Taokotaianga Taeake

KUA rave a Iehova i te ngati Iseraela ei iti tangata nona no tetai 1,500 tuma mataiti. I muri mai, ‘kua akara aroa mai te Atua i te etene i muatangana, e rave i tetai papaki tangata no tona ingoa.’ (Anga. 15:14) Te iti tangata tei kapikiia i te ingoa o Iehova, ko ratou Tona au kite tei taokotaiia i te manako e te akakoroanga okotai, noatu teiea te ngai e noo ra ratou i te enua nei. Kua akaue a Iesu i tana au pipi e: ‘Aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.’ Tei tupu, kua taokotaiia mai tetai iti tangata no to Iehova ingoa.—Mata. 28:19, 20.

² Me akatapu koe i toou oraanga kia Iehova e kia papetitoia, kua riro mai koe ei pipi na Iesu. E tuanga koe no tetai taokotaianga taeake Kerititiano i te ao katoa tei kore i akariro i te au turanga tuke ke mei te reo, te peu enua, iti tangata, me kore i te pae moni, kia akatupu i te ke i rotopu ia ratou. (Sala. 133:1) Kua akatupu te reira i toou inangaro e te akangateitei no toou au taeake Kerititiano i roto i te putuputuanga. Penei e iti tangata ke tetai papaki, e enua ke, turanga apii ke e penei kare koe i āriki ana ia ratou i mua ana. Inara i teia rā, kua topiriia kotou e te aroa taeake tei ririnui roa atu i tetai ua atu tu pirianga, i rotopu i te tangata, te akonoanga, me kore i roto i te ngutuare tangata.—Mare. 10:29, 30; Kolo. 3:14; 1 Pete. 1:22.

AKATANO I TE AERENGA MANAKO

³ Me e ngatā i tetai aronga i te kopae i te tu akavaavaa i te tangata, te turanga poritiki, te pirianga tangata, e te vai atura, penei e mea tau kia akamanako ratou i te au Kerititiano ngati Iuda o mua ana, tei akaruke i to ratou tu akavaavaa i te tangata o te pa enua no te mea e akonoanga ke ta ratou. Te tonoia anga a Petero ki te ngutuare o Korenelio te rangatira vaeau no Roma, kua akateateamamao a Iehova ia Petero no tana angaanga.—Angaanga, pene 10.

⁴ I roto i te orama, kua akakiteia kia Petero kia tā e kia kai i tetai au manu kare i tau i raro i te ture kia orongaia e te ngati Iuda ei atinga. Te patoi anga a Petero, kua tuatua maira te reo mei te rangi e: “Ko ta te Atua i tamā ra, auraka koe e tuatua e, e mea noa ïa.” (Anga. 10:15) Kua riro teia tuatua no te rangi mai ei akateateamamao ia Petero no tana apainga kia aere ki tetai tangata o te pa enua. I te āriki anga i ta Iehova akauenga, kua karanga atura Petero ki te aronga i reira e: “Kua kite oki kotou e, kare e tau i te tangata ngati Iuda kia kapiti atu, e kare oki e tomo i te are o te tangata o te enua ke ra; kua akakite maira te Atua kiaku e, auraka au e tuatua i te tangata e, e mea noa e te viivii oki. I aere mai ei au i te tiki angaia akenei, kare au i toekutu.” (Anga. 10:28, 29) I muri mai kua kite tikai a Petero i te akairo o to Iehova aroa takinga meitaki ia Korenelio e tona kopu tangata.

⁵ Ko Saula o Tareso tetai no te apii teitei aia a te au Pharisea, kua taakaaka aia iaia e kua piri ki te au tangata tei akavaavaa ana aia i mua ana. Kua aru katoa aia i ta ratou akaaere anga. (Anga. 4:13; Gala. 1:13-20; Phili. 3:4-11) Me akamanako ua tatou i te au tauianga tei anoanoia i roto i te aerenga manako o tetai au tangata mei a Serio Paulo, Dionusio, Damari, Philemona, Onesimo e etai atu, i to ratou āriki anga i te tuatua meitaki e kua riro maira ei au pipi na Iesu Mesia.—Anga. 13:6-12; 17:22, 33, 34; Phile. 8-20.

AKONO I TE TURANGA ROTAI I TE PA ENUA

⁶ Kare e ekoko kua riro te aroa i roto i te putuputuanga ei tauturu ia koe kia akapiri vaitata atu kia Iehova e tona akaaerenga. Kua kite tikai koe te aroa o te au pipi mou a Iesu mei tana i akakite e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:34, 35) Maata roa atu toou inangaro ia Iehova e tona akaaerenga, i toou kite anga e ko te aroa taau e kite ra i roto i te putuputuanga, te akaata maira te reira i te aroa e vai nei i rotopu i te au taeake i te ao katoa. Te kite nei koe i te akatupuanga o te totou a te Pipiria no runga i te tavaitai mai anga i to te pa enua i te au tuatau openga, kia akamori ia Iehova ma te au e te rotai.—Mika 4:1-5.

⁷ No runga i te au mea e akatupu nei i te ke i teia tuatau, koai ra oki ïa tei manako ana e ka rauka i te tavaitai mai i te au tu tangata “no te pa enua ravarai, e te au kopu ravarai, e te au iti-tangata ravarai, e te au reo katoa”? (Apo. 7:9) Akamanako ua ana i te aka tuke i rotopu i tetai pupu tangata kite karape no runga i te au apinga ou e maaniia nei, e te aronga e mou nei rai ki ta ratou peu tupuna. Te tu kaitamaki e ō maira te akonoanga atua a taua iti tangata rai e taua enua rai. Te riro nei te peu akaepaepa enua ei akamaata roa atu i te ke i rotopu i te tangata i te pae poritiki. Me akamanako ua koe i te aka tuke i roto i te turanga o te pae moni, pera te au mea e akatupu ra i te ke, ko te Atua Mana Katoatoa anake rai te ka rauka i te tavaitai mai i to te pa enua ravarai, te au reo ravarai, e te au pupu tuke tuke, te turanga o te oraanga, ki te ruru o te aroa e kia noo au ua tetai e tetai.—Zeka. 4:6.

⁸ Inara te tupu nei taua tu rotai ra. I te akatapuanga koe i toou oraanga kia Iehova e kua papetitoia ei Kite Nona, kua rauka ia koe teia turanga. Tera ra e apainga taau i te akapapu e kia vai ua rai te reira. Ka rave koe i teia na roto i te akono anga i te ako a te apotetoro ko Paulo i roto ia Galatia 6:10 e akakite ra e: “Kia rauka ta tatou ravenga, e takinga-meitaki tatou i te tangata ravarai, kia maata atura ki to te ngutuare o te akarongo ra.” Ka aru katoa tatou i teia ako e na ko ra e: “Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai. Auraka te tangata e akono i tona anake uaorai au mea, e akono katoa ra i to etai ke ra au mea.” (Phili. 2:3, 4) Me tereni ia tatou kia aru i to Iehova aerenga manako i te akaperepere i to tatou au taeake e te au tuaine, ka vai ua rai te pirianga au e te mataora i rotopu ia tatou tetai e tetai.—Ephe. 4:23, 24.

AKONO I TETAI E TETAI

⁹ Mei ta Paulo i akatutu mai, kare e tu pae ke i roto i te putuputuanga mari ra te akaperepere nei te au taeake ia ratou uaorai. (1 Kori. 12:14-26) Noatu te mamao i te au ngai e noo nei te au taeake mei tetai e tetai, kare ra mei te mea e kare tatou e manako atu ana ia ratou. Me takinga kinoia to tatou au taeake, ka mamae to tatou ngakau. Me rokoia ratou e te ngere no te tumatetenga me kore no te tamaki, te kaitamaki i rotopu i te au iti tangata, e aruaru ana to ratou au taeake i te kimi ravenga kia akamatutu i to ratou akarongo e te tauturu i te au apinga pae kopapa.—2 Kori. 1:8-11.

¹⁰ E mea tau kia pure tatou pouroa no to tatou au taeake i te au rā ravarai. Tetai papaki te rokoia nei e te timataanga kia rave i te kino. Ko etai te na roto nei i te au turanga ngatā tei kite ua te katoatoa. Tetai pae te rokoia ra e te patoianga mei to ratou au oa angaanga e to ratou ngutuare tangata e kare roa tatou e kite ana. (Mata. 10:35, 36; 1 Tesa. 2:14) Te taitaia nei tatou no te mea e taokotaianga taeake tatou i te ao katoa. (1 Pete. 5:9) Tetai au taeake o tatou, te tauta pakari nei i te rave i te angaanga tutu evangeria e i roto katoa i te au putuputuanga. Pera katoa to tatou au taeake e akaaere nei i te angaanga i teia ao katoa, ka anoanoia kia pure tatou no ratou i te akaari i to tatou aroa e to tatou inangaro ia ratou noatu kare atu e ravenga ke i te tauturu ia ratou.—Ephe. 1:16; 1 Tesa. 1:2, 3; 5:25.

¹¹ I teia au tuatau openga, no te maata ua atu o te manamanata i te enua nei, ka anoanoia to Iehova iti tangata kia papa ua i te tauturu i tetai e tetai. Tetai au taime ka anoanoia te rave i tetai au akanoonooanga ei tauturu i te au taeake i te pa enua tei na roto i te tumatetenga natura, mei te ngaruerue enua e te vai puke e pera katoa i te akaputu i te au apinga mei te kai, te kakau, te vairakau e te vai atura. Akaraanga meitaki tikai ta te au Kerititiano o te anere mataiti i akanoo no runga i teia. Maara ia ratou ta Iesu apiianga, rekareka tikai te au pipi i Anetioka i te tuku atu i te au apinga aroa na te au taeake i Iudea. (Anga. 11:27-30; 20:35) Muri mai kua akamaroiroi te apotetoro ko Paulo i to Korinetia kia tauturu i te au mea tei anoanoia, kia raveia na roto i te tu mako. (2 Kori. 9:1-15) I teia tuatau, me rokoia to tatou taeake e te au turanga ngatā e ka anoanoia te tauturu, e ariu viviki atu ana te akaaerenga e te au taeake Kerititiano i te tuku i te au mea tei anoanoia ei tauturu.

AKATAPUIA EI RAVE I TO IEHOVA ANOANO

¹² Akaaereia to tatou taokotaianga taeake i te ao katoa nei kia rave i to Iehova anoano. Tona anoano i teia tuatau, kia tutu aereia te tuatua meitaki o te Patireia i te enua ravarai ei kite no te pa enua katoa. (Mata. 24:14) To Iehova anoano, kia akamako tatou ia tatou uaorai kia tau ki tona turanga ngateitei ia tatou e rave nei i teia angaanga. (1 Pete. 1:14-16) Kia kauraro tatou ki tetai e tetai ma te ngakau tae i te akatotoa anga i te tuatua meitaki. (Ephe. 5:21) Ko teia te taime kia tuku i to Iehova Patireia na mua i roto i to tatou oraanga, eiaa kia kimi i to tatou uaorai meitaki. (Mata. 6:33) E akamaara tatou i teia, ia tatou e angaanga kapiti nei i te akatotoa i te tuatua meitaki, ka rauka ia tatou te mataora e te merengo maata i teianei e te au akameitakianga mutu kore a te tuatau ki mua.

¹³ E iti tangata umere tikai te Au Kite o Iehova, e iti tangata akatapuia e te mā e te maroiroi i te tavini i to tatou Atua. (Tito 2:14) Ta tatou akamorianga ia Iehova na te reira i akatuke takiri ia tatou mei to teia ao. Te angaanga kapiti nei tatou e to tatou au taeake i te ao katoa nei ma te manako okotai, te ngakau okotai, e te reo okotai o te tuatua mou, e te akarotai i to tatou oraanga ki te tuatua mou ta tatou e akakite aere nei. Kua totou a Iehova i teia i tona akakite anga ki te peroveta ko Zephania e: “Ei reira oki au e tuku atu ei i te vaa viivii kore ki te au tangata nei, kia tautopa katoatoa ratou i te ingoa o Iehova; kia tavini atu ratou iaia ma te manako okotai.”—Zepha. 3:9.

¹⁴ Kua akauru iora te vaerua o Iehova ia Zephania kia akataka mai i to tatou taokotaianga taeake i te ao katoa i teia tuatau, i te na ko anga e: “Kare te toenga o Iseraela e rave i te kino; kare oki ratou e tuatua i te tuatua pikikaa; kare oki e arero pikikaa e kitea i roto i to ratou vaa; ka kaikai oki ratou, e ka akāvai ki raro, e kare ua tetai e akamataku mai.” (Zepha. 3:13) Kua rauka ia tatou te mārama o te tuatua mou o ta Iehova Tuatua, e kua iki kia akarotai i to tatou oraanga ki to Iehova turanga tuatua tika, e kua rauka ia tatou i te angaanga kapiti ma te rotai. Kua rauka ia tatou i te akatupu i tei kore i manakoia ana e ka rauka i roto i te mata o te aronga tei aru i te aerenga manako o te tangata. Ae, e mea takake rava tatou, to Iehova iti tangata, i te akakakā Iaia ki to te pa enua ravarai.—Mika 2:12.