Koz d’in joli manièr dési la vérité

1. Kosa nou doi fé pou fé parti la famiy Jéova ?

KAN nou fé konésans èk in frèr ou in sèr, souvandéfoi lo promié kèstion nou poz ali sé : « Koman ou la konèt la vérité ? » Désèrtin va répond ké zot la « grandi dan la vérité ». Na dot va di ké i fé pa lontan zot « lé dan la vérité ». Nou répond komsa parské la vérité dan la Parol Bondié i gid nout vi. Akoz ? Parské pou fé parti la famiy Jéova, i fo nou fé mont ké nou èm la vérité é ké nou mèt ali an pratik dan nout vi. Sa i vé dir èt onèt dan nout kozé é dan nout fason d’fé (Ps. 15:1-3).

2. a) Koman domoun té oi Jézu ? b) Kosa Jézu la di su la fason domoun noré réaji par rapor la vérité ?

² Toultan Jézu té di la vérité. É mèm si pa toultan zot té dakor èk li, son bann zènmi la rokonèt ké li té onèt (Mat. 22:16). Jézu lavé prévni son bann disip koman domoun noré réaji kan zot noré antand la vérité li té prèch. Li la di : « Ma la vni mèt dézakor ant lo garson é son papa, ant la fi é son momon, é ant lo bèlfi é son bèlmèr » (Mat. 10:35). Jézu té vé domoun té aksèp la vérité, mé li té koné té sa pa èspas komsa (Mat. 23:37). Néna noré èm la vérité, é néna noré détèsté (2 Tés. 2:9-11).

3. Kosa nou sa oir dann sujé-la ?

³ Kom Jézu, nou fé zéfor pou èt onèt é nou ramas pa mantèr mèm si akoz sa, domoun i èm pa nou. É mèm si désèrtin lé pa dakor èk nou, nou kontinié prèché é nou amont sak la Bib i di. Èské sa i vé dir kan nou doi di la vérité, nou va anvoy sa kom la arivé ? Surman pa ! Dann sujé-la, dabor inn, nou va répond kèstion-la : Ousa nou pé trouv la vérité ? Aprésa nou va oir : poukosa, koman é kansa i fo koz su la vérité ? Sak nou va aprann va èd anou koz d’in pli joli manièr kan nou di la vérité, é sa, o moman k’i fo.

OUSA NOU PÉ TROUV LA VÉRITÉ ?

4. Akoz nou pé di ké la vérité i sort koté Jéova ?

⁴ La vérité i sort koté Jéova. Tout sak li di lé vré. Par égzanp, kan li di kosa lé bon é kosa lé pa bon, li tronp ali jamé (Ps. 19:9 ; 119:142, 151). Tout sak li di su lavnir lé vré (Izai 55:10, 11). Jéova i koz pa dann vid kan li fé in promès (Nonm 23:19). An vré, Jéova i gingn pa ramas mantèr ! (Ébré 6:18). Donk, lé normal k’i apèl Jéova lo « Bondié la vérité » (Ps. 31:5).

5. Akoz lé pa difisil aprann konèt lo « Bondié la vérité » ? (Akt 17:27).

⁵ Na détroi moun i di ké lé difisil aprann konèt Jéova, lo « Bondié la vérité ». Mé zot na tor ! Parské néna in bonpé prèv otour d’nou k’i amont ké Bondié i égzis (Rom. 1:20). Laba Atèn, kan li té pou koz èk bann grèk ké la parti loin lékol, Pol la di ké Bondié i vé nou « trouv ali » é ké « li lé pa loin chakèn an parmi nou » (lir Akt 17:27). Sé pou sa, Jéova i atir sak néna limilité é i rod la vérité dési li (Jan 6:44).

6. Kèl vérité nou trouv dan la Bib, é ou, poukosa ou aprésié konèt bann vérité-la ?

⁶ In fason pou aprann konèt Jéova, sé étudié la Bib. Sé lèspri sin Bondié la pous bann bonom ékri la Bib (2 Pièr 1:20, 21). Donk, tout sak néna dan la Bib lé vré é nou pé aoir konfians an li. Par égzanp, kan li koz su lo komansman lunivèr é koman la vi la arivé, nou pé aoir konfians (Jén. 1:1, 26). É nou pé kroir osi, kan li di poukosa nou pèch, nou souf é nou mor (Rom. 5:12 ; 6:23). Nou pé vréman kroir kan la Bib i di ké Jéova va utiliz son Garson pou répar tout bann déga ké Satan, « lo papa la mansonjri », la fé (Jan 8:44 ; Rom. 16:20). Nou pé kroir osi kan la Bib i promèt ké Jézu va détrui bann méchan, rolèv bann mor, répar la tèr é èd anou vni parfé (Jan 11:25, 26 ; 1 Jan 3:8). Sa lé vréman in gran lonèr ké Jéova la done anou ! Li la amont anou la vérité é li utiliz anou pou amont sa lé zot (Mat. 28:19, 20).

POUKOSA NOU DI LA VÉRITÉ

7-8. Kosa i doi pous anou di la vérité ? Done in légzanp (Mark 3:11, 12 ; agard osi lo bann zimaj).

⁷ Kom nou la vu avan, i fo pa nou ramas mantèr si nou vé fé parti la famiy Jéova. Parkont, pou fé plézir ali nou doi fé plis ké sa. Sé sak i pous anou di la vérité k’i kont pou Jéova. Gard kosa la èspasé kan Jézu té pou prèché (lir Mark 3:11, 12). Kan li té koté la mèr Galilé, navé in foul domoun otour d’li. An parmi navé bann domoun navé zèspri dési zot, banna la tonb dovan li é banna té i kri : « Aou mèm lo Garson Bondié. » Akoz bann démon té di la vérité su Jézu ? Pétèt sak zot té vé sé ké domoun i fé azot konfians, komsa apré zot té gingn anpèch banna sèrv Jéova. Sak bann démon la di té la vérité, mé zot lintansion té mové. Jézu té pa bèt é sa la pa fé plézir ali. Aprésa, li la intèrdi azot koz su li.

⁸ Kosa zistoir-la i aprann anou ? Sé sak i pous anou di la vérité lé inportan pou Jéova. Donk, kan nou amont la vérité dési Jéova nou fé sa parské nou èm ali. É kan nou fé sa, si domoun i mèt anou anlèr, oubli pa sé Jéova nou doi done la gloir ! (Mat. 5:16 ; agard Akt 14:12-15).

9. Kosa nou dévré évit fé, é akoz ?

⁹ Alon oir in not situasion ousa nou doi évit mèt anou anlèr. Majine in frèr rèsponsab i koz èk nou é i done anou in linformasion ké nou doi gard pou nou, é anou, nou sa fane sa partou èk dot. É pli tar, si banna i rand azot kont ké sak nou la di azot té vré, riskab zot va mèt anou anlèr parské zot va kroir ké nou koné in ta zafèr sékré. Nou pouré briy dovan lé zot mé pa dovan Bondié (Prov. 11:13). Akoz ? Déja inn, mèm si sak nou la di té vré, nou la parti koz su in nafèr nou navé poin lo droi kozé. Mé an plis ké sa, sa i fé mont ké nout lintansion té mové.

KOMAN DI LA VÉRITÉ

10. Kosa i vé dir « toultan janti » dann Kolosien 4:6 ?

¹⁰ (Lir Kolosien 4:6.) Lapot Pol la rapèl bann krétien Kolos ké zot kozé té doi èt « toultan janti ». Kosa sa i vé dir ? Dan la lang grèk, sa té vé dir ké nout kozé i doi pa sèlman fé lo bien lé zot, mé li doi osi èt janti é done lé zot lanvi ékouté.

11-12. Poukosa i fo nou fé atansion kan nou koz su la vérité ? Done in légzanp (agard osi lo bann zimaj).

¹¹ Kom Pol la di i fo nou lé janti kan nou koz su la vérité èk lé zot. La Bib i konpar la vérité èk in lépé égizé k’i sépar lam èk lèspri. Sa i vé dir ké la Bib i fé sort sak néna vréman dan nout kèr (Ébré 4:12). Mé si nou utiliz pa bien la Bib, nou pé blès in moun ou mèt problèm la ousa la pa bézoin. Koman sa i pé arivé ?

¹² Majine ké dann prédikasion, nou la trouv in moun sinsèr k’i pri bann zimaj é k’i èm fèt Noèl èk Pak sanm son famiy. Nou pouré ansèrv la Bib pou mont ali k’i sèrv pa rien pri bann lèstatu, é ké Noèl èk Pak lé pa dan la Bib (Izai 44:14-20 ; 2 Kor. 6:14-17). Si nou di sa lo promié foi nou oi ali, lé vré, nou va di la vérité, mé nou va pa bien ansèrv la Bib.

13. Koman nou pé asézone nout kozé ?

¹³ Pol la di osi ké nou dévré fé an sort ké sak nou di, i doi èt bon kom in kari bien asézoné. Sa i vé pa dir ké nou doi kachièt ou aranj la vérité. Olèrk sa, li la ankouraj anou pou asézone nout kozé komsa li lé bon pou sak i ékout anou (Job 12:11). Fé sa, lé pa fasil. Si nou pran légzanp in bon kari, pétèt nou pouré pans ké tout domoun va èm nout fason asézoné. Lé parèy, nou pouré pans ké nout fason kozé i pas èk tout domoun. Mé lé pa vré. Par égzanp, dann désèrtin zandroi, na domoun na labitid koz fran, é sa, mèm èk domoun pli vié ké zot. Dan dot zandroi, sa i pas pa, parské sé in mank rèspé. Pol la di k’i fo nou koné ‘koman nou doi répond chak moun’. Sa i vé dir ké nou doi asézone nout fason kozé, pa dapré nout kiltir oubien nout préférans, mé dapré sak lé zot.

KANSA FO DI LA VÉRITÉ

14. Kan li té su la tèr, èské Jézu la amont tout zafèr son bann disip ? Di poukosa.

¹⁴ Kan li té koz èk son bann disip, Jézu té janti é li la amont banna in bonpé zafèr (Mark 6:34). Mé zot lavé ankor in bonpé zafèr pou aprann. Jézu la pa ésèy amont azot tout sak li té koné. Li té koné zot bann limit. Li té konpran ké té pa lo bon moman pou zot konèt désèrtin vérité. Sé pou sa li la di azot : « Pou lo moman zot i pé pa konpran » (Jan 16:12). Kosa sa i aprann anou ?

15. Èské nou doi bonbard nout bann zétudian èk tout sak nou koné ? Di poukosa (Provèrb 25:11 ; agard osi lo zimaj).

¹⁵ Légzanp Jézu i fé mont anou ké lé pa parské nou koné la vérité ké nou doi bonbard nout létudian èk tout sak nou koné. Koman légzanp Jézu i pé èd anou ? Nou doi pran an kont la situasion chak moun. Alon ropran légzanp lo mésié k’i èm fèt Noèl èk Pak ansanm son famiy. Nou koné ké la Bib i koz pa dési bann fèt-la é ké Bondié lé pa dakor èk sa. Mé majine k’ou la komans étudié la Bib èk mésié-la rienk inn ou dé somèn avan Noèl. Èsk’i sré janti ké nou atand dé li ké li arèt fèt Noèl toutsuit, parské nou la amont ali ké sa lé pa dan la Bib ? Lé vré, i ariv ké néna détroi zétudian i mèt an pratik toutsuit sak zot la aprann. Mé pou dot, va pran plis lo tan pou fé bann chanjman. Nou pé èd nout bann zétudian fé bann chanjman, si nou di azot sak zot la bézoin konèt o bon moman, sétadir kan zot lé kapab konpran (lir Provèrb 25:11).

16. Koman nou pé èd nou bann zétudian « kontinié viv dapré la vérité » ?

¹⁶ Na poin bonpé zafèr k’i gingn done anou la joi kom èd in moun konèt Jéova. Nou pé èd azot « kontinié viv dapré la vérité » si nou kontinié èt in bon légzanp pou zot (3 Jan 3, 4). Donk, fé ansort ké out fason d’viv i mont ké ou kroi bann promès ké néna dan la Bib. Di la vérité èk in bon lintansion. Kan ou koz dési la vérité, koz d’in joli manièr, é pou sa, i fo out kozé lé bien janti é di o bon moman. É pou fini, done Jéova la gloir kan i rod pou mèt aou anlèr. Si ou fé sa, ou va fé mont ké Jéova, lo Bondié la vérité, sé out Bondié.