Te Kino ua Atura Toku Oraanga

TOKU ORAANGA:

Kua mamaata mai au i Los Angeles, California, i Marike, i roto i te au oire tei kiteaia no to ratou au pupu tā tangata e te apinga akakona. E ono tamariki a toku nga metua e ko au te rua.

Kua utuutu toku mama ia matou ei au mema no tetai akonoanga evangeria. Inara i toku mapu anga, e rua oku tu oraanga. I te Tapati, e imene ana au i roto i te pupu imene o te akonoanga. I te toenga o te epetoma, kua tamataora ua au, kua kai i te apinga akakona, e kua rave i te angaanga ainga tau kore.

Kua viviki ua au i te riri. E taangaanga ana au i tetai ua atu ravenga kia autu. Kare te au mea i apii ana au i roto i te akonoanga i tauturu mai ana iaku. E karanga ana au e, “na te Atu e akaoko​—e ko au tana i tono mai!” Iaku i te apii tuarua vaitata ki te openga o te au mataiti 1960, kua akakeuia au e te Black Panthers, e pupu poritiki tei kiteaia no ta ratou au ravenga tamaki anga me akatikatika i te au manamanata. Kua piri atu au ki tetai pupu poritiki no te apii tuarua. E maata te au taime e rave ana matou i te au patoi anga e i te au taime ravarai e topiriia ana te apii.

I te akaraanga kare te angaanga patoi anga i akaiti mai i toku tu riri. No reira kua piri atu au ki te angaanga takinokino tangata. Ei akaraanga, i tetai au atianga kua akara matou ko toku au oa i te au teata no runga i te au tuikaa Aperika tei takinokinoia i Marike i mua ana. Kua riri matou no te kino tei tupu, no reira kua tā matou i te au mapu papaa i roto i te are teata. E oti, kua aere matou ki te au oire e noo ana te au papaa, i te kimi i tetai aronga kia tā atu.

I te tuatau i mapu mai ei au, kua rave au e toku tuakana e toku nga teina i te au angaanga kino. Kua kimi te au akava ia matou. E mema toku teina no tetai pupu tā tangata rongonui, e kua aru au ia ratou. Te kino ua atura toku oraanga.

KUA TAUI TE PIPIRIA I TOKU ORAANGA:

Ko toku oa e nga Kite tona nga metua no Iehova, kua pati mai raua iaku kia aere ki ta ratou au uipaanga a te putuputuanga, e kua āriki au i te reira. Mei te akamata anga, kua kite au e e tuke te tu o te Au Kite. E Pipiria ta te katoatoa e kua taangaanga i te reira i ko i te uipaanga. Kua rave katoa te au tamariki i te ako anga i ko i te uipaanga! Kua umere au i te kite e e ingoa to te Atua ko Iehova, e te taangaangaia ra te reira. (Salamo 83:18) E tukeke te au tangata i roto i te putuputuanga, inara te taka ua ra e kare ratou e iriiri ana i te tu o te tangata.

I te akamata anga, kare au i inangaro i te apii i te Pipiria ma te Au Kite, inara e reka ana au i te aere ki ta ratou uipaanga. Tetai po, iaku i ko i te uipaanga a te Au Kite, kua aere toku au oa i te akara i tetai pupu imene. Ia ratou i reira, kua taia e ratou tetai mapu kia mate no te mea kare aia i oake ana i tona pereue manea. I tera mai rā, kua akatietie ratou no te tamate i teia mapu. I ko i te akavaanga, kare ratou i manako e e mea kino ta ratou i rave. Te maata anga ia ratou kua tiria ki roto i te are auri no tetai tuatau roa. Mea mataora ra, kare au i aru ana ia ratou i taua po ra. Kua iki au i te taui i toku oraanga e kua akamata i te apii i te Pipiria.

No te mea e maata te tu papakitai taku i kite i roto i toku oraanga, kua kite au i te au tupu anga i rotopu i te Au Kite tei riro ei mea umere tikai kiaku. Ei akaraanga, te aere anga tetai Kite papaa ki tetai enua, kua akaruke aia i tana tamariki na tetai ngutuare tangata kerekere e akono. E kua āriki katoa tetai ngutuare tangata papaa kia noo mai tetai mapu kerekere i ko ia ratou. Kua papu iaku e te rave ra te Au Kite o Iehova i te tuatua a Iesu ia Ioane 13:35: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” Kua kite mai au e e taokotai anga taeake mou teia.

I toku apiianga i te Pipiria, kua kite mai au e ka anoanoia kia taui i toku aerenga manako. Kua anoanoia au kia akamanako, kia rauka iaku i te akatupu i te au e kia kite mai e ko teia te oraanga meitaki roa atu. (Roma 12:2) Aere ua rai, kua meitaki atu toku tu. Ia Tianuare 1974, kua papetitoia au ei Kite no Iehova.

Inara noatu e kua papetitoia au, kua anoanoia rai au kia akatere i toku riri. Ei akaraanga, i tetai atianga iaku e aere ra mei tera are ki tera are i roto i te angaanga orometua, kua arumaki au i tetai tangata keikeia tei keia i te ratio i roto i toku motoka. Te vaitata anga au kiaia, kua titiri aia i te ratio e kua oro. Te akakite anga au ki te au taeake e i akapeea i rauka akaou mai ei taku ratio, kua ui mai tetai tangata pakari i roto i taua pupu ra e, “E Stephen, naringa i mou ia koe tera tangata, eaa taau ka rave kiaia?” Kua tauturu teia uianga iaku kia akamanako e kua akakeuia au kia angaanga pakari i te akatupu i te au.

Ia Okotopa 1974, kua akamata au i te angaanga tavini tamou, te akapou anga e 100 ora i te marama i te apii i te Pipiria ki te tangata. I muri mai, kua orongaia te tika anga ngateitei noku kia tauturu i ko i te opati maata o te Au Kite o Iehova i Brooklyn, New York. I te 1978, kua oki au ki Los Angeles i te akono i toku mama maki. E rua mataiti i muri mai, kua akaipoipo au i taku vaine akaperepere ko Aarhonda. Kua turuturu maata aia iaku ia maua e akono ra i toku mama e tae ua atu ki tona mateanga. I muri mai, kua aere maua ko Aarhonda ki te Apii Pipiria Punanga Tiaki o Gileada e kua tonoia maua ki Panama, te ngai e tavini nei maua ei mitinari.

Mei toku papetitoia anga, kua aro atu au i te au turanga te ka rauka i te akakeu iaku kia rave i te kino. Kua kite mai au e e mea meitaki i te akaruke i te aronga e tauta ra i te akakoko mai iaku me kore ka tauta au i te akamaru mai i te turanga na roto i te au mataara ke. E maata te aronga, kapiti mai taku vaine tei akameitaki mai iaku no te tu i akono ei au i teia au turanga. Kua poitirere katoa au iaku uaorai! Kare au e tau kia akameitakiia no teia au taui anga i roto i toku oraanga. Mari ra, te irinaki nei au e te akaari maira te reira i te mana o te Pipiria kia taui i toku oraanga.​—Ebera 4:12.

KUA PUAPINGAIA AU:

Kua oronga mai te Pipiria i te akakoroanga i roto i toku oraanga e kua apii iaku kia akatupu i te au. Kare au e tā akaou i te tangata; mari ra ka tauturu au ia ratou kia meitaki mai i te pae vaerua. Kua apii katoa au i te Pipiria ki tetai enemi taito mei te apii tuarua mai! Muri ake i tona papetitoanga, kua noo maua ki roto i tetai are no tetai tuatau poto. I teianei, e nga oa piri mou tikai maua. Tae mai ki teia rā, kua tauturu maua ko taku vaine e 80 tuma tangata kia riro mai ei Au Kite no Iehova na te apii anga i te Pipiria kia ratou.

Te āriki rekareka nei au ia Iehova no te oronga anga mai i te oraanga puapinga e te mataora i rotopu i te taokotai anga taeake mou tikai.