O ľil le Hebrejenge

10 O Zakonos ča sikavel* pre oda lačho, so majinel te avel, aľe na mišľinel pes oda savoro lačho, so o Del sľubinďa. Vaš oda o manuša našťi ole istone obeťenca, save sako berš anen, keren olendar, save služinen le Devleske, kajsen, save kampel, kaj te en.* 2 Či bi pes na preačhiľahas te anel o obeťi? Sem ola, so ala obeťi anen, bi enas žužarde* a avka bi aňi na džanenas, hoj keren binos. 3 Aľe avka oda nane. Bo kale obeťenca pes o bini sako berš leperen. 4 Na del pes, kaj o rat le bikengero the le capengero te odčhivel o bini.

5 Vaš oda, sar o Kristus avľa pre phuv, phenďa le Devleske: „ ‚Obeť the o dari pre obeť na kamľal, aľe pripravinďal mange ťelos. 6 Na sas tut radišagos le obeťendar, save pes labarenas pre jag aňi le obeťendar vaš o binos.‘ 7 Avka leske phenďom: ‚Adaj som, avav (pisinel pes pal mande andro zvitkos), kaj te kerav oda, so tu kames Devla.‘ “ 8 Avka peršo phenďa: „O obeťi the o dari, save pes denas pre obeť, o obeťi, save pes labarenas pre jag the o obeťi vaš o binos na kamľal aňi tut lendar na sas radišagos.“ Ala obeťi pes anen avka sar phenel o Zakonos. 9 Paľis phenďa: „Adaj som, avav, kaj te kerav oda, so tu kames.“ Ov kerel, kaj te preačhel te el platno koda purano* a kaj te el platno koda nevo.* 10 Kaleha, so „o Del kamľa“, pre amende dikhel sar pro svata prekal o ťelos le Ježišoskero Kristoskero, savo diňa sar obeť a adi obeť diňa jekhvar pro furt.

11 A mek ke kada dojekh rašaj sako ďives mušinel te kerel peskeri buťi predal o Del a pale a pale te obetinel ola ista obeťi, save ňigda našťi odčhiven o bini pro furt. 12 Aľe o Kristus pro furt obetinďa jekh obeť vaš o bini a bešľa peske paš e Devleskeri pravo sera. 13 Akorestar užarel, medik* leske na ena thode tel o pindre savore, so pre leste džan. 14 Bo jekha obeťaha kerďa, kaj pro furt te en dokonala ola, pre save o Del dikhel sar pro svata. 15 Phenel amenge oda the o Del prekal peskero svato duchos, bo peršo vakerel: 16 „ ‚Adi hiňi e zmluva, savi lenca kerava sar predžana ala ďivesa,‘ vakerel o Jehovas.* ‚Mire zakoni lenge sar te bi thovava andre goďi a pisinava andre lengero jilo.‘ “ 17 A paľis mek phenel: „Pre lengere bini the pre oda nalačho, so kerenas, mange imar ňigda na leperava.“ 18 Odoj, kaj hine o bini odmukhle, imar na kampel te anel obeť vaš o binos.

19 Phralale, prekal o Ježišoskero rat šaj džas bije dar sar te bi andro svato than le dromeha 20 prekal o zavesis. Ov amenge phundraďa* sar te bi nevo drom, savo ľidžal ko dživipen. Kale zavesiha pes mišľinel leskero ťelos. 21 Vaš oda, hoj hin amen igen lačho rašaj upral o Devleskero kher, 22 ta džas te služinel le Devleske calone jileha, zorale paťavibnaha, mi el amen žužo jilo, lačho svedomje a o ťelos mordo* andro žužo paňi. 23 Kaj chočso te el, zorales amen ľikeras olestar, hoj savorenge na preačhas te vakerel pal amari naďej, bo koda, savo diňa o sľubos, hino verno. 24 Rozmišľinen jekh pal aver, so predživen, kaj te presikavas buter kamiben a kaj te avas lačhe jekh ke avreste. 25 A na mukhas avri amare zhromažďeňa avka sar oda hin varesaven andro zvikos, aľe podhazdas jekh avres a oda mek buter te dikhen, hoj le Devleskero ďives hino pašes.

26 Te mištes prindžarďam o čačipen a the avka narokom keras bini, ta nane imar ňisavi obeť, savi pes šaj del vaš amare bini. 27 Aľe ča užaraha la daraha pro trestos a tiš užaraha pre choľi, savi labol sar jag, savi zňičinela olen, save džan proťi o Del. 28 Te peske vareko na kerel ňič le Mojžišoskere zakonostar, ňikaske pre leste na ela pharo, sar ela odsudzimen pro meriben, te pal oda phenena duj abo trin džene. 29 Akana rozmišľinen o so bareder trestos užarel oles, ko pre le Devleskero čhavo dikhel sar pro rukono* a odčhivel les pestar! Oles, predal savo hino leskero rat sar vareso običajno, o rat, savo hino sar e zmluva, savaha hino pošvecimen! A oles, savo na presikavel bari paťiv le Devleskere svatone duchoske, prekal savo o Del del peskero baro lačhipen! 30 Sem prindžaras oles, savo phenďa: „Pre mande hin, kaj te dav pale a me visarava vaš koda nalačho, so on keren,“ a tiš phenel: „O Jehovas* sudzinela peskere manušen.“ 31 Savi oda bari dar anel te perel andro vasta le džidone Devleske.

32 Ma bisteren pre oda časos, sar sprindžarďan o čačipen. Ľikerďan avri andre kada pharo mariben, sar zadživenas o trapišagos. 33 Varekana tumenge o manuša angle savore rakinenas a sas ke tumende bijo jilo. Varekana tumen pomožinenas olenge, so kada zadživenas. 34 Presikaďan o jilo le phralenge, save sas andre harešta.* A sar tumenge o manuša ile savoro, so tumen sas, nanašaďan o radišagos, bo džanenas, hoj oda, so tumenge o Del diňa, hino feder a ľikerela oda pro furt.

35 Vaš oda bije dar* dureder vakeren, bo te avka kerena, chudena bari odmena. 36 Aľe kampel tumenge, kaj te džanen te ľikerel avri, kaj te keren oda, so o Del kamel a avka chudena oda, so tumenge o Del sľubinďa. 37 Bo imar „ča čeporo“* a „koda, savo avel, avela a na avela nasig“. 38 „Aľe miro služobňikos, savo kerel oda, so hino lačho,* dživela, bo paťal“. „Aľe te daratar džal mandar het, na radisaľuvav lestar“. 39 Aľe amen na sam sar ola, so džan het le Devlestar a ena zňičimen, aľe sam sar ola, saven hin paťaviben a zachraňinena peske o dživipen.