Angaanga Puapinga ta te au Tavini Tauturu e Rave Nei

KUA tata te apotetoro ko Paulo ki te putuputuanga o Philipi e: ‘Ko Paulo e Timoteo, e puke tavini no Iesu Mesia, i te aronga tapu ravarai i roto i te Mesia ia Iesu, e nga episekopo e te au diakono, i Philipi.’ (Phili. 1:1) Akara ana ra, kua taiku mai aia i te au tiakono. Te taka ua ra e e tuanga puapinga ta teia au tangata i te tauturu i te aronga pakari i roto i te putuputuanga i taua tuatau ra. Mei tera katoa i to tatou nei tuatau. E angaanga puapinga ta te au Tavini Tauturu e rave nei i te tauturu i te au akaaere i te tiaki i te putuputuanga na roto i te tu tau.

² Kua kite ainei koe e koai ma te au tavini tauturu i roto i toou putuputuanga? Kua kite ainei koe eaa ta ratou angaanga e rave ra te ka riro ei puapinga noou e te putuputuanga? Papu roa e te mareka maira a Iehova i ta ratou tautaanga. Kua tata a Paulo e: “Ko te aronga oki i rave meitaki ana i te taoonga diakono ra, e ngai meitaki tei rauka ia ratou, e te maroiroi maata i te akarongo i te Mesia ra ia Iesu.”—1 Timo. 3:13.

AU UMUUMUANGA NO TE AU TAVINI TAUTURU

³ Te tapapaia ra te au tavini tauturu kia mako to ratou oraanga, ei au tangata irinakiia e te akono meitaki i ta ratou apainga. Ka taka meitaki ua teia me akamanako tatou i ta Paulo i akakite no runga i to ratou au tu i roto i tana reta kia Timoteo i te na ko anga e: “Koia katoa oki te au diakono, kia mamaru katoa ïa, eiaa ei vaa rua, eiaa ei inu ua i te wina, eiaa ei morimori apinga; Ei tangata tāpu marie i te tuatua ngaro i akarongoia nei ma te akava-ngakau viivii kore. Kia na mua rai oki i te timata marie ia ratou, e kare e tapepeanga, ka rave ei ratou i te taoonga diakono ra. Ei tangata vaine okotai anake te au diakono, i te arataki meitaki anga oki i ta ratou tamariki e to ratou uaorai ngutuare.” (1 Timo. 3:8-10, 12) Me aruia te turanga teitei tei akanooia no te au tavini tauturu, ka paruruia te putuputuanga kia kore e akaapaia te au tangata tei ikiia no teia au apainga.

⁴ Noatu e mapu me e pakarikari, e piri maroiroi ana te au tavini tauturu ki roto i te angaanga orometua i te au rā ravarai. Te akaari ra ratou i te tu maroiroi no te angaanga orometua na te aru anga i to Iesu akaraanga. Te akaata maira to ratou tu maroiroi i to Iehova inangaro kia ora te tangata.—Isa. 9:7.

⁵ Akaari katoa te au tavini tauturu i te akaraanga tau i roto i te tu o to ratou kakau, akamanea, ta ratou tuatua, to ratou tu e ta ratou peu. E akangateitei ana te tangata ia ratou no to ratou tu akono meitaki. E mea puapinga tikai to ratou pirianga kia Iehova e ta ratou au tuanga angaanga i roto i te putuputuanga.—Tito 2:2, 6-8.

⁶ Ka ‘timataia’ teia au tangata me ka tau ratou kia tavini. I mua ake ka akamanaia ai, kua akaari mai ratou e e au tangata mataku Atua ratou. Kua akaari katoa ratou e ko te au anoano o te Patireia te mea puapinga roa atu i roto i to ratou oraanga, e kua papa ua i te rave i tetai ua atu angaanga ka orongaia mai kia rave ratou. E akaraanga tau tikai ratou no te au taeake i roto i te putuputuanga.—1 Timo. 3:10.

TA RATOU E RAVE ANA

⁷ Tuke tuke te angaanga e rave ana te au tavini tauturu no to ratou au taeake e te au tuaine, kia va mai te au akaaere i te akono i te au apainga no te apii e te tiaki i te putuputuanga. Me tukuia tetai au angaanga na ratou, ka akamanako te aronga pakari i te ka rauka ia ratou tataki tai i te rave, e te ka anoanoia no te putuputuanga.

⁸ Ka akamanako ana i teia au tuanga angaanga: Penei e tai tavini tauturu ka tukuia kia akono i te au puka, kia taangaanga tatou i roto i te angaanga orometua e na tatou uaorai. Ka tukuia tetai pae kia akono i te au akanoonooanga no te moni me kore no te au rekoti. Ka tukuia etai kia akono i te au pu, kia akono i te au apinga akatangi, kia riro ei aronga raverave, e kia tauturu i te aronga pakari na roto i tetai au mataara ke atu. E maata te angaanga no te akono i te Are Uipaanga Patireia e te tamā i te reira, no reira e pati putuputuia ana te au tavini tauturu kia rave i teia au apainga.

⁹ I roto i tetai au putuputuanga, penei ka tukuia na te au tavini tauturu ke ke e rave i te angaanga tataki tai. Tetai mai, e maata te angaanga ta tetai tavini tauturu ka akono. Tetai au turanga penei e maata atu te au tavini tauturu ka akono i tetai angaanga okotai. Me kare e rava ana te au tavini tauturu ei akono i tetai au apainga, penei ka tuku te pupu aronga pakari na tetai au taeake tukatau e rave i teia au angaanga. Me ikiia ratou ei tavini tauturu ka rauka ia ratou i te taangaanga i teia kite. Me kare e au taeake, penei e pati i tetai tuaine tukatau kia rave i tetai au mea noatu kare aia e ikiia kia riro ei tavini tauturu. Ko tetai taeake me kore tuaine tei tukatau, ka tau kia aruia tona akaraanga e te tu o tana akamorianga. Ka riro tana aere putuputu ki te au uipaanga, tana angaanga orometua, tona ngutuare tangata, tana au tamataora, tona kakau e te akamanea e te vai atura ei akaraanga meitaki ki tetai ke.

¹⁰ I roto i te au putuputuanga e tokoiti ua te aronga pakari, penei ka patiia tetai au tavini tauturu tukatau kia uriuri i te au uianga no runga i te apiianga tumu o te Pipiria ki te aronga ka papetitoia. Tei roto te reira i te Au Manako ke Mai “Tuanga 1: Au Irinakianga Kerititiano.” I roto i te “Tuanga 2: Oraanga Kerititiano” e mea tau na tetai tangata pakari e uriuri i teia.

¹¹ Mei tera taime ki tera taime, me e tumuanga tau tetai, penei e mea meitaki kia taui te pupu aronga pakari i tetai au apainga mei tetai tavini tauturu ki tetai. Inara, e meitaki atu kia vaoo i tera apainga na taua taeake rai e rave no tetai tuatau, kia tukatau e kia karape aia i te rave i te reira.

¹² Tei runga ua i te au anoano o te putuputuanga, penei e au apainga ke atu tetai ka tau kia orongaia na te au tavini tauturu tei kite pu uaia to ratou tupuanga i roto i te akarongo. (1 Timo. 4:15) Me kare e rava ana te aronga pakari, penei ka ikiia tetai tavini tauturu ei tauturu no tetai akaaere me kore no tetai pupu, e ka angaanga aia i raro i te aratakianga a te aronga pakari. Penei ka tukuia ratou kia akono i tetai au tuanga i roto i te Uipaanga Oraanga e te Angaanga Orometua, kia rave i te Apii Puka a te Putuputuanga me inangaroia, e kia oronga i te au akoanga na te katoatoa. Penei ka orongaia tetai au tikaanga ke mai ki te au tavini tauturu me anoanoia e me kua tau ratou no teia apainga. (1 Pete. 4:10) Me tauturu ratou i te aronga pakari, kia rave te au tavini tauturu i te reira ma te ngakau tae.

¹³ Noatu e tuke ta ratou angaanga mei ta te aronga pakari, e tuanga puapinga rai te reira i roto i te akamorianga a Iehova e no te akaaere meitaki anga i te putuputuanga. Te au taime ka aereia, me rave te au tavini tauturu i ta ratou apainga ma te tau e me tukatau kia riro ei au tiaki e te au puapii, penei ka ikiia ratou ei aronga pakari.

¹⁴ Me e taeake mapu ua koe me kore koi papetito ua akera, te tauta ra ainei koe kia riro mai ei tavini tauturu? (1 Timo. 3:1) No te mea e maata te tangata e aere mai nei ki roto i te akamorianga mou i te au mataiti, te anoanoia nei te au taeake tukatau ei akono i te au apainga a te putuputuanga. E tauta i te akatupu i te inangaro kia tauturu i etai ke. Tetai mataara i te rave i teia, e akamanako oonu no runga i to Iesu akaraanga meitaki. (Mata. 20:28; Ioa. 4:6, 7; 13:4, 5) Ka oonu atu toou inangaro, ia koe e kite ra i te mataora i te tauturu i etai ke. (Anga. 20:35) No reira kia oronga ua i toou taime i te tauturu i etai ke, te akono i te Are Uipaanga Patireia me kore, i te rave i tetai tuanga apii i roto i te Uipaanga Oraanga e te Angaanga Orometua. Te ō katoa maira te akatupu anga i te au tu Kerititiano na roto i te rave matau anga i taau uaorai apii Pipiria. (Sala. 1:1, 2; Gala. 5:22, 23) E tetai, te taeake e tauta ra, kia akaari aia i te tu tiratiratu e te akarongo mou me orongaia atu tetai apainga i roto i te putuputuanga.—1 Kori. 4:2.

¹⁵ Te akamanaanga i te au tavini tauturu, e raveia ana na roto i te vaerua tapu kia puapingaia te putuputuanga. Ei akaari i to ratou rekareka ngakau tae no te angaanga pakari a te au tavini tauturu, kia taokotai te au taeake e te au tuaine ki teia au taeake i te akono anga i ta ratou apainga. Na roto i teia mataara, te akaari ra te putuputuanga i to ratou rekareka maata no ta Iehova akanoonooanga aroa kia mako te akaaere anga i tona ngutuare tangata i roto i te akarongo.—Gala. 6:10.