Koman ou va fé mont k’ou aprésié la ranson ?

1-2. Kosa lo sakrifis Jézu i pous anou pou fé, é poukosa ? (2 Korintien 5:14, 15 ; agard osi lo zimaj).

MAJINE in moun la sov aou alor k’ou té koinsé sou in limèb dégrèné, kèl santiman ou noré pou li ? Mèm si ou té pa lo sèl moun ké la été sové, lé sur ou noré anvi alé oir ali par ou mèm, pou di ali mèrsi é k’ou va jamé oubli sak li la fé pou ou.

² Kom nou la vu dan lo sujé avan, nou la bézoin in moun pou libèr anou lo péché èk la mor. É sé sak Jéova la fé, li la done anou son Garson komsa li gingn 1) pardone anou nout bann péché, 2) done anou lèspoir vni parfé é 3) èd anou rotrouv in lamitié sanm li. É gras la ranson osi, nou néna lèspoir viv pou toultan dann monn nouvo. Vréman, la ranson i rapèl anou lamour ké Jézu néna pou nou. É li té èm domoun dopi bien lontan avan vni su la tèr (Prov. 8:30, 31). Lapot Pol la ékri ké « lamour lo Kris néna i oblij anou » (lir 2 Korintien 5:14, 15). Sa i vé dir ké nou doi fé mont nout rokonésans pou lamour ké Jézu néna pou nou, é ké jamé nou va oubli sak li la fé.

3. Poukosa pétèt la fason ou va fé mont out rokonésans pou la ranson, sra pa parèy k’in not ?

³ Kosa ou va fé pou fé mont out rokonésans pou la ranson ? Sak ou va fé sra pa parèy sak in not. Pou konpran sa, majine troi moun i doi alé lo mèm landroi, mé ké chakèn i sort pa dan lo mèm vil. Lé normal ké zot va pa pran lo mèm chemin. Lé parèy, “ousa” ou vé alé ? Ou vé fé mont ké ou aprésié la ranson. Mé pou ariv la, nout tout va pa pran lo mèm “chemin”. Dann sujé-la, nou va oir koman fé mont nout rokonésans si nou lé : 1) in létudian la Bib, 2) batizé, oubien 3) in moun k’i sèrv pu Jéova pou linstan.

BANN ZÉTUDIAN LA BIB

4. Kosa Jéova i rosan pou bann zétudian ?

⁴ Si ou la aksèp in létud la Bib, sa i fé mont ké Jéova i vé k’ou dévien son kamarad, é li vé èd aou pou fé sa (Jan 6:44 ; Akt 13:48). Jéova i oi sak néna dan out kèr. Sa i vé dir ké li romark bann zéfor ou fé pou aprann konèt ali. É kan ou fé bann chanjman pou fé plézir ali, sa i kontant son kèr (Prov. 17:3 ; 27:11). Si jordi ou gingn très in lamitié sanm Jéova, sé gras la ranson (Rom. 5:10, 11). Sa sé in pa in ti zafèr, oubli pa sa !

5. Koman bann zétudian la Bib i pé mèt an pratik sak i di dann Filipien 3:16 ?

⁵ Koman aou, ké lé in létudian la Bib, ou pé fé mont k’ou aprésié la ranson ? In fason d’fé, sé suiv lo konsèy ké Pol la done bann Filipien : « Antouka, k’inport bann progré ké nou la fé, kontinié march droit dan lo mèm sans » (Fil. 3:16). Donk, lès pa rien ni pèrsone anpèch aou fé zéfor pou kontinié avansé su lo chemin la vi (Mat. 7:14 ; Luk 9:62).

6. Kosa bann zétudian i pé fé kan zot i trouv difisil fé bann chanjman ? (Détéronom 30:11-14 ; agard osi lo zimaj).

⁶ Pétèt na poin lontan ou la vu in zafèr dan la Bib té difisil pou ou aksèpté. Alor, kosa ou pé fé ? Fé rochèrch ladsi é pri Jéova pou èd aou mié konpran (Ps. 86:11). Si ou trouv toujour difisil pou konpran, mèt sa su koté pou linstan, mé arèt pa out létud. É si ou gingn pa arèt fé in zafèr ké Jéova i èm pa ? Oubli pa, Jéova va jamé domand anou fé in nafèr nou gingn pa fé. Ou lé kapab fé plézir ali (lir Détéronom 30:11-14). É Jéova i promèt ké li va èd aou (Izai 41:10, 13 ; 1 Kor. 10:13). Alor, larg pa lo kor. Kinport bann difikulté ou va pas dédan, rès kalé su tout bann gayar zafèr Jéova la fine fé pou ou, kom par égzanp la ranson. Plis out lamour pou Jéova va grandi, plis ou va konpran ké « son bann komandman lé pa lour pou porté » (1 Jan 5:3)a.

7. Dési kosa bann jèn la grandi dan la vérité i pé réfléchi ?

⁷ É azot jèn ké la grandi dan la vérité ? Azot osi zot lé bann zétudian la Bib. An vré, sé zot bann zétudian la Bib lo pli inportan pou zot papa momon. La Bib i di : « Kos koté Bondié, é li va kos koté zot » (Jak 4:8 ; 1 Kron. 28:9). Kan ou désid fé zéfor pou kos koté Jéova, ali osi li va fé bann zafèr pou kos koté ou. Si Jéova i fé in kont èk ou, sé parské li vé ou dévien son kamarad, é pa parské ou la grandi dan in famiy témoin Jéova. Kosa Jéova la fé pou ké ou gingn vni son kamarad ? Oubli pa, li la done aou in kado èspésial : la vi son Garson (Rom. 5:1, 2). Donk avan alé Mémoryal sèt ané, pran lo tan réfléchi su sak la mor Jézu i vé dir pou ou ! Réfléchi osi su sak ou vé fé pou di mèrsi Jéova é koman ou va amèn out vib.

SAK LÉ BATIZÉ

8. Koman sak lé batizé la fé mont zot néna la foi dan la ranson ?

⁸ Si ou lé déja batizé, lé sur k’ou la déja fé mont plizièr foi out foi dan la ranson. Par égzanp, ou la fé bann chanjman dan out vi pou fé plézir Jéova é pou très in lamitié sanm li. Ou la obéi lo komandman Jézu alé prèch lo gayar nouvèl é fé bann disip. Ou la of out vi Jéova é ou la fé batiz aou. É pétèt mèm la fine maltrèt aou parsk’ou sèrv Bondié (2 Tim. 3:12). Mé ou la kontinié rès fidèl Jéova, é sa i fé mont k’ou èm ali é k’ou lé rokonésan pou la ranson (Ébré 12:2, 3).

9. Kosa sak lé batizé i doi fé atansion ?

⁹ Anou ké lé batizé, fo nou fé atansion in nafèr. Èk lo tan, nou pouré oubliyé poukosa la ranson lé inportan. Koman sa lé posib ? Gard kosa la ariv bann krétien Éfèz. Zot té tienbo for é Jézu la félisit azot pou sa. Mé sèlman, li la di azot : « Mi néna sa kont ou : sé ké ou la pèrd lamour ou navé dann promié débu » (Rév. 2:3, 4). Jézu té vé dir k’i pé arivé k’in krétien i mèt pu lo kèr pou ador Bondié. In moun i pouré priyé, alé la sal, é prèché jus parské li lé abitié fé sa é pu par amour. Kosa ou pé fé si ou rand aou kont ké out lamour pou Jéova lé pu osi for k’avan ?

10. Koman ou pé fé atansion la kalité out ladorasion é mèt tout out kèr la ddan ? (1 Timoté 4:13, 15).

¹⁰ Lapot Pol la di Timoté fé atansion la kalité son ladorasion é mèt tout son kèr la ddan (lir 1 Timoté 4:13, 15). Lé parèy pou ou, réfléchi su sak ou pé fé pou kontinié done paké ankor plis pou ador Jéova (Rom. 12:11). Par égzanp, ou pé pran lo tan pou mié prépar out bann rénion, é sa va èd aou konsant aou plis kan ou lé la sal. Oubien pétèt kan ou fé out létud pèrsonèl, ou pé trouv in ti landroi trankil komsa sra plis fasil pou ou réfléchi su sak ou aprann. Sa va èd aou aprésié ankor plis out létud. Pou ké dofé i kontinié flanbé, fo rajout doboi dédan. Lé parèy, ou doi kontinié mèt out kèr dan bann bon zabitud-la, komsa ou va gingn aprésié la ranson, mé osi tout sak Jéova la fine fé pou ou. Donk, avan Mémoryal i ariv, akoz ou prandré pa lo tan réfléchi su tout bann gayar zafèr nou néna antank Témoin Jéova ? Lé sur, sa va èd aou aprésié ankor plis la ranson parské sé sa mèm i èd aou très in lamitié sanm Jéova.

11-12. Si ou la arèt done lo grin pou sèrv Jéova, èské sa i vé dir li la arèt done aou son lèspri sin ? Di poukosa (agard osi lo zimaj).

¹¹ Si i ariv ké ou done pu lo grin kom avan pou sèrv Jéova, pèrd pa kouraj ! Sa i vé pa dir ké li la arèt done aou son lèspri sin. Rapèl aou, lapot Pol la di èk bann Korintien, ké mèm li, nadfoi li té fors ali pou prèché. Mé li té sava kan mèm, parské li té koné té sak li té doi fé (1 Kor. 9:17). Kosa li té vé dir par la ?

¹² Nadfoi Pol navé pa anvi alé prèché. Pourtan, li té bien désidé pou alé prèché kan mèm. Aou osi, ou pé fé kom Pol. Mèm si i ariv ou la pa anvi fé sak Jéova i domand aou, fors aou fé sak lé bien. Donk, ézit pa priyé pou aoir « lanvi é la fors pou aji » (Fil. 2:13). Kontinié fé bann zafèr ké va èd aou rès kosté koté Jéova. Ou pé èt sur ké èk lo tan, out lamour pou Jéova va rovni pli for é ou va rokomans done lo grin.

13. Koman nou pé fé pou konèt ké nou « lé dan la foi » ?

¹³ Tanzantan, lé bien nou analiz anou nou mèm, kom Pol i di dann 2 Korintien 13:5 : « Kontinié réfléchi su zot mèm pou oir si zot lé dan la foi ; kontinié gardé kisa zot i lé vréman ». Par égzanp, nou pé domand anou : « Èské dan mon vi, i oi ké mon ladorasion pou Jéova sé sak lé lo pli inportan ? » (Mat. 6:33) ; « Èské dan mon bann lamizman i oi ké mi détès lo mal ? » (Ps. 97:10) ; « Èské mi fé an sort ké tout domoun lé an pé é uni dan lasanblé ? » (Éféz. 4:2, 3). Lo Mémoryal, sé lo bon moman pou analiz anou. Kan nou majine tout sak Jéova é Jézu la fé pou nou, nou la anvi di mèrsi nout Bondié é fé mont ké nou viv pou Jézu é pa pou nou mèmc.

SAK I SÈRV PU JÉOVA POU LINSTAN

14. Akoz détroi krétien la arèt sèrv Jéova pou linstan ?

¹⁴ Désèrtin frèr é sèr la arèt vni la sal, é sa mèm si zot la sèrv Jéova pandan in bonpé d’zané. Poukosa ? Détroi, sé akoz « traka la vi » (Luk 21:34). Na dot, sé akoz sak in frèr ou in sèr la di ou la fé (Jak 3:2). Na in pé la fé in péché grav é zot la ont domand lèd. Kinport sak la arivé, kosa ou pé fé mèm si ou sèrv pu Jéova pou linstan ? Kosa la ranson èk lamour Jéova é Jézu i pous aou pou fé ?

15. Koman Jéova i mont ké li fé toujour in kont èk sak i sèrv pu li pou linstan ? (Ézékièl 34:11, 12, 16).

¹⁵ Majine bann santiman Jéova pou sak i sèrv pu li pou linstan. Li bord pa banna su koté é li oubli pa banna. O kontrèr, li sa rod bann brébi ké la pèrd. Li done azot manjé é li èd azot artourn koté li (lir Ézékièl 34:11, 12, 16). Èské Jéova i pé fé parèy pou ou ? Mé oui ! Jus parské ou lé antrinn lir sujé-la, sa i fé mont k’ou vé toujour fé plézir ali. Jéova la vu bann bon zafèr dan out kèr, é li la déja ral aou inn foi koté li. Jordi, li oi toujour bann bon zafèr dan out kèr. Alor, èské ou pans pa li vé ou artourn koté li ?

16. Kosa i pé èd sak i sèrv pu Jéova pou linstan ? (agard osi lo zimaj).

¹⁶ Lo ti brochur Reviens à Jéhovah i di komsa : « Ou pé èt sur ké Jéova sra la pou èd aou dan out bann zéfor pou artourn koté li. Li va done aou la fors pou sobat kont bann traka la vi. Si in moun la blès aou, li va èd aou pas pardsi. Li va pardone aou é li va soulaj out kèr. Lé sur, ou va artrouv lo gou sèrv Jéova ansanm out bann frèr é sèr. » Rapèl aou osi, ké bann zansien lé toultan paré pou èd aou. Zot i pé èt « kom in kachièt kont lo van, in landroi sur kont mové tan » (Izai 32:2). Nou koné ou lé rokonésan pou la ranson, é ké ou vé fé mont sa Jéova. Donk domand aou : « Kosa mi pé fé pou ‘armèt lord’ ant Jéova é moin ? » (Izai 1:18 ; 1 Pièr 2:25). Par égzanp, èské ou pé arvni fé in tour la sal ? Èské ou pé alé koz èk in zansien, pou k’i èd aou artourn koté Jéova ? Pétèt li pé fé an sort k’in moun i fé létud pou ou pandan in tan. Ou pé èt sur, Jéova va béni tout bann zéfor ou fé pou artourn koté li. Li va osi béni sak ou fé pou fé mont out rokonésans pou la ranson.

KOSA OU VA FÉ ?

17-18. Koman nou pé bien ansèrv nout tan avan Mémoryal sèt ané ?

¹⁷ Jézu la di ké Jéova la anvoy ali pou done son vi « komsa tout domoun i fé mont la foi an li, i sra pa détrui, mé va gingn viv pou toultan » (Jan 3:16). Kom Jézu la done son vi pou nou, Jéova i pé libèr anou lo péché èk la mor. Nou voudré jamé pèrd nout rokonésans pou sa (Rom. 3:23, 24 ; 2 Kor. 6:1). Kan Mémoryal pa loin arivé, sa lé in bon moman pou réfléchi su tout lamour ké Jéova é Jézu néna pou nou. Zot lamour i dévré pous anou pou fé mont azot nout rokonésans.

¹⁸ Kosa la ranson va pous aou fé ? Sak ou va fé sra pa parèy sak in not. Ou pé èt sur, Jéova va béni tout son bann sèrvitèr k’i fé zéfor pou arèt ‘viv rienk pou zot mèm, mé pou sak lé mor pou zot’ (2 Kor. 5:15).