tutuanga e te apii anga uaorai. Kua anoano maataia te puka neneiia. I roto i tetai enua e tetai atu, kua akamaataia te au are manga me kore kua monoia ma te au ngai maata atu. Pouroa teia au anoano anga kua tupu mai na roto i te tauturu o te au moni oronga uaia mei to Iehova iti tangata.

Anoanoia te Au Are Uipaanga Patireia

Tetai anoano anga meitaki tei kiteia mai no te maata i te numero o te Au Kite o Iehova koia oki ko te au Are Uipaanga Patireia. Te akaari maira te au tare anga tei raveia i te akamata anga o te mataiti 2000 i te anoano anga e kia maata atu i te 11,000 Are Uipaanga Patireia i te au enua kare e meitaki ana te tupu anga, te ngai te kotingaia ra i te pae moni. Ka akamanako ana ia Angola. Noatu te au tamaki a te tangata e maata te mataiti, te kite ra taua enua i tetai avereti akamaata anga vaitata i te 10 patene te numero o te au papuritia Patireia. Inara, te putuputu ra te maata anga o te au putuputuanga e 675 i teia enua maata i Aperika i te ngai atea. Te vaira e 22 anake Are Uipaanga Patireia i te enua, e no teia e 12 ua e tauu are to etai.

Te vaira tetai turanga mei te reira rai i te Democratic Republic of Congo. Noatu e te vaira vaitata ki te 300 putuputuanga i te oire maata o Kinshasa, te vaira e tai ngauru Are Uipaanga Patireia. Takapini i te enua, te umuumu ra teia enua e tere atu i te 1,500 Are Uipaanga Patireia. No te tupu anga viviki i te au enua Europa Itinga, te ripoti maira a Rutia e Ukraine ma te taokotai e te umuumuia ra e au anere ua atu au Are Uipaanga Patireia. Te tupu viviki anga i Marike Ratino te maata ra i Brazil, i reira e maata atu i te apa mirioni Au Kite te anoano maata ra i te au Are Uipaanga Patireia.

Kia akono i te au anoano anga i roto i taua enua, te akatupu nei te Au Kite o Iehova i tetai porokaramu tere viviki no te patuanga i te au Are Uipaanga Patireia. Te tutakiia ra te porokaramu e te au moni tauturu oronga uaia e te au taeake i te ao katoa, e raukai i te au putuputuanga putaua tetai ngai akamori anga.

Mei te tuatau rai o Iseraela taito, e maata te ka akatupuia no te mea te ‘akangateitei ra te au Kerititiano ngakau tae ia Iehova i ta ratou ra au apinga.’ (Maseli 3:​9, 10) Te inangaro nei te Pupu Akaaere o te Au Kite o Iehova i te akanoo i teia atianga kia akameitaki oonu atu i te katoatoa tei akakeuia to ratou ngakau kia kapiti i roto i te oronga ua anga. E te papu nei matou e ka akakeu to Iehova vaerua i te au ngakau o tona iti tangata kia turu i te au anoano o te angaanga Patireia e totoa ra.

I te au akamaata anga i te ao katoa e tupu ra, kia akara ua atu tatou i te au tuatau no te akaari i to tatou tu rekareka e te puareinga i te tuku anga i to tatou maroiroi, to tatou taime, e ta tatou au apinga. E kia kite tatou i te rekareka mou te apai maira taua tu oronga ua.

[Pia i te kapi 29]

“E TAANGAANGA MEITAKI I TE REIRA!”

“E tai ngauru oku mataiti. Te tuku atu nei au i teia moni na kotou e raukai ia kotou i te oko mai i tetai pepa me kore tetai atu apinga kia maani i te au puka.”​—Cindy.

“Te inangaro nei au i te tuku atu i teia moni na kotou kia maata te au puka na tatou. Kua akaputu au i teia moni mei te tauturu anga i toku papa. No reira e taangaanga meitaki i te reira!”​—Pam, e itu mataiti.

“Kua mii tikai au no te uriia. Te manakonako nei au e te meitaki maira kotou. Teia ua taku moni e [$2, U.S.] i roto i taku pangika.”​—Allison, e a mataiti.

“Ko Rudy toku ingoa, e 11 oku mataiti. Toku tungane ko Ralph e ono aia. E toku teina ko Judith e rua e te apa. E akaputu ana matou mei ta matou moni oronga uaia mai no etai toru marama kia tauturu i to tatou au taeake i te [ngai tamaki]. Kua rauka ia matou i te akaputu e 20 tara ta matou e tuku atu nei i teianei.”

“Te tangi nei au i te au taeake [tei takinoia e te uriia]. Kua rauka mai iaku e 17 tara no te angaanga ma toku papa. Kare au i tuku atu i teia moni no tetai atu akakoroanga, no reira ka tuku au na kotou e iki.”​—Maclean, e varu mataiti.